Imamat 7 - Eipomek

Allah arye, malye winipmaca ati, ‘Se, na malye upseʼ tenen ning pununa ati, ‘'Aning arelyanganamlume,” nyabuk yupu

¹ Allah arye Musa biti nyabuk. Ninye malye winipmalya ati, anye birye, ‘Se na malye winipseʼ tenen ning, kum kilina ap, pununa ap ati, punubuka kam ning obikirye, boyanuka arelyanganamlum ning ati, “Wininamlume,” nyapnusine. Boyanuka onamlum kam ning ara, nara Allah, na kanye ara, ‘Aning ara, na tenena ati, malye una kumnye, pia teleb lek ninguk ulule,’ tenelule.

² Malye winipmace ati, ‘Se, na malye winipse, tenen ning lyepnutuʼ tenen, arenamak ning ara, mince pala keil yangabuka kintinip deialumak, kam ning obuka, uku dongonak aryuk, el si mesba arye, binuka onamlume. Ninye arye malye winipmakce ning ati, ‘Allah arye lyebuka, teleb kipdeipnamsilʼ tenen, kam ning boyanuka, uku dongon pil dona ati, ‘Aning ara, asum aryuk opnamabeʼ tenen, mince kintinip deiamlumak aryuk, asukumuk binuka onamlume. Aning opmunyeba, el ining bilye ning ara, imam nang, sik deiyoknye aryuk, dobukaplirye, min arye pala keil yangabuka kintinip deiamlumak, ‘Uku seknamapʼ tenen, mesba deiamlumak, aning kup-kup sirya, dana-dana ara, adoproplye ining arye, dobuka dikilinamlume.

³ Tonda, imam nang, sik deiyoknye elcuk, akam ning opmakce ning, el amu dam meta ap, deisuruk deice palilamle kop ap, el meta nirya ara, bobukaplirye, kam ning obuka, uku dongona ati, mesba kintinibuka deiamlum ning deiceuk, binuka mesba deice delilnamlule.

⁴ Tonda, keil duk bitinye ap, keil duk irilamle kop ap, tonda pia teleb sukum talima ap, talima deice palilamle meta ap, aning nirya arenalume. Imam deiyoknye birye, mesba deice uku danamluma atia.

⁵ Aning nirya ara, kam ning obuka uku dongona ati, kintinibuka deiamlum ning, el si mesba deice aryuk, imamnye birye, ‘Allah Yahweh ati, arepnune,’ tenebuka, binuka uku dongoplirye, arenamlule. Imamnye birye, ‘Ayanuka areplye ning ara, malye winipmace ati, Se, nun malye winipu ati, ikin kanye bobukaʼ tenena ning ara, pununa ati, ‘Allah namin kipsilirye, lyenamsileʼ tenen, Allah Yahweh ati arepnamlule. Imamnye birye, uku sekliba, uku buk arye, aning nirya dipnamlule.

⁶ Imam-imam nang ap, sikce deibiceba, dadeipdanin, banamak sal mapu ap, wisi nang ap nirya ara, ayanuka arepmace dina, pia teleb mingne teleb lek ning ara, sik ap dobuka, dina telebe. Bukni, talye nang nirya ara, aning pia kum dinamnyake. Imam-imam yala nanguk, aning dinamak bukni, adin ning dobuka, bobinuka dinak ara, yuk talyak, kum dinamnyake. Dinamakak ara, pia teleb sukum, lekto sukum bobinuka dinamnyake. Talya sukum dina kume. Deiyok ara, Allah el kanye ara, ‘Aning ara ‘Naʼ tenen, ning ati, pia teleb lek ning atonun ulule,’ tenelula atia.

⁷ Israel nang, sik malye winipmakce ning ati, ‘Allah arye, kum kilipsilirye, aning pununa ati, namin kipsilirye, lyepropnamsilʼ tenen, aning pununa ati, kam ning obuka arena ap, tonda aning atonun, malye winipmaca ati, ‘Se, nun malye winibupuʼ tenen, ikin kanye bobuka, tenen ning pununa ati, kam ning obuka, arelyanganamak ning ara, atonun ulule. Ara, “Aning-aning nirya wininamlyame,” nyapnuk touk, aninguk wininamlume. Aning pil don ning nirya ara, urasin tonok bukni, deiyok ara, mitik yuk-yuk ulule. “Apil dona ati, wininamlume,” nyabuka, arepsise ning, peraturan ara, tonok ulule. Tonda, malye winipmakce ning ara, ‘Allah namin kipsilirye lyebuka, teleb kilinamsilʼ tenen arena ati, kam ning opmakce ning, ton ning ara, uku arye dinamle bukni, ton ning ara, el tup tuba aupnamle ning ara, imam nang, sik dobuka dinamake. Ara, akam ning dobuka, uku dongoplirye, Allah ati arepnamle imamnye, elcuk atup aupnamle ning dipnamle.

⁸ Tonda, aobuka boyalum ining ning, mesba deice uku dongolamak ning ara, akam ning, el bola nirya babye, Allah el si eren aik pum tam pil dona deiyoknye, Allah ati arenmalye imamnye, elcuk akam ning bola kouplobuka dopropnamle. Ara, kam ning arebikiba, aning dobuka, uku dongopnamle imamnye, elcuk abola dopropnamle. Aning ara, el ning uka atia.

⁹ Aning atonun, Allah arena ati, roti din ning deiyok ning, el si tepung do, yakong do, terigu do, atoto ning, asum-asum nirya boyanuka, uku buk deice bukni, el si komfor do, uku deice bukni, yangalin ning, kuali deice arye deibuka, danamak ning nirya ara, arebikiba, Allah el si eren aik pum tam pil dona deiyoknye, imamnye birye, aning bobuka uku dongopnamle. Mitik tonun tuba aupnamle ning ara, aning areplinye imamnye, el tibuk arenalyame. Aning ara, anye aryuk doproplirye, dipnamle. Yuk talye nang arye, kum diptinge.

¹⁰ Aning atonun, Allah arena ati arelyanganamak roti din ning deiyok ning ara, terigu do, yakong do, tepung do, arebikirye, mitik tonun tuba aupnamle ning ara, Harun birye deiplye nang aryuk, doprobikirye, dinamnyake. Ara, embik tuba aupmalye ning ap, tonda minyak mek arye dikikirye, likuka tabakuka dapmaminye ning ap, minyak mek arye likuka, kum deipmamunye ning ap, atotoa ara, neikto. Aning nirya ara, Allah si eren aik pum tam talibuka pil dona deiyok nang, ara Harun ap, elce deipliba, deipdanin banamak nang nirya ap ara, sik ananguk, atouk kibuka, bokuka dinamnyake.

‘Allah arye teleb kipdeipsiliba, el ap teleb kibuka neika unamapʼ tenen, arelyanganamak ning ati, nyabuk yupu

¹¹ Israel nang arye, malye winipmace bukni, ‘Allah arye teleb kipdeipsilyeura, el ap neika teleb kibuka neika unamapʼ tenen, arelyanganamak ning ati, “Winipnamlume,” nyapnusine. Ara, anggun ap, Allah ap, teleb kipdeiplirye, elana ati ara, “Aninguk winibuka-winibuka wininamlume,” nyapsinye touk, winipmunce, Allah Yahweh el si erena ati, arelyanganamlume.

¹² Winipmanto ara, tonoknye birye, ‘Allah arye, teleb kibuka malye una ning kilipnilyeura, el ap teleb kibuka neika unanamʼ tenen, kam ning obuka, arelyanganamle bukni, ton ap teneplirye, ‘Allah ati, telebe nyana ati, aren ning, yuk ning ton tabuka arepnamne,’ teneplyeura, elce yuk aren ning ton, tabakuka dana kum ning arenamle. Tonok ning ara, roti kwaning nena kum ning arelyanganamle. Aning ara, minyak mek ap tabuka dan ning kum, arelyanganamle. Tonda, aning dobuka, arelyanganamle ning ton, roti kwaning bukni, pia mitik kue urasin atonun ning ton, aning babye arelyanganamle. Aning ara, tepung ap tabuka deibicak arye, minyak mek arye likuka deipmakirye, dapmakiba, pala weik wamlye ning arelyanganamle. Tonda, tepung pia teleb kibuka teikamakce ning ap, minyak mek arye, dikuka deibikcak arye, dapmace ning, el si kue, mitik ning tabakuka deipmakirye, dapmakce mitikto ning, bobuka arelyanganamle.

¹³ Anye birye, ‘Allah arye, teleb kipdeipnilyeura, el ap teleb kibuka neika unamnamʼ tenen, domba ato ning obuka arelyanganamle bukni, elcuk, ‘Tonda, Allah ati telebe nyana ati, yuk ning ap, tabakuka arepnune,’ teneplyeura, elce Allah ati, arepnamle ning nyapnusine. Ara, yuk ning roti nena deiyok ning deice arye dapmace ning ton, el si kue, adiparyuk bobuka, arelyanganamle. Aning ara, anye birye, ‘Allah ap, na ap, teleb kibuka neika unamnamʼ tenen, aren ning ap, ‘Telebeʼ nyan ning ap, atalak aryuk tabuka, Allah ati arelyanganamle.

¹⁴ Yatanye do nirya, ‘Allah ati arenamne,’ teneplyeura, ayupu noutam arye, laka nyapmanu aren ning, ara roti kwaning yala-yala nirya ara, noutam arye bokukaplirye, aroti kwaning yala ning nirya, tonok-tonok dobuka, adiparyuk Allah Yahweh ati, dobuka arelyanganamle. Akunum areplyeura, anye arepmok ning ara, asum pil doplye imamnye biryuk dopropnamle. Ara, Allah el si erena ati, anggun malye winipmamunye ning ati, domba ato ning obuka, imamnye birye ining dobukaplirye, uku dongona ati, keil pala yangabuka kintinibuka deiamikak, el si mesba dana-dana nirya, purupdonoklyeba, ining dulbinamle. Aimamnye, elcuk, aroti din kwaning ning dobuka dinamle. Ara, sikce Allah ati, roti kwaning din ning yala-yala nirya bukni, tonok-tonok arenamnyak ning, elcuk dopropnamle. Aning ara, el ninguk upnamle.

¹⁵ ‘Allah ap, nun ap, teleb kibuka neika unamapʼ tenen, “Telebe,” nyabuka, domba ato ning bobuka, arelamak ning ara, akunum obikirye, imam deiyoknye biti, arebikiba, Allah ati aren ning bokuka, uku akunum dongoplyopura, aining ning tup sirya ton tuba aupmalye ning ara, asum aryuk imamnye birye dinamle. Aining ning ara, arebikce sum aryuk, el tup nirya dilonamnyake. ‘Dokola deipnuyabe,’ kum tenenamake. Deibuka mapmaca ani, beren tam kiplyeura, bobuka kum dinamake.

¹⁶ Bukni, winipmanto ara, ninye tonok-tonok nang arye, sik malye winina ati kum bukni, sik mining kanye aryuk, “Nun ni Allah, anti winibuka arepnukine,” nyabuka, nyalin yupu nyabikirye, Allah aren ning boyanuka, arelyanganamaka ara, domba ato ning obiceba, Allah ati akunum arebikcopura, kalipdoba ton tuba sirya aupmalye ning ara, imamnye birye, asum dipnamle. Tonda, ambusum atonun sum deice arye, dina teleb uka. Aning atonun, sik malye winina ati kum bukni, sik mining kanye aryuk, ‘Allah ati teleb aren ning arepnuyabe,’ tenebikirye, arelyanganamak ning ati ara, winipnamake. Ara, domba ato ning obikirye, imamnye arebikcopura, asum aryuk, imamnye birye, Allah ati aren ning bobuka, mesba deice uku dongopnamle. Bukni, tup ning kalipdoba, ton tuba aupnamle ning ara, asum noutam arye dobuka dipnamle. Tonda, imamnye birye, adomba tup akunum diplopura, kalipdoba ton tuba sirya aupmalye ning ara, aning bobuka dadeipmaca ani, mapmalya bereklyeura, beren tam kiplyeura, elce aning dobuka, dina babye teleb uka. Kwal deipmalya ani, ambusum atonun sum deice arye, dina teleb uka.

¹⁷ Bukni, apil dona ati, opmalye basam tup kalipdoba bobuka, imamnye birye, aning deibuka dinmalya ani, damapmalya ani, like winilye sum akunum kiplyeura, abasam tup kalipdoba, tuba aupmalye ning ara, adiparyuk dobuka uku seklirye, dongopnamlule. Uku arye dibuka, sirya daknamlule. Like winilye sum aupmalye ning ara, sik imam-imam nang babye, pia kum dinamnyake.

¹⁸ Tonda, aning moubuka tenenamlulume. Like wilye sum akunum uplyeura, adomba ato ning kalipdoba, tup dobuka dina pia kume. Talya lubakibuka, mangkau asa aning dipmunyopura, ‘Na malye winin ning ara, Allah arye aning kiliplirye, kum kipnamnileʼ tenen, adomba ato ning arena deiyoknye, el malye winipmok ning ati, Allah arye biklirye, teleb kibuka kum delinamle. Tonda, akam ning anyarepmok bukni, like wilye deice deiplyopura, anyarepmace babye, Allah arye anyarepmok ning kum teneplirye, kanye kum delinamle. Ati, like winilye deice tuba aupnamle basam kalipdoba tup ara, dobuka pia kum dinamnyake. Ara pia meme. Allah arye aning ati, ‘Telebe,’ tenebuka, kum dopropnamle. ‘Aning ara, pia malyeuk ulule,’ tenenamle. Ati, adomba ato ning arepmok deiyoknye ati, Allah arye, el malye winipmalye ning, dipkoprob kum namin kibuka kilipnamle. Deiyok ara, Allah arye, ‘Aning ara, akunum malye winipmale,’ tenelule ati, batakalule. Ati ara, Allah arye, “Aning ara, dina meme,” nyaplye ning bobuka, talye kirikuka diplinye bira, adipmalye wenena ati, ikin ning, el anye deiceuk uplyeba, dolanamle. Allah arye aning diplinye ati, wenepnamlarya.

¹⁹ Allah arena ati, domba do, sapi do, tup ning nirya ara, akam ning opmunyakarye, kalipdoba tup dobuka deipmamunyebuk, yuk malye ning arye, adeice bol bolpiplyeba, Allah el kanye ara, ‘Atup ning ara, akunum malye ulule,’ tenenamle. Ati, aning akunum malye upleura, adiparyuk uku dongopmunyeba, uku arye dibuka, sirya dakanamlule. Tonda, malye ning arye, bol pipmalya sukum ara, dobuka kum dinamlume. Aning ara, pia meme. Sik malye winipmakce nang ati, ‘Allah arye namin kipsilirye, teleb kipdeipsilyeba, el damuk unamabeʼ tenen, bobuka yakaceba, opmamunye kam ning, el tup ara, malye ning kum talinyak nanguk, sikce tup ning dobuka dina telebe uka. Bukni, yata nang do nirya, Allah arye, ‘Aning ara, malye ning,’ tenelul ning, bol pibikcopura, Allah ati arepmake kam ning, tup tuba aupnamlye ning ara, pia kum diptinge. Awinin ning ara, meme.

²⁰ Allah arye, “Anang ara, malye ning bolpipmoa ati, ‘Nun ap, Allah ap, teleb kibuka neika unamapʼ tenen, “Na ti areninyak ning ton, pia kum diptinge,” nyabuka, akunum nyapsuk bukni, winipmanto ara, yata nang do nirya, sikce malye ning talipmakiryuk, tonda sikce yuk malye ning bolpibica ati, tonda sikce yuk malye ning winibica ati, tuba malyeto unmaca ati, Allah elti, arenyak basam tup dobuka diplinye bira, anye biti, Allah arye wenepnamle. Deiyok ara, aning talye daukirye, malye ning bol pipmace ning do, malye winibice nang ara, Allah el ning kum dobuka diptinge. Aning winibikce nang ara, bobuka Israel nang unyakak batakuka, leipdopmunce, anye bobuka, talye bai tam yakuka dopkwetepnamlume. Israel nang ap, neika kum unamake. Allah arye, anye weneplyeba, dipnamle.

²¹ Aning atonun, winipmanto ara, yatanye birye do nirya, Allah arye, “Aning ara, talina meme, aning ara, pia malye ning ati, aning ara na like. Aning ara, talena ap, bol pina ap, pia meme,” nyapdeipsuk ning, sikce amalye ning, bol pipmakce nang aryuk, sikce akunum malye kilinyake. Ara, ninye arye, malye ning deliltakanyak ning do, Allah arye, “Abai tam ulye kam ning ara, malye ning ulule,” nyapdeibuk ning do, Allah arye, “Aning ara, na pia like,” nyabuk ning do, aning atonun ning nirya talinyak nang ap, bol pipmakce nang ap, Allah el arena ati, arelamikce din ning nirya ara, pia kum diptinge. Ara, ninye arye, ‘Allah ap, nun ap, teleb kibuka neika unamapʼ tenen, Allah ati arelyanganyak ning ara, Allah Yahweh el ninguk ulula ati, pia teleb lek toto ning ulule. Ati, malye mem ning talibikce nang ara, Allah Yahweh ati arelamice domba ato ning, tup pia kum diptinge. Bukni, mandipna deice arye do, mangkau arye do, talye kirikuka ato ning dibikcopura, Israel nang ap, neika kum unamake. Anang dobuka, bai tam duknubuka dopkwetepnamlume. Allah arye anye weneplyeba, dipnamle. Allah arye Musa biti, laka nyabuk.

Allah arye, “Yata kam ulye ning do nirya, sik nong noutam ulye meta nirya ara, pia kum dinamlume,” nyabuk yupu

²² Ura, Allah Yahweh arye, Musa biti, “Anyapkine touk, aninguk winibuka-winibuka wininamlume,” nyapdeiamuk.

²³ Ayupu nirya ara, sik Israel yala nang ati, “Wininamlume,” nyapdeibuk. Allah arye, Musa deice nyapdeibuk yupu ara, ani. Anggun Israel yala nang ara, yata kam ulye ning do nirya, sapi basam do, domba basam do, kambing basam do, akam ning noutam ulye meta ara, pia kum dinamlume.

²⁴ Tonda, talye ulamle kam ning nirya, talye dipmalye ning ara, el meta kum dinamlum bukni, ameta dobuka, yuk ning kitinimna ati ara, telebe. Aning atonun, yata yala kam ning do nirya, talye bai tam kam ulye yu ning arye, ninye weilamice kam ning yanuka, obuka dinmalirye, sekuka batakmalye meta ara, anggun Israel yala nang arye, kum dinamlume. Bukni, ameta dobuka, yuk ning kitinibuka dona ati ara, sikce, ‘Aning arye, yuk pil ap, yuk ning ton kitinibuka dopnuyabe,’ tenebice touk, wininamnyake. Aning teleb bukni, meta yala-yala nirya ara, anggunce dina meme.

²⁵ Aning ara, talye ati kum nyapsine. Deiyok ara, yatanye birye do nirya, Allah Yahweh ati, kam ning obuka, yan arepmakcebuk, imam nang arye, uku dongonamak basam yala-yala nirya ara, akam ning, el meta dobuka dina pia meme. Ameta taliplinye bira, el anye bira, Allah Yahweh arye wenepnamle. Ati, ameta dilinye bira, Israel nang unyak noutam ara, kum unamlule. Anye el wenena ati, el dobuka, Israel nang unyakak arye, bai tam yakuka dopkweteplulume. Allah arye anye biti, wenepnamlarya. Weneplyeura, anye dipnamle.

²⁶ Tonda, sik Israel yala nang unamakak, dan mutuku do nirya ara, sikce kam ning ayala-yala nirya, maka do, yuk kam ning do, opmunye ning ara, el ining dobuka, kum dinamlume. Tonda, yuk yala ning nirya babye, opmunye ning ara, el ining dobuka, kum dinamlume.

²⁷ Aning ara, talye ati kum nyapsine. Ara, yatanye birye do, “Ining ning ayala-yala nirya, dina meme. Aninguk winibuka-winibuka wininamlume,” nyapdeipmasin ning yaniplirye, aning kum winiplinye bira, Allah Yahweh arye, ‘Anye, na tamnye ulule,’ kum tenenamle. Israel nang unyak noutam arye, kum unamle. Anye el wenena ati, el dobuka, Israel nang unyakak arye, bai tam yakuka dopkwetepnamake. Allah arye anye biti, wenepnamlarya. Weneplyopura, anye dipnamlarya.

Allah ap, ninye ap, ansinilina ati, el si eren aik pum tam, pil donamak imam-imam nang ara, anang arye dopropnamaka ning ati, nyabuk yupu

²⁸ Allah Yahweh arye, Musa biti, “Aning-aning nirya, winibuka wininamlume,” nyapdeibuk. Allah Yahweh arye nyapdeibuk yupu ara, ani.

²⁹ Ara, “Ance, sik Israel yala nang nirya ati, ayupu laka nyalbinulyame,” nyapdeibuk. Yatanye do, el malye winipmalye ati, ‘Se, nara malye winipmane ati, ining ning bobinyeura, teleb kipdeipniliba, Allah ap, na ap ansinilipdanuka, telebuk neika unamname,’ teneplirye, kam ning ton bobuka yanganamle. Akam ning ara, adiparyuk sikce noutam arye wilibuka, ‘Aning ara, Allah Yahweh, el si arepnamapʼ tenen, kintinibuka delinamle.

³⁰ Ara, el malye winipmalinye biryuk, ‘Na malye winipmanue,’ teneplirye, el mining taruk aryuk, kam ning bobuka, na Allah ati arelyanganamnile. Arepnilyeura, na si erena ati, imamnye birye, aning dobuka, uku dongopnamle. Tonda, ayanuka obuka arepmalye ning, basam tup ap, basam meta ap ara, imamnye birye dobukaplirye, na Allah Yahweh na din talakuk, “Telebe,” nyana ati, imamnye birye, el taruk deice dobuka, aning bitinye erebuka, bobina taliplirye, na arena ati, peterenamnile.

³¹ Aning akunum winiplyeura, na si eren aik pum tam pil dona nang, imam nang, sik deiyoknye, elti, areplinye bira, aimamnye elcuk, abasam meta dobukaplirye, Allah el arena ati, kam ning uku dongona ati, keil pala yangabuka kintinibuka deiamikak, el si mesba deice aryuk, uku dongonamle. Bukni, abasam el mun tup ara, Harun ap, elce deiamlye nang, sik imam nang, sik dina ati kintinibuka delinamle. Sikcuk, domba ato ning, mun tup dobuka dinamnyake.

³² Tonda, ‘Allah ap, nun ap, teleb kibuka neika unamapʼ tenen, arenamak ning, sekicak arye, kwalibikirye, abasam yan, keil tup sirik tam ning, el tup ara, Allah el si eren aik pum tam pil dona deiyoknye, imam ati, ‘Aning ara, el ning ukaʼ tenen, kintinibuka yukak delinalame.

³³ Ara, Harun elce deiamlye nang, Allah el si eren aik pum tam pil don nang noutam bukni, ‘Allah ap, nun ap, teleb kibuka neika unamapʼ tenen, malye winipmace ning lyebuka, teleb kilina ati, boyanmace ning opbikirye, aimamnye biti arebikceura, anye birye abasam ining ap, meta ap doproplirye, na Allah arena ati, uku dongopnamlanye, elcuk abasam yan, keil tup sirik tam ning, el tup ara, dolonamle. Ayan tup ara, el ninguk ati, elti, arelbanamlume.

³⁴ Ura, ara talye ati kum nyapsine. Deiyok ara, aopmace basam yan tup ap, basam taram ap, na Allah Yahweh, na si erena ati, na din tam erebuka binuka taliplirye, na arena ati, lake kilinamnulule. Winiplye talak ara, ‘Aning ara, Allah Yahweh el ning ukaʼ tenen, yukak kintinibuka delinamlule. Ara, aning ara, nati arenamnulule. Akunum arepnilyopura, narye, ‘Aning ara, sik imam pil don nang, sik ning,’ tenepnirye, narye sikti, arenamne. Ati, anggunce, ‘Allah ap, nun ap, teleb kibuka neika unamapʼ tenen, arenamnulum domba ato ning ara, kalebikiba, sik imam nang arye, aopmace basam sirik yan tup ap, basam mun ap, dopropnamniyake. Ara, Harun ap, elce deiamlye nang, sik imam-imam nang, sik ning ati, na si eren aik pum tam talibuka, pil donamak nang bulubuka, deibikirye, yanuka arenamlume. Aning ara, asum arye dipdongobuka, doyanamle talak nirya ara, pia ati, aninguk wininamlume.

³⁵ Aning laka nyapmasin ning ara, na Allah Yahweh ati, yanuka arepmakiba, imam nang arye, uku dongonamak ning bukni, danoutam arye, abasam yan sirik tam ning ap, taram ap wilipnikirye, sikce aning bitinye dinamak nang ara, Harun ap, elce deiamlye nang ap ati, yanuka arepnalum ning, sik aninguk dobuka dinamnyake. Ara, ‘Sikʼ anang arye, Allah el si eren aik pum tam pil donamakʼ tenen, anang wibuka deiplum talak arye dipdongobuka, dounamle talak nirya babye, anggunuk alaka nyapmasin ning, dobuka dinamnyake.

³⁶ Sik Israel deiyok nang arye, ‘Aning arye, Allah ati arenamap ning dobuka, nun pununa ati, Allah Yahweh ati arenamake,’ tenebuka, anggunce anang wipdeiamlum sum deice arye, na Allah arye laka nyapdeipsise. Ara, “Aimam nang, sik pil donamak ning pununa ati, sik Israel nang arye arenamlum ning ara, ani,” nyapdeipsise. Ati, atalak arye dipdongobuka, dounamle talak nirya babye, anyapmasin ning dobuka, sik imam-imam nang, sik dina ati, winibuka arenamlume. Anyapdeipmasin ning ara, anggun Israel yala nang arye, moubuka talipmunce, namin arye pia ati winipnin banamlume. Aning atonun, anggunce deiplumba, dadeipdanin banamak Israel nang babye, aning atonun, sik imam nang ati arelbanamniake.

³⁷ Ura, na Allah arye, laka nyapmasin yupu nirya ara, ani. Sik Israel nang arye, malye winibikirye, ‘Se, nun malye winipmap ning kum kina ati ara, Allah arye namin kipsilirye, lyepdopnamsilʼ tenen, kam ning obuka, uku dongolyangana ap, tonda, roti kwaning din ning deiyok ning, tepung ap, terigu ap, yakong ap dabuka kintinilin ning ap, tonda, Israel nang arye malye winipmace dekna ap, kum kina ap ati, tonda, malye ubiceba, ‘Se nun malye winipmabe,’ tenebikirye, ikin kanye bonamak pununa ap ati, tonda, na Allah si eren aik pum tam pil talibuka dona ati, ninye wibuka deipnalam talak dobuka, arelyangana ning ap, tonda, Israel nang malye winipmace ning, ‘Teleb kipdeipsilyeba, nun ap, Allah ap, telebuk neika unamapʼ tenen, kam ning obikirye, bobuka arelyanganamlum ning ap ati, pil dobuka wininamlum ning nirya ara, akunum laka nyapdeipsine. Aning nirya ati ara, anyapsise ninguk, “Winibuka-winibuka wininamlume,” nyapdeipsise touk kibuka, apiluk pia donamlume.

³⁸ Ayupu nirya ara, Allah Yahweh arye Musa biti, Sinai mutuku deice arye, “Aning nirya winibuka-winibuka winipnamlyame,” nyabuka, yupu nyapdeibuk. Anyabuk yupu nirya ara, Musa birye, sik Israel nang kekenak, yanuka laka nyabuk. Anyabuk ning nirya ara, mek pia kum ati, ninye kum ulamik sukum, amutuku si ara, ‘Padan Gurun Sinai mutuku,’ nyalamik. Tonda Allah arye, anyabuk yupu nirya ara, Israel nang arye kekebik ning ara, atalak arye dipdongobuka, dounamle talak nirya ati, aninguk talibuka, pil dopra balamik. Allah arye sik Israel yala nang nirya ati, “Anyapmasin ning nirya kekepmunce, na Allah Yahweh, na si erena ap, anggun malye winilulum ning pununa ap, tonda na arena ap ati ara, kam ning obuka pia ati, arelyanganamnulume,” nyapdeibuk.