Keluaran 12 - Eipomek

Allah el si Yahweh arye Israel ninye, sik min yuma mapu ona kumce, kaplibuka bindobuk ati, nyabuk yupu

¹ Allah el si Yahweh arye Musa ap, Harun ap ati, Mesir mutuku noutam tuba ulamdik talak arye nyabuk.

² Aunmalum wala buk, aminyan ara, deiyok koun wala kipnamsile. Ara wini talak arye deiyok koubuka, awala minop ning kiplirye, awala-awala nirya nukuka, tonok keting tamun tenenamlume. Keting tamun, keting tamun nirya, yubukap wala ara, awala uk kipdeipmunce, pia teninamlume Allah arye nyabuk.

³ Allah arye ayupu ton nyabuk. Anyapmasin yupu ara, anggun bitinye arye Israel ninye nirya ati Awala noutam bukni, hari tagu barye sum ara, anggun yuk-yuk bukni, anggun Israel ninye nirya arye, domba basam mi winiryuk ninguk wipnamlulume. Ara, aik yuk-yuk aulye touk, aik deiyoknye birye, domba tonok wibuka kintinipnamake. Webuka dopropmunce, yuk-yuk sal ap, kilapu ap, dolalulum touk, domba babye atonun wibuka, kintinip deipnamlulume. Sik mapu silip nirya, aik yuk-yuk aunyak touk, domba obuka dinamluma ati nyapne.

⁴ Bukni, anggun aik pum dipdanuka ulamlum ninye ara, yupa mitik tonun ulamunyopura, minopce yuk nang anggun dam neika ulalum ninye ap tabakdopnamlulume. Ara, anggun mitik aik ulalum nang ap, sik weik aik dam unyak nang ap tabakmunce, domba tonok dobuka opnamlulume. Domba nukuka kintineipnamlum ning ara, anggun yupa aulamunye touk tenibuka dopropnamlume. Anggun ninye yuk-yuk patapsilya ati, dipnumunye ning neiktoto uk kentinipnamlume.

⁵ Anggunce domba do, kambing do, Yim basam keting tamun tonok wamlye ninguk wibuka, kintineip deipnamlulume. Bukni bol malye ning ara, kume. Keting tamun tonok buk bol teleb arye nemlye ninguk kentinepnamlulume. Allah arye nyabuk.

⁶ Ayupu ton nyabuk. Anggunce tanggal sepuluh kiplye sum arye, domba do, kambing do, nong pia teleb ning tonok wibuka, kintinibuka weilamunya ani, awala noutam tanggal empat belas (14) akunum uplyopura, opnamlulume. Ara, asum ipnulya ati, keting okumul binulye talak akunum uplyopura, ara jam pamubarye atonun, Israel ninye nirya, sik aik yuk-yuk aulamak touk, adiparyuk domba do, kambing do, yim ning tonok opnamlulume.

⁷ Domba do, kambing do, abasam akunum opmunyopura, domba ining yangalin ning arye dopropmunce, bublan dam dana-dana yo deice ap, bublan itam malilamak yo deice ak, likdeipnamalume. Ara aik yuk-yuk bulubuka, domba tup anyaik noutam dinamlum touk, anyaik bublan dam, domba basam ining likdeipnamalulume.

⁸ Alukunyan noutam ara, domba nong nirya kalepmunce, uku deice dabuka dinamalulume. Tonda roti nena kum ning ap, malmalya yu ning ap, dipnamalume.

⁹ Domba imbik ning babye, tonda, mek buppu yulamak ning babye, pia kum dipnamalume. Aning ara kumce, domba nong nirya kalibuka, uku deice dapmunyeba, oplye ninguk dobuka, sekdoba tonokak nirya ulubuka deipmunce, kisok ap, yan ap, nong noutam ning ap nirya, uku deice dabuka dipnamalume. Tonda yuna kume.

¹⁰ Winipmunyopura, abasam yupmamunye kwal deipmamunye ani, beren tam ton kum dipnamalume. Winipmunce, mitik ning babye ton tuba awaplye ning ara, adiparyuk uku dabuka memepdopnamlume. Uku arye aning nirya diplirye, sirya daknamle.

¹¹ Aning dibuka seng apdopmunye talak ara, bisik binamluma ati, anggun baju ongobuka kentinipnamalume. Tonda, anggun yan tatang ongon ning, sendal ap, ongobuka, anggun talelulum kama taruk talibuka kentinipnamalume. Winipmunyopura, domba tup ap, aning nirya ara, ‘Adibaryuk minop binamapʼ tenen, pola dibuka seng apropnamalume. Aning nirya ara, na si Yahweh, na Allah arye nyapdeipsin touk winipnamalume. Ara anggun winiryuk mapu ona kumce, anggun asik kaplibuka binamne ati, aning dipnamalume. Allah arye nyabuk.

¹² Nyabukopura, ayupu ton nyabuk. Ura asum lukunyan noutamuk, na Allah arye, Mesir mutuku nirya binirye, Mesir mutuku winiryuk mapu nirya ap, sik weinyak kam ning, weik ning nirya ap, opnamne. Tonda, Mesir mutuku isa si erenyak ning nirya ara, na Allah arye wenepnirye, ikin weik ning, sik deice deipnamne. Na si Yahweh, na Allah arye nyapsina ati, aning dipkoprob winipnamne. Allah el si Yahweh arye nyabuk.

¹³ Bukni, anggun Israel ninye ara, domba basam ining dobuka, anggun bublan deice ap, bublan itam ap, likdeipmunce, laka kilin ning deipmunyeba eipnamsine. Anggun aik eipnyopura, anggun aik ara kaplipsinirye, ilil kanye bon ning kum arepnamsine. Ara, anggun winiryuk mapu ara, kum opnamne. Bukni, sik aik bublan deice domba ining kum likmace ninye, Mesir mutuku ninye ara, sik winiryuk mapu ap, kam uning weik ning ap, nirya opnamne.

Nena kum roti dan ning dina ati, nyabuk yupu

¹⁴ Arup winipmanye ning ati, anggunce asum-asum pia teninamlume. Anggunce, ‘Asum ara, Allah el weik sum ulule’, tenebuka, oketeng tamun, oketeng tamun nirya, kwalina pia kwalinamlume. Ara na si Yahweh, na si erena ati, akwalina pia kum bataknamlume. Keting tamun nirya, kaplina kwalya ara, pia batakalongona kume, apia kwalipmunce, na si erepnin banamnulume. Allah el si Yahweh arye nyabuk.

¹⁵ Allah arye nyabuk. Kaplina kwalya yun talak ara, wininamlume. Anggunce like nakub barye sum mabuka, nena kum roti dinamlume. Tonda, deiyok koun sum ara, adiparyuk roti nena deiyok ning, el si ragi nirya dobuka, anggun aik pum tam arye bai tam donoknamlume. Aning ara, talye kum nyapsine. Yatanye do nirya, deiyok koun sum arye dipdonobuka, tekbarye sum noutamak nirya ara, roti nen ning diplinye bira, Allah arye anye dobuka, anggun kan-kan arye dopkwetebuka opnamne. Allah arye nyabuk.

¹⁶ Nyabukopura, ayupu ton nyabuk. Anggunce minyuma sum ap, tonda tekbarye sum ap ati tenibuka, anggun nirya tonokak bulupnamlume. Ara, nati kibuka si eren sum ap, na si erena ap ati, bulupnamlume. Ati ara, anyapmasin sum, like bitinye ara (tanggal 1 ap 7) anggunce talye mangkau asa pil kum donamlume. Ati, anggunce din ning dinamlum ninguk, kentinipnamlume. Yuk aning-aning nirya ara, pil dona meme.

¹⁷ Awala, asum babye, narye anggun Israel ninye aning-aning nirya lyepnirye, Mesir mutuku noutam arye dobuka, bobinamasina ati, oketeng tamun, oketeng tamun nirya ara, aning pia teninamlume. Omapnin banamlum talak nirya ara, Nena Kum Roti Kwalina ara, pia kum bataknamlume. Tenibuka kwalinauk, pia yunamlume. Anggun wininamlum ning ara, atam arye, dipdongobuka keting tamun, keting tamun nirya, kwalipnin banamluma atia.

¹⁸ Ati yubuka deiyok koun wala noutam, tanggal 14 deice, keting kumupnulye talak ara, atalak arye deiyok koubuka, osum noutam bukni, like tekbarye sum ton ap, nena kum roti dem dinamlume. Ara, asum bukni dukdongobuka, tanggal 21 sum ara, keting kumupnulye talak ara, akunum ati nyapne. Atalak nirya ara, nena kum roti dem dinamlume.

¹⁹ Anyapmasin touk, tekbarye sum nirya ara, roti nena deiyok ning, el si ragi ara, anggun aik pum delina meme. Ara, yatanye do nirya, ninye asik nang do, Israel nang koprop do nirya, roti nen ning ragi deiplirye diplinye bira, Israel ninye noutam arye bobuka, bai tam dopkwetebuka oplopnamlume Allah arye nyabuk.

²⁰ Anggun unamlumak mutuku-mutuku nirya, anyapmasin talak noutam nirya ati, roti nen ning kum dinamlume. Anggun Israel yala ninye pia meme, roti nena kum ninguk dina telebe. Allah arye Musa biti nyabuk.

Musa birye Israel ninye ati, “Kwalina kentiniplulume,” nyapdeibukba, deiyok koubik yupu

²¹ Allah arye Musa biti nyabukba, Musa birye Israel ninye, sik deiyok nang wisi nang ati nyabuk. “Anggun bimunce, domba basam unyak noutam arye, domba basam yim mitik ning opnamlume. Ara, anggun ap neika ululum ninye awaplye touk nukuka, domba mi keting tamun tonok ning (umur 1 tahun), adomba mi bobimunce, akwalina ati obuka kwalipnamlume.

²² Kwalipmunye talak ara, anggunce domba ining dikilongon ning pum bisik dikdongopmunce, yo boksirika atonun ning, el si hisop, hisop yo bok koupne tonokuk dobuka wipmunce, domba ining ap tabakmunce, anggun bublan dam yo dana-dana ap, itam ap likipnamalume. Winipmunyopura, alukunyan noutam ara, anggun aik batakuka, bai tam talye kum banamalume. Aik pum tamuk unamalume. Winibuka mapmamunya bereklyopura, bublan kukuka bai tam binamalume.

²³ Aik pumuk unamluma deiyok ara ani. Alukunyan ara, Allah el si Yahweh arye, ‘Mesir mutuku unyak ninye, sik winiryuk mapu opnamne tenen, Mesir mutuku noutam nirya binamale. Bilirye, anggun aik dipdesiliba, anggun aik bublan dam dana-dana ap, bublan deice tam ap, ining likmamunyeba eiplyopura, anyaik dam kaplibuka talye mangkau asa binamle. Ara, Allah arye, ‘Kume nyapliba, ninye on malaikat arye, anggun aik wekuka, anggun winiryuk mapu kum opnamle. Bukni, ining ton kum deipmace aik ara, kaplibuka kum binamle. Anyaik ara wekuka, sik winiryuk mapu opnamle.” Allah arye nyabuk.

²⁴ Ati anggunce, ‘Asum ara, mambul weik mambul sumʼ tenen, pia talipmunce, kintinilinamlume. Anggun ap, anggun mapu nirya ap, anggunce deipmunyeba, dadeipdanin bakirye unamak ninye babye, ‘Allah arye nyapdeipsuk ning ara, dipkoprob winipnamabe. Ara, ‘pia weik sumʼ tenen, anyapmasin atonun pia wininamlume.

²⁵ Aminyan talak babye, na Yahweh arye anggunti, ‘Winiryuk mutuku arepnamsine,’ nyalilamsise mutuku bimunyopura, ‘Asum ara, weik sum anya arye tuba tenibuka,’ aninguk winipmunce, nara Allah, na siuk, Yahweh erenamnulume.

²⁶ Winilamunye bukni, anggun mapu arye, ‘Ara yata wiryamuk sum ati mambul ning winipnamap do? Tonda, deiyok ara yata ati wininyap do?’ nyabuka asipsicopura, anggunce tamubuka nyapnamlume.

²⁷ ‘Adomba obuka dinmaba deiyok ara, minop talak Allah el si Yahweh arye, Mesir mutuku noutamak, Israel ninye nun aik dam ara, kaplibuka binamuk bukni, Mesir nang aik wekuka, sik winiryuk mapu omukce, nun nirya batakuka, Mesir mutuku noutam arye bobisuk ati, aning nirya tenibuka kaplin kwalina yunyabe’, nyabuka lake nyanamlume. Musa birye, sik Israel deiyok nang nirya ati nyabuk. Nyabukopura, Israel nang arye kutam tuku dipdongobuka, Allah el si kibuka, si erebik.

²⁸ Winibikopura, aminyan talak, sik Israel ninye biyikce, Allah el si Yahweh arye Musa ap, Harun ap ati, ‘Aning ara wininamlume’, nyapdeibukba, kekepdikce laka nyapdik touk, sik Israel ninye nirya babye, atonun winibik.

Allah arye Mesir mutuku ninye, sik winiryuk mapu ap, sik weilamik ning weik ning nirya ap, obuk yupu

²⁹ Alukunyan noutam ara, Allah el si Yahweh arye, Mesir ninye sik winiryuk mapu nirya obuk. Tonok babye, ton kum batakuka ati, Mesir mutuku deiyoknye Firaun bira, weik nang bulamak buna deice bulamuk bukni, el winiryuk mi ton obuk. Tonda, amutuku wenen aik pum tam dongamikba ulamik nang ton, sik winiryuk mapu ton obuk. Aning atonun, amutuku nang, sik sapi ap, sik weilamik kam ning nirya ap, winiryuk ning ara, Allah arye obukba dibik.

³⁰ Obukba dibikopura, alukunyan noutam arye, Firaun ap, el pil dona deiyok nang ap, Mesir mutuku ninye nirya ap, alukunyan noutam bukuka dinmekce, sik winiryuk mapu nirya akunum dipmek ning eibikce, pia malye yupu nyabuka engebik. Engebik ning ara, talye ati kume. Ara Allah arye Mesir ninye, sik winiryuk mapu nirya obukba, dibika atia.

Allah arye Mesir mutuku ninye, sik winiryuk mapu obukba, Israel ninye ara, Mesir mutuku batakuka, biyik yupu

³¹ Alukunyanuk Firaun birye, Musa ap, Harun ap ati, yukubuk. Yukubukba yarikopura, elce nyabuk. “Anggun minop bukdumunce, Mesir mutuku ninye kan-kan arye, an ap, Israel ninye nirya ap, adiparyuk ansinibuka bilulume. Winipdumunce, min arye moropnulum touk, yuk mutuku bimunce, anggun nirya Allah Yahweh, el si erenamlume.

³² Tonda, anggun banumunyopura, anggun kambing ap, domba ap, sapi ap nirya bobuka, ‘Bobinamabe’, nyamlum touk bobilulume. Bukni, anggunce aning dobuka, anggun Allah ati arepnamunyopura, ‘Anggun ni koproba Allah arye, teleb updeipnutueʼ tenen, Allah ati moropnululme,” Firaun birye, Musa biti nyabuk.

³³ Ura, sik Mesir ninye nirya arye, Israel ninye ati, malye kanye bobikce, adiparyuk minop bimunce, nun mutuku bataksutume. Anggun kum bimunyopura, nun nirya dipnamabe nyabuka, mikip arye nyabik.

³⁴ Nyabikopura, adiparyuk, sik Israel ninye banuyik talak ara, sik roti nen ning kanam kum dongobik talakuk, roti bun nena kum ning ap, roti lin ning ap nirya dobuka, aning sik baju arye kitibukabikce, sik takunya deice deibikce, bobana ati kintineip deibik.

³⁵ Tonda, kitinibikce, sik Israel ninye ara, Musa min arye nyapdeiamuk touk, Mesir ninye sik dekna weik ning, kat ning emas ap, perak ap, teleb baju ap ati, binuka morobik.

³⁶ Morobikba, Allah el si Yahweh arye, Mesir ninye sik kanye talima tamubukba, aning Israel ninye arye binuka morobik touk arebik. Winibuka arebikba, Mesir ninye sik dekna weik ning nirya ara, Israel ninye sik kanye lukdanuka deibuka dopropce, kanye deibuka bobiyik.

Israel ninye Mesir mutuku batakuka, dobuka bobiyik ati, nyabuk yupu

³⁷ Aning-aning dobuka bobiyik ning ara, Israel ninye bisik nong bisik, Mesir mutuku noutam ubuk kota si, Ramses mutuku arye banmeka ani, kota si ton Sukot mutuku biyik. Sik biyik ninye, sik yupa ara enam ratus ribu (600.000) ninye biyik bukni, kilapu ap, mapu ap ara kum nukik. Ati pia weik tonap tabakuka bindobik.

³⁸ Sik Israel ninye banuyik talak ara, sapi ap, domba basam ap, kambing basam ap, sik melin ninye ap, yuk yala ninye weik tonap tabakuka panabikce biyik. Anang nirya ara yupa weik tonun arye ansinibuka biyik.

³⁹ Sik Mesir mutuku noutam arye, nena kum roti liyamik ning ara bobuka, roti dan ning pum tam dongobuka dabikce, nena kum roti dabuka dinmek. (Kwal lildona ati malye kanye bobik). Ara, Mesir mutuku ninye arye, sik mutuku noutam arye yakikba, pola bindobika arye, lo kum ubuka ati, dapnaba nelamle roti ara, dapmanto kum ati batakik. Tonda, yuk ning, sik bisik noutam din ning ton kum kintinibik. Ara din ning kintinibuka, dan talak lo kum ubuka ati, minopce bindobik.

⁴⁰ Ura, Israel ninye, Mesir mutuku noutam ulamik talak ara, keting tamun yupa weik tonun empat ratus tiga puluh (430) deice arye ulamik.

⁴¹ Keting tamun yupa empat ratus tiga puluh (430) ubukba, minop talak Allah el si Yahweh arye wenyamuk ninye nirya, Israel ninye aning-aning nirya, sik winilamik touk, Mesir mutuku batakuka biyik.

⁴² Sik bindobik lukunyan noutam aryuk, Allah el si Yahweh arye, ‘Israel ninye Mesir mutuku noutam arye melibuka bobinamne’, tenebukce, pia kalikuka dipnilipnin balamuk, lukunyan arye lyebukce bobiyuk. Ati ara, aning atonun, aminyan talak nirya, Israel ninye arye, ‘Alukunyan noutam, Yahweh arye winyamsuke’, tenena ati, oyanamle talak nirya tuba teninamake. Ara, sik Israel ninye nirya arye, aning ati tenipnin banamake. Oketeng tamun, oketeng tamun nirya ara, awala uk lukunyan babye, Israel ninye nirya ara, aninguk tenebuka dipra unamake. Tonda, sikce deibikiba, dadeipdanin banamak ninye nirya babye, atonun wininamake.

Kaplin Kwalina (Paskah) kwalibuka dina ati, “Aning ara, wininamlume, aning ara, pia kum wininamlume,” nyapdeibuk yupu

⁴³ Allah Yahweh arye, Musa ap, Harun ap ati nyabuk. “Kaplin Kwalina (Paskah) noutam wininamlum ning ara ani. “Domba basam obuka, Allah si erena ati, boyanmakirye, Kaplin Kwalina dam yanuka kwalipmunce, Allah ati arenamlum domba basam tup ara, yuk mutuku arye yanamak ninye asik nang ap nirya ara, abasam tup pia kum dinamake.

⁴⁴ Bukni, anggun pil melibuka dona ati, anggun yo bok deice arye dekuka deiamunyeba, anggun pil melibuka dolamice ninye ara, Kaplin Kwalina kwalipmamunye ning dina telebe. Ara, anggun pil melin nang ara, sik den bol mouse ning akunum sekamunye nanguk dinamake. Den bol mouse sekna kum nang ara, pia kum dinamake.

⁴⁵ Bukni, anggun mutuku noutam tia yanuka ulamice ninye asik nang ap, tia ati pil melibuka donmakiba, yo bok arepnamunya ati, pil donmasice nang ap ara, aKaplin Kwalina kwalipmace ning ara, pia kum dinamake.

⁴⁶ Kaplin Kwalina (Paskah) ati, obuka kwalipmamunye domba basam el tup nirya ara, aik noutamuk moubuka dinamlume. Ton bobuka, bai tam bana pia kume. Tonda, aobuka kwalipmamunye domba basam yok tonok ning babye, celona kume.

⁴⁷ Israel yala ninye nirya ara, anggun adiparyuk Kaplin Kwalina kwalibuka dinamlume. Asum ara, tonoknye babye pia ton kum bataknamlume. Anggun Israel ninye nirya akaplin Kwalina kwalibuka dinamlume.

⁴⁸ Bukni, den bol mouse sekna kum nang ara, na Allah Yahweh si erena ati Kaplin Kwalina kwalipmamunye din ning nirya ara, pia kum dinamake. Bukni, anggun mutuku noutam tia ati, anggun ap neika ulamunye ninye asik nang kan-kan arye, tonoknye ton, ‘Na ap, sik ap, neika aKaplin Kwalina neika diptibye teneplyopura, el ap, el mapu ap, sik nirya ara, den bol mouse ning akunum sekmunyopura, anggun ap dipnamlume. Ara, den bol mouse seknamak nanguk dinamake. Ara, sik den bol mouse akunum sekmunyopura, narye anang ati, ‘Wini talak ara, anang ara, anggun Israel yala nang koprop atonun unmake’, tenepnamne. Bukni, den bol sekna kum nang ara, aPaskah kwalina pia kum dinamake. Ara, meme nyapsine.

⁴⁹ Ara, ‘Na ti kibuka si erena ati, sal nirya ara, anggun den bol mouse ning sekenamlume nyapdeiamsise yupu ara, anggun Israel yala ninye koprop ati, nyapdeiamsise ning atonun, anggun Israel ninye kan-kan unamak ninye asik nang babye, aning atonun wininamake. Anggun Israel ninye koprop ap, anggun dam unyak ninye ap nirya arye, ayupu uk talibuka unamlume.

⁵⁰ Aning atonun, yata yupu do nirya, na Allah Yahweh arye, Harun ap, Musa ap ati, “Aning ara, wininamlume, aning ara, pia kum wininamlume,” nyapdeiamsise yupu nirya ara, anggun Israel ninye nirya, ayupu pia moubuka kekepmunce, ‘Dibʼ tenen, aninguk talibuka unamlume.

⁵¹ Luba kina kume. Kaplina ati, weik kwalina kwalipnamlum sum, Paskah sum ara, na Allah Yahweh arye, na mapu koprop Israel ninye nirya, Mesir mutuku ulamika noutam arye dobuka bobinamsise. Ati atalak ara, ‘Allah Yahweh arye nun boyanamsuk sum tenena ati, anggun Israel ninye nirya ara, Kaplin Kwalina (Paskah) ati, kwalibuka dinamlume.