Keluaran 10 - Eipomek

Allah arye, Mesir mutuku sul kwising weik, arebuk yupu

¹ Allah el si Yahweh arye, Musa biti nyabuk. “Ance, Firaun un dam bilyame. Narye, el nong kwepdeiamsa ati, wini talak narye arepsiba, el ap, el pil dona deiyok nang ap, sik talima malya kibuka bisinyak ning ara, narya. Deiyok ara, Mesir ninye ara, ‘Se Allah arye dipkoprob pil dopsile, tenebikirye kel kipnamak’ tenen, sik noutamak ninye kum winipmanto ning pil dopneba, kel kipnamake. ‘Utenepnamak’ tenen, talima kat una deiyok ning Firaun biti arepse.

² Tonda, ‘Anggun Israel ninye eibuka kel kipmunce, anggun mapu ap, aminyan talak anggun mapu arye, deipra banamak mapu ap ati, na wininpse ning laka nyanamlum’ tenen, winipse. Anggunce anggun mapu nirya ati, na wininpse ning laka nyanamlume. Ara, Mesir mutuku ninye malye ubikba, na mikip arye, kanye imun ning weik, sik nong deice delilamsirye, ninye kum winipmanto ning, Mesir mutuku noutamak arye pil dolamse. Aning nirya laka nyapmunyeba, anggun mapu kekebikirye, na wininye ning kel kipnamake. Tonda, anggun nirya arye, ‘Se, Allah ara Weik Deiyoknye el tonok ulule’ tenen, kel biknamlume,” Allah arye, Musa biti nyabuk.

³ Nyabukopura, Musa ap, Harun ap, sik Firaun dam birikce nyaprik. “Nun Ibrani ninye talibuka melisilye Allah, el si Yahweh arye, nyapmakile. ‘Yata talak arye ton, talima namin una kum arye, malye kibuka bisina uk umince, na amu tam kum unamlam do? Na mapu Israel ninye arye, na si erepnamniak’ tenen, ance sikti, lopdongopminba, yukak binamake, nyapkine.

⁴ Ati ara, ance ‘Sik aninye tuba kum binamake’ nyapminyopura, ambusum ara, narye sul kwising weika arye, sik mutuku noutamak dopkwetepniba, weik danamale.

⁵ Sul kwising weik arepneba, sik mutuku noutamak nirya, sul kwising weika arye amuplirye, tukwak nirya langdipnamle. Winipliba amutuku nirya, ninye arye kum eipmanto upnamake. Sul kwising aning-aning nirya dipnamle. Ara, ninye arye koulamik ning ap, yo mutmuta ap, weik mok es duk-duka arye opmok ning, mitik anun tuba aupmal ning ara, sul kwising arye aning babye diplirye, sirya daknamle,” nyabuk.

⁶ “Sul kwising pia weika arye, asik nirya langdipnamle. An aik ap, an pil dona deiyok nang sik aik ap, Mesir mutuku ninye sik aik ap, nirya langdipnamle. Awinipnamle ning ara, min arye atonun kum ulamukba, Mesir ninye kum elilamik. Aning ara an ap, an apu yapu ap, anggun min kum deiamsik talak arye dipdongobuka, aning atonun min winilamukba, kum elilamik bukni, Firaun an kel biknamlame.” Musa birye nyabukopura, adiparyuk Firaun dam arye, batakuka biyuk.

⁷ Musa biyukopura, Firaun el pil dona deiyok nang arye nyabik. “Yata talak arye, anye bira nun noutamak arye, pena youlamle atonun winipnamsil do? Nunce elti, lik weik upsile. Ati ara, Israel ninye ara, ance batakminba, dabinamake. Dabikirye sik Allah, el si Yahweh ati, el si erepnin banamake. Yahweh arye, nun amutuku nirya opmasilba, pia malye upmasil ning ara, kum elilyam do? Kanye imun upsil ning ara, an kum tenepmalam arye do?” nyabik.

⁸ Nyabika ati, Firaun birye ila tamubuka Musa ap, Harun ap ati, yukubuk. Yukubukba yarikopura, weiknye Firaun birye, “Yo dabimunce, Allah el si Yahweh, el si erepra banamlume. Bukni, yata-yata nang dipkoprob binamak do?” nyabuk.

⁹ Nyabukura, Musa birye tamubuka nyabuk. “Nunda kam nang babye, wisi nang babye, nun mapu nirya sal mapu babye, kilmapu babye, tonda nunce weinyap ning kambing babye, domba babye, sapi babye nirya bobuka binamabe. Aning nirya bobinamap deiyok ara, weik sum dam upliba, Allah el si Yahweh ati, el si erebuka, kipnamaba atia,” Musa birye nyabuk.

¹⁰ Nyabukura, Firaun birye tamubuka nyabuk. “Na kanya ara, ‘Anggun ni Allah, el si Yahweh arye, anggun melinamsile,’ tenenune. Bukni, narye anggun batakdongopsiniba, anggun mapu ap, anggun kilapu ap, nirya binamluma ara, na akunum kel bikmasine. Anggunda dipkoprob malye winina ati binamlume. ‘Firaun biti malye kipnamaba, tenelulume,’ tenepne.

¹¹ Ati ara, anggun sal diamuk binamlume. Min arye moropnulum touk, bimunce anggun sal diamuk, Yahweh el si erepra banamlume.” Firaun birye nyabuk. Nyabukce, Firaun yu ubukba, el mapu nirya arye Musa ap, Harun ap ati, “Firaun dam arye batakuka, anggun buru birurume,” nyabuka yakik.

¹² Winibikopura, Allah el si Yahweh arye, Musa biti nyabuk. “Anda Mesir mutuku nirya diprebuka, an taruk arye, Mesir mutuku puklyame. Pukminyopura, adiparyuk sul kwising weik yanamake. Yakirye, amutuku nirya langdipnamake. Winibikirye, Mesir mutuku ulamle ning nirya yana dipropnamake. Ara, min arye dekne duk-duka purwu mok arye, min kum opmok ning nirya babye, sul kwising arye dibuka, sirya daknamle.” Allah arye, Musa biti nyabuk.

¹³ Nyabukura, Musa el kama Mesir mutuku tuku deice pukminyeura, Allah el mikip arye weik kumanya yali tam arye dobuka yayukce, asum keting noutam talak babye, lukunyan talak babye, kumanya weik arye donmoka ani, berekukopura, yali tam arye, sul kwising tonap tabakuka boyayuk.

¹⁴ Winibukopura, sul kwising weike yayikce, Mesir mutuku nirya langdibuk. Langdibukce, Mesir mutuku noutamak pia weika arye amubik. Ara, min talak arye dipdongobuka, wini talak noutamak nirya ap, aminyan yanamle talak babye, aning kibuk touk, sul kwising pia weik kum ulamuk, ton kum unamle. Sul kwising atalakuk, Mesir mutuku noutamak pia weika arye ubuk.

¹⁵ Tukwak mutuku sul kwising pia weika arye langdibukce, amutuku tukwak nirya miribukba, anoutamak sul kwising arye, amutuku uamuk ning nirya dibuk. Ara, yata ning do nirya, maning ap, yo duk ap, yo ap, wa kouamik ning nirya ap, dekne duk-duka purwu mok arye cebuka bisibukba, tuba uamuk ning nirya babye, dibuk. Imbik ning pia mitik anun babye ton kum ubuk. Mesir mutuku noutamak imbik palamuk ning nirya dibikce, sirya dakik.

¹⁶ Winibukba, Mesir mutuku weiknye Firaun birye, minopce Musa ap, Harun ap, ila tamubuka yukubukce nyabuk. “Se, na pia malye upmane. Ara anggun ap, anggunce el si erelulum Allah ara, el si Yahweh biti, malye wininune,” nyabuk.

¹⁷ Aning ton nyabuk. “Tonok talak tonap, na malye wininye ning namin kipnumunce, anggun ni koproba Allah, Yahweh ati moropnunululume. Moropnumunyeba, anggunce el si erelulum Allah, el si Yahweh, elce nun dam imun kanye usilye ning ara, aning opmnamsil ning kum kipdeipsutue. Ara, ‘Sul kwising kum kipdeipsutue’ tenen nyapne,” Firaun birye nyabuk.

¹⁸ Nyabukopura, Musa birye Firaun dam batakuka biyukce, Allah el si Yahweh ati morobuk.

¹⁹ Morobukopura, Yahweh el mikip arye weik kumanya arebukba, keting wekelban tam arye, weik kumanya mikip arye dobukopura, kumanya mikip arye, sul kwising nirya dobukabukce, weik laut mekwen pum bisik dongobuk. Alaut mekwen ara, el si Ining Bi Laut nyalamik. Winibukba, Mesir mutuku noutamak ara, sul kwising tonok ning babye, ton pia kum ubuk.

²⁰ Allah el si Yahweh arye winibuk bukni, elce arebukba, Firaun el talima tuba malye kibuka kekena kumce bisibukce, ‘Israel ninye batakniba, kum binamake,’ tenebukce nyabuk.

Allah arye, Mesir mutuku inina arebukba, Mesir mutuku nirya, inibuk yupu

²¹ Allah el si ara, Yahweh arye Musa biti nyabuk. “An taruk im deice pukminba, Mesir mutuku noutamak nirya inipnule,” nyabuk. “Winibuka pia inipnamla anya arye, dirina ara, mitik tonun babye kum upliba, ninye arye kum eipdanmanto ubikirye, ilil weik upnuyake,” Allah arye Musa biti nyabuk.

²² Nyabukura, Musa birye el taruk im deice erebuka kama pukukba, Allah arye inina arebukba, amutuku nirya inibuk. Winibukba, Mesir mutuku noutamak, like winilye sum deice arye, pia inibuk.

²³ Inibukba, ninye arye kum eipdanmanto ubikce, el kwit birye, el kwit biti kum eipdanmanto ubika ati, ninye nirya kum binmanto ubikba, sik mining aik pumuk unmek. Ara, like winilye sum arye inibuk. Winibuk bukni, Israel ninye sik ulamikak ara, dirin deice pia teleb touk ulamik.

²⁴ Ati ara, Firaun birye Musa biti, ila tamubuka yukubuk. “Dabilyame, bimince Yahweh el si erepra banamlume. Tonda, anggun ap, anggun mapu ap, anggun kilapu ap, dobuka bobitum bukni, anggun kambing ap, domba ap, sapi ap ara, asukumuk bataknamlulume. Aning ara, kum bobinamlulume,” nyabuk.

²⁵ Nyabuk bukni, Musa birye tamubuka nyabuk. “Ance, ‘Telebe,’ nyapsiminba, nun weinyap ning nirya ara, bobuka binamabe. Winiptibyopura, akam ning obuka, nun ni Allah el si Yahweh, el arena ap, si erena ap ati, omutuku binuka uku dapnamabe.

²⁶ Aweinyap ning nirya bobuka, bana uk upnamabe. Tonok ning babye ton batakipyeba, amutuku tuba kum unamle. Deiyok ara, nunce aning obuka, Allah arepnamaba atia. Omutuku min kum bibirye, bisik noutamak tuba banmapye talak ara, Allah arye, ‘Aning obuka arepnamnulum bukni, aning ara kum arepnamnulume,’ nyapdeipnamsil ning ara, nun walwale. Nun ni Allah el si Yahweh, el arena ati, ‘Akam ning do, aning do?’ tenen, ‘Teniltona upsilyak’ tenen ati, akam ning nirya bobuka banamabe,” Musa birye nyabuk.

²⁷ Nyabuk bukni, Allah el si Yahweh arye Firaun biti kat kanye bon ning arebukba, kum kekebukce, talima malye winibuka, “Israel ninye batakniba kum binamake,” nyabuk.

²⁸ Firaun arye tamubuka Musa biti nyabuk. “Anda, na like. Anda na dinak batakuka yukak pia binulyame. Na urasin tonap kum eipnamnilame. Yuk sum tonap na urasin epdanimnyopura, an oplopkinyeba, an adiparyuk dipnamlame,” nyabuk.

²⁹ Nyabukopura, Musa birye tamubuka nyabuk. “Yo ance dib nyapnilame. Anyapmanilam atonun, an dam tonap kum yanamne. An urasin ara, narye tonap kum eipnamkine,” nyabuk.