Imamat 18 - Eipomek

Allah arye Musa biti, “Anggunce, Mesir mutuku ulamlum talak ara, sikce, ‘Aning winina ara, teleb uka,’ nyabik bukni aning ara pia malyeuk, nyabuk yupu

¹ Allah el si Yahweh arye, Musa biti, nyapdeibuk. Anyadeipkin yupu ara, ani.

² Ance, sik Israel nang nirya ati, “Allah arye nyapdeipmasil yupu ara, ani. ‘Nara, Allah Yahweh, anggun ni koproba Allah unune. Anggunda, narye wipdeipsise nang ululume,’ nyapne,’’ nyapdeipmasile. Winibuka nyapnulyame.

³ Tonda, ayupu ton nyapnulyame. Ara, Mesir mutuku ulamlum talak, Mesir mutuku nang winilamik ning nirya ara, anggunce elilalum ning ara, ‘Nun ton winipdenuyabeʼ tenen, kum wininamlume. Aning atonun, tonda narye, Mesir mutuku arye bobuka, anggun biti boyanuka, Kanaan mutuku boyanamsise. Ati, wini talak ara, ‘E, Kanaan mutuku nang ulamice ning ton, winipdenuyabeʼ tenen, pia kum wininamlume. Ara, Kanaan mutuku deiyok nang arye, ‘Aning ara, winina teleb uka. Aning ara, kum wininamlume,” nyabikceura, Kanaan mutuku nang kekebikirye, pia malye ning winilamikce ning ara, anggun Israel nang arye, pia kum wininamlume.

⁴ Aning kum bukni, na Allah arye, anggunti, “Aning wininamlume. Aning ara, pia kum wininamlume,” akunum nyapdeipsise yupu nirya ara, aninguk moubuka talipmunyakarye, aninguk pia wininamlume. Nara Yahweh, anggun ni koproba Allah unune nyapsine.

⁵ Ton ap ayupu ton nyapsine. Anggunda, na amu tam unmunce, narye anggunti, “Aning wininamlume. Aning ara, pia kum wininamlume,” nyapdeipsise yupu, aninguk moubuka talipmunyakarye, aninguk wininamlume. Anggunce anyapmasin yupu nirya, kekebuka wininmunce, aninguk talibuka umunyopura, anggun teleb kibuka unamlume. Anggun unamlumak nirya ara, telebuk unamlume. Nara Allah Yahweh arye, ayupu nyapdeipsine.

Allah arye Israel nang ati, “Aning nirya ara, pia kum wininamlum,” nyapdeibuk yupu

⁶ Allah arye, “Aning-aning pia kum wininamlume. Aning nirya ara, pia meme,” nyapdeibuk ning ara, ani. Tonoknye ton, tonoknye, el weit du koproba do, el yala nang koproba do, anye birye, el kwit koproba deiplye kilmu ara, pia kum doptue, Neika pia kum mapdiktinge. Aning ara, meme. Tonda, ‘Akilmu ap, na ap, neika maptinimnye,’ pia kum tenenamlume.

⁷ Tonda anggun ni koproba domlye kil, anggun nin koproba ap, neika pia kum manamlulume. Ara, ‘Akil ara, anggun ni koproba, el domlye kil ati, aning ara, pia mem ning ulule,’ nyapsine. Tonda, akil ara, anggun nin koproba ulula ati, el ap neika pia kum manamlulume. Aning ara, pia mem nyapsine.

⁸ Tonda, aning atonun, anggun ni koproba arye domlye kil, yuk kilapu domlinye babye, sik ap, neika mana pia meme. Akilapu kan-kan arye, tonok kil dobuka, neika mapmunyeura, adeice arye, anggun ni koproba neika mapmaluma atonun atia. ‘Winipmunyopura, anggun ni koproba ati, akunum malye weik kipmunyakʼ tenen, ato ning ton, pia winina meme nyapsine.

⁹ Tonda, anggun makal kilapu, anggun dukul do, anggun weit kil do, ‘Akil ap, neika maptinimnye,’ tenena pia meme. ‘Aning atonun, anggun ni koproba arye deiamlye kilmapu do, tonda anggun nin koproba arye deiamlye kilmapu do, ton anggun ni yapu arye, kil bintinyamlirye, ton kil arye deiamlye kilmapu do, anggunce, ‘E, akil ap neika maptinimnyeʼ tenena ara, pia meme. Ara, anggun ni yapu arye, yukak arye deiamice kilmu do, anggun neika ululum mutuku noutamak do, anggun ni yapu deiamikce kilmapu nirya ati, ‘E, akil ap neika maptinimnyeʼ tenena ara, pia mem nyapsine.

¹⁰ Tonda, anggun ninye wisi nang ati nyapsine. An kilmu koproba arye, el deiplye kilmu babye, tonda an mi koproba arye, deiplye kilmu babye, akilmapu ara, neika kum manamlulume. Atonun ning winipmunyeura, anggunce anggun mapu koproba ati, malye kipdeipmunce, ‘Alye dakdamunyakʼ tenen, awinina ara, pia mem nyapsine. Deiyok ara, ‘Anggun deipkirikdanin ban yala nang ara, anggunce, akunum malye kipmunyakʼ tenen, “Aning nirya ara, pia meme,” nyapsine.

¹¹ Tonda, ‘Anggun ni koproba, kil bitinye domlirye, anggun deiamsilye kil kum buk, ton kil arye deiamlye kilmapu babye, ‘E, akilmapu ap, neika maptinimnyeʼ, tenena ara, pia meme. Deiyok ara, anggun ni tonok arye deiamsilye ati, akilapu ara, anggun makal kilapu koproba ati, akilapu neika mana ap, yolana ap ara, pia meme. Deiyok ara, anggun tonok du weit ululuma atia.

¹² Anggun ni koproba, el weit kil babye, tonda anggun ni, el dukul babye, tonda el makal kilapu babye, ‘Se, akilapu ap, neika maptinimnyeʼ tenena pia meme. “Akilapu ara, anggun neik yala ati, pia neika mana meme,” nyapne. Akilapu ap, pia kum yonamlume.

¹³ Aning atonun, tonda anggun nin, el weit kil babye, el yala kilapu babye, el tam kilapu babye, tonda el makal nang arye deiamice kilmapu babye, ‘Se akilapu ap neika maptibye,’ tenena pia meme. “Akilapu ara, anggun nin yapu, sik du weit ati, pia neika mana meme,” nyapne. Akilapu nirya, pia kum yonamlume.

¹⁴ Tonda, ‘Anggun mam yapu koproba arye domikce kilapu buk, ‘Se akil ap, neika maptibyeʼ tenena, pia meme nyapne. Ara, anggun mam koproba, el kil ati, anggun nun ulula ati, aning ara, pia meme. Pia kum wininamlulume. Akilapu nirya, pia kum yonamlume.

¹⁵ Aning atonun, anggun sal ati nyapsine. An mi koproba arye, domlye kil ati, ‘Se akil ap neika maptinimnyeʼ tenena meme. Akilapu ara, anggun mapu, sikce domikce kilapu ati, “Anggun ninye wisi arye, pia neika mana meme,” nyapne. Akilapu nirya, pia kum yonamlume.

¹⁶ Tonda, an weit koproba do, an du koproba do, el domlye kil ati, ‘Se akil ap, neika maptinimnye,’ tenena meme. “Akilapu ara, anggun nang susuk arye domlye kil ati, ‘Neika maptinimnyeʼ tenena meme,” nyapne. Akilapu nirya, pia kum yonamlume.

¹⁷ Tonda, tonok kil ap, akil arye deiamlye kilmu ap, sik bitinye dobuka, neika mana meme. Tonda, akil arye deamlye mi, elce deiamlye kilmu ton, neika mana meme. Tonda, akil arye deiplye kilmu, akil arye deiplye kilmu ton, neika mana pia meme. Akilapu nirya ati ara, ‘Se akilapu ap neika maptinimnye,’ tenena meme. Deiyok ara, akilapu nirya, ‘Anggun dam unyak ati, sik nirya ara, anggun aik ninye tonok kibuka unyak nang ati, tonda an bidamnye atonun ulula ati, akil neika mana meme. Aning winipmunyeura, weik mem ning, pia malye ning winipmunce, alye dakalanamlume. Akilapu nirya, pia kum yonamlume.

¹⁸ Tonda, an dominye kil batakminyeura, el kam tuba ulamlye buk, el weit kil do, el du kil do, pia kum donamlyame. Akilapu ap, pia neika mana meme. Akilapu nirya, pia kum yonamlume. Winipminyeba, sik akilapu bitinye arye, ‘Seʼ tenen, ‘Malye kanye bobuka, walanauk ubicakʼ tenen, nyapsine. Aning ara, pia mem ning ati, aning ara, kum wininamlume.

¹⁹ Ura, yata kil do nirya, kilapu ining balamle talak arye, kil ton ining tuba banmalye buk, akilapu ap neika kum manamlulume. Deiyok ara, akil el ining balye talak ara, Allah arye, ‘Aning ara, malye ning ati, ining banmal talak ara, akil na dam kum yatue,’ tenelule ati, ining tuba banmalye talak ara, akil ap neika kum manamlulume.

²⁰ An kwit capu nang do, an yala nang do, anang arye, sik domice kilapu ap, neika kum mapnamlulume. Ubula dobuka, neika kum manamlulume. Aning winimunya deice arye, ancuk, malye kililanalama ati, Allah el kanye ara, ‘Aning winilinye bira, na dam kum yatue,’ tenamsile. Ati, “Aning nirya winina ara, pia meme,” nyapne. Akilapu nirya, pia kum yonamlume.

²¹ Ance deiaminye mi koproba ton bobuka, ‘Isa el si Molok si erena ati, binuka opnirye, arepnuneʼ tenen, bobuka kum arenamlyame. Utenebuka, an mi dobuka, isa Molok arepminya deice arye, an ni Allah, el si ati yanipmince, wininalame. ‘Aning winipminya deice arye, el si yanipminyakʼ tenen, “Aning ara, pia meme,” nyapne. Nara, Allah Yahweh arye, “Aning ara pia meme,” nyapsine.

²² Tonda, “Sal arye, kilapu ap neika malum touk, yuk sal ap neika mana pia meme,” nyapsine. Aning ara, pia kum wininamlume. Ara, tonoknye birye, ‘Se, na ap, kilapu ap, neika malamap touk, yuk sal ap, na ap, neika maptiniminye,’ tenen ning ati, nyapne. Atonun winina ning ara, Allah arye, ‘Aning ara, pia na like,’ tenelule. ‘Aning winilinye bira, na dam pia kum yatue. Awinina ara, na pia like,’ tenelule.

²³ Aning atonun, sal babye, kilapu babye, talye bai tam ulamak ning, kam do, basam do, sapi do, yuk kam ning babye nirya ati, ‘Kilapu ap malam touk ton, atalye kam un ning ap maptibye,’ pia kum tenenalyame. Talya kam un ning ap, tukwak nang ap, neika malulum ning ara, anggun nong deice pia malye kilinalume. Ati ara, aning pia kum wininamlume. Talye kam ulamak ning ap, tukwak kilisala ap, pia kum yolanamlume.

²⁴ Tonda, Allah arye nyabuk. Ura anyapdeipmasin yupu nirya ara, “Aning-aning ton, pia kum wininamlume. Aning ara, pia meme,” akunum nyapdeipmasin ning bukni, talye lukparabuka arye winipmunyeura, adeice arye, ‘Anggun bidamnye arye, malye kipdeipdamunyakʼ tenen ati, aning ara pia meme. Aning ara, pia kum wininamlume. Talya lukparabuka, aning nirya talye winipmunyopura, Allah el dam kum yanganamlume. Anggun ti, Allah elce, “Kume, aning wininyak nang ati, na pia like,’ tenelule. Tonda, ‘Amem ning winibikcakʼ tenena ati ara, Kanaan mutuku noutam unyak nang, yuk-yuk yala nang nirya yakdonoklulume. Ara, anggun Israel nang arye, Kanaan mutuku unyak nang arye, sik wininyak ning eibikirye, ‘Se, nun ton, aning winipnamabe,’ tenebikirye, ‘Malyeuk winibikcakʼ tenen, anggun amutuku min kum binuka unmalum talak arye, Kanaan mutuku unyak nang nirya, Allah arye, yakdonoknamle. Winiplyeba, anggun amutuku bimunyeura, telebuk binuka unamlume.

²⁵ Kanaan mutuku noutam unyak nang arye, atouk ning weik akunum winilamika deice arye, Kanaan mutuku nirya, im sirya, mutuku sirya akunum malye upmale. Ati ara, amutuku malye ning ubuk ati, kum danalina ara, narye, amutuku ikin ning weik deipseba, amutuku ara, dukna duklamak atonun uplirye, amutuku unyak nang nirya, yakdongokniba, amutuku batakuka, yukakuk bendopnamake.

²⁶ Bukni, anggun Israel nang ara, narye anggunti, “Aning ara wininamlume. Aning ara, pia kum wininamlume,” nyapdeipsise ning ara, adiparyuk moubuka talipmunce, wininamlume. Tonda, “Aning ara, pia mem ning,” nyabuka, nyapdeipsise ning nirya ara, tonok ning babye kum wininamlume. Ara, anggun Israel yala nang babye, anggun mutuku noutam ninye asik nang babye, tikilyayikba anggun ap neika umunye nang babye, sik nirya ara, narye nyapse noutam arye, tonok malye winin ning babye, pia kum wininamlume.

²⁷ Ara, talye ati kum nyapsine. Israel nang, anggun amutuku kum yanamlum talak, min talak amutuku ulamik nang nirya ara, malye winin ning nirya, weika arye winilamik. Adeice arye, amutuku ara, akunum malye kipdeibika ati, nyapsine.

²⁸ Ati ara, moubuka tenenamlulume. Na Allah arye, “Aning ara, wininamlume. Aning ara, pia kum wininamlume,” nyapdeipse yupu, yanipmunyakarye, talye lukparabuka winipmunyopura, na Allah arye, amutuku ikin ning weik deipseba, amutuku dukna duklamak atonun uplirye, amutuku unamlum Israel nang nirya babye, yakdonoksinyeba, amutuku batakuka yukak bindopnalume. Ara, min talak amutuku ulamik nang arye, malye weik winipnin balamikba, Allah arye anang eibuka yakuka dolkwetelamuk touk, ‘Allah arye, nun babye wenepsilirye, yakdonoksilyakʼ tenen, kanye moupnamlume. Ara, Israel nang anggun amutuku kum yanapmunye talak, min talak amutuku ulamik nang, malye weik winilamikba, ‘Allah arye yakdonokamuk touk winipsilyakʼ tenen, kanye moubuka teneipmunce, telebuk wininamlume, nyapsine.

²⁹ Aning ati ara, anggun akunum biknulume. Yata nang do nirya, “Aning ara, meme,” nyapdeipmasin ning bukni, amalye winin ninguk talibuka, wininyak nang ara, Allah arye wibuka deiamuk nang, Israel nang unyakak noutam arye, kum unamake. Anang dobuka, bai tam yakdonoknamlume. Winipmunyeba, Allah arye anang wenebuka opnamle. El mapu koproba ap, neika kum unamake.

³⁰ Ati ara, nara Allah Yahweh arye nyapsine. Narye anggunti, “Aning ara, wininamlume. Aning ara, mem ning ati, aning pia kum wininamlume,” nyapdeipsise yupu moubuka talipmunce, telebuk wininamlume. Israel nang, Kanaan mutuku noutam, min kum yanamlum talak ara, Kanaan mutuku ulamik nang, amem ning weik winilamik ning ton, anggun pia kum wininamlume. Awinilamik mem ning, anggun ton winipmunya deice arye, anggun babye, malye kipdeipdanalume. Nara, anggun ni koproba, Allah Yahweh arye nyapsine.