Imamat 25 - Eipomek

‘Keting tamun tekbarye kiplyeura, winibuka wininamake,’ nyabuk yupu

¹ Allah Yahweh arye, Musa biti, Sinai mutuku deice arye, ayupu nyapdeibuk.

² Anyapdeipkince, “Winibuka-winibuka wininamlume,” nyapne yupu ara, Musa ance, Israel nang ati, ‘Allah arye nyapdeipmasile,’ nyapnulyame. Nyabukopura, ayupu tonap nyabuk. Allah Yahweh arye, aminyan talak arepnamsil mutuku noutam binuka wekmunce, dopropnamlum talak ara, Allah Yahweh el si erebuka kina ati, wininamlume. Amutuku unamlum talak nirya ara, Allah atibuk, el si eremunyakarye, ‘Pia telebe,’ nyabuka, el si erenamlume. Tonda, keting tamun tekbarye kunum kiplye talak nirya ara, anggunce wa wina ap, wa wibuka yala ton kouna ap, pia kum wininamlume.

³ Keting tamun nakub barye (6) noutam unamlum talak nirya ara, wa wibuka yala kounamlulume. Tonda, anggun anggur tapu duk wa wina ati, yo marikdeipmunyakarye, winamlulume. Anggun amutuku tuku arye wa wipmunyeba, nong upnamle ning nirya ara, nakub barye keting tamun noutam arye, aning nirya dabuka bulubukapmunce delinamlume.

⁴ Bukni, keting tamun tekbarye uplye keting tamun nirya ara, Allah Yahweh, elce kintinibuka deibuk sum, ‘Allah el mambul weik sum, ani,’ tenebuka, kintinilinauk unamlume. Atekbarye keting tamun noutam nirya ara, amutuku tuku ton, dikdik sena atonun unamle. Ara, anggunce wa wina pia kume, bataknamlulume. Atalak ara, talye pil ton, pia kum donamlume. Aning atonun asum ara, anggunce wa wibuka yala ton, pia kum kounamlume. Tonda, anggunce wa wibuka kouamunye anggur tapu babye, kum sekeltakanamlume. Anggur duk ton kum dakuka bonamlulume. Deiyok ara, tekbarye keting tamun uplye keting tamun nirya ara, amutuku tuku ton, dikdik sena atonun unamlume. Ara, na Yahweh si erebuka kina ati, wininamlume.

⁵ Aning atonun, gandum duk do, yuk yala do, aning ton nirya arye, kouna kum buk, el duk arye sakamlirye, pamlye ning babye, tonda anggur tapu duk bukni, ninye arye dokuka, taruk ton kum dakuka deiamikca ani, el yuk paplirye, duk mounamle ning babye, anggunce bulubuka kum delinamlulume, tonda kum dinamlume. Aning ati ara, atekbarye keting tamun deiyok kouplye talak arye dipdongobuka, doyanganamle wala nirya ara, keting tamun tonok nirya deice arye, atuku ati dikdik senamlulume.

⁶ Winibuka dikdik selamlum touk, ninye arye kouna kum arye bukni, atuku deice arye, el yuk arye talye betekuka paplirye, nong unamle ning yala-yala nirya ara, anggun din ninguk unamle. Tonda, anggun pil melibuka pil don nang ap, ‘Pil donamsiakʼ tenen, yo bok deice arye, dekuka deiplum nang ap, tonda anggun ap neika unamlum ninye asik nang ap nirya arye yala kum kounamlum bukni, atuku nirya, el yuk talye paplirye, nong unamle ning yuk-yuk ning yala nirya ara, anggunce bulubukamunce, dinamlume. Aninguk ara, anggun din ninguk unamle, nyapsina.

⁷ Atonun ton, anggun unamlum mutuku noutam ara, domba basam do, kambing basam do, sapi basam do, yuk kam ulamle ning nirya ara, anggunce talibuka weinamlum ning babye, talye bai tam ulamle ning nirya babye, atuku el yuk talye paplirye, nong unamle ning nirya ara, dinamlume. Wa kum winamlume. Winibuka batakamunya ani, keting tamun tonok kipnamle.

“Yobel keting tamun uplyopura, aning-aning nirya tamubuka arenamlume,” nyabuk yupu

⁸ Nuknin balamunya ani, like tekbarye tujuh kali keting tamun ton nukmunyopura, minggu tekbarye atonun bukni, ‘Keting tamun tekbarye akunum kipleʼ tenen, nuklenamlulume. Anuklamunya aketing tamun nirya upnin balamlya ani, yupa weik empat puluh sembilan (49) tahun upnamle. Keting tamun 49 akunum uplyopura, ‘Akunumaʼ, keting tamun lima puluh (50) ning ara, el si ara, Yobel keting tamun, ‘Allah el mambul weik keting tamun akunum yanmasile,’ tenenamlume.

⁹ Tonda, keting tamun 49 ning akunum uplyeba, wala tekbarye nukmamunya ani, tekbarye wala akunum uplye talak ara, awala noutam bukni, tanggal sepuluh (10) uplyopura, asum ara, weik lelim nyan ning, el si terompet arye, lelim weik arye nyanamle. Deiyok ara, aketing tamun ara, lima puluh (50) keting tamun, el si ara, Yobel keting tamun, akunum upmalya ati, ninye malye ulamice ning, Allah arye kilipsilirye, teleb kipdeipnamsile. ‘Tamubuka tonap, teleb kilinamsil sum ara, ani,’ tenenamlulume. Ati ara, keting tamun lima puluh (50) yalyopura, mutuku-mutuku nirya daunyak nang ap, mutuku-mutuku yuk-yuk talibuka, daunyak nang ap, sik kekena ati lelim nyan ning, el si ara terompet arye lelim nyapnin banamlulume.

¹⁰ Keting tamun yupa weik, lima puluh tahun (50) akunum uplyopura, anggunce aketing tamun ara, ‘Tamubuka Arena Keting Tamunʼ, el si ton ‘Yobelʼ keting tamun ati, yuk wipdeipnamlulume. Winipmunyopura, amutuku noutam unyak nang nirya ati, “Anggun nirya ara, kanye deipdamunce, talyeuk unamlume,” nyabuka banamlulume. Aketing tamun noutam arye, anggun Israel nang nirya arye, adiparyuk tamubuka, anggun mutuku koproba min arye ulamlum mutuku tamubuka binamlume. Tonda, anggun yala nang, anggun mapu silip unyak mutuku, tamubuka binamlume. Ara, sikce deiamikba, dadeipdanin yanganyak nanguk, anggun tam nang unyak mutuku tamubuka binamlume. Yatanye do, adiparyuk tamubuka, el ap neika ulamik nang, el mutuku tamubuka binamlule.

¹¹ ‘Tamubuka Arena Keting Tamunʼ, el si ton Yobel keting tamun, lima puluh tahun (50) ning ati ara, pia kanye deibuka unamlume. Sik Israel nang nirya ara, sik wa wiamikak ara, yala ton, pia kouna meme. Atuku el yuk doklirye, pabuka tiklamle ning, el si gandum do, anggur tapu duk wa ati do, yuk kounyak ning do, el yuk palamle ninguk, bulubuka dinamlume. Wa wiamlumce kouamlum ning ap, tonda anggur tapu, el taruk kum sekmamunye ning bukni, el yuk arye, pamlye anggur duk ton, pia kum dabuka bulunamlulume. ‘Aning nirya ara, anggunce bulubukapmunce, ‘Naʼ tenen, pia kum delinamlulume. Tonda kum dinamlume.

¹² Deiyok ara, ani. ‘Tamubuka Arena Keting Tamunʼ, el si ton Yobel keting tamun noutam nirya ara, anggunce, ‘Kume, aketing tamun lima puluh ning ara, pia teleb mingne keting tamun, lek ning atonun ululeʼ tenen, wininamlume. Ati wa wina pia kume. Awa noutam ara, yata yala do, el yuk beteklirye, pakuka neplirye, duk moulamlye ninguk dinamlume.

¹³ Aketing tamun noutam ara, tia ati, anggun mutuku koproba ara, tuba tamubuka binamlume. Anggun ni yapu arye taleamikce, deiamsise mutuku tamubuka binamlume. Aketing tamun ara, ‘Tamubuka Arena Keting Tamunʼ, el si ton Yobel keting tamun ati, kanye deipmunce, telebuk unamlume.

¹⁴ Tonda, aketing tamun noutam ara, anggunce anggun kwitcapu nang koproba, Israel nang arye taleamice tuku, patapsilirye, ‘Winipnuname,’ teneprumunce, sik tuku dekmunyeura, dipkoprob atuku winilamle touk, yo bok teleb kibuka arenalume. ‘Yo bok mitika aryuk arepnuneʼ tenen, kanye pum tam tilila yupu nyana kume. Tonda, tilila yupu nyana deice arye, yo bok mitika aryuk arena meme. Dipkoprob ninguk arepmunce, deknamlulume. Aning atonun, anggun kwit birye, “Amio, an taleamlum tuku deknune,” nyaplyopura, atuku el dekna dipkoprob wamlye touk, yo bok moropnamlulume. Lak ninye kekenak arye, laka nyapnulyame. Tuku malye upmalyebuk, kwinisa dobuka, tenepce tilila yupu nyabuka, yo bok weik tonun dolona meme.

¹⁵ Ati ara, ‘Tamubuka Arena Keting Tamunʼ, el si ton Yobel keting tamun noutam ara, ‘Wa tuku deknune,’ tenepmunyeura, atuku el dekna ati ara, winipnamlume. Ara, mince arye uamuk Yobel keting tamun arye, nukapmunce, tuku deklum talak teneprumunce, danoutam uamuk keting tamun deice arye, yo bok bulubuka, deknamlulume. Aning atonun, minop talak atuku taleamuk deiyoknye birye, otam uamuk Yobel keting tamun teneplirye, atalak arye dipdongobuka nukaplirye, aminyan talak upnamlye Yobel keting tamun kentinyamdica ani, aketing tamun el dekna akunum uplye touk, ayo bok moropnamlule. Ara, atalak arye nukukaplirye, dor tam yanamle Yobel keting tamun teneplyopura, awa tuku wipmunce, aminyan talak panamle talak ton, tenepla deice arye, ayo bok moropnamlule. Yuk ton tabakna kume.

¹⁶ Ati ara, awa tuku wibikirye, kounamak keting tamun, pia weik tuba aupnamleura, malye touk, minop talak atuku deiyoknye birye, atuku el dekna ati ara, pia weik moropnamlule. Bukni, awa tuku wibuka wiptingce linamting keting tamun, mitik tonunuk uplyopura, atuku taleamlya deiyoknye birye, atuku el dengna babye, mitik tonun moropnamlule. Deiyok ara, wa tuku nirya, el dengna ati ara, awa weibikiba, ‘Weik panamle ning, weik tonun lipnamak do? Mitika aryuk lipnamak do?’ tenepmunce, adeice aryuk, ‘E, awa tuku el dekna yo bok ara, ani,’ tenenamlume.

¹⁷ Anggun kwitcapu nang koproba, Israel nang ara, deknamlum ning, yala-yala nirya ara, tilila ati, talye-talye yupu nyapmunyakarye, kwinisa kum donamlulume. Aning kum bukni, aning-aning nirya, el dengna dipkoprob aulye touk, aninguk tenebuka, yo bok moropnamlume. Tenepce tilila nyana pia meme. Ura, anggun nirya arye, anggun ni koproba Allah Yahweh ati, ‘Se, malye winibibiba, Allah arye wenepnamsilʼ tenen, na Yahweh ati, ilil asa upsilibuk unamlume. Nara, Yahweh, anggun ni koproba Allah unirye nyapsine.

‘Keting tamun tek barye talak arye, malye winibikcakʼ tenen, nyabuk yupu

¹⁸ Allah arye, “Aning ara, wininamlume. Aning ara, pia kum wininamlume,” nyapdeipse yupu ara, moubuka kekenamlume. Tonda, narye, “Aning ara, wininamlume, aning ara, kum wininamlume,” nyapdeipsise yupu nirya ara, luba kina kum aryuk, pia talipmunce, telebuk unamlume. Ayupu nirya ara, pia moubuka teneipmunce, namin arye pia telebuk unamlume. Winibuka unamluma deice arye, narye melipsinyeba, anggun amutuku noutam unamlum talak ara, pia teleb kibuka, namin arye, dakeiam asa unamlume. Winipmunyopura, narye kaleksiniba, ikin ning anggun dam kum yanganamsile. Kanye deibuka, telebuk unamlume.

¹⁹ Anyapmasin touk, telebuk umunyopura, narye melipsiniba, amutuku noutam binuka unamlumak ara, wa wipmunyeura, nong weik tonun linamlume. Atuku deice arye, ninye dopman kumto ubuka, arepsiliba, anggun din ning nirya ara, pia weik usiliba, weik tonun dinamlume. Din ning ara, kum suktalipnamsile. Tonda, narye kaleksiniba, ikin ning anggun dam kum yanganamsile. Kanye deipmunce, amutuku noutam, pia telebuk unamlume.

²⁰ Bukni, anggunce asipnulumce, nyapnulume. “Naio, keting tamun tekbarye deice ara, ance, ‘Wa wibuka kounyak ning kum kounamlume. Yala kouplumba, nong paplye ning nong upliba, kum linamlume. Atuku batakmunyeba, atuku el yuk paplirye, nong ubuka wisipnamle ninguk, bulupmunyakarye, delinamlume. ‘Aninguk libuka dinamlume,’ nyapdeiamsuluma ati, atekbarye keting tamun noutam ara, yata din ning dinamap do?” nyabuka, anggunce asipdenmanulume.

²¹ Aning ara, asipdenmanuluma ati, laka nyapsine. Kume, keting tamun nakub barye (6) akunum uplyopura, na Allah arye, anggun wa tuku nirya, pia teleb kipdeipnamne. Winipnamna deice arye, amutuku tuku nirya ara, din ning pia weik tonun panamle. Ati, din ning yala-yala nirya, pia weik tonun linamlume. Anggun wa tuku ati, pia teleb kipdeipsiniba, winibuka arepsinyopura, anggunce, tekbarye (7) keting tamun noutam ara, yala yuk-yuk ning yala nirya, kum kounamlum. Bukni, atalak ara, keting tamun winilye deice arye, dinamlum ning arepsiniba, linamlume. Ati ara, keting tamun winilye deice arye, libuka delinamlume. Adeice arye, keting tamun winilye noutam ara, aninguk dinamlume.

²² Ati keting tamun tekbarye (7) yala kum kounamlum bukni, keting tamun pinbarye (8) yalyopura, wa wibuka, yala kouna ap, dokona ap, lina ap wininamlume. Narye anggun wa tuku pia teleb kibuka deipsinyopura, adeice arye keting tamun nakub barye (6) noutam nirya, anggunce koulamlum ning nirya, el yuk pia teleb ubuka panamle. Adeice arye, nakub barye (6) keting tamun noutam, wa wiamunya tuba aupmalibuk, keting tamun nakub barye (6) ap, tekbarye (7) ap, pin barye ap noutam, aninguk dinamlume. Aning atonun, narye melilamsinya deice arye, din ning ara, pia weik uplyeba, dipnin balamunya ani, otam keting tamun pinbarye noutam yala ning ton, kounamlume. Winimunyopura, keting tamun topne barye sembilan tahun (9) uplyeura, aninguk bulubuka deipmunce, dinamlume.

Dekamne tuku ap, aik ap ara, tamubuka arena ati, nyabuk yupu

²³ Amutuku noutam ara, anggunce talibuka unamlum tuku nirya ara, dekelana ton winipdanamlum bukni, ‘Atuku deklumopura, atuku dekmalinye bira, doyanganamle keting tamun nirya ara, anye diamuk atuku pia talenamle. ‘Atalak ara, atuku el ninguk ululeʼ tenena meme. Aning ara, pia kum sekuka wininamlume. Deiyok ara, ani. Wini talak arye dipdongobuka, doyanamle talak nirya ati nyapne. Amutuku tuku nirya ara, dipkoprob, na ning diamuk unulule. Nara Allah naryuk, amutuku tuku nirya talinune. Ati atuku nirya ara, anggun ning kume. Nara Allah, na ninguk ulula ati, anggunda ninye asik nang atonun ululume. Anggunda, tia ati, atuku talipmunce, wa wibuka linamlume. Atuku nirya talina deiyoknye bira, na uka. Amutuku tuku nirya ati ara, anggunce, ‘Nun ton yo bok arebibyeba, tia ati, atuku talibibirye, wa wipnuyabe,’ tenebikirye, atuku taleamlya deiyoknye biti morobikirye, yo bok deice arye dekuka, talilamaka atonun ululume. Atuku deiyoknye bira, na Allah unune. Anirya ara, na ninguk ulule.

²⁴ Ati ara, amutuku noutam nirya, anggun yo bok deice arye deklulumce, talinamlum tuku nirya ara, atuku mince taleamuk deiyoknye birye, ‘E, wini talak arye, tamubuka atuku deknune,’ teneplyeura, atuku tuba tonap dekukapturye, elcuk atuku talenamle. Wa tuku nirya, minopce taleamlya deiyoknye birye, “Amutuku tuku dekamseba, yuk nang arye taleamik bukni, wini talak ara, atuku tonap deknune,” nyabuka, laka nyaplyopura, el adiparyuk deklirye, atuku talenamlule.

²⁵ Aning atonun, sik Israel nang dem, sik kwit ton, sik mapu silip kan-kan aulamlinye bira, ikin ning el dam yalyopura, ikin kanye boplirye, yuk-yuk mambul ning pataplye bukni, ato ning pia winipmanto kum uplyopura, el tuku dektu bukni, teleb ning ara ani. ‘Mambul uplyeura, el taleamlye tuku, yuk nang tia talak ati dektinge,’ teneptuopura, teleb ning ara, atonun winamlule. Ara, el aik ninye koproba dam, aulamice nang, el du koproba do, el weit koproba do, el li koproba do, el mam koproba do, ikin upmalinye el melina ati, adiparyuk tia talak ati, atuku deknamnyake. Ikin upmalinye birye, el weik tonun patalye ning ati, el taleamlinye tuku deklyeba, yuk yala nang arye dekikceura, aikin upmalinye bira, el tam nang, mening dam daulamikce nang ton yakirye, atuku dekikirye, dolonamake. Ara, sik kwit birye, el taleamuk tuku dekmalinye, el melina ati winipnamake.

²⁶ Ura, yuk ning ton nyapnusine. Ninye tonok nang ton, ikin ning sik dam yalyeba, sik patana ati, sik taleamik tuku ati ara, ‘Deknuyabe,’ tenebikce bukni, sik tam nang, mening dam aulamikce nang ton, sik yo bok kum ati, sik kwit melina ati, atuku kum deknitingura, talye daunyak nang, yuk tam nang ton dektinge. Bukni, yuk talak ara, atuku taleamuknye, pil doplirye, el yo bok ton weika tonun bulubukaplirye, aupmaleba, el mince taleamuk tuku, tuba tamubuka dektuopura, aminyan talak, el mince dekuk tuku, tuba tonap deklirye, tamubuka talenamle.

²⁷ Bukni, elce atuku deknulye talak arye dipdongobuka, otam yanamle Yobel keting tamun ton tenepdelirye, ‘Keting tamun, yata wiribuka akunum ubuk do?’ tenen, nukdelyeura, aketing tamun uplye touk, yo bok ton doproplyopura, ton tuba aupnamle ning ara, bulubukaplirye, ayo bok deice arye, atuku tuba tonap deknamle. Yo bok pia weika tonun dektu bukni, keting tamun akunum upnin biyuk ning nuklya deice arye, mitik tonun uk arepnamle. Ayo bok ara, el mince arye taleamuk tuku dekuka taleamlinye deiyoknye biti areplyeba, anye birye, dopropnamle.

²⁸ Wininamle bukni, el atuku taleamuk bukni, ikin ubukba, el patana ati, atuku dekamlinye birye, adekuk tuku pununa ati, yo bok kum upmaliba, el bidamnye tamubuka kum arepmanto uplyopura, el tuku dekamlinye biryuk, awa tuku nirya talinamle. Ataleamlya ani, wa tuku tamubuka aren keting tamun, ara ‘Tamubuka Arena Keting Tamunʼ, el si ton Yobel keting tamun, akunum kiplyopura, aketing tamun noutam aryuk, atuku minopce taleamlya deiyoknye birye, tamubuka el bidamnye atuku tonap dopropnamle. Tia ati dekamlinye, taleamuknye birye, atuku tamubuka minop taleamuknye biti, tamubuka arepnamle.

²⁹ Aning atouk, ninye ton, sik unak mana ati, weik asik dobik sukum, sik aik dam ara, dana-dana tam weik keil poka wiamice ning ton aupmalyopura, ulamikca ani, ‘Amin yan talak anyaik damnye birye, yuk nang ton dekting,’ tenepliba, yuk nang ton anyaik dekuka doprobikcopura, sikce tia taleamica ani, keting tamun tonok, talye kanye bobuka unamyake. Anyaik minopce domukce, taleamuknye birye, anyaik dekuk keting tamun arye dipdongobuka, keting tamun tonok nuknin balamya ani, anyaik el tamubuka deknamtu talak ara, atanggaluk, kil banamle. Tonok keting tamun noutam ara, anyasik ara, tuba tamubuka dekenamle. Bukni, keting tamun tonok ap, yuk keting tamun bitinye ap, akunum uplyeura, anyaik aminyan talak dekamikce nang aryuk, anyaik tuba talinamtinge. “Tamubuka minopce taleamuknye arepminyeura, deknamlarya,” kum nyanamlume, nyapsine.

³⁰ Ura, weik keil poka dobikirye, weik asik dobik noutam ara, ninye man aik, akunum dekicopura, asum arye dipdongobuka, pia nukda balamica ani, keting tamun tonok akunum uplyopura, anyaik tamubuka kum arepnamle. ‘Min yuma taleamlirye, dekamuka deiyoknye biti, kum deknamabe,’ tenebikcopura, telebe uka. Anyaik dekmek nanguk, anyaik tuba talinamake. ‘Anyaik tuba talinamabe,’ tenebikcopura, ‘Tamubuka Arena Keting Tamunʼ, ara Yobel nyalamap keting tamun noutam arye, tuba tamubuka kum deknamake. Sik anang aryuk deibikceura, dadeipdanin banamak nanguk, anyaik talinamake. Aminyan talak ara, anyaik dekamice nang, sik mapu dadeipdanin banamak nang arye, anyaik talibuka unamake.

³¹ Bukni, dan mutuku do nirya, talye sukum aik dobikirye, aunamice aik ara, anyaik dam keil poka arye, dobuka dana-dana nirya kum warikdongamice aik nirya ara, bai tam wa windam tuku atonun unamle ati, ato aik ara, “Tamubuka Arena Keting Tamun, tonda el si Yobel keting tamun akunum yalyopura, adiparyuk tuba tamubuka, minopce taleamuknye ati, arepnulume,” nyapnamtinge. Ato aik kum arye, minopce taleamuk deiyoknye birye, “Aulamlum aik ara, wini talak patapnil ati, tamubuka arepnamnilame, deknamane,” nyabuka, akunum nyabikcopura, adiparyuk anyaik min arye taleamuknye biti, tamubuka arepnamlume. Ara, ‘Tamubuka Arena Keting Tamunʼ, el si ton Yobel keting tamun talak akunum yalyopura, anyaik ap, atuku nirya ap ati, tamubuka aik damnye ap, tuku damnye ap ati, arenamake.

³² Ura, sik Lewi yala nang unamak asik ati, yupu nyapnusine. Anggun Lewi yala nang unamlum mutuku noutam nirya, aik dobuka unamak sukum nirya ara, sik Lewi yala nang aryuk, talibikirye, unamak aik nirya ara, winipnamlume. Anggun Lewi yala nang aryuk, aik doplumce, unamlumak ap, wa tuku nirya ap ara, angguncuk pia ati, talinamluma ati, anyaik dekikcopura, yuk nang arye, doprobica babye, aminyan yata talak arye do, sik Lewi yala nang arye, “Mince, anyaik taleamlinye tamubuka arepnamsulume,” nyabikcopura, adiparyuk tamubuka arenamlume. Sik Lewi nang arye, talinyak aik ara, sikce deibiceba, dadeipdanin banamak nang nirya ara, sik aik tia talak ati, winibice babye, aminyan talak, “Yobel keting tamun deice arye, tuba tamubuka anyaik arepsulume,” nyabikcopura, adiparyuk arenamlume.

³³ Bukni, Israel nang, sik unamak asik noutam nirya ara, Lewi yala nanguk, anggun kan-kan unamaka ati, Lewi yala nang arye, amutuku noutam arye aik tonok ton dopmace ning do, dekikce ning do, ‘Tamubuka Arena Keting Tamunʼ, el si ton Yobel keting tamun yalyopura, atalak noutam arye, “Nun mince dekupu aik ara, tuba tamubuka arepsulume,” nyabuka morobikceura, adiparyuk tamubuka arenamlume. Deiyok ara, sik Lewi yala nang arye, aik dobikirye, weik asik akunum kiplyopura, anyasik nirya ara, Lewi yala nang, sik ninguk ulula ati, ‘Tamubuka Arena Keting Tamunʼ, el si ton Yobel keting tamun noutam ara, anyaik tamubuka arepmunyeura, sikcuk talinamake.

³⁴ Sik Lewi yala nang arye dekenyak aik ara, morobikceura, tuba tamubuka arenamlume. Bukni, Lewi yala nang ulamice asik dam do, wa tuku lo wamlyak ati domba totoa weilamicak do, bai tam mutuku do, amutuku nirya ara, sik Lewi yala nang aryuk pia talinamak ati, amutuku noutam nirya ara, yuk nang arye, ton pia kum dekenamake. Deiyok ara, sik Lewi yala nang aryuk, amutuku nirya ara, pia ati talibuka unamake. Sikce deibikceba, dadeipdanin banamak nang ara, amutuku pia ati, talibuka unamyake.

Bona utotoa talina kum nang, talye kankan nang melina ati, nyabuk yupu

³⁵ Anggun unamlum mutuku noutam ara, anggun yala nang koproba noutam ap, anggun weite-du nang arye, tonoknye ton, aning-aning nirya kum uplyeba, talye bona talina kumce ulirye, kankanye uplyopura, el nong mikip kum upmanto upliba, ikin ning weik, el deice yalyopura, anggunce elti, adiparyuk melibuka arenamlume. Akan-kan nye bira, anggun ninye asik nang do, anggun mutuku noutam tikilyangan nang do, melibuka winilamluma atonun, anggunce aning-aning nirya, weik tonun talye arepmunyeba, anggun aik pum tam nang ap neika unmunce, pia teleb kibuka melipmunce, kanye doubuka, neikauk unamlume.

³⁶ Anggun ap, anggun tam nang ara, bona talina kum nang ulamak atonun uplyopura, anang ap neika unamlum talak ara, anggunce anye biti, yo bok arepmunyeura, aminyan talak ara, anyarepmunye ning ati, “Anda, yo bok weik tonun ton, eitam tonap tabakuka arepnamnulyame,” nyabuka, kum moronamlume. Tonda, minop talak ara, “Yo bok winibuka arepnamkin bukni, aminyan talak ara, yo bok weik tonun tabakuka arepnamnulyame. Winipnumunyeba, na ap neika unamname,” pia kum nyanamlume. Aning nirya ara, pia kum bukni, anggunce anggun ni koproba Allah, natibuk, ‘Malye winibibiba, wenepsilyakeʼ tenen, ilil unamsile. Na Allah ati, ilil kum upsilyeba, akan-kan nang, sik bona talina kum nang ati, eibuka bikmunce, kum bataknamlume. Aunamak talak nirya ara, anggun piluk dobuka ulamikca ani, Yobel keting tamun yalyopura, aning-aning nirya tuba tamubuka aren keting tamun ati, anggun mapu silip, apil don nang nirya ara, adiparyuk batakanamlume. Anang ati, talye batakmunyeba, anggun kan-kan bukni, urdemuk unamnyake. Melipmunyeba, anggun kan-kan teleb asa unamlume. Anang ati kum melipmunce, batakmunyopura, na Allah arye anggun ati, wenepnamsinca. Ati ara, anggunce nati, ‘Se, nun ni Allah arye, wenepsilyakʼ tenen, ilil unamlume. Anggunce, anang ap, teleb kibuka, neikauk unamlume.

³⁷ Tonda, anggun yala nang do, anggun aik neika unamlum nang kan-kan do, tonoknye aning-aning kum upliba, ikin uplya ati, sikce anggunti, “Amio, na melina ati, yo bok ton arepnutume,” nyabuka, moropsikcopura, talye luparabuka arepnamlulume. Anggunce, anggun yala nang ap, anggun mapu silip ap ati, “Kume, anggunda, yo bok moropmanilama atonun bukni, yo bok eitam tonap tabakuka, arepniminyopura, adeice arye melipnamkinca,” nyabuka, ikin ning, sik nong deice kum delinamlulume. Aning atibuk tenebuka, pia kum nyanamlulume. Tonda, sik pataplye touk, din ning talye luparabuka urdemuk arenamlume. “Din ning arepsitinye bukni, yo bok ton dekuka, arepnumunya deice aryuk, arepnamsine,” nyana meme. Anggunce duweit nang ap, anggun aik neika unyak ninye ap ati, din ning talye urdem aryuk arenamlume.

³⁸ Aning nirya ara, moubuka tenenamlume. Nara, Allah Yahweh arye nyapsine. Nara, anggun ni Allah unune. Narye anggun Mesir mutuku ulamlum bukni, dobuka boyanamsise. Naryuk winiryuk, pia teleb mutuku, Kanaan mutuku arepnamsine. ‘Israel nang ati, amutuku arepnyopura, nara anggun ni koproba Allah pia unamne,’ tenelamse. Na Allah Yahweh arye, ayupu nirya nyapmasina ati, ayupu nirya moubuka kekebuka wininamlume.

Yo bok deice arye, deklamik ninye ara, tuba tamubuka arena ati, nyabuk yupu

³⁹ Tonda, anggun unamlum mutuku nirya ara, anggun kwit capu do, anggun duweit do, anggun yala nang koproba do, anggun tam nang do, ikin weik uplya ati, bona utotoa talina pia kum arye, pia kankan daulamlirye, aning-aning nirya kum uplye ati, winipmanto ara, elce anggunti, ‘Kume amio, nara an talye pil melinanye unamne. Ati, yo bok deice aryuk, na nong deknamnilyame,’ nyabuka moropsikce babye, aning atonun kum wininamlume. Anggunce anggun yala nang ati, yo bok deice arye, pil dona melin nang dekikirye, malye ulamaka atonun, kum wininamlume. Anggunce elti, “Na melin piluk donamnilam bukni, urdem talye unamlyame. Yo bok deice arye dekisa ati, aning-aning nirya, pia kum arenamkine,” nyabuka, malye kum wininamlulume. Aning ara, pia malye ning ati, kum wininamlume, nyapne.

⁴⁰ Aning ara, kum bukni, anye bira, aik do, wa wina do, pil dobiki bukni, sik pil deiyok nang arye, yo bok arelamak atonun ubuka melinamlume. Anggun duweit do, anggun tam nang do, anggun yala nang do, anggun tam nang bukni bona talina kum nang do, anggun melin pil dobikcopura, apil dolamaka dengna atonun, anggunce anang ati, yo bok ap, sik patana ning ap urdemuk arenamlume. Tonda, yuk mutuku nang bukni, anggun mutuku noutam tekilyanganyakba, anggun ap neika unamlum talak ara, sik ninye asik nang ara, melin pil dobikcopura, apil deiyok nang arye, yo bok dobuka, sik ninye asik nang arelamak touk, anggunce anggun duweit bukni, bona talina kum ulamak nang ati, melibuka arenamlume. Bukni, aunamak talak nirya ara, anggun piluk dobuka ulamikca ani, Yobel keting tamun kunum yalyopura, aning-aning nirya tamubuka aren keting tamun ati, anggun mapu silip ap, anggun yala nang ap, apil don nang nirya ara, adiparyuk bataknamlume. Sik anang arye, ‘Nun mutuku koproba, tamubuka bitibye,’ tenebikceura, bana telebe uka.

⁴¹ Ara, Yobel keting tamun akunum uplyopura, apia talye kankan ulamlinye ap, el mapu nirya ap, tonda sik mapu silip nirya ara, sik tam nang ulamice sukum ulamikirye, pil dolamica ani, batakdongobikceura, anye ap, el mapu kilapu ap, tamubuka el mutuku koproba bilirye, el apu yapu nang arye taleamik mutuku ak, tamubuka binuka daunamlule.

⁴² Deiyok ara, anggun Israel yala nang nirya buk, bona talina kum nang, sik talye kankan unyak nang babye, bona weik talinyak nang babye, anggun nirya ara, na mapu koproba atonun ululume. Na Allah Yahweh atibuk, na pil melibuka don nang unamlume. Anggun apu yapu nirya ara, Mesir mutuku noutam, malye kanye bobuka daulamik bukni, narye sikti, dobuka boyanamsa ati, anggunce, ‘E, talye kankan unyak nang ara, yo bok deice arye dekibiba, nun pil talyeuk donamsiake,’ pia kum tenenamlulume. Anggun Israel yala nang, ‘Sik ton nang talye kankan unyak nang ara, urdem pil don nang atonun unamake,’ kum tenenamlume. Anggun bona talin nang babye, bona talina kum nang babye, anggunda na mapu koproba ululuma ati, ayupu nyapsine.

⁴³ Ati, anggun Israel nang arye, anggun tam nang buk, pia bona talina kumce, talye kankan unyak nang ati, pil dolamiki buk, dekna kumce, malye yupu nyana ap, ikin ning, sik nong deice delina ap ara, pia kum wininamlume. ‘Nunce talye kankan unyak nang deknamabe,’ teneplumce, talye lukparabuka kum wininamlume. Aning ara, kum bukni, ‘Se, nun ni Allah arye, wenepsilyakʼ tenen, anggun ni Allah, nati ilil tenebuka unamlume.

⁴⁴ Bukni, ‘Nun pil melina ati, talye pil don nang deknamabe,’ teneprumunyopura, anggun neika ululum Israel yala nang, tonok yala nang ululum ati, yo bok deice arye dekna pia meme. Aning patapsilyeura, anggun pil donanye do, pil don kilapu do, tonda, ‘Yo bok deice arye dekuka doprobibyeba, pil talye melibuka donamsiake,’ tenepmunyopura, Israel nang mamun ara, kum dekenamlulume. Aning kum bukni, anggun unamlum mutuku dana-dana tam aryuk, talye daunyak nang, yuk yala nang ara, yo bok deice arye dekna teleb uka. Ara, sal do, kilapu do, sik pil melibuka dona nang ati dekuka deipmunce, talipmunyeba, sik nirya arye, anggun pil melibuka donamsiake.

⁴⁵ Tonda, yuk mutuku ninye asik nang bukni, tikilyanganyakce, anggun ap neika unamlum nang ara, anggun ap, sik anang ap, sikce delinamak mapu ap ati, ananguk anggunce dekenamlume. Aning atonun ara, yuk mutuku ninye asik nang ton, anggun unamlum mutuku yaceba, anggun ap neika unamlum mutuku noutamuk unyak nang ap, sikce delinamak mapu nirya ap noutam arye, ‘Nun pil ton melibuka donamsiake,’ tenepmunyeura, sik anang ati, yo bok arye dekna ara, teleb uka nyapne. Bukni, anggun Israel nang arye, yuk Israel nang ati, yo bok kum dekenamlume.

⁴⁶ Ati, anggunce, sik yuk mutuku nang do, sikce delinamak mapu do, dekmunyeba, anggun pil don nang ubikirye, daulamikca ani, aminyan talak ara, anggun Israel nang arye, deiplum mapu ati, apil don nang arena telebe. Aminyan talak ara, anggun mapu ati, pil melibuka donamake. Apil don nang nirya bokukapmunce, anggun mapu koproba ati, apil don nang kipnamke. Ati ara, yuk mutuku arye tikilyangan nang, ninye asik nang ara, yo bok deice arye dekelumce, pil arukna ara, teleb uka. Bukni, anggun Israel nang arye, anggun tam nang, yuk Israel nang, anggun ap neika unamak nang, anggun kweit yapu nang ara, malye yupu ton kum nyalinamlume. Tonda, ikin ning sik nong deice, pia kum delinamlulume.

⁴⁷ Ura, yuk yupu ton nyapnusine. Anggun mutuku noutam ulamlye tikilyangan nang ton bukni, anye birye, pil teleb kibuka dopnin balamlya ani, aminyan talak, el babye bona talinanye akunum uplyopura, ‘Na pil dona ati, Israelnye ton deknune,’ tenepnamtue. ‘Winiptinye,’ teneplye bukni, sik Israel nang ap, neika dukdongobuka unamaka ati, Israel nang ton, sik ning kum daliba, talye bona talina kumce, urdem unmacopura, sik aninye asik nang arye do, yuk mutuku arye tikilyangalamik bukni, bona talin nang akunum uplyopura, el yo bok deice arye, Israelnye ton dektue. Adeknamlanye talinamle. Tonda, aninye asik nang, sik asik nang arye, sik duweit ara, Israel nang bukni, pia bona talina kum nang ton, dekna teleb uka.

⁴⁸ ‘Nun pil don nang unamsiakʼ tenen, yuk mutuku ninye asik nang arye, Israel nang dekting bukni, aminyan talak ara, Israel nang arye, sik du koproba arye do, sik weit koproba arye do, anang arye, apil don Israel nang, sik lyena ati, yo bok deice arye tuba tamubuka deknamtinge. Ara, Yobel keting tamun deice arye, tamubuka deknamtinge.

⁴⁹ Akumopura, anggun duweit arye do, anggun ni koproba el weit do, el du do, ura, apil donanye, el mam koproba do, ura, sik ap mening dam unyak nang do, sik yala nang nirya arye do, sik Israel pil don nang ara, sik lyena ati, yo bok dekuka pununa teleb uka. Aning kumopura, apil donanye, el babye mikip uplyeba, bona weik taliplirye, dekna ning weik akunum ‘Naʼ tenen, deiplyopura, ‘Narye na dekamnuk ning ati, tamubuka punupnirye, na deiyoknye biti, yo bok arepnamna deice arye deknamtinye,’ teneplyeura, aning babye, teleb uka. El bidamnye winipmanto uplyopura, elcuk dekelanamle.

⁵⁰ Apil melinanye birye, adiparyuk el deklamlinye biti, nyanamle. Apil donanye, dekamuk talak arye, dipdongobuka, nuknin balamya ani, aminyan talak, Yobel keting tamun yanamle keting tahun, lima puluh (50) ning akunum upmalye talak ara, akunuma. Danoutam arye upnin balamunce, upnin banamle keting tamun nuknamle. Apil dolamlye keting tamun nirya ara, nukunamlule. Apil deiyoknye birye, apil dona melinanye dekamuk keting tamun arye dipdongobuka, neika ulamdik keting tamun nuklyopura, adengna uplye touk, tamubuka arenamake. Pil dolamlye ati deklamlye keting tamun arye, dipdongobuka nukra yangalamlya ani, Yobel keting tamun kiplye talak ara, yo bok el deklamlye touk, ubuka nukdelirye, adengna uplye touk, yo bok tamubuka arepnamlule. Ara, asum-asum nirya do, keting tamun nirya do, pil don nang ati arelamaka atonun nukukaplirye, sik neika ulamdik keting tamun akunum kikliman kiplyeura, teneplinye bira, aning atonun tamubuka arepnamake. Deiyoknye birye, aninguk nuknin balamlya ani, ‘Aning dengna arepnikiba, dolonamne,’ nyanamlarya. Elce nyalamle touk, anggunce el pil donanye dekna ap, el lyena ap ati, tamubuka arepnamake.

⁵¹ Apil melinanye, el dekna ati, pil deiyoknye mince areamuk ning nukikirye, weik uplyopura, tonda Yobel keting tamun bisibuka, otam keting tamun tonap tuba weik auplyopura, apil melinanye, el lyena ati, el dekna yupa ara, weik tonun arenamake. Deiyok ara, pil deiyoknye birye, el melinanye, el nong dekamuk talak ara, yo bok weik arebuk bukni, keting tamun pil dolamuk ning ara, mitik tonun domlya ati nyapne. Ati, yo bok weik tonun, adeiyoknye biti, tamubuka arepnamlule.

⁵² Bukni, pil deiyoknye, mince areamuk ning nukikirye tenebikcopura, Yobel keting tamun dam akunum uplyopura, apil dona melinanye, el lyena ati, yo bok mitika tonun, tamubuka arepnamake. Deiyok ara, pil deiyoknye birye, el melinanye, el nong deklamuk talak ara, yo bok weik arebuk bukni, apil melinanye birye, keting tamun weik tonun pil akunum dolamuka ati, yo bok mitik tonunuk, tamubuka arepnamle. El keting tamun weik tonun pil dolamuka deice arye, el deiyoknye birye, ‘'Yo bok areamuk ning ara, pil weik dolamlya deice arye, akunum punubuke,’ tenenamake.

⁵³ Sik pil melibuka donamak nang ara, deiyoknye el amu tam unamake. Apil donamak talak noutam ara, deiyoknye birye, “Aning ara, pil donamlume. Aning ara, kum wininamlulume,” nyalilamle touk ubuka, el pil dona melinanye birye, adiparyuk winipnamle. Bukni, anggun damuk unamaka ati, anye el pil melilamle deiyoknye birye, el pil melinanye biti, ikin ning weik, el nong deice kum delinamle. Tonda, elti, malye yupu ton kum nyanamle. Anggun yuk Israel nang nirya arye, ‘Pil deiyoknye birye, nun kwit biti, malye uplyakʼ tenen, el winilamlye ning ap, elce nyalamle yupu ap, moubuka kekenamlume.

⁵⁴ Ura, ‘Tamubuka Arena Keting Tamunʼ, el si ton Yobel keting tamun min kum upmalye talak ara, sik pil melina ati, deklamik ning ara, sik lyena ati dekmanto ning, akunum laka nyapsine. Aning nirya kum winibikiba, talye pil dobuka daulamikca ani, Yobel keting tamun, lima puluh ning (50) akunum yalyopura, atalye pil dona ati dekamik nang nirya bataknamake. Ati ara, atalye pil donanye ap, el mapu nirya ap, el mapu silip nirya ap ati, ‘Telebe, dabinamlume,’ nyabuka, bataknamake. Winibikiba, apil dona melin nang ara, sik mutuku koproba, tamubuka banamake.

⁵⁵ Aning-aning nirya laka nyapmasin yupu ara, talye ati kume. Deiyok ara, anggun na mapu Israel nang nirya ara, na ‘Naʼ tenen nang ululume. ‘Anggunda, na amu tam umunyakarye, na piluk donamnulumeʼ tenen, wipdeiamsise. Tonoknye babye, yuk nang ati, talye pil melibuka don nang atonun ton, pia kum unamake. Tonda, na Allah arye, Mesir mutuku noutam arye dobuka boyanamsise. Winyamsisa ati, anggunce nati, ‘Elda, nun ni koproba Allah ululeʼ tenen, unamlume. Nara, Allah Yahweh unirye, nyapsine.