Imamat 14 - Eipomek

“Anggun nong bol deice kanye imun weik, pukle suse dilamsilye ning, mek likuka teleb kipmunce, Allah yupu aik wekenamlume,” nyabuk yupu

¹ Allah Yahweh arye Musa biti, ayupu ton nyapdeibuk.

² Nong bol deice nirya, weik korot suse do, pukle suse do, aning dilamlinye bira, mek likuka, teleb kilina sum ati wininamlum ning ara, nyapnusine. Ara, “Aninguk, winibuka-winibuka wininamlume,” nyapdeipnusin ning ara, ani. Pukle suse dilamlinye birye, Imam nang dam bilyeba, aning nirya telebuk unamlarya. Pukle suse akunum miklyopura, adiparyuk sik Imam nang dam dobuka banamnyake. Winiplyopura, sikce, “Anye bira, akunum teleb unmale,” nyanamake.

³ Winipnamaka ati ara, sik Imam nang arye, adiparyuk anye dobuka, anyaik bai tam bobikirye, anye dilenamnyake. El nong nirya moubuka deipdekirye, pukle suse taleamuk ning nirya kum uplyopura, Imamnye arye, ‘E, anye bira, el pukle suse akunum mikmale,’ teneplirye, nyanamle.

⁴ Winipliyeura, aimamnye birye nyanamle. “Yatanye do, ‘Teleb kipnile,’ teneplyeura, el melina ati, sik yuk nang arye, maka bitinye kam kipmanuk boyanganamake. Ara, maka nong malnye ning pia kume. Nong teleb ninguk boyanganamake. Tonda, cemara yo sekroba, tonok ning ap, ining bi wol tapu ap, mitik yo taruk, el si Hisop yo sekroba, koupna tonok ap, boyanganamake.

⁵ Aning dobuka yalyeura, Imamnye birye, “Wininamlulume, pukle suse dilamuknye birye, ‘Na akunum teleb kipmanile,’ teneplyeura, el teleb kilina ati, maka tonok dobuka yangalyeura, tuku arye telebuka memelinyak mek makau, belanga deice arye, yo mek pia teleb mekuk balamlye deice arye, amaka opmince, amek makau pum tam lipdongopnamake. Ara, silal tuku deice arye memebik mek makau pum tam aomace maka deipnamlume,” Imamnye nyapdeipnamsile.

⁶ Bukni, maka tonok tuba kam unmalye ning, adiparyuk dopropminyeura, kepyal yo ap, hisop yo tonok ap, ining bi tapu ap, kitibukabikirye, koubuka min arye mek balamlye sukum deice maka tonok ton opmalye ning, el ining kintinibuka deipmamunye deiceuk, burupdongopnamlume.

⁷ Imamnye birye, maka ining dobuka, pukle suse dilamuknye, el nong deice likililamlya ani, anye like tekbarye, tujuh kali deice arye likilinamle. Likilamlya ani, akunum teleb uplyopura, anye biti, “Akunum teleb upmalya ati, akunum,” teneplirye, nyapnamle. Tonda, kam tuba unmalye maka buk, tonok ton, ining burupmalye ning, tuba unmalya maka batakdongopliba, lakuka bai tam talye balonamle.

⁸ Apukle suse akunum lopmalinye bira, adiparyuk el baju nirya mek likinamle. Tonda, el potong nirya babye, konamlule. Winiplirye, mek keklyeba, el nong nirya teleb unamle. Mek liklirye, aning nirya teleb uplyopura, Israel nang unyakak, tuba tonap tamubuka, sik aik dam bana telebe. Ara teleb uka. Yuk nang aik dam yangana kum bukni, el aik pum tam babye, min yuma kum wektue. Like tekbarye sum el yuk barasik daunamlule. Talya bai barasik tamuk daunmalya ani, like tekbarye sum akunum maplyeura, el aik sirika tamubuka yanamle.

⁹ Like tekbarye sum akunum maplyeura, el kisok potong nirya koltanamlule. Tonda, kisok potong ap, bam potong ap, asok dibunya potong ap, nong deice tikilul potong nirya ara, konamlule. Winiplyeura, el ongolamlye baju nirya ara, mek likinamle. Tonda, el nong nirya mek keklyeba, aning nirya akapsaklirye, pia telebuk unamle. Aning akunum winiplyeura, Allah dam tonap tamubuka yangana telebe.

¹⁰ Winibuka daulamya ani, like pinbarye (8) sum akunum uplyopura, anye birye yim domba basam mi bitinye, bol pia teleb ning ap, kil domba basam mi tonok, pia teleb ning ap, dobuka yanganamle. Ara, yuk-yuk bobuka, yanganamnyake. Aning nirya ara, bol pia teleb ning uka, dobuka yanganamle. Ton yuk ning ara, tepung tiga (3) kilogram ap, Zaitun minyak mek ap, talbalibuka wibik ning ap, Zaitun minyak mek sepertiga liter, (0.3 liter) ap, boyanganamle.

¹¹ Aning nirya, akunum bolyalyopura, Imamnye birye, anye adiparyuk el nong ap, elce boyanmalye ning ap, nirya bobinuka, ‘Allah Yahweh arye, eipnamleʼ tenen, Allah ap, ninye ap ansinilina aik bublan dam bobuka binamle.

¹² Imamnye birye, ayim domba basam mi tonok ton doproplirye, zaitun minyak mek seper tiga liter (0.3) ning ap, aning nirya dobuka, el malye ubuk ning pununa ati, el ning nirya dobuka, ‘Allah Yahweh arye aning eipnulʼ tenen, taruk arye dobuka ereptalibuka, benbenep lakarye, Allah ati arepnamle. ‘Aning nirya ara, Allah Yahweh el ninguk ulule,’ tenebuka arenamle.

¹³ Ayim domba basam mi dobuka, adiparyuk, ‘Allah arye, nun malye winipye ning namin kibuka kilipnamsilʼ tenen, keil pala yangapdeibikce, kintinip deibikak, el si mesba bikirye, aning nirya obuka sekikirye, uku dongobikceura, ‘Nun malye winin ning nirya namin kibuka, kum kipnamsilʼ tenen, uku dongonamle. Adomba basam ara, adiparyuk, malye winin ning namin kilina ati bobikiba, amalye winilamice ning pununa ati, obuka arenamake. Tonda, aning nirya winibicopura, Pia Teleb Lek Aik, anyaik pum tamuk arenamlule. Deiyok ara, sik malye weik winibikce ning kanye imun tenen ning kilina ati, sik malye ning pununa ati arena ning ap, abitinye ara, Imam nang, sik ning ulule. Tonda, aning nirya ara, Allah el ninguk ulula ati, malye un ning kumura, pia teleb lek ninguk ulule.

¹⁴ Tonda, sik malye weik winilamice ning, kum kilina ap, biklina ap ati aren ning, ining ara, Imamnye birye, adomba basam mi ining mitik tonun dobuka, abarye suse dilamlinye, el sirik amul dam, amu tam likilinamle. Tonda, sirik tam pamu taruk duk ap, yan duk sirik tam ning ap, abitinye deice likeiplyeba, aupnamle deice arye, suse dilamlinye bira, teleb upnamle.

¹⁵ Aning atonun, sik imam-iman nang arye, Zaitun minyak mek sepertiga liter (0.3) kintinibuka deimice ning arye, mitik tonun ton dobuka, imamnye el kwanim taruk deice ton dikilanamle.

¹⁶ Minyak zaitun, el kwanim taruk deice akunum dikeiplyeura, elcuk el taruk sirik ning arye, aminyak zaitun mek pum tam wilonamlule. Wibuka buruplyeura, like tekbarye deice arye, (tujuh kali), ‘Allah Yahweh arye, dimanilʼ tenen, el aik damuk, burupdonoklyeba, aminyak dulbinuka taplaknamle.

¹⁷ Winiplyeura, aminyak Zaitun mek ton, mitik tonun ton, tuba aupmalyopura, imamnye, el taruk deice arye, aupmalye ning ara, adiparyuk el taruk arye burubuka, pukle suse dilamlinye, el sirik amul dam amu tam, ining likeipmalyakuk, likilinamlule. Aning atonun, anye el sirik taruk, pamu taruk duk deice ap, el yan duk sirik tam ning, weik yan duk deice ap, likeipnamle. Tonda, sik malye winibikce ning kanye imun tenen ning kilina ati, kam ning obuka, ining arepmace sukumuk, aining deice ton likeipnamle. Winiplyopura, dipkoprob pukle suse dilamlinye bira, akunum teleb upnamlarya.

¹⁸ Tonda, aSaitun minyak mek ton, Imamnye el taruk tatang deice tuba aupmalye ning ara, adiparyuk dobuka, asuse dilamuknye, el kisok deice dikilnamle. Winiplyeura, Imamnye birye, anye el suse dilamlirye malye kiamlinye, ‘Allah arye biklirye, el malye ulamuk ning, kum kipdeipnamleʼ tenen, apil ton dopnamle.

¹⁹ Ara, Imamnye biryuk, asuse dilamuknye, ‘El malye ulamlye ning kilibuka namin kipnamnilʼ tenen, malye unye ning, pununa ati, aren ning nirya dobuka, Allah ati arenamle. Ara, ‘Allah arye, anye el malye winilamuk ning biklirye, namin kiplirye, kum kilipnamleʼ tenen, apil ton dopnamlule. Aning akunum areplyeura, uku dongopnamle kam ning ton, opnamle. Ara, ‘Anye el malye winin ning biklirye, kum kipdeiplopura, teleb kipdeipnamnilʼ tenen, akam ning olbukakirye, kintinipnamlule.

²⁰ Winiplyeura, imamnye adiparyuk, aning dobuka, uku dongon ning ati, pala keil tablakuka yangabikce kintinip deibikak, el si mesba binuka, uku dongonamle. Winiplyopura, imamnye birye, anye el malye winin ning pununa ap, teleb kilina ap ati, apil akunum doplyeura, apil dopnya deice arye, “Anye bira, akunum pia teleb uple. Wini talak ara, elda Allah Yahweh, el dam ton yangana telebe uka,” nyanamlule.

²¹ Bukni, asuse dilamuknye bira, bona ton talina kumce, talye kankanye ulamlirye, anye aren ning nirya, pia kum winipmantonye ulamlyopura, el malye winin ning, punubuka kilina ati, yim domba basam mi tonok boyanamlule. Winiplyeba, imamnye birye aning dobuka, ‘Allah eipnamluleʼ tenen, el taruk arye, aning erebuka bepdenamlarye. Tonda, yuk ning ara, tepung pia teleb ning, tonok kilogram ap, minyak Zaitun mek ap, purubuka kintiniplirye, el malye winin ning dekna ap, pununa ap ati, boyanganamlule. Tonda, minyak Zaitun yo duk mek, sepertiga liter (0.3) ap delilyanganamle. Aning nirya ara, Allah Yahweh ati arenamle.

²² Aning atonun, elcuk maka bitinye, ara Bik maka do? Akumura, Yalma maka kintiniptue. Anye el dam uplye ning dobuka yanganamle. Amaka tonok ning ara, el malye winin ning dekna ap, pununa ap, kilina ap ati arenamle. Maka bitinye ning ara, ‘Allah arye, na malye wininun ning, namin kipnilirye, kum daneipnamnile, tonda lyepnamnileʼ tenen, aning nirya uku dongona ati, arenamlule.

²³ Ura, like pinbarye sum ara, pukle suse dilamuknye birye, ‘Na teleb kipnamnileʼ tenen, aning nirya dobuka, imam nang dam boyanganamlule. Ara, Allah Yahweh ap, ninye ap ansinilina sapi bol arye domik tenda aik bublan dam delilyanganamlule. Ara, Allah Yahweh, el dam boyanuka deipnamlula atia.

²⁴ Winiplyeura, imamnye birye, pukle suse dilamuknye birye, ‘Na malye winipse ning ati, imun kanye bonuna ara, namin kipnilirye, kilipnilirye, kum kipdeipnamnilʼ tenen, domba mi ap, minyak Zaitun mek sepertiga liter ning ap nirya ara, doproplirye, ‘Allah Yahweh aning nirya eiplirye, kanye deipnamsilʼ tenen, el taruk bitinye arye bobuka ereplyakarye, Allah el damuk benamlule. Awinipnamle ning ara, Allah ati arenamle.

²⁵ Ati, imun kanye bomlye suse dilamuknye, el malye winin ning ati, imun kanye bomlye ning, kum danalina ati, imamnye areplyeba, elcuk, el boyanmalye domba basam mi opnamle. Oplyeura, ining mitik tonun ton, doproplirye, el sirik taruk duk arye burubuka, asuse dilamuknye, el sirik amul deice tam ton, likilinamle. Aning atonun, el sirik taruk bukni, pamu taruk duk deice ap, el sirik yan bukni, weik yan duk deice ap, likipnamlule. Ara, ‘Awinipnye deice arye, teleb kipnamleʼ tenen, wininamle.

²⁶ Tonda, Imamnye birye, minyak Zaitun mek mitik tonun ton dobuka, el kwanim tam taruk tatang deice ton, likinamlule.

²⁷ Winiplyeura, aminyak mek mitik tonun ton, el sirik taruk deice auplyopura, aimamnye, el taruk deice arye talibuka, like tekbarye deice arye, Allah Yahweh el aik dam wipdonoklyeura, poulbinuka dulbinamle.

²⁸ Akunum winiplyeura, minyak mek mitik tonun arye, el taruk deice tuba min arye dikeipmalye ning ara, min arye kam ning boyanuka likeipmakibuk, aminyak mek palipmalye ning babye, likilinamle. Ara, asuse dilamuknye, el malye winibuk ning ati, imun kanye bolamuk ning kum kina ati, tonda anye teleb kilina ati, ining dikeipmokbuk, el sirik amul deice tam liknamle. Tonda, el sirik taruk bukni, pamu taruk duk deice ap, sirik tam yan bukni, weik yan duk deice ap, likeipnamlule. Ining ning, likilinakuk binuka, minyak mek ton likeipnamlule.

²⁹ Aning atonun, imamnye el taruk tatang deice, minyak mek ton tuba aupmalyopura, ‘Adibaryuk anye teleb upnamleʼ tenen, el kisok deice dikilinamle. Wininamla deice arye, pukle suse dilamuknye, el malye winin ning kum kina ap, tonda, el teleb kilina ap ati, winipnamlule. Aning akunum teleb uplyopura, Allah Yahweh el dam ton yanganamlule. Awiniplye deice arye, Allah ap, el anye ap, talima dukdongobuka, teleb unamle.

³⁰ Tonda, pukle suse dilamuknye, el boyanmalye Bik maka winiryuk ning ap akumopura, Yalma atonun maka winiryuk neplopmalye ning, boyanuka deipmalye ning ara, imamnye biryuk dobuka, Allah ati arenamle. Ara, el dam upmalye touk ati, aboyanmalinye dekmanto ati, nyapne.

³¹ Amaka bitinye bobuka yanganamle. Tonok ning ara, el malye winin ning, namin kina ap, kilina ap, kum danalina ap ati, boyanganamle. Ton tonok ning ara, el malye winin ning kum kina ati, uku dongoplya deice arye, el malye ning kum kilina ati arenamlule. Tonda, roti deiyok ning terigu do, tepung do, yakong do, aning ton boyanuka deipnamle ning babye, imamnye birye, Allah ati arenamle. Aning winiplyeura, aimamnye birye, anye bira winipmal ati, Allah Yahweh el aik dam binuka, ‘Allah arye, anye el malye winin ning kum kipdeiplirye, teleb kipdeipnamleʼ tenen, arenamlule. Winiplyeura, “Elda, akunum teleb upmale,” teneplirye, nyanamle.

³² Ayupu nyanman ning ara, bona utotoa kum talye ulamlinye birye, domba basam do, yuk dekna weik ning do, pia dipkoprob, pia kum dekmantonye ton, el nong bol deice pukle suse dilamlya ani, bukni, ‘Teleb kipdeipnunile,’ tenebuka wininamle ning ati, “Wininamlume,” nyabuka akunum nyapdeipne. Allah arye nyabuk.

“Aik pum tam lyun ning lyulirye, tong nyalyopura, winibuka wininamlume,” nyapdeibuk yupu

³³ Allah el si Yahweh arye, Musa ap, Harun ap ati, nyabuk.

³⁴ Narye anggunti, Kanaan mutuku aserepsinyeba, binuka wekmunce, amutuku talibuka, unamlum talak nirya ara, anyapdeipnamasin touk, wininamlume. Israel nang, anggun asik dobuka unamlumak nirya ara, na Allah arye arepnyopura, anggun aik pum tam lyun ning lyulirye, tong weik nyapliba, ‘Se, nun aik pum tam ara,barye suse akunum unmale,’ tenepmunyeura, winibuka wininamlume. Ara, barye suse ara, na dam arye anggun wenena ati, barye suse dobuka deipsinyeba, anggun bikilina ati, anggun dam yanganamsile.

³⁵ Aning barye suse deiyok ning, anggun dam deipsinyopura, yata nang do nirya, anggun kwitcapu nang nirya ati ara, pukle suse taliplirye, tong nyasilyopura, adiparyuk imam nang dam ati, yanuka, laka nyanamlume. Ara, anggunce, “Se, na aik pum tam ara, tong ning ton upmanile,” nyabuka, laka nyalyanganamlume.

³⁶ Laka nyapmunyeba, Imamnye birye, anyaik pum tam lyunmalirye, tong nyanmalye, pukle suse ning ati, min kum dilyanaplye talak arye, yupu nyapdeiplyeba, anyaik pum tam wamlye ning nirya ara, bai tamuk dobuka delinamlume. Ara, ‘Anyaik noutam winibibiba, malye un ning ton, kum unamle,’ tenena ati wininamlume. Winipmunyopura, aimamnye yalirye, bikilina ati, ‘Pukle suse ara, anyaik pum tam ton, tuba aupmal do?’ tenen, dilyanganamle.

³⁷ Apukle suse dilamlirye, lyubuka tong nyalamlye ning nirya ati, kum danin banamle talak ara, dipdepnamle. Dipdenabuka kum danin banamle talak ara, anyaik abilinga tam ara, bikilina ati, ‘El urasin ara, poronamle do, ining bi ning unamle do?’ tenen, anyaik abilinga deice noutam ara, ‘Ikin weik upmalba, abilinga deice dem kum bukni, abilinga pum tam akunum aupmal do?’ tenen, dilenamle. Pukle suse deiyok ning atonun ning auplyopura, imamnye adiparyuk, anyaik batakuka bai tam binamle.

³⁸ Imamnye birye, winibuka dipdelyeura, apukle suse deiyok ning atonun ning, anyaik pum tam weik auplyopura, anyaik pum tam batakuka, aik dam bilirye, anyaik bublan tirikdongoplirye, like tekbarye (7) sum daunamlule. Atalak noutam ara, ninye ton anyaik kum wekelbanamake.

³⁹ Like tekbarye sum akunum uplyopura, Imamnye birye tuba tamubuka, anyaikuk yalirye, ‘Akunum teleb ubuk do, kum do?’ tenen, pukle suse bikilina ati, yanuka dipdepnamle. Winibuka dipdelyeura, apukle suse deiyok ning atonun ning weik, anyaik abilinga pum tam akunum auplyopura, imamnye birye winibuka wininamlule.

⁴⁰ Anyaik yanuka dipdelyeura, el aimamnye birye nyapdeiplyeba, anyaik abilinga deice nirya ara, amalye ning pukle suse dilamle ning do, suse kala do, yabung do, diamlirye tong nyalamyak nirya ara, yanuka dipdelirye, nyanamlule. “Apukle suse deiyok ning bol piamlye aik, abilinga keil nirya uluplopmunce, bol piamlye sukum nirya dakuka, bai tam malye ulamlirye, lubuka tong nyalamlye ning donokonyak sukum, dopnoknamlume. Ara, Israel ninye unyakak dam kum bukni, anggun asik batakuka yukak, mitik pera sukumuk, bobinuka dopnoknamlume,” nyanamle.

⁴¹ Tonda, Imamnye birye yupu nyapdeiplyeba, yuk nang arye, anyaik abilinga pum tam ap, anyaik bai tam ap, aik abilinga taplakamice ning, pelester minop ning nirya, ulupdopnamake. Winibikceura, Imamnye birye, “Amalye ning nirya dobuka, Israel nang ulamicak dam kum bukni, anggun aik dam batakuka yukakuk, bobinuka donoknamake. Ara, bai tam malye ulamlirye, lyubuka tong nyalamlye ning donoklamikcak, donoklyame,” Imamnye birye nyapnamle.

⁴² Winibuka adakuka dopkwetepmunye keil, winiryuk abilinga pununa ati ara, adiparyuk winiryuk keiluk punupnamlulume. Anyaik abilinga taram winiryuk keil deipmamunye ning nirya ara, taplakne ning, el si pelester winiryuk ninguk tapdeipnalume. Ara, ‘Aik taram urasin teleb upnamleʼ tenen, taplakne ning, el si pelaster ati nyapneʼ tenen ati nyapne.

⁴³ Winibuka min arye lyulamlye ning ton, dakuka bai tam akunum dobikcopura, aik taramak taplakne ning, el si pelester winiryuk ninguk, akunum taplak deibikcak arye, aning nirya, winibuka sirya dakiceura, anyaik talye daupmalya ani, aminyan talak Imamnye birye, anyaik tamubuka dipdenamle.

⁴⁴ Dipdelirye, pukle suse deiyok ning ton tuba auplirye, tonda anyaik pum tam aning akunum tabakuka weik kiplyeura, anggunce utenenamlume. ‘Kume, pukle suse deiyok ning, anyaik tamubuka weik kipmal ati, dipkoprob pukle suse, kanye weik imun kanye bon ning anyaik akunum aupmale. Aning ara, yuk nang, sik nong deice ton, dakdongopmanto ning, dulbilyake,’ tenenamlume. Anyaik ara, akunum malye kibuka ati, Allah el kanye ara, ‘Anyaik ara, na like,’ tenelule. Yata nang do nirya, anyaik pum tam wekelbana kume. Anyaik dam bana do, wekna do, akunum winipmunyeura, Allah el dam ton, kum yanganamlume.

⁴⁵ Anyaik malyeuk kiplyopura, adiparyuk dakaltakna uka. Anyaik uluplopnamlulume. Ara, Imamnye birye nyapdeiplyeba, yuk nang arye, anyaik deibuka domice keil ap, abilinga yo ap, taplak deiamikce ning, el si pelester nirya ara, dakuka uluplobikirye, anyaik bai tam malye ulamle ning donoklamikce sukumuk, donoknamake. Ara, Israel nang unyakak kum bukni, sik asik batakuka yukak, mitik pera sukumuk, bobinuka donoknamake.

⁴⁶ Tonda, yatanye birye do, anyaik kum ulupmace talak arye, anyaik pum tam minop wekmalinye bira, amalye un ning dam, akunum binmalula ati, atalak aryuk, afia areplibuk, keting kumulbalye talak noutam nirya ara, Allah el kanye ara, ‘Anye akunum malye kipdeipdanmala ati, na dam ton kum yanganamlule,’ tenenamle.

⁴⁷ Aning atonun, yata nang do nirya, amalye kipmalye aik pum tam wekuka, mapmalinye bira, sik baju nirya mek likinamnyake. Atouk, anyaik pum tam arye, din dibice nang babye, adiparyuk sik baju nirya, teleb kibuka, mek liknamyake.

⁴⁸ Bukni, Imamnye birye, tonap tamubuka anyaik dilyanaplye talak ara, aning nirya dipre banmalya ani, tuba tonap tabakua lyuna ap, tong nyana ap, kum ulamlirye, aik taplakuka domice ning, el si pelester kitipdongamice touk wamlye buk, eiplyopura, el aimamnye birye, “Anyaik ara, akunum teleb upmala ati, Allah arye anyaik ati, kanye deipmale,” nyanamle. Ati, ‘Min arye anyaik lyuamukce tong nyalamukba, asukum ara winyamuk bukni, akunum teleb ulule. Dipkoprob akunuma, pukle suse dilamuk nang ara, akunum kum danmalye,’ tenenamle.

⁴⁹ Tonda, anyaik pum tam akunum teleb aunmalya, eiplyeura, Imamnye elce, maka bitinye ap, cemara yo ap, ining bi wol tapu kirmizi ap, mitik yo taruk, el si hisop yo, tonok koupne, tonap dolanamle.

⁵⁰ Winiplyeura, tonok maka ara, amalye upmalinye dekna ati, oplyopura, tuku arye dobuka memlinyak makau belanga arye, balamle mek pia teleb mek pu deice tamuk, amaka opnamle.

⁵¹ Aning winiplyopura, Imamnye elcuk, keipyal yo ap, ining bi wol tapu kirmizi ap, hisop yo taruk koupne tonok ap, maka ton tuba kam unmalye ning ap, aning nirya tabakuka, min arye teleb mek pu balamya deiceuk, opmalye maka ining dobuka, deipmok ning pum tam dongopnamle. Aning-aning nirya, aopmok maka, el ining pum tam dongoplirye, ining buruproplyopura, anyaik pum tam nirya ap, anyaik bai tam ap, likinamle. Winiplyeura, ining bol pipmalye ning, purupdonokliba, anyaik abilinga nirya pulbinuka dulbinamlule. Awinipnamle ning ara, tekbarye deice arye (tujuh kali) winipnin banamle.

⁵² Apil nirya dopmalye deice arye, min arye anyaik pukle suse deiyok malye ning aubuk buk, malye ulamuk bukni, anyaik teleb kilina ati, aopmalye maka ining ap, teleb mek pu balamlye mek ap, ining bi wol tapu kirmizi ap, hisop yo taruk koupna tonok ap, maka ton tuba kam unmalyeba, kam kipman lopdongopnamlye ning ap nirya ara, adeice arye anyaik teleb kipdeipnamle. Akunum winiplyeura, ‘Anyaik ara, akunum teleb ulule,’ tenenamle.

⁵³ Aning nirya, mek likuka akunum teleb kiplyopura, Imamnye birye, akam tuba unmalye maka ara, adiparyuk tamubuka lopdongopliba, Israel nang unyak mutuku batakuka, bai tamuk talye lakuka binamlule. Aning-aning nirya, pil dopnamla deice arye, ‘Allah arye anyaik malye uamuk ning, kum kipdeipnamleʼ tenen, anyaik pum tam malye wamlye ning, akunum mek liklyopura, anyaik nirya ara, pia telebuk upnamle. Atalak aryuk anyaik tonap teleb kiplyeura, ur talye wekelbanamnyake.

⁵⁴ “Aning wininamlyame,” nyapdeipsise ning ara, pukle suse nong bol deice dina do, kisok kabum dina do, kice weik talina do, kanye imun weik pukle suse dina do, korot suse weik dina do, aweik imun kanye bon ning talipsilyopura, na Allah arye, “Wininamlume,” nyapsine ninguk, wininamlume.

^55-56 Aning atonun, kanye imun weik pukle suse talipsilirye, leleng-leleng ana ap, uk dibuka dila weik upsilye ning ap, suse dila buna ap, yabung turukna ap, suse nong pum tam dina ap, dila cabuka nepsilirye, anggun aik pum tam do, baju deice do, bol pibisilirye, lyubuka tong nyasilyopura, aning tuba teleb kilina ati, anyapsin touk wininamlume.

⁵⁷ Ayupu nyapdeipsince, amalye ning talipsilyopura, “Wininamlume,” nyapsin touk, aninguk winipmunyopura, adeice aryuk, apukle suse ati, ‘E, aning ara, akunum teleb kibuka unmalye bukni, aning ara, tuba dinmala ati, malyeuk ulule,’ bikilinamlulume. Ati, kanye imun weik pukle suse dilamlye ning ati, “Pia wininamlume,” akunum laka nyapsine. Allah arye nyabuk.