Keluaran 2 - Eipomek

Musa deibikce, lyeprobik yupu

¹ Atalak ara, tonok Israel nang bukni, Lewi yala nang arye deibiknye, Lewi yala kil dobuk.

² Winibukba, akil mi bomuka ani, sal mi deibuk. Deibukce, ami el urasin eibukce, el urasin teleb ubuka ati, el lin birye, ‘Mesir nang arye obikcak’ tenen, ami dobuka wala winilye deice arye, duknupdeiamuk.

³ Winilamuk bukni, ami weik nebukba, tuba kum duknupmanto ubukopura, el lin birye, ‘Bai tam duknupnaman’ tenen, tower aling wibukabukce, ‘Mekwen diplyak’ tenen, yo cang atonun ning dobuka, anyaling bai tam palipdongobukce, el mi atower aling pum bisik dongobukce, bublan tirikdongobuk. Ara, Nil mek kup-kup bukni, kwasa kan-kan duknupdeibuk.

⁴ Winibuk talak ara, el du kil yuk sukum tikmokce, ami ati, ‘Yata wiripnamal do?’ tenen, dinauk unmok.

⁵ Daunmok ani, Firaun el kilmu Nil mek keknuyuka ati, yayuk talak ara, minopce mek kum yana kekuk. El melina kilapu ara, mek kup-kup talye banmek. Firaun kilmu mek keknuyuk talak ara, anyaling kwasa noutamak aupmokak yanuka eibuk. Eibukopura, el melin kil tonok ati nyabuk. “Anda tower aling oupmala ara, bimince dobuka boyanilyame,” nyabukba biyukce, dobuka boyayuk.

⁶ Tower tapu aling bublan kukuka dililamukak, anyaling pum bisik, ami engenmokak eibuk. Engenmokak eibukce, Firaun kilmu arye ami ati, bicoe tenebuk. Utenebukce, nyabuk. “Kume, ami ara, dipkoprob Ibrani nang mi,” nyabuk.

⁷ Nyabuk talak, ami el du kil birye, Firaun kilmu dam biyukce, asipdeyuk. “Ami ara, moum dinina ati, Ibrani kilapu dam bitinirye, bobuka boyaniba, akil arye an melina ati, ami moum diniptopura, teleb do?” nyabuk.

⁸ Nyabukopura, Firaun kilmu arye, “Yo telebe dabobuka binamalyame,” nyabuk. Nyabukura, ami el du kul birye, el lin dam biyukce, dobuka boyayuk.

⁹ Sik bitinye yarikura, Firaun el kilmu arye, ami el lin biti nyabuk. “Ura, ami bobuka, moum dinipminya ati, narye anti, dekna ning arenamkine,” nyabuk. Nyabukopura, akil el mi dobuka biyukce, moum dinibuka arelamuk.

¹⁰ Ami akunum nebukopura, bobuka Firaun kilmu dam tamubuka biyukce arebuk. Arebukura, atalak Firaun el kilmu arye, ami bobuka, ‘El si ara, Musa,’ nyabuka si dobuk. El si Musa nyabuka deiyok ara ani. Musa ara, Mesir mutuku yupu deice arye, ‘Danoutam arye dolona ulula ati,’ asi dobuk. Ara, ‘Nil mekin arye dopropse,’ tenena ati, nyabuk.

Musa Midian mutuku biyuk yupu

¹¹ Musa daulamuka ani, oketeng tamun deice akunum nebuk talak ara, ‘Na tam ninye ikin pil donyakak dilbinun’ tenen, Israel ninye mambul pil dolamikak dilbiyuk. Dinmok talak ara, Mesir mutukunye tonoknye birye, Musa el tamnye, Ibraninye tonok, kama arye el nong deice debuka onmokak, Musa eibuk.

¹² Eibukopura, ‘Ninye ton dinmaniak do?’ tenen, dililamukak ninye ton kum eibukopura, Musa birye, Mesirnye obukabukce, mek wininga arye, singnipdongobuk.

¹³ Mapmoka, berekukopura, asum ton, Israel ninye pil dolamikak, binuka dipdeyuk. Dinmok bukni, atalak ara, Ibrani nang bitinye olanmarikak, Musa eibukce, malye kina deiyok koupmoknye biti nyabuk. “Amio, anggun bidamang nanguk ati, yata deiyok ati, olanmarum do?” nyabuka asipdeyuk.

¹⁴ Nyabuk buk, anye birye Musa biti nyabuk. “Yata deiyoknye birye, anti erepdeipkukba, nun yupu lipsisikuka bokolina deiyoknye ap, nun deiyoknye ap unmasilam do? Anda Mesir mutukunye ambusum opmom touk, na ton opnunilama ati, wenepnilam do?” nyabuk. Nyabuk buk, Musa birye, ‘Se, na winipmanu ning ara, akunum bikmaniyake,’ tenebukce, ilil ubuk.

¹⁵ Aminyan talak, Musa birye Mesir mutukunye opmok ning ara, Firaun birye akunum kel bikukopura, ‘Naie, anye bira, yata ati do, el oplopnune’ tenen, piripdeyuk bukni, Firaun tenebuk ning ara, Musa kel kibukce, adiparyuk yuk mutuku bikbik abuka bindobuk. Ara, mutuku si, Midian mutuku noutamak binuka, mekwena ati lukamikak pum bisik wekuka bukmok.

¹⁶ Winipmok talak ara, Midian mutukunye tonok, el kilmapu tekbarye kilapu ulamik. Anye bira, el si ara, Yitero ulamuk. El pil ara, Allah si erena ati, kam ning obuka arena deiyoknye ulamuk. Anye, el kilmapu tekbarye arye, sik domba basam mek arena ati, amekwen dam lukamikak kwelyayik. Ara, ‘Mek kwebibirye, mek delinak dikdongobibyopura, nun ni el domba basam dipnuyake’ tenen, mekwena ati lukamik dam yayik.

¹⁷ Winibik talak ara, domba basam talibuka wein nang, yuk nang yayikce, akam kilapu ati, yanuka yakikba, mek kum yana kwebik. Winibikba, Musa eibukce, tikuka sik kilapu lyena ati, sik yu nang yakuk. Winibukopura, akilapu melina ati, mek kwebuka, sik domba basam arebuk.

¹⁸ Winibukba, akilapu sik aik minopce tamubuka biyikba, atalak ara, sik ni birye asipdeyuk. “Yata ati, arup minopce tamubuka aik yalum do?” nyabuk.

¹⁹ Asipdeyukbuk, sikce nyabik. “Kume, domba basam wein nang, yu nang arye yakmasiyakba, mek kum kwepmapubuk, ninye tonok Mesir mutukunye birye, melibuka lyepmasilce, mek kwebuka nun domba basam arepmasile. Adeiyok ati, minopce tamubuka yayabe,” nyabik.

²⁰ Nyabikba, sik ni birye, “Se, anggun yata ati, anye talye batakuka yanmalum do? Anye bira dan unmal do? Anggunce, el dobuka boyanmatumba, el ap din neika diptibye. Ati, el yanamala ati, tamubuka yukulbilulume,” nyabuk.

²¹ Binuka yukubikba, Musa yayukopura, neika unmek. Neika ulamika ani, aminyan talak anyaik deiyoknye Yitero birye, el kilmu Sipora kapreibukba, Musa dobuk.

²² Dobukce, neika daulamdika ani, akil Sipora birye, sal mi deibuk. Deibukopura, Musa birye, ‘Ami el si ara, Gersom,’ nyabuka, si dobuk. ‘Ami el si Gersom,’ nyabuka, si dobuka deiyok ara ani. Ara, Ibrani yupu deice arye, Gersom kekena ara, yuk yupu bukni, el yupu deiyok, ‘Otam ninye asiknye, atonun ulule.’ Asi dobuka, Musa birye nyabuk, “Wini talak ara, yuk mutuku noutamak, nara tikilyangananye, ninye asiknye atonun unune,” nyabuk.

²³ Atalak noutamak ara, keting tamun weik, Israel ninye ap, neika amutuku daulamika ani, aminyan talak Mesir mutuku ninye deiyoknye, Firaun dibuk. Tonda, atalak noutamak ara, Israel nang keting tamun deice arye, ikin pil pia talye urdem pil dolamikce, weik mambul kanye bobuka engelamik. Sik ikin pil dona ap, mambul kanye bona ap ati engelamikce, “Se, nun ni Allah melibuka lyepsilyame,” nyabuka morolamikba, Allah arye kekelamuk.

²⁴ Israel nang Allah ati, morolamik ning ara, kekelamukce utenebuk. ‘Kume, Israel ninye, sik apu yapu nang Abraham ap, Isak ap, Yakub ap ati, narye, “Dipkoprop winipnamsine, winipnamsine,” nyabuka nyalilamse ara, tuba tenenuna ati ara, sik biti melinamne,’ tenebuk.

²⁵ Allah arye, “Narye anggun melina ati, winipnamsine,” nyapdeiamuk ning ati, tuba tenelamuka anya arye, sik Israel ninye ati, pia bico tenelamukce, ‘Sik melina ati, yata wiriptinye do?’ tenebuk. Utenebuka ati, Allah arye, ‘Israel ninye, sikda narye dina ap, kalikna ap tuba unamne,’ tenebuk.