Imamat 23 - Eipomek

Allah el si erena ati wipdeibukce, “Na mambul sum ani, na mambul talak ani,” nyapdeibuk yupu

¹ Allah el si Yahweh arye, Musa biti nyabuk.

² Musa ance, Israel ninye nirya ati, nyapnamlyame. Allah el si Yahweh arye wipdeipsil sum, weik mambul sum nirya ara, el si eren sum anya arye, Israel ninye nirya bulubibirye, ‘Asum-asum ap, atalak-atalak nirya ap ara, nun ni Allah, el si erena sum ati, ‘Asum nirya ara, weik mambule. Tonok ning babye kum bataknamabe,’ tenebuka unamabe. ‘Allah arye nyapnuke,’ ance Musa birye nyapnamlyame,” Allah arye, Musa biti nyabuk.

Allah arye, weik mambul sum, Sabat sum ati, nyabuk yupu

³ Like nakub barye (6) sum ara, anggun pil don sum bukni, like tekbarye (7) sum ara, Allah na weik sum ati, pil dona meme. Like tekbarye sum deice arye, pil dona kumce, anggun nirya bulupmunce, na siuk erenamnulume. “Asum ara, pil dona kumce, dikdik senamlulume. ‘Asum ara, Allah el si Yahweh ati, el si eren sum anya arye, mambul sum koprop,’ tenebuka unamlulume. Ara, dan mutuku do nirya, anggun binuka unamlum mutuku nirya ara, aninguk tenebuka unamlulume.” Allah arye nyabuk.

Allah arye, weik mambul sum ati, nyabuk yupu

⁴ Allah arye, Musa biti nyabuk, “Musa ance Israel ninye ati nyapnalyame. Allah el si Yahweh arye, wipdeipsil weik mambul sum nirya ara, el si eren sum ati, Israel ninye nirya bulubuka bukmunce, ‘Asum-asum nirya ara, weik mambule,’ tenebuka unamabe. ‘Allah arye asum ara ani, atalak ara, ani’ tenen, wipdeibuk touk, atalak akunum yalyopura, ‘Israel ninye yukupniba, bulubuka el si erenamabe’ tenen, yanuka weknamake, nyapsuke,’ nyapdeipnalyame,” Allah arye Musa biti nyabuk.

Nena Kum Roti Kwalina ati, nyabuk yupu. Tonda, Allah arye, “Mesir mutuku noutam arye lyepsuk talak ara, Kaplina ati Kwalin Sum, el si Paskah,” nyabuk yupu

⁵ Allah arye Musa biti nyabuk. “Ura, min yuma wala noutam bukni, tanggal empat belas (14) keting noutam kipmalya ani, sin tam talak bukni, inipnulyopura, anggun nirya bulupmunce, nara Allah, na si Yahweh si erena ati, na nyapnamsin ning arenamnululume. Aning deiyok ara, Mesir mutuku noutam arye, Mesir ninye, sik du mapu, min talak deibik mapu opse bukni, Israel ninye sik min talak deibik mapu ara, kum opsirye, sik aik kaplibuka binamsirye, Israel ninye lyebuka boyanamsa atia. Atalak awinipse ning ati tenebuka, asum ara bulupmunce, na si erenamnulume,” Allah arye nyabuk. Nyabukce ayupu ton nyabuk.

⁶ “Ura awala deiceuk, koklom dikin sum kipnopura, ara tanggal 15 sum kunum kiplyopura, bulupmunce, nara Allah, na si Yahweh si erena ati, nena kum roti dabuka, like tekbarye (7) sum wibuka, atalak noutam nirya arye, aroti yalauk dinamlulume, nyapsine.

⁷ Wini talak bukni, like tonok ning ara, like tekbarye sum kiplyopura, Allah na mambul sum anya arye, yuk-yuk sum nirya, pil yala-yala nirya dolamlum touk, lik tekbarye sum deice ara, atalye pil ton kum donamlulume. Ikin pil dona pia kumce, asum ara bulupmunce, na siuk erenamnululume.

⁸ Like tekbarye (7) sum nukuka, atalak noutam nirya bukni, asum-asum nirya ara, sik adiparyuk, nara Allah, na si Yahweh ati, anggunce weilamlum kam ning obuka, arenamnulum ning ara, uku dongopmunba, uku arye dinamle. Aning atonun wininamlulume. Atalak noutam ara, like tekbarye (7) sum nukmunce, asum nirya na arena ati, pil dolulum ning ara, teleb bukni, like tekbarye sum akunum uplyopura, asum arye, talye pil nirya pia kum donamlulume. Aning kum bukni, bulupmunce, na siuk erenamnululume. Allah arye, Musa biti nyabuk.

“Anggun wa win dam noutam moulamle ning, min yuma ning dobuka, Allah el si erena ati arepnamlume,” nyabuk yupu

⁹ Allah el si Yahweh arye, Musa biti nyabuk.

¹⁰ Ance sik Israel ninye ati, nyapnamlyame. Na Allah arye arepnamsin mutuku, akunum wekelbimunyopura, aning-aning nirya, nong malamle ning ap, duk moulamle ning aning-aning nirya ap, bulubuka lipnamlulume. Winipmunyopura, gandum nong ning dopropmunce, min yuma moulamle ning ara, wibuka koupne tonok koupmunce, Allah el si eren aik pum tam, pil dona deiyok nang, sik dam boyanamlulume. Adeiyok nang ara, Allah ap, ninye ap, ansinilina deiyok nang ati nyapsine.

¹¹ Anggun akunum boyamunce, adeiyok nang dam arepneba, Allah el si eren aik pum tam, pil dona weik deiyoknye birye, agandum koupne dobuka ereplirye, Allah el si Yahweh dam arye, erebuka bobilirye, ereptalibuka bobinamle. Winipnamaka deiyok ara, ‘Allah arye, Israel ninye ati, sik malye ning ara, namin kibuka, kum kiplirye, lyepsutue’ tenen, wininamake. Apil donamle sum ara, tekbarye sum pil dona kumce, dikdik sebuka, Allah el si erenamak sum akunum upliba, mapmamunya ani, bereknamle talak ati nyapsine. Allah arye Musa biti nyabuk. Nyabukce, ayupu ton nyabuk.

¹² Ura, arup nyapmasin sumuk, min yuma moulamle ning, koupne tonok dobuka, Allah ati arepmunye sum ara, anggun adiparyuk yim domba basam, keting tamun tonok nelamlye ning bukni, bol malye una kum ning bobuka, Allah ati arepnamlulume. Arepmumba, Allah el si eren aik pum tam, pil dona deiyoknye birye, aning bobuka, uku dongopliba, uku dipnamle. Ara, Allah el si erena ati, arelbanamlulume. Allah arye, Musa biti nyabuk. Nyabukce, ayupu ton dukdongobuka nyabuk.

¹³ Winipmunye talakuk, roti dana ati deiyok ning, el si tepung, pia teleb ning, mitik tonun ikin ara, empat liter ap, tonok liter noutam ning ap (4.5 liter), minyak ap, tabakuka deipmunce, aning dobuka, uku dongopmunba, uku diplyopura, nintong teleb upliba, anggun ni koproba Allah, na si Yahweh kekepnirye, kanye deipnamsine. Tonda, anggur mek, tonok liter kwebuka, aning ap tabakuka, na Allah ati, arelbanamlulume.

¹⁴ Anyapmasin ning nirya ara, pia tuba-tuba winipra banamlume. Ara, moulamle ning min yuma ning ara, na Allah ati, min kum arepmanumunye talak ara, roti ap, gandum imbik ning ap, ura gandum do, yakong do, ato ning, uku dapmaminye ning babye, mitik ning babye, ton kum dinamlulume. Nati, min yuma lipmamunye ning, wibuka akunum arepnumunyopura, aminyan talak ara, anyapmasin ning nirya, dina telebe. Anyapmasin ning ara, anggun ap, anggun mapu ap, anggunce deipnamlumba, dadeipdanin binamak ninye nirya ap, aning pia winipra banamake. Tonda, amutuku babye, yuk unamlum mutuku babye, anyapmasin ning pia winipra banamlume, kum bataknamlulume, nyapsine. Allah arye Musa biti, nyabuk.

Minggu nukuka, tekbarye minggu kunum kiplyopura, weik kwalya kwalinamak ning ati, nyabuk yupu

¹⁵ Allah arye nyabuk. Anggun pil dona kum diparyuk, dikdik sebuka, Allah el si eren sum, tekbarye sum, ‘Sabat sumʼ nyalamap sum akunum kiplyopura, ambusumto sum arye, anggun koulalum ning nirya, nong malamle ning babye, duk moulamle ning babye, min yuma ning dobuka, koupne koupmunce, Allah ati arepnamlume. Arepmunyopura, Allah el aik pil dona deiyoknye birye, nati bobuka beprelyopura, asum arye deiyok koubuka, tekbarye minggu nuknamlulume. Aminggu-aminggu nirya ara, ‘Tek barye upnamle minggu ati nuknamlulum’ tenen, nyapsine. Aminggu ton, aminggu ton nukre banmamunya ani, tekbarye minggu akunum uplyopura, akunuma. Noutam ton batakna kume.

¹⁶ Winipnamluma ati, asum-asum yupa weik, lima puluh (50) sum nukunamlulume. Ara, Allah el si eren sum, Sabat sum nukre banmamunya ani, Sabat sum tekbarye nukuka, akunum uplyopura, asum bukni, ambusumto sum akunum uplyopura, yupa pamubarye (50) sum akunum nukre balamunce, mapra balamunya ani, yupa pamubarye sum akunum uplyopura, asum arye tonap gandum koulamunye ning, winiryuk teleb ning bobuka, Allah el si erena ati arelbanamlulume. Nara Allah, na si Yahweh nati arelbanamlulume, nyapsine.

¹⁷ Anggun bona yuk-yuk bolamunye atonun, roti bitinye dapmunce, Allah el si eren aik pum tam, pil dona deiyoknye dam boyamunce, arepmunyopura, sikce Allah el si erena ati, el si erenamlume. Aroti bitinye ara, roti dana ati deiyok ning, el si tepung, pia teleb ning ikin ara, empat liter ap, tonok liter noutam ning ap (4.5 liter) dobuka, tonda roti nena deiyok ning, el si ragi ap, yambul anun tabakmunyopura, roti dapnamlulume. Ateleb ning nirya wibuka, nara Allah, na si Yahweh ati, arelbanamlulume. Aning ara, anggun koun ning, min yuma ning dobuka, Allah na si Yahweh erena ati, aning arepnumunyeba, na si eren aik pil dona deiyok nang arye, aning dobuka, erebuka bobikirye, bepre binamake. Winipmunyopura, na si Yahweh, na Allah ati arelbanamlulume, nyapsine. Allah arye nyabuk. Nyabukopura, Allah arye, ayupu ton nyabuk.

¹⁸ Aroti bitinye arenamlum talak babye, keting tamun tonok mamlye yim domba basam tekbarye ap, mitik sapi basam yim tonok ap, tonda weik domba basam yim bitinye ap, anirya ara, pia teleb ninguk, tabakuka arelbanamlulume. Aning nirya ara, nara Allah, na si Yahweh erena ati, imam nang arye uku dongopnamake. Winipmunyopura, anggun malye winin ning kilipnamsine. Akam ning, uku dapnamlum sumuk, arup nyapmasin ning, roti ap, anggur mek ap, gandum ap, atalak aryuk tabakuka arelbanamnululume. Arepmumba, imam nang arye, aning dobuka uku dongobikiba, uku diplyopura, ateleb nintong welepliba, nara Allah, na si Yahweh, aning kekepnirye, na kanye deipnamsine.

¹⁹ Atalak aryuk, anggun malye winin ning namin kibuka kilina ati, yim kambing basam tonok arepnamnulume. Tonda nara, anggun ni Allah ap, anggun Israel ninye ap, ‘Teleb ubuka neika uptibye’ tenen, keting tamun tonok mamlye yim domba basam bitinye dobuka boyamunce, na si eren aik pil dona deiyoknye biti arepnamlume.

²⁰ Aning ap, min yuma ning roti bitinye ap, boyamunce, na aik pil dona deiyoknye ara, Allah ap, ninye ap, ansinilina deiyoknye arepnamlulume. Arepmumba, adeipmunye ning dobuka, elce Allah na si erena ati, na dam arenamnile. Adeipmunye ning nirya dobuka boplirye, na Allah ati erebuka, na Allah arye aning nirya ati, ‘Aning ara, pia teleb ning,’ tenepnirye, na aik pil dona deiyoknye biti, kanye deipnirye, el malye winin ning babye, namin kipnirye, kum kilipnamne. Allah arye Musa biti nyabuk. Nyabukce, ayupu ton dukdongobuka nyabuk.

²¹ Aning nirya winipmunye sum babye, ance Israel ninye ati, nyapnamlyame. ‘Asum ara, nun nirya bulubukap wekibirye, weik sum upnamsile. Tonda, Allah elti, winilen sum anya arye, asum-asum nirya, ikin pil dolulum ning nirya ara, asum ara, pil ton dona meme. Dikdik sebuka, Allah el si Yahweh, el siuk erenamlulume. Anyapmasin ning ara, anggun ap, anggun mapu ap, anggunce deipmunba, dadeipdanin, banamak ninye nirya ara, aninguk, pia winipra banamake. Tonda, amutuku babye, yuk unamlum mutuku babye, anyapmasin ning pia winipra banamlume. Pia kum bataknamlulume, nyapsine. Allah arye Musa biti, “Ance sik Israel ninye biti, ayupu nyalbinamlyame,” nyabuk. Ayupu nyabukce, ayupu ton nyabuk.

²² Sik wa win dam nong lipropnamak talak ara, wa kup-kup ak tikamlye ning ara, parapkabuka lilona meme. Aning nirya ara, nirya libuka, sirya kum daknamlulume. Aning kum bukni, wa sirya kup-kup ubuk ning ara, aupnamlule. Tonda, wa wina nong lipmunce, mangkau arye tukwak talye sakmalye ning ara, tuba tonap yamunce, bulubuka lilona meme. Asukumuk bataknamlulume. Deiyok ara, wa kup-kup ap, talye sakmalye ning ap ara, sik bona utotoa kum ninye ap, sik mutuku noutam ninye asik tikilyangan nang ap, ananguk doprobikirye dinamaka ati, nyapsine. Nara Yahweh, anggun ni Allah, na tonok unirye nyapsine. Allah arye Musa biti, nyabuk.

Allah si erena ati, weik kwalya kwalipna arye, pong-pong ana, el si terompet, mot selamik ati, nyabuk yupu

²³ Allah el si Yahweh arye, Musa biti nyabuk.

²⁴ “Ance Israel ninye nirya ati, nyapnamlyame. Allah arye nyapsile. Tek barye wala noutamak bukni, like tonok ning ara, tanggal satu ara, weik sum kipdeipnamlulume. Asum ara, anggun Israel ninye nirya, pil tonok babye, pia kum donamlulume, dikdik sebuka na siuk erenamnulume. Asum ara, anggunce, ‘Kume, asum ara, weik mambul sum ati, nun nirya bulubuka, Allah el si erenamabe’ tenen, pia wininamlulume. Tonda, asum deiyok kouna ati, pong-pong ana, el si terompet dobuka, weik arye nyapnamlulume. Ara, kili sal nirya kekebikirye, ‘E dikdik sen sum akunum deiyok kipla, tenepnamak’ tenen, nyapsine.

²⁵ Asum ara, ikin pil tonok ning babye, pia kum donamlulume. Dikdik senauk unamlume. Talye pil kum donamlum bukni, Allah el si Yahweh, el arin ning ati, kintinibuka arepmunce, uku dongopmunyopura, el si Yahweh erenamlulume. “Allah arye nyapsile,” nyapnamlyame. Allah arye Musa biti nyabuk.

Israel ninye, sik malye winilamik ning ati, lukparabuka oplopsutu bukni, Allah namin kiplirye, amalye winin ning kum kilina ati, weik sum upliba, kwalina ati, nyabuk yupu

²⁶ Allah el si Yahweh arye Musa biti nyabuk.

²⁷ Ura, wala tekbarye akunum uplyopura, awala noutamak bukni, takubarye (10) sum, tanggal sepuluh (10) akunum uplyopura, weik mambul sum, na si eren sum upnamle ati, Israel ninye nirya bulupnamlulume. Asum ara, anggun malye winin ning ati, adiparyuk oplopsitinye bukni, aning namin kipnirye, anggun malye winin ning kilibuka kum kipdeipnamna ati, kam ulamle ning obuka, anggun malye winina kilina ati, arepnululume. Ara, weik mambul sum atia. Ati, asum ara, din ning dina kum diparyuk, nara Allah, na arin ning ati, kintinibuka arepmunce, uku dongopmunyopura, na si Yahweh erenamlulume.

²⁸ Asum ara, yata ikin pil do nirya, tonok pil babye kum donamlulume. Deiyok ara, asum ara anggun malye winin ning ati, namin kipnirye kilibuka, kum kipdeipnamne sum atia. Asum ara, na si eren aik pil don nang arye, anggun ni koproba Allah, na dam yakirye, kam ning obuka, teleb arin ning arepnicopura, Israel ninye malye wininyak ning nirya kilina ati, amalye ning namin kipnirye, kum kipdeipnamne ati, anggun nirya ara, yuk talye pil dona meme. Anggun malye winina ati, lukparabuka oplopsitinye bukni, anggun dekna ati, kam ulamle ning opmunce, na arena ati, uku dapnamlulume.

²⁹ Yatanye do nirya, asum deice din ning, urdem lukparabuka diplyopura, wenebuka oplopnamne. Israel kili sal kan-kan arye yaknamlulume. Yuk Israel ninye ap, neika kum unamake.

³⁰ Yata ninye do nirya, asum deice pil tonok ning babye doplinye bira, wenebuka oplopnamne. Anye ap, yuk Israel ninye ap, neika kum unamle. Opneba dipnamle.

³¹ Ati, asum ara, pil tonok ning babye, dona meme. Anyapmasin ning ara, anggun ap, anggun mapu ap, anggunce deipmunyeba, dadeipdanin banamak ninye nirya ap, aning pia winipra banamake. Tonda, amutuku babye, yuk unamlum mutuku babye, anyapmasin ning pia winipra banamlulume, pia kum bataknamlume, nyapsine.

³² Asum ara, dikdik sen sum upnamsile. Tonda, asum noutam ara, din ning tonok ning babye, kum dinamlulume. Ara, awala noutam bukni, like jam 9 upnulye keting nukuka, dukdongopra like jam 10 keting upnulye ara, dikdik senauk unamlume. Dine dina kumce, na si erenauk wininamlulume. Allah arye Musa biti nyabuk.

Allah el si erena ati, doltakna asik barasik mitik aik dopnamik ning ati, nyabuk yupu

³³ Allah el si Yahweh arye, Musa biti nyabuk.

³⁴ Israel ninye ati nyapnamlyame. Wala tekbarye ning, akunum uplirye, awala noutam tanggal 15 deice ara, Barasik Dolin Aik ati kwalina sum upnamle. Aning babye, na si erena ati, weik sum upnamsile. Asum deice deiyok koupmunce, anirye tekbarye sum deice ton, tabakuka pia upra banamlulume.

³⁵ Min yuma sum ara, tanggal 15 deice arye, ara dikdik sen talak ati, urdem pil dona meme. Pil dona kum bukni, anggun nirya bulupmunce, na si erenamnululume.

³⁶ Asum arye nukuka, tekbarye sum tonap, anoutam nirya ara, kam tuba ulamle ning obuka, nara Yahweh, na si erena ati, uku dabuka arepnumunce, winibuka tuba winipra banamlume. Winipmamunya ani, like pinbarye (8) sum, tanggal 8 akunum uplyopura, asum babye dikdik sen sum upnamle. Asum ara, anggun nirya bulupmunce, kam tuba ulamle ning obuka, nara anggun ni koproba Allah, na si Yahweh erena ati, uku dongobuka arepnamnulume. Asum ara, sirya dakna sum ati, talye pil tonok ning babye, dona pia meme. Allah arye Musa biti nyabuk. Nyabukce, ayupu ton nyabuk.

³⁷ Ura, arup laka nyapmasin yupu nirya ara, na Yahweh arye, akunum wipdeipse sum anya arye, anggun nirya ara, ‘Asum nirya ara, weik mambul sumuk,’ tenenamlume. Tonda, “Asum aning arepnamnulum sum ton, aning arenamlulume,” nyabuka, akunum laka nyapmasin touk, asum nirya, na si erena ap, tonda anggun malye winina ati, kum opnamsin bukni, anggun lyena ati, kam ulamle ning obuka, uku dongopmunce, na si Yahweh erenamnulume. Ton ning ara, gandum atonun ning. Ton ning ara, anggur duk mek. Ton ning ara, kam ning obuka arenamnulume. Aning-aning nirya ara, narye, ‘Asum arye, aning arenamnululume. Orsum ara, aninguk arenamnululume,’ nyapdeiamsise touk, arenamnululume.

³⁸ Aning arenamnulum ning ara yuk, tonda, anggun kanye aryuk, ‘Aning ara, Allah el si erena ati arepnamne,’ tenepmunye ning ara, yuk ulule. Tonda, dikdik sen sum, Sabat sum deice, na Yahweh, na si erena ati arepnamnulum ning ara, yuk ulule. Aning nirya, yala yuk-yuk aulul bukni, aning nirya ara, na Yahweh ati arenamnululume. Allah el si Yahweh arye nyabuk. Nyabukce, ayupu ton nyabuk.

³⁹ Ati, wala tekbarye (7) ning akunum uplirye, awala noutam tanggal 15 deice ara, deiyok kounamlulume. Anggun kouamunye ning, akunum wisibuka, nong uplya ati, lipmunyopura, asum anyapce, deiyok koubuka like tekbarye sum deice arye, na si Yahweh erebuka, teleb ning arepnamnululume. Deiyok koun sum ara, ara dikdik sen sum upnamle. Aning atonun, like pinbarye (8) sum, tanggal delapan babye (8), dikdik sen sum upnamle.

⁴⁰ Asum like tonok ning deice ara, yo duk moulamle yo binuka, pia teleb yo duk dakuka, nati arepnamnulume. Tonda, kapce bok atonun bok ap, tonda yuk talye yo taruk bukni, bok weik wamlye ning ap, dobuka kintinipnamlulume. Ayo taruk weik tonun talipmunce, erebuka kwakdupmunce, na si erenamnulume. Atalak noutam ara, ikin kanye bona kume. Teleb kanye bobuka, pin-pin asa arye, na si Yahweh ati, si erenamnululume. Winipmamunya ani, like tekbarye sum akunum uplyopura, akunum ati bataknamlulume. Aning nirya wininamlum ning ara, aketing tamun, aketing tamun noutam nirya, wala tekbarye ning akunum kiplyopura, apil donamlulume.

⁴¹ Aketing tamun, aketing tamun nirya ara, tonok talak bukni, tekbarye wala uplyopura, like tekbarye sum deice arye, aning pil donamlulume. Ara, anyapmasin wala, tekbarye wala bukni, like tekbarye sum noutamak nirya, adeice arye, akwalina ap, na si erena ap, winipra banamlulume. Tonda, anyapmasin ning ara, anggun ap, anggun mapu ap, anggunce deipmunba, dadeipdanin banamak ninye nirya ap, aning pia winipra banamake. Aweik sum ara, pia kum batakanamlulume.

⁴² Ton ning ara, akwalina talak ara, anggun aik koproba, kum mapnamlulume. Aning kum bukni, mitik bai tam doltakna aik dopmunce, anyaik pumuk mapnamlulume. Ara, Israel yala ninye koproba nirya ara, atalak dipdongobuka, like tekbarye sum deice arye, barasik doltakna aik pumuk mapnamlulume.

⁴³ Anggunda, mitik barasik doltakna aik dobuka, mapnamluma deiyok ara, nyapnusine. Ara, anggunce deiplumbuk, dadeipdanin banamak ninye nirya arye, biknamaka ati nyapne. Ara, narye Israel ninye bobuka, Mesir mutuku noutam arye, lobuka boyase talak ara, mek ap, mok ap kum ati, ninye kum ulamik mutuku noutam barasik doltakna aik dopribalamika ati, anggunce deiplumba, dadeipdanin banamak ninye nirya arye, ‘Aning biknamak’ tenen, mitik barasik doltakna aik dobuka mapnamlume, nyapsine. Nara Yahweh, anggun ni Allah, na tonok unirye nyapsine. Allah arye Musa biti, nyabuk.

⁴⁴ Allah, el si Yahweh arye Musa biti, ayupu nirya nyabukopura, Musa ayupu kekebukce, sik Israel ninye dam binuka, lak nyabuk. Ara, Allah arye, ‘Sik mambul sum ani, sik weik kwalina talak ara ani,’ nyapdeibuk touk, sik kekena ati, laka nyalbiyukba, kekebik.