Keluaran 23 - Eipomek

“Ninye yuk nang ati, tilil yupu nyana kumce, teleb deice arye, pil melibuka donamlulume,” nyabuk yupu

¹ Sikce minina yupu nyapmakiba, kekelalum ning ara, talye-talye kum nyapnin banamlume. Tonda, tonoknye birye, dipkoprob malye upmalye bukni, yupu lipsisikuka bokolin talak ara, ‘Malye upmalinye bira, teleb upmale, tenepnamakʼ tenen, anye el melina ati, ‘Elda, teleb winipmal,’ tenebuka, melibuka yupu kum nyanamlulume.

² Sikda, malye unmace nang weika arye wininmakiba, epmunyopura, ‘E, nun babye amalye wininmak touk, nun babye malye unamabe,’ tenebuka, kum wininamlume. Malye nang arye malye wininmace touk, anggun ton melibuka kum wininamlume. Tonda, sik anang arye, malye winipmace, yupu lipsisikuka delina deiyok nang arye, ‘Amalye winipmace nang wenepnamakʼ tenen, bulupmace dam bimunce, ninye weik arye, “Kume, anang ara, malye kum winipmangu,” nyabuka, talye yupu nyabica babye, anggunda na mapu koproba anya arye, aning atouk melibuka kum nyanamlume. ‘Tilila yupu deice arye, teleb ning ara, malye kipdeipmuyakʼ tenen, ati nyapsine. Malye ning ara, ‘Aning ara, malye diamuk,’ nyanamlume. Teleb ning ara, ‘Aning ara, telebuk ulule,’ nyabuka, diksukum yupu dem nyanamlume. Minina yupu nyana meme.

³ Tonda, talye bona utotoa kum talenyak ninye arye, dipkoprob malye winipmace nang ati, yupu lipsisikuka bokolina deiyok nang arye, ‘Sik malye winipmace ning ati, yupu lipsisikuka bokolinamapʼ tenen, aik boyacopura, na mapu anggunce bico tenepmunce, ‘Kume, amalye winipmace nang ara, kankan nang unyaka ati, daupmalye, malye dem wininamakeʼ tenen, anggunce “Kume, anang ara dipkoprob malye kum unmake,” nyabuka, tilila yupu deice arye melibuka kum nyanamlume. Yata nang do nirya ati, sik malye winipmace atouk ubuka, yupu lipsisiknamlulume.

⁴ Winipmanto ning ara, anggun mal olan nang, sik sapi basam do, keledai basam do, kutukmalirye, bai tam unmaliba, anggun mangkau banmamunce eipmunyopura, adiparyuk bobuka, el basam damnye damuk boyanamlume. Anggunce, ‘Akeledai basam ara, na mal olan nang arye, sik talinyak ning ati, daupmalye, ikin upmala deice arye dadipnamle,’ tenena meme. ‘Aning ara, na mal olan nang, sik ning ati ara, dawangaplule,’ kum tenenamlule. Adiparyuk sik sapi basam do, domba basam do, bobuka el deiyoknye ati, tamubuka arelbanamlume.

⁵ Atonun, anggun mal olan nang arye anggunti, ‘Anang nun like,’ tenepsica babye, anggun mal olan nang, sik keledai basam deice bona utotoa weik libuka deipmakiba, bobanmakca ani, ikin arye dokuka pupnin baliba, eipmunyopura, akeledai basam batakna kume. Adiparyuk melibuka erelinamlume.

⁶ Anggun mutuku noutam arye, bona utotoa kum ninye ati, yupu bokolin nang dam bobikiba, ‘Yupu lilsisikna deiyok nang arye, teleb ubuka yupu lipsisiknamakʼ tenen, sikce abona utotoa kum ninye ati, dipkoprob yupu dem, nyapmunce melinamlume. ‘Kume, sikda bona utotoa kum ninye ati, dauplule,’ kum tenenamlulume.

⁷ Tonda, malye nang arye, sik yupu lipsisikuka bokolin nang dam yakirye, malye kum upmace ninye bukni, anang ati, tilila yupu nyabikce talak ara, anggunce ayupu pia kum kekepnamlume. Ara, malye kum upmalinye do, pia telebuk ululnye do, anang ati, ‘Malye winipmale,’ nyabuka, ‘Obikcakʼ tenen ati, aning ara, pia kum wininamlume. Yupu lilsisikin talak ara, tilila yupu kekena meme. Ara, talye ati kum nyapsine. Deiyok ara, na Allah Yahweh arye, aning-aning nirya dinuna ati, dipkoprob malye winipmace nang ati, ‘Anang ara, teleb unmake,’ kum tenenune. Malye winipmace nang nirya ati, dipkoprob wenepnamne. Dipkoprob malye ubice ninye ati, ‘Dawinipmalye,’ kum tenenune. Sik winipmace touk, yupu lipsisikuka bokeipnirye, wenepnamne.

⁸ Malye winipmalinye birye, ‘Na tam uk kepnutueʼ tenen, namin kina ati, yo bok arebicopura, sik yupu bokolina deiyok nang arye, ayo bok doprobikirye, amalye winipmace nang ati, ‘Sikda teleb winipmaka ati, kum wenepnamabe,’ nyabuka, tilila yupu dem nyabicopura, ara pia malye weik unyake. Aning ara, pia kum wininamlume. Deiyok ara, ani. Namin kina ati arelamak yo bok doprobica deice arye, asing teleb nang bukni, asing kulamle nang atouk kililanyake. Tonda, namin kina ati dopropmace yo bok dopropmaca deice arye, diksukum winipmace ning nirya babye, malye-malye kililulume. Winimunya deice arye, malye winipmalinye, teleb kipdeipmunye bukni, teleb winipmalinye bira, malye kililulume. Ati, aning ara, pia kum wininamlume.

⁹ Anggunce ninye asik nang ati, ikin ning, sik nong deice kum deipnamlume. Aning ara, talye ati kum nyapsine. Deiyok ara, anggun babye Mesir mutuku ulalum talak ara, amutuku nang arye, ikin pil dilamsikba dolamlumba, pia mambul kanye bomlum ning ara, anggun akunum bikamlume. Minop talak ikin ulamlum ning ara, luba kina meme. Ati ara, anggun mutuku noutam unamak ninye asik nang ati, teleb ubuka melinamlume. Ikin ning, sik nong deice delina meme.

Allah si erena ati, dikdik sen ning atonun wininamak ati, nyabuk yupu

¹⁰ Keting tamun nakub barye (6) sum nirya ara, wa wibuka, yuk pil don sum unamlume. Winipmunce, nong uplirye wisiplye ning ara, libuka dinamlume.

¹¹ Bukni keting tamun tekbarye (7) sum kiplyopura, tonap wa kum winamlume. Aketing tamun ara, tuku wa wibuka tuku palina kume. Tonda, yala ton kum kounamlume. Minop wa tuku batakamunce, talye dem daupnamle. Winimunyopura, awa tuku noutam arye, anggunce kum koumunye ning bukni, el yuk pabuka, duk mouplirye, wisinamle ning ara, libuka kum dinamlume. Ara yuk ati, kum bukni, sik bona utotoa kum ninye arye aning nirya libuka dinamake. Tonda, sik batakice ning ara, bai tam kam ulye ning arye, eibikirye dipnamake. Atonun, wa wiamunye babye, zaitun yo duk moulamle ning babye, atonun ubuka tekbarye (7) keting tamun noutam ara, bataknamlume. Duk moulamle ning ara, libuka dina meme.

¹² Like nakub barye (6) sum ara, anggun pil koproba donamlume. Bukni, tekbarye (7) sum kiplyopura, anggun pil dolulum ning nirya batakmunce, adiparyuk dikdik sepnamlume. Winipmunyopura, anggun pil melibuka dona ati, yo bok deice dekelulum ninye ap, kilapu ap, tonda, anggun pil melin ninye, ninye asik nang ap nirya ara, sik babye dikdik senamake. Tonda, anggun keledai basam ap, sapi ap, atalak ara dikdik senamake. Ati, tekbarye (7) sum uplyopura, anggun nirya dikdik sepnamlume.

¹³ Narye anggunti, “Winipnamlume, aning ara, kum wininamlume,” nyapdeipmasin yupu, mem yupu nirya ara, moubuka talipmunce, unamlume. Tonoknye babye, kum bataknamlume. Tonda, yuk talye ning nirya ati, ‘Nun ni koprobaʼ tenen, si kum erenamlume. Atonun, yuk ninye arye, sik si erenyak ning si nirya ara, sik si ton, pia kum sinamlume. ‘Aning arye melipsitingʼ tenen, kum yukunamlume. Na Allah Yahweh arye nyapsine.

Allah si eren talak kipliba, wininamak ning ati, nyabuk yupu

¹⁴ Keting tamun, keting tamun nirya noutam ara, na si erena ati, weik sum winilye wepdeipmunce, na si Allah ati, si erenamnulume.

¹⁵ Wala tonoknye, el si ara Abib ati, “Wala si Abib noutam arye asum, atanggal deice arye, weik sum kipnamnulume,” nyapdeiamse touk, uplyopura, anggunce, ‘E Nena Kum Roti Kwaning, dina sum ara kunum aupmale,’ tenepmumce, na si erenamnulume. Atalak ara, narye anggun ati nyapdeipsisi touk, Abib wala noutam like tekbarye sum ara, anggunce nena deiyok ning, el si ragi, tabakuka dapmace roti kum dinamlume. Anggunce dinamlum ning ara, nena kum roti dapmunce, tekbarye sum arye, anena kum roti kwaninguk dinamlume. Deiyok ara, Abib wala noutam aryuk, anggun Mesir mutuku ulamluma batakuka, yanamluma ati, aning ara tuba tenipmunce, wininamlume. Tonda, asum atanggal deice arye, yanabuka na si erenamnulum talak ara, asum-asum nirya, na telebe nyana ati, na aik yanganamlum talak ara, taruk banang yangana kume. Anggun wa wibuka koumunce, limunye ning noutam ara, teleb arin ning bobuka, na si erena ati, na aik yanuka arelyanganamnulume.

¹⁶ Tonda, anggun wa wibuka kouamunya, min yuma yongobuka lipmunye sum kiplyopura, ‘Nun ni Allah arye, arisulul ati ara, el siuk erenamabʼ tenen, asum akunum uplyeura, wa wiamunye Winye Ning libuka kwalipmunce, na si erenamnulume. Tonda, keting tamun akunum sirya daklye talak, anggun wa kouamunye ning sirya dakna ati, libuka deipnamlum talak ara, ‘Asum ara, weik sumʼ tenen, bai tam tia ati doltakan aik dopnamlume. Atalak ara, ‘E ara weik sum kipmaleʼ tenen, wa wiamunye ning libuka yana deipmunce, Wa Wiamunye Ning, Sirya Dakna Kwalya kwalipmunce, na si erenamnulume.

¹⁷ Keting tamun tonok-tonok noutam ara, ‘Weik tonun kwalina deiyok winilye talak ani,’ nyabuka, akunum nyapdeipmasin touk, ‘Mambul sum ani,’ tenebuka umunce, kwalina kwalipnamlume. Keting tamun nirya ara, like winilye deice arye, anggun Israel yala ninye dem nirya ara, na dam yanuka na siuk erelyanganamnulume. Nara, anggun ni Allah Yahweh, aning-aning deice tam mikip unirye, na tenenun touk wininuna ati, na siuk erenamnulume. Nara, Allah Yahweh Aning-aning nirya talibuka deice tam mikipnye unirye, ‘Naʼ tenenye touk wininuna ati, na si Allah Yahweh ati, si erenamnulume.

¹⁸ Na si erena asum nirya ara, weik sum kipliba, anggunce na arena ati, kam ning obuka arepnamnulum sum ara, nena deiyok ning ap, tabakuka kinineipnamak ning niryada, pia kum arenamnulume. Ara, nen roti do, yuk nelamle ning do nirya ara, nati tabakuka, kum arenamnulume. Tonda, na si erena ati, kwalipmamunye basam meta sekdoba tuba auplyopura, ‘Kwal adeipmapya ara, ambusum upnamale,’ tenena meme. Weik sumuk uku dongopmunyeba, uku arye dibuka, sirya daknamle. Domba basam kwalipmamunye ning, sekdoba ara, ‘Naʼ tenen, delina kume.

¹⁹ Aketing tamun, aketing tamun kinamle talak nirya ara, anggun wa wiamunye ning, min yuma ning pia telebnye ara, adiparyuk na Allah ati, na aik dam arelyanganamlume. Nara, anggun ni koproba, Allah Yahweh ununa atia. Tonda, domba basam tup do, kambing basam tup do, yupnamunye talak ara, sik nin yapu moum yung ap, tabakuka yuna meme, nyapsine.

Allah Yahweh arye, Israel ninye ati, nyalin yupu deice, nyabuk yupu

²⁰ Anggun nirya dilulume. Dipkoprob na pil donanye, malaikat tonok dopdeipniba, elce menekuka baliba, anggunda el aminyan melibuka banamlume. Ara, narye anggun Israel ninye ati, ‘Amutuku binamakʼ tenen, akunum kintineip deipsise mutuku bana ati, abisikuk bobisilirye, dadeipsiliba, amutuku uk unamlume. Amalaikat arye erebuka, balirye kaliksiliba, anggunda el amu tamuk kipmunce, el balye bisikuk banamlume.

²¹ Anggunda bisik banamlum talak niryada, narye dopreipsise malaikat, elce nyapsilye touk, moubuka kekepmunce, talibuka unamlume. Atalak nirya ara, elce nyapsilye yupu kum yaninamlume. Amalaikat ara, na si el deice akunum deipse ati, elce nyapsilye yupu yanipmunyopura, anggun malye upmunye ning ara, namin kum kipnamsine. Anggun ti wenepsilirye, ikin ning anggun nong deice deilinamsile.

²² Bukni, anggunce el yupu pia moubuka kekepmunce, aninguk talibuka winipmunce, tonda, narye anggunti, “Aning ara, wininamlume, aning ara, pia kum wininamlume,” nyapsise ninguk kekebuka, winipmumyopura, narye anggun melina ati, anggun mal olan nang yanganamak talak ara, na yu upniliba, anggunti unirye, sik anang nirya obuka, sirya daknamne. Aning atouk, dan mutuku nang do nirya, yuk mutuku ninye arye, ‘Israel nang sik nong deice ikin ning delinamabʼ tenen, yanganamak talak babye, narye aninye nirya ati, sik nong deice ikin ning arepnamna deice arye, amutuku nang nirya malye kipnamne.

²³ Na pil donanye malaikat arye, anggun dam tiklirye, menekuka baliba, el aminyan tam balamunya ani, yuk mutuku ninye unyak mutuku bobinamsile. Ara, sik Amori yala ninye ap, Het yala ninye ap, Feris yala ninye ap, Kanaan mutuku ninye ap, Hewi yala ninye ap, tonda Yebus yala ninye ap, sik unyak mutuku binuka weknamlum talak ara, narye, sik aninye nirya opnirye, kum daneipnamne. Winipnyopura, anggun Israel ninye arye, amutuku nirya talibuka unamlume.

²⁴ Amutuku binamunyopura, amutuku unyak ninye, sikce si erenyak ning ara, anggun Israel ninye arye, aning si erena ati, aning dam kutam tuku deice deibuka, si kum erenamlulume. Tonda aning si pia kum sinamlume. Tonda, sik amutuku ninye arye winilamice ning ton, ‘Nun babye winipdenuyabeʼ tenen, pia kum wininamlume. Bukni, amutuku nang arye, puturubuka ninye urasin atonun winyamikirye, si erelamice ning nirya ara, dakuka kum daneinamlulume. Atonun, sikce aning si erena ati, weik cang yo ikilin kil ara, anggun adiparyuk daklopmunce, kum kipdeipnamlume.

²⁵ Aning ara, si kum erenamlum bukni, anggun Israel ninye arye, nara anggun ni Allah Yahweh atibuk, si erebuka ulamnumunyopura, narye anggunti, kanye deibuka, teleb ulinamsine. Ara, anggun dinamlum ning nirya ap, mek dinamlum ning nirya ap ara, telebuk deipsiniba, amutuku noutam unamlum talak nirya ara, narye kalikuka melipsiniba, uk disilye ning aning-aning nirya, anggun dam kum unamsile.

²⁶ Na siuk erenulumopura, narye anggunti melipsiniba, amutuku noutam unamak Israel kilapu nirya ara, mi mun pum opyukliba, talye ton kum deliltakanamake. Tonda, amutuku noutam ara, youkwak kilapu ton kum unamake. Mapu teleb weik ubuka delinamake. Winibuka melipsinyopura, anggun kam un talak ati ara, keting tamun tonap, lo weik tonun arye arepsinyopura, keting tamun kam weik unamlume.

²⁷ Amutuku noutamak embanamlum talak ara, na mikip anggun deice deipsiniba, anggun binamlum mutuku unyak ninye nirya ara, ilil weik upnamle. Winipnamna deice arye, sik aninye ara, kanye walwal kepdeipniba, kwakdu-kwakdu apdanamake. Winibikiba, anggun ona ati yanamak nang nirya ara, ilil upliba, balye tamubikirye, bikbik abuka bindopnamake. Aning nirya ara, narye winipnamne.

²⁸ Winipmanto ning ara, weik lus mong yalyopura, ninye ak, ‘Topsiliba, uk weik dipsilyakʼ tenen, bikbik abuka balamak touk, anggun mal olan nang dam binumunye talak ara, na mikip arye dopdeipniba, sik Hewi mutuku nang ap, Kanaan mutuku nang ap, Het mutuku nang ap, ilil weik upliba, bikbik abuka bindopnamake.

²⁹ Winipnamlum bukni, sik amutuku unyak ninye ara, tonok keting tamun aryuk kum yakdononamne. Deiyok ara, amutuku noutamak, ninye kum ukceura, bai tam kam unyak ning yuk-yuk ning nirya yakirye, anggun unamlum sukum yanuka langdibikiba, anggunce aning nirya kum optume. Tonda, amutuku noutam, tonok talak aryuk ninye nirya kum ubicopura, pia pata mutuku, ninye kum ulamice sukum atouk, ‘Amutuku nirya tunim apsilyakʼ tenen, sik anang ara, adiparyuk kum yaknamne. Ati ara, amutuku ninye nirya ara, tonok keting tamun deice arye, kum yakdonoknamne. Tonok keting tamun deice arye, ton ninye yakdonoknamne, ton keting tamun deice arye, ton yala ninye yakdonokname.

³⁰ Amutuku unyak nang ara, adiparyuk kum yakdonoknamak bukni, ton talak ton yakdonokmaca, ila ton talak ton yakdonokmaca kipnamake. Winipnin balamica ani, anggun Israel ninye arye deipmunyeba, dadeipdanin banamak ninye, pia weik tonap upmumyopura, anggun ap, anggun meapu ap nirya arye, amutuku nirya talibuka unamake.

³¹ Anggun Israel ninye unamlum mutuku ap, yuk ninye unamak mutuku ap ara, mutuku lilun wilina ati ara, laka kilin ning deipnamsile. Ati, weik laut mekwen, el si Teberau (Bi Laut) tam arye dipdongobuka, anirye, Pilistin ninye unyak mutuku, yuk weik laut mekwen tam arye ubuka, mek pia kumak weik, pata tam arye dipdongobuka, atam arye Efrat mek biyukak arye, amutuku noutam nirya ara, anggunti sekdeipnopura, arepnamsine. Na mikip arye melipsiniba, amutuku-amutuku nirya noutam unyak ninye nirya, malye kibuka onamlume. Melinamsina deice arye, anggunce amutuku ninye nirya yakmunce, amutuku nirya dopropmunce, talibuka unamlume.

³² Anggunce amutuku binuka unamlum talak ara, amutuku unyak ninye ati, “Nun neika teleb una ati, wininamabe, wininamabe. Nunce anggun ati, melibuka wininamabe,” nyabuka, nyalin yupu, pia kum nyanamlume. Tonda, sik amutuku ninye arye, ‘Nun ni koprobaʼ tenen, si erenyak ning ati, anggun Israel ninye arye, ‘Aning ara, nun ton melipsitingʼ tenen, kum si erenamlume. ‘Aning ara, pia meme,’ nyapsine.

³³ Anggun Israel ninye ati, arepnamsin mutuku noutamak unamlum talak nirya ara, yuk yala ninye kunum aunyak bukni, aninye nirya yaknamlume. Anggunce, sik amutuku ninye ati, ‘Dauplye, sik ap, nun ap, neika unamabe,’ tenena meme. Deiyok ara ani. Sik amutuku tuba ukcopura, sik wininamak ning eipmunya deice arye, nati yanipnamnulume. Sik amutuku ninye arye, si erenyak ning, ‘Anggun babye, aning si erepmunyakʼ tenen, nyapsine. Yuk mutuku nang si erenyak ning ati, ‘Nun niʼ tenen, si erepmunya deice arye, ‘Na Allah Yahweh bataknumunce, na dam malye updeipnumunyakʼ tenen, nyapsine. Ara, amutuku ninye arye, si erenyak ning, si erepmunyopura, kiklina ara, sik mining wena wepmakiba, kapang mana (kuskus) mangkau arye abisik wekliba, youlamle touk winipdamunyak ati, ‘nyapsine. Ati ara, amutuku unyak ninye ap, anggun ap, neika una pia kume.