Imamat 9 - Eipomek

Allah ap, ninye ap ansinilina ati, pil dona deiyok nang, sik imam-imam nang arye, sik pil deiyok koubuka, pil dopnin balamika ati, nyabuk yupu

¹ Musa birye, Harun ap, elce deiamuk nang ap, ‘Imam-imam nang unamakʼ tenen, wibuka delina sum kibukba, Musa birye, “Apil dopra banamlume,” nyapdeibuk touk, Harun ap, el mapu ap, Allah el si eren aik bublan dam daunmekce, like tekbarye sum noutam arye, apil dopnin banmeka ani, like pinbarye sum ton kibuk. Asum ara, Musa birye, Harun ap, elce deiamuk nang ap, tonda Israel nang, sik deiyok-deiyok nang nirya ap ati, “Asukum yalulume,” nyabuk.

² Tonda Musa birye, Harun biti nyabuk, “Ance, sapi basam yim winiryuk nenmalye ning ap, yim domba basam ap, boyalyame. Adobuka boyamince kam ning bitinye ara, Allah Yahweh el si erena ap, el arena ap ati, yanuka arepnalyame. Tonda, yim sapi basam ara, an malye winin ning kum kibuka kilina ati, obuka boyana arepnamlyame. Bukni, yim domba basam ara, Allah el si erena ati, aning obuka uku dongona ak, dobuka delilyanamlyame. Akam ning bitinye ara, winiryuk nepmalirye, bol pia teleb ninguk dobuka yanamlyame. Bol malye ning boyangana meme. Akam ning bitinye ara, Allah Yahweh ati arepnalame.

³ Winipmunyopura, Harun ance, sik Israel nang nirya ati, ayupu laka nyapnamlyame. “Anggun malye winilulum ning ati, ‘Allah arye namin kiplirye, lyepdopnamsilʼ tenen ati, anggunda kambing basam yim tonok dobuka boyanamlume. Ara, anggun malye winilamlum ning, ‘Allah arye, nun malye winin ning kum kipsilyakarye, lyepnamsil atiʼ tenen ara, yim sapi basam mi ap, domba basam mi ap, bobuka yanamlume. Akam ning bitinye ara, keting tamun tonok deice arye, winiryuk nepmalye basam, bol pia teleb ninguk, boyanamlume. Dobuka boyamunce, opmunyopura, nun imam nang ati, arepsumunyopura, nunce aning dobuka, Allah Yahweh, el arena ati, uku dongopnamabe.” Ayupu nyapnamlyame.

⁴ Tonda, Harun ance, sik Israel nang nirya ati, “Aning babye wininamlulume,” nyapminyeura, sik adiparyuk winipnunyake. Ara, “Yim sapi basam ap, tonda yim kambing basam ara, obuka boyanamlume. Aning bitinye arepnamluma deiyok ara, ‘Allah ap, nun ap teleb kibuka neika unamap,’ tenena ati, aning opmunyakarye, Allah Yahweh ati, arenamlulume. Tonda, aning ap tabakuka arepnamlum ning ara, ani. Ara, roti kwaning dana ati deiyok ning, tepung terigu do, yakong do, aning babye, minyak mek arye likuka dapmace dina ap, boyanamlume. Aning nirya ara, ‘Allah arye, nun malye wininyap ning kilina ap, tonda lyebuka teleb kibuka kilipnamsilʼ tenen, dobuka arelyanamlume.” Harun ance ayupu laka nyapnulyame. Ayupu laka nyapminyeura, sik Israel nang ara, adiparyuk boyanuka, Allah Yahweh el dam arelyanunyake. Ara, talye ati kume. Deiyok ara, asum ara, Allah Yahweh, anggun dam yanamle. Ati ayupu nyapsine.” Musa birye Harun ap, elce deiamuk nang ap, Israel nang sik deiyok-deiyok nang ati, ayupu nirya nyabuka, laka nyabuk.

⁵ Musa birye, sik aimam nang nirya ati, “Aninguk kintinibuka boyanamalume,” nyapdeibuk ning nirya ara, kekebikce, sik Israel nang nirya ati, laka nyabikura, sik anang-anang nirya arye, ‘Aning-aning bulubuka boyalulume,’ laka nyabik touk, Allah ap, ninye ap ansinilina ati, sapi basam bol arye dolamik tenda aik domika damuk bulubuka yayikce, ‘Asukum ara, nun ni Allah Yahweh arye dinmasilʼ tenen, el dam atonun, bulubuka wekikce, el siuk yanuka erebuka kibik.

⁶ Sik Israel nang nirya, anyaik dam bulubikopura, Musa birye, sik nirya ati nyabuk, “Asum ara, Allah Yahweh arye, anggunti, ‘Winipnamyake,’ nyapdeipmasu touk, akunum winiplume. Elce nyapdeipsuk touk, akunum winipmunyopura, awinipmunya deice arye, Allah Yahweh elda, pia teleb ulula ati, el weik dirina ara, akunum lak kipdeipsiliba, anggunce eipnamlume,” nyabuk.

⁷ Ura, aning nirya akunum winibikura, Musa birye, Harun biti nyabuk. “An adiparyuk kam ning opmince, uku dongona ati, pala keil yangabuka kintinip deibikak, el si mesba dam binulyame. Biminyopura, ‘Allah arye nun malye winin ning namin kibuka, kum kipdeipsilirye, lyepdopnamsilʼ tenen, kam ning obuka, Allah aren ning ap, aning atonun kam ning obuka, uku dongon ning ara, adiparyuk binuka kintinip deipnulyame. Nun malye wininyap ning ati, Allah arye talye lubakibuka oplopsutu bukni, anya aren ning arepminya deice arye, an malye winiminye ning ap, sik Israel nang malye wininyak ning ap nirya ara, Allah Yahweh arye namin kipsilirye, nun malye wininyap ning kum kipsilyakarye, teleb kipdeipnamsile. Aning nirya, Allah ati arepnumunye ning nirya ara, Allah Yahweh arye, na dam yanuka, “Winibuka winipnamlume,” nyapdeiamsuk touk, winibuka, pil dopnulyame. Musa birye Harun biti, nyabuk.

⁸ Musa birye nyabukopura, Harun kekebukce, adiparyuk kam ning obuka, uku dongona ati, mesba kintinibika dam bobiyukce, elce malye winilamuk ning ati, ‘Allah arye, na malye winin ning namin kipnilirye, kum kibuka, teleb kipdeipnamnilʼ tenen ati ara, ayim sapi basam mi, winiryuk nenmalye ninguk, obuka bobiyukce, Allah ati arebuk.

⁹ Harun elce, asapi yim oplobuka dopdeibukura, elce deiamuk nang, el mapu arye, asapi basam el ining biyuk ning ara dobuka, Harun dam boyayikce, ‘Akunum kintinip deipmabe,’ nyabuka, Harun dam binuka nyabikura, Harun yayukce, el taruk arye, aining deice binuka burubukce, ‘'Ining ning obuka, uku dongona ati, keil tablakuka kintinyamik ning, el si mesba kup-kup dam dana-dana arye, belepdeiamik yo taice atonun ning deice, binuka likdeibuk. Tonda, aning akunum winibukura, ining ton tuba aubuk ning ara, doropdakuka, aining ning obuka uku dongona ati, mesba kintinip deibik ning deiyok dam dana-dana tam nirya, binuka dikdeibuk.

¹⁰ Bukni, aopmok basam el meta ap, keil duk bitinye ap, talima deice palilamle kop ap, dopdakuka, ining ning obuka uku dongona ati, keil taplakuka mesba kintinibuka deiamikak dobuka, biyukce uku dongobukba, uku arye dibuk. Aning nirya, mesba deice deipmok ning nirya ara, ‘Allah arye, na malye winin ning namin kibuka, lyepropnamnilʼ tenen, arepmok ning noutam arye dobuka, uku dongobuk. Apil nirya ara, Allah Yahweh arye, Musa biti, “Apil dopnamlyame,” nyapdeiamukba, Musa birye, ayupu nyamuk touk, laka nyabukba, Harun birye, aning winibuka, pil dobuk.

¹¹ Winibuk bukni, aopmok sapi basam el nong deice bai tam bola ap, tup ap nirya ara, mesba dam arye, Israel nang, sik sapi bol arye doltakna tenda aik dolamikak arye, bai tam bobinuka, uku sekukabukce, aning nirya dobuka, auku dongobukba, uku arye dibuk.

¹² Winibukopura, tonda Harun el damnye malye winilamuk ning, kum kina ati ara, kam ning ton obukabukce, kintinibuka deibuk. Kintibukce, opmok ning el ining nirya ara, elce deiamuk nang, el mapu arye, aining dobuka kintinibikce, sik ni koproba ati, binuka arebik. Elce aining dobuka, kam ning obuka, uku dongona ati, keil pala yangabuka kintinibuka deiamikak, el si mesba deice ap, mesba el kup-kup dana-dana tam nirya ap, binuka likdeibuk.

¹³ Harun el mapu arye, aining dobuka arebikce, apil nirya akunum dobukopura, el mapu arye, abasam el kisok ap, yuk tam tup sekuka kintinip deipmek ning nirya arye, yuk-yuk bukni, aning nirya dobuka, aning nirya dobuka, tonok-tonok arebik. Harun biti arebikba, elce dopdakuka, kam ning obuka uku dongona ati, mesba kintinibuka deiamikakuk, bobinuka uku dongobukba, uku arye dibuk.

¹⁴ Aning akunum winibukopura, aopmek ining ning, el deisuruk ap, yan ap ara, Harun birye dobukabukce, mek likuka, teleb kibuka kintinip deibuk ning ara, aining ning obuka, uku dongona ati, kintinibuka deimuk ning deice, aning babye binuka, uku dongobukba, uku arye dibuk.

¹⁵ Apil nirya akunum dobuka, sirya dakdongobukopura, Harun biryuk, Israel nang, sik malye winilamik ning kum kina ati, kintinibuka deipmek kambing basam ara, boyayukce, adiparyuk obukabukce yanuka arebik. Obuka din ning ara, Israel nang, sik malye winilamikce ning ati, ‘Allah arye namin kiplirye, anang teleb kipdeipnusilʼ tenen, Allah ati arebik. Ara, el damnye malye awinilmuk ning kilina ati, apil dobuka, winipmok touk winibuka, Israel nang, sik malye ulamik ning ati, ‘Allah arye namin kibuka kiliplirye, kum kibuka, anang teleb kipdeipnamsilʼ tenen, apil dobuka, Allah ati aning arebik.

¹⁶ Tonda, Allah arena ati, kam ning obuka, uku dongonak bobinuka dongobuk. Ara, Musa birye, ‘Allah arye lyepsutuʼ tenen, kam ning obuka, uku dongopnarye, Allah ati aren pil ara, winibuka-winibuka apil donamlume,” nyabuka, laka nyapdeiamuk touk, Harun birye, apil ton dobuk.

¹⁷ Tonda atalakuk, roti kwaning din ning deiyok ning, terigu do, tepung do, yakong do, Allah el arena ati, kintinibuka delilamik ning ara, Israel nang arye, boyanmek ning ara, Harun el taruk tonok arye, mitik tonun ton dobuka boyayukce, uku dongona ati, mesba kintinibuka deiamikak yayukce, uku dongobuk. Asukumuk bukni, beren tam talak kam ning obukabukce, uku dongopmok ning, akunum uku dongopmok bukni, atalak ara tabakna ati ara, aroti kwaning dina deiyok ning ton arebukce, Allah el arena ati, uku dongobuk.

¹⁸ Atouk tonda, Harun elcuk yim sapi basam ap, yim domba basam ap, dobuka boyanmekce, elti, arebikba, aning ton yanuka obuk. Ara, ‘Nun Israel nang nirya, nun malye wininyap ning arena ati, Allah kum kipsilyakarye, teleb kipdeipsilyeba, nun ap, el ap, ansinibuka telebuk unamapʼ tenen, apil ton dobuk. Aopmek nang ara, Harun el mapu siknice, ining doprobikce, sik ni Harun biti yanuka arebik. Harun birye aining ning obuka, uku dongona ati, kintinibuka deibikak, el si mesba deice ap, amesba kup-kup dam, dana-dana nirya ap, binuka dikuka deibuk.

¹⁹ Bukni, ayim sapi basam ap, yim domba basam ap ara, sik meta ap, kop ap, tonda keil duk kop ap, amu tam dam meta ap, tonda talima palilamle meta nirya ara, kintinibuka deibuk.

²⁰ Akintinibuka deibuk meta ap, kop nirya ap nirya ara, aopmalye yim sapi basam ap, yim domba basam ap, sik taram tup nirya ara, adeipmekakuk binuka, ameta ning nirya dobukabukce, ataram tup deice deibuk. Winibukopura, Harun birye, aining noutam arye doprobuk meta yala-yala nirya dobuka, uku dongona ati, kintinibuka deibikak mesba deiceuk binuka, uku dongobukba, uku arye dibuk.

²¹ Harun birye, abasam mun tup ap, sirik tam keil tup ap, uku min kum dongobuk talak ara, abitinye ning doprobukce, Allah Yahweh ati, ‘Telebe,’ nyana ati, el dam tamuk, aning erebuka talibukce, binuka peterebuka nyabuk. Anyaribuk ning ara, ‘Allah aik talibuka, anyaik pum tam pil don nang, sik ning ukaʼ tenen, Allah ati arebuk. Apil dobuk ning nirya ara, Allah arye nyapdeibukba, Musa birye, “Winibuka apil donamlulume,” nyabuka, laka nyabuk touk, Harun birye winibuk.

²² Harun birye, aning nirya winibuka akunum arebukura, el taruk erebuka, Israel nang, sik abulupmekak urasin tam erebukce, ‘Allah Yahweh arye, Israel nang kalikuka melinamleʼ tenena ati, teleb yupu nyabuka morobuk ning ara, el taruk erepmok ning ara, batakuk. Winibika deice arye, ‘Allah arye sik Israel nang teleb kibuka delinamsilʼ tenen, pil dobuk. Tonda, asum arup talak ara, Allah el aren ning yala-yala nirya, akunum arebuka ati, mesba dam arye, mitik yukak koulukuk. Harun birye akunum Allah ati arebuk ning ara, ninye malye wininyak ning kilina ati, kam ning obuka arebuk. Tonda, ninye malye wininyak ning ati, Allah arye adiparyuk wenebuka oplotu bukni, sik pununa ati, kam ning obuka uku dongona ati, mesba deice arebukce, uku dongobuk. Tonda, ‘Ninyeʼ malye wininyak ning namin kiplirye, Allah ap, ninye ap, teleb kanye arye ton ap, teleb kibuka neika unamap,’ tenena ati, akunum nyabuk. Harun birye, anye aren ning yala wilye akunum arebukopura, mesba dam arye, koulukuka yayuk.

²³ Winibukopura, Musa ap, Harun ap, sik adiparyuk Allah Yahweh ap, ninye ap ansinilina ati, sapi bol arye tia ati domik doltakna tenda aik deipmek noutam, binuka wekdik. Wekuka daunmarika ani, tamubuka bai tam yarikopura, ‘Allah arye, Israel nang nirya ati, teleb kipdeipnamsilʼ tenen, teleb yupu nyabukadikce, teleb kipdeipdik. Teleb kipdeipdikopura, sik Israel nang nirya arye, Allah Yahweh el pia teleb ulula ati, el weik dirina ara, sik dam yanuka, lake upmokura, sik nirya arye, adirina ubuk ning eibikce bikik.

²⁴ Atalak ara, Allah Yahweh el weik dirina noutam arye, talye karin arye, uku dopkwebukba, uku dongon ning, el si mesba deice deipmok domba ato ning ap, meta ning yala-yala nirya ap ara, uku arye minop dibuka sirya daklobuk. Winibuk talak ara, sik Israel nang nirya eibikce, kanye weik deibikce, ‘Seʼ tenen, Allah Yahweh el si erena ati, sik urasin tam ara, tukwak deice mamikce, Allah ati si erebuka kibik.