Imamat 5 - Eipomek

Allah arye, “Malye winipmace nang kilibuka, teleb kilina ati, mambule,” nyabuk yupu

¹ Allah arye Musa biti, laka nyabuk yupu ara, ani. Winipmanto, ninye tonoknye birye, yuk nang ati, malye winipmakiba, tonye birye, aning eipmalul do, yuk nang arye laka nyapmakba, kekebuka bikmalul do? Bukni, ninye malye winipmakiba, yupu lipsisikuka teleb kilina deiyok nang arye, el anye biti, “Ance, nun dam yamince, amalye winipmek ning nyapmalume. Tonda, eipmalume. Ati, ance eibuka kekeplumce, bikmalum ning nirya ara, yanuka lak nyapnusilyame,” nyabice buk, el anye, sik dam kum yalye do? Yalye bukni, “Anang ara, dipkoprob malye winipmangue,” nyabuka, kum laka nyaplirye, kwinisa dobuka duknuplyopura, Allah arye anye biti, ‘Kume, elce dipkoprob malye winipmal buk, wenepnamne,’ tenepnamle. Awiniplye ning ati, dengna ara, ikin ning el deice, weik yalyeba dolonamle.

² Aning atouk winipmanto ara, yatanye birye do, Allah arye, “Aning ara, malye ning ulule ati, aning nong dam binuka, talina babye, pia kum wininamlume. Winipmunyeura, na dam kum yanamnulume,” nyabuk ning ara, mangkau arye, aning nong bol piplyopura, Allah arye anye biti, ‘Dipkoprop malye winipmale,’ tenepnamle. Ara, anye mangkau arye, bai tam ulamlye kam ning oplomice ning do, mangkau arye bal do, kola do, aning atonun ning, tukwak deice balamle ning do, ninye arye weilamak ning bukni, Allah arye aning yala-yala nirya ati, ‘Aning ara, malye ati, kum talipnamlume,’ nyapsuk ning ara, mangkau arye bol piplyopura, adeice arye malye akunum winipmalule. Ura, aning bolpipliba, kum bikmalya babye, aminyan talak, elce, ‘Se, amalye ning bol pipmalya ara, pia malye mem ning bolpipmaneʼ tenen, el anye birye, akunum bikdalyopura, el babye, ‘Se, aning ara, dipkoprob malye winipmanue,’ tenenamle. Allah arye anye ati, ‘Kume, malye ning talepmoka ati, na dam yangana meme. El malye kipdayuke,’ tenepnamle.

³ Aning atonun winipmanto ara, yatanye birye do, mangkau arye ninye deice do, kilapu balamle ining do, tukwak ninye bol deice malye ulul ning ati, Allah arye, ‘Aning yala-yala nirya ara, bol pina meme,” nyapdeiamsuk ning, bol piplyopura, dipkoprob malye akunum winipmoe. Mangkau arye winipmok bukni, aminyan talak, elce, ‘Se, amalye ning bol pipmalya ara, pia malye ning bolpipmaneʼ tenen, el anye birye, akunum bikdalyopura, el babye, ‘Se, aning ara, dipkoprob malye winipmanue,’ tenenamle. Tonda, Allah arye anye biti, ‘Kume, malye ning talepmoka ati, na dam yangana kume. El dipkoprob malye kipdanmoe,’ tenepnamle.

⁴ Tonda, winipmanto ning ara, yatanye birye do, “Aning ara, narye pia dipkoprob winipnamne,” nyapdeiamuk yupu nyaplye bukni, dipkoprob kum winiplyopura, elce malye akunum winipnamle. Ura, “Ayupu ara, dipkoprob yupu nyapmane. Aning ara, dipkoprob winipnamnarya,” nyapdeiamuk yupu nyapmalye bukni, dipkoprob kum winipmoka ati, malye winipmoe. Ura, ninye arye, moubuka tenina kumce, yupu yuk-yuk nirya, talye lukparabuka nyanyak bukni, sikce, “Winipnamabe,” nyakce yupu, kum winibikceura, Allah arye sikti, ‘Kume, dipkoprob malye akunum winipmake,’ tenelule. Ati, aminyan talak, atonye birye, “Anyapse yupu ara, kum winipsa ati, na malye winipse,” tenen, bikdalyopura, Allah teneplye touk, el babye, ‘Se na malye winipseʼ tenen, bikdanamle. Allah arye, atonye biti, wenepnamle.

⁵ Ura, winipmanto ning alaka nyapmasin yupu nirya, ara mangkau arye malye winyamice ning yala-yala nirya ara, yatanye birye do, atonun ning winipmalya deice arye, dipkoprob malye winiple. Amalye un ning winipmalinye bira, el adiparyuk, “Se, na malye winipmanue,” nyabuka, ninye kekenmacak arye, laksukum arye lak nyaplirye, loltakanamle.

⁶ Atonun ning winipmalya deice arye, malye winipmace nang nirya ara, Allah arye amalye winin ning kum kipdeiplirye, teleb kilina ati, amalye winin ning pununa ara, amalye winipmalinye, el adiparyuk Allah Yahweh ati, teleb aren ning boyanamle. Ara, domba basam do, kambing basam do, kil ninguk bobuka, anye birye, Allah Yahweh ati arelyanganamlule. Akam ning bobuka, Allah ap, ninye ap, ansinilina aik pum tam pil dona nang, sik deiyok imamnye ati, areplyopura, aimamnye birye dobuka, Allah ati, arelyanganamle. Winiplye deice arye, amalye winipmalinye, el malye ning ati, Allah arye namin kibuka kiliplirye, teleb kilinamle.

⁷ Bukni winipmanto, amalye upmalinye bira, pia talye kan-kan nye ulirye, el domba basam do, kambing basam do, dipkoprob kum uplya ati, kum deklyopura, aning ara, pia kumnye bira, el anye malye winipmalye ning kum danalina ati, pununa ning bobuka, arelyangana ati ara, yalma maka bitinye bobuka arena telebe. Akumopura, tekukur maka bitinye arena babye, telebe. Ara, ayala maka bitinye tomobukaplirye, bobuka el malye winin ning kilina ati, Allah Yahweh ati, arelyanganamlule. Ara, tonok ning ara, imamnye elcuk, ‘Aning ara, el malye winibuk ning kilina ati, kintinipneʼ tenen, minopce Allah ati arepnamlule. Aning atouk, ton ning ara obuka, mesba deice uku dongopnamlule.

⁸ Amalye winipmalinye birye, maka bitinye boyalyopura, Allah ap, ninye ap, ansinilina ati, aik pum tam talibuka pil dona deiyoknye, imam el damuk boyanamlule. Winibuka min yuma ning bobuka yalyeopura, imamnye elcuk, ‘Aning ara, el malye winipmalye ning kilina ati, Allah arepnamne,” nyabuka, keteneipmalye ninguk bobuka, Allah ati arepnamlule. Amaka bobuka yalyopura, imamnye birye, maka el ngang bibik talibuka, maka ngang yok kotoknamle bukni, maka el ngang yapla, adiparyuk kum cepsaknamle.

⁹ Winiplyopura, amalye winin ning kilina ati, opmalye maka, el ining banmalye ning ara, dobuka, Allah arena ati, kam ning obuka, uku dongolamakak, el si mesba, memepdeiamikcak, kup-kup sirya dana-dana binuka, dikdonokda biliba, aining mesba keil deice dupnamlule. Tonda, weik tam ining tuba aupmale ning ara, kam ning obuka, uku dongona ning ara, mesba memepdeiamica deiyok tamuk, dikdongopliba, tukwak deice noutam wekelbanamle. Amaka oplirye, apil donamaka nirya deiyok ara, ‘Allah arye malye winipmalinye, el malye ning kiliptueʼ tenen, winipnamle.

¹⁰ Imamnye birye, apil akunum doplyopura, imam nang, sik weik deiyoknye elcuk, malye ning winipmalinye birye, boyanmalye maka bitinye ning ara, yuk kintinibuka deipmalye tonok maka ara, uku dongona deice arye, ‘Allah ati arepnuneʼ tenen, adiparyuk bobuka, maka obuka, uku dongonak bobinamlule. Bobilyopura, uku dongona ati ara, Allah arye, “Winibuka-winibuka pil dobikirye, uku dongonamlume,” nyabuka, pil dolamak atonun kibuka, pil donamle. Ara, malye upmalinye, el malye winin ning lyebuka, teleb kilina ati, imamnye birye, apil doplyopura, amalye upmalinye, el malye ning adiparyuk Allah Yahweh elce, amalye winipmalye ning nirya kiliplirye, teleb kibuka delinamle.

¹¹ Ura, yuk yupu ton nyapnune. Winipmanto ara, yatanye birye do nirya, aning-aning pia kum talilulnye, mangkau arye malye winiplyopura, amalye winipmalinye, el malye winin ning lyebuka, teleb kilina ati, yalma maka bitinye do, tonda tekukur maka bitinye do, aning nirya kintinilina kumnye bira, yuk ning kintinipnamlule. Ara, roti kwaning memena deiyok ning, tepung teikmace ning, el si tepung pia teleb ning, boyanamle. Atepung el dekna ikin ara, dua liter memebuka, boyanganamlule. Ateleb tepung ara, minyak zaitun mek ap, tonda nintong teleb nyan ning, el si Kemenyan ap, atepung deice arye kum tabaknamle. Aning bitinye kum tabakuka deipmalye ninguk boyanamlule. Deiyok ara, akintinibuka boyanamle ning ara, dina ati kum bukni, malye ning upmalinye, el malye winipmalye ning, atepung arepnamla deice arye, Allah arye el malye winipmalye ning lyebuka, teleb kilinamle atia.

¹² Ati, amalye winipmalinye birye, aroti kwaning dana deiyok ning, el si tepung pia teleb ning keteneipmalye ning ara, adiparyuk bobuka, imam nang sik ninye, el damuk boyanamle. Boyaliba, imamnye birye, atepung mitik tonun ton bokuka doproplirye, el taruk tatang deice aryuk, lake bikilin ning ati, bobuka, Allah Yahweh ati arenamlule. Ara, Allah el arena ati, kam ning obuka, uku dongonak ati, pala keil yangabuka memepdeiamikcak, el si mesba dobuka bilirye, atepung binuka, uku dongonamlule. Apil donamle deice arye, ‘Adin ara, akunum Allah arepmaneʼ tenen, peten kilinamle. Tonda, malye winipmalinye, el malye ning kilina ati, Allah arye, aning kilibuka teleb kilinamla ati, apil donamle.

¹³ Anyapdeipman touk, imam nang, sik weik deiyoknye, elce malye winipmalinye, el malye ning kilibuka teleb kilina ati ara, winibuka apil doplirye, Allah ati arenamle. Adeice arye, anye el malye winipmalye ning yuk-yuk nirya ara, Allah arye kum daneiplirye, telebuk kipdeipnamle. Aminyan talak aning ati, pia kum wenepnamle. Winibuka roti kwaning memena deiyok ning, mitik tonun bobuka, uku dongona pil akunum doplyeura, tepung weik tuba bataklye ning ara, imamnye el din ati, aning dolonamle. Ara, mince Allah arena ati, gandum do, yakong do, duk mitik ning areplirye, ulamle atonun unamlule.

Allah arye, “Aning-aning winina meme,” nyabuk bukni, mangkau arye winipmakirye, punubuka arenamak ati, nyabuk yupu

¹⁴ Allah Yahweh arye, Musa ati, “Aning-aninguk talibuka unamlume,” nyapdeibuk.

¹⁵ Winipmanto, Allah Yahweh arye, Musa ati lak nyabuk. Anggun malye winin ning kilina ap, pununa ap ati, narye, ‘Aning-aning ara, na mambul ning, ‘Naʼ tenen ning ati, pia teleb ning, lek ninguk arelyanganamnulume,” nyapdeiamsuk. Bukni, yatanye birye do, el mangkau arye, apia teleb ning aren talak, malye winiplyopura, tonda, teleb kibuka kum arepmalya deice arye, malye upnamle. Malye winipmalyopura, abatakmalirye, malye upmalye ning ati, el anye birye, malye winipmalye ning pununa ati, teleb aren ning ton, punubuka arelyanganamle. Ara, domba basam yim ning, nong bol pia teleb kibuka, winiryuk nepmalye ninguk, bobuka arelyanganamle. Tonda, ayim domba el dekna ara, ani. Ara, mince Allah el arena ati ara, dekna weik ning, el si perak, “Na si eren aik arena ati, winibuka-winibuka nukmunce, ato ninguk bobuka arelyanganamlume,” nyabuka, laka nyapdeiamsuk ning atonun, dekna weik domba basam bobuka, arelyanganamle. Domba basam dekna mitik ninguk, dekana meme. Adomba, el nong dekna weik atonun ninguk, bobuka yanganamlume. Amalye winipmalinye birye, aning arenamla deiyok ara, adomba arepnamla deice arye, el mangkau arye malye winipmok ning ati, punupnamle.

¹⁶ Ara talye ati kume. Yatanye do nirya, “Narye, Allah el arena ati, winibuka-winibuka arepnamne,” nyabuka laka nyalamuk bukni, aminyan talak aning dipkoprob kum arebuk ati, dipkoprob malye winipmale. Anye binyuk mince ton, “Winibuka arepnamne,” nyabuk touk, kum bobuka arelyanamlya ani, aminyan talak ara, dipkoprob kum arepmalye ning, ati, aning punupnamle. Aning kum bataktue. Anye birye kum bobuka arelyanmalya ati ara, akum ura, aminyan talak kum arepmalye ning ati, aning pununa ara, winipnamle. Elce, “Winibuka arepnamne,” nyabuk touk bukni, tonap tabakuka bokukaplirye, arepnamle. Ara, dua puluh persen (20%) tonap, tabakuka arenamle. Winiplyopura, akam ning bobuka yanamle ning ara, el adiparyuk imamnye, el dam arenamle. Winibuka yanuka areplya ning ara, anyaik talibuka, pil don imamnye birye, ayim domba bobilirye, Allah ati binuka areplyopura, adeice arye, Allah Yahweh arye, anye, el malye winipmalye ning ara, kum kipdeiplirye, teleb kipdeipnamle.

¹⁷ Tonda, Allah Yahweh arye, “Wininamlume, aning ara, pia kum wininamlume,” nyapdeiamsuk yupu, danuotam arye tonok ning babye, tonoknye mangkau arye, ayupu yaniptapmalya deice arye, malye ulule. Ura, amalye winipmalye ning ara, mangkau arye winipmalye bukni, malye akunum winiplyopura, amalye winipmalye ning ati dengna ara, ikin ning yalyeba dolonamle. Allah arye elti, ‘Kume, el malye winipmala ati, wenepnamne,’ tenenamle.

¹⁸ Ati, amalye winipmalinye birye, el malye winin ning pununa ati, Allah ati arelyanganamle. Ara, domba basam yim ning, nong bol pia teleb kibuka nepmalye ninguk, bobuka arelyanganamle. Aning ara, Allah el aik pum tam pil talibuka, apil dona deiyoknye, imamnye ati yanuka arepnamle. Domba basam nong malye wamlye ning ara, pia kum arelyanganamle. Ayim domba, dekna teleb ninguk dipnamlule. Ara mince, Allah arye, “Winibuka-winibuka, ato ninguk nukuka arepnamnulume,” nyapdeipsuk dekna atonun ninguk, bobuka arepnamlule. Winibuka yanuka areplyopura, Allah aik talibuka, pil dona imamnye birye, bobilirye, Allah ati binuka, areplya ning ara, Allah Yahweh arye, anye el mangkau arye malye winipmalye ning ara, kiliplirye, teleb kipdeipnamle.

¹⁹ Anyaripnamle ning deiyok ara, ani. Ara, Allah Yahweh arye nyapdeibuk yupu ton, mangkau arye kum winipmalya deice arye, malye winipmalya ati, aning punubuka, Allah arelyangana ati, kam ning, yim domba basam bobuka arelyanganamle. Allah arye Musa ati, laka nyabuk.