Keluaran 11 - Eipomek

Allah el si Yahweh arye, Mesir mutuku du mapu nirya, obuk yupu

¹ Allah el si Yahweh arye Musa biti, nyabuk. “Narye winilen ati kanye ikin weik ning, tonok ning ton, Firaun ap, Mesir ninye ap ati arepnamne. Aning ton arepneba, akunum winiplyopura, Firaun birye anggun bataksiliba, ‘Nun mutuku batakuka binamlume,’ nyabuka, Mesir mutuku noutamak arye yaknamsile.

² Ati ara, Musa ance nyapminba, Israel nang nirya arye, Mesir ninye sik dam unyak nang ati, morobikceba, amutuku ninye arye, dekna weik ning, kat ning emas ap, perak ap arepnamsiyake,” Allah arye Musa biti nyabuk.

³ Ura, atalak ara Allah el si Yahweh arye Mesir ninye ati, sik talima noutamak pil dobukce, sik kanye tenen ning dangubuka, sik Mesir nang arye Israel ninye ati, ‘Teleb’ tenen, kanye deibik. Tonda, Musa bira Mesir mutuku ulamuk talak arye, sik weiknye Firaun el amu tam talye ulamik ninye nirya ap, Firaun el pil dona deiyok nang nirya ap, sik nirya arye Musa ati, ‘Elda telebnye anya arye, elda mambule’ tenelamikce, elti, si erelamik.

⁴ Musa birye Firaun biti ayupu nyabuk. “Allah el si ara, Yahweh arye nyapmakile. Alukunyan noutamak ara, na Mesir mutuku noutamak nirya bindenamane.

⁵ Winipnyopura, yata ning do, nirya, Mesir mutuku min yuma mapu sal nirya ap, ninye weilamak ning, kam ning minopce deibik ning ap, nirya dipnamake. Ara, Mesir mutuku weiknye, el buna ning deice bululnye Firaun babye, el mi, du mi babye dipnamle. Aning atonun dipdongobuka talye melina kilapu, gandum duk lanyak kilapu babye, sik sal mapu min yuma mapu ton dipnamake. Aning atonun ton, basam mi du delilamlye ning ap, anirya babye dipnamake,” Allah arye nyabuk.

⁶ Nyabukce, ayupu ton nyabuk. “Dibikcopopura, Mesir mutuku ninye nirya arye engepnamake. Pia malye kanye bobuka enggenamaka ara, minop talak arye dipdongobuka anoutam talak babye aning Atonun ton kum uamuke. Tonda, aminyan yanamle talak nirya ara, enggenamaka ara, mitik mambuluk unamle. Narye wini talak arepnaman kanye imun ning ara, pia ikin ati, weik mambule,” Allah arye nyabuk.

⁷ Nyabukce, ayupu ton nyabuk. “Bukni, ‘Sik Mesir mutuku ninye kel kekepnanak’ tenen, Mesir ninye yuk, Israel ninye yuk kipdeipnamake. Ara, Mesir mutuku nang, sik du mapu nirya dipnamak bukni, Israel ninye sik un dam ara, ninye ap domba ap, sapi basam ap nirya ara, sal mapu du mapu ara kum dipnamake. Ati, sik unyakak ara, ninye on malaikat kum yanamala anya arye, tonok kam babye malye nyabuka kum daneipnamle. Telebuk unamake. Winipnyopura, adeice arye, ‘Se, dipkoprob Yahweh, elda mikip weiknye ulula anya arye, Mesir mutuku ninye wenepnamal bukni, Israel ninye kume. Ati elce bokuka arisilye ning ara, yuk-yuk uka.’ Utenepmunce, kel biknamlame.” Musa birye, Firaun biti, “Allah arye nyapkile,” nyabuk.

⁸ Nyabukce, ayupu ton nyabuk. “Allah arye winiplyopura, Firaun an pil dona deiyok nang nirya, na si erena ati, na dam yanuka kekebuka bukikirye, nyanamake. ‘An ap, an yupu kekebuka dobolbakinyak ninye, sik Israel ninye nirya ap, nun mutuku batakuka, adiparyuk bilulume,’ nyapnamake. Winibicopura, nunce anggun batakuka bindopnamabe,” Musa birye Firaun biti nyabukce, yu weik ubukba, adiparyuk Musa birye Firaun dam arye batakuka biyuk.

⁹ Ura, asum talak ara, Allah el si Yahweh arye Musa biti akunum nyapdeipmoke. “Narye Mesir mutuku noutamak, ‘Ninye kum winipmanto ning ap, ninye winipmanto kum pil ap, pia weika arye winipnamne,’ tenepsa ati, na Allah arye, Firaun el talima kat ning arepneba, malye kibuka kum kekeplyopura, an yupu kum kekepnamkile. El tuba kekena kum diparyuk unamle.” Allah arye Musa ati nyabuk.

¹⁰ Ayupu nyabuk touk, Musa ap, Harun ap, sikce ninye kum winipmanto ning, Firaun dam winiprik. Bukni, Allah el si Yahweh arye, Firaun biti mandipna kanye kibuka, kekena kum deiyok ning arebukba, tuba kum kekebukce, el talima kanye tuba malye kibuka kekena kumce bisibukce, ‘Israel ninye kum binamake,’ nyabuka, Israel ninye kum batakdongobukce, el mutuku noutamakuk talibukba, ulamik. Tubakuk aunmek.