Keluaran 16 - Eipomek

Allah arye Israel ninye ati, din ning ap, maka ap, arebuk yupu

¹ Elim mutuku daulamika ani, aminyan talak wala bitinye ning noutam bukni, Mesir mutuku batakik talak arye nukuka, wala tonok deice arye abalamikba, wala bitinye tanggal lima belas akunum ubukopura, atalak ara Elim mutuku batakuka ninye kum ulamik mutuku noutamak, mutuku si Sin mutuku wekelbiyik. Sin mutuku ara, Elim mutuku atam, Sinai mutuku ortam, anoutamak ubuke.

² Amutuku noutamak ara, mek ap, aning-aning nirya ap kum uamukba, ninye kum ulamik mutuku anya arye, Israel ninye amutuku noutamak balamikce ulamik talak ara, Israel ninye arye Musa ap, Harun ap ati, din ning patalamukba, weik arye malye nyalamik.

³ Sikce nyanmek ning ara ani. “Nun tuba Mesir mutuku ulamupu talak ara, Allah el si Yahweh arye akunum daomsutue. Mesir mutuku ulamupu talak ara, din ning weik ubuka anya arye, tup ning weik yubuka, talye kanye bobuka, lukuka dilamuburye, nun patalamsuk touk, weika arye roti kwaning ap, aning ayala-yala nirya ap dibuka telebuk ulamupu. Mesir mutuku winibuka ulamupu bukni, ance yata ati amalye mutuku bobuka yasulum do? Din patana deice arye dipnamap do?” nyabik.

⁴ Nyabuka malye nyanmekba, Allah el si Yahweh arye Musa biti nyabuk. “Dipkoproba nyapne. Im deice din ning, el si ara manna kwaning, na im deice arye mok purwu atonun kibuka dopreipnamane. Winipniba, anggun Israel ninye nirya arye, tonok sum uk dinamak ning ati, bulubuka tonokak deibikirye, dinamalume. Winipnaman deice arye, asipdenamasine. Ara, ‘Israel ninye arye, na nyanye yupu kekebikirye, anyapman touk unamak do, kum do?’ tenen, dipdenirye asipdenamasine.

⁵ Ati, yuk asum-asum nirya ara, tonok sum ninguk buknamake. Bukni, nakub sum arye din ning like bitinye sum deice dinamak ning ara, bulubuka deibikirye dinamake. Tek barye sum deice kum buknamaka atia.” Allah arye nyabuk.

⁶ Allah arye nyabuka ati ara, atalak ara Musa ap, Harun ap arye, Israel ninye nirya ati nyaprik. Arup sintam ara, ‘Allah arye mambul pil dopsilyeba, anggunce, dipkoprop, nun ni Allah Yahweh arye, Mesir mutuku arye bobuka, yangalamsuke’ tenen, kel kipnamlume.

⁷ Aning atonun, ambusum beren tam ara, anggun dam Allah el si Yahweh arye, el mikip deice upnamal ning upliba eipmunyopura, ‘Se Allah ara dipkoprob mambule’ tenenamalume. Anggunce Allah ati derebuka malye nyaplumbuk, Allah kekesulula ati, el mikip deice arye pil dopnamasile. Na ap, Harun ap ara, nun bitinye ara mambul weik nang kume ati, malye nyanmasulumce derenmasulum ning ara, yata ati do? Malye nyanmasulumce derenmasulum ning ara, dipkoprob Yahweh ati nyanmaluma.

⁸ Anggunce Allah ati malye nyanmalum ning akunum kekepmasila ati, Allah arye sintam tup ning arepnamasil ning ap, beren tam talak im deice manna kwaning arepnamasil ning ap, eipmunyopura, ‘E diba, Allah el si Yahweh, elcuk aning arepsile’ tenen, kel kipmunce talima namin asa unamlulume. Anggunce na ap Harun ap ati, malye-malye nyabuka deresumunye ning ara, yata ati do? Nun bitinye ara mambul nang kume. Dipkoproba anggunce Yahweh ati malye nyanmalume, nunti kume. Musa birye Israel ninye ati nyabuk.

⁹ Nyabukopura, Musa birye Harun biti nyabuk. “Ance Israel ninye kekenak nyapnulyame. Anggunce malye nyanmalum ning ara, Allah arye akunum kekepmasila ati, adiparyuk Allah el si Yahweh dam yanuka bulupnamalume.” Musa birye Harun biti nyabuk.

¹⁰ Nyabukura, Harun birye aninye yukubukba yayikopura, Harun birye el yupu Israel ninye nirya ati tuba nyanmok talak ara, sik nirya arye ninye kum ulamik mutuku, pata mutuku tam tamubuka dinmikce, weik dua noutamak, talye karin arye Allah el si Yahweh, el dirina weika arye ubukba eibik.

¹¹ Atalak aryuk, Yahweh arye Musa biti nyabuk.

¹² “Israel ninye sikce kanye imun kanye bobuka, malye nyanmaka ara, narye akunum kekepmane. Ati ance, sik Israel ninye ati, nyapnamlyame. Arup sintam ara, tup ning arepneba dinamalume. Tonda, mapmamunya beren tam talak ara, im deice kwaning, el si ara manna arepneba, dinmamunyebuk, boupnamasile. Winipmunyopura, adeice arye, ‘E dipkoproba, Allah elda nun Ni Yahweh, nun weik deiyoknye usulule,’ tenebuka kel biknamanulume,” Allah el si Yahweh arye nyabuk.

¹³ Nyabukopura, anyapmok touk sintam talak, Allah arye dopkwetebukba, im deice arye Riklinye maka atonun maka, weika arye yayikba, sik aik dana-dana tam nirya wekikba langdibuk. Mapmeka beren tam talak ara, Allah arye mok purwu atonun ning arebukba, sik aik nirya langdibuk.

¹⁴ Winibukopura, amok purwu keting tin arye buppu upkukce, bilikuka banmokce, mok purye sakanmokba, apata mutuku deice, mek silong bulamle touk, kurun ning tukwak nirya siknipdongobuk. Aning ara, es urasin atonun kurubuk.

¹⁵ Winibukba Israel ninye eibik bukni, sik walwal ati, “Aning ara yata ning do?” nyabuka, sik bidamang uk asilanmek. Nyanmekbuk, Musa birye sikti, nyabuk. “Aning ara, Allah el si Yahweh arye anggun dina ati, im deice arye roti atonun ning, el si ara manna arepmasil ning atia,” nyabuk.

¹⁶ “Allah el si Yahweh arye, ‘Aning ara wininamlululme,’ nyapmasila ara ani. Anggun yuk-yuk ulamlum touk, aning nirya bulubuka anggun patasilye touk dobuka deipmunce, tonoknye bira, ikin bitinye ninguk, dobuka dipnamlulume. Ara, tonoknye ara, tiga liter, tonap setengah liter nukuka dipnamlulume.” Musa birye nyabuk.

¹⁷ Nyabuk touk, Israel ninye arye yuk-yuk bulubuka deibik. Sik yuk-yuk aulamik touk nukuka bulubika ati, ton weik yupa nang ara weika arye deibik. Ton mitik yupa nang ara, mitik anun uk bulubuka deibik.

¹⁸ Ati ara, aning weika arye bulubuka deibik ninye ara, weik kum ubuka ati, kwal kum deibik. Tonda mitik anun arye bulubuka deibik ninye babye, mitik ubuka babye kum suktalibik. Aning-aning nirya, sik patalamuk touk bulubuka deibuka dilamikba, tonap kum patalamuk. Ara, Allah arye nyabuk touk, tonoknye ikin bitinye ning bulubuka lipdeibikce nukika atia.

¹⁹ Musa arye sik aninye ati nyabuk. “Yata ninye do nirya, adin ning akunum dipmunyopura, tonoknye babye mitik anun ton kwal kum deipnamalume. ‘Arup bulupmanye ning ara, kwal deipmanya beren tam talak ton dipnaman’ tenena kume,” nyabuk.

²⁰ Nyabuk bukni, ton nang ara, Musa nyabuk yupu kum kekebikce, malya kibuka aning ara, dinmeka ani, batakik ning ara, kwal deipmek. Kwal deipmekba lyubukce, beren tam talak tong welebuk. Tong welebukce ku pia weik ubuk. Winibukba, Musa birye sik aninye ati, derebuk.

²¹ Asum-asum nirya beren tam talak ara, sik patapne touk, aning bulubuka delilamik. Bululamik bukni, keting tin arye deipna arye, ibarya welepna arye dakalsaklamuk.

²² Nakub sum ara, kwaning like bitinye talak din ning ati, bulubuka deibik ning ara, tonoknye ikin dumbarye libuka deibik. Winibikba, sik Israel deiyok nang arye yanuka Musa kekena ati laka nyabikba, kel kibuk.

²³ Ati ara, nakub sum arye, Musa birye sik aninye ati nyabuk. “Aning ara, Allah el si Yahweh arye nyapdeipmasile. Ambusum tekbarye sum ara, pil aning-aning nirya kum dopnamalume. Ambusum ara yuk wibuka, dikdik sena sum upnamasile. Ara, Allah el si Yahweh, el si erena sum ati, wibuka kintinip deipmunce diksukumuk unamlume. Arup ara, Yahweh el si kina ati, kintinilinamlulume. Ambusum, tekbarye sum pil kum dopnamluma anya arye, arup ara anggunce, ‘Akwaneng dabuka dipnaman,’ tenepmunyopura, teleb uka. ‘Arup arye mek buppu din ning yupnuyap,’ tenepmunyopura, ara teleb uka. Akunum mapmamunya ani, kwal tuba deipmamunyopura, ambusum beren tam dina teleb uka,” Musa birye nyabuk.

²⁴ Nyabukura, Musa arye nyapdeipmok touk, sikce din ning dinmeka ani, weik ubukba tuba batakik ning ara, ambusum tekbarye sum ning ati, kwal deibik. Sikce kwal dadeipmek ning ara, tekbarye sum dipnamik ning ara, tong kum nyabukce, ku kum ubuk. Teleb uk ubuk.

²⁵ Asum ara, Musa arye adiparyuk dukdongobuka nyabuk. “Ambusum din ning bulupmalum ning ara, arup tekbarye sum aryuk nirya dinamalume. Arup ara, Allah el weik mambul sum, Sabat sum upsile. Arup deice, Allah el si kina ati, dikdik sena sum ati, anggunce Allah el si erebuka unamlume. Tonda ‘Din ning buru tam tuba aupmal do?’ tenen, dipdemunyopura, kum eipnamalume. Tek barye sum deice ara im arye saknamle kwaning el si manna kum upnamla atia.

²⁶ Yuk-yuk sum noutamak, nakub sum deice arye, din ning nirya libukapmunce, bulubuka aik deice delinamlum bukni, Tek barye sum ara, dikdik sena sum upnamasila ati, asum ara din ning tonok ning babye kum arepnamasile,” Musa arye nyabuk.

²⁷ Nyabuk bukni, ton nang ara, tekbarye sum deice buru banmekce, ‘Din ning aupmal do, kum do? Aupmalyopura, bulupnamap’ tenen, epra banmek bukni, pia kum eibik.

²⁸ Dipdeyikbuk, kum eibikba, Allah el si Yahweh arye Musa biti nyabuk. “Ura, ‘Tek sum aning elbana kume,’ akunum nyapsise bukni, yata talak karin ton, narye ‘Aning ara wininamlulume, aning ara kum wininamlulume,’ nyabuka deresinye yupu nirya ati, anggunce kekebuka talye kanye bobuka unamlum do?

²⁹ Ati ara, anggunce pia moubuka teneipnamlulume. Allah el si Yahweh arye, dikdik sena sum anggunti, akunum kintinip deipmasile. Ati, like nakub sum deice ara, narye din ning arisinye ning ara, like bitinye deice dinamlum ning aresunune. Ara, tekbarye sum din ning atia. Akunuma. Tek barye sum ara, aninye buru tam tonok ton pia bana kume. Aikuk dikdik sebuka unamlume,” Allah arye nyabuk.

³⁰ Allah arye nyabuka ati ara, atekbarye sum noutamak nirya ara, pil pia kum dolamikce, dikdik senauk ulamik.

³¹ Allah arye kwaning ara, yo kita atonun ning arebukba, sik Israel ninye arye ‘Aning el si ara manna ulule’ nyalamik. Akurun ning ara, tomat duk atonun pia mitik ubuk. Tonda, mong mek dibikiba, to nyalamle touk ning ubuk.

³² Tonda, Musa arye nyabuk. “Allah el si Yahweh arye nyapsuke. Akwaneng ning el si ara manna bulubuka, ikin bitinye libukapmunce, dokola deipnamlulume. Telebak deipmunyopura, dapia unamlume. Ara, aminyan doryanamle talak noutamak ara, manna ning deipmalumba, anggunce deiplumbuk dadeipdanin, banamak ninye nirya ara, sik bidamang aning dilyanganamak. Ara, Mesir mutuku noutamak, narye lobuka boyasise talak, yini mutuku noutamak arye manna kwaning arepsiba, dinmalum ning ara, anggun mapu nirya kel kipnamaka ati, nyapsine,” Allah arye nyabuk.

³³ Allah arye nyabuka ati ara, Musa birye Harun biti nyabuk. “Ance yangalin ning dobukapmince, apum bisik manna kwaning dua liter bulubuka, aning pum bisik dongopnulyame. Akunum dongopminyopura, bublan tirikuka, Allah el si Yahweh, el dinak deipnamlyame. Winipnamlama deiyok ara, doryanamle talak noutamak nirya ara, nunce deibibyeba dordeipre banamak mapu nirya ara, sik babye aning dilyanamake. Aning ap, Allah ap ati pia tenebuka banamabe,” Musa arye nyabuk.

³⁴ Nyabukura, Harun birye aning makau pum bisik lipmok ning dobukabukce, Allah el si Yahweh arye nyabuk touk winibuka, ‘Allah nyalin yupu lilongonak deipnulyame,’ nyabuk touk, ‘Aning pia tenenamap’ tenen, telebto ak uk deibuk. Ara, Allah arye Musa biti nyabuk touk winibuk.

³⁵ Amana kwaning ara, Israel ninye yupa tonok keba obarye (40) keting tamun deice noutamak arye, aninguk dibuka balamik. Aning dilamikce ninye kum ulamik mutuku noutamak balamika ani, aminyan talak yuk mutuku binuka wekelbiyik. Ara, ninye akunum asik dobuka ulamik mutuku wekelbiyik. Amutuku si ara Kanaan mutuku. Keting tamun 40 deice arye, aning dipra balamika ani, Kanaan mutuku sirya wilinak yayik talak ara, tuba dinmek bukni, atalak aryuk batakik.

³⁶ (Minop talak ara, sik Ibrani nang arye, 2 liter nungna ati ara, ‘tonok omerʼ nyalamik. Tonda, 20 liter nukuka deililamik ning ati ara, sukce ‘tonok efaʼ nyalamik.)