Keluaran 25 - Eipomek

Allah el si Yahweh arye, “Na si eren aik don ning ati, delinamlume,” nyabuk yupu

¹ Allah el si Yahweh arye, Musa biti nyabuk.

² Ance, sik Israel nang nirya ati nyapnulyame. “Allah arye nyapsile. ‘Anggunce aning-aning nirya bulubuka, na si erena ati, teleb aren ning bulubuka, na Allah dam boyanganamnyake,’ nyapmasile, nyapdeipnulyame. Ara, yata nang do nirya, sik talima noutam arye, ‘Aning ara, na ni Allah ati winibuka arepnune,’ tenebikce ning ara, nati adiparyuk, arelyanganamninyake.

³ Ara, urasin pia teleb kat deken ning, el si ara, emas ap, namin deken ning el si ara, perak ap, tonda, kat ning el si ara, tembaga ap, aning nirya boyanuka, arelyanganamninyake.

⁴ Tonda, urasin pia teleb kain, el si ara lenan ap, kain win tapu, el si ara, wol ap arelyanganamake. Ara, lenan kain ap, wol tapu warna biru ap, warna unggu ning ap, ining bi ning warna merah ap, arelyanganamake. Tonda, Kambing potong arye wibik baju ap, boyanuka arelyanganamake.

⁵ Tonda, yim kambing basam obuka, bola kobuka, ining bi ning likiamikce ning ap, tonda laut mek kwen pum noutam ulamle ning, el si lumba-lumba, el bola namin teleb ning ap, tonda akasia yo ap, arelyanganamake.

⁶ Tonda, upna lana ati minyak mek ap, weik sum deice nintong teleb nyana ati, minyak mek ton arelyanganamake. Ara, na pil dona ati, ninye wibuka delin talak, sik kisok deice dikilongonamak minyak mek, nintong teleb ning, el si rempah-rempah ap, tonda nintong teleb ning bukni, uku dongonyak ning, el si dupa ton arelyanganamake.

⁷ Tonda, urasin pia teleb dekna weik keil, el si Krisopras, aning ara, imam el taram deice ongolul ning bukni, takunya dam taplakuka delinamake. Tonda, yuk dekna weik urasin teleb keil ton, tabakuka arelyanganamake. Ara, na si erebuka kina ati, teleb aren ning arena ati, weik deiyoknye, imam Agung birye, el nong deice ongolul kain lenan baju ap, tonda anye taram deice ting atonun ongolul ning ap, el si Efod ap, adekna weik keil dobuka, adeice akeil taplakuka delinamaka ati nyapsine.

⁸ Aning nirya akunum winibikcopura, ance sik Israel nang ati nyapmimba, na unamne tia doltakan tenda aik, pia teleb aik dopnamniyake. Winibikcopura, sik melina ati, na Allah arye, sik kan-kan noutamuk, tia talak ati, anyaik pum tam yanmana, binmana kinamne. Anggun ap, neika unamaba atia.

⁹ Na aik dopnunikce talak ara, narye anti, ‘Aning atonun wipnulyame,’ laka nyapdeipnamkin touk, winibuka dopnamninyake. Ara, anyaik ap, anyaik pum tam delinamak ning nirya ap, anyaik don ning yuk-yuk ning nirya ap ara, narye tenepnirye, ‘Na si eren aik dona ara, aninguk winipnamlume,’ nyabuka, laka nyapdeipnamsin ninguk, lyom kain ap, yuk teleb ning ap arye, natia tenda aik dopnamnulume.

Allah nyapdeiamuk yupu, Peti Perjanjian marikna yo pum libuka delina ati, nyabuk yupu

¹⁰ Akasia yo lakase moubuka mememunce, peti yo dobuka, marikna atonun kintinipnamlume. Apeti yo pum memena ati ara, el cang ati kiklilena ara, 110 sentimeter kiplyopura, moubuka dopnamlume. Tonda, el pala anerye eitam ap, uapce dipdongobuka asukum tikilinak ap, kiklilena ati ara, atonun 66 sentimeter upnamle.

¹¹ Adopnamlum Peti Perjanjian yo ara, ‘El urasin teleb upnamleʼ tenen, pum tam babye, bol bai tam babye nirya ara, urasin pia teleb kat deken ning, el si ara emas, pia teleb ning dobuka, amarikna deice taplak deipnamlume. Aning emas memepnamlum talak ara, yuk kat ning ton tabakna kume. Emas, pia teleb lek ninguk memepnamlume. Tonda, ayo Peti Perjanjian kup-kup tam urasin teleb una ati, yo puturubuka delinamak ning, el si ara bingkai babye, emas dobuka, aning deice taplak deipnamlume.

¹² Amarikna yo puturupmunyopura, el barwu, dana-dana yuk-yuk, ton tam bitinye, ton tam bitinye, tounedama wilamaka atonun ubuka, kat dekna weik ning, emas arye memepmunce, bisik yuk-yuk botopdeipnamlume. Akintinipnamlum bisik ara, cang yo dongobuka, amarikna pum peti bobana ati, kintinipnamlume.

¹³ Apeti yo, cang yo bobana ati, memepnamlum yo ara, yo si akasia yo aryuk dobuka memepnamlume. Amemepdeipnamlum yo deice ara, urasin teleb una ati, kat dekna weik ning, el si ara, emas aryuk taplak deipnamlume.

¹⁴ Peti yo akunum kintinipmunyopura, peti yo barwu dana-dana toupnedama atonun ubuka, emas arye cincin bisik atonun, memep deipmamunyak uk, acang yo dobuka, abisik dongopnamlume. Ara, apeti yo pum bobana ati nyapsine.

¹⁵ Ayo peti marikna, el si Peti Perjanjian dana-dana tam, cincin bisik atonun ubuka, emas arye memepmamunye bisik ara, acang akasia yo akunum dopmunyopura, tuba ton kum kulonamlume. Acang yo ara, abisik-abisik pum tamuk, pia aupnamlule. Ton kulona meme.

¹⁶ Winipmunce, apeti marikna pum noutam ara, keil pala bitinye, narye, “Aning ara, wininamlume, aning ara, pia kum wininamlume,” nyabuka, keil pala deice sekdeiamsise yupu ara, Peti Perjanjian ara, marikna yo bisikuk dongobuka deipnamlume.

¹⁷ Tonda, apeti marikna deice tam, bublan tirikna ati ara, dekna weik kat ning emas, pia teleb ning arye, dobuka tiriknamlume. Abublan el cang ara, 110 sentimeter dekuka memepnamlume. Abublan el pala ara, 66 sentimeter dekuka memepmunce, kintinipnamlume.

¹⁸ Winipmunyopura, malaikat urasin atonun ning, el si Kerub, bitinye memepnamlume. Aning memena ati ara, pia dekna weik kat ning, el si ara emas, darabuka teikikceba, pala teleb uplya deice arye memepnamlume. Tonok ning ara, sirik tam deipnamlume. Ton ning ara, kwanim tam deipnamlume. Abitinye Kerub ara, apeti tirikina ati, deice tam tirikilongonamlum ning ara, aning deice tamuk deipnamlume. Apeti yo pum tirikin ning, el si ara, ‘Penutup Perdamaian,” nyanamlume. Ara, Allah arye anggun Israel nang ati, adiparyuk oplopsutu bukni, weik tonun bico tenesilirye, lyenamsila ati, apeti yo pum, Peti Perjanjian el deice tam bublan ara, el si ara, ‘Penutup Perdamaian,’ nyanamlume.

¹⁹ Akerup bitinye ara, Peti Perjanjian marikna yo pum, el deice tam bublan, tirikin ning dukdongobuka, tonok ninguk memepdeipnamlume. Akerub bitinye ara, yuk-yuk memelina ara kume. Ara, Peti Perjanjian marikna yo pum, el deice tam bublan ap, aKerub bitinye ap, tonok pala emas arye, puturubuka memepnamlume. Tonda, apeti yo pum tam, tirikilongon deice ara, ton Kerub sirik tam sirya, ton Kerub otam kwanim tam sirya memepnamlume.

²⁰ Memep deipmunyeba, aKerup bitinye, sik urasin ara, tonok noutamuk kipdeipmunyeura, dilanamdake. Winipdikirye, sik pol epdadikirye, anoutamuk, pol kup-kup dukdongopdanamdake. Winipdikirye, sik urasin babye, tonok tam noutam bisikuk kipdikirye, dilanamdake. Ara, amarikna pum peti, el deice tam bublan, el si Kalulongona Perdamaian, asukumuk dilanamdurake. Akalulongona deice arye, sik pol ara, apeti yo pum tam bukni, noutam bisikuk, atam ap, otam ap, mining damuk dipdongopdanamdake.

²¹ Ayo marikna, Peti Perjanjian, el tam bublan, el si ‘Penutup Perdamaian,’ akunum memepmunyopura, deipnamlume. Tonda, amarikna pum peti deice tam bublan min kum tirikdongopmamunyopura, apeti yo pum bisik ara, keil pala bitinye dobuka deipnamlume. Ara, narye, “Aning ara, wininamlume, aning ara, pia kum wininamlume,” nyapdeipsirye, keil pala deice sekuka, deipsise ning ara, anggunce akeil bitinye dobuka, apeti yo pum bisikuk dongobuka deipnamlume. Winipmunce, amarikna pum deice ara, adiparyuk moubuka, el bublan Penutup Perdamaian dobuka, apeti deice tirikdongopmunyeba, daupnamlule.

²² Peti Perjanjian dopmunce, el deice tam bublan tirikina ati, Penutup Perdamaian moubuka deipmunya deice ara, malaikat urasin atonun ning, el si ara Kerub, bitinye kintinibuka deipmunyak, asukumuk anoutam yaniba, na ap, an Musa ap, elanamname. Asukum elanamnam talak ara, narye na mapu Israel nang ati, an dam yanuka yupu nyapkinirye, “Aning wininamlume, aning kum wininamlume,” nyapdeipkiniba, ance sik Israel nang nirya, sik dam binuka nyapmimba, adiparyuk na yupu kekebuka unamake. Allah arye Musa biti laka nyabuk.

Roti kwaning dabuka delinak dona ati, laka nyabuk yupu

²³ Ura, anggun adiparyuk, akasia yo dobuka, amarikna arye, roti kwaning dabuka, delin meja memepnamlume. Ameja el cang ara, 88 sentimeter, el pala ara, 44 sentimeter. Tonda, asukum tikilinak, el cang (tinggi) ara, 66 sentimeter kiklibuka memepnamlume.

²⁴ Winipmunya deice ara, dekna weik teleb kat ning, emas arye, ameja deice taplak deipmunce, dopnamlume. Tonda, ameja deice tam kup-kup ara, ‘Urasin teleb unamleʼ tenen, emas arye taplak deipmunce, kwanibuka tanapdongopnamlume. Aning el si ara, bingkai memepnamlume.

²⁵ Ameja memepdeipmunya, el deice tam kup-kup dana-dana tam nirya ara, el pala ara 7,5 sentimeter kintinibuka memepnamlume. Ara, ninye taruk pala atonun ning memepnamlume. Amemepmunya, el kup-kup ak ara, teleb kat ning, emas arye kwanibuka, antanap dongopnamlume. Aning el si ara, bingkai memepnamlume. Tonda, aning bingkai el urasin teleb una ati, kat ning emas arye, taplak dongopnamlume.

²⁶ Winibuka, dopmunyopura, ameja pala bobana ati, anirye welepmalye yo, el barwu dana-dana ara, kat ning el si emas arye, toupnedama wilamaka atonun, memepmunce, bubik atonun ubuka, bisik dumbarye kintinipnamlume. Ameja el yan dumbarye damuk memepnamlume.

²⁷ Aemas arye bubik atonun ning ubuka, meja kup-kup tam wibuka, bisik botopdeipmunyak ara, ameja talena ati, cang yo dongobuka bobanamlume.

²⁸ Ameja pala bobana ati ara, akasia yo aryuk, dobuka memepnamlume. Ayo deice ara, urasin teleb una ati, kat ning emas arye taplak deipmunce, kintinipnamlume. Ameja pala bobana ati, amarikna toupnedama bisik atonun ning, memepmunye pum bisik dongopmunce, ameja bobanamlume.

²⁹ Tonda, ameja deice deipnamlum din delina piring ap, mek kwen makau cangkir ap, cang mek makau kendi ap, tonda mangkok ap, nirya memepnamlume. Aning nirya memena ara, urasin teleb dekna weik ning, emas arye memepdeipnamlume. Amemepdeipnamlum ning nirya ara, na si erena ati, anggur mek arebikiba, kwebuka dina ati, kintinipnamlume. Ati ara, ameja deice deipnamlum ning nirya ara, dekna weik kat ning emas, pia teleb ning aryuk memepdeipnamlume.

³⁰ Ameja memepnamlum ning ara, narye anggunti, nyapdeipsiba, Musa birye sekamuk yupu libuka deiplum Peti Perjanjian, oraik pum tam aupmal bukni, cang kain gorden biribuka, lapkwetepmom aik arye, atam ara, Peti Perjanjian urasin tamuk, binuka ameja deipnamlume. Winipmunce, ‘Na ap, anggun ap, neika unamabeʼ tenen, lak kin roti kwaning ara, asukumuk dobuka, delilyanganamlume. Ameja deiceuk pia aunamle.

Lampu wisa deiyok kina ati, nyabuk yupu

³¹ Anggun adiparyuk, lampu wisa deiyok kina ati ara, urasin teleb kat ning, emas pia teleb ninguk dopropnamlume. Emas dopropmunce, wisa el deiyok ning ap, deiyok talin ning dona ati, wisa talinamak nang ap kina ati, urasin teleb ning, emas aryuk memepnamlume. Aweisa deiyok tikdeipnarye, talina ati ara, anggunce emas aryuk dobuka, tikeipmunyeba, el urasin teleb ulya deice memepnamlume. Aning deice bita teleb una ati ara, bunga kait urasin teleb ulamle atonun ubuka, puturupdeipnamlume. Ara, yo kita min kum popnamalya ati, kita bulamle atonun ning ap, el kita polamle ato ning ap, anggunce memebuka aweisa deice taplak deipnamlume. Aning nirya ara, nong tonok kibuka memepnamlume.

³² Aweisa deiyok ning noutam arye, tonok cang ning welepnamlule. Aweleplya deice arye, baru dana tam ara, kwa winilye welebuka, sirik tam deipnamlume. Aning atonun ton, dana tam babye, kwa wililye welebuka kwanim tam deipnamlume. Anya arye, anirya tabakuka memepmunyopura, wisa talinamak ning, nakub barye memepmunce, kintinibuka deipnamlume.

³³ Anakubarye upna kwa lekamlya nirya deice ara, urasin teleb kina ati ara, bunga Badam kait urasin teleb ulamla atonun kibuka, tonok kwa deice ara, Badama kait urasin atonun ning, yuk-yuk winilye puturupdeipnamlume. Ara, el banggu atonun ning ap, yo kita popnulirye, buppu ulamle atonun ning ap, akwa lekamlye nirya deice ara, deipnamlume. Upna kwa lekamlye ning ara, deiyok dana tam winilye deipmunce, deiyok dana tam winilye ton deipmunce, aweisa talinamle ning nakub barye (6) kibuka, kintinibuka deipnamlume.

³⁴ Aweisa talinamle ning, deiyok noutam welepnamle ning ara, kwa wamlayak talena ati ara, bunga Badam kait urasin atonun, teleb ulamla atonun ning, kwa dumbarye memepmunce, kintinipnamlume.

³⁵ Naku barye kwa leklirye, welepnamlak nirya ara, kum-kum moubuka deipnamlume. Akait urasin atonun, yuk-yuk kintineip deipnamlume. Ara, yo kita min kum popmalya ati, buppu kipnulirye, kum-kum kintinlamle atonun ubuka deipnamlume. Ati ara, aweisa talinamle ning, deiyok noutam welepnamle ning deice, kwa dumbarye memepdeipnamlume.

³⁶ Lampu weisa lana ati, kwa leklirye welepnamle ning ap, deiyok ap, Badam kait urasin atonun ning ap nirya ara, dekna weik kat ning, emas arye memepdeipnamlume. Memep deipmunyopura, akwa lekamlyak, el ku tonok-tonok delina ati memena ara, yo kita min kum buppu ulamle atonun ubuka, moubuka memepnamlume. Ara, kat ning, emas pia teleb ning aryuk, teing-teing abuka memepmunce, tonok nong uk dobuka deipnamlume.

³⁷ Lampu weisa deiyok ara, tonok ning welepnamle bukni, dana-dana tam wisa talinamle ning, winilye, winilye kibuka welepnamle. Aweisa talinamle ning deice tam, wisa lan sukum ara, tekbarye moubuka memepdeipnamlume. Winipmunyeba, wisa uku laplirye, ninye din tam nirya ara, dirinauk upnamle.

³⁸ Tonda, aweisa uku dinibikiba diplirye, akuma dopkwetelye ning sekuka, teleb kilina ati ara, aweisa tapu seken ning babye, dekna weik kat ning, emas arye kintineip deipnamlume. Tonda, aweisa amu tam ara, ‘Minyak arye, meja deice sakuka bol piplyakʼ tenen, mitikto pala delinyak ning, el si talam nyanyak ning babye, emas arye memepnamlume. Ara, kurun ning emas arye, teing-teing abuka memepmunce, kintinipnamlume.

³⁹ Alampu wisa el deiyok ap, noutam welepnamle ning ap, kwa leklirye welepnamle ning nakub barye ap, wisa delinak ap, wisa amu tam ara, pala ning deipnamlum ning ap, wisa tapu sekna ning ap, nirya memena ati ara, dekna weik ning emas ara, tiga puluh lima kilo (35 kg) dobuka, moubuka memepnamlume.

⁴⁰ Alampu upna deiyok ap, pil don ning ap, nirya memepnamlum talak ara, narye anti, ‘Sinai mutuku deice arye, aweisa talin ning ara, winibuka moubuka kintinipnamlume,’ nyabuka, lak nyamkise touk ubuka, aninguk tenepmunce, memepdeipnamlume.