Keluaran 19 - Eipomek

Allah arye, Sinai Mutuku deice, pitin kilina ning ulamukba, elilamik yupu

¹ Israel nang Mesir mutuku batakuka, wala winilye deice arye balamika ani, akunum ubukba, Mesir mutuku batakuka binamik sum uk ubukopura, adiparyuk Sinai mutuku biyik. Sinai mutuku ara, mek kumak anya arye, yuk ninye kum ulamikak biyik.

² Ara, min arye Rafidim mutuku ulamikak batakuka, amutuku arye bisik banmeka ani, aminyan talak mek kumak anya arye, ninye pia kum ulamik mutuku biyikce, weik mutuku ton Sinai mutuku laka oubukukak eibik. Mitik atam asukumuk binuka cang baju arye doltakna aik binuka dobuka mabik. Sik urasin tam Sinai mutuku dup laka orupmokak eibik.

³ Atalak ara Musa birye, ‘Allah ap epdanamanam’ tenen, Sinai mutuku dup welebuk. Allah el si Yahweh arye Sinai mutuku dup deice, Musa biti yukubukce nyabuk. “Anyapnukin yupu ara, Yakub birye deibukba, dadeipdanin yangalamika ani, atalak unyak Israel yala ninye ati, koulukuka bimince, nyalbinamlyame,” nyabuk.

⁴ Narye Mesir nang ati wenebukapsirye, oltakalamse ning ara, akunum elilamlume. Tonda anggun babye kele. Narye anggunti, ‘Na tenena ninye’ tenen, Mesir mutuku noutamak lyepsisirye, winipmanto ara, Ambun maka opmanto ning nirya deice lakuka balamle touk, Ambun maka pol deice deibuka na dam boyanamsise.

⁵ Ati ara, anggunce na arepsise yupu moubuka kekepmunce, talipmunyopura, narye anggunti ara, “Na tenen ninye tenepsinirye, pia kalikuka melinamsine. Ara, narye, ‘Wininamlulume, aning ara kum wininamlulume,’ nyalisinye yupu kekebuka dobolbamunyopura, narye pia talinamsine. Mutuku im sirya, mutuku sirya nirya ara, na ninguk ulule. Tonda, tukwak mutuku noutamak ara, yuk mutuku ninye weik aunyak bukni, anggun uk ara, na mapu atonun unamnulume.

⁶ Ati ara, anggunce na yupu moubuka kekepmunyopura, narye anggunti, ‘Sikda weik mambule. Aning ara na si erena ati, Allah ap, ninye ap ansinilina deiyok nang atonun unyake. Anggunda, na balye tam bukmunba, na akwamse ninye, sikda pia telebe,’ tenenamsine.” Allah arye Musa biti nyabuk. Nyabukopura, ayupu ton nyabuk. “Anyapmakin yupu nirya bobuka, sik Israel ninye ati nyalbinamlyame,” Allah arye Musa biti nyabuk.

⁷ Nyabuka ati, Musa ila tuba Sinai mutuku deice arye koulukukce, Israel ninye sik deiyok nang ati bulupdeibukce, sik kekena ati, Allah el si Yahweh arye elti, nyapmok yupu nirya laka nyabukba kekebik.

⁸ Nyabukura, Israel ninye nirya arye, “Telebe nun Ni Allah, el si Yahweh arye nyapmasil yupu nirya ara, aninguk wininamabe,” nyabikba, Musa birye tamubuka anyabik ning ati, Yahweh el dam nyalbiyuk.

⁹ Anyalbiyuk talak ara, Allah el si Yahweh arye tamubuka Musa biti nyabuk. “Na, an dam yanamna ara, weik dua kan-kan yanamne. Dua noutamak yanirye, anti yupu nyapkiniba, Israel ninye nirya babye kekenamniyake. Wininamna deiyok ara, wini talak ara, na yupu an dam nyapkiniba, Israel ninye nirya eibikirye kekebikcopura, anti, ‘E Musa bira, Allah el pil dolinye’ tenen, diba tenebuka kekenamkiyake,” nyabuk. Nyabukura, Musa birye sik Israel ninye arye nyapmik yupu, Yahweh ati laka nyabuk.

¹⁰ Nyabukba, Allah el si Yahweh arye, Musa biti nyabuk. “Ati bimince, sikti, melipminba, arup ap, ambusum ap ara, ‘Talya nanguk ati kum unamabe, Allah el ‘Naʼ tenen, ninye, pia teleb nanguk ati unamap’ tenen, kintinip deipnamake. Tonda, sik baju nirya, mek likuka kintinip deipnamake. An babye winipnamlyame.

¹¹ Anggun nirya aning akunum winipmunye buk, like winilye sum akunum uplyopura, akunuma. Asum anyuk, na Yahweh ara, Sinai mutuku dup, ninye nirya eipmantoak koulukuka yanirye, Sinai mutuku deice deipnaman laka kilin ning eipnamake. Ati, like winilye sum kum upmala talak arye, anggun adiparyuk kintinipnamlulume,” Allah arye Musa biti nyabuk. Ayupu ton nyabuk.

¹² “Tonda, ‘Israel ninye Sinai mutuku dana-dana nirya talye bicak’ tenen, ance yupu seklyame. ‘Winipbikcak’ tenen, nyapnamlyame. Amutuku taram dam welena ap, amutuku deiyok dam binuka talina ap babye, pia meme. Yatanye do nirya, amutuku dam bikirye, amutuku nong yanibuka bilyopura, adiparyuk wenebuka oplopmunba dipnamle,” Allah arye nyabuk. Nyabukabukce ayupu ton nyabuk.

¹³ “Amutuku yaniplirye bilyopura, anye bira adiparyuk keil dobuka el nong deice dopmunce oplopnamlulume. Akumopura, yin arye dobuka opnamlulume. Aoplobikce ning koproba ara, nong bol pina pia meme. Tonda, yata kam un ning do, ninye babye, yuk yala ning nirya babye, domba basam do, kam do nirya, amutuku dam bana kume. Nun bitinye arye nyapmanamak bikcopura, kam pia kum unamake. Ona dem uka. Bukni, na Allah arye nyapnyopura, ninye arye yim domba basam el yang pum bisik arye pubikiba, pong abuka lelim nyapnamle. Lelim weika nyapliba kekebikirye, anang nirya amutuku dam yanamake. Yuk talak ton kume,” Allah arye Musa biti nyabuk.

¹⁴ Nyabukura, Musa amutuku dup arye koulukukce, anang ati melibukba, ‘Allah el ‘Naʼ tenen, nang, pia teleb ninye unamap’ tenen, talima kintinibikce, sik baju mek likuka kintinibik.

¹⁵ Winibikba, Musa birye sikti, nyabuk. “Osum like winilye sum ara ‘Yahweh ap epdanamap’ tenen, kintinina ati ara, wini talak dipdongobuka, like winilye sum atalak ara, kilapu ap manna pia meme.” Musa birye Israel ninye ati nyabuk.

¹⁶ Like winilye akunum uplyopura, asum beren tam, bebeya lakuka, liman obukba, Sinai mutuku deice weik dua welebuk talak ara, bilkong nyana weik arye nyabukba, aulamik ninye kekebikce, lukdanuka kwepdayikce, ilil ubukura, sirim talibuk.

¹⁷ Anirya winibuk bukni, Israel nang ap, Allah ap elana ati, Musa birye Israel ninye nirya bobuka biyukba, amutuku dam amu tamuk binuka tikmek.

¹⁸ Atalak ara dinmekce, tulum arye Sinai mutuku nirya libuk. Aning ara Allah el si Yahweh arye uku noutamak koluka yayuka ati winibuk. Atulum welebuka ara, wa uku ina ibikiba weik tulum dilamle atonun winibukce, amutuku nirya weika arye long-long anmok.

¹⁹ Asum talak, yim domba basam yang dobukabikce weik arye pong-pong anmek ning ara, lelim ara mitik tonun nyanmek. Bukni, uku birye tabakuka bilkong nyana weik arye lelim nyanmok. Awininmokba, Musa birye Allah ati nyabukba, Allah arye tamubuka yupu nyabuka ara, liman olamle atonun yupu Musa biti nyabuk.

²⁰ Allah el si Yahweh arye Sinai mutuku dup deice koulukukce, Musa biti yukubukba, Musa amutuku dup welebuk.

²¹ Allah el si Yahweh arye Musa biti nyabuk. “Ila tamupmince, koulukuka biminyopura, Israel nang ati tonap nyapnulyame, ‘Allah el si Yahweh, el dam binuka eiptibye’ tenen, malya kibuka amutuku dam yangana meme. Nun nyapnimnyak nirya bana kume. Sikce amutuku dam yakceopura, adiparyuk sik ton opnyopura, ninye weik dibikcak tenen atia,” Allah arye nyabuk.

²² Nyabukce, ayupu ton nyabuk. “Tonda Allah ap, ninye ap ansinilina deiyok nang babye, na dam yanukcopura, sik kanye talima nirya pia teleb ubuka utotoa ton winina kumce na dam yanganamake. Kumopura, anang ara wenena ning weika arye arepnamne,” Allah el si Yahweh arye nyabuk.

²³ Nyabuk buk, Musa birye Yahweh ati tamubuka nyabuk, “Aning ara amutuku kum weleptinge. ‘Amutuku deiyok ara, dam yangan meme,’ nyapsiba akunum kekebuka kel kibike. Ance nunti nyapdeiamsululuma ara ani. ‘Amutuku dana-dana nirya laka kibuka sekdongopnulyame. Amutuku ara, pia teleb ak, weik mambul ak, tenepnamlulume,’ nyapsulum ning ara akunum teneipmake,” Musa birye nyabuk.

²⁴ Nyabuk buk, Allah el si Yahweh arye tamubuka nyabuk, “Koulukminba, Harun ap tamubuka yanururume. El ap, an ap tamubuka yarumunye bukni, narye wipnamne nang, ara Allah ap, ninye ap ansinilina deiyok nang, sik imam nang, yuk ning ap ara, amutuku dam yangana kume. Tonda Allah el aik pum pil don nang ap, talye ninye nirya ap, ‘Se Allah el si Yahweh eiptibye’ tenen, malya kibuka yangana meme. Narye “Amutuku ara memak” nyapsak bisibuka yangana kume. Sik yacopura, anang ara wenena ning weika arye arepnamne,” Allah arye nyabuk.

²⁵ Allah el si Yahweh arye ayupu nyabuka ati, Musa koulukukce, Allah arye nyapmok yupu nirya ara Israel ninye ati laka nyalyayuk.