Imamat 13 - Eipomek

Ninye sik nong bol deice, weik mambul susu dilamlye ning ara, “Aning-aninguk, wininamlume,” nyabuk yupu

¹ Allah Yahweh arye, Musa ap, Harun ap ati, “Aning-aning ara, winibuka wininamlume,” nyapdeibuk yupu ara, ani.

² Winipmanto ara, Israel yalanye do, tonoknye, el nong bol deice, lolobuka nelamlirye, dilamlye yabung botoplirye suse ap, tonda bol deice bolkona atonun kibuka dilamle ning ap, tonda aning deice, weik imun kanye bon suse do, aning atonun ning dilamlinye bira, sik yuk nang arye, adiparyuk anye bobuka, imamnye dam boyanganamlulume. Ara, imam Harun ap, elce deiplyeba, dadeipdanin banamak nang ap bukni, anoutam arye, ‘Imam pil dona deiyoknye birye, asuse dilamlinye, dipdenamleʼ tenen, sik damuk dobuka, yanganamnyake.

³ Adiparyuk, Allah si eren aik pum tam pil dona deiyoknye, imam elce, weik imun kanye bon suse, nong bol deice dilamlinye bira, adilamlye talak ara, moubuka, bita dilenamlule. Ara, anye bol deice suse dilamlinye tam arye, ‘El nong bol deice palamle potong ton, kul potong ton ulamle do, kum doʼ tenen, dilenamle. Tonda, anye nong bol deice suse dilamlye bukni, nong bol tup kan-kan wekuka dilamlyeba, eiplyeura, ‘Se, aning ara, korot suse dilulue,’ tenepnamle. Aning eiplya deice arye, “El anye bira, pia malye suse uku dilula ati, anye bira Allah dam kum yatue,” nyabuka, ninye kekenak arye, laka nyanamle.

⁴ Bukni, anye el bol deice kurubuka butbuta kulamle malye suse, el si panu taleamlinye bukni, asusu arye, anye el nong bol tup kan-kan dibuka, wekna kum ap, tonda asusu taleamlirye, dilamlinye tam arye, el nong bol deice wamlye potong kum kuruyamlirye, diksukum wamlinye bira, ‘Imamnye birye, el anye biti, “Anda, imun kanye bon suse uku bikuk do? Korot suse dinmakil do? Uku diksukum boupkuk do?’ tenen ati, dipdenamkine. Ati, tia ati, ninye una kumak, bai tamuk, like tekbarye (7) sum binuka unalyame,” nyanamle.

⁵ Talya daunmalya ani, tekbarye sum (7) akunum uplyopura, ‘Imamnye birye, anye el suse dilamlye ning ati, tonap tamubuka dinmal do, adilye ning dem upmal do, kum do?’ tenen, Imamnye birye dipdelirye, “Kume, suse ara, min arye adilye ninguk upmale. Tonap tamubuka kum dinmale,’ teneplyopura, anye biti nabinye birye, nyapnamlule. Anda tonap tamubuka like tekbarye (7) sum ton ninye una kumak, bai tamuk binuka, dipdelyeura, unamle.

⁶ Akunum tekbarye sum tonap akunum kiplyeura, imamnye elcuk, anye el bol deice suse dinmalinye ati, ‘Lopmal do, kum do?’ tenen, dipdelirye buk, suse tonap kum dinmalirye, akunum kum upmalirye ati, teleb asa unmalibuk, eiplyopura, el adiparyuk, yuk nang kekenak ati, “Wini talak ara, anye el bol deice weik imun kanye bon suse dilul ning ara, akunum miripmal ati, lopmale. Ati ara, tamubuka tonap, Allah el dam yangana teleb uka,” nyanamle.

⁷ Bukni, aimamnye birye, asuse dilamlinye biti, “Akunum kaikmakilce, teleb upmakile,” nyapmalye buk, daunmalya ani, tuba tonap asuse tamubuka dinmalopura, el anye adiparyuk, Imamnye birye, el damuk tamubuka yanganamle.

⁸ Yalyeura, imamnye birye, tamubuka dipdelirye, asuse ara, min arye dilamlinye suseuk, tamubuka dinmalyeba, eiplyeura, anye biti, “E, anda, dipkoprob min arye dilamkuk ning, imun kanye bon suse dikulule,” nyanamle. Asuse ara, nong bol deice dilamya ani, nong tup kan-kan sakalul suse, imun kanye bon ning uku bikuk ati, “Wini talak ara, anda malnye ning atonun unlyame. Ati ara, Allah el dam ton, pia kum yanamlyame,” nyanamle.

⁹ Ati ara, yata nang do nirya, uku bikmalirye, kanye imun pukle suse, el nong bol deice dilinye bira, yuk nang arye, adiparyuk el anye bobinuka, imamnye el damuk, boyanamnyake.

¹⁰ Adobuka yalinye bira, imamnye elce, moubuka dipdelirye, ‘E, anye bira, el nong bol deice ara, nebukce lolobuka ulirye, el nong bol noutam yarukuka yabung panaplirye, ining bi lololamle suse ulirye, asuse dilul bol deice tam arye, tikilul potong deice nirya ara, asuse yabung banmalirye, apotong nirya ara, kuruna uk ulul do, kum doʼ tenen, moubuka bita dilenamle.

¹¹ Dipdelya deice arye, alaka nyapmasin ning, suse dilamlyak, tup ining bi doklamlye ning tuba aupmalyeura, imamnye birye, “Se, anye bira, el bol deice ap, el nong bol noutam ap ara, dipkoprob ila kanye mun suse dilule,” nyabuka, laka nyapnamle. Tonda, imamnye birye, asuse akunum dilamliba, biklyopura, el anye biti, “Anda, ninye aik pum tamuk, dabinuka unmaminya ani, tamubuka yaminyeura, tuba tonap dipdenamkine. Min arye nyalamlye atonun, kum nyanamle. Deiyok ara, dipkoprob el anye bira, amalye suse akunum dilamlyeak, bikamlula ati, tonap tamubuka kum dilenamle. Anye bira, akunum malye ning wekelula ati, Allah el dam ton, pia kum yanganamle.

¹² Tonda Imamnye birye, anye el nong bol deice dipdelyebuk, el bol deice nirya, lolobuka kala lokuka sakanmalirye, suse aryuk anye el yan duk arye dipdongobuka, potong duk nirya amuamlirye, suse dilamlyeak, imamnye biryuk, adilul suse ara, yata talak arye lopnamle ouku weik do? Mitik do tenepnamle. ‘Seʼ tenen, anye el nong nirya bita dilenamle.

¹³ Ara, Imamnye birye, ‘Anye el nong bol deice korot taleamlye ning ap, nong deice suse dilamlye ning ap nirya ara, dipdelyakarye, anye el nong bol deice nirya ara, kuruna uk upmala ati, ‘Kume, anye bira, teleb akunum upmale,’ teneplyopura, Imamnye birye, “Anye bira, akunum miripmale. El nong bol deice nirya ara, akunum miripmala ati, el dilamuk suse akunum lopmale. Elda teleb upnamala ati, Allah el dam ton yangana telebe uka,” nyabuka, ninye kekenamacak arye, laka nyanamle.

¹⁴ Bukni, anye el nong noutam suse dilamlirye, yarukuka dolamlyeba, ining bi wamlye tup eiplyeura, Imamnye elcuk tonap tamubuka dilenamle. Aning auplyopura, imamnye birye, “Anye bira, nong bol malye ninguk ulule. Ati ara, elda, Allah el dam ton, kum yanganamle,” nyanamle.

¹⁵ Dipkoprob anye, el nong bol deice ara, weik lolobuka suse dilamlirye, ining bi wamlye ning eiplyeura, “Kume, anye bira, malye torok suse dilule,” nyabuka, lak sukum arye nyanamle. Ara, “El nong bol deice, weik kanye imun bon barye suse talibuke. Tuba dilule,” nyabuka laka nyanamle.

¹⁶ Bukni, anye el nong tup ining bi aupmalye ning, turukun suse dilamlya ani, akunum nebuka loloplirye, weik dilamlye suse akunum mikdoplyeura, asuse dilamyak, el dila ara, kurulamle. Asuse akunum miriplirye, el bol deice tam nirya, teleb kibuka kuruplyopura, anye bira, adiparyuk imamnye dam tamubuka yanganamle.

¹⁷ Imamnye birye, tonap tuba tamubuka dilina ati, yanganamle. Winiplyeba, yanuka dipdelirye, el anye weik korot suse dilamlya ning mikdoplirye, asukum ara bol kurupmalyeba eiplyeura, imamnye birye, “El anye korot suse dilamlye ning ati, malye suse dinmalinye bira, akunum lopdopkilce, teleb upmakile. Ati, Allah el dam tamubuka yanganalame,” nyabuka laka nyanamle.

¹⁸ Tonda winipmanto ning ton. Yatanye do, el nong bol deice arye, torok moupmalirye, suse dinmalya ani, miripnamle.

¹⁹ Bukni, uku moupmalye dila deice arye, tuba tonap lolonmalirye, kurun do, ining bi dokona do, auplyeura, anye adiparyuk, imamnye el damuk yanganamle.

²⁰ Ara, imamnye birye dipdelirye, anye el nong bol deice suse dilulak, lolona suse dem uplirye, dinmalyeba, asuse ara, nong bol deiceuk kum bukni, tup noutam ton, akunum diplyopura, tonda asuse deice ara, yabung upmalule. Tonda, abola deice lolonmalirye yabung balamle nong bol tam tiklamle potong nirya kurupmaliba, eiplyopura, imamnye birye, ‘Kume, anye bira, malye pukle suse dem dilule,” nyabuka laka nyanamle. Malye un suse dina ati, deiyok kouna ara, torok mouamlya, dila deice arye deiplirye, yabung kipnamle ning ara, asukum arye, korot suse deiyok kibuka yuk tam ton dilamlule.

²¹ Bukni, imamnye birye dipdelirye, lolopna suse dilamlinye ati, el bol deice, asuse dilamlye tam nirya moubuka bita dipdelirye, atam nong bol deice ap, nong tup noutam ap dilamlya ani, nong bol deice arye palamle potong ton, kurun ton una kum ap, tonda asuse nong noutam lolona kum ulamliba eiplyopura, diplirye, kiplyeak eiplyeura, imamnye birye, el anye ati, “Se, like tekbarye (7) deice arye, yukakuk, yuk asik binuka, aik pum tamuk unmaminya ani, tuba tonap tamubuka, na dam yaminyeura, tonap dipdenamkine,” nyanamle.

²² Daunmalya ani, tekbarye sum akunum uplyopura, anye el suse lololamlye suse ara, tonap lolobuka tabaklirye, anye el nong bol deice weik tonun uplyopura, Imamnye birye, anye biti, “Anye bira, weik korot malye suse el nong deice tuba dilule. Elda malye ulula ati, Allah el dam ton, kum yanganamle,” nyabuka, laka nyanamle.

²³ Bukni, lolobuka suse dilamlye buk, tonap lumukna kumce, nebuka weik lolona kum uplirye, telebuk upmalyopura, ‘Kume, ara talye suse dilule,’ tenenamle. Ara, min arye torok moamukce dila deice arye, lolobuka suse dinmale,’ tenenamle. Uteneplya ati ara, “El anye bira, weik korot suse dilirye, malye kum ulule. Telebuk ulula ati, Allah el dam ton yanganamle,” nyabuka laka nyanamle.

²⁴ Ura, yuk yupu ton nyapnusine. Ara winipmanto ara, nong bol deice arye, butbutukuka neplirye, uku bouplirye, suse taleamlye bukni, asuse deice arye yabung ara, ining bi ning banamle. Winipliyeura, imamnye birye, anye el suse dipkoprob dipdelnamle.

²⁵ Imamnye birye moubuka dipdelirye, anye el nong bol deice suse dilulak, lolona suse uk uplirye, dinmalyeba, asuse ara nong bol deiceuk kum bukni, el nong tup noutam ton akunum diplirye, asuse deice ara, yabung kipnamle. Tonda, abola deice lolonmalirye, yabung balamle nong bol tam tiklamle potong nirya kurupmalyak, eiplyeura, imamnye birye, “Kume, anye bira, malye pukle suseuk dilule,” nyabuka laka nyanamle. Malye dilamle suse dina ati, deiyok kouna ara, ‘Uku dilamlyak, dila deice arye deiplirye, yabung kipnamlye ning ara, asum arye pukle suse weik kipnamleʼ tenen, bikinamle. Winibuka biklyeura, imamnye birye, “Asuse dilamlinye biti, elda malye pukle suse akunum talipmale,” nyabuka, laka nyanamle.

²⁶ Bukni, ‘Auk dilamuk suse dila talipnamlanye ning, nong bol deice tam arye, tiknamle potong ton kurun kina ap, tonda suse nong pum tam dinin bana ap unmalyeba, kum eipmalyopura, imamnye birye, el anye biti, “Anda like tekbarye sum ara, ninye una kum sukum, aik pum tamuk binuka, unmaminya ani, tamubuka yanamlame,” nyapliba, anye yukak binamle.

²⁷ Daunmalya ani, tekbarye sum akunum uplyopura, imamnye birye, el suse dilamlinye biti, tuba tonap tamubuka dipdelirye, anye el bol deice lolon suse ara, tabakuka lopropnin banmaliba, el nong bol tam weik tonun tonap akunum winipnin balyopura, imamnye birye, “E, anye bira, korot suse weik akunum taleble ati, malye kipmale. Elda, Allah dam kum yanganamle,” nyabuka, laka nyanamle.

²⁸ Bukni, lolobuka suse dinmalinye bira, el nong bol deice tonap lolopnin bana ap, lolobuka suse, kamo yuk ning ton una ap, kum uplirye, asuse dilamlinye bol deice nirya kurunauk uplyeura, Imamnye birye, ‘E, anye bira, malye una suse, pia imun kanye bon ning kum dilamleʼ tenen, bikinamle. Winibuka biklyeura, “El anye bira, malye ning korot suse weik kum dilule ati, Allah el dam ton yanganamle,” nyabuka laka nyanamle. Deiyok ara, ‘Asuse ara, uku dilamlyak dila uka,’ tenenamle.

²⁹ Ura, yuk yupu ton nyapnusine. Sal do, kilapu do, kisok bol deice dilamlye suse kabum taliplirye, dipnamle do, akumopura, sal ati ara, si bam bol amu tam butbutukuka lololamle suse, el si panu talibukce, dinmal do?’ tenen, dipdenamle.

³⁰ Atonun ati talin suse taliplinye do, suse talibuknye do, kil do, aning ara adiparyuk imamnye el dam yalyeba, dilenamlule. Dipdeliba, asi butbut butukulamle suse ara, nong noutam dipnin banamle. Tonda, si bam bol amu tam ap, nong bol deice ap, butbutuklamle suse taleamlyak arye, nong bol kuruplirye, apamlye potong nirya, ulubuka-ulubuka banmaliba, eiplyopura, “Kume, anye bira, malye weik korot suse dilule,” nyabuka, laka nyanamle.

³¹ Imamnye birye, asuse moubuka dipdelirye, ‘Kume, aning ara, dipkoprob malye korot suse kum talipmale. Ara, anye el nong tup kan-kan wekuka dina kum ap, weik kina kum ap, tonda suse dilul nong bol tam deice arye, tikilul potong nirya ton, kuruna kum ap, porona ap kum upmale. Tonda danoutam arye mirin potong kum paluleʼ tenen, akunum biklyopura, amalye suse talipmalinye biti, “Anda, tia ati, like tekbarye (7) sum deice arye, dabinuka aik pum tamuk daunmaminya ani, like tekbarye sum akunum uplyopura, na dam tamubuka yanulyame,” nyalinamle.

³² Daunmalya ani, like tekbarye sum akunum upyleura, asum adiparyuk tonap dilina ati, imamnye dam tamubuka yanganamle. Yalyeura, imamnye dipdelirye, atalipmalye suse tonap diltabakna ap, nong bol tup kan-kan wekelbana kum unmalirye, asi butbutukuka lolamle suse taleamlye bol tam arye, tiklamle potong deice kuruna kum ap, porona ap, tonda bam potong kuruna ap kum winiplirye, tonda asi butbutukua lolon suse arye, nong noutam dipnin bana ap kum kipmaliba, imamnye birye eipnamle.

³³ Eiplyopura, asuse dilamlinye, el kisok deice taliplyopura, potong nirya ara, kopnamle. Tonda, bam potong nirya babye, kopnamle. Winipnamle bukni, to nyanak uk dilamlak tiklamle potong ara, kum konamle. Winiplyopura, tonap anye biti, imamnye birye, “Anda tuba, like tekbarye sum ton, dabinuka anyaik pum tamuk daunmaminya ani, yanulyame,” nyalinamle.

³⁴ Nyapliba, dabinuka unmaliba ani, like tekbarye sum akunum kiplyopura, adiparyuk imamnye damuk, tamubuka yalyeba, moubuka dilenamlule. Dipdelirye, akisok potong pamlya deice ap, bam potong kopmalya deice ap arye, butbutuklamle suse ap, to nyan ning ap, tonap tabakuka dina ap, kum danmalya ati, butbutuklamle suse arye, nong noutam dipnin bana ap, wininmaliba, kum eiplyopura, anye biti, “An suse ara, ton tabakuka, kum dilamkile. Adeice arye, an nong bol nirya akunum teleb upmakila ati, Allah dam ton yanganamlame. Tonda, an ongolyam baju ara, mek liknulyame,” nyapdeipnamlule.

³⁵ Bukni, “Teleb kipmakile,” nyapmalya ati, anye bilirye, dabinuka unmalya ani, amalyeto nyan suse tuba tamubuka tuba taliplyeura, anye bira tamubuka Imamnye dam yanganamle.

³⁶ Anye adiparyuk tamubuka, Imamnye dam yalyeura, yanuka nyapliba, imamnye birye, ato nyan suse dinmalyak tamubuka dilenamlule. Dipdelyeba, anye el bol deice nirya ara, amalye suse tabuka dinmaliba eiplyopura, imamnye birye, ‘Kurun potong ton tikuk do? tenen, kum dilenamle. Deiyok ara, asuseuk akunum talipmalula ati, ‘Anye el suse tonap dipdenune,’ kum tenenamle. Ara, ‘Weik imun kanye bon uk, barye suse, korot suse akunum talipmaleʼ tenen, biknamlule. Akunum biklyopura, Imamnye birye, “Anye bira, dipkoprob amalye korot suse ara, tonap tamubuka talipmalula ati, anye Allah el dam kum yanganamlule,” nyanamle.

³⁷ Bukni, Imamnye birye dipdelirye, asuse kum eiplyerua “Kume, anye bira, malye pukle suse, korot suse ara, tonap tabakuka kum dinmale,” nyanamle. Tonda, nong bol dipdeliba, asuse weik kina kumce, potong babye miripmalyeura, ‘Kume, amalye suse ara, akunum kwetepmale,’ tenenamlule. Uteneplyopura, Imamnye birye, el asuse dilamlinye biti, “An suse ara, akunum teleb kipmakile. Ati ara, Allah el dam yanganamlyame,” nyanamle.

^38-39 Winipmanto ara, sal bol deice do, kilmu bol deice do, uku bouplirye, sik bol deice kuruplyeura, Imamnye birye, kil do, sal do, adiparyuk ataliplye suse moubuka dipdenamlule. Dipdelyopura, uku diksukum boupmalyeba, nong bol deice yambul anunuk kuruplyeura, Imamnye birye, “Ara, bol deice talye uku diksukum boupmale suse dem talibuka ati, teleb kibuka lopnamlarya,” nyanamle. Tonda, “Anye el suse ara, teleb kipnamlarya. Ati, Allah el dam tuba yanganamlule,” nyanamle.

^40-41 Winipmanto ara, sal kisok potong ap, kisok dana-danatiklamle potong ap, nirya ulubuka lyeksaklirye, dilo kipnin balyeura, adilo lak uplye ning ati, ‘Ara pukle suse dilirye ati, malye ulule,’ kum tenenamlume. Ato ning ara, talye uplirye, teleb upmalula ati, ‘Anye birye, Allah el dam tuba yanganamlule,’ nyanamle.

⁴² Bukni, kisok deice dilo kwakamlya deice arye do, el kisok deice tam do, bol deice, ining bi kipdeipmalye ning, dokmalya ani, lolobuka suse deiyok kouplirye, dipnin balyopura, ‘Kume, ara weik malye pukle suse, korot suse el bol deice ap, kisok deice ap, talipmaleʼ tenen, bikinamlule.

⁴³ Ati ara, imamnye dam yalyeba, dilenamlule. Dipdelirye, anye el dilo deice do, el kisok deice tam bol deice do, ining bi dokmalirye, lolobuka suse dinmalyeba eiplyeura, ‘E, ara pukle suse atonun suse dinamalʼ tenen, bikinamle. Asuse ara, talye nong bol deice ining bi dokmalirye, lolobuka suse dilamlye ning eiplirye, ‘Aning ara, korot suse talipmale. Akumura, aning ara, lolobuka suse dinmalye,’ tenenamle.

⁴⁴ Imamnye birye, “El anye bira, dipkoprob el kisok deice ara, malye barye suse talipmala ati, Allah el dam kum yanganamlule,” nyabuka, laka nyanamlule. Imamnye birye, ayupu laka nyanamla deiyok ara, “Anye el dilo deice, ining bi dokmalirye,barye suse dinmalya ati, tonda pukle suse akunum dinmalula atia,” nyabuka laka nyanamlule.

⁴⁵ Malye pukle suse dilamlinye bira, teleb baju ton kum ongonamle. Malye pun deiamlye baju dem ongonamle. Tonda, el potong teleb-teleb kibuka, siser arye kum lelekenamlule. El potong talye batakliba, potong dukuk mounamlule. Abarye suse dilamlinye, el bisik banulye talak ara, yuk nang sik bikna ati, el asok deice ap, el si bambol ap, lelipdongobuka balirye, “Se, nara, malye barye suse talipnuka ati, Allah dam ton kum yanganamne,” nyabuka, yupu weik erebuka nyapnin banamlule.

⁴⁶ Barye suse dilamlinye bira, suse kum lomlirye, tuba dilamlinye talak nirya ara, anye bira malye pukle suse, tonda, barye suse wekemalula, malinye kibuka unamle. Ati ara, Allah el dam ton kum yanganamle. Tonda, el anye bira, yuk Israel nang aik dobuka ulamicak ton, neika kum unamlule. Anye bira, yukak bai tam ninye una ap, bana ap kumakuk, aik dopdeibikiba, binuka el aryuk daunamlule.

Barye suse dilamnanye, el ongolamne baju winipnamak ning ati, nyabuk yupu

⁴⁷ Winipmanto ara, pukle suse do,barye suse do, aning talilamlinye bira, ongolamlye baju ara, ‘Abarye suse bol piamne ning ara, abaju deice ap, pum tam ap, atuba aupmal do?’ tenen, abaju dobuka, imamnye dam bobinamle. Imamnye birye, aning dipdenamle. Ara, domba bola arye wiamikce baju do, tonda pia teleb kain lenan arye wiamikce baju do,barye suse dilamlinye ongolamlye baju, yuk ning deice do, pukle suse urasin atonun ning nong bol deice lak unamle. Ara, mitik yo bok embik ning do, ining bi ning do, laka unamle.

⁴⁸ Tonda aninguk kum bukni, asuse dilamlinye el ongolamlye baju do, yuk yala ning, domba basam ato ning bola dobuka, aning deice arye deibuka winyak baju do, lenan kain el tapu pum tam do, domba potong arye wilamice baju, el tapu pum tam do, apukle suse ap,barye suse ap dilamlinye, el baju yala-yala nirya ara, atouk dilenamlule.

⁴⁹ Abaju ongolamlye bol deice urasin ara, porona ap, ining bi bol delina ap, unmalyeura, ‘Se diba, ara pukle suse dinmale do? Barye suse dinmale do?’ tenen, elcuk bikinamle. Winiplyeba, biklyopura, anye el adiparyuk imamnye dam yalyeba, dipdenamlule.

⁵⁰ Winiplyopura, Imamnye birye, anye ap, el ongolamlye baju nirya ap ara, aning urasin nirya moubuka dilenamle. Dipdelirye, ‘E, aning ap, abaju ap ara, dipkoprob pukle suse aupmale,’ teneplye ning dobuka, like tekbarye sum arye, yukakuk binuka delinamlule. Anye birye, atalak noutam abaju nirya, pia kum ongonamlule.

⁵¹ Like tekbarye sum akunum uplyopura, asumuk abaju doproplirye, tonap tamubuka dilenamlule. Tonda, abaju deice nirya ara, abaju tapu pum tam do, abola deice do, malye suse dilamlye ning urasin atonun tuba aupmalyopura, ton dadeipmalya ani, tupa tonap tapakmalirye weik tonap aupmalyopura, aimamnye birye, ‘Kume, abaju deice ara, malye pukle suse do,barye suse do, tuba dubuke. Ati, yuk nang abaju mangkau arye bol pibikcopura, apukle suse, sik nong deice ton dulbilyake. Ara, asuse sik nong deice ton dakdongopmanto ulule. Ati, abaju ara, akunum malye weik kibuk,’ teneplirye, yuk nang kekenak laka nyanamle. Abaju deiyoknye ap, yuk nang nirya ap ara, abaju pia kum ongonamnyake.

⁵² Abarye suse malye deiyok ninguk, tuba abaju palepmalyopura, Imamnye elcuk, aning dobuka, uku dongonamle. ‘Ara, amalye kipmalye baju deice do, abaju tapu pum tam do, abol deice palipmalye ning do, aning nirya ara, yuk nang, sik nong bol deice dakdongopmanto ulula, ‘tenena ati, abaju dobuka, uku dongoplyeura, uku arye dibuka, sirya dakanamle.

⁵³ Bukni, Imamnye birye, abaju nirya moubuka dipdelirye, anye el ongolamlye baju deice arye do, abaju tapu pum tam do, tonap tabakuka weik kum uplyopura, Imamnye birye, ‘E apukle suse bol pibuk ning ara, yuk nang deice sakmanto kume,’ teneplirye, bikeipnamle. Uteneplyeura, ‘Dawaplyeʼ tenen, abaju uku kum dongopnamle.

⁵⁴ Tonda, yuk nang ati, “Abaju ara, pia teleb winibuka, abaju mek likuka, teleb kipdeiplulume,” nyaplyeba, adiparyuk mek likinamnyake. Akunum mek likuka deibikcopura, adiparyuk ongona kum bukni, like tekbarye (7) sum nirya ara, ninye kum ulamice sukum dabinuka, delinamlule.

⁵⁵ Like tekbarye sum akunum mabiceura, asumuk, Imamnye dam boyakiba, dilenamlule. Dipdelyeba, ton tabakna kum wamlirye, min arye awamlye urasin touk tuba aupmalye bukni, min bol sukamlye ning kilina kumce, tuba upmalyak eiplyeura, “Kume, abaju deice ara, malye barye suse bol sukamuk ning ara, tuba aubuka ati, aning ara, pia malye weik ulule. Ati, adiparyuk uku dongopnulyame,” nyanamle. Ara, pukle suse malye una ning ara, abaju deice do, abaju kain pum tam do, tuba aubuka ati, winibuka uku dongopnulyame,” nyabuka, laka nyanamlule.

⁵⁶ Bukni, Imamnye birye, dipdelirye, abaju deice ara, malye pukle suse, tonda, barye suse deiyok ning, el urasin atonun kum wamlyeura, abaju kain pum tam do, bol deice do,barye suse atonun ning aubukak ara, sirikak welebuka, sakmanto uamikakuk sekenamlule. Ara, ‘Ila tonap beleplirye, lake auplirye, tupa dinamle do, kum do?’ tenen, upnamlule.

⁵⁷ Dadeipmalyebuk, amalye ning kwilikuka seklopliba, kum upmalye bukni, abaju deice do, baju tapu noutam do, bol deice do, tuba tonap arye ton, malye weik un suse urasin laka kiplyopura, Imamnye, elcuk dobuka, asuse deiyok ning upmalyak, baju do, yuk ning do, kwilikuka seklopliba, uku dongopliba, uku arye abaju ap, ayuk ning ap nirya dinamlule.

⁵⁸ Akunum mek likikceba, malye un ning ton, abaju bol deice do, baju tapu noutam do, basam bol deice do, abarye suse deiyok ning awamlye sukum, mek likikceba, aning kum upmalyeura, tonap tamubuka mek likinamnyake. Ara, ‘Asuse deiyok ning yanamliryaʼ tenen, tonda ‘Tamubuka akunum teleb upnamleʼ tenen, wininamlume. Teleb uplyopura, akunuma.

⁵⁹ Malye barye suse dilamlye nang ongolamice baju ara, domba potong arye taplakuka wilamice ning do, tonda ining bi tapu wol arye wilamice lenan baju do, tonda yuk ning bol arye kobukabikirye, dobuka wilamak baju do nirya ati ara, narye, “Aning ara, malye ati awinibuka wininamlume. Aning ara, tuba teleb ati, awinibuka wininamlume,” nyapdeipmasin touk, aninguk tupa wininamlulume. Allah arye, Musa ap, Harun ap ati, ayupu nirya nyapdeibuk.