Imamat 26 - Eipomek

“Allah el amu tam namin asa ulamlinye biti, teleb ning arenamne,” nyabuk yupu

¹ Allah Yahweh arye nyabuk. Anggun taruk arye memebuka delin ning do, memen ning patung do, talye daulamle ning do, aning-aning nirya ati, ‘Aning ara, nun ni koproba ulirye, el aryuk kalekuka melinamsilʼ tenen, talye ning ati, si kum erenamlulume. Tonda, ‘Aning ara, nun ni koproba unamsilʼ tenen, talye aupmalye kam ning urasin atonun kibuka, anggun taruk arye, memebuka deipmunce, si kum erenamlulume. Aning atonun, keil arye do, yo arye do, cang ning ikuka deiplumce, aning dam binuka, si kum erenamlume. Tonda, talye daulamle ning urasin atonun memebuka deipmunce, ‘Aning melinamsilʼ tenen, aning ati, si pia kum erenamlulume. Ara talye ati kume. Deiyok ara, nara Allah Yahweh unirye, anggun ni koproba Allah, na tonok unune. Yuk Allah ton pia kum ulule.

² Tonda, narye anggunti, “Sabat sum deice arye, talye pil dona kum aryuk, dikdik sepmunce, na siuk eren sum aunamle. Ati ara, Sabat sum deice ara, aning aryuk wininamlulume,” nyapdeipsise sum ara, mambul weik sum ati, asum ara, pia moubuka tenenamlulume. Ara, talye pil dona kum aryuk, dikdik sena ati, Sabat sum ap, tonda na Allah si erena ati, yuk wibuka Pia Teleb Lek Aik, kintinip deipnulumak ap ara, natibuk, si erepnumunce, kinamnululume. Nara, Allah Yahweh ununa ati, ayupu nyapdeipsine.

³ Anggun tuba kam unamlum talak nirya ara, narye, “Aning ara, winibuka, winibuka wininamlume. Aning ara, pia kum wininamlume,” nyapdeipsise yupu nirya ara, batakna pia kumce, pia moubuka talinamlulume. Narye, anggunti, “Anggun teleb una ati, teleb wininamlum ning ara, ani. Pia kum wininamlum ning ara, ani,” nyapdeipsise yupu nirya ara, batakna pia kum aryuk, pia moubuka talepmunce, winimunyeura, pia teleb kilinamsine. Narye melinamsin ning ara, ani.

⁴ Tonok ning ara, narye, ‘Mok cen wala ani,’ tenelamse talak ati, mok aren talak akunum uplyopura, mok arepsinyeba cenamle. Winipniba, mok ceplya deice arye, tuku deice arye, talibuka kounamlum ning, yuk yala nirya ara, tuku namin kibuka, pia weik tonun teleb kibuka panamle. Winiplyopura, yo duk ayala-yala weik tonun mounamsile. Aning nirya ara, pia telebuk unamle.

⁵ Aning-aning nirya ati, pia teleb kibuka melipsinya deice arye, anggun gandum wa wibuka kounamlum ning nirya, pia weik tonun palirye, nong ubuka wisiplyeura, mouplirye, lipmunce, gandum duk dakna ati, yo kwarya arye daknamlum pil, min kum sirya dakmunyopura, anggun anggur tapu duk weik tonun mounamle. Weik tonun melibuka kalikinamsina deice arye, wa wibuka min koupnin balamun buk, minop wisiplirye, duk dakan talak kinamle. Tonda, anggur tapu duk wisipliba, dadakmunce, anggur duk min dakuka, kum purupmamunye talak aryuk, tuba tonap gandum duk ton kounamlume. Gandum duk yuma minop wisiplirye, lin talak upliba, linamlume. Aning atonun, minop wisipliba dakanamlum talak aryuk, anggun anggur tapu duk babye, minop wisipnin banamle. Ati, wa wibuka yala kounyak talak babye, duk moun talak babye, wa ning nirya lin talak babye, ouku una kumce, minop wisinin banamsile. Apia teleb kilinamsil deice arye, anggun mutuku noutam ara, din ning pia weik usilirye, weik tonun dipmunce, bounamsile. Tonda, narye melibuka kalekisinya deice arye, anggun mal olan nang, yuk mutuku yu nang ara, anggun dam kum yanganamake. Anggun mutuku noutam ara, mal olana kum aryuk, kanye deibuka, pia telebuk unamlume.

⁶ Anggun unamlum mutuku nirya ara, narye melibuka kaleksiniba, pia telebuk unamlume. Amutuku noutam, pia teleb kibuka umunce, talye mangkau asa manamlume. ‘Se, yata ning arye do, yata mutuku nang arye, yanuka opnusiak do?’ tenen, ilil pia kum unamsile. Tonda, yuk talye bai tam yu ulamlye kam ning ara, ninye opmanto kum ulye ning nirya ara, bai basam do, yu kwatima do, yu weik kuse harimau do, aning nirya ara, anggun mutuku noutam arye dopropnirye, kum kipdeipniba, anggun dam kum olyanamsile. Aning atonun, naryuk melibuka kaleksiniba, yuk mutuku yu nang nirya arye, parang ya donogobikirye, ‘Sik Israel nang opnuyapʼ tenen, anggun mutuku noutam kum olyanganamsiake. Narye kaleksiniba, mal olan nang ton pia kum olyanamsiake.

⁷ Tonda, anggun mal olan nang yanuka opsikce talak ara, anggun Israel nang ara, ilil una kumce, mikip weik umunce, sik yu nang ati, yupa weik ubikca babye, anggun parang ya dobuka, obuka sirya dakmunce, malye kipnamlume. Sik yu nang ara, weik tonun oplopnamlume. Ton nang ara, ilil weik uplye ati, bikbik abuka bai sakuka bendopnamake.

⁸ Winipmanto ning ara, winibuka unamlum talak ara, anggun Israel yin talen nang pamubarye nanguk, anggun mal olan nang, seratus nang ati obuka, sirya daknamlume. Tonda, anggun Israel yin talen nang seratus nang arye, anggun mal olan nang ati, ninye yupa pia weik, sepuluh ribu (10,000) nang obuka, sirya daknamlume. Ara, sik parang ya dobuka, obuka sirya dakmumce, malye-malye kipmamunya deice arye, sik yuk mutuku yu nang ara, weik tonun oplopnamlume.

⁹ Na Allah ara, anggun damuk bico tenesinirye, anggun dam unamsina ati, narye anggunti melinamsine. Meliamsinya deice arye, anggun mapu babye, weik tonun arenamsine. Ara, anggunce deipmunba, dadeidanen, banamak mapu nirya ara, pia weik unamake. Tonda, narye, “Winibuka unamlume. Winipmunyopura, narye dipkoprob aning ton, aning ton winipnamsine,” nyalin yupu deice nyapdeipsise yupu ara, aning nirya dipkoprob melibuka winipnin banamsine.

¹⁰ Tonda, anggunce tuku deice arye talibuka, wa wibuka kounamlum ning yala-yala nirya ara, weik tonun arenamsine. Winibuka arepsinyeba, pia weik tonun lipmunce, weik tonun dinamlum bukni, pia weik, kum nukmanto linamluma ati, ton ning ara, na dokola din delin aik ton, weik tonun delinamlume. Winipnin balamunya ani, aminyan talak, wa wibuka kouamunya ani, duk moupnin banamle ning ara, keting tamun noutam nirya ara, pia ouku weik kipnin banamlula ati, minop talak, ‘Naʼ tenen, dokola deiamlum ning ara, min kum dipmamunye buk, aning dobuka, talye donokmunce, winiryuk ning ton, punubuka delinamlume.

¹¹ Tonda, na Allah ara, anggun unamluma kan-kan uk unamne. Ara, anggunce na si eren aik dopnamnulum noutamuk unamne. Anggun ap neika unamabe. Ati, narye anggun Israel nang nirya ati ara, ‘Anang ara, na likeʼ tenen, pia kum batakanamsine. Bico tenebuka melinamsine.

¹² Winilamsinya deice arye, nara anggun unamluma kan-kan noutamuk unirye melinamsine. Nara, anggun ni koproba Allah unamne. Anggunda, na mapu koproba, ‘Naʼ tenen nanguk unamnulume.

¹³ Nara, Allah Yahweh, anggun ni koproba Allah unune. Anggunda, Mesir mutuku noutam ulamlum talak nirya ara, sik amu tamuk ulamlume. Sik Mesir mutuku nang arye, ikin ning weik, anggun nong deice delilamikba, anggun talye pil don nanguk ulamlume. Bukni, narye anggunti, lyebukapsinirye, dobuka boyanamsise. Ati anggunda, tuba tamubuka, Mesir mutuku nang, sik talye pil melin nang ton, kum unamlume. Tonda, Mesir mutuku taleamsik nang arye, anggun Israel nang ati, ‘Sikda talye nang ati dauaplye,’ tenebuka, ikin ning deililamsuk ning ara, narye akunum malye kibuka, kum kipdeipsa ati, anggunce, ‘Seʼ tenen, kisok kanupdongobuka, kum banamlume. Wini talak arye dipdongobuka, doupnamle talak ara, anggunda kanye deibuka, telebuk unamlume. Allah arye Israel nang ati, nyabuk.

Allah arye, “Winibuka, winibuka wininamlume,” nyabuk yupu kekebuka, kum winilulnye biti, “Wenebuka opnamne,” nyabuk yupu

¹⁴ Allah Yahweh arye, sik Israel nang ati nyabuk. Narye, anggunti, “Aning ara, wininamlume. Aning ara, pia kum wininamlume,” nyapdeipsise yupu, anggunce ayupu moubuka kum kekepnumunce, kum talibuka winipmunyopura, wenepnamsine.

¹⁵ Tonda, narye anggunti, “Aning ara, winipnamlume,” nyapdeipsise yupu ap, “Aning, aninguk, teleb kibuka wininamlume,” nyapsise yupu ap, kum talipmunce, narye, “Winibuka, winibuka, wininamlume,” nyapdeipse ning nirya ati, ‘Nun like,’ tenepmunce, na yupu yanibuka, malye kipmunyopura, dipkoprob wenepnamsine. Aning atonun, narye, “Wininamlume. Winipmunyopura, narye anggunti, winibuka melinamsine,” nyalin yupu deice nyapsise yupu ton, kekena kum arye, ayupu ati yaniplopmunyopura, dipkoprob wenepnamsine.

¹⁶ Narye anggunti, “Wenenamsine,” nyapmasina ara, talye ati kum nyapmane. Ara, narye anggun wenena ati, anggun dam ara, kanye imun weik ning arepsinyopura, ilil pia weik unamsile. Ara, anggun nong nirya, buppu kibuka talin nakina uk, el si malaria ap, tonda ilong talibuka ngosokne talin ning ap, arepnamsine. Arepsinyopura, auk dilamsiliba, pia min kum lopnamsile. Winibuka disilyeura, anggun asing kuna deiyok uk ton dilamlya ani, asing malye kupnamsile. Tonda, bol malye bopmunye, uk dilamsilya ani, anggun nong nirya mitang upsilyopura, dibinauk unamlume. Tonda, anggun wenena ati, ikin ning ton, anggun dam deipnyopura, anggun wa wiplumce, ‘Din ning kouplum ning nirya ara, nong uplyeba, din dipnamapʼ tenen, wa wipmunce, kounamlum bukni, ‘Din ning yuk-yuk ning nirya ara, nong upliba dinamapʼ tenen, wa wipmunce kounamlum bukni, din ning nong ara dipkoprob libuka kum dinamlume. Deiyok ara, yuk mutuku yu nang, anggun mal olan nang yakirye, anggunti yanuka, obuka sirya daksikirye, anggun wa wibuka yala kouamunye ning nirya ara, libuka sirya dakdopnamsiake. Anggun mal olan nang aryuk, aning nirya libuka dinamake.

¹⁷ Aning atonun, narye anggunti ‘Anang ara, na like,’ tenepnirye, anggun wenena ati winipnamsine. Anggun mal olan nang dobuka deipneba yakirye, yanuka obukapsikirye, sirya daksikirye, sikcuk yanuka talipsikiba, unamlume. Tonda, anang ara, anggunti, ‘Nun like,’ tenesinyak nang aryuk, talinamsiake. Sikce, anggun kan-kan ton nang ara, obuka sirya dakicak arye, oplobikceba dipnamake. Ton nang ati, obuka sirya dakicak arye, talipsikcopura, sik amu tamuk, ikin kanye bobuka unamlume. Anggun Israel nang arye, ayu mal olan nang ati, ilil usilirye, anggun mutuku batakmunce, bai sakuka bindopnalume. Tonda, ilil weik upnamsila ati, yuk talak ara, yu nang arye kum dobonmasice babye, anggun kanye aryuk, ‘Se olyanganamsiak do?’ tenen, ilil upsiliba, bai sakuka bikbik abuka bindopnalume.

¹⁸ Ura, narye anggun malye una ati, wenen ning nirya arebuka, winipdesinye buk, anggunce talima namin kibuka, na dam tamubuka kum umunyeura, narye yuk wenen ning, tonap tabakuka arenamsine. Ara, like tekbarye (7) kibuka, tuba tonap aninguk tabakuka arenamsine. Ara, tujuh kali lipat deice arye wenen ning ton arenamsine. Deiyok ara, anggun malye winimunye ning dekna wininamsina atia.

¹⁹ Anggunda, ‘Nunda, teleb weik nanguk unyabe. Allah el amu tam kum unamabe,’ tenebuka, pia kwalibuka erelalum bukni, narye anggun wenena ati, weik ikin ning ara, anggun nong deice deipsinyopura, malye kanye bobuka, ikin asa uk unamlume. Ara, narye anggunti, winibuka wenepsinyeura, adeice arye, na Allah ati biknamnulume. Ura, besi ning kum bulakmanto ulye touk, narye na kanye yuk kum tenenamne. Anggun wenena ati, ‘Mok ton pia kum cenamleʼ tenen, yupu sekdongobniba, mok pia kum cenamle. Winipnyeura, tuku nirya kelkelaplirye, atuku nirya ara, pia katauk uplyeba, yala ton, pia koupmanto kum unamle. Ara, kat ning el si tembaga atonun, anggun tuku babye, pia kat unamle.

²⁰ Winipnyopura, anggun mikip aryuk, pil domunce, wa wibuka koulenamlum bukni, anggun pil talyeuk donamlume. Ati ara, anggunce wa wibuka kounamlum tuku noutam nirya ara, teleb kibuka, nong ton pia kum unamsile. Aning atonun ton, yo duk moulamle yo yala yuk-yuk ning nirya babye, papnamle bukni, duk ton pia kum mounamle. Yo duk yuk-yuk ning nirya, kum libuka dinamlume.

²¹ Winipsinyopura, teleb ning ara, anggunce, ‘Se, nun malye wininyap ning ara, batakibirye, Allah el amu tam ton unamabe. Elce nyapdeipsuk yupu moubuka kekenamabe,’ teneptum bukni, kum kekepmunyopura, weik tonun tonap wenenamsine. Ara, anggunce, na nyapsise yupu tuba yupu kekebuka, namin arye kum umunce, na yupu yaniplobuka, malyeuk winimunyopura, aning dekna ati, weik wenena ning tonap tabakuka, tujuh kali lipat arye, tuba-tuba ikin ning arenamsine.

²² Na Allah arye, bai tam pia yu ulamle ning, kam ning nirya dobuka deipneba, anggun dam olyanganamsiake. Aning boyakirye, anggun mapu weika tonun, yanuka obuka sirya daknamsiake. Tonda, anggunce talibuka weinamlum ning ayala-yala nirya, yanuka obuka sirya dakanamsiake. Atonun, anggun wisi nang babye onamsiake. Winipsikce bukni, ninye weik dibikcopura, anggun yupa ara, mitik tonunuk unamlume. Ninye weik dibikceba, kum danin bacopura, anggun unamlum mutuku nirya babye, anggun banalun bisik babye, dipdemunyeba, talye louk uplyeba, banmamunce eipmunba, yuk-yuk ning kum dalya arye, amutuku nirya ara, din bulanguk, walang yo uk unalume.

²³ Narye, aning nirya akunum wenebuka asipdesinye buk, anggunce tuba kum kekepnulumce, mandipna kanye tuba bopmunce, nati tuba malyeuk winimunyopura, tonda nati, ‘Elda nun like,’ tenepnumunce, na yupu tuba yanipnumunyopura, narye anggunti wenenamsine.

²⁴ Anggunce, ‘Allah ara, nun like,’ tenepnulumyakarye, tuba malyeuk wininelumnyopura, na Allah arye anggunti, ‘Anang ara, na like,’ tenebuka wenenamsine. Narye wenepsinyakarye, ikin weik ning arye, anggun nong deice deipnamsine. Ara, otalak wenen nang ara, mitik tonun atonun ulamuk bukni, wini talak wenepnamsin nang ara, tekbarye kibuka tabakuka wenenamsine. Ara, tujuh kali lipat nyalamak atonun, adeice arye, pia weik kanye imun ning tonap tuba arenamsine. Ara, anggun malye winimunye ning dekna ati, wininamsine.

²⁵ Wininamsin ning ara, ani. Ara, narye mal olana deiyok nang dopdeipsiniba, sik parang ya dobukabikirye, anggun dam olyanganamsiake. Narye anggunti, wenenamsina deiyok ning ara, ani. Ara, narye anggunti, “Aning ara, wininamlume. Aning winiplumyopura, narye aning ton teleb kilinamsine,” nyabuka, nyalin yupu akunum nyapdeipsise. Bukni, ayupu tuba-tuba yanimunya atia. Tonda, anggunce, ‘Se, Allah arye wenepsilyakʼ tenen, anggun mutuku binuka, anggun weik asik dana-dana tam, keil poka noutam aryuk, bulubuka unmunce, ‘Asukum ara, elce kum opsutuʼ tenen, unamluma babye, narye anggun dam ara, imun kanye bona weik ning ton, arepsinyeba, anggun kan-kan, uk weik anun talinamsile. Ara, uk ayala-yala nirya ap, suse ap arepsinyeba, auk nirya ara, kwetepmanto kum unamsile. Tonda, nati tuba malye kanye bopnulumakarye, mandipna kanye deiplumnyopura, anggun mal olan nang ton dopdeipnyeba, anggun damuk mal olyanganamsiake. Obuka sirya daksikirye, tapu koupsiceura, anggun pera mutuku bobinamsiyake.

²⁶ Tonda, anggun din ning pana deiyok ning nirya ara, kum kilinamsine. Winipnyopura, anggun din ning, pia mitika aryuk uplyeura, anggun mutuku kilapu takubarye, kilapu arye, ‘Roti kwaning din ning dapnuyapʼ tenen, pataplyeura, roti bun ning ara, mitika aryuk upnamla ati, roti dana tonok aryuk danamake. Aroti kwaning danmaca ani, akunum dabuka deibikcopura, ‘Ninye nong ikin ulamlye touk, roti kwaning ning ton, dobuka arebibyeura, dinamakʼ tenen, ninye nong ton ikin ati, dipdekirye, din ning bokuka arelenmake. Winipdenamak bukni, timbangan arye kiklibiceba, auplye touk bokuka arebikce babye, din ning mitikuk upmalya ati, din ning kum bounamsile. Din patanauk unamsile.

²⁷ Ura, awenen ning nirya, anggun dam arelamsinye bukni, anggunce aning nirya bikina kumce, ‘Allah ara, nun likeʼ tenen, na Allah ati, malye tuba kibuka, na yupu yaniplobuka, na yupu moubuka kum kekemunce, kum talepmunyopura, tuba tonap tabakuka wenenamsine.

²⁸ Winimunyopura, aning dekna ati, narye weik tonun wasinerye, wenebuka ikin weik ning, anggun nong deice deipnamsine. Ara, anggun malye winimunye ning dekna ati, tekbarye deice arye wenepnamsine. Ara, ‘Tujuh kali lipat deice arye,’ nyalamak atonun, pia weik kanye imun ning, weika arye arenamsine. Ara, ikin ning min talak yambul anun areamsise ning atonun kum bukni, aminyan ning ara, pia weik imun kanye bonuk, na Allah aryuk, kanye imun weik ning, na Allah aryuk arepnamsine.

²⁹ Ara, anggun unamlum mutuku nirya ara, din ning yala-yala nirya, kum kipdeipnyopura, din patana pia weik unamsile. Din patalamsilya deice arye, anggun mening deiamunye mapu opmunyakarye, sik nong dinamlume. Ara, anggunce deiamunye mapu babye, kilmapu babye, obuka dinamlume.

³⁰ Aning atonun, anggunce mutuku kon deice memebuka deiplumce, anggun ning nirya bobuka, mutuku kon deipmunce, isa si erena ati, uku dongolulumak nirya ara, narye uluplopnamne. Tonda, isa si erena ati, kin-kin tong ning dobuka, uku dongolbalamlumak nirya ara, dakuka uluplopnirye, kum kipdeipnamne. Winipnyeura, isa si erena ati, weilbalamlum ning, anggun si eren ning nirya ara, sik nong nirya dakukapnirye, donoknamne. Anggun ton oplopsinyeba, dipmunyopura, anggun nong dopropnirye, anggun talye ning si erelulum ning ap, isa si erena ati, memebuka delilulum ning, el si patung ap, dakukapnirye, adeiceuk, anggun nong dobuka, adeice deiplopnamsine. Na kanye talima noutam ara, pia malye weik winilulumba, na lik unulule ati, dukmanto kanye unirye, aning nirya ati ara, ‘Anang ap, aning ap nirya ara, na like,’ tenenune.

³¹ Tonda, anggun umunye asik, kota noutam nirya, anggun aik weik domluma nirya ara, narye malye kibuka uluplopnirye, kum kipniba, talye louk kipdeipnamne. Anggunce, teleb sukum teneplumce, domba basam ato ning opmunyakarye, isa si erena ati, arelulumak nirya ara, narye daklopnamne. Tonda, na si erena ati, arelyanganamnulum ning nirya ara, arepnutuma babye, narye siltong kum kekenirye, dipkoprob kanye deibuka, kum dolonamsine. Aning ara, batakniba, talye daupnamle.

³² Aninguk kum bukni, anggun unamlum mutuku nirya ara, naryuk pia malye kipdeipnamne. Awinipnyeba, aminyan talak, anggun mal olan nang arye, ‘Israel nang obuka sirya daknamapʼ tenen, anggun mening dam yacopura, narye anggun mutuku malye kipdeipnamsinak ara, eibikirye, ‘Se, amutuku ara, pia malye akunum upmale. Yata deiyok ati, upmal do?’ tenen, mambul kanye bobikirye, ‘Se, nun like,’ tenebuka lukuldanamake.

³³ Aninguk kum bukni, anggun Israel nang arye, nati, ‘Elda nun like ati, elce nyapdeipsuk yupu ara, kum kekebuka talinamabe,’ teneplumce, na yupu tuba yaniplopnumunyopura, na Allah arye, anggun unamlum mutuku nirya ara, olana deiyok ning arepnyeba, yuk mutuku yu weik yin talen nang arye, sik parang ya ap, olan ning nirya ap bobikirye, anggun dam yanuka, obuka sirya daknamsiake. Obuka sirya daksikirye, anggun nirya tapu koupsikirye, anggun babye, pera mutuku bobinamsiake. Aning winipsikcopura, yuk pera lo mutuku yu nang arye, anggun Israel nang ara, dana-dana tam mutuku bobinamsiake. Atalak noutam ara, tonok mutuku ak, kum unamlume. Dipkoprob, malye kanye bonamlume. Malye kanye bopmunce, yuk mutuku ninye asik nang ulamak touk unamlum talak ara, anggun wa windam nirya babye, malye kipdeipnamsine. Tonda, anggun unamlum asik, weik kota mutuku nirya ara, batakmunyeba, talye louk uplyeura, dimbulanguk, walang yo uk upnamle ati, nyapsine.

³⁴ Anggun wenena ati, aning-aning nirya akunum winipsinyopura, anggunda yuk mutuku yu nang arye, tapu koupsikirye bobuka, sik mutuku ak delilbisikceba, amutuku unamlume. Daunamluma ati, anggun mal olan nang aryuk, talipsikiba, sik mutuku unamlum talak ara, anggun mutuku koproba, anggun min talak ulamlum mutuku ton, talye daunamle. Atalak ara, anggun mince talyalum mutuku, pil dona kumce, dikdik senauk unamlule. Amutuku taleamlum talak ara, narye, “Amutuku nirya ara, pil dona kumce, dikdik sena una ati, keting tamun ton arenamlume,” nyapdeipsise touk, dikdik semunce, keting tamun arelamtum toura, akunum teleb kiamtu bukni, aning kum winilamluma ati, yuk pera lo mutuku bobinuka deipsikiba, daunamlum talak ara, anggun mutuku ati, lo ton arenamne. Amutuku ara, dikdik sena atonun, talye daunamle.

³⁵ Ati, anggun min talak taleamlum mutuku nirya ara, dikdik sena atonun talye daunamle. Anggunda, amutuku talibuka ulamlum talak nirya ara, Sabat sum deice dikdik sena atonun, keting tamun kum arelamluma ati, amutuku deice ara, wa wina ap, yala kouna ap, pana ap, dola wena ap, lina ap, pia winilamlume. Ati, wenen ning, anggun deice deipsinyopura, yuk pera mutuku bobisikiba, daunamlum talak nirya ara, anggun mutuku dikdik sena atonun talye daunamle.

³⁶ Sik yuk mutuku nang, yu weik yin talen nang arye, anggun Israel nang weika tonun opnamsiak bukni, ton nang ara, mitik tonun aryuk batakikiba, kam tuba unamake. Kam tuba unamlum nang ara, yuk mutuku nang arye, sik mutuku delilbisikceba, daunamlum talak ara, anggun ap neika unamlum nang nirya ati, ilil deiyok ning ton, arepsinyopura, anggunda pia ilil weik unamsile. Winibuka daulamunye buk, narye kumanya mikip weik ning arepnyeba, pu aplirye, lelim weik nyalirye, yo nirya lokukaplirye, yo bok ton saklya deice arye, lelim mitik tonun aryuk nyapnamle deice arye, anang nirya kekebikirye, ‘Se, yu nang arye, parang ya bobuka olyanmasiak do?’ tenen, ilil weik upsilyeba, anggun bikbik abuka bendopnamlume. Winipmanto ara, ninye arye olanukce talak, bikbik abuka perak balolamak atonun, upnamlume. ‘Bikbik abuka balamunyak ton, sakmunyopura, nun mal olan nang arye opnusiak do?’ tenebuka, ilil kum unamsile. Ara, anggun mal olan nang ton, dam kum dobolbanmasiki bukni, ilil weik upsilyeba, bikbik abuka banamlume.

³⁷ Ara, ninye sik olalamikak arye, kum dobolbisikce buk, anggun dem bikbik abuka bamunyakarye, ‘Parang ya arye opnusiak do?’ tenen, tonye deice, tonye deice kwepdanalume. Tonda atalak ara, anggun mikip kum unamla ati, anggun mal olan nang ati, kum obuka sirya daknamlume. Atalak ara, anggun mal olan nang arye, anggun biti, obuka sirya daknamsiak bukni, anggun ara, mitanguk unamlume.

³⁸ Anggun nirya ara, yuk mutuku delilbinamsikceba, daunamlumak dinamlume. Tonda, anggun mal olan nang unyak mutuku nirya arye, obuka sirya daksikirye, kum kipdeipnamsiake. Anggun mal olan nang unyak mutuku noutam ara, kum kam unamlume.

³⁹ Winibuka obiceura, mitik tonun kam tuba unamlum nang ara, anggun mal olan nang kan-kanuk umunce, malye kanye bobuka unamlume. Aunamluma deiyok ara, anggunce babye, malye winilamlum ning ap, anggun apu yapu nang ap, punun nang ap ton, malye winilamikce ning ap, adeice arye, ikin ning weik, anggun nong deice yanuka upsilyopura, malye kanye bobuka, malye unamlume. Kanye teleb bobuka, kum unamlume.

⁴⁰ Ura, anggun malye-malyeuk ulamlum ara, arup nyapmakin ning atonun, ikin ning weik, anggun wenena ati wininamsine. Winibuka wenepsinyeura, daulamunya ani, doyanamle talak aning nirya tamubuka, tonap moubuka tenenalume. Ara, sik punun deiyok nang, sik minop talak ulamik nang arye, malye winilamik ning ap, sik anang arye delilamikce, dadeipdanin yangalamik nang ap arye, malye winilamik ning ap, ura, anggun anoutam talak babye, malye wininmalum ning ap ati, ‘Se, nun nirya ara, dipkoprob pia malye weik tonun winilamupu ati, wini talak ara, nun ni koproba Allah bikeipsilirye, nun malye winin ning nirya kum kipdeipsutue,’ tenenamlume. Tonda, aning atonun tenelamlum ning ara, anggunce na yupu yanibuka, mandipna kanye deibuka ulamlum ning ap, anggunce, ‘Kume, Allah ara, nun like,’ tenelamlum ning ap nirya ara, lak sukum arye laka nyanamlume. Aning nirya, tamubuka tenebuka bikinamlume.

⁴¹ Tonda, anggun ap, anggun apu yapu nang ap, punun deiyok nang ap, malye weik winilamlumba, narye min talak ulamik nang ap, anggun wini talak ululum nang nirya ap, anggun wenena ati, lo arepsinyeba, yuk pera mutuku yu nang arye, malye kipsikirye, dobuka yuk pera mutuku delilbinamsiake. Winilamsikiba, sik mal olan nang ulamik mutuku ak daulamik. Winilamika ati, anggun apu yapu nirya ati, sikce deiamikba, dadeipdanin banamak nang nirya ara, atonun malye winina ap, na yupu malye kina ap, aninguk winilamik. Yuk pera mutuku ak daulamikce buk, aminyan talak ara, anang arye sik malye winilamik ning ap, na Allah arye nyapdeiamse yupu yanibuka, mandipna kanye bobuka ulamikce ning nirya ap, tamubuka tenebikirye, ‘Se, nunda dipkoprob malye winilamupu,’ tenebikirye, ‘Winida diksukum kibuka, wininamapʼ tenebikirye, ‘Winida moubuka unamapcaʼ tenen, na si erebikceura, narye ton, tamubuka tenenamsine.

⁴² Sik malye-malye weik ulamik nang arye, kanye talima mitang arye ukirye, ‘Se, nun dipkoprob malye winilamupu,’ tenebikirye, nati moropnikcopura, narye ton tamubuka tenenamsine. Ara, na Allah arye, “Winibuka unamlulume. Winipmunyopura, narye ton anggun melina ati, aning wininamsine,” nyabuka, nyalin yupu nyapdeiamsirye, “Winipnamsine,” nyapdeiamse ning ara, tuba tenenamsine. Ara, anggun apu yapu, sik si Abraham ap, Isak ap, Yakub ap ati, nyapdeiamse nyalin yupu ati nyapsine. Tonda, na Allah arye, “Anyapsin mutuku arepnamsine,” nyapdeiamse mutuku ara, tuba tenenamnarya. Kanye talima mitang asa ubikirye, nati teleb kibuka, moropnikcopura, narye arenamsise mutuku nirya, anggun wenena ati, malye kipdeipse mutuku nirya ara, tonap tenepnirye, teleb kipdeipnamnarya.

⁴³ Deiyok ara, na mapu, na ‘Naʼ tenen nang nirya ara, narye nyapdeipse yupu nirya ara, moubuka kum kekelamikirye, yanilamikce, malye winilamik ning ap, narye, “Aning talipmunyakarye, winibuka unamlulume,” nyapdeipse ning ara, sikce, ‘Kume, ayupu nirya ara, nun like. Aning kum wininamabe,’ tenelamik ning ap ati ara, ikin ning, sik nong deice delilamikce, sik taleamik mutuku dobuka, yuk mutuku nang ati areamse. Winipsa ati, amutuku nirya ara, Sabat sum deice, dikdik sena atonun unamle. Anggun apu yapu arye, amutuku nirya taleamik talak noutam ara, Sabat sum deice, dikdik sena atonun una ati, keting tamun ton, kum arelamik ati, wini talak ara, yuk mutuku nang arye, sik biti obuka, sirya dakikce, yuk pera mutuku delilbalamikba, yuk pera mutuku noutamuk unyaka ati, atalak ara, narye arenamsise mutuku ara, dikdik sena atonun keting tamun una ati, talye louk upnamle. Talya daunamle. Israel nang, sik malye winilamikce ning dekna ati ara, yuk pera mutuku noutam unamake. Atalak ara, malye kanye bobikirye, nati, “Naio melibuka lyepsilyame,” nyabuka, moropnamniak do, kum do, dinauk unamne.

⁴⁴ Ura, sik malye weik winilamik ning ati ara, wenen ning arepnamsin bukni, sik mal olan nang unyak mutuku noutam unamak talak ara, pia kum bataknamsine. ‘Sik Israel yala nang nirya ara, na mapu unyaka ati, anang ara, na pia like. Sik ti, pia batakne,’ tenebuka kum nyanamne. Tonda, sik Israel nang nirya ati ara, kum oplopniba, min kum dipnin banamake. Sikda, na mapu koproba tuba unyaka ati, sik mal olan nang mutuku tuba unamak talak nirya ara, narye sikti, “Aning wininamlume. Winimunyopura, narye aning ton winipnamsine,” nyalin yupu nyapsise ning ara, pia, kum bataknamne. Ara, narye nyalin yupu nyapdeiamse ning ara, min kum danamle. Aning ara, kum yaniptapnamne. Nara, Allah Yahweh, anggun ni koproba Allah unirye nyapsine.

⁴⁵ Sikda pia kum bataknamne bukni, na minop talak arye, sik apu yapu nang ati, sik dam arye, “Aning ara, wininamlume. Winipmunyeba, narye winibuka arepnamsine,” nyalin yupu nyapdeiamse ning ara, tamubuka teleb kipdeipnamne. Tonda, ‘Na pia mikip weik biknamakʼ tenen, min talak Mesir mutuku ulamik nang arye, ikin pil dobuka, sik nong deice delilamikba, ikin weik ulamika ani, narye lyebukapsirye, bobuka yanamse. Winipsa deiyok ara, ‘Tukwak nang, im sirya, mutuku sirya nirya, aning eipnikirye, biknamniaka atia. Tonda, ‘Nara Allah Yahweh, Israel nang anggun ni koproba Allah ununeʼ tenen, apil dolamse. Ura, nara Allah Yahweh unirye, ayupu nyapmasine. Ayupu nirya ara, Allah Yahweh arye, Israel nang ati nyabuk.

⁴⁶ Adeice tam sekuka deibupu yupu nirya ara, Allah el si Yahweh arye, “Aning ara, wininamlume. Aning ara, pia kum wininamlume,” nyapdeibuk yupu ap, tonda, “Teleb winina ara ani, malye winina ara, ani,” nyan yupu ap nirya ara, Sinai mutuku deice arye, Musa biti ayupu nyabuk. Musa biti ayupu arebukura, Musa birye Israel nang nirya ati, “Winibuka winilnamlulume,” nyabuka, laka nyalamukba, kekebuka ulamik.