Imamat 15 - Eipomek

Sal babye, kilapu babye, ati, “Sik nong noutamak arye, malye ning basilyopura, wininamnyake,” nyabuk yupu

¹ Allah el si Yahweh arye, Musa ap, Harun ap ati, nyabuk.

² Anyapdeipnirye, “Winibuka-winibuka wininamlume,” nyapdeipsinye yupu, Israel nang ati, laka nyalbinamdurume,” nyabuk. Anggunce, Israel nang nirya kekena ati, anyupu nyapnamdurume. Anggun kan-kan arye, ninye ton, uk dilirye, yabung atonun kibuka, lin ban bisik arye, yabung atonun kibuka mek balamle ning ara, anggunce, ‘Se, aning ara, pia malye ning unmale,’ tenenamlume. Aning upmalye talak ara, anang ara, Allah el dam ton, kum yanganamake.

³ Amalye ning talinamsil ning ara, yabung tuba balamlye talak babye, minto arye banmalya, tunim aplye talak babye, anye el nong pum tamuk, tuba uplye talak babye, Allah el kanye ara, ‘Aning ara, pia malye kibuke,’ tenelule ati, ‘Sik babye, aning biknamake,’ tenenamdume. Aning upmalye talak ara, anang ara, Allah el dam ton, kum yanganamake.

⁴ Ati yatanye do nirya, lin yangan bisik arye, yabung atonun kibuka mek balamlinye bira, uk taleplinye, el unamlye sukum ap, el bunak ap, el manak ap nirya babye, pia malye kinamle. Allah el kanye ara, ‘Aning ara, pia malyeuka,’ tenelule ati nyapne.

⁵ Tonda, yata nang do nirya, lin yangan bisik arye, yabung atonun ubuka, balamlye ning, amalye ning el si lelehan uk, taliplirye mek do, yabung do, balamle ning ara, yuk nang arye, anye el manak talibikcopura, sik babye, akunum malye kililanyake. Ati, sik nong ap, sik baju ap, pia teleb kibuka, teleb mek arye, mek likuka delinamake. Winipnamak bukni, aning bolpipmace talak arye, dipdongobuka, aning tuba aupmalye touk, keting noutam nirya areplibuk, danoutam talak ara, Allah el kanye ara, ‘Anye bira, akunum malye kipdanmala ati, na dam ton kum yanganamle,’ tenenamlule. Bukni, keting kumul balyopura, Allah el kanye ara, ‘Winibuka, tuba ton akunum teleb upmale,’ tenelule.

⁶ Aning atonun, yata nang do nirya, el lin bisik arye, yabung atonunuk dilamlinye balamlinye, el bun amsuna deice bukikcopura, ‘Amalye ning taplakmasil do?’ tenen, sik nong ap, sik baju ap, pia teleb mek arye, mek likua delinamake. Winipnamak bukni, anyuk taliplinye bira, el bunak deice bukikce talak arye, dipdongobuka tuba aupmalye touk, keting noutam nirya aupmalya ani, danoutam talak ara, Allah el kanye ara, ‘Anye akunum malye kipdeipdanmala ati, na dam ton kum yanganamle,’ tenenamlule. Bukni, keting koumul balyeura, Allah el kanye ara, ‘Winibuka, tuba ton akunum teleb upmale,’ tenelule.

⁷ Tonda, aning atouk, yata nang do nirya, lin bisik yabung atonunuk dilamlinye, el nong talinyak do, talyeuk el nong bol pipmace do? ‘Amalye ning taplakmasil do?’ tenen, sik nong ap, sik baju ap, pia teleb kibuka, mek teleb arye, mek likuka delinamake. Winipnamak bukni, anyuk taliplinye bira, el nong bol pipmace talak arye, dipdongobuka aning tuba aupmalye touk, keting noutam nirya areplibuk, danoutam talak ara, Allah el kanye ara, ‘Anye bira, akunum malye kipdeipdanmala ati, na dam ton kum yanganamle,’ tenenamle. Bukni, keting kumul balyeura, Allah el kanye ara, ‘Winibuka, tuba ton akunum teleb upmale,’ tenelule.

⁸ Tonda, lin bisik arye, yabung atonunuk dilamlinye birye, el maka tulultaklamliba, yuk nang, sik nong taplaklyopura, atalak aryuk, sik babye akunum malye ning bol pilule. Ati, ‘Amalye ning taplakmasilya ati, malye akunum kipdanmabeʼ tenen, sik nong ap, sik baju ap, pia teleb kibuka, teleb mek arye, mek likuka delinamake. Tonda, sik kisok potong ap, bam potong nirya ap ara, koltakanamke. Winipnamak bukni, anyuk taliplinye, el si maka tulultaklamliba, yuk nang sik nong palepmalye talak arye, dipdongobuka, aning tuba aupmalye touk, keting noutam arye ubuka, sin tam talak nirya ara, Allah el kanye ara, ‘Anye bira, akunum malye upmala ati, na dam ton kum yanganamle,’ tenenamle. Bukni, keting akunum kumul balyeura, Allah el kanye ara, ‘Winibuka, tuba ton akunum teleb upmale,’ tenenamle.

⁹ Tonda, yatanye birye do, alin bisikuk taleamlinye bira, el den si bisik arye yabung balamlinye birye, el kuda basam deice bana ati bulamle ning, el si ara pelana, abunamle sukum nirya ara, malyeuk kilinamle. Ara, ‘Aning el nong bol pipmalya ati, auk deiyok ning akunum taplakmalirye, dakdongopmale,’ tenena atia.

¹⁰ Yata nang do nirya, anyuk talilamlanye bira, el ulamlirye bulamyak ap, talilamye ning ap, el ongolamlye baju ap, bol pilamlye ning nirya ap ara, malye ning kunum kilule. Ati ara, yuk nang arye, amalye ning talibicopura, sik babye akunum malye kipdanamake. Aning talibikce talak arye, dipdongobuka, aketing noutam nirya aupmalya ani, keting kumulbalye talak nirya ara, Allah el kanye ara, ‘Anye akunum malye kipdanmala ati, na dam ton kum yanganamlule,’ tenenamle. Amalye ning tuba aupmalye touk, keting kumul banamle. Mapmace ani, bereklyopura, tuba tonap akunum teleb kum unamake. Tonda, anye el ulamle ning dobuka, yukak bobikce nang ara, sik babye akunum malye kipdeipdanmake. Ati, sik babye, adiparyuk mek kekelona ap, sik baju mek likna ap, wininamyake. Aning talinyak talak arye, dipdongobuka, aning tuba aupmalya ani, keting noutam nirya upmalya ani, Allah el kanye ara, ‘Anye bira, akunum malye unmala ati, na dam ton kum yanganamlule,’ tenenamlule. Bukni, keting kumul balyopura, Allah el kanye ara, ‘Winibuka tuba ton akunum teleb upmale,’ tenenamle.

¹¹ Tonda, anyapmasina atonun ning taliplirye, el nong noutam ara, lden si bisik arye yabung do, mek do balamlanye bira, el taruk mek pia kum liklyopura, malye unamle. Winiplya deice, el winilamlye ning, yuk nang bol pibice do, tonda ataliplinye bira, yuk nang taliplyeura, anang babye akunum malye kilidanyake. Ati, anye talipmalye nang nirya ara, sik baju nirya ara, mek likna ap, sik nong pia mek kekna ap wininamyake. Anyuk talilamlanye bira, el nong talimace talak arye, dipdongobuka, keting noutam talak nirya aupmalya ani, danoutam talak ara, Allah el kanye ara, ‘Anang ara, akunum malye unamaka ati, na dam ton kum yanganamnyake,’ tenenamle. Bukni, keting akunum kumul balyeura, Allah el kanye ara, ‘Winibuka, tuba tamubuka akunum teleb upmake,’ tenelule.

¹² Tonda, anyuk talilamlinye birye, dobuka pil dolamle ning nirya babye, malye upnamle. Winipmanto ara, tuku arye dobuka, memelinyak makau, el si ara belanga, taliplyopura, akunum malye winipmalula ati, adiparyuk amek makau cobuka, bai tam donoknamnyake. Bukni, yo arye memelinyak ning, yuk-yuk ning nirya ara, anyuk talilamlinye ap, bol pipmalye ning ap nirya babye, malye upmalye bukni, aning pia teleb kibuka, mek likmunyeura, akunum tuba tamubuka teleb upnamle.

¹³ Ura, Yatanye do, el nong noutam ara, lin lan bisik arye, yabung do, mek do balamlinye bira, aminyan talak loplyeba, akunum teleb kiplinye bira, el nong teleb uplye sum arye nukuka, adiparyuk tekbarye sum urdem daunamlule. Tonap mabuka dinauk unamle. Dilamlya ani, tuba teleb uplyeura, teleb mek balamye noutam arye, el nong pia teleb kibuka, mek kekenamle. Tonda, el baju nirya pia teleb kibuka mek liknamle. Akunum pia teleb kibuka mek liklyeura, ‘Anye bira, el uk akunum lopmalya ati, akunum teleb upmanile,’ tenebuka, Allah dam ton yangana teleb uka,’ tenenamlume.

¹⁴ Like tekbarye sum akunum maplyeura, pin sum akunum uplopura, maka bitinye, Yalma maka do, Bik maka do, min yuma winiryuk deipmalye ninguk, bobuka yanganamle. Bobuka yalirye, Allah Yahweh el si erena ati, tia talak ati, sapi basam bol arye doltakna tenda aik bublan dam, ninye ap, Allah ap, ansinina ati, anyaik damuk yalirye, aboyanmalye maka bitinye dobuka, Imamnye elti, yanuka arenamle.

¹⁵ Amaka ara, bobuka, Imamnye el dam boyanuka areplyeba, Imamnye elce, Allah Yahweh ati arenamle. Maka bitinye ati, tonok ning ara, ‘Anyuk dilamlibuk, lopmalinye, el malye winin ning ati, Allah arye namin kiplirye, kilibuka aning nirya kum daneipnamleʼ tenena ati, arenamlule. Ton bitinye maka ara, anyuk dilamuknye, el malye winin ning pununa ati, Imamnye birye, amaka obukaplirye, uku dongonamlule. Imamnye birye, aning pil bitinye akunum winilyopura, anye el malye winin ning, namin kiplirye, kum kiliplirye, teleb kilina ati, anyuk dilamuknye bira, akunum dopropmalula ati, akunum teleb unmalula ati, tuba tonap tamubuka Allah Yahweh, el dam yanganamle.

¹⁶ Aning atonun bukni, yuk yupu ton nyapnune. Ara, yatanye birye do nirya, ton el ining ara, den si bisik arye, den yung atonun balyopura, el nong nirya lolobuka banamle ati, pia teleb kibuka mek kekenamle. Aning bol piplye talak arye dipdongobuka, aning tuba awamlye touk, keting noutam nirya aupmalya ani, danoutam talak ara, Allah el kanye ara, ‘Anye bira, akunum malye kipdeipdanmala ati, na dam ton kum yanganamle,’ tenenamlule. Bukni, keting kumul balyopura, Allah el kanye ara, ‘Winida, tuba tonap tamubuka ton, akunum teleb upmale,’ tenelule.

¹⁷ Tonda, yatanye do nirya, anye el lin bisik arye, den yung mek banmalirye, yuk ning nirya bol pipnamle ning ara, sik cang baju deice do, sal nong bol do, kilapu nong bol do, aning bol piplyopura, aning babye, akunum malye kipdeipmale. Ati, adiparyuk, anang sik nong nirya ap, aning bol pipmalye baju ap, yuk talye ning ap, pia teleb kibuka, mek likinamake. Aning bol pipmalye talak arye, dipdongobuka, tuba aupmalye touk, keting noutam talak nirya ara, aupmalya ani, danoutam talak ara, Allah el kanye ara, ‘Anang ap, aning ap ara, akunum malye unmala ati, na dam ton kum yanganamake,’ tenenamlule. Bukni, keting akunum kumul balyopura, Allah el kanye ara, ‘Winida, tuba tonap tamubuka akunum teleb upmake,’ tenelule.

¹⁸ Aning atonun ton, kil tonok ap, sal ap epdadicak arye, mapmarice buk, anye el lin bisik arye, lin lapmarice bisik, aning balyopura, sik amsunak saklyopura, kil babye, sal babye teleb kibuka mek kekenamake. Aning winipmalye ning ati, mek kekenmarice buk, keting kumulbinamle. Deiyok ara, aning sik nong bol pipmalye, atalak arye dipdongobuka, keting noutam talak nirya aupmalya ani, keting kumulbalye talak ara, Allah el kanye ara, ‘Anang ara, akunum malye kipdeipdanmaraka ati, na dam ton kum yanganamdake,’ tenenamle. Bukni, keting kumul balyeura, Allah el kanye ara, ‘Winida, tuba tonap tamubuka, akunum teleb kipmarake,’ tenelule.

¹⁹ Ura, yuk yupu ton nyapnusine. Tonok kil ton, el ining balamle talak ara, aining ara, malye ning ati, asum arye dipdongobuka, tekbarye sum deice arye, akil ara, malye kilule. Allah el dam ton kum yanganamlule. Atalak noutam nirya ara, akil babye, yata nang do nirya, akil neika mana do, el bol pina do, akunum winibikcopura, aning babye, malye winin ning ati, amalye ning bol pipmalyeura, malye kilalule. Ara, atalak arye dipdongobuka, tonok sum keting noutam nirya ara, malye ning tuba upmalya ani, keting kumulbanamle. Ara, atalak arye dipdongobuka, aning tuba aupmalye touk, keting noutam nirya aupmalya ani, danoutam talak ara, Allah el kanye ara, ‘Akil ap, akil mapmace nang ap, akil bol pipmak nang ap, akunum malye kipdeipdanmaka ati, na dam ton kum yanganamake,’ tenenamle. Bukni, keting akunum kumul balyopura, Allah el kanye ara, ‘Winida, tuba tonap tamubuka akunum teleb upnamake,’ tenelule.

²⁰ Tonda, ining banmalye kil ara, yata ning do nirya, el ap neika buna ap, mana ap, bol pina ap, upmalye nang ara, akunum malye upnamake. Aning nirya ara, akil bol piplyopura, amalye ning tuba upmalula ati, abol pipmalye ning nirya ara, malye nanguk unamake.

^21-23 Tonda, yatanye do nirya, akil malamlye amsuna ap, akil bulamyak ap ara, amalye ning bol pilamlye pilamlula ati, anye birye, aning taliplyeura, adeice arye, akunum malye kipdeipdanmale. Ati ara, ato nang ara, malye kilanyake. Ining tuba balamlye kil ap, el malamlyak ap, bulamlyak boplyopura, adiparyuk, anye el baju nirya, teleb kibuka mek liklirye, el nong nirya ara, teleb kibuka mek kekuka, teleb kilanamle. Ara, atalak arye dipdongobuka, keting noutam talak nirya ara, malye ning tuba aupmalya ani, danoutam talak ara, Allah el kanye ara, ‘Anang ara, ining balamle kil bol pipmala ati, tonda anye bira, ining balamlye kil mapmala ati, akunum malye unmale. Ati, na dam ton kum yanganamle,’ tenenamle. Bukni, keting akunum kumuplyopura, Allah el kanye ara, ‘Winida, tuba tonap tamubuka akunum teleb upmale,’ tenelule.

²⁴ Aning atonun, sal ton, ining banmalirye tong nyanmalye kil ap, epdadikirye, neika maprikcopura, anye el babye, malyeuk unamla ati, like tekbarye deice arye, el yuk manamlule. Tonda, anye tekbarye sum noutam arye, el mapnamlak babye, malyeuk upnamlule. Ati, el malamlyak nirya ara, malye kilinamle ati, elce mamlye ning babye, Allah dam kum yanganamle.

²⁵ Tonda, tonok kil ton, awala-awala nirya, el ining balamle talak atonun kum bukni, yuk talye talak noutam aryuk, el lin bisik arye, ining balyeura, aning ara, pia malye ning balule. Winipmanto ning ton, awala-awala nirya, el ining balamle ning atonun kum bukni, tuba weik tonun balamlyopura, pia imun kanye bobuka unamle. El ining balamlye talak nirya ara, aning ara, malye ning ati, Allah el dam ton kum yanganamle.

²⁶ Akil el ining balamle talak nirya ara, el malamlye amsuna do, el bulamyak do, nirya ara, malye upnamle. Aning ara, tuba balamlya deice arye, el bulamlye sukum ap, el bol pilamlye ning ap nirya ara, malyeuk unamle.

²⁷ Yata nang do nirya, akil ining balamlirye, bulamlyak bol pibikcopura, aning babye, malye kilule. Aning ara, malyeuk kilula ati, sik nong babye, sik baju babye, akunum malye kililanyake. Winibikcopura, adiparyuk, sik baju mek likuka, pia teleb kibikirye, sik nong babye, mek kekena ap wininyake. Ara, aning bol pibikmace talak arye, dipdongobuka, aning tuba aupmalye touk, asum keting noutam nirya ara, malye ning tuba upmalula ati, Allah el kanye ara, ‘Anye bira, ining balamlye kil, mapmala ap, tonda bol pipmala ati, akunum malye kipdanmala ati, na dam ton kum yanganamle,’ tenenamle. Bukni, keting akunum kumul balyopura, Allah el kanye ara, ‘Winida, tuba tonap tamubuka akunum teleb upmale,’ tenelule.

²⁸ Bukni, akil ining banmalirye, daulamlya ani, ining akunum ceplirye, teleb uplyeura, ining kum dalyopura, asum aryuk akil arye nuknin balamlya ani, like tek sum (7) kunum uplyopura, utenepnamle. ‘Kume, Allah arye nyapdeipsuk touk, arup akunum winipmala ati, Allah el kanye ara, ‘Akil ara, akunum teleb upmale,’ tenenamlule.

²⁹ Winiplirye, like tekbarye (7) sum akunum uplirye, pinbarye (8) sum uplyopura, el awinyamlye ning dengna ati, maka bitinye Yalma maka mi do? Akumura, Bik maka mi do? Maka bitinye winiryuk neplopmalya ning bopyanuka, Allah Yahweh ap, ninye ap ansinilina aik, Allah el si eren aik bublan dam boyalirye, Imam biti yanuka arenamle.

³⁰ Amaka bitinye bok yanuka areplyeura, Imamnye birye, aboyanmalye maka doproplyeura, akil el malye winin ning dengna ap, kilina ap ati, Allah arenamle. Ton maka ara, el malye ning namin kiplirye, kum kipdeibuka lyeplyana ati, ton ning ara, uku dongoplyeba, teleb kilina ati, uku dongonamle. Aning nirya wininamluma ara, Imam birye, akil el malye winin ning ap, el ining balamuk ning ap ati, teleb kilina ati, apil doplirye, amalye ning ulamlye kil ara, tuba tamubuka, Allah Yahweh el damuk, yangana teleb uka.

³¹ Allah Yahweh arye Musa biti, ayupu nirya nyapdeibukopura, “Anyadeippne ning ara, ance Israel nang nirya ati, nyapminyeura, kekebikirye, moubuka ukirye, ato malye winin ning ara, dan talak uptu do, kum do, aning winiplye talak ara, na Allah Yahweh, na aik pum tam, pia kum yanganamake. Malye ning aupmalye touk, sik mangkau arye, na aik dam yakcopura, adiparyuk narye sikti, wenebuka opnamne. Ati, ‘Winipnamsilyakʼ tenen, sik malye kum wininamniake. Na si eren aik ara, sik unamaka kan-kan noutamuk unamle bukni, sik ap, malye ning ap, auplyopura, na si eren aik dam yangana pia meme. Ara, sik Israel nang arye, malye ning aupmalye talak ara, na aik koproba yanuka wekmunyeura, na si eren aik babye, malye kiplyake. Winibikcopura, anang nirya dipnauk unamake.

³² Aning ati ara, akunum laka nyapsine. Yata malye winin ning do nirya, anang nirya arye, amalye ning talibikiba, malye akunum kipdeipdakce talak ara, “Anggunce winibuka-winibuka wininamlume,” nyapdeipne yupu ara, moubuka wininamlume. Ara, ninye ton, uk dilirye, lin bisik arye yabung ap, mek ap, ining ap, balyopura, narye nyapdeipsin touk, pia winipra banalume.

³³ Aning atonun, yata kil do nirya, el ining balamlye talak ara, malye akunum ulula ati, na dam ton kum yanganamle. Akil babye, narye, “Wininamlume,” nyapsin yupu kekebuka wininamlule. Tonda, kil do, sal do, sik lin bisik arye, yabung do, ining do, mek do balamlyeura, sikda akunum malye unyake. Tonda, ining balamlye kil, aning tuba unmalyebuk, sal arye akil ap, neika mapriceura, adeice arye, akunum malye kipdeipdanamdake. Aning ara, pia malye ati, anye babye, na dam ton kum yanganamlule. El babye, narye, “Wininamlume,” nyapdeipmasin yupu moubuka wininamle. Allah arye, Musa biti nyapdeibuk.