Imamat 17 - Eipomek

Domba ato ning boyamunce, onamlum ning, el ining ati ara, “Wininamlume, aning ara kum wininamlume,” nyabuk yupu

¹ Allah el si Yahweh arye, Musa biti, ayupu nyapdeibuk.

² Musa ance, Harun ap, el mapu ap, tonda Israel yala nang nirya ap ati, “Allah el si Yahweh arye, ‘Aning ara winibuka-winibuka, wininamlume,’ nyapdeipsuk yupu nirya ara, ani,” nyabuka, sik Israel nang dam, laka nyapminyeura, kekepnamnyake.

³ Sik Israel yala nang nirya ara, tonoknye babye, sik yuk-yuk domba basam mi do, sapi basam do, tonda kambing basam do, anggun Israel nang ululumyak dam do, yukak bai tam do, akam ning boyanuka, obice talak ara, na Allah ati, arelyanganamniyake.

⁴ Bukni, yatanye birye do nirya, anyapmasin kam ning, domba ato ning opmace bukni, aning boyanuka, na si eren aik, sapi bol arye doltakna tenda aik bublan dam kum boyaceura, malyeuka. Dipkoprob, “Wininamlume,” nyapsin ning ara, ani. Na Allah Yahweh ap, ninye ap, ansinilina aik bublan dam, domba ato ning obice ninguk, bobuka yakirye, na Allah ati arelnamniyake. Bukni, winipmanto ning ara, sikce akam ning, Allah arelyangana ning ati ara, talye yukak arye obiceba, aning el ining banmalye ning ara, na Allah arye, “Aning ara, winibuka winimunce, onamlume,” nyapdeipsise touk kibuka, kum opmace ning ati, winibiceura, na yupu akunum yaninyak ati, ara pia malye wininyake. Deiyok ara, domba ato ning, el ining yukak bai tam saka banmalya ati, nyapne. Tonda, aning boyanuka, na Allah ati kum arepnamninyake. Ati ara, aning atonun winiplinye bira, na mapu Israel nang kan-kan ton, pia kum unamle. Anye dobuka, anggun ululumak batakuka, bai tamak uk kwetepmunce, bataknamlume. Anye bira, bataknamna ati, na mi kum unamle. El dipnamlarya.

⁵ Na Allah arye, ayupu nirya nyapdeipsin deiyok ara, ‘Israel nang nirya arye, ayupu kekebikirye, domba ato ning, Allah Yahweh ati arepnukce ning ara, adiparyuk bobikirye, na Allah ap, ninye ap, ansinilina ati, sapi bol arye domik doltakna tenda aik dam boyanuka, na Allah ati arelyanganamniyake. ‘Tonda, talye bai tam, sik bidamnye tenebikcakuk winibikcakʼ tenen, nyapsine. Winibikirye, sik nirya adiparyuk, tonoknye yuk-yuk Allah si erena ati, na ap, ninye ap, ansinilina ati, doltakna aik bublan dam boyakirye, Imam nang dinamacak aryuk, Imam nang ati yanuka arenamnyakce, sik arye onamake. Winibice deice arye, sik malye winilamikce ning nirya ara, na Allah arye namin kibuka, kilipnamne. Winipnyopura, sik ap, na Allah Yahweh ap, teleb kibuka neika unamabe.

⁶ Tonda, Imamnye birye, adiparyuk adomba basam mi ap, sapi basam ap, kambing basam ap, bobukaplirye, Allah Yahweh ap, ninye ap, ansinilina ati, sapi bol arye domik doltakna tenda aik bublan dam bobilirye, aning obuka uku dongonak, el si mesba memebik sukum, sirya dana-dana ara, ining dobuka wipdonoklyeura, amesba deice poulbinuka dulbinamle. Tonda, adomba ato ning meta ara, dobuka uku dongoplyeura, siltong teleb ning welepyeba, na Allah Yahweh kekenirye, na kanye teleb unamnile.

⁷ Sik Israel yala nang nirya ara, Allah Yahweh arye, “Winibuka aning wininamlume. Aning ara, pia kum wininamlume,” nyapdeipsuk ninguk, pia ati moubuka talibikirye, wininamyake. Tonda, domba ato ning obukabikirye, sikce kum bikinyak ning, malye un isa-isa si eren ati, kambing basam urasin atonun memebuka deibikirye, aning si erena ati, aning obuka kum arenamyake. Aisa mer si erena ati, kam ning obuka arebikceura, yuk talye kilapu ubula yona atonun winin ning winiyak ati nyapsine. Aning ara, ‘Na pia like,’ tenenune. Ati, Allah arye akunum nyapdeipmasil yupu, “Aninguk winibuka talipmunyakarye wininamlume,” nyapsuk ning ara, ayupu pia ati, moubuka talibikirye, wininamyake.

⁸ Tonda, Musa ance, sik Israel nang ati, ‘Winipnamlume,’ nyapnulyam yupu ara ani. Winipmanto ara, Israel nang arye tonoknye do, tonda yuk mutuku arye tikilyangan nang bukni, sik Israel nang kibikura, sik ap neika unyak nang ap, nirya ara, Allah arena ati, domba ato ning obuka, uku dongona ati, tonda yuk pil dona ati nirya babye, sik yuk-yuk bobuka, Allah el si eren aik damuk arelyanganamniyake.

⁹ Bukni, yatanye do, sik malye winipmalinye bira, domba ato ning, adiparyuk Allah Yahweh arena ati bobuka, Allah Yahweh ap, ninye ap, ansinilina ati, sapi bol arye domik doltakna tenda aik, bublan dam kum yanuka opmalinye bira, pia malye weik ulule. Sapi ato ning ara, talye yukak bai tam arye oplirye, ‘Allah ati yanuka arepnune,’ teneplinye bira, el anye biti, na mi koproba kum unamle. El anye bira, na mapu, sik Israel nang kan-kan ton, pia kum unamle. Anye dobuka, sik ulamicak batakuka, bai tamuk dopkwetepmunce, yaknamlulume. Anye bira, na babye bataknamna ati, na mi kum unamle. El yuk daulamlya ani, dipnamlarya.

¹⁰ Tonda, sik Israel yala nang koproba do, yuk mutuku arye tikilyangan nang buk, Israel nang ap ulamice nang do arye, tonoknye ton, domba ato ning obikirye, ining balamle ning dobukaplirye, aning diplinye bira, Allah arye, “Aning ara, pia kum wininamlume,” nyapdeibuk ning yanilula ati, wenepnamle. Tonda, el anye bira, Allah mapu, sik Israel nang kan-kan ton, pia kum unamle. Anye dobuka, sik ulamicak batakuka, bai tamuk yakmunba, binamlule. Anye bira, Allah babye batanamle ati, el mi kum unamle. Anye bira, el yuk ulamlya ani, dipnamle.

¹¹ Ayupu nyapman ara, talye ati kum nyapsine. Deiyok ara, ani. Domba ato ning ayala-yala nirya ara, ining deice aryuk, kam unyake. Ati ara, na Allah Yahweh arye, ‘Iningʼ kum dinamlume,’ nyapsise ninguk kekebuka wininamlume. Tonda, domba ato ning nirya opmunye ning ara, “Aining ning nirya, boyamunba, Allah si eren aik dam, yanuka arebikceba, uku dongolulumak, el si mesba deice, aining likeipmunya deice arye, anggun malye winilulum ning nirya ara, kilibuka kum kum daneipnirye, kum kilinamsile. Ining arenamluma deiyok ara, ining noutam ara, kam una deiyok ning aulule. Ati, ining arepnumunya deice arye, anggun malye winin ning nirya pununa ati, aning nirya kilipnirye, kum kipdeipsinirye, lyepnamsine.

¹² Ati ara, Israel nang ap, tonda yuk mutuku arye, tikilyangan nang bukni, anggun Israel tam kibikba, neika ululum nang ap nirya ara, ining diamuk dina pia meme. Tonda, domba ato ning ining kipman dina ara, pia meme, nyapsine.

¹³ Aning atonun, tonda winipmanto ara, Israel nang ap, tonda ninye asik tikilyangan nang buk, tikilyangan nang, sik Israel nang tam kiprobikiba, sik ap neika unamak nang ap nirya ara, anoutam tonok-tonok nang arye, dan nang arye do, maka do, yuk talye kam ulamle ning do, opmunye ning ara, ‘El tup ara telebe, aning talye mangkau asa dinamnyake,’ nyabuk ning, tomoplirye, oplyeba, ining saklye ning ara, dina meme. Adiparyuk dobuka, tuku palibuka dongobikirye, adeice ara, singnilongonamlume.

¹⁴ Ining dina meme,’ nyapsise ning ara, talye ati kume. Deiyok ara, kam unyak ning yala-yala nirya ara, ining deice aryuk kam unyake. Ati ara, na Allah arye, anggun Israel nang nirya ati, “Ining unmalye buk, akipman dina meme,” nyapsise. Ara, yatanye do, amem nyapse ning dobuka, diplinye bira, na mi koproba kum unamle. Kam unyak ning yala yuk-yuk nirya ara, ining deice aryuk kam unyake. Ati ara, ining diplinye bira, sik adiparyuk, anye bobinuka, Israel nang unyaka kan-kan arye bodinuka, bai tamuk yaknamlulume. Na Allah arye, anye wenepnamne. El dadipnamlarya.

¹⁵ Tonda, Israel nang arye do, ninye asik nang bukni, tikilyanamlirye bukni, Israel nang tam keamicebuk, anggun ap neika unamlumak nang arye do, Israel nang kan-kan ulamikce nang do, nirya arye, bai tam kam ulamle ning ton, dipmalye ning dobuka dipmalinye do, tonda talye bai tam kam unyak ning aryuk, yuk kam ning ton, oplopmalye ning ara, el ton dobuka dipmalinye bira, el adiparyuk mek dem kekenamlule. Tonda, el ongopmalye baju nirya babye, mek likinamlule. Winibuka likinmalirye dinmaliba, sin tam kipliba, malye ning tuba upmalya ani, keting kumuplyeura, ‘E, malye winipman ning ara, akunum kum danilce, teleb akunum kipnile,’ tenenamle. Atalak ara, na Allah arye, ‘Anye na dam yangana teleb uka,’ tenenamne.

¹⁶ El anye birye, el nong ap, el ongolye baju ap, aning mek kum liklyopura, aning kum likmalya ati, dengna ara, ikin ning el dam yalyeba, dolanamle. El nong ap, baju ap mek kum liklyeura, el malye ulamlye ning ati, wenepnamne, nyapsine.