Imamat 3 - Eipomek

Allah Yahweh arye, “Anggun malye ning kilibuka lyepsinirye, na ap, anggun ap ansinina teleb kibuka, neika unamaba ati, kam ning bobuka arenamnulume,” nyabuk yupu

¹ Winipmanto ara, ninye bin tonok arye, el malye winyamlye ning ati, ‘Na malye wininye ning namin kipnilirye, Allah ap, na ap teleb kibuka, neika unaname’ tenen, Allah ati arenamlum ning ara, ani. Ara, kam ning boyanuka uplyopura, bol pia teleb ap, nong kalimna teleb ninguk boyanamlule. Bol malye ning ara, Allah Yahweh ati, arena pia kume. Anya arye, yim sapi basam tonok arepnulye do, kil sapi basam arepnulye do? Allah arena ati, el damuk boyanamlule. Bukni, sapi basam ara, bol ap, nong kalimna ap, pia teleb ninguk boyanamlule. Bol malye ning ara, pia kume. Bol malye ning areplyopura, Allah Yahweh arye, el anye biti, kanye kum delinamle.

² Asapi basam bobuka yalyeura, anye birye, ‘Anyarepnun ning ara, na malye wininun ning pununa ati, arepneʼ tenen, el taruk dobuka, akam ning, el kisok deice deiplyopura, adiparyuk asapi basam opnamlule. Aning opnulyopura, ninye ap, Allah ap, ansinilina ati, sapi basam bol arye domik doltakne tenda aik wekelbana ati, bublan dam arye binuka onamlule. Oplyeopura, Allah si eren aik pum tam talibuka pil dolamlinye, Harun elce deibukba, deipdanin yangakirye, anyaik pum tam talibuka pil donyak nang, sik imam-imam nang dam boyalirye, yanuka arepnulule. Winipyopura, imam yala nang arye, aopmalye ning, el ining dobukabikirye, Allah arena ati, keil pala yangabuka taplakuka memepdeibikce, ining ning obuka uku dongona ati, el si mesba memebuka deiamunye sukum, mesba el kup-kup dam dana-dana nirya ara, aining ara, el taruk arye burubukabikirye, pala keil taplakuka yangabik sukum obinuka, aining ning deice purup donokikiba, ining dulbinamle.

³ Tonda, malye un ning winilamlinye birye, ‘Nara malye winipsa ati, na ap, Allah ap, ansinilidanuka telebuk unamname,’ teneplirye, kam ning boyalirye, oplyopura, Allah Yahweh ati uku dongopnamlule. Ati, akam ning oplyopura, Allah el si eren aik pum tam pil dona deiyok nang, sik imam-imam nang arye, ayanuka oplye kam ning noutam arye, Allah arena ati, kintinibuka dolonamak ning ara, ani. Deilyu noutam irilamle kop ap, akam ning deisuruk dam meta nirya ara, dolonamnyake.

⁴ Tonda, pia telebak ara, keil duk ap, keil duk deice palilamle kop ap, talima pum palilamle meta ap, talima duk ap, aning nirya dolonamlule.

⁵ Adopropnamle ning nirya ap, tonda, ‘Allah ati, arepnamapʼ tenen, yuk tup ning ap, kintinibuka deipmakce ning nirya ap, tabakuka uku dongona ati, amesba memebuka deibika arye, Harun el mapu arye, aning nirya bobuka, amesba deice uku dinmalye noutam, uku dongonamake. Ara, ‘Allah Yahweh ati arepnuyapʼ tenen, uku dongobikiba, atup ning nirya uku diplirye, siltong teleb ning weleplya ati, Allah kekeplirye, kanye teleb unamle.

⁶ Winipmanto ara, yatanye birye do nirya, ‘Allah arye, na malye winilamse ning lyepropnilirye, teleb kipdeipniliba, el ap, na ap, telebuk unamnameʼ tenen, kam ning bobuka, arelyanganamle ning ara, domba basam do, ura kambing basam do, sapi basam do, bol malye ning ara, bobuka arelyangana, pia meme. Anya arye, tonok yim ning do, kil sapi basam do, akam ning bobuka arelyanganamle ning ara, bol pia teleb ninguk, bobuka arelyanganamlule.

⁷ Winipmanto ara, ninye bin tonok arye, domba basam mi tonok ton, ‘Allah ati, arepnune,’ teneplyeura, anye el bidamnye, adomba basam mi bobuka, Allah Yahweh el si erena ati, arenamlule. Ara, sapi basam bol arye domik doltakne tenda aik damuk, ‘Allah eipnamleʼ tenen, anyaik damuk bobuka yanganamlume.

⁸ Adomba basam mi, anyaik dam bobuka bilyopura, anyaik bublan dam binuka deiplirye, anye el taruk dobuka, adomba basam mi, el kisok deice deiplyopura, ‘Aning ara, na malye winilamse ning, punupnilirye, kilipnamnileʼ tenen, adiparyuk adomba mi onamlule. Winiplyopura, Allah el si erena ati, sapi basam bol arye domik doltakne tenda aik pum tam talibuka pil dona nang, Harun el mapu, sik imam-imam nang arye, adomba obuka, ining doprobikirye, ining ning obuka uku dongona ati, mesba memebuka deiamice sukum, amesba el kup-kup dam dana-dana nirya ara, el taruk arye aining burubukabikirye, pala keil taplakuka yangabik sukum obinuka, mesba deice purup donokikiba, ining poulbinuka dulbinamlule.

⁹ Ati, anyapmasen touk, anye birye, ‘Allah Yahweh arye, na malye wininun ning ara, lyepropnilirye, teleb kibuka deipnutuba, el ap ansinibuka teleb utinimnyeʼ tenen, ining ning bobuka, arelyanganamle ning ara, uku dongonamnyake. Ara, sik imam nang arye, el boyanamle domba basam mi, el deisuruk noutam palilamle kop ap, amu tam yok dam kalibikiba, ulamle meta ap, aning nirya doprobikirye, Allah Yahweh el arena ati, uku dongonamnyake.

¹⁰ Tonda, pia telebak ara, keil duk bitinye ap, keil duk dam irilamle kop ap, talima duk ap, talima pum palilamle kop ap, aning nirya ara, bobikirye, kintinibuka boyanamlule. Boyalyeura, imam-iman nang, sik deiyoknye ati arenamlule.

¹¹ Allah ap, ninye ap, ansinilina ati, sapi basam bol arye domik doltakne tenda aik pum tam, pil dona deiyoknye, imam atalak pil donmalinye, elce adomba basam mi obuka deipmunce, bokuka yuk kintinip deipmunye ning nirya ara, el anyaik pil donmalye imamnye birye, aning nirya bobilirye, binuka uku dongopliba, uku arye dipnamle. Adin ning binuka uku dongonamle ning ara, Allah Yahweh, el si erena ati, binuka arenamlule.

¹² Winipmanto ara, ninye bin tonok arye, kambing basam tonok ton, ‘Allah ati, arepnune,’ teneplyopura, anye el bidamnye aryuk, akambing basam bobuka, Allah Yahweh el si erena ati, arenamlule. Ara, sapi bol arye doltakne tenda aik dam, ‘Allah eipnamleʼ tenen, anyaik damuk boyanganamlule.

¹³ Asukum boyalyopura, adiparyuk anye el taruk akambing basam kisok deice deiplirye, ‘Akambing ara, na malye winina punun ning ati winipleʼ tenen, akambing basam ara, Allah ap, ninye ap, ansinilina ati, sapi basam bol arye domik doltakne tenda aik pum tam, wekelban bisik bublan dam aryuk onamlule. Akambing basam, el ining banmalye ning ara, Harun el mapu, sik imam nang arye, aining doprobikirye, taruk arye burubukabikirye, ining ning obuka, uku dongona ati, pala keil taplakuka yangabik sukum, mesba dam obinuka, aning deice burubuka donokikiba, ining poulbinuka, akeil deice dulbinamlule.

¹⁴ Akambing basam ning, Allah ati aren ning ara, aning boyanamlanye, elce akambing basam teleb-teleb akuk, wibuka doplirye, uku dongopnamak deice arye, Allah ati arenamlule. Arena ati doropnulye ning ara, ani. Dei suruk deice palilamle kop nirya atia.

¹⁵ Tonda akambing basam, el keil duk bitinye ap, keil duk deice irilamle kop ap, tonda talima ap, talima irilamle meta ap, aning ton, Allah ati arenamnyake.

¹⁶ Aning-aning nirya ara, Allah ap, ninye ap ansinilina ati, sapi basam bol arye domik doltakne tenda aik pum tam, pil talibuka dona deiyok nang, sik imam-imam bukni, atalak pil donmalinye biryuk, aning nirya doproplirye, pala keil yangabuka kintinip deibikak, aning bobilirye, binuka uku dongopnulule. Winibuka uku dongopliba, atup ap, meta ap, kop ap ara, uku diplirye, siltong teleb ning ara, weleplirya ati, Allah Yahweh kekeplirye, el kanye teleb unamle. Luba kina meme. Akam ning noutam wamlye meta ap, deisuruk dam palilamle kop nirya ara, Allah elti, arenamlule. Aning nirya ara, Allah Yahweh, el ninguk ulula atia.

¹⁷ Ura, aning nirya laka nyapmasin yupu nirya ara, anggun Israel yala nang ara, ‘Allah arye nunti, ‘Wininamlume,’ nyapdeipsuka ati, aning nirya talibuka pia wininamabe,’ tenenamake. Tonda, yata kam ning do nirya, el ining ap, meta ap, kop ap, dobuka dina meme. ‘Aning ton dobuka dipnuyabe,’ tenebuka, pia kum dinamlume. Anyapman yupu ara, batakna meme. Wini talak arye dipdongobuka, dounamle talak nirya ara, pia tuba-tuba nyanauk unamlame. Nyanamlama deice arye, sik Israel yala nang nirya ara, ayupu kekebikirye, bikuka pia winipnin banamnyake. Allah Yahweh arye, anyabuk yupu nirya ara, Musa kekebukce, Israel nang dam, yanuka lak nyabuk.