Imamat 4 - Eipomek

Mangkau arye malye winibikirye, ‘Se, Allah Yahweh arye, nun malye wininyap ning kilipsilirye, lyepnamsilʼ tenen, arelyangan ning ati, nyabuk yupu

¹ Allah Yahweh arye, Musa biti nyabuk.

² Anyapdeipkin yupu nirya ara, Musa ance, sik Israel nang kekenmacak arye, ayupu nyapnalame. Ara, yatanye do, Allah Yahweh arye, “Aning ara, kum wininamlume,” nyapdeibuk yupu nirya, tonoknye babye ton, mangkau arye malye winiplyopura, Allah arye nyapdeipsuk yupu noutam arye, tonok ning babye, yanibuka malye winiplyopura, na Allah Yahweh arye, “Winibuka unamlule,” nyapdeipse touk, aninguk talebuka wininamnyake.

³ Min yuma ning ara, imam-imam nang kan-kan, ‘Anye aketing tahun noutam ara, Allah ati arelbanamleʼ tenen, elti, wibuka erepdeibikinye, imam nang anggun deiyoknye biti nyapnune. Winipmanto ara, Allah Yahweh, el si eren aik pum tam pil don nang, sik deiyoknye birye, mangkau arye malye winiplyopura, aning wenena ati, el nong deice ap, sik Israel yala nang nirya babye, sik nong deice ap, ikin unamle. Ati ara, aimam deiyoknye birye, malye winipmalye ning ati, ‘Yahweh arye, namin kipnilirye, lyepropnamnilʼ tenen, na Allah Yahweh ati, arepnamnile. Ara, anye el adiparyuk, winiryuk nepmalye yim sapi basam bukni, bol malye bona kum, pia teleb ninguk, na Allah ati arelyanganamnile.

⁴ Ayim sapi basam bobuka, Allah ap, ninye ap ansinilina ati, sapi bol arye domik doltakne tenda aik bublan botobuka deiamikak, asapi basam bobuka binamlule. Bobuka bilirye, aimam deiyoknye, el bidamnye aryuk, aboyanuka deipmalye yim sapi basam, el kisok deice, el taruk dobuka deiplirye, asapi basam ara, onamlule. Ara, ‘Aopman basam ara, na ni Allah arye eipmalce, na malye winina pununa ap, kum kilina ap ati, dopropnuleʼ winipnamle.

⁵ Imam-imam nang arye, ‘Atalak ara, Allah si eren aik pum tam pil donamleʼ tenen, akunum wibuka deipmanye, sik deiyoknye elcuk, aopmalye yim sapi basam ining ara, bokuka ton doproplirye, Allah ap, ninye ap ansinilina ati, tia ati domik doltakne aik pum tamuk bobuka binamle.

⁶ Winiplyopura, aimam nang, sikce wibuka deipmaca deiyoknye, el dumu taruk arye, ayim sapi basam ining burubukaplirye, Pia Teleb Lek Aik pum tam wekelban ati, bisik bublan dam lelipdongamica cang kain urasina tam, asukum dam ara, el dumu taruk duk deice ining burupmalye ning, dupmalye ining ara, like tekbarye purupdonokliba, acang kain dam dupnamlule.

⁷ Asapi basam ining tuba upmalye ning ara, mitik tonun ton bokuka doproplirye, Allah ap, ninye ap asinilina ati, sapi bol arye tia domik doltakne tenda aik pum tam, siltong teleb nyan ning, el si dupa, uku dongona ati, mitik mesba memebuka deiamikak, el sirya dana-dana tam arye, tace atonun kibuka memamica belyamlye deice, binuka likilinamlule. Tonda, aining ton tuba aupmalyopura, el adiparyuk doplirye, tuba tonap tamubuka, anyaik bai tam bilyopura, anyaik wekelban ati, bublan dam bukni, urasin tam kintinip deibik mesba mening dam dikuka dikilinamle. Ara, ‘Allah arena ati, kam ning obuka, uku dongona ati, keil pala yangabuka kintinip deiamikak, amesba dam binuka, ayim sapi basam ining dikilinamle.

⁸ Aning akunum winiplyopura, anye, imam nang, sik deiyoknye elcuk, ayim sapi basam meta nirya ara, wibuka dolonamlule. Awibuka dolonamle meta nirya ara, ani. Asapi basam deisuruk irilamle kop nirya ap, meta nirya ap, wibuka dolonamlule.

⁹ Tonda, keil duk bitinye ap, keil duk dam irilamle kop ap, talima ap, talima irilamle kop ap nirya, apia telebak nirya ara, wibuka dolonamle.

¹⁰ Apil donamla ara, malye upmace nang ati, ‘Nun malye wininyap ning, namin kipsilirye, Allah ap, teleb kibuka neika unamapʼ tenen, kam ning obuka boyakceba, uku dongonak ning, mesba deice deiplirye, uku dongolamle atonun ubuka, apil babye atonun ubuka, pil donamle. Aning ara, mangkau arye malye uplyopura, apil atonun doplirye, keil pala yangabuka kintinip deibukak, el si mesba deiceuk, ayim sapi basam ton uku dongonamle. Ara, keil duk ap, deisuruk irilamle kop ap, meta nirya ap, amesba deice uku dongonamla ati, nyapne.

¹¹ Bukni, asapi basam el tup ap, el bola ap, tonda, el kisok ap, yan ap, deisuruk ap, el kwapnaca ap nirya ara, bokuka weik tam nirya ara, yukak ton, Israel nang unyakak, bai tamuk bobinamlule.

¹² Aopmalye yim sapi basam sekuka deipmalye ninguk bukni, ton yuk bokuka deipmalye ning nirya ara, adiparyuk dobuka, Israel nang unyakak, mening dam kum bukni, telebakuk bobinamlule. Ara, Israel nang unyakak batakuka, bai tam atu lukuka donokolbanyaka dam bilirye, asukumuk binuka, uku dapnulya ati, yo boyanuka deiplirye, uku seklyopura, abasam wibuka deipmalye ning nirya ara, ayo deice deiplyeba, uku arye dipnamle. Aning uku sekuka danamlyak ara, talye sukum meme. Na Allah arye, ‘Asukum ara, teleb uka. Atu lukuka donokolbanyaka damuk deipnamlule,’ nyapdeipsakuk, uku dongonamlule.

¹³ Ura, yuk yupu ton nyapnusine. Winipmanto ara, sik Israel nang nirya ara, Allah Yahweh arye, “Aning ara, winina meme,” nyapdeibuk bukni, mangkau arye tonok ton malye winibikirye, ‘Aning ara, nun malye winipmabe,’ kum tenebikca babye, tonda yuk Israel nang babye, kum bikikceba, aning tenina kum bukni, na nyapdeipse yupu akunum yanibikcopura, akunuma. Na kanye ara, sik dipkoprob akunum malye winipmake. Sik Israel nang arye, ‘Se, aning ara, nun mangkau arye malye winipmaba ati, dauaplye,’ tenenamak bukni, nara, ‘Kume, dipkoprob malye winipmake,’ tenenamna ati, awinin ning kum kilina ati, dekna ning ton kintinipnamake.

¹⁴ Ati ara, talye daunmaca ani, aminyan talak, ‘Se, dipkoprob nun malye winipmapuʼ tenen, akunum bikikcopura, winipnamake. Israel nang, sik adiparyuk, yim sapi basam winiryuk nenmalye ning boyanuka, sik malye winipmace ning pununa ap, dekna ap ati, Allah Yahweh ati, aren ning arepnamniake. Ara, na Allah Yahweh ap, ninye ap asinilina ati, sapi basam bol arye doltakne tenda aik bublan damuk, yim sapi basam winiryuk nenmalye ning boyakirye, ‘Kume, ara nun mangkau arye malye winipmapu ning dekna ati, asapi basam bobipyeba, Allah arye namin kipsilirye, lyepnusilʼ tenen, na Allah Yahweh ati yanuka arenamninyake.

¹⁵ Adekna ning yanuka arenamak ning ara, Israel nang, sik weik deiyok nang, sik wise-wise nang nirya arye, ayim sapi basam boyanuka kintinibikirye, ayim sapi kisok deice taruk deibuka, ‘Kume, ara nun ap, Israel nang ap, nun nirya mangkau arye malye winipmaba ati, asapi basam ara, yanuka arepmabe,’ tenebikirye, asukum aryuk asapi basam opnamake. Ara, na Allah Yahweh arye dinmanyakuk, na arena ati, na si eren aik damuk opnamake.

¹⁶ Asapi basam akunum obikcopura, imam-imam nang arye, ‘Anye atalak deiya koubuka pil donamsilʼ tenen, akunum wipdeipmek imamnye, sik weik deiyoknye birye, asapi basam ining ton dobuka doproplirye, Allah ap, ninye ap, asinilina ati, sapi basam bol arye domik doltakne tenda aik, Allah el si eren aik noutamuk bobanamlule.

¹⁷ Winibuka abasam ining, anyaik pum tam bobilyopura, anye el dumu taruk arye, aining liklirye, Pia Teleb Lek Aik pum tam wekelban bisik bublan ati, wilyamik cang kain urasin tam ara, like tekbarye deice arye purupdonokliba, aining ara, asukumuk sakuka dupnamlule. Ara, na Allah Yahweh arye, dinmanye talak aryuk, na arena ati, na damuk apil donamlule.

¹⁸ Asapi basam ining tuba upmalye ning ara, mitik ton bokuka doproplirye, Allah ap, ninye ap, ansinilina ati, sapi basam bol arye doltakne tenda aik noutam, yo pum peti dekna weik kat ning, emas arye kintinibik mesba memepdeiamikcak, el sirya dana-dana arye, tace atonun kibuka memamica, dumbari belyamlya deice binuka, asapi ining likilinamlule. Tonda, ayim sapi basam ining ton, tuba aupmalyopura, el adiparyuk dobukaplirye, tuba tamubuka, anyaik bai tam bilyopura, Teleb Lek Aik wekelbana ati, bublan dam bukni, urasin tam memepdeiamica, uku dongonak mesba dam binuka, dikilinamlule. Ara, ‘Allah arena ati, kam ning obuka, uku dongona ati, keil pala yangabuka memepdeiamikcak, amesba dam bilirye, aining dikilinamle.

¹⁹ Tonda, aimam deiyoknye birye, asapi basam el meta ap, kop ap nirya ara, dobukaplirye, ining ning obuka, Allah arena ati, uku dongonak ati, anyaik bai tam bisik bublan dam mesba memepdeibika deice bobilirye, uku dongonamlule. Uku arye aning nirya dipnamle.

²⁰ Aning uku dongon pil don ara, ‘Malye winipmace nang ati, lyepropsutueʼ tenen, yim sapi basam winiryuk nenmalye ning, obuka boyaceba, imam nang sik deiyoknye birye, aning dobuka, uku dongolula atonun ubuka, winiryuk nyapmasin pil atonun doplirye, asapi nong babye atonun, uku dongonamlule. Imam-imam nang, sik deiyoknye biryuk apil donamlule. Aimamnye birye apil donamla deice arye, Israel nang nirya, sik mangkau arye malye winipmakce ning ara, Allah Yahweh arye, aning nirya lyebuka kum kipdeiplirye, teleb kilinamle. Sik malye winipmace nang ati, weneptu bukni, asapi basam opnamaka deice arye, sikti, punupnamle. Adeice arye, Allah Yahweh arye, anggun Israel nang ati, teleb kipdeipnamsile.

²¹ Ura, apil nirya akunum dobuka, sirya daklyopura, ayim sapi basam ara, imam nang sik deiyoknye elce, Israel nang unyak noutam bobuka bai tam bilirye, asapi nong tup ap, bola ap, yan ap ara, uku binuka dongonamlule. Aning uku dongon pil dopnamle ning ara, Allah ap, ninye ap, asinilin aik talibuka, pil dona deiyoknye, imam el malye winilye ning ap, Israel nang nirya, sik malye wininyak ning ap ati, Allah arye kum kipdeiplirye, sik nirya ati, tuba tonap teleb kipdeipnamle.

²² Ura, yuk yupu ton nyapnusine. Winipmanto, sik Israel nang talibuka ulamice weik deiyok nang ton, mangkau kanye aryuk bukni, Allah Yahweh arye, “Aning ara, kum wininamlume,” nyapdeipsuk yupu tonok ati, yanibuka malye winibikcopura, aning deice arye, dipkoprob malye winililanyake. Ati, sik si erenyak Allah, sik ni koproba Allah arye, ‘Daupmalye,’ kum tenenamlule. ‘Amalye winibikce nang ara, dipkoprob malye winipmake,’ tenepnamle.

²³ Ati, daunmalya ani, aminyan talak, aweik deiyoknye birye, ‘Se, aning ara, dipkoprob na mangkau arye, malye winipmanueʼ tenen, akunum bikdalyopura, el adiparyuk yim kambing basam winiryuk nenmalye ning tonok, bol pia teleb ninguk boyanuka, Allah arena ati, boyalirye, arenamlule. Ara elce, ‘Kume, na mangkau arye malye winipmanua dekna ati, akambing basam ara bobiniba, Allah arye lyepnunilʼ tenen ati, arelyanganamnyake.

²⁴ Ayanuka areplya deiyoknye, el taruk dobuka, akambing basam el kisok deice deiplyeba, onamlule. Akambing ona talak ara, ining ning obuka, uku dongona ati, mesba memepdeiamicak utamuk, binuka deiplirye onamlule. Ara, Allah Yahweh el arena ati, kam ning obuka, uku dongopmunce arena ati ara, ‘Asukum aryuk, Allah dinmasilyakuk, binuka opnamapʼ tenen, keil taplakuka yangap deiplumce, memepdeiplumak aryuk, binuka onamlule. Akambing basam onamla deiyok ara, el malye winin ning pununa ap, kum kina ap atia.

²⁵ Imam pil dona deiyoknye, el adiparyuk el taruk arye, akambing basam ining likdongoplyopura, Allah el si eren aik bai tam bukni, urasin tam deiamikakuk, ining ning uku dongona ati, amemepdeibik mesba damuk binuka, dikilinamlule. Ara, dana-dana tam kup-kup dam dumbarye tace kibuka memepdeibuka deice binuka, likilinamlule. Tonda, sapi basam ining ton, tuba aupmalyopura, el adiparyuk dobukaplirye, Allah el si eren aik wekelbana ati, bublan dam bukni, urasin tam memepdeiamica, mesba dam binuka, aining nirya dikilinamlule. Ara, ‘Allah arena ati, kam ning obuka, uku dongona ati, keil pala yangabuka memepdeiamikcak, amesba dam binuka, aning ara, dikilinamlule.

²⁶ Winibuka apil dobuka kintinip deiplyopura, amutuku nang sik deiyok kibuka taleamlimye bira, mangkau arye malye winipnamlye ning ara, Allah arye teleb kipdeipnamle. Aning teleb kilina ati, yanuka opmalye kambing basam, el meta nirya ara, amesba deice uku dongonamlule. Ara, amalye winipnamlya deiyoknye birye, ‘Na malye winipman ning ara, ‘Allah arye lyepnuturye, teleb kipdeipnutueʼ tenen, kam ning obuka, meta nirya boyaliba, imamnye birye, aning dobuka, mesba deice uku dongonamlule. Ara, ‘Allah ap, nun ap tuba teleb kibuka, neika uptibyeʼ tenen, pil dolamle touk ubuka, adeiyoknye el melina ati, imamnye birye, apiluk donamlule. Winipnamla deice arye, Israel nang talina deiyoknye, el malye winipmalye ning ara, Allah arye namin kiplirye, kum kipdeipnamle. Amalye winipmalye ning ati, kum wenepnamle. Tuba tonap, teleb kipdeipnamle.

²⁷ Ura, aning atouk bukni, yuk yupu ton nyapnusine. Winipmanto ara, ninye deiyok nanguk kum bukni, talye Israel yala nang nirya babye, Allah Yahweh arye, “Aning ara, kum wininamlume,” nyapdeipsuk yupu ton, el mangkau arye malye winiplirye, anyapdeipsuk yupu yaniplyopura, ‘Se, na mangkau arye, Allah Yahweh ati, malye kipdeipmanue,’ tenenamlule. Allah el kanye ara, ‘Mangkau aryuk, dipkoprob anye birye malye kipmaue,’ tenepnamle.

²⁸ Ati, daunmalya ani, aminyan talak, anye birye, ‘Se, aning ara, dipkoprob na malye winipmanuʼ tenen, akunum bikdalyopura, el dekna ap, pununa ap ati, el adiparyuk Allah aren ning ton boyanamle. Ara, kambing basam kil winiryuk nepmalye ninguk, tonda bol malye ning ton pia meme. Nong bol pia teleb ninguk boyalirye, ‘Kume, na mangkau arye malye winipmanua ati, akil kambing basam bobiniba, Allah arye namin kipnilirye, lyepnunilʼ tenen, Allah ati yanuka arenamnyake.

²⁹ Akambing basam yanuka areplinye bira, el taruk dobuka, akil kambing, el kisok deice deiplirye, onamlule. Akambing on talak ara, ining ning obuka, uku dongona ati, keil pala yangabuka memepdeibika, el si mesba utamuk, binuka onamlule. Ara, ‘Allah arena ati, kam ning obuka uku dongobuka arena ati, asukumuk binuka opnamapʼ tenen, memepdeiamlumak uk, binuka onamlule.

³⁰ Aning nirya kunum winipmunyopura, imam pil dona deiyoknye, adiparyuk el taruk arye, akil kambing basam ining wibuka, ining ning uku dongona ati, keil pala yangabuka memepdeibikak, el si mesba, el kup-kup dana-dana tace atonun kibuka, memepdeibik deice binuka likilinamlule. Tonda, ining ton tuba aupmalyopura, ining ning uku dongona ati, memepdeiamik ning, mesba dam bukni, tuku deice binuka dikilinamlule.

³¹ Aboyaliba, opnamle kil kambing basam el meta ap, kop ap nirya ara, adiparyuk dobukaplirye, mince winilamlye touk, malye winipmalinye birye, ‘E, na malye winipmana ati, ining ning dobuka, Allah dam biniba lyepnilyopura, el ap, na ap, tuba tonap teleb kibuka, neika unanamʼ tenen, meta nirya boyaliba, mesba deice uku dongolamle touk ubuka, pil doplirye, uku dongonamlule. Aning atonun, anye birye, akambing meta nirya boyanuka, imam nang, sik weik deiyoknye biti arepliba, imam adiparyuk ameta nirya, mesba deice deiplyeba, uku diplirye, siltong teleb ning welepliba, Allah Yahweh kekeplirye, el kanye teleb unamle. Aning ara, amankau arye malye ulul ning ara, pununa ap, dekna ap ati, apil donamlule. Tonda aning atonun, aimamnye birye, apil winibuka dolamlye touk ubuka doplyopura, adeice arye, amalye ning mangkau arye winiplinye, el malye winyamlye ning ara, Allah Yahweh arye kilipnamle. Amalye winyamlye ning ati, wenebuka kum opnamle.

³² Ura, yatanye birye do nirya, mangkau arye malye winiplinye, el malye winipmalye ning ati, ‘Allah arye, na malye winin ning kilipnilirye, teleb kipdeipnutueʼ tenen, ‘Domba basam binuka arepnune,’ teneplyopura, el boyanamle ning ara, kil domba basamuk boyanamle. Ara, tonok pia bol teleb kibuka nepmalye ninguk, boyanuka arelyanganamlule.

³³ Ayanuka areplinye, el taruk ara, dobuka akil domba basam, el kisok deice deiplyeura, onamlule. Adomba on talak ara, ining ning obuka, uku dongona ati, utam memepdeiamicak arye, binuka deiplirye onamlule. Ara, Allah arena ati, kam ning obuka, uku dongobuka arena ati, ‘Mesbah damuk binuka deibibirye, opnamapʼ tenen, memepdeiamlumak uk, binuka onamlule.

³⁴ Winiplyopura, imam pil dona deiyoknye bira, Allah ap, ninye ap ansinilina ati, sapi basam bol arye tia ati domik doltakne tenda aik pum tam, pil talibuka pil donanye, elcuk el taruk arye, akil domba basam ining burubukaplirye, kam ning obuka, uku dongona ati, mesba memepdeiamikak, el kup-kup dana-dana, sapi basam el kisok tace belelamle touk ubuka, memebika deice binuka likdeipnamlule. Tonda, ining ton tuba aupmalyopura, ining ning uku dongona ati, memepdeiamik ning mesba dam bukni, deiyok tam nirya, tuku deice dikilinamlule.

³⁵ Aboyaliba, opnamle kil domba basam el meta nirya ara, adiparyuk dobukaplirye, mince winilamlye touk, malye winipmalinye birye, ‘E, na malye winipman ning ara, ining ning dobuka, Allah dam binuka arepniba, Allah arye lyepnilirye, teleb kipdeipniliba, Allah ap, na ap, tuba tonap teleb kibuka, neika ansinibuka neika unanamʼ tenen, boyaliba, obuka, uku dongolamla atonun kibuka, pil doplirye, uku dongonamlule. Anye birye, aopmalye kil domba, meta nirya bobinuka, imam nang, sik weik deiyoknye biti arepliba, imam adiparyuk, ameta nirya mesba memepdeibika deice binuka, uku dongonamlule. Ara, amalye winipmalinye, el pununa ap, dekna ap ati, arepnamlule. Ameta dobuka uku dongopliba, uku diplirye, siltong teleb ning welepliba, Allah Yahweh kekeplirye, el kanye teleb unamle. Tonda aning atonun, aimamnye birye, apil winibuka dolamlye touk, ubuka doplyopura, adeice arye, atonoknye el mangkau arye malye winipmalye ning ara, Allah Yahweh arye kilipnamle. Amalye winipmok ning ati, kum wenebuka opnamle.