Imamat 20 - Eipomek

Allah arye, “Aning ara, winina kume,” nyabuk yupu kekebuka, kum ulamik nang wenebuka ona ati, nyabuk yupu

¹ Allah el si Yahweh arye, Musa biti nyabuk.

² Anyadeipkin yupu ara, ance Israel nang kekenak binuka, laka nyapnulyame. Israel nang nirya do, yuk mutuku arye tikilyangan nang buk, anggun ap pia neika unamlum nang nirya do, anang nirya ati, nyapnulyame. Ara, tonoknye, sik mapu ton dobuka, Kanaan mutuku unyak nang arye, si erelamik isa, el si Molok, elti, arelbilinye bira, adiparyuk anang nirya arye, keil arye cobuka opmunyeba, dibinamnyake.

³ Yata nang do nirya, sik mapu isa si erena ati, Molok arebiceura, adeice arye, na si eren aik ati, malye kilinamniake. Tonda, na si, pia teleb lek ning ara, sikce, ‘Nun like,’ tenebuka, akunum yanipnikirye, nati malye kilinamniake. Ati, ‘Anang ara, na mapu koproba unyake,’ kum tenepnamne. Israel nang kan-kan noutam arye dobuka, bai tam yakdonoknamne. Winipnirye anang nirya obuka, sirya daknamne.

⁴ Tonda, amutuku noutam unamlum nang nirya arye, isa si Molok, el si erena ati, anye el mapu dobuka areplyeba, amutuku ululum nang ton, el malye upmalye ning ati, eibuka bikmuncuk, anye biti kum wenemunyopura, narye sik Israel nang ati, wenepnamne.

⁵ Tonda, isa Molok el si erena ati, sik mapu dobuka, arelbace nang ara, naryuk sikti, wenebuka opnamne. Ara, sik mapsilip nirya ap, tonda, sik dam neika unyak nang ap nirya ara, Israel nang unyak mutuku kan-kan noutam arye dobuka, bai tam dopkwetepnamne. Winipnirye, sikti, wenebuka opnamne. Ara, na dam arye, batakuka isa Molok, el si erena ati, el si erebikce nang ap, yuk nang eibikirye, ‘E anang winice touk, nun babye wininamabe,’ tenenyakce, ‘Amalye ninguk winibice nang babye, anang ara, na mapu koproba unyake,’ pia kum tenenamne. Israel nang kan-kan noutam arye dobuka, bai tam dopkwetepnamne. Sik nirya ati, wenebuka opnamne. Deiyok ara, kilapu domice nang bukni, aminyan talak yuk kilapu ati, ‘Se, akilapu ap neika maptibyeʼ tenelamak touk, sik ato nang ara, Molok si erenyak nang arye, na Allah ati, akunum batakaninyake.

⁶ Yatanye do, asing ketenanye, elda diamice nang kanye ap, isa mikip deice arye yupu sisikinanye ap dam bilirye, “Ance, aning ara winipnutume,” nyabuka moroplinye bira, ‘Anye na mi koproba ulule,’ kum tenenamne. Deiyok ara, na Allah ati, na siuk erepniting bukni, talye isa si ati erenyak deice arye, ninye arye kilapu akunum domice bukni, akilapu batakuka, yuk kilapu ati, ubula yolalamak atonun unyaka ati nyapne. Ati, narye Israel nang kan-kan noutam arye, anang dobuka, bai tam yakdonoknamne. Winipnirye, anang nirya obuka, sirya daknamne.

⁷ Nara, anggun ni koproba Allah Yahweh arye nyapsine. Anggunda, malye un ning nirya batakmunce, moubuka kaledamunce, pia telebuk wininamlume. Wininamluma deiyok ara, na anggun ni koproba Allah Yahweh ununa ati, nyapne.

⁸ Ati ara, narye, “Aning ara, winibuka wininamlume. Aning ara, pia kum wininamlume,” nyalinsinye touk, moubuka talipmunyakarye, unamlume. Ara, nara Yahweh unirye nyapsine. Na Yahweh arye, ‘Anggun Israel nang arye, aninguk wininamakeʼ tenen, wipdeipsise. ‘Naʼ tenen nang ululuma ati, nyapsine.

⁹ Tonda, yatanye do, el li ap, el lin ap ati, yu weik uplirye, el li ap, el lin ap ati, sik deice ikin ning deiplirye, malye kibuka suplyeura, anye bira, adiparyuk obuka, batanamlulume. Tonda, anye el dipnamle ning ara, el bidamnye malye upmalya deice arye, opdanamle.

¹⁰ Winipmanto, Israel nang tonoknye birye, el kayapu, yuk nang kil dobuka yoplyeura, anye ap, akil ap ara, adiparyuk obuka bataknamlulume.

¹¹ Aning atonun, ninye tonoknye ton, el li koproba domlye kil buk, el mining mi ap mapriceura, el li koproba ati yaniplirye, malye kipdeipnamle. Ati, anye ap, akil ap, adiparyuk obuka batanamlulume. Anye ap, akil ap, sik bitinye dipnamdaka deiyok ara, sik bidamnye malye kipdanamdake.

¹² Winipmanto ton, ninye ton elce deiplye mi arye domlye kil, el yamal kil bobinuka neika mapriceura, anye ap, akil ap, sik bitinye nirya ara, adiparyuk wenebuka, obuka batanamlulume. Ara akil ap, anye ap, sik bitinye ara, Allah arye, ‘Aning ara, pia mem ninge,’ nyapne. Ara, ‘Sal ap, kil ap, ato ning pia kum wininamlume,’ nyapdeipsuka ati, pia mem ning winipmariceura, wenebuka opnamlulume. Sik dipnamdaka deiyok ara, sik bidamang malye wamdice deice arye, opdanamdake.

¹³ Tonda, winipmanto ninye tonoknye birye, ‘Se kilapu ap malamak atouk ubuka, sal mamun buk, ‘Neika maptinimnye,’ teneplirye, el kwit ap neika mapdiceura, sik bitinye pia malye weik ning winipnamadak ati, sik abitinye nang ara, adiparyuk wenebuka onamlulume.

¹⁴ Aning atonun, sal ton el kil domlirye, neika maladice bukni, anye birye adomlye kil, el lin babye dobuka, neika mapdiceura, Allah el kanye ara, “Aning ara, pia malye weik ning, mem ning,’ tenelule ati, sik awinilye nang nirya ara, adiparyuk opmunyakarye, uku dongobikceba, uku arye, sik nong dipnamlule. Amalye winin ning ara, anggun dam pia kum unamlume. Amalye ning ara, na mapu koproba nang arye, pia kum wininamlume.

¹⁵ Tonda, winipmanto ninye tonoknye birye, talye domba do, sapi do, kam do, yuk ning ton, kilapua malamak atonun, neika mabikceura, adiparyuk anye ap, akam ulye ning ap, obuka bataknamlulume.

¹⁶ Aning atonun, kil ton talye kam ulye ning kam do, sapi do, basam do, el ap neika mapriceura, akil ap, akam ulye ning ap, adiparyuk onamlulume. Aning atonun wininyak nang ara, sik dipnamak ning ara, sik ining ara, sik nong deice upnamle. Deiyok ara, sik bidamnye, malye winilanyak deice arye opdanamake.

¹⁷ Winipmanto, tonoknye ton, sik ni, sik nin tonok birye, deiamlye buk, el makal kil koproba bukni, sik neika mapriceura, Allah arye, ‘Ato nang ara, na mapu koproba unyake,’ pia kum tenenamle. Israel nang kan-kan arye, ato nang dobuka, bai tam yaknamlulume. Allah arye sik nirya ati, wenebuka opnamle. Atonun ning winiplinye ap, akilapu ap, pia mem ning, weik malye ning akunum winipnamdaka ati nyapne. Akilapu ara, el makal kilapu buk, winipmalya deice arye, ikin ning el damuk yaliba dopropnamle.

¹⁸ Tonda winipmanto, ninye tonoknye birye, el domlye kil do, yuk kil do, el ining balamle talak ara, el ap, akil ap, neika mapriceura, sik anang bitinye ati, Allah arye, ‘Na mapu ururake,’ kum tenenamle. Ati ara, Israel nang kan-kan arye dobuka, bai tam dopkwetepnamlulume. Allah arye, sik bitinye ati, wenebuka opnamle.

¹⁹ Winipmanto ara, ninye tonoknye ton, el lin el weit kil do, el lin el dukul do, el li el weit kil do, el li el dukul, el li el makal kilapu do, neika mabiceura, awinipmanyaka deice arye, sik yala nang akunum yanibuka, malye kipdanmarake. Aning ati, menenga dekna ara, Allah arye wenebuka, ikin ning, sik dam yalyeba, dolonamake. Sik nirya ara, mapu min kum deipmace buk, dibinamake.

²⁰ Aning atonun, tonoknye ton, el li koproba, el weit arye domlye kil do, el li koproba el du birye domlye kil buk, ubula dobuka, neika mabice nang ara, pia malye ning winipmanyaka ati, el li koproba si, akunum yanipnamle. Awiniplye ning ati, Allah arye weneplirye, menenga areplyeba, dolonamaka ara, mi ton pia kum deipmalirye, dibinamdake.

²¹ Aning atonun winipmanto, ninye tonoknye birye, sik nang susuk koproba arye domlye kil, ubula bobinuka, neika mapriceura, pia malye ning akunum winipmarice ati, el aik ninye ati, malye kibuka, si akunum yanipnamle. Awinipnamle ning ati, Allah arye weneplinye menenga areplyeba, dolonamak ning ara, ikin ning, sik deice deipliba, mi pia ton kum deipnamdake.

²² Aning ati ara, na Allah Yahweh arye nyapsine. Narye, “Aning ara, wininamlume. Aning ara, pia kum wininamlume,” nyapdeipsise yupu moubuka talepmunyeura, telebuk unamlume. Kumura, anyapdeipmasin ning talipmunyakarye, malye winipmunyopura, ninye duklamak atonun, narye bobuka, Kanaan mutuku bin deipsinyeba, unamlum mutuku noutam arye, yakniba yukak binamake.

²³ Minop talak, sik Kanaan mutuku noutam ulamik nang ara, apia malye ning nirya ara, weika arye winilamika ati ara, narye anang ati, “Kume, anang ara, na pia like,’ tenenune. ‘Na dam kum yanganamake,’ tenelamse. Ati, anang arye talibuka, ulamikce ning ara, ‘Nun ton talibuka, winipdenuyabe,’ pia kum tenenamlume. Ati ara, Kanaan mutuku min talak arye dipdongobuka, wini talak unyak nang ara, anggun Israel nang dam arye yakdonoknamne. Winipnyeba, anggunda amutuku wekmunce, talibuka unamlume.

²⁴ Kanaan mutuku noutam ulamik nang ara, malye winin ning weika arye wininyaka ati, ‘Anang ara, na pia like,’ tenelamse bukni, narye, “Anggun Israel nang ara, aning-aning nirya ubuk mutuku, pia teleb mutuku arepnamsine,” nyabuka, nyalin yupu nyapdeiamse mutuku ara, wini talak ara, arepsine. Ati amutuku ara, anggun pia talibuka unamlume. Na dipkoprob, anggun ni Allah Yahweh unune. Yuk nang yala-yala nirya, im sirik, mutuku sirik nirya, daunyak mutuku noutam arye, wilibuka anggun tonok arepnamsine.

²⁵ Anggunda, ‘Naʼ tenen nang unamakʼ tenen, wipdeipsise. Ati, anggun amutuku unamlum talak ara, narye anggunti, “Ura, akam ning do, ato maka do, ayala ning nirya do, aning ara, teleb ning buk, aning ara, malye ning,” akunum nyapsise. ‘Aning ara, teleb ning,’ nyapse ning ara, ur dinamlume. Bukni, ‘Aning ara, malye ning,’ nyapsise ning ara, kum dinamlum ati, “Aning ara, meme,” nyabuka, laka nyapdeipmasine. Aning nirya laka nyapsinye ning ara, moubuka bikmunce, aninguk talibuka unamlume. “Aning ara, dina kum ning,” nyapdeipsise ning ara, pia kum dinamlume. Ati ara, daunamle kam ning do, maka do, “Aning ara meme,” nyapdeipsise ning ara, malye ning ulula ati, aning dobuka, talye lubakibuka dipmunyeura, anggun nong malye kilanamlume. Ati, “Aning nirya ara, pia kum dinamlume,” nyapsine.

²⁶ Deiyok ara, ani. Na mapu anggunda, yuk mutuku im sirya, mutuku sirya nirya unyak nang arye, talibuka unyak mutuku noutam arye, anggun Israel nanguk, yuk-yuk bokuka deipseba, telebuk unamlume. Amutuku noutam unamlum talak ara, na mapu koproba, pia teleb nang unamlume ati, anggun nirya pia malye ning ton, winina kumce, teleb asa uk unamlume. Ara, nara anggun ni koproba Allah Yahweh unune. Nara, malye winin ning tonoknye babye, na dam pia kum ulula ati, nara pia etekdopnye, pia teleb leknye ununa ati, anggun babye, na unye touk, malye winina kumce, pia teleb etekdop lek nang unamlume.

²⁷ Ura, tonok yupu ton nyapnusine. Amutuku noutam unamlum nang ara, sal do, kil do, ton min diamice nang, sik kanye ap epdakirye, yupu sirinyak nang ap, tonda isa mikip deice arye, ninye kir dona nang ap ara, sik adiparyuk keil dobuka, amalye winin ning unyak nang opmunyeba, dibinamake. Adipnamaka deiyok ara, sik bidamang nong deiceuk upnamle. Sikce malye winipmaca deice arye dipnamaka ati, deiyok ara, sik dam uple.