Kejadian 41 - Eipomek

^1-2 Ura, sik nirya daulamika ani, Firaun ton lengdar mabuk. Elce lengdar mapmokce eibuk ning ara, ani. Amutuku noutamak weik balamuk mek, Nil mek lilun tikmokbuk, amek pum bisik danirye, sapi basam tek barye kutukuka, maning mek lilun palamuk ning dinmek. Sik nong ara weik, sik urasin ap, sik potong ap ara, pia teleb ulamik.

³ Sik adinmek bukni, aminyan ara, sapi basam tek barye ton kutukik. Asapi basam ara, bol pia malye bomikce, sik potong ara, malyeuk ulamuk. Sik bol malye sapi basam arye, nong weik sapi basam dam, maning dinmek sukumak tikilyayik.

⁴ Sik bol malye bomik sapi basam arye, nong weik sapi basamak obuka dibik. Dibikura, Firaun el lengdar mapnin banmok noutam bukuk.

⁵ Bukuk bukni, wi tuba talipmok anya arye, tuba tamubuka tonap mapmukce, lengdar deice ton eibuk ning ara, ani. Tonok jagung tikmokak, el jagung duk tekbarye pia teleb ning ubuk.

⁶ Ajagung tekbarye teleb ning aupmok bukni, sirya talak adeiyok tonok bukni, jagung duk tekbarye tonap moupmok. Moupmokbuk, laka ubukba, keting yangan tam arye weik kumanya dobukba, silal lebukabukce, ajagung duk malye ubuk.

⁷ Malye ubukba, sik tekbarye malye ning arye, tekbarye nong teleb ning ati dipkwetebukba, kum dayuk. Dipkwetebukopura, Firaun el lengdar mapnin banmoka ara, bukuk.

⁸ Berekukopura, Firaun birye, ‘Se, aning ara, yata deiyok ati do?’ tenen, mambul kanye bonmokce, el asik nang, Mesir mutuku keten nang ap, weik kel bikne nang ap ati, yukubukba, el dam yayik. Yayikopura, Firaun lengdar mapmukce eipmok ning nirya laka nyanmokba, aninye noutamak arye tonoknye babye, ‘Deiyok ani’ tenen, lak nyapmanto kum ulamik.

⁹ Talye unmikba, Firaun el mek din makau talina deiyoknye birye nyabuk. Se, atalak na malye winipse ning ara, laka nyapnun tenepne.

¹⁰ Oketeng tamun noutamak ara, ance na ap, an din ning dana deiyoknye ap ati, yu upkukba, wenepsulumce, wenena aik yin talin nang sik deiyoknye aik dongopsulume.

¹¹ Dongopsulumba, daulamnumu talak noutamak ara, nun bitinye arye lengdar mapnumu. Alukunyan tonok talak aryuk, lengdar mapnumu bukni, alengdar deiyok ning yuk-yuk winibukak eipnumu.

¹² Atalak ara, yin talin nang, sik deiyoknye aik ulamnumu talak, nun ap neika ulamupunye, Ibrani kamnye ton ulamupu. Elda, anyasik deiyoknye, el urdem pil melinanye ulamuk. Nun lengdar deice eipnumu ning, elti, laka lepnumuba, elce nun bitinye yuk-yuk ati, ‘An lengdar deice eipmalam ning deiyok ara ani, ani,’ nyabuka laka nyapsuke.

¹³ Elce laka nyapsuk touk, aning nirya winibuk. Nara ance ereipnulumba, an pil ton tuba dokunune. Bukni, an din dana deiyoknye bira, yo deice kirikuka dopkweteplumce, ngang sekuka oplume. Anye birye, Firaun biti nyabuk.

¹⁴ Firaun biti, laka nyanmokba, kekebukopura, adiparyuk yupu deibukba, yuk nang arye Yusup wenena aik pum unmokak dobuka boyayikura, el bam potong kobukabukce, teleb baju ongobukura, Firaun dam yayuk.

¹⁵ Yayukura, Firaun birye, Yusup biti nyabuk. “Na lengdar mapmasirye, eibsi ning deiyok ara, yuk nang nirya arye, laka kum nyapnike. Sik walwal bukni, yuk nang arye, ‘Kume, Yusup bira, lengdar malamap ning deiyok ara, laka nyapsutue,’ nyapnikba, kekepse ati ara, ance laka nyapnilyame,” nyabuk.

¹⁶ Nyabukura, Yusup birye nyabuk “Kume, na mikip deice aryuk, kum laka nyapkitinye. Bukni, ance, ‘Se, na lengdar deice eibsi ning deiyok dan do?’ tenen, ‘Se,’ tenenmalam ning ara, Allah elcuk laka nyapnamkutue,” nyabuk.

^17-18 Nyabukura, Firaun birye Yusup biti, nyabuk. Na lengdar mapsa deice eipse ning ara, ani. Nil mek kup-kup tikmasebuk, amek pum bisik danirye, sapi basam tekbarye, sapi nong weik basam ap, sapi potong pia teleb basam kutukuka, maning pamukak yanuka dinmek.

¹⁹ Maning dinmek bukni, aminyan ara yuk sapi basam tekbarye ton kutukuka tikilyayik. Bukni aning ara. sik pia bol malyeuk upmok. Sik nong bol mitik malyeuk upmok. Mesir mutuku noutam nirya, sapi basam weik bukni, asapi bol pia malye bopromik ning ara, na pia ton kum eililamse.

²⁰ Sik bol malye sapi basam arye, nong weik sapi basam ak, nirya obuka dibik.

²¹ Dibikopura, sik bol pia malye unmek touk, tuba malyeuk unmek. Ninye nirya arye sikti, dipdeting babye, ‘Sik winiryuk dina weik dipmake’ tenen, kum biktinge. Malye urasin tuba bopmekba, na lengdar mapsa deice arye eipse. Firaun birye Yusup biti nyabuk.

²² Nyabukopura, ayupu ton dukdongopbuka nyabuk. “Ura, yuk lengdar deice eipse ning ara ani. Tonok jagung deiyok pabukce, el jagung taram ara, pia teleb ning tekbarye moubuk.

²³ Moubukura, sirya talak, ajagung yok deice bukni, jagung duk tekbarye tonap moubuk. Moubukura, keting panan talak arye buppu weik kumanya dobukba, silal sebukabukce, urasin pia malye weik ubuk.

²⁴ Winibukopura, sik mitik jagung duk arye, urasin teleb jagung duk ati dipkwetebik. Ayupu nirya ara, na mutuku unyak ninye arye pia teleb pil donyak ninye ati, laka nyapse bukni, sik noutamak arye tonoknye babye, ‘Deiyok ani,’ nyabuka laka kum nyapnike,” Firaun birye nyabuk.

²⁵ Nyabukura, Yusup birye Firaun biti nyabuk. Anda lengdar bitinye eipmamu bukni, sik deiyok ara tonok uk ulule, yuk ton kume. Anya arye, Allah arye an Firaun biti, sirya talak winipnamsil ning ati laka nyapmakile. Deiyok ara ani.

²⁶ Sik tekbarye urasin teleb sapi basam ara, keting tamun tekbarye atia. Aning atonun, urasin teleb jagung duk babye, keting tamun tekbarye atia. Lengdar mapmamu ara bitinye bukni sik deiyok ara tonok uka.

²⁷ Aminyan talak tikilyayik sapi basam urasin pia malye ap, bol malye ap bobik sapi sik deiyok ara keting tamun tekbarye atia. Aning atonun urasin malye jagung duk moubuk bukni, keting panan tam arye buppu weik kumanya yayukba silal lebuk ning ara, keting tamun tekbarye ulula atia. Aketing tamun tekbarye, talye keting tamun kum bukni, din ning ayala-yala nirya kum upliba, talye si tebuka urdemuk upnamap talak ati nyapkine.

²⁸ Arup nyapmakin touk, Allah arye an Firaun biti, aminyan winipnamsil ning ati akunum laka nyapkile.

²⁹ Keting tamun tekbarye deice arye Mesir mutuku noutamak nirya ara, sik kounamak ning pia weika arye moupnamle. Din ning yala-yala weik unamsile.

³⁰ Bukni, aminyan talak ara, keting tamun tekbarye deice arye, din ning ayala-yala nirya kum daliba, din si tebuka urdem unamabe. Winipsilyopura, Mesir mutuku noutamak nirya din si tebuka ulamepye ani, ikin pia weik ubibya deice arye, min arye din ning weik wamsuk talak nirya luba kipnamabe.

³¹ Min yuma, din ning ayala-yala nirya weik upnamle bukni, aminyan talak, aning nirya kum dandoplyopura, imun kanye pia weik bonamabe ati, teleb wamsuk talak luba kipnamabe.

³² Lengdar bitinye mapluma deiyok ara ani. Alengdar bitinye ara deiyok tonok bukni, Allah arye, ‘Aning ara dipkoprob winipnamne. Kanye kum bintinipnamnile, akunum winipnamne,’ tenebuka ati ara, lengdar bitinye ara nyapkuke. Tonda, Allah arye aning nirya ara, minopce winipnamsile, nimalye arye kume. Yusup birye Firaun biti nyabuk.

³³ Nyabukopura, ayupu ton dukdongopbuka nyabuk. “Aning nirya ati, teleb ning ara nyapnukine. An epremince, weik kel ap, ‘Deiyok ani’ tenen, moubuka tenepmanto ning ap winilulnye eipminyopura, erepnalame. Ara, ‘Mesir mutuku nirya kalikna ap, melina ap ati, talina deiyoknye upnamle’ tenen, anye erepnalame.

³⁴ Tonda winipnamlyame. Din ning lipsisikuka bokolina deiyok nang wibuka deipminyopura, keting tamun tekbarye deice, din ning yala nirya weik upnamsil talak ara, sik Mesir mutuku ninye linamak ning nirya bonamake. Linamak ning bokuka pamubarye deibikirye, dumbarye ning talye mangkau asa dinamak bukni, pamu ning ara, dokola ati kintinibuka delinamake.

³⁵ Ance wipnamlam deiyok nang arye, din ning ayala-yala nirya, weik unamsil keting tamun ara, ton ning ara, Firaun si deice arye doprobikirye, weik ninye asik noutam memebuka deiamice ning. Ara, aminyan talak ikin unamsil talak dina ati, aning winibipyopura, teleb uka.

³⁶ Adeiyok nang arye, memebuka delinamak din ning ara, sirya talak keting tamun tekbarye deice, Mesir mutuku din ning ayala-yala nirya kum danin balyopura, memebuka deiamikce ning, dobuka bokeibicopura, Mesir mutuku ninye dipnamake. Winibikca deice arye, Mesir mutuku nirya ap, Mesir mutuku ninye nirya ap, min kum, kum danamle.” Yusup birye Firaun biti, nyabuk.

³⁷ Ayupu nirya laka nyabukura, Firaun kekebukce, “Aning ara telebuk,” tenebuk. Tonda el amu tam pil dolamik nang babye, sik kekebikce, “Teleb,” tenebik.

³⁸ Utenebikura, Firaun birye, el pil don nang nirya ati asipdeyuk. “Anggun ton teneipdelulume. Anye bira, Allah el Dib Kanye arye, el talima noutamak pil dolulue. Dana-dana tam nirya, ton pia epra bitibya babye, atonye ton eiptibye do? Na kanye ara, kum eiptibye,” nyabuk.

³⁹ Firaun birye nyabukce, elce Yusup biti nyabuk. “Ura, aning-aning nirya, ance laka nyapmasilam ning nirya ara, Allah arye anti, laka nyapdibkukba, laka kibuka nyapmasilama anya arye, yuk nang ara, mitik tonun arye kel nang unyak bukni, nun kanye ara, anda weik kel ap, ‘Deiyok asukum’ tenen, laka nyapmanto una ap, weika tuba ulamkile.

⁴⁰ Ati ara, na weik aik ap, na talinun ning ap ati, weik deiyoknye unamlame. Ance tenepminye yupu nyapdeipminba, na talinun ninye nirya ara, kekepkikirye, ance nyapsiminye touk, aninguk wininamake. Na tonok ara, amutuku ninye deiyoknye unirye, amutuku nirya talinamne anya arye, nara an deice tam unamne bukni, yuk ninye nirya ara, an amu atamuk unamake. Sik deiyoknye unamlame.” Firaun birye, Yusup biti nyapdeibuk.

⁴¹ Firaun birye, Yusup biti nyabukopura, ayupu ton nyabuk. “Wini talak arye dipdongobuka oyanamle talak ara, akunum erepdeipkine ati, Mesir mutuku nirya talibuka deiyoknye unamlame,” nyabuk.

⁴² Nyabukce, sik ninye deiyok nang arye, sik taruk duk deice ongolamik ning, emas el si ara, cincin dobuka Yusup el taruk duk deice dongopdeibuk. Deiyok ara, ‘Mesir ninye nirya arye, anye nun deiyoknye tenebikirye, kel biknamak,’ tenen, winibuk. Tonda, atalak ninye deiyok nang ongolamik baju, pia teleb ning ap, Yusup el ngang dam karakna ati, emas tapu ap arebukba, Yusup birye aning karakuk.

⁴³ Tonda Firaun birye nyapdeibukba, sik amutuku ninye deiyok nang balamik touk, kuda basam libuka, tuku deice balamuk ning ton arebukba, Yusup aning wekuka adeice tikukce, balamuk. Firaun bira, pia deice tam ninye deiyoknye ulamukce, Mesir mutuku nirya taleamuk bukni, el amu tam weiknye bitinye ning ara, Yusup binyak erepdeibukba tikuk. Amutuku noutamak Yusup balamuk talak, yuk nang arye, “Memepdoplulume,” nyanmikba, sik talye daulamek ninye nirya memepromekba, Yusup banmok. Firaun anirya winibuka deiyok ara, ‘Yusup birye Mesir mutuku noutamak wininamap ning nirya ati, yupu bokolina deiyoknye, weiknye unamsil’ tenen, winibuk.

⁴⁴ Winibukce, Firaun birye Yusup biti nyabuk. “Nara dipkoprob amutuku talina deiyoknye minopce unun bukni, ance, “Winiplulume,” nyapsiminyopura, na tam ninye arye pil donamak bukni, kumopura, kume. Ara, sik kanye aryuk pil kum donamake. Ance nyapsiminye ninguk kekebuka pil donamake,” nyabuk.

⁴⁵ Nyabuka Firaun birye Yusup biti, winiryuk si ton sisibuk. Anye si ara, ‘Sapenat-Panea,’ nyabuka sisibuk. Tonda, el kil ati, akil si, ‘Asenat,’ kapdeibukba dobuk. Akil el li bira, On mutuku ninye, sik isa si erena deiyoknye, el si ara, ‘Potipera’ ulamuk. Aning-aning nirya akunum winibukopura, Yusup birye, Mesir mutuku noutamak pil dolamuk.

⁴⁶ Ura, Mesir mutuku nirya taleamuk deiyoknye Firaun birye, Yusup ereibuk talak ara, Yusup elda keting tamun 30 akunum nebuk. Atalak arye, deiyok koubuka otalak noutamak nirya Yusup birye, Firaun el dam batakuka, Mesir mutuku noutam nirya, pil dopra balamuk.

⁴⁷ Keting tamun tekbarye deice ara, Mesir mutuku noutam koulamik ning aning-aning nirya, pia weik moulamukba, din ning pia weik ulamuk.

⁴⁸ Din ning aning-aning weik ulamuka anya arye, Yusup birye nyapdeibukba, amutuku ulamik ninye arye, sik weik asik dana-dana tam wa wibuka koulamik ning, nong pia weik moulamuka anya arye, aketing tamun tekbarye noutamak ton ning ara, bokuka din delin aik memebuka delilamik. Ara, ‘Aminyan talakuk dipnamap’ tenen, tenebuka delilamik.

⁴⁹ Ura, minopce kum lyupmanto ning, jagung atonun do, gandum, kedelai atonun do, terigu do, Yusup birye nyapdeibukba, aning atonun ning pia weika arye delilamikba, nukmanto kum ulamuk. Ara, laut mekwen kup-kup mek wininga, pia weik ulamle touk. Kilo nukmanto kum ubuka delilamika anya arye, Yusup deiyok kibuk talak ara, kilo nukuka sekelamuk bukni, nukmanto kum ulamukba, nukuna ara batakuk.

⁵⁰ Din ning aning-aning nirya, yo bok min kum silikuk talak, teleb keting tamun noutamak ara, Yusup el kil Asenat birye, sal mapu bitinye deibuk. (Akil el li bira, sik On mutuku ninye arye, isa si eren deiyoknye, el si ara Potipera ulamuk.)

⁵¹ Yusup el min yuma talak deibuk mi, ‘El si ara, Manasye,’ nyabuka si dobuk. Ara, ami deibuk talak ara, Yusup el kanye deibukce, “Winira Allah arye akunum melipmanilba, minop talak na ikin ulamnuk ning ap, na ni koproba ap, el aik ninye nirya ap ati, ikin kanye bobuka tuba kum teninune,” nyabuk. Nyabukce ami si ara, ‘Manasye,’ nyabuk.

⁵² El sal mi bitinye deibuk talak ara, Yusup birye, “Amutuku noutamak ara, imun kanye bobuka, ikin weik ulamnuk bukni, winira Allah arye melipmanile deice arye, na mapu deibuka, telebuk unune,” nyabukce, “Ami el si ara, Efraim,” nyabuka si dobuk.

⁵³ Atalak ara, keting tamun tekbarye, din ning ayala-yala nirya pia weik uamuk talak sirya dakuk.

⁵⁴ Sirya dakukba, anyapce dipdongobuka, oketeng tamun tekbarye ton, din ning kum danamuk talak deiyok koubuk. Ara, oketeng tamun deice Yusup birye, “Aminyan talak aning-aning nirya kum danamsile,” nyapdeiamuk touk, deiyok koupnin banmok. Mesir mutuku noutam ara, dana-dana mutuku nirya ara, din ning aning-aning nirya kum dayukba, aninye nirya din si tebuka, din dina kumce, urdem ulamik. Winilamik bukni, Mesir mutuku noutamak ara, din ning weik uamuk talak memebuka, weik delilamika arye, sik diamuk din dilamik.

⁵⁵ Din kum dayukba, amutuku ninye nirya ikin weik ulamikce, sik deiyoknye Firaun biti, “Se na nio, nun din ara kum dasila ati, melipsilyame,” nyabuka morolbiyik. Morolbiyik buk, Firaun birye nyabuk. “Winira Yusup dam bimunyeura, elce nyapnamasil ninguk kekebuka unamlulume,” nyabuk.

⁵⁶ Amutuku dana-dana tam nirya, din aning-aning nirya kum danin balamukopura, Yusup birye nyapdeibukba, sik min arye, din delilamik aik bublan kukeibukura, Mesir mutuku noutam ulamik ninye mutuku-mutuku nirya arye dekelyangalamik. Ara, amutuku dana-dana tam nirya, din kum dayukba, aninye nirya ikin weik ulamika ati, din dekelyangalamik.

⁵⁷ Tonda, Mesir mutuku noutamakuk kum bukni, dana-dana tam mutuku nirya babye atonun, sik din ning babye kum dayukba, sik yuk mutuku ninye babye, ikin weik ulamikba, ‘Mesir mutuku ninye arye memebuka delilamik ninguk deknuyap’ tenen, Mesir mutuku dekelyangalamik.