Imamat 22 - Eipomek

“Allah ati aren ning ara, pia teleb lek ninguk, ulule,” nyabuk yupu

¹ Allah Yahweh arye, Musa biti nyabuk.

² Narye anyapdeipkin yupu ara, ance Harun ap, el mapu ap ati, nyapnulyame. “Sikce pil donamak ning nirya ara, pia moubuka tenebikirye, pil donamake. Ara, sik Israel nang arye, yata yala ning do nirya, na Allah arena ati, aning-aning bobuka yakirye, na si erena ati arenamniake. Arepniceba, anggun imam nang arye, aning nirya bobinuka, pil donaluma ati, ‘Sik imam nang arye, na pia teleb lek ning, pia mingne ning, malye kipdeipnikcakʼ tenen, nyapkinine. Sik imam nang arye, na pia teleb lek ning talye lukparabuka talibikirye, malye-malye winibikcopura, ‘Aning nirya malye kipdeibikcakʼ tenena ati, nyapne. Na si ara, pia lek si unulula ati, sik malye winibikce deice arye, ‘Na pia teleb, lek si malye kipdeipnikcakʼ tenen, “Anggun pil ara, pia moubuka tenepmunce, donamlulume,” nyapsine. Nara, pia dipkoprob Allah Yahweh unirye, nyapkinine.

³ Tonda, ance imam Harun biti nyapminyeura, el mapu nirya ati, nyanamlule. Ara, narye anggunti, “Aning ara, wininamlume. Aning ara, pia kum wininamlume. Aning babye, kum talinamlume,” nyapdeipsise ning bukni, sikce aning talibikirye do, aning winibikirye do, adeice arye, malye kipdeipdakiba, malye ning sik deice tuba unmalye buk, Israel nang arye, na pia leknye arena ati, yanuka arepnamak ning dam ara, pia kum yanganamnyake. Ara, Israel nang arye, ‘Nun ni koproba Allah, el si erena ati, ‘Aning ara, el ‘Naʼ tenen ninguk upmaleʼ tenen, nati kintinibuka arenamniak ning ati nyapkine. Bukni, sik imam nang malye tenena arye, talye lukparabuka, sik aning winipmakce imam nang ara, pia buklopnamnarya. Aning bataknamne. Tonda, na dam ton kum yanganamake. Anang ap, na ap, neika pia kum unamabe. Anyapdeipsen yupu ara, atalak arye dipdongobuka, doyanamle talak babye, pia ati winipnin banamnyake. Na Allah Yahweh arye, nyapdeipsine.

⁴ Tonda, Harun birye deiamukba, dadeipdanin banamak nang noutam arye, tonoknye ton, el nong bol deice imun kanye bolamak uk, pukle suse dilamlinye bira, na Allah ati arepmace din ning ara, pia kum dinamnyake. Tonda, ki dam noutam arye, uk dilamlirye, lin bisik arye yabung balamlinye do, aning ulamlye bira, na Allah ati arepmace din ning ara, pia kum dinamnyake. Nati, arenamak din ning ara, mingne ning, pia teleb lek atoto ning ulule ati, amalye un nang ara, “Akunum teleb kipmakile,” kum nyabice talak ara, adin ning ara, dobuka kum dinamnyake. Tonda, imamnye birye, ninye dipmakce nang taliplyopura, elce akunum malye kipdeipdanmalule. Aning atonun, dipmakce nang deipmacak do, dipmakce nang, sik nong bol pipmalye ning do, aning ton mangkau arye taliplyopura, elce akunum malye kipdeipdanmalule. Tonda, imam nang arye, sik lin bisik arye yabung do, den ula do, aning balamlinye bira, el nong akunum malye kipdeipdanmalule.

⁵ Tonda, tuku deice talye balamle ning, kwatima do, tang do, kuluma do, malye kam ning ton aupmalye buk, imam nang arye, aning bol pibikcopura, sik nong akunum malye kipdeipdanmanyake. Aning atonun, talye awamlye ning do, ninye nong do, narye, “Aning ara, pia kum talinamlulume. Aning ara, bol pina meme, malye kipdeipsilyake,” nyapdeipsise ning nirya ara, sik imam nang arye, pia kum talinamake. Bukni, mangkau arye talibicopura, sik nong deice, akunum malye kipdeipdanamake. Anang ara na dam kum yaganamniake.

⁶ Imamnye birye, atonun malye ning bol pipmalinye bira, akunum malye kipdeipdanmalule. Atonye bira, malyeuk unamle. Ara, amalye ning winipmalye imam bira, aning talipmalye talak aryuk, elda malye ning wininanye unmalya ani, awiniplye talak arye ubuka, sin tam talak ara, malye ning tuba upnamle. Tonok keting noutam nirya ara, el anye birye, mek kum kekmalyopura, malyeuk tuba ulula ati, na Allah ati, yanuka arepnamak din ning ara, pia teleb, lek atoto ning ulula ati, anye birye, adin ning bobinuka, kum dinamlule. Keting min kum kumulbalyopura, anye el nong nirya mek keklyopura, adin ara, ur dipnamlule.

⁷ Bukni, keting akunum komuplye talak ara, akunum mek kekuka teleb kiplyopura, alek din ning dobuka, dinamlule. Adin ara, anye el dina ati, talye mangkau arye dinamlule.

⁸ Bukni, yata ning do nirya, bai tam ulamle kam ning, el yuk dipmalye ning do, sik bidamang mamun arye, obuka dipmalirye, seklopmalye ning ara, imam nang arye, atup sekdoba dobuka, pia kum dinamlule. Aning tup dobuka diplyopura, el bidamnye nong deiceuk, malye kililanamle. Na Allah Yahweh arye, akunum nyapsine.

⁹ Ati, sik imam yala nang nirya ara, adiparyuk na nyapmasin yupu moubuka kekebikirye, aninguk talibuka, dakeiam asa arye unamake. Tonda, anyapdeipman ning touk, kum winibikirye, malye kipdakiryuk, na lek aik pum tam binuka, pil dobikcopura, adeice arye na lek aik malye kweipkamnunge. Winibikcopura, narye, “Sikda malye kipdanmakce, nati malye kipdeipmaka ati, merekuka opnamane,” nyapnyeba, na lek aik pum tam pil donmace talak aryuk, dibinauk unamake. “Aning ara, winibuka telebuk unamlume. Mem ning talina kume,” nyapdeipsin yupu yanipmaca ati, wenepnamne. Na Allah Yahweh, narye sik imam nang wibuka kintinipsirye, ‘Sik anang ara, telebuk unamake,’ tenepsirye, teleb kipdeipse nang ati, nyapne.

¹⁰ Israel nang arye, ‘Nun ni koproba Allah, el si erena ati, aning ara, ‘El tenen ninguk upmaleʼ tenen, nati kintinibuka arenamniak ning, mingne teleb ning ulula ati, sik imam nang ap, sik duweit mapu silip ap dinamnyake. Bukni, yuk talye daunyak Israel nang do, sik imam nang, sik aik pil melina ati, pil don nang do, sik aik tia pil melibuka donmakiba, yo bok arenyak nang do, sik atalye nang nirya ara, nara Allah, na koproba ning, na lek dokola ning ulula ati, aning pia kum dinamnyake.

¹¹ Bukni, imam nang ara, ‘Naʼ tenen, lek ning, mingne din ning dinyaka ati, imamnye birye, el pil dona ati, yo bok deice arye dekelyeba, el aik neika ulamlirye, pil dolamlinye ap, tonda imam el bidamnye deiamlye mapu ara, Imamnye el dilamle din ning ara, sik babye dinamnyake. Anang ara, malye ur dinamnyake. Aning ara teleb uka.

¹² Tonda, Israel nang arye, ‘Nun ni koproba, Allah el si erena ati, aning ara, el tenen ninguk upmaleʼ tenen, nati kintinibuka arenamniak ning ara, pia teleb mingne din ning ulula ati, imamnye birye deiamlye kilmu ara, yuk talinye domlyopura, nati arelyanganamniak ning, el li koproba, imamnye birye deiamlye bukni, akilmu ap, el akanye ap ara, mingne din ning dobuka, kum dinamdake.

¹³ Bukni, imamnye, el kilmu ninye akunum domlye buk, el akanye akunum dipliba, youwak ulamlul do? Tonda el akanye birye bataklye do ati, min ton delina kumcuk, yuwak ulamliba, tamubuka el li koproba aik yanamlye kil ara, el li koproba, imam dilamlye din ning ara, el kilmu babye, ur dinamlule. Ara teleb uka. Deiyok ara, adina ara, imam nang sik din ninguk ulula ati, imam nang, sik mapu silipuk dinamnyake. Bukni, sik talye unyak nang nirya ara, na Allah ati areninyak mingne ning ara, pia kum dinamnyake.

¹⁴ Tonda, imamnye el mapu silipuk kum bukni, talinye mangkau arye, Allah si erena ati arelyanganyak, dina bobinuka diplyopura, adipmalye din ati pununa ara, adin ning, el dekna atonun bukni, tabakuka dua puluh persen ton (20%) tabakuka kinitiplyopura, sik imam nang ati, arelyanganamlule.

¹⁵ Israel nang arye, ‘Nun ni koproba, Allah el si erena ati ara, el ‘Naʼ tenen ninguk upnamleʼ tenen, na Allah Yahweh ati, kintinibuka arenamniak ning nirya ara, mingne ninguk ulula ati, sik talye daunyak Israel ninye ap, anggun imam nang ap, aning ara, malye kum kilinamnululume. Aning nirya ara, ‘Naʼ tenen, mingne ning ulula ati nyapsine.

¹⁶ Adelilyanmace ning ara, ‘Naʼ tenen, mingne ning, lek ning ulula ati, talye Israel nang arye do, yuk nang arye do, mangkau arye aning dibikcopura, na Allah arye anang ati wenepnamne. Ati ara, sik malye winipmakce ati, bita weneptinye buk, sikce, ‘Se, Allah arye, nun malye winipmap ning ati, namin kipsilirye, kum wenepnamsileʼ tenen, na aren ning ton kintinibuka arepnamniak ati nyapne. Deiyok ara, ‘Na mingne ning, na lek ningʼ tenen ning dobuka, dipmaca deice arye, anang arye sik bidamang ati, malye kipdanmanyake. Nara, Allah Yahweh unune. Narye, anggun Israel nang nirya ati, teleb kibuka delisununa ati, narye ayupu nyapsine. Allah arye, Musa biti nyabuk.

Allah arye, “Aning ara, na si erena ati arena telebe,” nyapdeibuk yupu

¹⁷ Allah Yahweh arye, Musa biti nyabuk.

¹⁸ Ayupu nyapdeipsinye ning ara, “Aning-aning winina ati, ance Harun ap, el mapu ap, sik Israel nang nirya ap ati, ‘Allah arye nyapdeipmasile,’ nyapnalame. Ara, sik Israel nang do, ninye asik nang, yuk mutuku arye tikilyakikirye, sik ap neika unyak ninye, asik nang do, Israel nang ap, sik kan-kan neika unamak nang ap ara, sik malye ning kilina ati, uku dongonamak ning ara, tenipdekirye, na Allah Yahweh ati, arenamniak ning ap, tonda sik dam uplye ning ati, pia talye arenamaka ning ara, winibuka arenamake.

¹⁹ Na Allah arena ati, bobuka arelyanganamniak domba basam do, sapi basam do, kambing basam do nirya ara, yim basamuk boyanganamniake. Ara, bol pia teleb ninguk boyamunyeura, nara Allah, na kanye delinamsile. Bol malye bomlye ning ara, pia arena meme. Teleb ninguk dipdebuka arenamlume.

²⁰ Akam ning nirya, domba basam ato ning nirya ara, bol malye wamlye ning ton, pia kum arelyanganamnilume. Atonun ning arepmunyeura, na Allah Yahweh arye, na kanye kum deipsinirye, anggun malye winin ning kum kilipnamsine.

²¹ Tonda, Israel nang, sik malye winipmakirye, ‘Se, nun ni koproba Allah arye, nun malye ning kilipsilirye, lyepsilirye, teleb kibuka neika unamabeʼ tenen, domba ato ning obuka, arelyanganamak ning ara, bol malye bomlye ning pia kum boyanamnyake. Ara sikce yuk-yuk bukni, ‘Na ni Allah, el si erena ati, winipnamne, winipnamne,’ nyabikirye, nyalin yupu nyabikca deice arye arepnamak ning do, tonda, sik kanye aryuk, talye arepnamniak ning do, nirya ati ara ato uka nyapne. Malye bol bomlye ning kum bukni, bol pia teleb ning arelyanganamniake. Ara, sikce na Allah ati arenamaniyak ning ara, sapi basam do, domba basam do, kambing do, aning nirya ara, bol teleb ning arebikceba, na Allah arye kanye deipnirye, aning dolonamne.

²² Tonda, domba basam ato ning opmunce, na Allah ati, arelyanganamlum ning ara, asing kuamlye ning ap, yok cemlye ning ap, tonda suse dila taleamlye ning ap, torok mouamlirye, yabung balamle ning ap, tonda bol karasa koklamlye ning ap ara, yuk uk dilamlye ning ap ara, boyamunba, uku dongobikirye, na Allah Yahweh, na si erena ati, kintinibuka arepmunyeba, imamnye birye mesba dam binuka, uku kum dongonamyake. Nara, Allah Yahweh, na si erena ap, na arena ap ati, malye bol bomlye ning, malye ning pia kum arelyanganamnulume.

²³ Bukni, winipmanto ning ton nyapnune. Ara, anggun kanye aryuk, na Allah si erena ati, talye lukparabuka arelyanganlum kam ning ara, sapi basam do, domba basam mi do, el nong nirya teleb nelul bukni, el yan ton tam ning, cang ulye ning do, ton tam ara yan bumang ulye ning do, aning ara boyanuka, arena ara, teleb uka. Aning teleb bukni, anggunce, “Nun ni koproba, Allah el si erena ati, winipnamabe, winipnamabe,” nyabuka, nyalin yupu, mikip arye nyabuka arin ning ara, kum arenamnulume. Nong mitik malye wamlye ning bobuka yamunyeura, na Allah arye, ‘Aning ara, malye ning bobuka yanmakeʼ tenen, kum dolonamne. Bukni, nyalin yupu nyana kum bukni, sik bidamnye kanye aryuk, urdem talye arenamniak ning ara, yan bumang ning do, yan cang wamlye ning do, aning arena ara, pia teleb uka.

²⁴ Ura, aning atonun, na Allah si erena ati, kam ulul ning bobuka, arelyangan ning ara, ani. Domba basam do, sapi basam do, kambing basam do, el den duruk tiklim daraplirye, butuklye ning ap, den duruk seksaklye ning ap, tonda, den duruk suse dilamlye ning ap ara, na Allah Yahweh ati, pia kum arenamnulume. Tonda ato ning ara, anggun unamlum mutuku noutam nirya ara, na Allah Yahweh ati, pia kum arenamnulume.

²⁵ Tonda, anggun Israel nang kan-kan bukni, ninye asik nang tikilyayikba, anggun ap neika ululum nang arye, weinamak kam ning, domba basam ato ning nirya babye, bol malye ning bobuka, anggun Israel nang ati arebikcopura, aning ara, bol malye wamlula ati, na Allah Yahweh ati, pia kum arenamnulume. Ninye asik nang, yuk mutuku nang arye talibuka, weilamice domba ato ning babye, bol malye uplye ning ara, na Allah si erena ati, mesba deice uku kum dongonamlume. “Aning ara, malye ning,” nyabuka, laka nyapmasin ato ning, bol malye ning dobuka, na si erebuka kina ati arepmunya babye, na Allah Yahweh arye, na kanye deibuka kum dolonamne. Bol malye ning arepnumunye deice arye, anggun malye ning kum kilipnamsine. Teleb ninguk talye arenamnulume. Allah arye Musa biti, ayupu nirya nyabukce, yupu ton dukdongobuka, ayupu ton nyabuk.

²⁶ Allah Yahweh arye, Musa biti nyabuk.

²⁷ Ura, sapi basam do, domba basam do, kambing basam do, mi winiryuk deiplye talak arye, nukuka like tekbarye (7) sum ara, el lin ap unamdake. Bukni, like pinbarye (8) sum akunum kiplyopura, anggunce, ‘Nun ni Allah ati arepnuyabe,’ tenepmunyopura, na Allah arena ati, ur boyanamnulume. Pinbarye sum akunum kipmalye ning ara, dopropmunce, na Allah Yahweh si erena ati, na dam arelyangana ara, teleb uka. “Arepmunyeba, imam nang obikirye, mesba deice uku dongona teleb uka,” nyapne.

²⁸ Bukni, domba basam do, sapi basam do, kambing basam do, maka ayala-yala nirya do, na Allah ati, ‘Obuka arepnuyabe,’ tenepmunyopura, teleb bukni, domba mi ato ning bobinuka, “Allah arelbimunye sumuk, sik nin ap, tonda sik ni ap bobinuka, atonok sum deice aryuk kum obuka arelyanganamlume. Domba ato ning, wisi ning ap, sik mapu ap, tabakuka neika asumuk obuka arelyangana meme,” nyapne.

²⁹ Ura, anggunce Allah, el si Yahweh, el telebe nyana ati, domba ato ning dobuka bobinumunyopura, anyapsin touk wininamlume. Tonda, anyapsin touk winipmunce, arepmunyopura, Allah arye kanye deipsilirye, dolanamle.

³⁰ Ati, wininamlum ning ara, ani. Ara, na Allah ati arepnamlum din ning ara, uku dongon pil dobice sumuk, domba ato ning, el tup tuba aupmalyeura, asumuk dibuka, sirya dakanamlume. Tonda, adinmamunye, din tuba deipmamunba, mapmamunya bereklyopura, ton sum kipliba, kwal ning ara, ton kum dinamlume. Na Allah Yahweh arye, nyapsine.

³¹ Aning ati ara, na Allah Yahweh arye nyapne. Narye anggun Israel nang ati, “Aning ara, wininamlume. Aning ara, pia kum wininamlume,” nyapdeipsin yupu, talibuka pia wininamlume. Nara, anggun ni koproba Allah Yahweh unirye, nyapsine.

³² Tonda, na weik etekdopnye, pia teleb leknye unune. Na si Yahweh ununa ati, malye yupu nyapmunce, malye kum kilinamnulume. Deiyok ara, anggun Israel nang nirya ara, na Allah ati, ‘Se, elda pia weik mambul etekdopnye, pia teleb leknye ulule,’ tenepnumunce, anggun Israel nang nirya arye, na siuk erenamnululume. Na si ara, Allah Yahweh unune. Naryuk anggun Israel nang ati, ‘Naʼ tenen nang ubikirye, etekdop teleb lek nang unamakʼ tenen, narye anggun wipdeipsiserye, teleb kilisunune. Na Yahweh arye nyapsine. Nara, weik etekdopnye, malye winina pia kumce, pia teleb leknye ununa atonun, narye anggun babye, etekdop teleb lek nang kipdeipnamsine.

³³ Anggunda, Mesir mutuku noutam ulamlum bukni, narye yuk mutuku bobuka yanamsise. Nara, anggun ni koproba Allah unirye, ‘Israel nang talepnamneʼ tenen, wipdeiamsise. Nara, Allah Yahweh arye, anggunti nyapsine. Allah arye, ayupu nirya nyabuk.