Keluaran 13 - Eipomek

“Min yuma deipmunye mapu ap, nena kum roti ap ati, winipnamlume,” nyabuk yupu

¹ Allah Yahweh arye, Musa biti nyabuk.

² “Anggunce min yuma deipnamlum mapu nirya ara, natibuk arelyanganamnulume. Ara, anggun Israel ninye arye minyuma delilamlum mapu nirya ap, tonda, anggunce weilulum sapi basam do, domba basam do, anggunce weilulum kam ning aning-aning nirya min yuma deiplye ning yim yala nirya ara, natibuk tamubuka arelyanganamnulume. Ara, aning nirya ara, na ninguk unamlula ati, natibuk arelyanganamnulume.” Allah arye Musa biti nyabuk.

³ Nyabukba, Musa tamubuka Israel ninye dam yayukce, ayupu nirya Israel ninye ati, nyabuk. Asum ara, nun ni koprop Allah Yahweh, el taruk mikip deice arye, Mesir mutuku ikin kanye bobuka ulamlum talak arye, akunum lyebuka lopdeiamsuke. Ara, Mesir mutuku ninye arye tapu koubukapsikce, ikin weik pil pia, anggun nong deice delilamsikba, ikin piluk talye dolamlum bukni, Allah arye lyebuka lopdeipsuke. Ati ara, ‘Asum arye aning nirya pia tenenamapʼ tenen, keting tamun nirya ara, asum arye anggunce, ‘Kume nunda Mesir mutuku ulamupu talak ara, ikin weik pil pia weik tonun dolamupubuk, Allah Yahweh el mikip weiknye birye, lyebuka lopdeipsukce, boyanamsuka ati, pia teninamapʼ tenen, wininamlume. Ati, aning ara, asum arye pia tenenamlume. Aning tenina ati, asum arye, roti kwaning nen ning ara, pia kum dinamlume. “Allah arye nyapdeipmasile,” nyabuka, Musa birye, Israel ninye ati nyabuk.

⁴ Nyabukopura, ayupu tonap nyabuk. Ati ara, keting tamun, keting tamun nirya bukni, wala si Abib wala, tanggal satu kiplyopura, ‘Asum ara, mambul weik sum ati, aning pia teninamlume. Ara, minop talak bukni, anggun Mesir mutuku noutam ulamlum bukni, awala, deice arye, Mesir mutuku batakuka yanamlum sum atia. Ati, asum uplyopura, ‘Nun Mesir mutuku noutam ulamupu ani, batakuka yanamupu sum uple’, tenenamlume.

⁵ Allah Yahweh arye, anggun apu yapu punun nang ati, “Kanaan mutuku ara, Het yala nang ap, Amori yala nang ap, Kanaan yala nang ap, tonda Yebus yala nang ap, sik nirya unyak mutuku uk, dipkoprob arepnamsine,” nyabuka, nyalin yupu deice arye nyapdeiamsuke. Amutuku noutam ara aning-aning nirya weik aubuk mutuku ati, ara, mong mek ap, sapi basam moum yung ap, tonda, pia teleb mirin tuku ap, aning-aning nirya weik aubuk mutuku ati, “Pia teleb mutuku ara, dipkoprob arepnamsine,” nyabuka, nyalin yupu deice arye nyapdeiamsuke. Ati amutuku noutam akunum bimunyopura, aketing tamun, aketing tamun nirya, wala si Abib wala akunum uplyopura, tanggal satu sum ara anggunce, ‘Nunda Mesir mutuku ulamube bukni, Allah Yahweh arye boyanamsuk ati, atalak ara, nun weik mambul sum anyeʼ tenen, weik kwalina kwalipmunce, Allah Yahweh el siuk erenamlume.

⁶ Ati ara, wininamlume. Tek barye sum nirya ara, anggun nirya nena kum roti kwaning dem dibuka unamlume. Bukni, winibuka unmamunya ani, tekbarye sum akunum uplyopura, Allah Yahweh el tibuk, si erebuka kinamlume.

⁷ Atonun, anggunda tonok sum arye dipdongobuka, tekbarye sum nirya ara, roti kwaning nena deiyok ning, el si ragi ap tabakuka dalamak roti pia kum dinamlume. Tonda atekbarye sum nirya ara, anggun unamlum mutuku arye, roti nena deiyok ning el si ragi kum upnamle. Ara roti kwaning nen ning babye, talye yuk ning, nena deiyok ning, el si ragi tabakuka memepnamak ning yala-yala nirya babye, anggun mutuku noutam pia kum upnamle. Ara, Allah el weik sum kintinilina ati ara, roti nena deiyok ning, ragi nirya ara, kum kipdeipmunyeba, atekbarye sum noutam nirya ara, aning pia kum dinamlume.

⁸ Asum ton, dam akunum uplyopura, anggunce Allah el si erena ati kwalina kwalilamunye ani, anggun mapu arye, “Naio, yata deiyok ati aning ara wininmalum do?” nyabuka asipsicopura, anggunce, anggun amapu ati nyanamlume. “Kume, atalak ara, nun Mesir mutuku ulamupu buk, nun ni koprop Allah Yahweh arye, mambul pil akunum dopsuk deice arye, lobuka lyepropsukce, amutuku boyanamsuk sum, el si erena ati unmabe,” nyanamlume.

⁹ Aweik sum deice pil donamlum ning nirya ati deiyok, winipmanto ning ara, ninye winyamice ning tuba tenena ati, taruk deice ap, asok deice ap, denelamaka atonun winina ati wininamlume. Tonda, ‘Allah Yahweh arye, mikip weik deice arye mambul pil dopsukba, Mesir mutuku ikin weik ulamupubuk, Allah arye lobuka lyepdopsukce, amutuku boyanamsuke’, tenena ati, apil dopmunce, Allah el si eren sum, Allah ati kinamlume. Tonda Allah Yahweh arye anggun Israel ninye ara, “Aning ara, wininamlume, aning ara, pia kum wininamlume,” nyapdeiamsuk yupu ati, ‘Ayupu uk tuba tenenamapʼ tenen, aweik sum deice arye apil donamlume.

¹⁰ Aning nirya ati, aketing tamun, aketing tamun nirya ara, Allah arye nyapdeipsuk sum kiplyopura, Abib wala, tanggal satu akunum uplyopura, Allah arye, Wininamlulume nyabuka lak nyapdeipsuk ninguk tenibuka, kwalibuka dimunce, Allah si erenamlume. Allah arye nyapsuka ati, wininamabe. Musa birye Israel ninye nirya ati lake nyabuk.

“Minyuma ning nirya ara, na Allah Yahweh ati arenamnulume,” nyabuk yupu

¹¹ Musa birye, Israel yala ninye nirya ati nyabuk. Allah Yahweh arye, anggun ap, anggun punun nang ap nirya ati, “Dipkoprob Kanaan mutuku bobisinirye, amutuku arepnamsine,” nyabuka nyalin yupu deice arye nyapdeiamsuke. Ati ara, nyapdeiamsuk mutuku akunum bobisilirye, arepsilyeura, amutuku noutam bimunyopura, amutuku ara dipkoprob anggun mutuku kibuka unamluma ati, anggunce amutuku noutam unamlum ning nirya, lake nyapnusine.

¹² Kanaan mutuku noutam binuka unamlum talak nirya ara, anggun min yubuka deipnamlum mapu nirya ap, tonda anggunce weipnamlum kam ulye ning aning-aning nirya ap, sapi basam do, domba basam do, aning nirya ara minyuma winiryuk deipnamle yim ning nirya ara, Allah Yahweh ati adiparyuk bobuka, tamubuka arelyanganamlume. Ara talye ati kume. Amin yuma ning nirya ara, Allah Yahweh, el ninguk ulule ati nyapsine.

¹³ Bukni, keledai basam minopce winiryuk deipnamle yim basam ara, Allah Yahweh dam arelyangana ati, kintinilin ning ara, aning el punun ati ara, yim domba basam mi minop ning tonok opmunce, Allah ati bobuka arelyanganamlume. Akeledai basam pununa ati, domba basam mi kum upmalya ati, ton kum opmunyeura, adiparyuk anggunce keledai basam winiryuk ning ara, el ngang talipdongobuka kotokmunce bataknamlume. Tonda, anggun mapu min yuma mapu nirya ara, anggun pununa ati, domba basam mi ton obuka, Allah ati arelyanganamlume. Anggun mapu min yuma mapu ara, kum opnamlume, adiparyuk domba basam mi opnamlum deice arye, anggun min yuma mapu punupnamlume. Winipmunce, Allah ati arelyanganamlume.

¹⁴ Winilamunyeba, doyanamle talak ara, anggun mapu arye, “Awinilamunye ning nirya ara, yata deiyok ati winilulum do?” nyabuka asipsicopura, anggunce tamubuka anggun mapu ati nyanamlume. “Kume, aning ara, nun Mesir mutuku noutam ulamupubuk, sik Mesir mutuku nang arye, ikin weik pil dilamsikba, talye piluk dolamupu bukni, ‘Allah Yahweh, el taruk mikip deice arye lopdeipsukce, lyebuka Kanaan mutuku boyanamsuk ning’, tenena ati wininyabe,” nyanamlume.

¹⁵ Tonda nyanamlume. “Atalak ara, Mesir mutuku ninye deiyoknye Firaun birye, nun Israel ninye ati, pia lik kanye bobuka ulamukce, ‘Sik Israel ninye ara, yuk mutuku pia kum binamake’, tenelamsuke. Utenelamsuk bukni, Allah Yahweh arye, sik Mesir mutuku ninye arye, min yubuka delilamik mapu nirya ap, tonda sik domba basam do, sapi basam do, sikce weilamik ning nirya ap, minop deiamik yim ning nirya ara, Allah arye obuka sirya dakamuk. Allah arye winibuka ati, aninguk tenebibirye, nun weilamap ning arye, minop deiplye ning nirya ara, obibirye, nun ni Allah ati arelyanganamnyabe. Atonun, nun min yuma mapu nirya, sik pununa ati, domba basam mi ton obuka, Allah ati arelyanganamnyabe.

¹⁶ Aning wininyaba deiyok ara, ‘Allah Yahweh arye, winyamuke’, tenena ati wininyabe. Ara winipmanto, ninye arye winyamice ning tenena ati, taruk deice ap, asok deice ap, denelamaka touk, ‘Nun ni Allah arye winyamsuke’, tenena ati wininyabe. Tonda, ‘Nun Mesir mutuku noutam ulamupubuk, Allah Yahweh el taruk, mikip deice arye boyanamsuk’, tenena ati, wininyabe. Aning ton, anggun mapu nirya ati nyanamlume. Musa birye sik Israel ninye ati nyabuk.

Allah el si Yahweh arye, Israel ninye ati, Laut Teberau mekwen deice, bobiyuk yupu

¹⁷ Mesir mutuku deiyoknye Firaun birye, Israel ninye batakukba biyik. Abiyik talak ara, Pilistin ninye ulamik mutuku balamik bisik ara, dam awamuk bukni, Allah arye abisik kum bobiyuk. Abisik ara, pia dam koprop bukni, Allah arye tenebuk. Sik Israel nang ara, ‘Se, nun mal olan nang bisikak banmaba ati, nun eipsikirye opsicakʼ tenen, sik ilil uplya ati, ‘Mesir mutuku uk tamubuka bitibye’, tenebicake, Allah arye utenebuka ati, yuk bisik bobiyuk.

¹⁸ Utenebuk ati, Allah arye aninye bobuka, ninya dilamak mek ton, kum uamuk mutuku, pia pata weik mutuku bana ati, abisik laut mekwen, el si Teberau mekwen dam abisik bobiyuk. Israel ninye arye, Mesir mutuku batakuka biyik ning ara, ‘Yuk mutuku nang arye opsicak tenen, sik parang ya ap, yin ap, mal ap nirya bobikce biyik. Ara oldan ning kintinina ati, aning nirya bobikce biyik.

¹⁹ Tonda, Israel ninye Mesir mutuku noutam tuba ulamik talak ara, Yusup birye el weit koproba ap, el du yapu ap ati nyamuk. “Kume, na kele. Aminyan talak, Allah arye Israel ninye lopdeiplirye bobuka, amutuku noutam arye bobinamle ati, bobinamsilye talak ara, na yok ara baya wibuka bobinamnulume. Ati, ‘Dipkoprob aning winipnamkiyabe’, nyabuka, yupu nyapdeipnamnulume. Ara, na akunum dipnyopura, na yok deilin baya wibuka, bobinamnulume. Na yok deilin baya yo, amutuku noutam batakuka bana kume,” nyabuk. Mince nyamuka ati, Israel ninye arye, “Dyo winipnamkiyape,” nyabuka yupu moupdeiamik. Nyamik ati, sik Mesir mutuku batakuka binuyik talak ara, Musa birye Yusup el yok deilin marikna yo bok biyik.

²⁰ Sik binuyik talak ara, Israel ninye, Sukot mutuku arye batakikce, mutuku si Etam mutuku binuka, tia una ati, domba bol baju arye dolamik aik dobik. Etam mutuku ara, mek pia kumak ati, ninye kum ulamik mutuku, pia pata mutuku lilkwa uamuk.

²¹ Atalak ara, Allah arye winilamuk. ‘Israel ninye arye, nun binamap bisik ara ani tenen, moubuka kel biknamak tenen, Allah el si Yahweh arye keting noutam talak, weik dua kan-kan weknarye, adua ara sik binaman bisik menekuka balamukba, sik aminyan tam balamik. Lukunyan ati ara, ‘E, nun binamap bisik ani, tenepnamak tenen, weik uku buk arepnaba, uku buk noutam weknarye menekuka balamukba, adirin deice sik aminyan balamik.

²² Sik balamik talak nirya ara, batakna kumce, keting noutam, sik balamik bisik, Allah arye weik dua areamukba, sik balamik bisikuk balamuk. Atonun, lukunyan nirya ara, weik uku buk arepnaba, sik ap balamik. Keting noutam babye, lukunyan babye, pia kum batakamuk.