Imamat 21 - Eipomek

‘Imam nang ara, malye ton winina kumce, pia telebuk unamakʼ tenen, nyabuk yupu

¹ Allah Yahweh arye, Musa biti, ayupu nyapdeibuk. Ance, anyapdeipne yupu ara, imam-imam nang, sik kekenak binuka, nyapnalyame. Ara, Harun birye deibukba, deipdanin balamik nang arye, imam pil talibuka donyak nang, sik nirya ati, ayupu nyapnulyame. Ara, imam pil don nang noutam arye, tonoknye ton, Israel yala nang buk, sik mapu silip ton dipmaceba, sik nong dobuka dadeipmace dam yanuka, pia kum talinamyake. Ara, dipmace nang, sik nong ara, sik imam nang arye talibicopura, ‘Sik nong malye kipdacakʼ tenen, nyapne.

² Aning ara, pia kum wininamak bukni, imamnye el tam nang koproba ara, el lin koproba do, el li koproba do, el mi koproba do, el kilmu koproba do, tonda el duyapu do, el weit yapu do, el dukul kilapu do, el weit kilapu do, atonun nang dibikceura, sik nong taliplya babye, malye bukni, yuk Israel nang dipmaca ara, kum talinamnyake.

³ Aning atonun, imamnye el makal kil, wel tuba ulamlirye, ninye kum doplye buk, diplyeura, imamnye birye, el makal kil dipmalya ati, taliplya babye, malye ur talipnamlule.

⁴ Bukni, imamnye, el makal kil koproba kum bukni, el kayapu nang arye domace kilapu do, yuk tam nang do, sik dipmaceba, deipmacak wein talak ara, talye unamle. Sik nong pia kum talenamle. El malye kum kipdanamale ati, nyapsine.

⁵ Tonda, sik imam pil talibuka donyak nang ara, sik kisok potong batakanyak ning ara, dilo kum conamnyake. Tonda sik bam potong ton, kum konamanyake. Tonda, sik imam nang, sik kayapu nang dibikceura, ‘Se, nunda ikin kanye bobuka engenamapʼ tenen, sik nong deice, dila kum dolinamnyake. Winibikceura, sikce sik nong ati, malye kipdeipdanamake. Adeice arye, sik dipmakce nang ati, weika arye engenmakirye, sik nong deice, dila kum dolinamnyake.

⁶ Deiyok ara, sik imam nang ara, na Allah ap, ninye ap, elana aik noutam pil don nang unyaka ati, nyapne. Sikda ‘Naʼ tenen, nanguk unamake. Tonda, Israel nang, ‘Allah arye, nun malye winipmap ning, kilibuka lyepnamsilʼ tenen, domba ato ning dobuka obikirye, uku dongolbanyake. Din ning, ayala-yala weike, na Allah, na si erena ati, arelyanganinyake. Ati ara, malye ning dam una do, talina do, ubikce deice arye, nara Allah, na si malye kum kilinamniyake. Tonda, sikce na si erena ati, mambul pil donyakce, nara pia teleb, ektedopnye, leknye biti, si ereninyak ati, ara sikce malye ning, bol pina kum aryuk, pia telebuk unamyake.

⁷ Tonda, imamnye ton, kil dopnulyopura, wel kil bukni, talye-talye yolamice kil do, yuk malye ning ati, malye winipdanamlye kil do, aning atonun, talye-talye ulamlye kil ton, kum dopnamake. Tonda, ninye domlye bukni, el lakanye bataklya ati, talye ulamlye kil ara, pia kum donamle. Aning ara, talye ati kume. El imamnye bira, ‘Na Allah ap, ninye ap, ansilina aik pil talibuka donanye unamleʼ tenen, anye biti wipdeipse. Ati, anye bira, ‘Naʼ tenen, ning ulule. Elda, malye ning ton winina kumce, telebuk wininanye biti nyapne.

⁸ Israel nang nirya ara, bikinamake. ‘Imam nang nirya ara, Allah arye wibuka deibuk nang unyaka ati, sikda malye winin ning pia kumce, pia teleb ninguk wininyake. Ati sikda, nong teleb, lek nang unyake,’ tenenamake. Deiyok ara, sik imam nang arye, din ning bobuka, na Allah si erena ati, arelyanganamniyake. Nara, Allah Yahweh unune. Nara, Pia Teleb, Lek Weiknye unune. Tonda, naryuk, ‘Naʼ tenen nang, na mapu Israel nang anggunti, pia teleb ubuka, lek nang kilisunune.

⁹ Tonda, Imam nang ton, kilmu deiamikibuk, akilmu ‘Yo bok arepnamniyakʼ tenen, talye daunyak ninye ap, epdakirye, talye-talye yolamiceura, awinilamice deice arye, el nong ati malye kilalule. Tonda, el li koproba, imam kiamlye buk, el kilmu arye, pia malye kililule. Ati ara, imamnye birye deiamlye kilmu, talye-talye yolamiceura, adiparyuk akilmu tongobuka, obikiba diplyeura, uku danamake.

¹⁰ Imam nang kan-kan arye, imam deiyoknye una ati, tonoknye wibuka deipnamnyake. Awipnamak imamnye bira, sik nirya deice tam, weik deiyoknye unamle. Imam deiyoknye wibikce talak ara, minyak mek el kisok deice dikilinamake. Tonda, el wibuka erepdeibikceura, imam deiyoknye ongon baju ton, ongolinamnyake. Ati ara, el kisok potong ara, cang dolobuka, duk kum mounamle. Tonda, el ongonamle baju ara, kwilikin baju ton kum ongonamle.

¹¹ Tonda dipmace nang, deipmace sukum ara, imam deiyoknye kum dilyanganamlule. El li koproba do, el lin koproba do, dipmarica babye, ‘Sik nong dam yalyeura, malye kipdalyakʼ tenen, ati, aning kum winipnamlule. Ara, el li koproba do, el lin koproba do, dipmarikca babye, sik nong deipnamak sukum ara, kum dilyanganamlule. Aning winiplya deice arye, el nong deiceuk, malye kilinamle.

¹² Tonda, nara Allah, na etekdopnye, pia teleb lek aik noutam arye, pil dolamlya ati, ninye dibiceura, ‘Anang melipnamneʼ tenen, anyaik batakuka, bai tam kum banamlule. Apia lek aik batakuka, bai tam bilyopura, ara, “Na lek aik batakuka bana kume,” nyapse ning ara, yaniltanamle. Tonda, na Allah aik pil dona ati, wibuka deibice talak, minyak mek, el kisok deice dikuka likeibikce, ‘Allah el ‘Naʼ tenen, ning pia unamleʼ tenen, elti, erepdeibik ning, malye kipdalyake. “Nara, el li koproba Allah Yahweh unirye,” nyapne.

¹³ Tonda, Imam nang, sik deiyoknye kil dopnulyeura, sal ap neika ton malena pia kum kil koproba, wel tuba ulamlye kil buk, el mutuku kil dopnamlule. Talya kil dona meme.

¹⁴ Tonda, yuwak kil do, el akanye kam tuba ulamlye buk, batakamlye kil do, tonda wel nebuka talye ulamlye buk, ubula yolamak kil do, tonda yo bok arebikirye, talye-talye yolamice kil do, atonun kilapu ara, pia kum donamlule. Bukni, el mutuku kilapu noutam arye, sal ap pia kum malamikirye, malye una kum wel tuba ulamlye kil dopnamlule.

¹⁵ “Aning ara, wininamlume,” nyapse ning, moubuka kum taliplirye, ayupu yaniloplyeura, el mapu nirya ara, pia teleb ubuka, diksukum nanguk kum unamake. Ayupu yanibica deice arye, el mapu ara, malye kipdeipnamle. Nara, Allah Yahweh unune. Tonda, narye elda Imam deiyoknye biti, ‘Teleb mingne anye unamleʼ tenen, teleb kibuka delinune. Allah Yahweh arye, Musa biti nyabuk.

¹⁶ Ayupu akunum nyabukopura, Allah Yahweh arye, Musa ati, ayupu ton dukdongobuka nyabuk.

¹⁷ Anyapdeipnun yupu ara, ance Harun biti, laka nyapdeipnulyame. Yatanye do nirya, ance deipminyeba, dadeipdanin yanganyak nang bukni, tonoknye ton el taruk do, yan do, tonda el nong bol deice nirya ara, malye wamlinye birye, na si erena ati aren ning ara, kum arelyanganamnulule. Aning nyapmakin yupu ara, wini talakuk kum bukni, wini talak arye dipdongobuka, doupnin banamak talak nirya babye, malye wamlye nang arye, pia kum arelyanganamnilule.

¹⁸ Na si erena ati arelyanganamniak nang ara, sik nong bol ara, malye wamlye nang ara, na dam kum yanganamake. Winipmanto ning ara, asing kun nang ap, yan kwanyamlya ati, aik bulamlinye ap, urasin tam omlye dila do, yuk malye wamlinye do, atonye ap, na dam kum yanganamake. Winipmanto ning ton, nyapnusin ara ani, ton tam yan cang weik uplye bukni, ton tam yan ara, bumang wamlinye ap, ton tam taruk cang wamlye bukni, ton tam taruk bumang wamlinye ap ara, na dam kum yanganamake.

^19-20 Tonda aning atonun, yatanye do nirya, el taruk yok cebukba, taruk malye wamlye nang ap, yan yok cebukba, yan malye wamlye nang ap, tonda, Tonda, balye tam amnyo yok nemlirye uk dilamliba amnyo yok kanupdongobuka balamlinye ap, asing uk dilamliba, asing kuamlinye ap, tonda, nong bol deice korot talilamliba, nong bol nirya malye wamlinye ap, torok do, nong bol suse yuk ning do, auk dilamlirye tong nyalamliba wamlinye ap, tonda den duruk nebuka malye wamlye nang nirya ara, na Allah ati aren ning boyanuka, na dam kum yanganamnyake. Sikce na ati, kum arelyanganamniake.

²¹ Aning nirya deiyok ara, ani. Harun elce deiamukba, dadeipdanin banamak nang, sik imam nang nirya ara, sik nong bol malye wamlye nang nirya ara, na Allah Yahweh arena ati, din ning boyanuka, na dam kum arelyanganamniake. Atonun nang nirya ara, na aren ning boyanuka, uku kum dongolyanganamake. Deiyok ara, sik nong bol deice, malye ning wamlula ati, sik ni koproba Allah, na dam kum yanganamnyake. Na si erena ati, din ning boyanuka, kum arelyanganamniyake.

²² Bukni, Harun birye deiamukba, dadeipdanin banamak nang, el yala nang bukni, anyapmasin uk yala taleamlye nang ara, yuk imam nang arye, nati boyanuka arelyanganamniak teleb din ning ara, sik nong bol malye wamlye nang arye, adin ning ton dobuka, sik ton dina telebe uka. Ara, pia teleb lekto din ning ap, tonda pia teleb din ning ara, “Sik ato nang arye, dobuka dina telebe,” nyapsine.

²³ Bukni, Harun el yala nang bukni, anyapmasin uk talilamliba, sik nong bol malye wamlye nang ara, na Pia Teleb Lek Aik pum tam, yuk-yuk wilibuka dona ati, cang kain lapkwecamika dam ara, kum binamle. Tonda, Israel nang, sik malye wininyak ning kilina ati, kam ning opnarye, uku dongon ning, el si mesba deibikak ara, aning dam kum yanganamnyake. Deiyok ara, sik nong bol malye wamlye nang arye, na pia teleb lik ning nirya dam yaceura, malye ulinyaka ati, nyapne. Nara, Allah Yahweh unune. Na Allah arena ati, kintinibuka deiamik aik bitinye ap, anyaik pum tam wilibuka deipse pia teleb kibuka lek ning deipseba, aning nirya ara, pia teleb lek ning ulule. Ati ara, sik nong bol malye nang arye, anyaik ap, anyaik pum tam ulye ning ara, uk diliba, nong bol malye wamlye nang arye, anyaik pum tam ning ‘Bol pipmace deice arye, malye kilinyakʼ tenen, nyapsine. Ati, anyaik dam kum yanganamnyake. Nara, anggun ni koproba Allah Yahweh arye, nyapsine.

²⁴ Aning-aning nirya, Allah arye Musa biti, laka nyabukura, Musa elce, Harun ap, Harun birye deiamukba, dadeipdanin yangalamik nang nirya ap ati, tonda sik Israel yala nang nirya ap ati, laka nyapdeibukba, kekebik.