Imamat 16 - Eipomek

Israel ninye, malye winilamik ning ati, Allah arye, talye lukparabuka optu bukni, sik malye winin ning pununa ati, Allah arye, “Sik malye ning, ‘Kum daneipnamsilʼ tenen, kam ning obuka arenamnululume,” nyapdeibukba, pil dolamik yupu

¹ Harun el mapu bitinye ara, sik kanye aryuk, Allah el si Yahweh, el dam talye parapkabuka birika deice arye, pia malye uprikba, Allah arye uku dopkwetebukba, uku dibukura, abitinye nang diprik. Sik malye winiprik ning ara, kanye moubuka tenilena kumce, uku dobuka, Allah el si eren aik pum tam talye parapkabuka wekrikba, Allah arye uku dopkwetebuka deice arye, anang obuk. Allah arye, ‘Telebe, dauplye,’ nyabukce, kum batakukce, obuk.

² Sik akunum diprik talak ara, Allah el si Yahweh arye, Musa biti nyabuk. “An du Harun biti, nyapnamlyame. Ami, an mining kanye aryuk, tonda an mining kanye tenepminye talak aryuk, Allah el si eren aik pum tam ara, mambul ak ulul ati, Pia Teleb Lek Aik pum tam, talye parapkabuka kum weknamlulume. Allah arye, ‘Akunum anyaik ara, mem aik ulule,’ nyapsuka atia. Allah el si eren aik pum tam, diripkwetebuk cang kain, balye tam kipdeipminyopura, Allah arye opnamkile. Deiyok ara, emas marikna anyaik pum tam memebuka dadeiamik ning, el si Peti Perjanjian ara, ayo marikna deice tam bublan dam kum yatume. Amarikna bublan ara, ‘Allah arye nun malye ning kum daneipnamsil’ tenen, delinyak ning, pia memak atia. Tonda, Allah el yuk arye, abublan deice tam, dua kan-kan tikilyangalula ati, asukum ara, malye ning pia kumak, pia teleb lekak anya arye, kum bitume. An du Harun biti, ayupu nyalbinulyame,” Allah arye Musa biti nyabuk.

³ Nyabukce, ayupu ton dukdongobuka nyabuk. Ayupu ton Harun biti, “Allah arye nyapkile,” nyabuka, nyalbinamlyame. Harun birye, na si eren aik pum, natikilyanganyak wekelbinulye talak nirya ara, winibuka wininamlule. Harun birye, sapi basam mi kam ning dobuka, el ap, Israel ninye ap, sik malye wininyak ning kilina ati, kintinipnamlule. Aminyan, asapi basam opra banamlule. Tonda, domba basam kam ning dobuka, boyanamlule. Aminyan talak, sik malye unyak ning dekna ati, adomba oplirye, uku dongopnamle bukni, kabula. Aning arepnamnil ning babye, Israel ninye, sik malye ning lyena ati, arelbanamlule.

⁴ Aning akunum kintiniplyopura, atalak wininamle ning ara, ani. Allah el si eren aik bukni, mambul aik el si ara, Pia Teleb Lek Aik min kum binulye talak ara, mem aik pia teleb lekak weknamla ati, min yuma ara, el nong nirya mek kekenamlule. Mek keklyopura, Allah ap, ninye ap, ansinilina deiyok nang ongolamice baju, pia lek baju ongonamlule. Ara, el baju amu ning babye, tonda baju alip tam ning babye, pia lek ulul baju uk ongonamlule. Winiplirye, alek baju yala ninguk bukni, cang ning dobuka, el deiyatinga koulongonamlule. Winiplyopura, el kisok nirya, kurun baju aryuk kitinamlule. Akurun baju kum ongoplyopura, na Pia Teleb Lek Aik kum wektue. Allah arye nyabuk.

⁵ “Israel ninye weilamak ning noutam arye, sik yim kambing basam bitinye bobuka, Harun binyak arenamake. Aning ara, sik malye wininyak ning lyena ati, akambing bitinye obuka, nati arenamnululume, nyapkine. Aning atonun, Israel nang arye, yim domba basam tonok dobuka, Harun biti arenamake. Ara, ‘Allah arye, nun malye winin ning kilipnamsil’ tenen, Harun birye, ayim domba bobuka oplirye, uku daplirye, na Allah ati arenamnulule. An Musa birye, Harun biti nyalbinamlyame,” Allah arye nyabuk.

⁶ Allah arye nyabukopura, ayupu ton laka nyabuk. Ura, arenamnil ning deiyok laka nyapnune. Harun birye el ap, el kilapu ap, el mapu nirya ap, sik malye ning kilina ap, sik winilamicak pununa ap ati, adiparyuk asapi basam yim obukaplirye, na Allah ati arenamnulule.

⁷ Winiplyopura, sik Israel nang arye kambing basam yim ning bitinye arepnamak ning dobuka, nara Allah, na si Yahweh ati, arenamnulule. Ara, na Allah ap, anggun ninye ap ansinilina ati tia tenda na si erena ati bublan dam boyaliba, na Allah arye elinnamne.

⁸ Ayim kambing basam bitinye ara, ‘Aning wipnun do, aning wipnun do?’ tenen, wina deiyok ning, el si undi, pil dopnamle. Aning ara, yo bitinye wibuka, tonok ning deice na si seknamle. Yuk ning deice. ‘Bura dolkweten kambing,’ seknamle. Winiplirye, asing dina kumce, tonok ning talye lukparabuka dopropnamlule. Winipnamla ara, tonok kambing wiplirye, nara Allah, na si Yahweh ati, arepnamnulule. Yuk kambing ara, aminyan talak ara, talye bai donokonamlule. Deiyok ara, Israel ninye, sik malye ning ati, wenebuka optinye bukni, sik malye winina pununa ati, akambing el nong deice, sik malye winilamak ning dobuka deiplirye, akambing lopdeipliba, ninye pia kum unyak mutuku noutam bindopnamlule. Wininamle ning, el si ara, Asazel nyanamlume. Akambing bitinye wena ati, undi pil donamlule.

⁹ Atalak Harun undi pil doplirye, nara Allah, na si Yahweh arena ati, kambing akunum wiplyopura, akambing Israel ninye, sik malye winilamikce ning, kilibuka lyena ati, akambing basam opnamlule.

¹⁰ Bukni, undi pil dobuka winmali bukni, Israel ninye, sik malye winilamice ning pununa ati, bai tam dolkweten kambing, ara Asazel kambing nyalamik ning ara, adiparyuk bataknamlule. Bukni, wiplyopura, kam kipman adiparyuk, na si Yahweh, na Allah dam boyanamnulule. Israel ninye anggun malye winina ati, narye adiparyuk wenebuka opsitinye bukni, anggun malye winina ning pununa ati, akambing dobuka, aminyan talak, Israel ninye sik malye ning, el nong deice deipniba, Harun birye lopliba, ninye kum unyak mutuku noutamak bindopnamlule. Aning ara, ‘Na Allah ap, ninye ap, epdatibirye, teleb kibuka neika uptibye’ tenena ati, Israel ninye, sik malye winin ning akambing deice deipniba, akambing arye, sik malye ning dobuka, ninye kum unyakak mutuku noutam bindopnamlule. Allah arye nyabuk. Nyabukce, ayupu ton dukdongobuka nyabuk.

¹¹ Ura, Harun el ap, el kilapu ap, el mapu nirya ap, sik malye ning ati, lukparabuka optinye bukni, sik malye winin ning kilibuka lyena ati, adiparyuk yim sapi basam obukaplirye, na Allah ati arenamnulule. Ara, el ap, el kilapu ap, el mapu silip babye ara, sik malye winin ning kilipnirye, sik lyepnamna atia.

¹² Winiplyopura, el adiparyuk, keil lelebuka dika deibukak deice arye, kam ning obuka, uku kalum ongolamle kalum, tuba tin unmalye ning dobuka, yangalin makau pum tam, ongobuka kintinipnamlule. Nara Allah, na si Yahweh arye dinamne. Tonda, el taruk bitinye arye, siltong teleb ning, uku sice atonun dobuka, na Allah si eren aik pum tam bukni, lelipdongamice cang kain, amu tam boyanamlule. Ara, Pia Teleb Lek Aik pum tam boyanamla ati nyapne.

¹³ Anintong teleb ning bobuka, na si Yahweh, na Allah dam binuka tiklirye, ‘Na dipnyak’ tenen, siltong ning, sice atonun ning ara, uku deice deipnamlule. Deipliba, uku arye nintong teleb ning diplyopura, tulum weik weleplirye, memebuka diamikce marikna, el si Peti Perjanjian, singnipdongonamle. Amambul marikna ap, marikna pum tam, Allah mem yupu nyamukba, Musa sekeibukba, amarikna libik ning ap, marikna el mem bublan ap, aning nirya ara, tulum weik weleplirye, siknipdongonamle. Winiplyopura, Harun kum eipnamla anya arye, kum dipnamle. Ninye malye winin ning kilina ati, na Allah ap, ninye ap ansinilina ati, arin ning, ‘Abublan deice deiamicak, lak kum eipnamle’ tenen, wininamlule. Allah arye nyabuk.

¹⁴ Nyabukce, ayupu ton nyabuk. “Harun birye, sapi basam opnamle ning ara, el ining mitik tonun ton, taruk liklirye, amambul marikna urasin deice dikdonokliba, palilbinamlule. Aning atonun, tuba tonap sapi basam ining mitik tonun ton, taruk liklirye, dikdonokliba, like tekbarye (7) arye, dikdonokliba, amarikna bublan urasin dam ap, amarikna deice tam ap, palilbanamlule,” Allah arye nyabuk.

¹⁵ “Aning akunum winiplyopura, aning ton winipnamlule. Israel ninye, sik malye ning kilina ati, Harun birye kambing basam oplirye, el ining yangalin ning pum bisik dongoplirye, bobuka, Allah na si eren aik pum tam, cang kain lalkwetenak, balye tam bobinamlule. Bobilirye, sapi basam ining dobukaplirye, mambul marikna urasin dam ap, abublan deice ap, taruk arye purupdonokliba, dulbalamle touk, akambing ining babye, amarikna el si Peti Perjanjian deice purupdonokliba dulbanamlule.

¹⁶ Awinipnamle ning deice arye, Allah na si eren aik pum tam, Pia Teleb Lek Aik, ara pia mem aik ati, teleb kipdeipnamnulule. Israel ninye, sik malye wininyak ning, aning-aning nirya ap, tonda Allah na yupu kum kekenyak ning ap ati, Harun awinipnamle ning deice arye, Allah ap, ninye ap ansinilina ati, Pia Teleb Lek Aik ara, pia mambul aik, teleb kipdeipnamlule. Apil nirya lak nyapman touk, Harun birye, Allah na si eren aik, bai tam ning babye, pia noutam ning babye atonun, pil doplirye, teleb kipdeipnamlule. Deiyok ara, anyaik sik Israel ninye malye-malye winibikirye unyak noutam, na si eren aik domikba ulula anya arye, sik malye wininyaka deice arye, anyaik malye winipdeibika ati, anyaik teleb kin pil donamlule, nyapkine.” Allah arye nyabuk.

¹⁷ “Harun birye, Allah ap, ninye ap ansinilina ati tenda aik, ara na si eren aik pum tam bukni, Pia Teleb Lek Aik wekelbilye talak ara, tonoknye babye tonap, anyaik bukni, mitik bai tam aik, Allah ap, ninye ap ansinilina aik el si Teleb Lek Aik, wekna meme. Ara, Harun el yuk, noutam aik el si, Pia Teleb Lek Aik pum tam, pia memak weklirye, el ap, el kilapu ap, el mapu nirya ap, Israel ninye nirya ap, sik malye ning kilibuka lyena ati, pil dopnulye talak ara, yuk nang anyaik dam nirya wekelbana meme. Israel ninye nirya, sik malye winin ning kilina ati, Pia Teleb Lek Aik pum tam weklirye, mambul pil dopnulye talak nirya ara, yuk nang nirya anyaik wekna pia meme,” Allah arye nyabuk.

¹⁸ “Ura, Allah si arena ati, kam ning oplirye, aopmalye ning nong ap, ining ap, keil lelebuka yangapdeibika dam yalirye, opmalye kam ning adeice deipnamlak ati, teleb kipdeipnamlule. Apil donamle talak ara, nara Allah, na si Yahweh arye na asing arye dinamne. Ara, Allah si eren aik pum tam, Pia Teleb Lek Aik pum batakuka, tuba ton bai tam yalyopura, pala keil lelebuka dika deibukak, kam ning oplirye, aning el si mesba deice deipnamlak dam yalyopura, el taruk arye, ining dobuka purupdonokliba, dulbanamlule. Ara, sapi basam kam ning opmalye ning ining ap, tonda kambing basam opmalye ning ining ap, mitik anun dobuka, akeil pala deice, sirya sapi basam yang atonun ning belepdeibikak ara, adeice purupdonokliba dulbanamlule.

¹⁹ Harun el taruk arye, ining mitik anun likukaplirye, like tekbarye arye keil pala deice kup-kup sirya tam, dikdonokliba dulbanamlule. Awininamla deiyok ara, Israel ninye sik malye wininyak ning deice arye, apala keil lelebuka yangapdeibuka ara, akunum malye ulula ati, amalye ning kilibuka, teleb kilina ati, apil donamlule. Kumopura, sik ap, na Allah ap kum ansinipdatibye,” Allah arye nyabuk.

²⁰ Aning nirya akunum winiplirye, Allah el si eren aik pum tam bukni, Pia Teleb Lek Aik weik mem aik ap, anyaik mitik bai tam, el si Teleb Lek Aik ap, ura, kam ning opnirye, pala keil lelebuka, yangapdeibukak, adeice deipnamlak ap, anirya ati, malye ning akunum kiliplirye, teleb kipdeiplyopura, kambing basam kam kipman dobuka, anyaik dam boyanamlule. Akambing ara, lopdeipliba, ninye una kum mutuku, pia laka mutuku noutam, bindopnamlule. Aning deiyok ara, Israel ninye sik malye winin ning akambing deice deibuka, bai tam yakdonokliba, balonamlule. Winibuka bai tam bilya deice arye, sik malye winin ning bobanamlule, Allah arye nyabuk.

²¹ Ayupu nyabukopura, ayupu ton dukdongobuka nyabuk. “Harun el taruk bitinye arye dobuka, akambing basam kam kipman ning, kisok deice deipnamlule. Winipnamla ara, Israel ninye sik malye winin ning ati, lak kibuka nyanamlule. Aning atonun, Allah el yupu kum kekebikirye, batakanyak nang, malye wininyak ning nirya ara, ninye kekenak lakak arye, laka nyaplirye, aning nirya akambing basam kisok deice deiplyopura, adiparyuk akambing lolinamlule. Winiplyopura, akambing batakliba, ninye una kum mutuku, pata mutuku noutam, akambing binamlule. Atalak ara, akunum wipdeiamikinye biti, wipdeipnirye, akambing dobuka, bai tam, pia pata mutuku noutam bobilirye, yakdonoknamlule. Akambing tamubuka ninye unyak mutuku, pia kum yanamle. Dapia banamlule,” Allah arye nyabuk.

²² “Akam kipman yim kambing basam ara, akunum wibuka kintinip deibikinye, libuka bobilirye, akambing el kisok deice, Israel ninye sik malye wininyak ning nirya, bobuka bilirye, ninye pia kum unyak mutuku noutam binamle bukni, akambing basam ara, pata mutuku anyuk lopdeipnamle,” Allah arye nyabuk.

²³ “Akunum bilye talak ara, Harun adiparyuk, Allah ap, ninye ap ansinilina ati, tia ati sapi bol arye domik tenda aik, Allah el si eren aik pum tam bukni, anyaik si ara, Teleb Lek Aik weklirye, el teleb kurun baju, arup arye ongopmalye ning, ‘Weik mambul aik Pia Teleb Lek Aik wekelbinun’ tenen, ongopmalye ning ara, binuka kwiribuka, anyaik pum tamuk delinamlule,” Allah arye nyabuk.

²⁴ Nyabukce, ayupu ton nyabuk. “Aning akunum winiplyopura, anyaik pum tam bukni, el yuk tonok telebak ton bilirye, el nong mek keknamle. Winiplye talak ara, asum el yuk baju kwiribuka deipmalye ning ara, tuba tonap tamubuka ongoplyopura, anyaik batakuka bai tam banamlule. Bilyopura, el malye winin ning kum kilina ati, kam ning oplirye, uku dongonamlule. Aning akunum winiplirye, Israel ninye nirya, sik malye wininyak ning kum kilina ati, kam ning ton oplirye, uku dongonamlule. Aning deiyok ara, na Allah arye, aninye nirya talye lukparabuka optinye bukni, sik malye winin ning pununa ati, kam ning obuka, uku danamlule,” Allah arye nyabuk.

²⁵ “Winiplyopura, sik malye ning kilina ati, yim kambing opmalye ning ara, akambing meta dobuka, uku dongonamlule. Ara, pala keil lelebuka yangap deibukak deice, kam ning dana ati, uku sekuka dongonamlule. Uku dongoplyopura, uku diplirye, tulum welenamlule.

²⁶ Ninye kum unyak mutuku noutam, kambing lobuka yakdonoknamlya deiyoknye bira, adiparyuk Israel ninye dam kum yanmalye talak ara, el baju ap, el nong ap, mek akunum keklyopura, tamubuka sik Israel ninye unyakak yanamlule,” Allah arye nyabuk.

²⁷ “Sapi basam ap, kambing basam ap, Israel ninye sik malye ning kilina ati, ining bobuka, Allah el si eren aik pum tam, weik mem aik, Pia Teleb Lek Aik arenamlule. Bukni, akambing ap, asapi ap, abasam bol ap, tup ap, deilyu ap, tuba deipmalye ning nirya ara, uku dongonamlule. Uku dongopnamlul bukni, ara Israel ninye sik unyakak bai tam, aning nirya bobilirye, uku dongopliba, uku dinamlule,” Allah arye nyabuk.

²⁸ “Tonda abasam tuba deipmalye ning nirya, uku dongolbinamlanye bira, adiparyuk mek keklirye, el baju ton, mek liklyopura, el adiparyuk Israel ninye ap, elana ati, bai tam arye, sik unyakak tamubuka yanganamlule,” Allah arye nyabuk.

Malye winilamik ning ati, ‘Allah arye lyepnamsil’ tenen, pil dolamik yupu

²⁹ Allah arye Musa biti nyabuk. Wini talak anyapnusin yupu nirya ara, pia, adiparyuk wininamlulume. Apil nirya kum bataknamlulume. Ara, wala tekbarye ning, awala noutam like tagu barye sum (tanggal 10) deice arye outam sum, akunum uplyopura, anggun kanye nimalyap asa ubuka, Allah el amu tam umunce, din dina kum, pil babye ton dona kume. Awininamlum ning ara, anggun Israel ninye koproba babye, anggun dam tikilyangan nang babye, sik yuk mutuku ninye bukni, anggun neika umunye nang babye, anggun nirya ati nyapsine,” Allah arye nyabuk.

³⁰ “Anggun nirya, ‘Wininamlulume’ nyapmasina ara, urdem ati kume. Deiyok ara, ani. Anggun malye winina ati, adiparyuk opsitinye bukni, asum ara, anggun malye ning nirya kilipnirye, anggun malye winin ning lyena ati, akunum winipnyopura, na kanye ara, anggun malye winin ning akunum kum danamle. Ati, anggun ap, na ap ansinipdatibye. Na Allah, na si Yahweh dam, talye lukparabuka kum yatume. Na ap ansinipdana ati, anggun teleb ubuka, telebuk akunum deipsiniba, anggun malye ning akunum kum dalyopura, na dam yangana teleb uka,” Allah arye nyabuk.

³¹ “Asum ara, tenepmunce, din dina kum, tonda pil aning-aning nirya pil dona kumce, kanye lamapdongobuka upmunce, Allah el amu tam upmunyopura, asum ara pia ati, dikdik sen sum unamsile. Aning ara, pia kum bataknamlulume. Pia wininamlulume. Na Allah arye nyapsine,” nyabuk.

³² “Ura, oketeng tamun ara, na Allah ap, ninye ap ansinipdana ati, malye winin ning lyen pil dona deiyoknye, el kisok deice minyak dikeibikirye, Allah el pil dona ati wipdeiplumnye bira, apil donamlule. Ara, anggun adiparyuk opsitinye bukni, anggun malye winina ati, kam ning obuka, na arena ati, pil donamlinye biti nyapsine. Tonda, wipnamlumnye bira, el li pil dolamuk pil punubuka dopnin banamlanye bira, apil donamle talak nirya ara, elce kurun teleb baju uk ongonamlule.” Allah arye nyabuk.

³³ “Winiplyopura, kam ning oplirye, ining dobuka, ‘Allah arye, nun malye winin ning kilibuka lyepnamsil’ tenen, pil donamlule. Ara, Allah el si eren aik ap, anyaik pum tam bukni, min yuma aik, el si Teleb Lek Aik ap, tonda bitinye aik, pia mem aik, anyaik si, Pia Teleb Lek Aik ap, tonda anyaik bai tam bukni, kam ning obuka, uku dongopnamlyak, ara pala keil lelebuka yangap deibika ap, teleb kipdeipnamlule. Ara, na Allah ap, anggun ninye ap ansinildana ati, pil dona deiyok nang, sik malye winina ap, tonda talye Israel ninye nirya, sik malye wininyak ning ap, aning nirya ati, kam ning obuka arepniliba, teleb kilinamsine. Ara, na Allah arye, ‘Anggun malye ning lyena ati, apil-apil ton donamlulume,’ nyapsise atonun, doyanamle keting tamun tuba apiluk donamlulume,” na Allah arye nyapsine.

³⁴ “Anyapmasin ning ara, anggun pia ati, aketing tamun, aketing tamun nirya, like tonok deice aryuk, apil dopnin banamlulume. Ara, na adiparyuk opsitinye bukni, anggun pununa ati, Israel ninye anggun malye winin ning kilibuka lyena ati, anyapmasin pil pia donamlulume,” na Allah arye nyapsine. Aning ara, Allah el si Yahweh arye, ‘Wininamlulume,’ nyabuka, Musa biti nyabuk touk, Harun birye anyapmok ning nirya atonun, binuka pil dopnin balamuk.