Keluaran 17 - Eipomek

Musa birye, weik keil obukba, mek kutuka yayuk yupu

¹ Atalak ara, Israel ninye nirya, Allah el si Yahweh arye, “Aning ara, wininamlulume,” nyabuk touk, amutuku-amutuku nirya bisipnin balamik. Balamika ani, mek kumak anya arye, ninye kum ulamik mutuku, mutuku si Sin mutuku arye dinibukabikce, mutuku si ton Rafidim mutuku biyikce, cang baju arye barasik, binuka dobik. Aik dobik bukni, amutuku noutamak babye, mek pia kum uamukba, sik Israel ninye arye mek kum dinmek.

² Israel ninye ara mek kum dinmeka ati, sik aninye arye Musa biti, weik arye malye kibuka uanmek. “Wini talak ance nun mek arepsiminyeba diptibye,” nyanmek. Nyanmekopura, Musa birye tamubuka nyabuk. “Anggunda yata deiyok ati, nati malye yupu nyanmanulum do? Dipkoprop Allah el si Yahweh ati winilen atonun wininmaluma ara, yata ati do?” nyabuk.

³ Nyabuk bukni, Israel ninye mek pia patana unmoka anya arye, Musa biti weik arye malye kibuka uanmek. “Ance yata ati Mesir mutuku arye bobuka yasulum do? Winipsulumba, amutuku mek pia kum ati, nun ap nun mapu ap, nun weilamap ning ap nirya ara, pia dipnamabe. ‘Dadipting’ tenen, boyasulum do?” nyabuka, malye kibuka uanmek.

⁴ Nyabuka malye nyanmeka ati, Musa birye Allah el si Yahweh ati nyabuk. “Se na nio, aninye ati ara, narye yata wiriptinye do? Dipdelyame, sikda ‘Keil dobuka Musa opnuyap,’ tenepmanika ati, na ikin upnile,” Musa birye Allah ati nyabuk.

⁵ Nyabukopura, Yahweh arye Musa ati nyabuk. “Winira anda sik urasin tam menekuka banulyame. Tonda, ance Israel ninye deiyok nang yukupminyeba yanuka dinmacak arye minop talak ance mek si Nil mek kulapmalum kama dobuka banulyame. Ara, Israel nang bobuka boyanamlum talak boyangaminye kama bobuka banulyame.” Allah arye nyabuk.

⁶ Nyabukce, ayupu ton dukdongobuka nyabuk. “Ura, bisik banmaminya ani, mutuku si Horeb mutuku biminyopura, na Allah arye weik keil deice bukni, sik urasin tam tiknamane. Akeil dam yaminyopura, an boplum kama arye, weik keil kulapminyeba, akeil pum bisik noutamak arye mek pakuka saklibuk, Israel ninye arye dinamake,” Allah arye nyabuk. Aning nirya nyabuk touk, Musa arye Israel deiyok nang dinmekak, el kama arye weik keil mikip arye kulaplobukba, mek kutukuka yayukba dinmek.

⁷ Winibukopura, Musa arye amutuku si ati, Meriba mutuku nyapdeibuk. Amutuku si nyabuka deiyok ara ani. Ara, sik Israel ninye arye Musa ap, Allah el si Yahweh ap ati, malye-malye nyanmekce, “Yahweh dipkoproba nun ap unyap do, kum do?” nyanmeka ati, amutuku si Meriba nyabik. Sik yupu deice arye, Meriba nyabika deiyok ara, ‘Malye nyana’ nyanyake. Aning atonun, amutuku uk bukni, Musa arye yuk si ton nyabuk. Ara, Masa mutuku ton nyabuk. Aning nyabuk ning ara, Israel ninye arye Allah ati malye nyabukabikce, Allah ati winilen atonun wininmeka ati, amutuku si ati Masa ton nyabuk. Sik yupu deice arye, Masa deiyok ara, ‘Winilina’ nyanyake.

Ninye yala Amalek nang arye, Israel ninye ati, obuka dakik yupu

⁸ Israel ninye, Rafidim mutuku noutamak tuba unmek talak ara, Amalek yala nang arye, ‘Israel ninye opnamap’ tenen, amutuku yanuka warikmekce, Israel nang ati, mal dolyayik.

⁹ Sikce, ‘Anang obuka daknuyap’ tenen, yanganmek talak ara, Musa birye Yosua biti nyabuk. “Ance ninye wibuka deipminba, Amalek nang ap olana ati kintinipnamlulume. Ambusum ara, Amalek yala nang ap mal olanmamunye talak ara, na mutuku deice welebuka tikmanirye, Allah arye arepnukba, bobuka banye kama ara, na taruk arye erebuka talipnamane,” Musa birye Yosua biti nyabuk.

¹⁰ Nyabukopura, Yosua bira Musa nyabuk touk, ninye bobuka Amalek nang nyalbiyuk. Winibukopura, Musa ap, Harun ap, Hur ap, mutuku deice welebik.

¹¹ Welebikopura, Musa birye el kama dobuka el taruk pia erebuka tikmok talak ara, Israel nang arye Amalek nang obuka dakik bukni, Musa el taruk erepmoka batakukba, taruk batakuk talak ara, Amalek nang arye Israel nang obuka dakik.

¹² Wininmekbuk, Musa el mitang ubukba, Harun ap, Hur ap, sikce keil pala dobuka deiprikba, Musa akeil deice bukuk. Bukukopura, Harun ap, Hur ap arye ‘El taruk batakdongobibyopura, kum bataknamal’ tenen, Musa el taruk dana-dana talibuka erepdeipdikba, Musa el taruk tuba mikip arye erebuka talipmarik talak ara, el kama daraptalipmokba, Amalek nang ap, Israel nang ap, mal pia olanmek ani, keting kum ubuk.

¹³ Winipmeka ati ara, Yosua ap, Israel nang ap, sik parang ya arye, Amalek yala nang obuka sirya dakik.

¹⁴ Akunum obuka sirya dakikopura, Allah el si Yahweh arye Musa biti nyabuk. “Awinipmuk ning nirya ara, yuk talak nirya ‘Winyamik’ tenen, tenina ati, domba bol mikamuk ning dobuka sekna ning deice arye abol deice seknamlyame. Ara, luba kina kum, Israel ninye pia tenenamaka atia. Tonda aning nirya Yosua el kekena ati nyanamlyame. Deiyok ara, Amalek nang arye Israel ninye obuka sirya dakika ati, ‘Aminyan talak yuk ninye nirya arye, Amalek ninye sik si ila tuba tonap kum tenipnamak’ tenen, sik si kum kipdeipnamne,” Allah arye Musa biti nyabuk.

¹⁵ Nyabukopura, Musa birye asukumuk keil pala dobukabukce, keil taplakra pipdeibik. Deiyok ara, ‘Aning deice Allah el si Yahweh, el si kina ati, kam ning obuka uku sekuka dapnamap’ tenen deibuk. Tonda amutuku si sidobuk. Amutuku si ati, Allah arye na erepdeipnuk mutuku nyabuk. Asi deiyok ara, ‘Allah arye melipnukba, malye nang sirya dakuka obupu’ tenen, asi nyabuk.

¹⁶ Tonda Musa arye nyabuk. “Allah el si Yahweh ara, ‘Weiknye buna ning deice bukuka, elcuk melipnamsil’ tenen, na taruk erepse. Yahweh arye sik Amalek nang ati, batakna kum, doryanamle keting tamun nirya deice arye, pia sik Amalek nang onauk unamle,” Musa birye nyabuk.