Imamat 19 - Eipomek

‘Israel ninye, diksukum ubuka telebuk unamak’ tenen, Allah arye, “Wininamlulume, aning ton kum wininamlulume,” nyapdeibuk yupu

¹ Allah el si Yahweh arye, Musa biti nyabuk.

² Ance Israel ninye nirya ati, nyapnamlyame. “Anggunda, malye winin ning nirya batakuka, diksukumuk winimunce, telebuk unamlulume. Nara, Yahweh unune. Nara, anggun ni Allah, malye ning ara, tonok babye kum uniliba, diksukumuk winibuka, teleb unun touk, anggun babye, malye ning nirya batakuka, diksukumuk winibuka, teleb unamlulume.

³ Tonda, ninye nirya adiparyuk, anggun nin yapu ap, anggun ni yapu ap ati, ‘Sikda mambule’ tenen, kinamlulume. Winipmunyopura, tekbarye sum nirya ara, pil dona kumce, asum deice na Allah arye nyapdeamsi touk, na siuk erebuka, si erenamnululume. Nara, anggun ni Allah Yahweh unune. Anggun ni Allah, na tonok unune.

⁴ Anggunce talye ning do, talye isa mer ap, Isa Mutuku Dongonye ap, yuk ning nirya ap ati, si erena pia meme. Tonda, yata ning do nirya, emas do, perak do, besi ning do, aning dobukapmunce, puturubuka ninye urasin atonun ubuka, memebuka deipna arye, ‘Nun ni Allah atia’ tenen, aning ati, si erena pia meme. Na tonok ara, Allah ununa ati, anggunce na siuk erenamnulume. Nara Yahweh, anggun ni Allah, na tonok unirye nyapsine,” Allah arye nyabuk.

⁵ “Ati anggunce, ‘Nun ap, Allah el si Yahweh ap, ansinibuka, teleb kibuka unamap’ tenen, kam ulamle ning obuka, na Allah ati arenamlum talak ara, na nyapsinye touk, arenamnululume. Winipmunyopura, narye kanye deipsinirye, anggun arenamnulum ning dopropnamne. Narye, ‘Wininamlulume,’ nyapdeipsinye touk, kum winipmunyopura, na kum kekepnamsine.

⁶ Tonda, na arena ati, kam ulamle ning boyamunce, anggun ap, na ap, ansinibuka neika una ati, opmunye ning ara, adiparyuk arup ap, ambusum ap, aning tup toubuka dinamlulume. Like bitinye sum arye, dinmamunya ani, sirya daknamlulume. Like bitinye sum ara, atup ning mitik anun babye tuba auplyopura, like winilye sum ara, adiparyuk uku dabuka dongopmunce, sirya dakanamlulume. Aning ara, na arena ati, kwal ton delina pia meme,” Allah arye nyabuk.

⁷ “Bukni, aning nirya dinmamunya ani, sirya batakmace ning ara, like winilye sum ning, kwal tuba aupmalye ning ara, pia mem ning atonun, malye ning atonun ulule nyapsine. Aning ara, na like. Tonda, aning kum arepnutume. Tonda, anggun babye, kum dinamlulume. Aning ara, pia meme, nyapsine.

⁸ Yata ninye do nirya, like winilye sum abasam kwal deipmace ning, dobuka dibicopura, narye wenepnamne. Deiyok ara, ani. Na Allah Yahweh arye, ‘Aning ara, like winilye sum uplyopura, dina meme. Aning ara, pia mambule, ‘Naʼ tenen, ning, teleb koprop ning, lek atonun ning,’ nyabuka, akunum nyapsa ati, kum dinamlulume. Ati, aning diplinye bira, wenebuka opnamne. Anye aning dobuka diplya deice arye, ‘Kume aning ara, talye ning anye,’ tenena atonun winiplya deice arye, yaniptapnilirye, pia malye winilule. Anye arye, el bidamnye ati, kunum malye kipdeipnamle. Winiplyopura, atalenye bira, pia wenebuka bataknamne. Israel yala nang ap, anye ap, neika pia kum unamake. El bai tam yakmunyopura, narye wenebuka opnirye, pia kum danamle.” Allah arye nyabuk.

“Anggun wa win ning nirya ara, sirya dakuka kum linamlulume,” nyabuk yupu

⁹ Allah arye Israel ninye ati, nyabuk. “Anggun kouamunye ning ara, anggun wa win dam, dana-dana wiamice ning, akunum nong ubuka wisiplyopura, anggunce aning nirya libuka, kum sirya daknamlulume. Ya sekuka bulubuka, tonokak kum delinamlulume. Aning kum bukni, wa kup-kup ton aupnamlule. Wa kup-kup upmalye ning ara, libuka sirya dakna kume. Tonda, ‘Mitik tonun auplye ning ara, mangkau kanye bobuka, nirya lipropman do? Tuba ton batakman do?’ tenen, dipdemunce, tuba aupmalye ning ara, ‘Nirya libuka, sirya daknamne’ tenena meme. Awa win dam, tuba tamubuka lilbana meme. Wa kup-kup upmalye ning ara, libuka sirya dakna meme. Deiyok ara, sik talye bona utotoa kum ninye lipnamaka ati, nyapsine.

¹⁰ Aning atonun, anggunce anggur tapu duk, wa win dam bimunce, anggur tapu duk nirya sekukab tonokak kum delinamlulume. Tonda anggur tapu duk dakanmamunce, tukwak talye saklye ning ara, anggunce bululbana meme. Anggur tapu duk tukwak saklye ning ara, batakmunba, aminyan talak, sik talye bona utotoa kum ninye ap, talye tikilyangan ninye ap, yuk mutuku ninye ap, sik anang wa kum wamlula anya arye, sikcuk aning bulubuka dinamaka ati nyapsine. Aning ara, sik ning uka. Nara Yahweh, anggun ni Allah, na tonok unirye nyapsine,” Allah arye nyabuk.

“Yuk nang ati ubula dona ap, tilila yupu nyana ap, malye kibuka winilina ap, meme,” nyabuk yupu

¹¹ Allah arye, Israel ninye ati nyabuk. “Sikce yuk ninye nirya, sik ning ati, ubula dolona meme. Tonda, yuk nang nirya ati, minina yupu nyalana pia meme. Yuk nang ati, malye ubuka deilina pia meme.” Allah arye nyabuk.

¹² Nyabukce, ayupu tonap dukdongobuka nyabuk. “Anggunce tilila yupu nyapnya deice arye, ‘Yuk nang arye, dib tenepnamniyak’ tenen, ‘Allah el si deice, dipkoprob yupu nyapkine,’ pia kum nyanamlulume. Na Allah si deice tabakuka, tilila yupu nyapmunyopura, ara na si malye ubuka deilina ati, aning ara, winina meme, nyapsine. Na si talye kum nyaltakanamlulume. Nara Yahweh, anggun ni Allah unirye nyapsine,” Allah arye nyabuk.

¹³ “Ton ning ara, anggun yala nang babye, anggun damak unyak nang babye ati, tilila yupu nyana deice arye, minina yupu nyana ap, tenepce arye nyana ap, sik ning ubula dolona ap ara, pia meme. Tonda sikce, ‘Anggun melina ati, pil dobibiba, dekna ning dopropnamabe’ tenen, pil melibuka dosinyak ninye nirya ara, malye ulina kume. Sik pil akunum dobikcopura, asum aryuk, sik dekna ning arepnamlulume. Anggun pil donmasica ati, dekna dolon ning ara, mapmamunya ani, beren tam arye arena meme. Pil donmace sumuk, arenamlulume.

¹⁴ Anggunce amul kunukne ninye ati, ‘Malye yupu nyabibyeba, kum kekepnamsiyak’ tenen, ‘Talya mangkau asa nyapnuyabe,’ tenena meme. Amul kunukne ninye ati, malye yupu nyana kume. Tonda, asing kunanye balirye, ‘El yan dum keil duknamle’ tenen, bisikak keil deliltakana pia meme. Aning nirya kum bukni, anggunce nati, ‘Nun ni koproba Allah, el Yahweh ulula ati, elda pia mambule ati, nun ilile,’ tenenamnulume,” Allah arye nyabuk.

Diksukum una ap, bico tenena ap ati, nyabuk yupu

¹⁵ “Anggunda, ‘Pia dipkoprob unamap’ tenen, diksukumuk wininamlulume. Ara, ‘Teleb upmak do, kum do?’ tenen, yupu talina ap, yupu bokolin talak ap nirya ara, diksukum yupu uk talibuka wininamlulume. Atalak ara, bona utotoa kum ninye ati, ‘Se, bicoe, sik malye ning daupmalye,’ tenebuka winina kume. Tonda, ‘Sik weik tonun melipnamabe,’ tenebuka winina meme. Aning atonun, bona weik talin nang babye ati, ‘Malye winipnamak bukni, sikda bona weik talin nang ati, daupmalye’ tenen, anang ati, ilil tenena pia meme. Bona utotoa kum nang babye, bona weik talin nang babye, diksukum ubuka, yupu teleb kibuka, lipsisikuka bokolinamlulume. Sik malye winibice nang ati, ‘Na kwit capu awinipmace,’ tenebuka, ‘Sik malye ning daupmalye’ tenena kume. Yuk ninye nirya ati, diksukum yupu uk, talibuka lipsisikuka bokolinamlulume,” Allah arye nyabuk.

¹⁶ Tonda, nyabuk. “Anggunce, yuk nang nirya ara, malye kum winipmake bukni, yuk nang arye, ‘Anang ara malye wininyake, tenepnamak’ tenen, talye yupu nyabuka, ninye noutamak, lak nyalbana kume. Tonda, yata ninye do nirya, anggun dam unyak ninye ati, ‘Aninye ati, narye malye kipdeipnyak’ tenen, bico tenepmunce, pia moubuka kalikinamlulume. Anggunce, ‘Yo dauplye, daoptinge,’ tenebuka, talye kume. Melibuka kalikinamlulume. Nara Yahweh, anggun ni Allah arye nyapsine,” Allah arye nyabuk.

¹⁷ “Tonda yata nang do nirya, anggun kwit capu nang ati, anggun kanye talima pum tam ara, ‘Anang ara na like,’ tenen, yu kanye bolana meme. Tonda, anggun kwit capu nang arye, malye winibicopura, adiparyuk “Aning ara, meme, bataklyame,” nyanamlulume. ‘Dauplye’ tenena meme. Kumopura, sik talye lukparabuka, malye winipmakca deice arye, anggun eipmamun bukni, kum wenepmunyopura, ‘Anggun babye, malye winipmunyak’ tenen ati, nyapne. Malye winin ning ati, ‘Aning ara meme,’ nyabuka, lakak aryuk laka nyalanamlulume. Winipmunyopura, malye kum upnamsile,” na Allah Yahweh arye nyapsine.

¹⁸ “Tonda, anggunce yuk Israel ninye nirya ati, yu kanye bopmunce, derelana meme. Ara, ‘Se, anang arye, nati malye winipnika ati, narye sikti, kwang daknamne,’ tenena meme. Aning atonun, anggun kayapu nang ati, ‘Anye birye nati, malye kipdeipnuka ati, anye bira na like,’ tuba kum tenilanamlulume. Aning kum bukni, anggunce anggun kwit capu nirya ati, bico tenilanamlulume. Ara anggunce, anggun bidamang ati, bico tenelulum touk, anggun kwit capu nirya ati, bico tenen, kanye deiplanamlulume. Nara Yahweh, anggun ni Allah arye nyapsine,” Allah arye nyabuk.

¹⁹ “Anggun ni Allah arye, ‘Aning ara, wininamlulume. Aning ara, pia kum wininamlulume,’ nyapsinye yupu nirya ara, moubuka kekepmunce, wininamlulume. Yata kam ulul ning do nirya, yala yuk-yuk tabakuka lamakalina meme. Aning ara, pia malye weike. Atonun, tonok wa noutam, yala ning bitinye kibuka, tonok tuku pum bisik, kum kounamlulume. Aning atonun ton, tonok baju bukni, ton yala baju win ning ap, ton yuk yala baju win ning ap, bitinye tabakuka wipmunce, kum ongonamlulume. Deiyok tonok baju wibuka, abutumuk ongona telebe. Baju winin deiyok ning bitinye tabakuka wina meme.” Allah arye nyabuk.

Pil dona melin kilapu ap, neika mana ati, nyabuk yupu

²⁰ “Ura, yatanye do nirya, anggun melin ati, yo bok deice arye dekenyak kilapu ati, ‘Talya kil’ tenen, talye lukparabuka, neika mana meme. Amelin kil, yuknye birye, ‘Na dopnamne,’ akunum nyaplyopura, anye birye, akil dekna ati, yo bok min kum arepmalya babye, yuk talinye birye, akil dobuka, neika mana meme. ‘Akil ati dopnamne,’ nyalamlinye birye, amelin kil el dekna ati, dekna arena kumce, yuknye birye, akil ap neika mapdicopura, aning ara, pia malye weike. Ati anye wenepnamlulume. Wenepnamlum bukni, apil melin kil ap, neika mapmarikinye bira, adiparyuk ona meme. Akil dekamlye deiyoknye birye, min yuma akil el dekna ati, dekna punubuka areplirye, akunum bataklyopura, sik bitinye optum bukni, dekna punubuka kum bataklyopura, ona meme. Akil ati, se teneplinye birye, dekna min kum arepmalye talakuk, apil melin kil, yuknye birye, ubula neika mapdicopura, adiparyuk akil ap, anye ap, sik bitinye kum opnamlulume. Anye birye yoplye kil ati, min kum batakmalibuk, pia malye winipmarice ning ati, sik bitinye adiparyuk kum opnamlulume.” Allah arye nyabuk.

²¹ Bukni ayupu nyabukce, ayupu ton nyabuk. “Anye birye, pil melin kil talye lukparabuka yoplyopura, el winipmalye ning dekna ati, yim domba basam, kam ning dobuka, Allah el si eren aik bublan dam delilyanamle. Ara, ‘Allah el si Yahweh arye, na malye winipse ning namin kipnilirye, na malye winipse ning kilibuka lyepnamnil’ tenen, yim domba basam boyanamle.

²² Aning winipliba, sik Allah ap, ninye ap, ansinilina deiyok nang arye, adomba kam ning obuka, Allah aren aik binuka, uku dongopnamake. Ara, amalye winipmalinye, el dekna ati, adomba obuka Allah ati arepnamake. Uku dongobikiba, siltong, na Allah dam bilyopura, anye el malye winipmalye ning nirya ara, na Allah arye namin kipnirye, kilipnamne,” nyabuk.

Yo duk moulamle yo kouna ati, nyabuk yupu

²³ “Ura, anggun Kanaan mutuku wekelbimunye talak ara, ‘Yo duk dinamabe’ tenen, yo duk moulamle yo, ayala-yala nirya koupmunba, keting tamun winilye deice arye, ayo duk pia weik mouplyeura, anggun minopce kum dakuka dinamlume. Ayo duk nirya ara, keting tamun like winilye deice arye, mem ning atonun upnamle ati, ayo duk dina meme.

²⁴ Bukni, keting tamun like dumbarye deice ara, ayo duk nirya ara, Allah el ‘Naʼ tenen, ning atonun upmala ati, anggunce ayo duk dakuka, kum dinamlulume. Na Allah ati arenamnululume. Arepnumunye ning ara, na Allah, na si Yahweh ati, ‘Elda pia mambule ati, telebe,’ nyabuka, na si Yahweh erenamnulume.

²⁵ Keting tamun pamubarye mapmunyopura, ayo duk deiyok koubuka dakmunce, dinamlulume. Ara, anggunce aning ara, pia kintinip deipmunce, upra balamunya ani, ayo duk aram batakna kumce, pia dakuka dina telebe. Anyapsin touk, winipmunyopura, anggun yo duk ayala-ayala nirya weik upra balirye, duk moupra banamle. Nara Yahweh, anggun ni Allah arye nyapsine,” nyabuk.

Kam ulul ning ining dina ap, ninye potong ap, ninye nong ap ati, nyabuk yupu

²⁶ Anggunce aning-aning nirya ara, ining kipman dina pia meme. Tonda, ‘Aminyan upnamle ning kel biknirye, laka nyapnamne,’ tonda, ‘Mikip arye pil doptinye’ tenen, isa si erena ap, isa mikip deice pil dona ap ara, pia meme.

²⁷ “Atonun tonda, anggun ni koproba Allah dib tenena kum ninye potong kolamak touk, kum wininamlulume. Ara, anggun Israel nang ara, kisok potong, amul dam dana-dana potong ara, kum konamlulume. Tonda, anggun bam potong ara, pia kum konamlulume. Tonda, anggun bam potong cang uplyopura, mouse ning sekena babye, meme.

²⁸ Aning atonun ton, akunum dipmace ninye arye, ‘Eipsikirye, kanye deipnamsiak’ tenen ati, engenmakirye, ‘Ining banamle’ tenen, anggun nong bol deice topnong arye touldana meme. Tonda tace ning arye, anggun nong bol deice puturulana meme. Tonda, tace ning arye, anggun nong bol deice sekdamunyeba, suse buksilirye, dila una meme. Maka do, ninye urasin do, aulye ning nirya urasin ato ning, anggun nong deice tace ning arye, lukuka kintinilana, pia kum wininamlulume. Aning ara, ‘Sik Allah diba tenena kum nang ulamak atonun, kum wininamlum’ tenen, nyapsine. Nara Yahweh, anggun ni Allah arye nyapsine,” nyabuk.

²⁹ “Tonda, anggunce, ‘Nun kilmapu deibibyeba, elce talye-talye yolan kil kiplirye, yo bok weik doproptibye’ tenena meme. Winipmunyopura, ara pia malye winipmunyake, nyapsine. Tonda, winipmunyopura, yuk nang ton eibsicopura, sik babye atonun winipnamake. Winibicopura, amutuku noutam nirya, malye ning ayala-ayala nirya, pia weik upra banamle. Ati, winina pia meme,” Allah arye nyabuk.

Allah ati, si erena ap, diksukum una ap, wisi nang ati kina ap ati, nyabuk yupu

³⁰ “Tek barye sum ati, anggunce Sabat sum nyamunye sum ara, anggunce, ‘Allah el ‘Naʼ tenen sum, mambul weik sum,’ tenebuka, yuk talye pil aning-aning nirya, kum donamlulume. Tonda, na si eren aik noutam, na teleb aik binuka, yanuka kina kum aik ati, anyaik ara, ilil tenenamlulume. Nara Yahweh, anggun ni Allah arye nyapsine. Ati, kintinip deipmunce, na Allah ati, si erepra unamnulume.

³¹ Tonda, yuk ninye yupu kekena kumce, anang sik walana unyak nang ap, isa mer ap, diplamak ninye, sik kanye ap, sisiklamak nang unyakak morolbana ap, yupu talina ap, pia meme. Aning atonun, Isa Mutuku Dongonye mikip deice arye, aminyan winipnamle ning laka nyanyak nang dam, bana pia meme. Aning nirya winimunya deice ara, malye ulilalulume. Nara Yahweh, anggun ni Allah arye nyapsine,” nyabuk.

³² “Tonda dan aik do nirya, anggun bukmunye talak, sik wisi nang babye, wisi kilapu babye, ato nang anggun bukmamunyak yacopura, adiparyuk, tikuka, ‘Telebe,’ nyabuka, kinamlulume. Aning atonun, nara anggun ni Allah ununa ati, ‘Nun ni Allah el si Yahweh, elda weik mambule’ tenen, nati ilil upsilyeba, anggunce na siuk, erenamnulume. Nara Yahweh, anggun ni koproba, Allah arye nyapsine,” nyabuk.

³³ “Tonda, anggun mutuku noutam bukni, anggun amutuku ululum nang ap, yuk pera mutuku ninye ap, ninye asik nang ap, teleb kibuka neika unamlulume. Ninye asik nang ati, sik nong deice, ikin ning kum delinamlulume. Malye kum kilinamlulumce, teleb ubuka neika unamlulume.”

³⁴ “Tonda anggun mutuku noutam, anggun ap ululum nang, ninye asik nang babye, anggun umunye touk unamake. ‘Anang ara, yuk mutuku nang anya arye, nun like’ tenena meme. ‘Nun nirya, tonok mutuku nang diamuka, nunda tonok yala nang uka,’ tenenamlulume. Anggun Israel ninye arye, anggun ap neika ululum nang, ninye asik nang ati, bico tenenamlulume. Deiyok ara, anggun babye, minop talak Mesir mutuku ulamlum talak ara, ninye asik nang atonun, ulamluma ati nyapsine. Nara Yahweh, anggun ni koproba Allah arye nyapsine,” nyabuk.

Dekna ati, nyabuk yupu

³⁵ “Tonda, yuk nang ati, minina yupu kum nyanamlulume. Aning ara, ikin ning dilina ap, timbangan kiklina ap, ‘Cang do, bumang do?’ tenen, tonda ‘Weik do, mitik tonun do?’ tenen, kiklilen talak nirya ara, tilila yupu kum nyanamlulume. Dipkoprob uk nyanamlulume. Ara, cang ning nukna ap, bumang ning nukna ap, ikin kilo ning nukna ap, mek deice arye, dikdongobuka nukna ap, lak kin ning moubuka dimunce, dipkoprob yupu uk nyanamlulume. Ura kilo do, meter do, mek kwebuka dikilongona do, anirya ara, tilila yupu nyana pia meme.” Allah arye nyabuk.

³⁶ Nyabukopura, ayupu tonap dukdongobuka nyabuk. “Ura, kiklilen ning meter ap, kanam ning ikin ati, kiklilen ning el si timbangan ap, mek ning kwebuka dikilongon ning dekna ap nirya ara, moubuka dipdemunce, pia teleb diksukum ninguk nyabuka, talinamlulume. Dekna talak nirya ara, diksukumuk wininamlume. Nara, anggun ni koproba Allah, Mesir mutuku noutam arye boyanamsisinye birye, nyapsine. Nara Yahweh, anggun ni koproba, Allah arye nyapsine,” nyabuk.

³⁷ “Ati, kanye lamapdongobuka umunce, na Allah arye, ‘Winibuka wininamlulume. Aning ton, pia kum wininamlulume. Teleb winina ara, ani. Malye winina ara, ani,’ nyabuka nyalisinye yupu uk, moubuka kekepmunce, wininamlulume. Nara Yahweh, anggun ni koproba, Allah arye nyapsine,” nyabuk.