Imamat 2 - Eipomek

Din ning bukni, yakong do, terigu do, Allah Yahweh arena ati, nyabuk yupu

¹ Tonda yata nang do, tonok-tonok nang arye koubuka dinyak ning, yakong do, terigu do, beras atonun ning do, ‘Allah Yahweh ati, yanuka arepnune,’ teneplinye bira, pia teleb kibuka teikikce ninguk, el si tepung, pia teleb ninguk boyanamlule. Bukni, minyak zaitun mek arye dikuka deipmalirye, uku dongolamak siltong teleb ning, el si kemenyan arye, adin ning deice siknipdongobuka deipmalye ninguk boyanuka, arelyanganamlule.

² Aboyangana ati ara, elce akintinibuka deipmalinye biryuk, Harun elce deiamukba, dadeipdanin yangakirye, na si eren aik pum tam, pil talibuka donyak imam-imam nang, sik dam boyalirye, yanuka arepnulule. Winiplyopura, imam yala nang bukni, asum anyaik koproba pil donmalinye birye, atepung ton tonok taruk arye, mitik tonun ton doropnulule. Atonun, minyak zaitun mek ap, tonda siltong teleb ning, el si kemenyan nyanyak ning ap, dobukaplirye, aning nirya ara, uku dongona ati, keil pala yangabuka taplakikce, kintinibuka deibikak, el si mesba bobilirye, uku dongopnulule. Auku dongoplya deice arye, aning nirya ara, ‘Yahweh ati, akunum arepneʼ tenen, laka kipnulule. Apil doplya deice arye, uku diliba, siltong teleb ning, Allah Yahweh dam biliba, kekeplirye, pia teleb kanye delinamlule.

³ Ura, Allah si erena ati, atepung boyanmakce bukni, Imam nang arye, Allah ati akunum arebikiba, aning tuba aupnamle ning nirya ara, weik tam ara, Harun ap, elce deiamuk nang ap, ara el mapu ap dopropnamake. Ara, sik Allah ap, ninye ap, ansinilina aik pil don nang, sik imam nang unyaka ati, sikcuk aning dobuka dinamake. ‘Adalamak din ara, pia teleb lek ninguk, Allah el ning ulule,’ tenamlame. Deiyok ara, Allah Yahweh el arena ati, uku dongonamaka ati, pia teleb, lekuk ulula atia.

⁴ Winipmanto ning ton, Allah el si erena ati, roti kwaning yala ning arepnamaneʼ tenen, roti dan ning, el si ara kompor, pum tam dapnukcopura, roti kwaning nena kum ninguk danamnyake. Aroti kwaning ara, el si ara tepung, pia teleb ninguk boyanuka, minyak zaitun tabakmunce, urasin mitik kue atonun dabuka, arenamlume. Aning kumopura, roti dana deiyok ning nena kum, tepung boyanuka, mitik tonun pala kibuka kue mitik namin kibuka, adiparyuk danamlume. Tonda, apala ning deice babye, minyak zaitun mek ap bobinuka, aminyak zaitun mek arye, akue deice mitik tonun likuka delinamlume.

⁵ Tonda winipmanto, ‘Allah si erena ati, roti kwaning yanuka arepnune,’ tenemunce, yanuka danamlum ning ara, pala kat ning deice dapnumunyopura, aroti kwaning dan ning deice aryuk, bupukmumnyopura, tepung ara, teleb bun ning ap, tonda minyak zaitun mek ap, tabakuka kintinipmunce, dapnamlulume. Bukni, roti nena deiyok ning, el si ragi ton tabakna meme. Roti kwaning nena kum ninguk dabuka, yanuka arenamlume.

⁶ Allah ati arepnamamunye roti kwaning ara, roti deiyok ning, tepung teleb ning dobuka, adiparyuk noutam arye tobuka deipmunce, atobuka deipmamumnya noutam ara, minyak zaitun mek arye dikdongobuka delinamlume.

⁷ Tonda winipmanto ning ara, ‘Allah arena ati, roti kwaning ara, yangalin ning, el si kuali deice deibuka dapnune,’ tenepmunyopura, aroti kwaning ara, tepung pia teleb ning ap, minyak zaitun mek aryuk, tabakuka dapnamlulume. Akunum dapmamunce, Allah Yahweh ati, yanuka arepnamlume.

⁸ Allah arena ati, aroti kwaning yala nirya ara, aning laka nyapmasin touk kibuka, dapmunye ninguk, adiparyuk Allah Yahweh ati, yanuka arenamlume. Ara, Allah ap, ninye ap ansinilina ati, el si eren aik pum tam, pil ati dona deiyok nang, sik imam nang dam binuka arepmunyeba, sik anang aryuk, uku dongonak, keil pala yangabuka deiplumak, el si mesba dam bobanamnyake. Bobikirye, uku dongon pil donamake.

⁹ Allah el si eren aik pum pil donanye, imam arye doplirye, aroti kwaning deiyok ning, el si tepung noutam ara, tonok taruk arye, mitik tonun doproplirye, uku dongona ati, mesba dam bilirye, adiparyuk uku dongopliba, uku arye dipnamle. Deiyok ara, ‘Aning nirya, el Allah Yahweh ati, akunum aripneʼ tenen, lake bikilina ati, wininamlule. Aning bobuka, uku dongopliba, uku diplirye, nintong teleb ning weleplyeura, Allah Yahweh kekeplirye, el kanye teleb unamle.

¹⁰ Tonda, anoutam ara, lake bikilin ning akunum doproplirye, uku dongoplyeura, Allah si erena ati, bobuka yanmace ning, weik tam tuba aupnamle ning ara, Harun ap, el mapu ap dolonamnyake. Ara, Allah ap, ninye ap, ansinilina ati, Allah el si eren aik pum tam, pil dona deiyok nang, sik imam nang aryuk, aning dobuka dinamnyake. Ara, ‘Aroti kwaning ara, Allah el ninguk ulule ati, aroti kwaning ara, pia teleb lek ninguk ulule,’ tenenamlume. Deiyok ara, Allah Yahweh el arena ati, akunum kintinibuka, uku dongonyaka atia.

¹¹ Tonda, aning moubuka bikinamlume. ‘Allah ati, roti dana deiyok ning, el si tepung boyanuka arepnuyabe,’ tenepmunye din ning nirya ara, madu mong mek ap, tonda, roti kwaning nena deiyok ning, el si ragi ap, tabakuka kum danamlume. Deiyok ara, mong mek ap, roti kwaning nena deiyok ning ap ara, Allah Yahweh ati, kum arenamlume. Ara, Allah Yahweh, el si erena ati arenamlum ning ara, aning ap tabakuka, pia kum danamlume. Aning bitinye ara, Allah arena ati, uku kum dongonamlume.

¹² Anggunce, aketing tamun, aketing tamun nirya, wa wibuka koululum ning yala-yala nirya ansinibuka, weinye yubuka linamlum ning ara, noutam arye bokuka, mong mek ati, arelyangana telebe uka. Ara, min yuma ning aren talakuk arenamlume. Atalak ara, aning ara, arena teleb bukni, ‘Allah Yahweh arena ati, aning bobuka uku dongobibiba, nintong teleb ning welepliba, Allah kanye delinamle,’ tenena kume. Aning bitinye ara, roti kwaning nena deiyok ning ap, mong mek ap ara, bobuka yamunce, keil pala taplakuka yangabuka kintiniplum ning, el si mesba deice ara, uku yanuka kum dongonamlume.

¹³ Tonda, luba kina meme. Allah ati, yanuka arelyanganamlum roti kwaning deiyok ning, tepung do, yakong do, beras atonun ning do, aning atonun ning kintinipnamlum din ning nirya ara, teleb kin ning ati, garam aryuk dongobuka deipmunce, yanuka arenamlume. Garam dongobuka arenamluma deiyok ara, Allah arye nunti, “Aning wininamlume. Aning winipmunyopura, narye ton, anggunti, melibuka kalikinamsine,” nyabuka, nyalin yupu, nun dam nyalisilye ning ara, ‘Aniʼ tenen, lake bikilina ati, “Tepung yala ning arenamnulum talak ara, garam ap tabakuka dongopmunce, arenamnulume,” nyapsuka ati ara, aning ara, batakna meme. Ati, Allah ati, tepung arye kintinibuka, arelyanumunye ning nirya ara, garam aryuk dongobuka, boyanuka arenamlume.

¹⁴ Tonda winipmanto, anggunce yakong do, gandum do, wa wibuka kouamumnya ani, pabuka duk mouplyopura, aduk winiryuk minop wisiplyeura, dakmunce, ‘Allah el si Yahweh ati arepnune,’ tenepmunyopura, bola kopmunce, teikuka, teleb upmunye ninguk dobuka, uku buk deice dapmunce, deiamunye ninguk dobuka, Allah ati arelyanganamlume.

¹⁵ Aning atouk, agandum duk do, yakong duk do, yuk tepung ning duk do, teikuka deipmunye ning deice ara, minyak zaitun mek arye, dikuka delinamlume. Tonda, aminyak zaitun mek arye dikuka deipmunyeura, nintong teleb ning, el si kemenyan ton dobuka, agandum deice deipnamlume. Deiyok ara, Allah ati arenamluma atia.

¹⁶ Winipmunyopura, Allah ap, ninye ap, ansinilina aik pum tam, pil dona deiyoknye imamnye birye, agandum duk teikmamunye ap, minyak zaitun mek ap, tonda nintong teleb ning, el si kemenyan ap, lake bikilina ati, tonok taruk arye, aning noutam mitik tonun wilibuka doproplirye, Allah Yahweh el si erebuka arena ati, uku dongonamlule. Deiyok ara, ‘Aning nirya, Allah Yahweh, el si eren ap, elti, si erebuka kina ati, elti, akunum arepmabeʼ tenen, lake bikilina ati, aning nirya, uku dongonamake.