Keluaran 21 - Eipomek

Yo bok deice arye dekenyak ninye arye, Ibrani ninye ap, neika dukdongobuka una ati, nyabuk yupu

¹ Allah arye Musa biti nyabuk. Na Allah arye, Aning ara wininamlume, aning ara pia kum wininamlume nyapdeipnusin yupu ara, Musa ance sik Israel ninye nirya ati laka nyalbinulyame.

² Ayupu ara ani. Sik aik melibuka pil dona ati, anggun mutuku Ibrani nang koproba buk, yo bok deice arye, dekenamlum Ibrani ninye ara, keting tamun nakub barye deice aryuk, pil donamak bukni, keting tamun tekbarye akunum uplyopura, aninye bataknamlume. Batakmunyeba, binulyopura, el adiparyuk talye mangkau asa banamlule. Ara el pil dolamlye ning ati, dekna ning ton kum arenamlule. Adiparyuk batakdongopmunyeba, elda teleb aryuk binulyeura, anggunce elti, ‘Teleb aryuk dabilyame nyanamlume.

³ Winipmanto ara, anggun aik pil dona ati, ninye ton kil dona kum buk yo bok arye dekuka deiaminyeba, pil dolamsilya ani, keting tamun tekbarye deice pil dolamlya ani, keting tamun tekbarye deice pil dopsilyopura, tekbarye keting tamun deice ara, anggunce kil dona kumnye batakmunyeba, adiparyuk el yuk banamlule. Bukni, anyaik pil dona ati melinanye kil akunum domuk bukni, anggunce yo bok deice arye dekamunyeba, elce anggun pil dolamsilya ani, batakmunyeba, el binulye talak ara, el ap, el domlye kil ap neika banamdurake. El kil ara kum bataka binamlule.

⁴ Bukni, anyaik deiyoknye birye, el pil melina ati, kil dona kumnye ton yo bok deice deklirye, anye biti kil ton arepliba, dobuka ulamlya ani, anye ap, el kil arye, mi do, kilmu do, deipnamdak mapu ara, anyaik deiyoknye el ninguk unamake. Aning atonun, siknin babye, anyaik deiyoknye el ninguk unamle. Amapu ap, akil ap anyaik tuba unamake. Anyaik pil melinanye bataknamle talak ara, el domlye kil ap, sik mapu ap ara, batakuka el yuk dem banamlule.

⁵ Bukni, winipmanto ning ara, anyaik pil melinanye birye, “Kume, na kil ap, na mapu ap, tonda yo bok deice deknuknye bira, anyaik deiyoknye ak, kanye deilinuna ati, sik nirya ati batakuka kum binamne,” teneplirye, nyaplyopura, el anye kum binamlule.

⁶ Winiplinye bira, el deiyoknye birye adiparyuk bobuka, Allah el si eren aik dam bobinamlule. Akunum bobilyopura, adeiyoknye birye, el aik bublan dam ayukumna yo ikamicak binuka, ‘Asukum tiklyame nyaplyeba tiklyopura, el deiyoknye birye, kat ning tatce kecamice ning doplirye, apil melinanye el amul potoknamle. Winibuka potoklirye, bitinye kiplyopura, el apil melinanye birye, anyaik deiyoknye biti, pil melibuka donanye pia unamle. El kam unamle talak nirya ara, anyaik deiyoknye birye, dekne ning ton kum arepnamle bukni, pil tuba melibuka donamle.

⁷ Ibrani yala kilapu ton sik ni yapu arye, yo bok patapliba, yuk nang dam binuka dekamice kilapu ara, keting tamun nakub barye akunum mabikirye, tekbarye keting tamun uplyopura, asukum arye ninye talye dekna kum pil dolamice nang batakikiba balamaka atonun, akil ara kum binamle. Ninye arye talye dekna kum pil dolamica ani, keting tamun tekbarye kiplya ati, batakuka balamaka atonun, sik kilapu ara batakuka kum banamnyake.

⁸ Winipmanto ara, ‘Akil deknirye, aminyan talak naryuk dopnamne tenen, tonoknye birye yo bok deice arye dekuka domlye kil ara, el deiyoknye tenepmalye touk, akil arye kum winiplyeura, adeiyoknye birye akil ati kanye kum deiplyopura, anye birye akil dobuka yuk nang ati deknamle. Ara, akil pununa ati, yuk nang arye akil deknamake. Bukni, ‘Akil dopnamne tenyamlirye, akil dekamlya deiyoknye birye, talye tikilyangan nang ati, kum deknamle. Yuk mutuku nang arye ato kil kum dekenamnyake. Deiyok ara, akil dekamlya deiyoknye birye, akil ati, ‘Aminyan talak dopnamkine nyalilamlye bukni, akil ati kanye kum deiamlye ati, akil kum dopnamle. Ara, elce nyalilamlye yupu akunum yaniplye ati, akil dobuka, yuk mutuku arye talye tikilyangan nang ati, kum deknamlume.

⁹ Winipmanto ara, akil dekamlya deiyoknye birye, Kume, na deipse mi ara akil arepniba dopnamle teneplirye, el mi ati arepliba, anye mi arye akil doplyopura, akil dekamlya deiyoknye birye akil ati, ‘Akil ara na kilmu koproba atonun unamle teneplirye, akil ati teleb ubuka melinamle. Ara, anye el kilmu koproba ati melilamle touk, minop talak arye dekamli bukni, el bidamnye kum dopnamle kil ara, teleb arye melinamlule. Akil ara, el kilmu koproba atonun unmale.

¹⁰ Aminyan talak, anyaik deiyoknye birye, yuk kil tonap tabakuka dopliba, el minop domlye kil ara, tuba melinamle. Ara minop domlye kil, el din ning ap, baju ap, tonda yuk ning aning-aning nirya ap ara, el min arye arelamlye touk ubuka, aminyan talak babye tuba arenamlule. Akil ati, Kume, winira yuk kil akunum dopmana ati, anda tuba kum melinamkine nyabuka, min arye domlye kil ati, kum bataktue. El aminyan talak dopnamle kil melinamle touk, el min arye domlye kil ati babye, atonun, teleb arye meliplirye, aning-aning nirya tuba arenamlule. Akilapu bitinye ap, anye ap, teleb ubuka neika unamnyake.

¹¹ Bukni, adeiyoknye birye, el min arye domlye kil ati, “Kume, el din ning ap, baju ara, nun kilapu ati melinyap ning ap, aning nirya akil ati kum melipnamne teneplirye, akil ati dipkoprob melibuka kum arenamne teneplyopura, anye birye el min arye domlye kil bataknamlule. Akil batakliba binulyopura, akil arye el doplinye biti, ‘El punun yo bok ton arepnune kum tenepnamlule. Tonda, akil min arye domlinye birye akil ati, Yo bok ton arepnilyame nyabuka kum morolbinamlule. Allah arye Musa biti nyabuk.

‘Ton nang arye, ton nang ati, malye updeibiceura, aning dekna ati, wininamak ara, ani,’ nyabuk yupu

¹² Allah arye, Musa biti nyabuk. Yatanye do nirya, el yu uplya ati, ninye ton opliba, diplyopura, anye el babye adiparyuk wenebuka obikiba, dipnamlule. Ninye ona deiyoknye, el wenena ati, onamlulume.

¹³ Bukni anye bira, tenepce arye ‘Anye optinye tenena kum bukni, el mangkau arye opliba, diplyopura, anggunce, Kume, Allah el kanye arya tenenamlume. Ton anye birye, ton ninye oplinye bira, Allah arye yupu kum sektue. El, ninye opmalya deiyoknye, ilil upliba, ‘Yuk nang arye na wenebuka, opnicak tenen, bai tam sakuka, ‘Dan mutuku binun do?’ tenen, bisik ati, elkirikinmalinye bira, na Allah arye, “El teleb arye unamlak ara ani. Abisik bilyame,” nyabuka, lake nyapnamne. Nyapnyopura, el abinuka unamle mutuku babye, narye kalikuka melinamne.

¹⁴ Bukni, yatanye do nirya, el kap biti, ‘Anye bira, na song ati, yata wiribuka arye optinye do?’ tenen, teninauk kibuka, yu kanye boplirye, tulum uplye ati, el ka opliba, diplyopura, anye bira narye kalikuka kum melinamne. Kume, atonye bira, yu arye el ka oplyopura, anye bobuka na dam arye bobimunce oplopnamlume. Ara, anggunce, ‘Nun ni Allah arye, ‘Nun malye winin ning namin kipsilirye, lyepnamsilʼ tenen, kam ning ton obuka, pala keil yangabuka kintineipmamunya dam bobimunce, elti, wenebuka opmunyeba, dipnamle. Deiyok ara, asing dilamtaka arye, yuknye opmalya ati, atonye bira, narye kum lyepnamne.

¹⁵ Yatanye do nirya, el li ap, el nin ap ati, opliba dipdicopura, anye el babye adiparyuk wenebuka obiceba dipnamlule.

¹⁶ Yatanye do, ‘Yo bok dopropnamneʼ tenen do? Yuk deiyok ati do? Ninye ton el mikip arye tomobuka tapu kouplirye, bobuka yuk nang dam binuka deklyopura, el amalye upmalinye bira, el wenena ati oplopnamlume. Atonun, ‘Yo bok dopropnamneʼ tenen, ninye ton tomobuka tapu koubuka, bobinmalirye, dabinuka unmali bukni, sik deiyok nang arye, amalye upmalinye eibikirye, tomobicopura, el wenena ati obuka, bataknamnyake. Ara, el tomopmalinye bira, kam tuba unamle bukni, amalye upmalinye bira, el wenena ati ara, opnamnyake. Winiplinye bira, el adiparyuk wenebuka opmunyeba, dipnamlule.

¹⁷ Yatanye do nirya, el anye birye, el li do, el nin do, sikti, ‘Ikin uptueʼ tenen, malye yupu nyabuka wenelamlinye bira, adiparyuk anye el wenena ati opmunyeba, dipnamlule.

¹⁸ Winipmanto ara, ninye tonok-tonok arye, olanmaceba tonoknye birye, keil dobuka, el ka yuknye biti, oplibuk, kum diplyopura, el aopmalinye biti, wenebuka kum opnamlume. Atonun, ninye olanmaca ani, tonoknye, el taruk pinin arye, el ka opliba, kum diplyopura, el aopmalinye biti, wenebuka kum onamlume.

¹⁹ Bukni, el ka opliba, tukwak sakuka pulbilirye, binman kum uplya ati, el aik pumuk malamlya ani, aminyan talak el kama taliplirye, aik dam binmanto uplye talak ara, el omlinye biti, wenebuka kum opnamlume. Bukni, el aopmalinye birye, el ka pil dona kumce, na kinamle talak ati, yo bok ton bulubuka arenamlule. Tonda, ‘Na ka opmanuba, dila sakuka ati, aning nirya teleb ubuka niptueʼ tenen, ‘Winida telebuk unmal do, kum do?’ tenen, pia melibuka dipniliplirye, el ka biti pia melinamle. Akunum niplirye, teleb ulyopura, akunuma.

²⁰ Yatanye do nirya, el pil melibuka dona ati, yo bok deice arye dekuka, boyangalulnye bira adiparyuk, sal do, kilapu do, weik tonun arye, sik nong deice opliba diplyopura, apil melinanye weik tonun arye oplinye bira, adiparyuk wenepmunce, anye el nong deice ikin ning deipnamlume.

²¹ Bukni, apil melin ninye bukni, tonoknye do, kil do, opmalinye bira, keting noutam tonok do, bitinye do, mapmalye bukni, adiparyuk kum diplyopura, el opmalya deiyoknye bira, ikin ning, el nong deice kum deipnamlume. Deiyok ara, aninye ara, el pil melina ati, yo bok deice arye deice yana deiamlula ati, aninye ara, el ning unyake. Elce teneplye touk wininamle. Ati, el opmalinye bira, kum diplyopura, adeiyoknye biti, ikin ning el nong deice kum deipnamlume.

²² Winipmanto ara, ninye yata wiribuka nang do, nirya arye, sik olanmaca ani, mi bomlye kil, el nong deice opdongobikiba, el mi mun pum tam arye deiplirye, ami ap, el lin ap, kum dipdicopura, aopmalinye biti, kum opnamlume. Bukni, akil el domlinye birye, “Kume, na kil opmaluma ati, yo bok deknamanulume,” nyabuka moroplyopura, amutuku yupu lipsisikna deiyoknye birye, “Telebe, el nyapmal touk, yo bok winibuka arepnamlume,” nyabicopura, akil opmalinye birye, aning atonun winibuka arenamlule.

²³ Bukni, akil el opmace ning ara, na kina bukam uplyopura, el aopmalinye biti, na kina bukam upmalye touk, elti, wenenamlume. Ara, akil opmalinye el nong babye, opmunyeba, el akil el nong dila sakmalye touk, anye el babye dila saknamlule. Aning atonun, akil opmakiba, akil do, el mi bomlye mi do, diplyopura, aopmalinye ton, tamubuka opnamlume.

²⁴ Atonun, tonda akil el asing tulubuka opmacopura, apununa ati, akil opmalinye, el asing tulubuka onamlume. Akil el si kuruka obicopura, akil opmalinye bira, el si duk kuruknamlume. Tonda, akil el taruk cepmalinye bira, apununa ati, akil opmalinye bira, el taruk uk cepnamlume. Atonun, akil el yan cepmalinye bira, el pununa ati, akil opmalinye bira atonun, el yanuk cepnamlume.

²⁵ Aning atonun, akil el yok dila sakmalyopura, apununa ati, akil opmalinye biti, ‘El babye, yok dila saktue’ tenen, dila sakipnamlule. Aning atonun, ninye olanmaca ani, akil el nong bol deice, yo nia arye kulapmakiba, uk dem diplyopura, awinipmalye touk, aning pununa ati, akil opmalinye, el babye uku dilamle dila atonun opnamlume. Tonda, akil opmakiba, el nong bol deice nepmalyopura, awinipmalye ning pununa ati, akil opmalinye, el babye opmunyeba, nenamlule.

²⁶ Yata nang do nirya, ‘Na pil melibuka donamnilʼ tenen, el yo bok deice arye dekuka delilyanganyak nang, ara sal do, kilapu do, sik asing tulukuka obikibuk, el asing akunum malye uplye arye, ninye eipmanto kum uplyopura, aning dekna ati ara, el deiyoknye, el pil tuba melibuka kum donamlule. Awinipmalinye, el asing punun ati, el pil ara batakliba pil melina kumce, talye urdem unamlule. El deiyoknye birye, asing malye upmalinye bira, batakliba, pil dona kumce, teleb arye talye urdem daunamlule.

²⁷ Atonun ton, el deiyoknye birye, el pil melibuka dolamlinye binyak onmali bukni, si duk kuruka, saklyopura, awinipmalye ning pununa ati, anye bira, el deiyoknye biti, pil melibuka kum donamlule. Bukni, el si duk pununa ati, adeiyoknye birye, apil dolinye bira, batakliba, talye kanye bobuka, urdem unamlule.

Ninye arye, weilamak ning winina ati, nyabuk yupu

²⁸ Yim sapi basam kisok deice tace belelamle ning arye, ninye nong deice lukuka opliba diplyopura, wininamlume. Anye akunum dipmalye ning wenena ap, punun ning arena ara, asapi basam adiparyuk keil arye dobuka, opmunyeba dipnamlule. Keil arye dobuka opmunyeba, akunum diplyopura, el tup ara ninye arye dobuka kum dinamlume. Tonda, asapi weilamaka deiyok nang ati, ikin ning pia kum deipnamlume. Anye el sapi basam arye opmalinye bira, el deiyok ton kume.

²⁹ Bukni, ayim sapi basam el kisok tace arye, ninye tuba-tuba olamlyopura, yuk nang arye, asapi deiyoknye ati, “Yata deiyok ati an sapi basam ara, batakloplumba, ninye weik arye tuba olul do?” nyalamiki bukni, asapi deiyoknye kekena kumce, moubuka kum kiriklamlye arye, el sapi arye ninye tonap oblyeura, sapi basam yim ap, asapi basam deiyoknye ap ara, keil arye donokuka opnamlume. Ara, sik wenena ati, ninye arye keil dobuka, obibikiba, sik nisin dipnamdake.

³⁰ Bukni, sik adipmalinye bira, el tam nang arye, ayim sapi basam deiyoknye biti, “Ura, an kum dipnalame. Bukni, aning pununa ati ara, nunce anti moropkibyeura, winibuka arepsilyame,” nyabiceura, asapi basam deiyoknye birye, el babye pununa ati, sikce nyamice touk, yo bok bulubuka iplyeura, akunuma. Anye el wenena ati, kum opnamlume. Ara sikce elti, “Yata wiribuka do?” nyabuka, morobica babye, arenamlule.

³¹ Anyapman touk, ayim sapi basam arye, el deiyoknye el mapu do, kilmapu do, atonun opliba dibiceura, asapi basam babye, adeiyoknye bira, sik wenena ati keil arye dobuka onamlume. Bukni, yuk nang arye, “Kume, el kum opnamlum bukni, yo bok winibuka arepnamsile, nyabikiba, elce areplyeura, akunuma. Elda kum opnamlume.

³² Winipmanto ara, ninye melina ati, yo bok deice arye dekuka deibikiba, dekne ning ton dolona kumce, talye pil melibuka dona ati, pil dolamice ninye do, kilapu do, asapi basam el kisok deice tace ning aryuk mangkau asa opliba, diplyopura, asapi basam deiyoknye birye, keil uang weik ning tiga puluh perak dobuka, apil melinanye, opmalya el dekna ati, ‘Pil donamnilʼ tenen, yo bok arye dekuka deiamlinye biti, arenamlule. Areplyopura, asapi basam deiyoknye kum opnamlume. Bukni, asapi ara, adiparyuk keil dobuka opmunyeba, dipnamlule.

^33-34 Yatanye do, el mek dina ati, mek kwen tuku luklyopura, alukamlye mek sibaru dam ara, siknipdongopnamlule. Tonda, yuk nang arye, mek kwen tuku lukamice ning, eiplirye, sibaru dam siknipdongamice, bublan dangaplobuka, mek kweplyeura, abublan kin-kin tamubuka siknipdongopnamlule. Bukni, apum tam bublan kum siknyamicopura, sapi basam do, kil sapi do, tonda keledai basam do, mangkau banmalya ani, abisik saklyopura, mekwen tuku pailyamlinye bira, wenenamlume. Tonda, abisik bublan kum siknipdongopmalinye babye wenepnamlume. Ara, adipmalye basam pununa ati ara, yo bok doplirye, abasam talibuka weilamlinye biti, arenamlule. Yo bok akunum areplyeura, abisik sakmalye basam ara, el yo bok areplinye binyuk, adipmalye sapi nong ara, dopropnamlule.

³⁵ Tonda yatanye do, el ka yim sapi basam kisok tace arye, yuknye el yim sapi basam ton, lukuka opliba diplyopura, aopmalye sapi basam nong bobuka, el tup kwalibuka, sik bitinye bokdopnamdake. Tonda, kam tuba ulye sapi basam bobuka, yuk nang ati, dekdopdikirye, ayo bok dobuka, sik abitinye nang ara, neika bokdopnamdake.

³⁶ Bukni, yuk nang sapi basam min arye el kisok deice, tace weik belelamle ning arye, lukuka olyangalamlya ani, yuk nang arye, “An sapi basam kalikina ati, poka dobuka dongonalame,” nyabuka wenepmace bukni, abasam aryuk, tonap opliba, eibikirye, “Kume, ara min arye yuk nang ning olya ani, asum babye ople. Ayim sapi basam ara, poka dobukaplirye, apoka pum tam kum dongoplirye, moubuka kum kalikilya deice arye, winipmaleʼ tenen, bikicopura, anye wenepnamake. Ara, aopmalye yim sapi basamuk, el pununa ati, kam kipman sapi deiyoknye, elce dipmalye sapi deiyoknye biti, yo bok arenamlule. Dipmalye sapi punun ati, kam unmalye sapi deiyok birye, yo bok akunum areplyopura, elcuk adipmalye sapi basam tup ara, kwalibuka dinamlule.