Keluaran 24 - Eipomek

Allah el si Yahweh arye, Israel nang ati, “Wininamlulume,” nyapdeibuk yupu ara, ‘Weik mambule tenepnamak’ tenen, winibuk ning ati, nyabuk yupu

¹ Allah el si Yahweh arye, Musa biti nyabuk. “Harun ap, Nadab ap, Abihu ap, tonda Israel ninye sik deiyok nang, wisi-wisi nang yupa bitinye keba nakub dikin (70) ap, Sinai mutuku welepnulum bukni, sik anang ara yukak tikikirye na si erepnamniake,” nyabuk.

² “Musa an dem, na dam yana weleyanamlyame. Bukni, Israel ninye anggun deiyok nang ap, ninye si nyapmakin nang ap, Israel mutuku ninye nirya ap ara, na dam yangana meme. Tonda, Musa ance amutuku welepminye talak ara, yuk nang nirya ara, amutuku kum weleyatinge,” Allah el si Yahweh arye Musa biti nyabuk.

³ Musa tamubuka biyukce, Israel nang ati Allah el si Yahweh arye, ‘Wininamake’ tenen, nyapdeipmok yupu, mem yupu nirya laka nyabukba, sik Israel ninye nirya kekebikce, neik sum arye nyabik. “Telebe, nun koproba Allah, el si Yahweh arye nyapmasil ning nirya ara, aninguk wininamabe,” nyabuka, tonoknye nyalul touk, neikto touk, nyabik.

⁴ Nyabikopura, Musa birye Yahweh nyapmok yupu nirya sekuk. Akunum sekukopura, mapmeka berekukopura, osum beren tam ara, Musa birye Sinai mutuku dam amu biyukce, keil pala dobuka taplakreibuk. Ara, Allah el si erena ati kam ning obuka, Allah el arin ning akeil deice uku seknirye, ‘El si erenamabe’ tenen, keil pala dobukabukce, pala keil taplakakuka pipdeibik. Tonda, Israel nang bikilina ati, cang keil dobuka ayukumna atonun tuku palibuka ikdeibuk. Ara obarye (12) ikuk. Ara, Israel yala dua belas (12) aulamik touk, obarye tenebuka ikuk.

⁵ Winibukopura, atalak babye Musa birye Israel kam nang wibukabukce nyabuk. “Allah el kanye teleb kilin ning ati, kam ning obuka uku dapnululume. Tonda, ‘Yuk nang ap teleb kibuka neika uptibye’ tenen, sapi basam weik kam ning obuka areplum bukni, uku kum dapnululume. Aning nirya ara, nun ni Yahweh ati arelbinululume,” nyabuk.

⁶ Nyabuk buk, sik anang arye kam ning obikopura, Musa birye akam ning opmik ning ining doprobukce, yangalin makau pum bisik dikdongobuka bokdeibukce, taruk arye burubukabukce, pala keil yangapdeipmuk deice purupdongobukba, adeice dulbiyuk.

⁷ Winibukopura, Allah arye ‘Wininamlulume, aning ara kum wininamlulume’ nyapdeibukba sekamuk buku doprobukce, Israel nang kekenak nyabukba kekebikce, sikce tamubuka nyabik. “Telebe, Allah el si Yahweh arye nyapsuk ning nirya ara, aninguk wininamabe. El yupu talibuka dobolbanambe,” nyabik.

⁸ Nyabikopura, Musa birye yangalin makau dikdongopmok ining, taruk arye burubuka, sik nong deice ining purupdonokuk. Winibukopura, nyabuk. “Aining deice arye, Allah el si Yahweh arye, ‘Wininamlulume,’ nyapdeiamsuk yupu ap, elce ‘Anggun melinamsine,’ nyapdeipsuk yupu ap, moupdeipsine. Elce, ‘Anggun melinamsine,’ nyabuka nyalin ati nyapsuk ning ara, talye kum nyaplopsuk bukni, elce, ‘Wininamlulume, aning ara kum wininamlulume,’ nyabuka deipsuk yupu deice arye winilule. Aining deice arye moupdeipsile,” Musa birye nyabuk.

⁹ Akunum winibukopura, Musa ap, Harun ap, Nadab ap, Abihu ap, tonda Israel ninye sik deiyok nang, wisi-wisi nang yupa bitinye keba nakub dikin (70) ap, Sinai mutuku deice welebik. Ara, ‘Israel ninye kalikuka melisulul Allah dilbinuyap’ tenen, welebik.

¹⁰ Welebiyikce dinmikba, Israel nang sik deiyoknye Allah, el yan amu tam ara, teleb keil pala deice tikmokba, el dirina ara, im kalum dalamla atonun winipmokba eibik.

¹¹ Atalak ara, Israel ninye sik deiyok nang arye, Allah atikmokak eibik bukni, Allah arye sikti, derebuka kum wenebuke. Kum derebuka ati, sik abinmik nang diamuk din ning ap, mek ap neika dinmek.

Musa Sinai Mutuku ila tuba tonap welebuk yupu

¹² Aminyan talak Allah el si Yahweh arye Musa biti nyabuk. “Na dam weleplumce, amutuku deice yana unmalum bukni, narye ‘Aning ara wininamlulume, aning ara kum wininamlulume,’ nyapdeipse mem yupu ara, keil pala bitinye deice sekeipse ning arepkiniba, ance Israel ninye ati nyalbinamlyame. Ara, ‘Sik kel kipnamak’ tenen, peterepra binamlyame,” nyabuk.

¹³ Nyabukura, adiparyuk Musa ap, el melinanye Yosua ap, Allah el unak, Sinai mutuku welebirik.

¹⁴ Musa ap, Yosua ap, welepnurik talak ara, Musa birye Israel ninye sik deiyok nang ati nyabuk. “Anggun aunmamunce nunti dinmamunya buk, nun tamubuka yanamaname. Tonda yuk nang ap, derepdamunce, ikin-ikin upsilyopura, Harun ap, Hur ap, sik dam tuba unamaraka ati ara, ato ning aupmalyopura, sik dam laka nyalbimunba, yupu talibuka sikce weik pil donamsirake,” nyabuk.

¹⁵ Nyabukce, Musa Sinai mutuku welebuk. Welebuk talak ara, weik dua koulukukce amutuku nirya langdibuka libuk.

¹⁶ Atalak ara, Allah el si Yahweh, el dirina weik, Sinai mutuku deice nirya lak koprop kibukba, like nakub barye sum arye, dua arye amutuku tuba libuk. Winyamuka ani, tekbarye sum ara adua noutamak arye Allah el si Yahweh arye Musa biti yukubuk.

¹⁷ Atalak ara, Israel nang arye Sinai mutuku dinmekce, Yahweh el weik dirina ara, amutuku dup deice weik uku buk dilamle atonun unmokba eibik.

¹⁸ Allah arye Musa biti yukubukba, Sinai mutuku welebiyukce, dua noutamak wekelbiyuk. Sinai mutuku deice unmok talak ara, sumu lukunyan, like yupa tonok keba obarye (40) empat puluh sum arye, tuba unmoke.