Keluaran 18 - Eipomek

Yitro birye, Musa ulamukak, dilbeyuk yupu

¹ Ura, Musa el yamal koprop Yitro bira, Midian mutuku ulamuk. Yitro elda, Allah si erena ati, aren ning uku dongon pil talibuka pil dona deiyoknye, Imam ulamuk. Ulamukce kekelamukba, yuk nang arye, “Musa birye, Israel ninye Mesir mutuku ulamikbuk, bobuka bisik noutam yangalul talak ara, Allah Yahweh arye Musa ap, Israel ninye ap, sik dam yanuka, weik mambul pil aning-aning nirya winipnin yangalule,” nyalamikba kekelamukce, ‘Musa ap, na ap epdanimirye yupu talipnanam tenen, Musa dam biyuk.

² Yitro birye, ‘Musa dilbinamne tenen, panabuk talak ara, Musa el kil Sipora bira, Midian mutuku tuba ulamuk. Ulamuk ati, Yitro birye el kil ap, el mapu ap bobukce biyuk.

³ Musa el mapu ara, bitinye deiamuk. Yubuka deiamuk mi el si ara, Gersom Tonda el weit koproba el si ara, Elieser Sik amapu bitinye ara, sal mapu diamuk deiamuk. Dunye el si ati, Gersom nyabuk deiyok ara, ‘Na amutuku yanuka Unun ara, ninye asik nang atonun ununaʼ tenena ati, ami el si Gersom nyabuk.

⁴ Tonda, el weit koproba el si ati, Elieser nyabuka si dobuk. Elieser nyabuka deiyok ara, ‘Na punun nang si erelamiknye Allah Yahweh arye, akunum melibuka lyepropnukba, Mesir mutuku ninye taleamuknye Firaun birye, ton kum opnukeʼ tenena ati, aminyan deibuk mi ati, el si Elieser nyabuka si sibuk.

⁵ Musa el yamal koproba Yitro birye, Musa el kil Sipora ap, tonda Musa el mapu bitinye ap, bobuka Musa dam yayik. Ara, Musa ulamukak, pata weik mutuku, mek kum ati, ninye kum ulamik mutuku bukni, weik mutuku Sinai mutuku dam yayik. Ara Allah Yahweh elda malye ning tonok babye kum ululnye anya arye, amutuku deice arye, yanuka yupu nyabuka ati, amutuku ati, ‘Pia teleb koprop mutuku,’ nyalamik. Atalak ara, Musa birye, tia ati tenda arye dobuka ulamuk asik dam yayik.

⁶ Musa dam yanuyik talak ara, Yitro birye, “Yupu nyalilbilulume,” nyapdeibukopura, yuk nang arye, Musa biti, “Amio, an yamal koproba Yitro ap, an kil Sipora ap, an mapu bitinye ap nirya ara akunum yanmake,” nyabuka lake nyabikba, Musa kekebuk.

⁷ Ayupu Musa dam laka nyabikba, kekebukopura, tia ati baju arye dolamik aik, bai tam biyukce, ‘Na yamal binyab epdananamʼ tenen, Yitro yanganmok bisik dam biyukce, sik nirya epdayik. Akunum epdayikopura, Musa birye, el yamal koproba Yitro el dam yayukce, ‘Kipnun tenen, ngang kanupdongobukce, Yitro iribuka mutubuk. Tonda, Musa ap, Yitro ap, sik mamum asipdarikce, “Teleb ulyam do, uk ton dikulul do?” nyabuka, asipdarikopura, sik anirya Musa el baju bola arye dolamik aik pum tam wekik.

⁸ Aik akunum wekikura, Musa birye, el yamal kekena ati, Allah Yahweh arye meilyamukba pil dolamuk ning nirya ati lake nyanmok. Ara ninye deiyok kibuka, Mesir mutuku ninye taleamuknye Firaun dam ap, Mesir mutuku ulamik ninye sik dam ap, Allah Yahweh arye, ninye winipmanto kum ning aning-aning nirya winibukce, Israel ninye lyebuka, boyanamuk ning nirya ati lake nyanmok. Tonda, Israel ninye Mesir mutuku batakuka, Kanaan mutuku yangalamik talak, sik dam kanye imun ning aning-aning nirya ara, angyalamukba ikin kanye bobuka upnin yangalamikba, Allah Yahweh arye, lyebuk ning nirya ati, Musa birye laka nyabuk.

⁹ Musa birye, aning nirya akunum laka nyabukura, Yitro kekebukce, pia kanye weik deibuk.

¹⁰ Winibukopura, ayupu nyabuk. “Sik Mesir mutuku ninye nirya ati, taleamuk ninye deiyoknye Firaun, el taruk deice arye, sik Israel ninye taleamukce, ikin ning sik nong deice delilamuk bukni, Allah Yahweh arye lyepsuk ning ap, tonda Mesir mutuku ninye sik kan-kan arye, ikin pil dilamsikba, imun kanye bobuka, ikin pil weik dolamlum bukni, Allah arye melibuka lyepsuk ning ap nirya ara, narye, anggun ni koprop Allah Yahweh ati, weik arye telebe nyapsine.”

¹¹ Yitro birye nyabukopura, ayupu ton nyabuk. “Wini talak ara, ance ayupu nyapmanilam deice arye, dipkoprob na akunum bikmane. Anggun ni koproba, Allah Yahweh ara, dipkoprob mikip weiknye ulule. Yuk ninye nirya arye, talye ning yala-yala nirya ati, “Nun ni koproba, nun kwepdeipsuknye,” nyabuka, si erenyak ning ara, talye atibuk si erebuka kinyake. Asi erenyak ning yala nirya ara, Allah Yahweh el amu tamuk unyake. Allah anggun nong deice ulule anya arye, el mikip weik ulul bukni, sik si erenyak allah ara, talye ati wininyake. Tonda aning ara, na akunum kel bikinune. Mesir mutuku ninye arye, ‘Nunda mikip weik nang unyabe,’ tenebuka, kwalilamikce, sik kanye erelan nang ulamik anye, Israel ninye ati, ikin weik ning sik nong deice delilamik bukni, Allah Yahweh arye, “Mesir mutuku nang ati nirya obuka dakuke. Aning nirya winibuka ati, ‘Elda, mikip pia weiknye ululeʼ tenen, akunum bikmane,” nyabuk.

¹² Nyabukopura, Yitero birye, Allah Yahweh ati, ‘Telebe,’ nyapnirye, ‘Uku dongopnunʼ tenen, Allah el arena ati, kam ning ton obuka kintinibuk. Ara, kam ning obuka uku dongon ning ap, yuk yala arena ning ap bobuka, Allah Yahweh el dam boyayuk. Atalak ara, Harun ap, Israel ninye sik deiyok-deiyok nang nirya ap, Yitro dam yayikura, bulubuka bukmekce, Yahweh el si erena ati, neika roti kwaning dinmek.

Musa birye, ninye yupu lipsisikilina deiyok nang, wipdeibuk yupu

¹³ Mapmeka akunum berekukopura, Musa birye, sik Israel ninye atibuk, yu yupu deice walalamikce, oldalamik ati, yupu talibuka lipsisikilinmok. Apil ara, beren tam talak arye deiyok koubuka donmoka ani, sintam kipmoka ani, inipdongobuk.

¹⁴ Atalak ara, Yitro birye Musa apil dolamuk ning nirya akunum bikamuk ati, Musa biti, asipdeyuk. “Ance aninye ati pil donalama ara, yata wiribuka pil donamlam do? Tonda aning nirya ara, an tonoknye biryuk, aninye nirya ati, yupu lipsisikin pil donamlam do? Ara abukmaminba, aninye nirya yanuka tikikirye, yupu nyabikiba, an tonoknye biryuk, yupu lipsisikuka bokolinamlam do? Ayupu nyana ati ara, an tonok aryuk, beren tam talak arye apil dona ati, deiyok koubuka tikmaminye ani, sintam kiplirye inipnamle do? Awininmalama ara, yata deiyok ati wininmalam do?” nyabuka asipdeyuk.

¹⁵ Yitro birye Musa biti, nyabuka asipdeyuk ati, Musa birye tamubuka nyabuk. “Kume, aninye nirya ara, na dam yakirye, sik yupu laka nyapdeipnikiba, Allah Yahweh arye, ‘Anye winiptinge, tonda teleb ning ara, winipnamake,’ tenelul ning nirya ara, narye, sik anang dam lake nyanune.

¹⁶ Tonda, sik babye Israel ninye sik mamun yu upliba, yupu deice arye walanamak ning nirya babye, na dam yakirye, lake nyabikiba, narye, ‘Aning ara, wininamlume, aning ara, pia kum wininamlume,’ nyabuka, yupu lipsisikuka bokolinune. Tonda Allah arye, ‘Aning ara, wininamlume, aning ara, pia kum wininamlume,’ nyabuka, el mem yupu nyapdeipsuk ninguk, narye, sik aninye kekenak lake nyalinune,” Musa birye, el yamal Yitro biti, laka nyabuk.

¹⁷ Musa birye nyabukce, apil dolamuk ning nirya ati, el yamal koproba Yitro birye nyabuk. Kume, apil dolyam ning ara, teleb pil dolyam bukni, an tonoknye biryuk ato pil nirya ara, teleb ubuka kum dopnamtum ati, aning ara, malye weik ulyame.

¹⁸ Ara, talye dem kum nyapkine. Deiyok ara, an tonoknye biryuk ato pil donmaminya ara, mikip kum dakilirye, metang upnamkile. Atonun tonda, an yupu kekena ati, yanamak nang babye, sik mikip kum dalirye, lik unamle. Adonalam pil ara, ikin weik pil ati, ancuk apil teleb ubuka kum doptume. ‘Apil donmaminya ak, an mikip kum dakilyakʼ tenen, nyapkine.

¹⁹ Ati, atalak ara, Musa anda, na nyapnukin yupu nirya ara, pia moubuka kekepnulyame. Ara, narye, ‘Teleb wininamlam ning ara ani,’ nyabuka lake nyapnukine. Tonda, ‘Allah arye anti, ‘Melipnamkilʼ tenen, Allah ati morokunune. Dipkoprob ance Israel ninye nirya, sik melina ati, Allah ap, Israel nang ap, ansinilina deiyoknye unamlyame. Ara, sik malye unamak ning nirya ara, ance bobuka, Allah el mikip weiknye dam bobanalame.

²⁰ Sik Israel ninye arye an dam yanamak talak ara, ance sik kel bikna ati, ‘Allah arye, “Winipnamlume, aning pia kum wininamlume,” nyabuka peterenamlyame. Tonda, Allah arye, ‘Aning telebe, aning malye nyapsuk ning ton lake nyanamlyame. Tonda, ‘Teleb bisik benamluma ara ani, pia kum binamlum bisik ara ani,’ nyabuka, lake nyanamlyame. Atonun, ance, ‘Teleb pil donamlam ning ara, ani. Malye uning ati, apil ara, kum donamlume,’ nyabuka, Israel ninye ati peterenamlyame.

²¹ Bukni, wininamlam talak nirya ara, ‘Na yupu nyan pil ati, na melin nang unamakʼ tenen, ance dipdebuka, ninye ara, yata wiribuka nang do? Ninye ton wipdeipnulyame. Sik anang ara, kanye moubuka tenebikirye, yupu nyapmanto nanguk wipnamlame. Ara, ‘Teleb arye pil dopmanto nang ara, anye tenepmince, ananguk wipdeipminba, yupu lipsisikin pil talibuka unamake. Ara, sik anang noutam arye bokdeipminba, ton deiyok nang arye, ninye yupa ara, pia weik seribu (1.000) nang ati, yupu lipsisikuka talinamake. Ton deiyok nang arye, ninye yupa ara, 100 nang ati, yupu lipsisikuka talibuka unamake. Atonun, ton deiyok nang arye, 50 nang melina ati talinamake. Ton deiyok nang arye, ninye 10 nang melina ati, yupu lipsisikuka talibuka unamake. Ance, ‘Yupu lipsisikin pil talibuka donamakʼ tenen, adeiyok nang wipdeipnamlyame. Tonda, ance awipdeipnalam nang ara, talye nang kum wipdeipnamlyame. Anang ara, ‘Malye ubibya ati, Allah arye wenepsilyakʼ tenen, Allah ati, ilil kanye bobuka, elti, dib tenibuka unyakce, tilila yupu talye kum nyalamak nang ap, tonda ‘Sikda, yo bok weik dopropnamapʼ tenen, namin kin yo bok ton, pia kum dolonyakce, telebuk unyak nanguk wipdeipnamlyame. Tonda, yuk nang arye, sik anang ati ara, ‘Sikda, telebuk unyak nang ati, anang ati dipkoprob tenepnamap,’ tenenyak nanguk wipdeipnamlyame.

²² Sik anang wipdeipminyeura, ance, ‘Wininamlume,’ nyabuka sik dam lake nyapminyeura, sikce, Israel yala ninye nirya ati, yupu lilsisikna deiyok kin nang unamake. Tonda yupa yuk-yuk bokolinalume. Winibuka, sik pil arepminyeura, moubuka donamake. Winibikirye, Israel ninye arye, weik malye upmace ning ara, ance yupu lipsisikuka nyanamlame. An melin nang arye kume. An melin ati, wipdeipnamlam nang ara, Israel ninye arye, mitik caknam arye, malye upmace ning ara, sik damang lipsisikuka yupu talenamake. Ikin weik ning, sik anang arye lipsisikmanto kum ubice ning ara, an dam boyaceura, ance yupu talibuka lipsisiknalame. Bukni, mitik caknam ning ara, sik anang aryuk, yupu talibuka lipsisikinamake. Winipnamak deice arye, an pil dona ara, caknamuk kinamkile.

²³ Anyapmakin touk winipminyopura, Allah Yahweh arye, ‘Musa birye winipnilyopura, Israel ninye teleb deice unamak,’ tenebukce, ayupu uk nyapdeipsutumopura, adeice arye, Israel ninye nirya, sik ikin weik ning ap, tonda malye ulanamak ning ap ara, ance apil dobuka, yupu talibuka lipsisiknalam talak ara, mitang kum upnamkile. Teleb arye pil donalame. Tonda, sik Israel ninye nirya, an ap, an melina ati wipdeipnamlama deiyok nang anya arye, yupu lipsisiknamlam ning kekebikirye, kanye teleb upliba, ‘Telepe akunum,’ tenebikirye, sik babye ulamicakuk, teleb kanye arye tamubuka banamake. Yitro birye, Musa biti ayupu nirya nyabuk.

²⁴ Nyabukopura, Musa bira, el yamal koproba Yitro birye, ‘Wininamlame,’ nyabuka atonun, aninguk winibuk.

²⁵ Winibuka ati, Israel ninye sik kan-kan noutam, Musa birye, ‘Anang ara, yupu lipsisikna deiyok nang ubikirye, Israel ninye sik deiyok-deiyok nang unamakʼ tenen, dipsukum ubuka, teleb ulamik nanguk dipdeyukce, wibuka erepdeibuk. Israel ninye, sik yupa ara, seribu (1.000) nang bokdeibukce, sik yupu lipsisikna deiyoknye ton wipdeibuk. Atonun ton, Israel ninye ton, seratus (100) nang bokdeibukce, sik deiyoknye ton wipdeibuk. Atonun ton, lima puluh (50) nang ati, sik deiyoknye ton wipdeibuk. Tonda 10 nang ati, sik deiyoknye ton wipdeibuk.

²⁶ Musa birye, sik anang wipdeibukura, Israel ninye kan-kan noutam ulamikce, Israel ninye sik malye una kanam to upne ning ara, sik anang aryuk kekebuka, yupu lipsiskuka bokolilamik bukni, ikin weik upne ning ara, aninye arye bobuka Musa dam binura, Musa birye aikin ning nirya ara, lipsisikuka bokolilamuk. Bukni, Israel ninye arye, sik malye una caknamto ning ara, adeiyok nang dam yanuka, lake nyalamikba, sik anang aryuk, yupu talibuka, lipsiskuka bokolilamik.

²⁷ Sik nirya daulamika ani, aminyan talak ara, Musa birye, el yamal koproba Yitero biti, “Telebe an mutuku koprop, tamubuka dabinulyame,” nyabukba, Yitero el mutuku koproba tamubuka biyuk.