Imamat 8 - Eipomek

Musa birye, ‘Allah ap, nun ap, dukulongon pil donamsiakʼ tenen, Harun ap, el mapu ap, wipdeibuka ati, nyabuk yupu

¹ Allah Yahweh arye, Musa biti nyabuk.

² Ance, Harun ap, el mapu ap, sik nirya ati yukupnulyame. Yukupminyeba, sik yace talak ara, ance sik imam nang ongonamak lenan baju ap, ninye deiyok nang wibuka deibikirye, sik kisok deice dikililamak minyak mek ap, kintinipnalyame. Tonda, sik awipdeipnalam nang, sik malye winin ning, ‘Allah Yahweh arye namin kiplirye, kum kipdeipnamleʼ tenena ati, yim sapi basam tonok ap, tonda yim domba basam bitinye ap, tonda keranjang aling tonok, nena kum roti kwaning dabuka, lipmangu keranjang aling deipmace ning ap, “Aning nirya ara, dobuka dinamlume,” nyapminyeura, Israel nang arye, aning nirya dobuka yanamake.

³ Tonda, ance sik Israel nang nirya ati, “Bulubuka yanamlulume,” nyapminyeura, na Allah si erena ati, tiaya sapi bol arye domik arye, doltakna domik tenda aik bublan damuk, bulubuka wekelyanunyake. Allah arye Musa biti, nyabuk.

⁴ Nyabukopura, Allah Yahweh arye, Musa biti, “Winibuka-winibuka pil donamlyame,” nyapdeipmok ning nirya ara, anyapmok touk winibuk. Winibukopura, Israel nang nirya bulubuka, Allah si eren aik dam yanuka wekik. Anyaik bublan dam, akunum bulubuka wekik talak ara, sik Israel nang nirya, anyaik dam wekuka dinmekak arye, Musa bira akunum pil dobuk.

⁵ Winibukopura, Musa birye, sik awekmek Israel nang nirya ati, nyabuk. “Allah Yahweh arye, nati, ‘Harun ap, elce deiamuk mapu ap ati, aning ara, ‘Winibuka-winibuka pil donamlame,’ nyapdeipnok touk winibuka, pil dopnune,” nyabuk.

⁶ Winibuka nyabukopura, Musa birye, Harun ap, el mapu ap, sik nirya ati, “Asukum anyuk yanululume. Ayamunyopura, anggun yan ap, taruk ap, nong nirya ara, mek liknusine,” nyabuk. Musa birye, nyabuk touk yayikura, Musa birye, anang nirya mek likuk.

⁷ Aning akunum winibikopura, Musa birye Harun biti ara, imam nang, sik deiyok nang ongolamak baju, nong dam ongonamaka ning ara, kwiribuka deibukce, abaju deice arye, yuk imam nang ongolamak cang baju, el si juba ap ongopdeibuk. Juba akunum ongobukce, abaju deice bukni, el deiyatinga deilin ning, cang baju arye kintinip deiamik ning, el si ikat pinggang, ton marikbeibik. Winibukopura, ‘Allah arye laka nyapsileba, nun wininamap ning kel biknuyapʼ tenen, delilamak ning, el si Efod, aning bobinuka, Harun el taram damuk taplakuka deibuka, tapu arye koupdongobuk. Efod baju kiniknarye, daralongona ati, kel weik nang arye, namin baju ati wilamik cang baju, Harun el deiatinga deibuka koupdongobuke.

⁸ Winibukopura, Harun el taram dam deibuka ongopmok baju, Efod deice ara, dekna weik keil bitinye, akeil si ara, Urim keil ap, tonda Tumim keil ap arye dobuka, abaju deice deibuka taplak deibuk. Ara, ‘Allah arye laka nyapsiliba, nun wininamap ning, kel biknamapʼ tenen, urasin teleb keil bitinye deiamik ning ati nyapne.

⁹ Tonda, Harun el kisok kouna ati, cang kain, el si serban koupdongobuk. Aserban deice ara, dekna weik kat ning, el si emas arye, urasin teleb kibuka, memebuka deiamikak, bobinuka kitipdeibuk. Aning ara, el si hiasan emas bukni, el deiyok ara, ‘Aning kinikmalinye bira, Allah el koproba ululeʼ tenen, tenelamikce ongolamik. Tonda, aning winibuka, ongopdeibuka deice arye, ‘Harun bira, Allah Yahweh el tia tenda aik pum tam pil don nang, sik deiyoknye unamleʼ tenen, laka kina ati, kintinideibuk. Aning nirya ara, Allah arye Musa biti, “Winibuka pil dopnamlyame,” nyapdeiamok touk, apil dobuk.

¹⁰ Tonda, aning nirya akunum winibukopura, Allah el si eren aik, sapi bol arye domik tenda doltakna aik, ‘Atenda bol aik ara, Allah el ninguk pia unamle. Tonda, imam nang arye, anyaik pum tamuk, pil donamak deice arye, Allah ap, nun ninye ap, ansinilidanuka, teleb kibuka neika unamapʼ tenen, Musa birye, minyak mek bobukabukce, el taruk arye, mitik tonun burubuka, anyaik tenda bol deice ap, anyaik pum tam kintinibuka deiamik ning nirya ap, adeice likdeibuk. Tonda, purupdongokukba, mek lupsingca pakukba, aning nirya deice, poulbinuka dulbiyuk.

¹¹ Tonda, Musa birye minyak mek ton mitik tonun dobuka, kam ning obuka, uku dongona ati, kintinip deiamik ning, el si mesba ap, mesba dam pil don ning, alat-alat nirya ap, ‘Sik taruk ap, yan ap, mek liliknamakʼ tenen, kintinibuka deiamik mek, makau ap, amek makau deilin ning, el aning deice deiamikak, uamuk ning ara, minyak mek dobukabukce, like tekbarye deice arye binuka, mek burubuka, purupdeibikba, aning nirya deice poulbinuka dulbiyuk. Aning winibuk deice arye, ara, ‘Allah Yahweh el ninguk,’ tenenamaka ati, laka kipdeibuk.

¹² Apil akunum nirya winibukopura, Musa birye, Harun wibuka deibukce, ninye deiyok nang wibuka deimokce, kisok deice dikililamak minyak mek mitik tonun ton, Harun el kisok deice likdeibuk. Awinibuka deiyok ara, ‘Harun bira, Allah el si eren aik pum tam, pil dona deiyoknye unamle. Elda malye winin ning nirya bataklirye, elda telebuk unamleʼ tenen, minyak mek mitik tonun arye, Harun el kisok deice likdeibuk.

¹³ Musa birye Harun biti, akunum pil dobuka sirya dokukopura, Harun el mapu nirya ati, “Na dam yanululume,” nyabukba, sik nirya, bulubuka yayikopura, nong dam kiniklamik cang baju, kemeja baju ongobukce, sik deiyatinga delina ati, ikat pinggang ton marikdeibuk. Tonda, sik kisok kitina ati ara, cang kain ton, el si destar koupdongobuk. Aning nirya pil dobuk ning ara, Allah Yahweh arye Musa biti, “Aning ara, winibuka pil dopnamlyame,” nyabuk touk, winibuka pil dobuk.

¹⁴ Aning nirya akunum pil dobuka, sirya dakukopura, Musa birye, ‘Harun ap, el mapu ap, sik malye winilamik ning ara, Allah arye namin kiliplirye, kum daneipnamleʼ tenen, yim sapi basam tonok obuka yayuk. Ayanuka deibuk sapi basam deice arye, Harun ap, el mapu ap, sik taruk ara, asapi basam, el kisok deice deibik. Ara, ‘Nun malye winin ning, asapi basam el nong deice deibibyeura, nun malye winina ning punuba lyena ati, opnamapʼ tenen, el kisok deice, sik taruk deibik.

¹⁵ Winibukopura, Musa birye asapi basam obuk. Obukba, abanmok ining ara, dobuka, kam ning obuka, uku dongona ati, mesba dobuka kintinip deiamikak, kup-kup sirya dana-dana arye, taca belelamle ning atonun kibuka deiamik deice ara, el taruk duk arye, aining mek burubukabukce, ataca atonun ning deice binuka, likuka deibuk. Winibuka deiyok ara, ‘Amesba nirya ara, Allah Yahweh el ning ukaʼ tenen, merekbukce, teleb kipdeibuk. Asapi basam opmuk ning, tuba aunmok ining bobukabukce, amesba dam bukni, deiyok tam tuku deice, dikdongobuka deipdebiyuk. Winibuka deice arye, amesba ati ara, ‘Allah el ninguk unamlule. Tonda, amesba malye winin ning, aupmalye ning ara, ‘Allah arye, aning kum kibuka, lyepsilirye, teleb kipdeipnamleʼ tenen, amalye winin ning nirya pununa ap, kum kilina ap, apil dobuka deice arye, teleb kipdeibuk.

¹⁶ Winiryuk obuk sapi basam ara, kop teleb ning, deisuruk irilamle geleng-gelenga ap, keil duk bitinye ap, keil duk irilamle kop ap, talima pum tam palilamle meta ap nirya ara, Musa birye dobuka bobiyukce, Allah arena ati, uku dongolamak ning, el si mesba deice binuka, uku dongobukba, uku arye dibuk.

¹⁷ Bukni, asapi basam tup nirya ap, el bola ap, el deisuruk noutam ulamle ning, wilibuka deipmok ning ap, tonda deisuruk sirik ap nirya ara, dobukabukce, Allah si eren aik, bai tamuk binuka, Israel nang ulamik sukum, bai tam atonun binuka, uku sekukabukce, aning nirya bobuka, uku dongobuk. Uku buk arye, dibuk. Ara, Allah Yahweh arye, Musa ati, “Winibuka wininamlyame,” nyapdeiamok touk, kibuka, apil dobuk.

¹⁸ Aning akunum pil dobukopura, kam ning obuka, uku dongona ati ara, Musa birye, yim domba basam yim ning bobuka yayuk. Adobuka yayuk domba basam, el kisok deice ara, Harun ap, el mapu ap, sik taruk ara, ayim domba basam el kisok deice deibik. Ara, ‘Allah arye, nun malye winin ning ati, wenebuka opsutu bukni, nun pununa ati, ayim domba obibyeba, ‘Allah arye nun malye ning biksilyakarye, lyebuka teleb kideipnamsilʼ tenen, winibik.

¹⁹ Harun ap, el mapu ap, adomba el kisok deice, sik taruk akunum deibikopura, Musa birye adomba basam dobuka obuk. Obukba, el ining biyuk ning ara, dobukabukce, kam ning obuka, uku dongona ati, mesba deice ap, amesba el kup-kup dumbarye memepdeiamikak, sirya dana-dana ara, aining arye binuka, tikuka dikdeibuk.

²⁰ Winibukopura, adomba basam ara, sekuka atam-atam yuk-yuk wilibukce, kintinibuka deibuk. Winibukopura, adomba basam, el kisok ap, el nong sekuka deipmok ning ap, el meta nirya ap ara, Musa birye dobuka, uku dongobuk.

²¹ Bukni, ayim domba el nong pum tam ulamle ning ap, tonda yan ap nirya ara, sekuka doprobuk. Winibukce, mek likuka yuk kintinibuka deibuk. Winibukce, yuk ning nirya ara, uku dongona ati, mesba dobuka kintinip deiamikak, bobinuka, uku dongobuk. Auku dongobuk ning ara, uku diplirye, siltong teleb ning weleplyeura, ‘Allah Yahweh kekeplirye, kanye teleb deipnamleʼ tenen, ‘Allah Yahweh arepnuneʼ tenen, uku dongobuk. Apil dobuk ning nirya ara, Allah Yahweh arye, Musa ati, “Winibuka pil donalyame,” nyabuka, laka nyapdeiamuk touk winibuk.

²² Aning atonun, Musa birye domba basam yim bitinye, tuba batakmuk ning tonok ton dobuka yayuk. Ara, ‘Aning arye, Allah arena pil donamsiakʼ tenen, awibuka deibuk imam nang, sik malye winin ning, kum kibuka, teleb kilina ati, adomba basam yim bitinye boyayuk. Aboyanuka yayukopura, aning ara, Harun ap, el mapu ap, ‘Nun malye un ning ati, Allah arye wenebuka opsutu bukni, aning pununa ati, abasam opnuyabeʼ tenen, sik taruk nirya dobuka, adomba basam yim, el kisok deice deibik.

²³ Sik taruk nirya dobuka, adomba basam kisok deice deibikopura, Musa birye adomba basam obuk. Obukba, el ining biyuk ning ara, mitik tonunuk, dem ton doprobukce, Harun el sirik amul utam deice deibuka likdeibuk. Tonda, el taruk duk pamu tam ning ap, yan duk pamu ning ap ak bobinuka, likdeibuk.

²⁴ Tonda, Musa biryuk, Harun el mapu ati, sik nirya babye, “Na dam yalulume,” nyabukba, yayikopura, sik sirik amul deice ap, tonda taruk duk pamu ning, sirik tam ning deice ap, yan duk pamu deice ap ara, aining sirya tuba aupmok ning, mitik tonun dobukabukce, likdeibuk. Winibukopura, aning mitik weika arye, tuba aubuk ning ara, dopdakuka, ining ning obuka uku dongona ati, amesba memepdeiamikak, aning kup-kup dumbarye dana-dana ak, binuka dikdeibuk.

²⁵ Adomba basam el kop pia telebak ara, deisuruk deice alip irina ati, palilamle kereng-kerenga kop ap, amu tam dam meta ap, tonda talima pum palilamle meta ap, keil duk dam palilamle kop ap, keil duk bitinye ap, tonda, yan sirik tam ning, keil tup ap nirya ara, Musa birye doprobuk.

²⁶ Tonda, Allah Yahweh ati arelamik roti kwaning nena kum ning, akunum dabukabikce, libuka deiamik keranjang, ‘Allah dinamleʼ tenen, Allah el si eren aik pum tam, deiamikak arye dobuka, Musa birye aroti kwaning nena kum ning, dobukabukce kintinibuk. Doprobuk din ning ara, yuk roti kwaning minyak mek arye, likuka dapmakce ning, el si kue ap, tonda mitik roti kwaning ap, doubuka doprobuk. Winibukopura, domba basam yanuka sirik tam ning keil tup ap, meta nirya deipmok ning ap, binuka deipmokakuk, aroti kwaning yuk-yuk ning, nirya bobinuka tabakuka deibuk.

²⁷ Aning nirya ara, Musa birye dobuka, Harun ap, el mapu ap, sik taruk tatang deice binuka deibuk. Dobuka bin deibukba, sik anang nirya arye, Allah Yahweh el urasin dam tamuk, erebuka bobiyikce, Allah ati si erebuka kibikce, “Telebe,” nyabuka, bina peterebik. Awinibika deiyok ara, ‘Allah Yahweh disilirye, elti, anyarepnuyap ning ara, ereptalibibirye, peterebibnye ning nirya ara, Allah Yahweh arye eiplirye, aning nirya ati, kanye deipnamsilʼ tenen, winibik.

²⁸ Sik imam nang arye, aroti kwaning ning akunum binuka, “Telebe,” nyabuka peterebik ning ara, Musa birye, abopmek din ning nirya ara, sik taruk deice arye, tamubuka doprobuk. Doprobukopura, aning uku dongona ati, el si mesba kintinibuka dobuka deiamikakak, boyayukce, uku dongobuk. Aning nirya ara, yim domba uku donogopmuka deice deibukba, uku arye dibuk. Apil dobuk ning nirya deiyok ara, ‘Imam nang arye, mambul pil donamsiakʼ tenen, ninye wibuka delina pil, teleb kina ati, aning nirya tapakukce, uku dongobuk. Winibukba, uku dibukce, siltong teleb ning welebukba, Allah Yahweh kekebukce, el kanye deibuk.

²⁹ Tonda, Musa birye ayim domba basam taram dam, tup dobukabukce, Allah Yahweh el urasin tam binuka, erebuka talibukce, Allah Yahweh ati lake kipdeyukce “Telebe,” nyabuk. Aning ara, Allah arye Musa biti, “Ayim domba basam taram dam, tup nirya ara, ancuk dopropnulyame,” nyabuka ati, Musa birye aning doprobukce, Allah ati arebuk. ‘Apil dobuk ning nirya deiyok ara, imam yala nang pil donamsiakʼ tenen, wibuka delina talak ati, pil dobuk. Aning pil dobuk ning nirya ara, Allah Yahweh arye, Musa ati, “Wininamlume,” nyapdeiamok touk, binuka pil dobuk.

³⁰ Aning nirya akunum winibokopura, Musa birye, minyak mek likilina ati, mitik tonun ton wilibuka doprobuk. Tonda, kam ning obuka, uku dongona ati, mesba deice kintinibuka deimuk ning, ining burubuka puruldonokukba, poulbinuka dulbinmok ning arye, ining mitik tonun ton wibuka doprobuk. Dobukopura, Harun ap, el mapu ap, sik ongopmek baju deice ara, aining arye purupdonokuk. Aning atouk, Harun birye deiamuk nang nirya ara, sik nong ap, sik baju ap deice arye, aining burubuka purupdonokuk. Apil dobuka deiyok ara, ‘Allah Yahweh, el ‘Naʼ tenen ning wininamake. Sikce el pil donamaka ati, sikda imam nang unamake. Anggun Harun ap, elce deiamuk nang ap, sik ongopnamak baju ap, aning nirya babye, ‘Pia teleb upmaleʼ tenen, wibuka deibukce, teleb kipdeibuk.

³¹ Winibukopura, Musa birye Harun ap, el mapu ap ati, ayupu nyabuk. Anggunda ayim domba basam tup ning, tuba aupmalye ning noutam arye, tup dopropmunce, Allah ap, nun ninye ap, ansinilina ati aik, sapi bol doltakna aik, el bublan damuk bobimunyakarye, atup ning dabuka dipnululume. Tonda, imam nang wibuka delina ati, kinitipmik roti kwaning, keranjang aling pum tam libuka deipmace ning ap, dopropmunce, aning nirya ara, asukum aryuk tabakuka dipnulume, nyabuk. Ara, Allah Yahweh arye, Musa biti, ‘Harun ap, elce deiamuk nang ap, aning winibuka dinamnyake,’ nyabuk touk, Musa birye laka nyapdeibukba, Harun ap, el mapu ap kekebikce winibik.

³² Tonda, Allah arye nyabuk touk, Musa birye Harun ap, el mapu ap ati, laka nyapdeibuk. Ara, “Adomba basam tup ap, roti kwaning ap, dinmamunye ning bukni, tuba ton kwal aupmalye ning ara, adiparyuk dobuka, uku dongopmunyeba, uku arye dibuka, sirya dakanamle.

³³ Tonda, apil don talak ara, tonok sum arye dipdongobuka, tekbarye sum noutam nirya ara, ninye ap, Allah ap ansinilina ati, tia sapi bol arye doltakna tenda aik bublan damuk binuka unamlume. Asukum ara, batakuka, yukak bana kume. Ara, anggun imam nang wipdeipmasin bukni, anggun apil dona ati, wibuka delin talak nirya ara, kabula. Apiluk talibuka donmamunya ani, tekbarye sum sirya daklyopura, batakuka talye yukak babye banamlume.

³⁴ Allah Yahweh arye, “Apil dopnalume,” nyapmasilba, arup dopmap pil ara, dolamepya deice arye, anggun malye winilulum ning nirya pununa ati ara, Allah lyepsilirye, namin kipnamsile. Apil dopmap deice arye, akunum teleb kipdeipmasil ati, kum wenebuka opnamasile,” nyapse.

³⁵ Bukni, anyapmasin touk, tekbarye sum nirya ara, keting noutam talak ap, lukunyan talak ap, asum-asum nirya ara, Allah Yahweh el sapi bol arye doltakna domik tenda aik bublan damuk binuka kintinipmunce, Allah arye, “Wininamlume,” nyapdeiamsuk touk, apiluk donamlulume. Tonda, atonun kibuka, pil donamlulume. Ara, Allah Yahweh arye, “Aning winipnululume,” nyapdeipsuk touk winibuka, pil donamlulume. Aning kum pil dopmumnyopura, anggunda adiparyuk dipnamlume. Ati, aning nirya ara, Allah Yahweh arye, na Musa dam nyapdeipnuk touk, wininamlume. Musa birye Harun ap, elce deiamuk nang ap ati, laka nyabuk.

³⁶ Musa birye nyabuk ati, Allah Yahweh arye, Musa el dam nyapdeiamukba, Musa birye nyapdeibuk yupu nirya ara, Harun ap, el mapu ap, sik kekenak laka nyabukba, anyapdeibuk touk, pil donmik.