Keluaran 22 - Eipomek

Yuk ninye ning upula doprobicopura, “Aning wininamlulume, aning ara pia kum wininamlulume,” nyabuk yupu

¹ Yatanye birye do, ninye arye weilamak ning ara, sapi basam do, domba basam do, ubula doproplirye, yo bok deknamle do, obuka dipnamle do, atonun winiplyopura, el ning pununa ati, aubula donanye birye, sapi basam tonok dopropmalyopura, tonap tabakuka sapi basam pangubarye arepnamlule. Tonda, domba basam tonok ubula dopropmalyopura, aning pununa ati ara, dumbarye arepnamlule.

² Tonda winipmanto, upula donanye birye, ‘Upula dopnunʼ tenen, lukunda noutam, yuk nang sik poka domica damak yalirye, apoka pakanmalibuk eibiceura, obikiba dipnamle. Bukni, aupula dopmalinye opnamlanye, el taruk deice ara, aoplinye ining kum upnamle. Ati anye bira, wenebuka kum opnamlulume.

³ Bukni, winipmanto ara, upula donanye keting purulyangalye talak arye, anye eibikirye, obikiba diplyopura, aupula donanye opnamla deiyoknye bira, el taruk deice ining aupnamle. Anye ati wenepnamlulume. Aupula donanye birye dopropmalye ning ara, tonap tamubuka aning punubuka arepnamle. Bukni, aning-aning nirya kumnye birye, upula doproplyopura, aupula dopropmalenye tamobuka, tapu koubuka deipmunba, yuk nang arye, ‘Nun pil melinanye unamsilʼ tenen, yo bok deice anye deknamake. Dekicopura, anyarepnamak yo bok deice arye, el ubula dopropmalye ning tuba dekuka arenamake. Winipmunce, el upula dopropmalye ning ara, el taruk deice aryuk punupnamlule.

⁴ Aupula donye birye, yuk nang sik weilamice ning, sapi basam do, domba basam do, keledai basam do, upula dopropmalirye, daunmalibuk, yuk nang arye eibikirye, aupula dopropmalye ning, kam tupa unmaliba eibicopura, el anye birye aning pununa ati, tonap tabakuka bitinye arepnamlule. Ara, kam ning tonok dopropmalye bukni, tuba tonap ton ap tabakukaplirye, aning pununa ati, aning atonun bitinye arepnamlule.

⁵ Tonda, yatanye do, el domba basam do, basam do, kambing basam do eiplirye, el wa win damak kirikmaliba, turya kwaplobuka, banmalirye, anggur tapu duk wa do, yuk koun ning wa do, yuknye el wiamlyak binuka diplyopura, awein ning deiyoknye birye, awa wiamlinye ati, el basam dipmalye ning pununa ati, anggur tapu duk pia teleb ning do, yuk koun ning pia teleb ninguk, arenamlule. Ara, basam deiyoknye birye, el mining wa noutam arye do, el mining anggur tapu wa noutam arye do, duk mouplyopura, pia teleb ning libuka, wa deiyoknye biti, punubuka arepnamlule.

⁶ Yatanye do, el wa win dam binuka uku sekmalibuk, uku dipra balirye, ilima ning do, yuk ning do, dipre balirye, awa damak yuknye ton, el jagong ato ning, gandum wa wibuka kouamlye ning nirya do, tonda linmalirye, koubuka delinmalye ning do, uku arye diplyopura, aning pununa ati ara, auku sekmalinye birye, agandum wa pia teleb ning wiamlyakuk aning pununa ati, dekne arepnamlule.

⁷ Tonda winipmanto, tonoknye birye, el kwit ati, “Na kwit, ance na ning ara, yo bok do, yuk ning do, ‘Yuk nang arye upula dopropnicakʼ tenena ati, arepkiniba, an aik tia ati deiaminya ani, aminyan talak tamubuka dopropnamne,” nyapliba, bobinuka deipmalibuk, upula don nang arye yanuka, aning dopropmakiba, enmaca ani, aupula dopmalinye akunum eibicopura, aupula dopmalinye birye, deiyoknye punuka arena ati ara, aninguk bukni, tuba tonap, bitinye tabakuka arepnamlule.

⁸ Bukni, aning upula dopmalinye kum eibicopura, “Aning ara, tia ati deipnilyame,” nyapmalya ati, bobinuka deipmalye aik deiyoknye biti dobuka, yupu lipsisikna deiyok nang dam bobicopura, asipdenamake. Ara, ‘Anyaik pum deipmok ning ara, anyaik deiyoknye, el taruk arye talibuka deipmok ati, aning ara, elcuk upula doprobuk do, kum do?’ tenen, asipdenamake. Asipnamaka ati, anye dobuka, Allah si eren aik dama bobikceura, adeiyok nang arye ayupu ati, lipsisikuka bokolinamake.

⁹ Tonda sapi basam do, keledai basam do, domba basam do, akumopura, baju do, tonda, yuk yala ning nirya do, aning nirya, wangamlibuk, doproplyopura, ninye arye, “Kume, aning ara, an ning kume. Aning ara, na ningak ubule doproplume,” nyabuka, nyalamarikcopura, sik anang bitinye dobuka, Allah Yahweh si eren aik dam bobice anye, anyaik yupu lipsisikna deiyok nang arye, “Kume, Allah elcuk, dipkoprob aning ara, ani. Ara el ning kume,” nyabuka, wibuka yupu bokolinamake. Sik adeiyok nang arye, “Anye el ning kume, elce talye yupu nyanmale,” nyabikinye bira, elce el kwit ati, dekna ara, weika arye ton ap tabakuka, bitinye kibuka arepnamlule.

¹⁰ Winipmanto ara, tonoknye birye keledai basam do, sapi basam do, domba basam do, yuk wein ning do nirya, el kwit el melina ati, batakamlyeba, tiya weilamlibuk, dipnamle do, korma dila dopnamle do, tonda, upula don nang arye dopropnamaka do, winibice ning ara, yuk nang sik asing arye kum eibicopura, winipnalume.

¹¹ Winibuka wenebica ati ara, awein ning tia ati, dopropmalinye bira, minopce Allah si eren aik bilirye, Allah Yahweh kekenak arye, nyanamle. “Kume, Allah Yahweh arye dinmanilak, dipkoprob nyapne. Na kwit birye na ati, ‘Ance, na ning tia weinamnilyame,’ nyabuka moropnukba, weilamse ning ara, na bai tam upula kum dopropse. Tonda, narye kum opse,” nyapnamle. Nyaplyeura, abasam deiyoknye bira, ayupu kekeplirye, ‘Dipkoprop nyapmanile,’ tenenamle. ‘Aupmal do, kum do?’ tenen, pia tuba-tuba kum tenenamle. Aning tia ati weilamlirye, kaliklamlinye birye, “Na kume,” akunum nyaplyopura, akunuma. Abasam tia ati weinmalinye birye, abasam deiyoknye ati, aning pununa ara, dekna kum arepnamlule. Sik nirya arye, ‘Akunuma,’ tenebuka unamake.

¹² Bukni, upula don nang arye, awein ning tia dopropmalinye, el aik arye, dipkoprob ubula dopropmakiba, abasam tiya ati weilamlinye birye, abasam el deiyoknye, aning pununa ati, dekna arepnamlule.

¹³ Bukni, tia ati dopropmalinye birye, awein ning weilamlibuk, adomba basam do, sapi basam do, bai tam ulye kam ning, pia yu weik ning arye, abasam yanuka obuka dipmalirye, sekdoba batakmalye ning ap, yok toto seklopmalye ning ara, ‘Dip obuka dipmalʼ tenen, kel bikna ati, aning seklopmalye ning dobuka yalyopura, abasam deiyoknye birye, aobuka dipmalya, akunum eiplyopura, tia weilamlinye birye, abasam deiyoknye ati, dekna tamubuka, kum arepnamle. Aning kum punupnamlule.

¹⁴ Tonda, tonoknye birye, el kwit biti, “Na kwit, an domba basam natia ati talipnamne,” nyabuka, moroplirye talinamle ning ara, el adomba basam deiyoknye bira, adam kum unmalibuk, yok cepnamle do? Dipnamle do? Awinipnamlyopura, el tia talipnamalinye birye, adeiyoknye biti, pununa ning ara, adiparyuk dekna ning arepnamlule.

¹⁵ Bukni, adomba basam deiyoknye, el ap neika unmarikirye dinmalibuk, awein ning yok cepnamle do dipnamle do, winiplyopura, tia ati talipnamlanye birye, aning pununa ati, dekna ning ara kum arepnamlule. Bukni, atia dopmalinye birye, el kwit ati, “Amio, an domba basam do, sapi do, yo bok arepkinye deice arye, abasam tia bopmakinya ani, arepnamakine,” nyapmaliba, bonmalya ani, atalak noutam arye, yok cepnamle do, dipnamle do aning winiplyopura, abasam tia dopmalinye birye, abasam deiyoknye biti, yo bok akunum areamlya ati, yuk dekna ning ton, tamubuka abopmalye ning pununa ati, yo bok tabakuka kum arepnamlule. Ara, tia dolona ati, yo bok akunum arebuk ati, tonap tabakuka kum arepnamlule.

Ninye malye tenenyak ning akunum winibicopura, “Aning ara winamlume, aning ara, pia kum wininamlulume,” nyabuk yupu

¹⁶ Winipmanto ara, ninye ap elana kum kil, pia kamuk ulamlibuk, ninye yuk nang arye, ‘Akil dopnamne,’ nyana kum arye, akil ati imun kum nyamakibuk, tonye birye, akil yukupliba, sik neika mapdeikceura, akil ara, adiparyuk el kil unmale. Winiplyeura, anye birye, akil dama ati, adiparyuk arepnamlule.

¹⁷ Bukni, akil el li birye, “Anye bira, na kilmu pia kum dopnamle,” nyaplyeura, akil yukuplirye, sik neika balamdak deiyoknye bira, akil ap epdanmarice ati ara, adiparyuk pia teleb dekna ning arepnamlule. Ara, sal ap min kum mapmalye kam kil, el tapu ati arelamak touk, dekna weik ning, yo bok arepnamlule. Ara, el ap tia mapnin balamdikca dekna ati, arepnamlule.

¹⁸ Isa pil dona ati, asing kwa bitinye weik arye kel kilul kil, dipkoprob amalye pil tuba-tuba dolirye, anggun damak aunmalyopura, adiparyuk obuka bataknamlulume. Akil ara, anggun ap neika kum unamlulume.

¹⁹ Yatanye do, talye kam ulye ning ap, neika tabakuka mapmalinye bira, adibuk wenebuka oplopmunyeba, dipnamlule. Ninye kume.

²⁰ Yata nang do nirya, na Allah Yahweh ati, na si erena ati, kam ning obukamunce, uku dongonamlume. Bukni, yata nang do nirya, anggunce talye ning ati, “Na ni koproba,” nyabuka, atalye ning ati, si erena ati, ining ning obuka areplirye, aning ati si ereplinye bira, adiparyuk opnamlulume. Ara, na Allah Yahweh ati, batakanululnye ulula ati, adiparyuk, elti, opnamlulume.

²¹ Ninye asik nang, anggun dam aunamak nang ati ara, ikin ning pia kum delinamlume. Aning kum bukni, melibuka umunce, anang ati, diksukumuk unamlume. Awinamluma deiyok ara, ani. Ara, anggun Israel nang babye, Mesir mutuku noutam ulamlum talak ara, anggun babye, ninye asik nang atonun ulamlumba, Mesir mutuku nang arye, anggun nong deice ikin weik delilamsikce, malye kililamsika ati, nyapsine.

²² Atonun tonda, anggun dam unyak youwak kilapu ap, kwaknamne mapu ap ati, ‘Sikda talye nang unyaka ati, dauaplye’ tenebuka, sik dam ara, ikin ning deipmunce, sikti, malye kum kilinamlume. Sik dam ara, kanye ikin ning kum delinamlume.

²³ Ara, talye ati kum nyapsine. Deiyok ara, anggunce anang ati, ikin ning sik nong deice deiplumce, malye kilimunyeba, sik youwak kilapu ap, kwaknamne mapu ap arye, na Allah ati, “Se, nio, nun kanye imun usilye ning ara, melipsilyame,” nyabuka, weik yupu deice arye, “Melipsilyame,” nyabuka, moropnikceura, narye sik yupu dipkoprob kekepnamne.

²⁴ Anggunce youwak kilapu ap, kwaknamne mapu ap ati, malye kililalum ning ara, sikce nati, “Na nio, melipsilyame,” nyabuka moropnikceba, ayupu nirya kekepnye ning ara, na yu weik upnilyeura, narye nyapdeipnyeba, yu nang arye parang ya bobuka, anggun dam yakirye, yanuka oplopnamsiake. Opsikceba, anggun kilapu nirya ara, youwak kilapu unamake. Tonda, anggun mapu nirya babye, kwaknamne mapu uk unamake.

²⁵ Na mapu koproba, anggun Israel nang ara, anggun talilulum yo bok noutam arye, kankan nang ati kintinibuka, tia arelamlum ning ara, sik kankan nang, ayo bok tamubuka arepnamak talak ara, ‘Yuk yo bok ton eitam ap tabakuka arepnilyame,’ kum nyapnamlulume. Ara, yuk nang, sik yo bok weik talibikirye, atalak-atalak nirya noutam ara, kankan nang tia talak ati, arelamak nang arye, ‘Na ning areamse ning ara, tamubuka arepnamnilam bukni, minpola yo bok weik tonun ton, uang bunga ton tabaknimince, tamubuka arepnilyame,’ nyalamak touk, na mapu koproba arye, aning kum nyanamlulume.

²⁶ Winipmanto ara, an kwit birye yo bok pataplyeba, ance ayo bok tia ati arepmince, elti, ‘Aning dipkoprob tamubuka arepnamnilamʼ tenen, “An teleb ning, cang baju, buppu kin ning ara, tia ati dopropnirye deipmanya ani, ance na yo bok ton tamubuka arepnamnilam talak ara, acang baju ton tamubuka arepnamkine,” nyana meme. Aning ara, kum nyanamlum bukni, el baju tia ati dopropmaminyopura, asum keting kum kumupmalye talakuk, adiparyuk tamubuka arenamlulume.

²⁷ Anye el cang buppu baju tia ati dopropmince, ouku weik tonun pia kum delinamluma deiyok ara, ani. Anye el cang baju buppu kin ning ara, el nong bola leilipyeba, buppu una ara, aninguk ulula ati, ance el baju tamubuka kum arepminyeura, el mapnutu talak babye, yata ning arye, el nong pakubuka maptuba, buppu kiptu do? El talye maptuba, buppu kum kiptuura, anye birye na Allah ati, ‘Melipnilyane,’ nyabuka, weik yupu deice arye, malye nyabuka moropnilyeura, narye el yupu dipkoprob kekenamne. Ara, na Allah Yahweh, ninye ati bico tenena deiyoknye ununa ati nyapsine. Aning-aning nirya winina ati, “Aning ara wininamlume, aning ara, pia kum wininamlume,” nyabuk yupu

²⁸ Allah Yahweh ati, malye-malye yupu nyabuka, el deice arye pia kum nyanamlume. Tonda, amutuku noutam ninye deiyok kibuka talinyak nang ati, “Anggunda, dipkoprob malye nang ululume,” nyabuka, kum nyanamlume.

²⁹ Anggunce talibuka ululum ning ara, anggur tapu duk mek ap, jagong atouk ning, el si gandum ap, minyak zaitun yo duk mek ap, aning nirya ara, noutam arye bokuka, na anggun ni koproba, Allah Yahweh, na atibuk bokuka, arelyanganamnulume. Tonda, anggun sal mapu min yuma winiryuk deipmunye nang nirya ara, batakna kume, adiparyuk na Allah Yahweh atibuk, arelyanganamnulume.

³⁰ Aning atouk, anggun sapi basam ap, domba basam ap, kambing basam ap nirya noutam arye, minyuma deiplye mi, yim ning nirya ara, like tekbarye sum ara, sik nin yapu damuk unamnyake. Bukni, like tekbarye sum, akunum kiplyeura, adiparyuk na si erena ati, awiniryuk kam ning nirya bobuka, na dam arelyanganamnulume.

³¹ Anggunda dipkoprop, na mapu koproba, pia diksukumuk unamluma ati, anggunce talibuka weinamlum kam ning nirya ara, bai tam kam ulye yu ning arye, oplopmalye ning ara, kum dinamlum bukni, aning ara, adiparyuk dobuka, anggunce tamunye, kam arepmunyeba, dinamlule.