Imamat 24 - Eipomek

Allah el Pia Teleb Lek Aik noutam deiamik lampu weisa kalikna ati, nyabuk yupu

¹ Allah el si Yahweh arye, Musa biti nyabuk.

² Anyadeipkin yupu ara, Musa ance Israel nang ati nyapnulyam yupu ara ani. Anggunce zaitun yo duk dopropmunce, teikmunyeba, el minyak zaitun balyopura, aminyak zaitun duk mek, pia teleb ning ara, na damuk boyanganamlulume. Deiyok ara, lampu weisa Allah Yahweh, el si eren aik pum tamuk deibikceopura, pia lanamle. Winibuka ubikcopura, pia ati lanamle. Ati minyak zaitun duk mek bobinuka, Allah si eren aik dam yanganamlulume.

³ Alampu weisa nirya ara, Harun elcuk moubuka kintiniplirye, pil donamle. Ara, kum inipmalye talak arye dipdongobuka, lukunyan nirya lapmalya ani, bereknamle talak nirya, moubuka kaliknamle. Allah Yahweh, elda asukumuk pia unamla ati, elce aweisa lampu dinamle. Allah el nyalin yupu lin peti yo marikna, el si Peti Perjanjian, amekina pum tam deibik aik otam, Pia Teleb Lek Aik ubukak bukni, atam ara, yuk aik wilibuka deibik aik, el si Teleb Lek Aik anoutam ara, cang weik kain lapkwetebik. Ara, Pia Teleb Aik wilibuka lelibuk ati, Pia Teleb Lek Aik otam ubuk buk, atam ara, aweisa teleb kibuka lanamle. Anyapmasin ning nirya ara, anggunce deiplumba, dadeipdanin banamlum nang babye, atonun pia apiluk dopnin banamake. Ara, wini talak unyak ninye arye apil winibuka, aminyan talak nirya aunamak ninye ara, atouk pia apiluk wininamake.

⁴ “Harun birye aning nirya ara, winipnamlyame,” nyapminba, elcuk kalikuka pil dobuka teleb wininamle. Alampu weisa, el yan ara, dengna weik ning, el si emas, pia teleb ning arye deipdongobuka, memebikirye, anyaik deipnamle. Tonda, atalak-atalak nirya ara, alampu ara pia ati, Allah Yahweh el Teleb Lek Aik pum tam deiplyeba lanamle. Ati ara, Allah Yahweh arye, alampu pia delinamle.

Roti kwaning dana ati, nyabuk yupu

⁵ Allah arye Musa biti, nyabuk. Ance, adiparyuk roti kwaning dana deiyok ning, el si ara tepung, pia teleb ning, tonok kilogram dobuka, roti din ning yuk-yuk bukni, 12 dapnamlyame. Roti tonok ning ara, tepung tonok kilogram deice arye dopropmince, roti dapnamlyame. Winipminyeura, roti kwaning dua belasuk (12) dabuka deipnamlyame.

⁶ Aning akunum dapminyopura, roti kwaning delinak ara, olbitinye kipdeipnamlyame. Nukmince, dana tam ol ara, nakub barye (6) deipnamlyame. Atouk, dana tam ol babye, nakub barye deipnamlyame. Abitinye ol nirya ara, obarye (12) roti kwaning kintinibuka deipnulyame. Asukum nirya ara, like arye dana tam, dua belas (12) roti kwaning ara, memep deipnamlyame. Dekna weik urasin teleb ning, el si emas arye, memebuka deibik meja deice deipnamlyame. Ameja deiyok memebikce, Allah el tia doltakna tenda aik pum tam deibik meja deice deipnamlyame.

⁷ Aroti kwaning dam ara, nintong teleb ning, el si kemenyan ton, kintinibuka deipnamlyame. Asum-asum nirya, aroti kwaning dabuka delinamak ning ara, nintong teleb ning, el si kemenyan, deipmamumnya deice arye, teleb kilinamle. Aning ara, Allah Yahweh, el aik noutam deipnamlyame. Tonda, aning nirya ara, Allah Yahweh el si erena ati, uku dongolamak atouk upnamle.

⁸ Israel nang arye, na Allah si erena ati, dikdik senyak sum, Sabat sum deice ara, aroti kwaning 12 ton, dabuka punupnamlyame. Aning ara, tuba-tuba Allah Yahweh, el si eren aik pum tam, emas arye memebuka deibik meja deiceuk, dabuka delilyanganamlyame. Aning ara, sik Israel nang nirya ara, ‘Allah ap, nun ap, pia teleb kibuka, neika unamapʼ tenen, nyalin yupu nyalamak atonun kibuka delinalame. Ara, wini talak arye ubuka, dotalak nirya, pia winipnin banamake.

⁹ Aroti kwaning dabuka delinamak ning ara, Harun ap, Harun birye deiplyeba, dadeipdanin banamak nang nirya ara, sik din ning upnamla atia. Sik imam nang arye, aroti kwaning dinamak sukum ara, pia teleb aik pum tam aryuk dinamake. Aroti ara, pia teleb lek mingne ning ulula ati, pia teleb sukumuk dinamyake. Tonda, yuk ning, Allah Yahweh si erena ati, imam nang dam boyakirye, arenamak ning ara, sikce doprobikikirye dinyak ning ara, mitik mambul ulul bukni, aroti kwaning ara, mambul weik ning ulule. Tonda, aning nirya ara, Allah Yahweh, el si erena ati, uku dongolamak atonun ning upnamlule.

Allah ati, malye yupu nyabikiba, aning wenena ara, ikin ning arena ati, nyabuk yupu

¹⁰ Tonok talak ara, sik Israel nang, sik asik dobuka ulamik kan-kan ara, tonoknye birye, winibuk ning ara, ani. Anye el li bira, Mesir mutuku nang bukni, el lin bira, Israel kil arye deiamuk. Israel kil arye deiamuk mi ap, yuk Israelnye ap, uapdarikce taruk pinin arye, bokuka olanmarik.

¹¹ Akil el si ara, Selomit. Tonda, el li koproba, el si ara, Diberi, el yala ara, Dan yalanye ulamuk. Tonok talak ara, Selomit el mi ap, yuk Israelnye ap, aik dam walanmarikce, taruk arye bokuka olanmarik. Walanmarikce talak ara, Selomit birye deiamuknye bira, Allah Yahweh el si ati, malye yupu nyabuk.

¹² Winibukopura, sik Israel nang arye, anye bobinuka, wenen aik dongobikce, Musa dam binuka, “Anye birye, malye weik winipmok ning ati, yata wiriptibye do? Nun ni koproba Allah Yahweh arye, yata nyapnamsil do?” nyabuka asipdeyik.

¹³ Boyayikopura, asukum deipmekce, ‘Allah Yahweh arye, yata nyapnamal do?’ tenen, dina ap, kekena ap uk unmekce, ‘Allah arye nyapsilye touk, winipnamabeʼ tenen, sikda kekenauk unmik. Winibuka dinmeka ani, Allah Yahweh arye, Musa biti nyabuk.

¹⁴ Wini talak ara, Allah ati, malye yupu nyapmalanye bira, anggun Israel nang unmalumak kan-kan arye dobuka, bai tam bobinuka deiplulume. Winibuka dopkwetepmunyopura, anye birye Allah ati, el nong deice malye yupu nyanmok buk, kekepmek nang nirya ara, amalye yupu nyapmoknye biti, el kisok deice taruk deibikcopura, anyasik ululum nang nirya arye, bita dipdenamlume. Akunum winipmunyopura, Israel nang nirya arye, keil arye anye dobuka, anye onmamunya ani, oplopmunyeba, dipnamle, nyabuk.

¹⁵ Winipmunyopura, Musa ance Israel nang nirya kekena ati, nyapnulyame. “Yata nang do nirya, Allah ati malye yupu nyaplinye bira, el nong deiceuk, ikin ning delilanamle.” ‘Allah arye nyapmale,’ nyapnamlyame.

¹⁶ Yata nang do nirya, Allah Yahweh ati, el nong deice malye yupu nyabikirye, Allah ati yanibikce nang ara, sik yuk Israel nang nirya arye, adiparyuk keil dobuka, amalye yupu nyabikce ning ati, opnamlulume. Anyapsin ning ara, anggun Israel nang koproba babye, yuk ninye asik nang do, yuk mutuku arye tikil yangan nang do, anggun kan-kan unamak nang nirya babye, Allah Yahweh ati, malye yupu nyabikce nang ara, sik wenena ati, adiparyuk keil arye dobuka oplopmunyeura, dibinamake.

¹⁷ Aning atonun, yata nang do nirya, ninye yuk nang ati, obikce nang ara, dipkoprob wenebuka opmunyeba, dibinamake.

¹⁸ Tonda, yata nang do nirya, anggun kayapu yuk nang, sik weilamice kam ning, domba basam do, sapi basam do, talye donokuka oplobikceura, adiparyuk adipmalye ning pununa ati ara, domba basam do, sapi basam do, tamubuka pununamlume. Ara, talye ati kume. Deiyok ara, el kwitcapu nang ning opmalya, ati elce tamubuka pununamle.

¹⁹ Aning atonun, ninye tonok-tonok nang arye, yuk nang sik kayapu neika ulamikce nang, sik ning ton doprobikirye, malye kipdebikceopra, anang babye sik winibikce touk, anggun ton wininamlume. Aning winipmunyopura, “Anggun winipmalum touk ati, winipmabe,” nyanamake.

²⁰ Ati, winipmanto ara, sik yuk nang arye, yok bulaklopsikcopura, ayok pununa ati, tamubuka, sik yok babye, ceplopnamlulume. Atonun, yuk nang arye, sik dan tam asing tuluklobikceura, aning pununa ati, anye el dan tam asing babye, tulubuka onamake. Atouk elce, yuk nang ati onmalya ani, anang sik si duk luksaklopura, asi duk pununa ati, el si babye, kurukultakanamake. Tonda, yuk nang nirya ati, malye kipdeibikiba, el nong deice obikirye, malye kipdeibikcopura, awinilinye biti, tamubuka awinipmasikca atonun, anggun babye, anang ati wininamlume.

²¹ Ura yata nang do nirya, anggun weilamlum kam ning, domba ato ning opmunyopura, tamubuka akam ninguk punulanamlume. Bukni, yata nang birye do, nirya elce ninye yuk nang ton oplyeba diplyopura, el pununa ati, aninye opmalya deiyoknye babye, onamlume. Ara, elce ninye opmalya dekna ati, ninye opmalya deiyoknye babye, wenebuka opmunyeba dipnamle.

²² Narye yupu deiyok tonok, anggunti arepsince, “Wininamlume,” nyapdeipsise ning ara, pia moubuka talipmunyakarye, unamlume. Ara, anggun Israel yala nang koproba ap, tonda anggun ap neika unamlum ninye asik nang nirya ap ati, “Aning wininamlume,” nyapsine. Nara, Allah, Yahweh arye nyapsine. Anggun ni koproba Allah unune. Allah arye Musa biti nyabuk.

²³ Allah arye, ayupu akunum nyabukopura, Musa birye, anyabuk yupu nirya ara, sik Israel nang kekena ati, “Allah arye nyapsile,” nyabuk. Nyabukopura, sikce Allah Yahweh ati, malye yupu nyapmoknye bira, wenena aik pum tam arye dobuka, bai tam dopkwetebikce, keil arye cobuka onmeka ani dibuk. Ati, Israel yala nang nirya ara, Allah Yahweh arye, Musa ati, “Aning atonun wininamnyake,” nyapdeibuk touk, Israel nang arye winilamik.