Keluaran 15 - Eipomek

Allah arye, Mesir ninye obukba, Musa ap, Israel ninye ap, Allah Yahweh el si erebuka, mot nyanmek yupu

¹ Allah arye, Mesir mutuku yin talin nang obukopura, Musa ap, Israel ninye ap, Allah el si Yahweh ati, kanye deibuka, elti teleb nyan mot senmek. Sik nyabuka senmik mot yupu ara, ani. Nun ni koproba Allah, el si Yahweh ati, el si erebuka mot nyanamabe. Allah el mikip weik kiplirye, aning-aning deice tam ulula ati, el si erebuka mot nyanamabe. Mesir mutuku yin talin nang ap, sik kuda deice bukuka balamik kuda ap, Allah arye dobuka, weik laut mekwen noutamak dopkwetebukba, mekwen arye dibuk. Diprobukba, sik nirya dibik.

² Allah el si Yahweh, elda mikip weiknye anya arye, na kanye talima el deice uk delinune. Elce Mesir mutuku noutamak arye nun dobuka lyepmasil ati, narye Allah el si erebuka kisal donune. Nun ni Allah ulula ati, kanye deibuka mot nyabuka si erenamne. Elda nun ni Allah el uka ulula ati, el si erenyabe. Elda nun apu yapu ati kalikuka pia meliamuka anya arye, elti, kisal dobuka el si erenyabe.

³ Nun ni Yahweh elda mal olana weik deiyoknye atonun ulule. Allah elda tonoka, el si ara Yahweh ulule.

⁴ Nun ni Allah elce, Firaun el yin talin nang ap, el kuda libuka tuku deice bukuka ban ning ap, deiyok nang ap nirya dobuka, weik laut mekwen pum bisik dongobuka opmale. Firaun el yin talina deiyok nang, pia teleb ning nirya ara, weik laut mekwen siknibuka obukba, mekwen dibuka sirya dakuk.

⁵ Yuk ninye arye weik keil dobuka mekwen pum bisik dopkwetebikiba, ikin arye mekwen noutamak bongobalamle touk, Mesir mutuku sik yin talin nang, deiyok nang weik, mekwen pum bisik wekikba mekwen dibuka siknibuke.

⁶ Nun ni Yahweh, anang opmom tam ara, an taruk sirik tam pia mikip weik ubuka anya arye, telebuk ulyame. Allah an taruk sirik tam arye mal olan nang ati oplopmalam ning ara, weik mambule.

⁷ Anda pia mikip weik deiyoknye, tonda pia mambulnye ulyama deice arye, ‘El ti malye kibuka optibye’ tenelamkik nang nirya ara, ancuk, obuka sirya daknanye ulyame. Weik uku buk arye maning ap, aning-aning nirya ap, dilamle touk, an yu upkukba adeice arye, Mesir mutuku yin talin nang weik oploplume.

⁸ An si pito arye, weik laut mekwen puplumba, amekwen nirya ceprobukce, dana-dana kiprobuk. Dana-dana tam kibuka tikilbiyukba, aik abilinga kat ulamle atonun winibuk. Ara, laut mekwen noutamak bukni, mikuka kat kibukak arye. Winibukba nun anoutam bisikuk yapue.

⁹ Mesir mutuku mal olan nang arye utenepsike. ‘Dobolyabirye binuka talipdongobuka opnuyabe. Obibirye, sik ning nirya doprobibirye, Winibibirye aning-aning nirya weika arye dopropnamabe,’ tenepsik. Tonda utenebik, ‘Aninye nirya nun parang ya arye oplonamabe. Nun parang ya arye obuka, sirya dakipyeba, nirya dipnamake,’ tenepsik.

¹⁰ Utenepsik bukni, ance weik kumanya mikip puplumba, weik laut mekwen arye aninye siknibukce dibuk. Winibukba, ikin ning, besi ning kitibuka mekwen dongobikiba, weik laut pum bisik wekelamle touk, aninye nirya mekwen wekikba, mikip weik mekwen arye dibuka siknibuke.

¹¹ Yatanye do? Ninye arye, ‘Aning ara Allah atonun’ tenebikirye, yuk ning si erenyak ning nirya ara, an Yahweh uminya atonun kum uptinge. An winilyam touk, yuk Isa Mutuku Dongonye, sik mikip koproba deice arye, kum winiptinge. Tonda, yuk nang nirya ara, an winiminya atonun kum wininyake. An tonok ara, pia diksukumuk ulyame. Pia telebuk ulyame. Pia telebnye, dirina weiknye umince, ninye kum winipmanto ning, mambul pil, ninye winipmanto kum pil weik dolyame. Yata ning do nirya, an winiminya atonun kum wininyake.

¹² An sirik taruk puklumba, tukwak mutuku dilikuka dana-dana kiprobukba, mal olan nang nirya apum wekikba, dibuk.

¹³ Ance, ‘Anang ara ‘Naʼ tenen, ninye’ tenen, wiamsulumce lyepsulum ninye pia bico tenebuka tuba melisilyame. Pia kum batakasilyame. Winimince, ‘Dipkoprop bisik ani,’ nyabuka bobuka yangasilyama ani, wini talak babye, bobinamsilame. Tonda aninye ara an mikip deice arye pia melipnamlyame. Ance aninye bobuka balaminya ani, ance sikti, kintinip deiamlum mutuku, an uminyak, malye ning pia kum ululak, pia teleb touk delilbinamsilyame.

¹⁴ Winipminyopura, ninye mutuku-mutuku nirya kekebikirye, ilil ati sirim talipnamle. Pilistin mutuku nang arye, ikin kanye bopnamake.

¹⁵ Tonda, Edom mutuku deiyok nang ara, ilil weik upliba sirim talipnamle. Moab mutuku deiyok nang babye, ilil ati sirim talipnamle. Tonda, anti ilil upliba, sik Kanaan mutuku ninye ara, sik talima mitang upliba bindopnamake.

¹⁶ Sik nirya arye, ‘Se yata wiripnamsil do?’ tenen, ilil weik upliba, imun kanye bobuka unamake. Allah an mikip weik deice arye, ilil upliba, keil talye darabuka bulamle touk, unamake. Ara, Allah arye meliamuk ninye sik bisibuka banmaca ani, amutuku noutam banamak talak, yan dobikce talak nirya ara, yuk malye nang nirya, olena kum bukni, keil ikin ulamle touk, talye tunim abuka unamake.

¹⁷ Allah Yahweh, ance Israel nang ati meliamlumce, ‘Na unamnak, amutuku uk binuka, teleb kibuka unamak’ tenelamlum touk, Israel ninye bobuka bobimince, an mutuku koproba, amu tam binuka deipminba, asukumuk unamake. Na nio, ance aning-aning nirya talebuka, mikip weiknye ulyama ati, amutuku ara, pia teleb mutuku, an bidamang taruk arye kintinipmalum mutuku, aninye dobuka deipminba, sikda amutuku deice amu tam aik dobuka unamake.

¹⁸ Nun ni Allah, an si Yahweh, anda aning-aning nirya talibuka, pia weik deiyoknye arye unamlama ara, pia kume kum danamle. Anda aning-aning nirya talibuka, Raja kibuka, doryanamle talak nirya noutamak arye, pia unamlame.

Miryam birye deiyok koubuka, Allah si erena mot, nyanmek yupu

¹⁹ Atalak ara, weik laut mekwen ceprobukce, laut mekwen noutamak arye tuku dilikukce, tuku mikukopura, Israel ninye koubuka biyik bukni, Mesir mutuku deiyoknye Firaun ap, el yin talina deiyok nang ap, kuda deice bukuka balamik nang ap, kuda libuka tuku deice balamuk ning kuda kereta ap nirya ara, ‘Tuku mikmok bisik deice banuyap’ tenen, bayikbuk, Allah el si Yahweh arye tenebuka arebukba, mekwen dana-dana tam kipmok ning ara, ila tamubuka sik banmek bisikuk mek ansinibuka obukba, dibuka siknipdongobuk. Diprobukba, sik nirya dibik. Mesir mutuku nang nirya dibik bukni, Israel ninye ara, talye kanye bobuka mikmok bisikuk yanibuka biyikba, teleb ubik.

²⁰ Aning nirya winibuka, ati ara, tonok kil el si Miryam birye mot sebuk. Allah arye laka nyalamukba, Miryam kekelamukce Allah el yupu laka nyana kil ulamuk. Miryam bira, ara Harun el du kul ulamuk. Elce deiyok koubuka, lelim nyana ning rebana dobukabukce, taruk tapne arye bokuka mot menekuka nyanmokba, Israel kilapu nirya kanye deibuka mot senmek. Sik nirya arye rebana ning dobuka taruk tapne arye bokukapna arye, mot senmek.

²¹ Miryam birye deiyok koupmokba, sik senmek mot ara ani. “Nun ni koproba Allah, el si Yahweh ati, el si erebuka mot nyanamabe. Allah el mikip weik uplirye, aning-aning deice tam ulula ati, el si erebuka mot nyanamabe. Mesir mutuku yin talin nang ap, sik kuda deice bukuka balamik kuda ap, Allah arye dobuka, weik laut mekwen noutamak dopkwetebukba, mekwen arye dibuka siknibuke. Diprobukba, sik nirya dibike,” nyanmek.

Mutuku si Elim ap, Mara ap, noutamak, Allah arye, sik mek buk, teleb kipdeibuk yupu

²² Aning nirya winibikopura, Musa birye Israel ninye bobuka, weik laut mekwen Teberau kup-kup tam batakuka, weik pata mutuku noutamak bisik banmeka ani, mek kumak ati, ninye una kum mutuku, Syur mutuku binuka wekik. Tonda, amutuku noutamak ara, mok pia kum celula ati, Israel ninye arye like winilye deice, amutuku noutamak banmeka ani, mek kum ati, eprepnin biyik bukni, mek pia tonok babye kum eibik.

²³ Winibikopura, aminyan talak mutuku si ton, Mara mutuku noutamak wekelbiyikce, mitik mekwen eibik bukni, amutuku uamuk mek mekwen ara, pia sik ati kum dipmanto kibuk. Amutuku uamuk mek nirya ara, sisilya uk uamukba, kum dipmanto ubik. Amutuku ara, sik mek uk ubuka ati, atalak arye deiyok koubuka, amutuku el si Mara mutuku nyabik. Israel ninye sik Ibrani yupu deice ara, Mara nyabika deiyok ara, sik mek mutuku ati nyabik.

²⁴ Ati ara, Israel ninye arye kum dipmanto sik mek ati, pia weik arye malye-malye nyanmekce, Musa biti nyabik. “Nun yata wiribuka amek diptibye do?” nyabuka ngalukunmek.

²⁵ Malye nyanmekopura, Musa birye ikin kanye bobuka, engebukce Allah el si Yahweh ati morobukba, Yahweh arye Musa biti, yo kama tonok lake kipdeibukce, arebuk. Ayo arebukce nyabuk. “An boplum yo, mekwen pum bisik dongobuka dopropminyopura, amek ara teleb upnule.” Nyabukura, Musa ayo dobuka, amek noutamak dongobukba, amek ara pia teleb kibuk. Winibukba, sik nirya amek dibik. Dibikura, atalak ara Allah el si Yahweh arye sik winipra banamik ning ati, ikin yupu nyapdeibuk. Ara, ‘Winipnamlume’ nyapdeibuk yupu atia. Tonda, Yahweh arye aninye ati asilen yupu ton arebuk.

²⁶ Atalak ara, Allah, el si Yahweh arye Israel ninye ati ayupu nyabuk. “Anggunda na Yahweh arye nyapnusin ning nirya ara pia wininamlulume. Ara, narye nyasunun yupu moubuka kekepmunce, na tenenye touk diksukumuk winipnamlulume. Ara, narye anggunti, ‘Aning ara winibuka-winibuka unamlume,’ nyabuka deipnirye, aresunun yupu nirya, moubuka kekepmunce, dobolbanamlume. Aning atonun narye anggunti, ‘Aning kum unamlume’ nyasunun yupu mem yupu nirya kekepmunce, aning nirya kum winipmunyopura, narye melinamsine. Ara, Mesir ninye anggun ona ati, weik kanye imun ning ap, uk deiyok ning ap arepse touk, anggun Israel ninye ati ara, pia kum arepnamsine. Auk ara, aning-aning nirya kum dipnamsile. Ara, nara anggun ninye deiyoknye, Allah ununa ati, na Yahweh arye anggunti kwetepsinirye, lyebuka kam bukuka deipnamsine,” Allah el si Yahweh arye Israel ninye ati nyapdeibuk.

²⁷ Winibuka akunum nyabukopura, sik ila tamubuka bisik banmeka ani, tonok mutuku ton, mutuku si Elim mutuku wekelbiyik. Amutuku noutamak ara, mek puak ara, obarye (12) uamuk. Tonda, yo si korma yo ara, yupa bitinye kepdopnye nakub dikin (70) tikamuk. Ati ara, mek uamuka dam, asukumuk sik doltakna aik binuka dobuka unmek.