Imamat 27 - Eipomek

Allah el si Yahweh aren ning ati, “Winibuka arenamlume,” nyabuk yupu

¹ Allah Yahweh arye Musa ati, ayupu nyabuk

² Anyapne yupu ara, Musa ance Israel nang dam bimince, ‘Allah arye nyapdeipmasile,’ nyapnulyame. Ayupu ara, ani. Tonoknye ton, Allah Yahweh el ‘Naʼ tenen ning unamla ati, winipnamlyeura, el nong dengna atonun aren ning ara, ‘Allah ati arepnune,’ teneplyeura, akintinyamikce keil uang ton arenamake. Anye, elce arenamle ning ara, ‘Keil uang, el si syikal Tonoknye biti, 50 syikal, ara 570 gram perak arelamik. Dengna weik ning, perak ning ara, ‘Winibuka-winibuka arenamakʼ tenen, laka nyapnusine. Aning kinitinibikce touk, arenamyake.

³ Anye elce, Allah Yahweh el si eren aik dam boyanamle keil uang perak, el si syikal ara, Allah el aik pil donyak nang arye, “Keilʼ uang syikal ning ara, el dekna winibuka-winibuka nukibirye, arenamab,” nyalamak atonun, Israel nang arye nukuka arenamyake. Ura, ninye dekna ara, keting tamun ara, umur 20 keting tamun arye nukuka, 60 tahun akunum wisi dayik nang ara, sik nong pununa dengna ara, dengna weik ning, el si uang perak syikal, 50 nukuka arenamyake.

⁴ Ura, kilapu umur ara, keting tamun 20 yupa tahun adeice nukuka, 60 tahun akunum wisi dayik kilapu ati ara, sik nong pununa dekna ara, dekna weik ning, el si uang perak syikal 30 nukuka arenamyake.

⁵ Aning atonun, yata nang do, sal do, kilapu do, sik umur keting tamun ara, 5 tahun arye ubuka, 20 tahun akunum wisi dayikce nang ara, winibuka arenamyake. Sal ara, sik nong pununa ati, dekna ara, dekna weik ning, el si uang perak syikal 20 nukuka arenamyake. Bukni, kilapu ara, sik nong pununa ati dekna ning ara, dekna weik ning, el si uang perak syikal 10 nukuka arenamyake.

⁶ Aning atonun, yata nang do, sal do, kilapu do, winiryuk deipmakce mapu ara, wala tonok arye, nukuka 5 keting tamun akunum unyak nang ati ara, winibuka arenamyake. Sal mapu ara, sik nong pununa ati, dekna ning ara, dekna weik ning, el si uang perak syikal 5 nukuka arenamyake. Bukni, kilmapu ara, sik nong pununa ati dekna ara, dengna weik ning, el si uang perak syikal 3 nukuka arenamyake.

⁷ Bukni, sik wisi nang ara, aninguk arenamyake. Wisi nang ara, sik keting tamun ara, 60 tahun ubuka, adeice nukuka, keting tamun weik tonun ton, wisi akunum dayik nang ara, sik nong pununa ati, dengna ning ara, dekna weik ning, el si uang perak syikal 15 nukuka arenamyake. Aning atonun bukni, pia wisi kilapu ara, sik keting tamun ara, 60 tahun, adeice nukuka keting tamun weik tonun ton, wisi akunum dayik kilapu ara, sik nong pununa ati, dengna ning ara, dekna weik ning, el si uang perak syikal 10 nukuka arenamyake.

⁸ Bukni, yatanye do nirya bona talina kumce, talye kankan unyak nang do nirya, aunmalinye birye, ‘Anye arepniba, Allah el tenen ning unamleʼ tenen, kintinibuk bukni, anyapdeipne touk, anye keil uang kum arepmanto uplirye, dipkoprob bona talina kumnye kiplyopura, pia kan-kan nye ulamlyopura, anye birye Allah ati, arelbanamle sal do, kil do dobuka, imamnye dam bobinamle. Bobilyopura, imam arye Allah ati, arepnulye ning dipdelirye, ‘E, el dengna atonun ning ara, ani,’ teneplirye, nyapnamlarya. “Winibuka dem arepnalyame,” nyabuka, lake nyapnamle. Imam arye nyapdeiamlye touk, aninguk ‘Allah ati arepnune,’ teneplirye, aninguk boyanuka, kanye lungnubuka, namin asa ulirye, el auplye touk arenamlule. Ara, Imam arye nyapdeiamlye touk, aninguk auplyopura, ‘Allah ati arepnun,’ teneplinye birye, aninguk boyalirye, kanye lamabuka namin asa arye ulirye, el auplye touk arenamle.

⁹ Ura wini talak ara, Israel nang arye, ‘Nun ni Allah aren ning ati, kam un ning, domba ato ning obuka arebibyeura, ‘El ninguk kipnamle,’ tenebikirye, Allah el si erena ati domba ato ning obuka arena ati nyapnune. Anye birye, ‘Allah ati arepnune,’ teneplyopura, anye bira adiparyuk, malnye ning arena pia kum bukni, dipkoprob teleb ning arenamlule. Ara, Allah el kanye ara, ‘Aning ara, ‘Naʼ tenen, ning ati, pia mingne teleb lek ning, etekdopnye ulule,’ tenenamla atia.

¹⁰ Yatanye birye do nirya, ‘Allah ati arepnamneʼ tenen, domba ato ning wibuka kintinip deiamlye ning ara, aninguk bobuka, Allah ati arepnamlule. Minop wibuka deipmalye ning bataklirye, yuk ning ton punubuka kum arenamlule. Tonda, teleb ning arye, malye ning kum pununamlule. Aning atouk, malnye ning boyanuka, teleb ning kum pununamlule. Tonda winipmanto, domba ato ning teleb ning deibuk bukni, ‘Allah el ‘Naʼ tenen ning ati, domba basam arepnune,’ akunum teneplyopura, tuba tamubuka aning batakuka, yuk yala ining ning dobuka batakuka, sapi ato ning kum pununamlule. Min akunum wibuka deiplye ning, aninguk arenamlule. Aning nirya ara, nong teleb ning arenamlulume. Bol malye ning arena meme.

¹¹ Ura, ‘Allah el si erena ati, domba ato ning arepnune,’ tenepmunyopura, awebuka kintinibuka deiplilalum ning ara, na Allah arye, “Ayala ning ara, teleb ning. Aning ara, malye ning ati, kum arepnutume,’ nyapdeipsise ning, ateleb ninguk arenamnulume. Bukni, winipmanto ara, tonye bira, ‘Allah arye, ‘Aning ara, malye ati, pia dina kume,’ nyapdeipsuka ati, el kanye kum deilinamle bukni, aning boyanuka, ‘Allah el si erena ati arepnuneʼ tenen, kintiniplyopura, min yuma ara aning boyanuka, sik imam nang dam bobinamlule.

¹² Aning bobikcopura, imamnye birye, akam ning el nong ara, bita moubuka dipdenamlule. Dipdelirye, ‘Aning el dengna ara, aniʼ tenen, biklyopura, elce, “Dekna ning syikal, winibuka kintinibuka, Allah ati arepnululume,” nyapdeiplye touk, aninguk anggunce arenamlulume. Yuk ning ara, kume.

¹³ Bukni, akam ning boyanmalinye bira, elce teneplirye, ‘Akam ning ara, kum obuka arepnirye, tuba tamubuka dopropnamne,’ teneplyopura, adiparyuk imamnye birye, “El aning dengna ara, winibuka,” nyapmalnye ning ap, tonda tonap tabakuka, dua puluh persen (20 %) ton ap ati, imamnye biti arenamake.

¹⁴ Ura, aning mitik tonunuk, tonok-tonok nang arye, sik teleb una ati, sik ning ara, sikce talibuka domikirye ulamikce aik ati, ‘Allah el si erena ati, anyaik arepnune,’ teneplirye, arepnulye talak ara, imam nang arye anyaik dipdekirye, “Anyaik el dengna ara, winibuka ulule,” tenebikirye, nyabikcopura, akunuma. Sik imam nang arye nyabikce touk, ayupu kekenamlume. Ara, anyaik urasin teleb do, malye do, aning el dengna ara, anyabik touk unamlule. Tonda elce, “Aninguk. Allah el arena ati, dengna ning syikal winibuka arenamlume,” nyapdeiplye touk, aninguk arenamyake.

¹⁵ Bukni, ‘Na aik bobuka, Allah el si erena ati, arepnune,’ teneplinye birye, tuba tamubuka dipdelirye, ‘Kume, anyaik ara, naryuk tamubuka dopropnune,’ teneplyopura, imamnye birye, “Anyaik ara, el dengna winibuka ulule,” nyabuk touk, anyaik deiyoknye birye arenamlule. Tonda, adiparyuk duapuluh persen (20%) tonap tabakuka arenamle. Anyaik pununa ati, el dengna ning akunum areplyopura, min arye anyaik taleamuknye birye, anyaik tamubuka doproplirye, tonap talenamlule.

¹⁶ Aning atonun, tonok-tonok nang arye, sik apu yapu nang arye talilamik tuku, anang ati arebikceba, atuku talenamak deiyok nang arye, ‘Atuku ara, Allah el ‘Naʼ tenen ning upnamlule. ‘Allah el si erena ati arepnuyabe,’ tenebikirye, arebikce talak ara, awa tuku noutam yala koupnamaka nukdekirye, adengna atonun arenamnyake. Ara, awa tuku yala ning koupnamice touk, neika nukdekirye, “Ayala, el dekna ara, winibuka dekenamake,” nyabikcopura, aning atouk, arenamyake. Winipmanto ning ara, awa tuku noutam kouamikce ning, gandum duk el ikin ara, 182 liter yala kwapnamaka ati, el dengna ara, uang perak ara, lima puluh (50) syikal arenamyake.

¹⁷ Ura winipmanto ton, atalak ara, weik mambul keting tamun, ‘Tamubuka Arena Keting Tamunʼ, el si ton Yobel keting tamun noutam, ‘Atuku dobuka, Allah el si erena ati arepnune,’ tenebikcopura, arup nyapmanu touk, aning nirya uang perak 50 syikal arenamyake.

¹⁸ Bukni, weik mambul dikdik sen keting tamun, ‘Tamubuka Arena Keting Tamunʼ, el si ton Yobel keting tamun akunum upmalyeura, arye nukuka, mitik tonun otam keting tamun akunum uplyopura, winipnamake. Anye birye, ‘Awa atuku ara, Allah ati arepnune,’ teneplye talak arye nukikirye, doupnamle keting tamun nukulaminya ani, Yobel keting tamun upmalye talak akunum nukdeminyakarye, ‘E, keting tamun tonap winibuka upnin banmalya ani, Yobel keting tamun akunum upmale,’ tenebikcopura, danoutam upnin banamle keting tamun aupmalye touk, ‘Awa tuku, el dengna ara, ani,’ laka nyapnamake. Imam nang arye, aning akunum tenebikcopura, awa tuku el dengna ara, mitik tonun ton seklobikirye, ‘Tamubuka Arena Keting Tamunʼ, el si ton Yobel keting tamun doupnamla ati, anoutam upmalye keting tamun nukdekirye, aupmalye touk, dengna ning arenamyake.

¹⁹ Tonda, aminyan talak, awa tuku Allah ati areamlinye birye uteneplirye, ‘E, na wa tuku ara, Allah el ‘Naʼ tenen ning upnamaleʼ tenen, areamse bukni, wini talak ara, tuba tamubuka naryuk dekuka, dopropnamne,’ teneplyopura, awa tuku tamubuka dektu bukni, winipnamlule. Ara, imamnye birye, “Awa tuku ara, el dengna ara ani. Keil uang perak ara, winibuka arenamlyame,” nyaplye touk, anye birye, imam nyapdeiplye touk, nirya arepnamle. Bukni, tonap tabakuka, elce dua puluh persen (20%) ton arenamle. Aning nirya akunum punubuka areplyopura, el mince taleamuk wa tuku, deiyoknye birye tonap doproplirye, elcuk talenamle. Winiplyeura, el ning koproba akunum kipnamle.

²⁰ Bukni, minop talak awa tuku taleamuknye, elcuk awa tuku tamubuka kum dekamlirye, ton Allah ati kum areamuk bukni, ila tamubuka yuk nang ati, “Awa tuku deklulume,” nyablyeba, dekikcopura, akunuma. Awa tuku ara, min talak taleamuknye babye, atuku tamubuka kum dekenamle. Tonda, yuk nang babye, atuku kum deknamake.

²¹ Bukni, anyapmanu wa tuku ara, min talak taleamuknye birye, kum punubuka deklyopura, keting tamun upnin banmalya ani, 50 keting tamun akunum uplirye, ‘Tamubuka Arena Keting Tamunʼ, el si ton Yobel keting tamun akunum uplyopura, akunuma. ‘Tamubuka Arena Keting Tamunʼ, ara Yobel keting tamun akunum yanmala ati, awa tuku ara, bataknamake. Tuba tonap kum deknamtinge. Yobel keting tamun arye dipdongobuka, doyanamle talak nirya ara, awa tuku ara, Allah Yahweh el ninguk pia dotalak nirya ati upnamle. Ati ara, awa atuku ara, imam-imam nang arebikiba, sikce pia talinamake.

²² Ura, yuk ning ton nyapnune. Winipmanto ara, ninye tonok-tonok nang arye, wa tuku ton taleamikce bukni, atalak ara, sik apu yapu nang arye, kum areamaik. Atalak ara, yuk nang arye, “Atuku deksilyame,” nyabikura, dekikcak arye, talibikirye, daulamica ani, aminyan talak sik anang aryuk, ‘E, awa atuku ara, nun ni Allah, el ning koproba upnamla ati, el tibuk arepnuyabe,’ tenebiceura, winipnamanyake.

²³ ‘Allah el ‘Naʼ tenen ning ati, awa tuku arepnuyabe,’ tenebikce sum ara, imamnye birye, asum arye nukdelirye, ‘Doyanamle ‘Tamubuka Arena Keting Tamunʼ, el si ton Yobel keting tamun talak ara, ani. Keting tamun sirya akunum daknamle talak teneplyopura, “Awa tuku el pununa ati dengna ara ani,” nyapnamle. Imamnye birye, aning nirya nukdelirye, “Dengna ara, winibuka arepnulume,” nyaplyopura, aninguk deknamake. Asum deice aryuk, atuku deknulinye birye, asum aryuk arepnamle. Aning arebikcopura, atuku pununa ati arepnamle yo bok ara, Allah Yahweh, el ninguk upnamle.

²⁴ Winipnamak bukni, keting tamun lima puluh (50) Yobel keting tamun akunum yalyeba, awa tuku ati, tuba tamubuka aren talak akunum upmalya ati, adiparyuk awa tuku el babye, min deiyok koubuka, taleamuknye biti, tamubuka arenamyake. Ara, el apu yapu nang arye, awa tuku min talak arelamiknye, elcuk atuku tuba ton talinamle.

²⁵ Ura, Allah arena ati, yata dengna do nirya, aning nirya el dengna ara, Allah el si eren aik pil dona deiyok nang arye, “Dengna weik ning, el si perak ara, tonok syikal winibuka-winibuka arenamlyame,” nyapdeiamik ning atouk, kiklipdebuka, anggun Israel nang nirya arye, aning tenebuka nukmunce, arenamlume.

²⁶ Winida, yuk ning ton nyapnusine. Ara, anggun weilamlum kam ulye ning ara, mi minop deipmalye ning ara, Allah Yahweh el ninguk akunum ulule. Ati ara, sik min deibikce mapu ara, anggun Israel nang arye dobuka, ‘E, nun ni Allah, el si erena ati, el ‘Naʼ tenen ning talye aren ning ton delilbinuyabe,’ kum tenenamlume. Deiyok ara, sapi basam ap, domba basam ap, tonda kambing basam ap, mi winiryuk deipmalye ning nirya ara, Allah Yahweh, el ninguk akunum ulul ati nyapne.

²⁷ Bukni, yuk yala kam ulul ning ara, Allah arye, “Ayala ning ara, nati kum arenamnulume. Aning ati ara, na like ati, anggunda aning nirya, pia kum dinamlume. Ara meme. Ati aning ara, nati kum arenamnilume,” nyapdeipsuk ning ara, Allah arena ati, pia kum boyanganamlume. Bukni, kum dipmanto yala kam ning ara, min winiryuk deipmalye ning ara, ‘Na tuba tamubuka deknune,’ tenepmunyopura, imam-imam nang arye, aning bita moubuka dipdekirye, “Aning ara, el pununa ati, winibuka dekna ning, uang perak syikal arepmanto ning ara ani,” tenebikirye, nyalamaka deice arye dektume. Aning el pununa ati dengna ara, sik imam nang arye nyalamak atonun ap, tonda dua puluh persen (20%) ton, tonap tabakuka arepmunce, dekenamlume. Anggunce punubuka dektum bukni, anggunce, ‘Aning ara, kum deknuyabeʼ tenen, batakmunyeura, Allah el si eren aik pum tam arye, pil donyak nang, sik imam nang arye, akam ning doprobikirye, talye daunyak nang ati deknamake. Aning deknamak dengna ara, sik imam nang arye, “Aning ara, el dengna winibuka arenamlume,” nyamikce ninguk, arenamake.

²⁸ Winida, yuk ning ton nyapnusine. Winipmanto ara, yata nang do nirya, anggun weilulum kam ulye ning babye, sal babye, anggun apu yapu arye areamik wa tuku babye, talye yuk daulye bona ning babye, tonoknye ton el yuk, “Na talenun ning ton dobuka, Allah el si erena ap, el ‘Naʼ tenen ning ap ati, arepnuna ati, aning ara, oplopnirye, pia kum kipdeipnamne,’ teneplirye, kintinibuka arenamle ning ara, punupmunce, dekuka tuba tamubuka, pia kum dolonmalume. “Aning ara, akunum kum winipnamne,” nyabuka, nyalin yupu deice arye akunum nyalula ati nyapne. Aning ara, tuba tamubuka pia kum dekuka doproptume. Ara, “Allah Yahweh, el ‘Naʼ tenen ning ulula ati,” nyapsine. Aning nirya ara, el ning uka. Ati, aning nirya ara, pia mingne teleb lek ning atonun ulula ati, nyapne.

²⁹ Tonda, aning atonun ton, ninye arye malye weik ning winibiceba, sik wenena ati, ‘Allah arye wenepsilyakʼ tenen, ‘Anye bira, oplopnamabe. Anye obibyopura, elda Allah el ‘Naʼ tenen ning atonun unamlule,’ tenemunce, ninye kintinip deiplum ning ara, nati tuba tamubuka kum punubuka deknamlume. Aning ara, pia kume. Aning atonun nang ara, adiparyuk opmunyakarye, kum kilinamlume, dipnamlule. Anggunce anye biti, kum bataknamlum bukni, adiparyuk oplopnamlume.

³⁰ Ura, yuk ning ton nyapnusine. Anggunce talibuka ululum ning nirya ati ara, nukdemunce, ‘El dengna ara, ani,’ tenepmunyopura, aning ulye touk, adeice arye, sepuluh persen (10%) ton kintinipmunce, anggun ni koproba Allah ati arenamlume. Ara, tuku deice arye talibuka kounamlum yala yuk-yuk ning nirya ara, gandum babye, yo duk ayala-yala nirya babye, Allah Yahweh, el ning arena ati ara, sepuluh persen dobuka, tonap tabakuka arenamlume. Tonda, aning nirya ara, Allah Yahweh el ning koproba ulula ati, el aik noutamuk, kintinibuka delinamlume. Aning nirya ara, Allah Yahweh el mingne teleb lek ning atonun ulula atia.

³¹ Ninye tonok-tonok nang ton, tuba tenebikirye, ‘E, na talenun ning noutam arye, Allah arena ati, sepuluh persen (10%) kintinibuka deipse ning ara, punupnirye, tonap tamubuka dopropnamne,’ teneplinye ning ara, winipnamle. Anggunce aning, el dengna ulye touk nukikirye, lima persen (5%) tenebikirye, aning ap, sepuluh persen (10%) arebik ning ap, tabakikirye, Allah ati arenamake. Winipnamaka ati, “Aning, el dengna ara, winibuka arenamlume,” nyabuka, akunum nyapdeiamse touk, tabakuka, dua puluh persen (20%) ton arenamyake.

³² Ura, yuk ning ton nyapnusine. Anggunce talibuka weilamlum kam ning nirya ara, sapi basam do, domba basam do, kambing basam do, keledai basam do, ura, ayam maka do, aning nirya nukunmamunya ani, danoutam arye, toupne barye (9) nukmunce, aning ara anggun ninguk upnamle bukni, takubarye (10) ning ara, ‘Aning ara, Allah Yahweh el ‘Naʼ tenen ningʼ tenena ati, Allah ati arepnamlume. Ara, abasam nirya ara, basam weina deiyok nang nukikirye, sik kama talibikirye dam banmalye ning ara, sembilan (9) talye dabanmalye ning bukni, nukunmaca ani, sepuluh kiplye ning (10) ara, ‘Allah Yahweh el ‘Naʼ tenen ning, el ninguk ulule,’ tenena ati, aning dobuka, Allah ati arenamnyake. Aning ara, mingne teleb lek ning atonun upnamle.

³³ Tonda, akam ulye ning, anggun weilulum ning banmaceba, weina deiyok nang arye nukuce talak ara, yata nang do nirya ara, “Takubarye (10), sepuluh binmalye ning ara, teleb do, aning ara malye do?’ tenen, sikce kum wipnamnyake. Tonda, malnye ning babye, teleb ning babye, punulana ara pia kume. Bukni, punulana kintinibikca babye, teleb ning ap, malye ning ap, abitinye ning nirya ara, Allah Yahweh el ‘Naʼ tenen ninguk ulula atia. Aning areplinye birye, ‘E, sepuluh binmalye ning ara, tuba tamubuka punubuka deknirye, naryuk talenamne,’ tenena ara, pia meme nyapsine.

³⁴ Ura, asumkum sekuka deipsin yupu ara, “Ayupu nirya winibuka-winibuka wininamlume. Aning ara, wininamlume. Aning ara, pia kum wininamlume,” nyapdeibuk yupu nirya ara, Allah el si Yahweh, Sinai mutuku deice arye, Musa biti nyabukce arebuk. Ara, ‘Israel nang dam laka nyaplyeba, kekebuka talibikirye, aning pia talibuka wininamakeʼ tenen, Allah arye Musa biti ayupu nirya nyapdeibuke.