Imamat 12 - Eipomek

Kilapu mi akunum deibikce talak, ‘Tamubuka teleb ubikceba, Allah dam tonap tamubuka yatingeʼ tenen, teleb kililana ati, nyabuk yupu

¹ Allah el si Yahweh arye, Musa biti, “Kilapu mi akunum deibikce talak, sik teleb kililana ning ara, aning wininamlume, aning ara, pia kum wininamlume,” nyapdeibuk yupu ara, ani.

² Tonda, Israel mutuku noutam unyak kilapu kan-kan, tonok kil ton, sal mi deiplyeura, like tekbarye sum nirya ara, akil ara, mitik tonun malye unamle. Ati, na Allah dam kum yatue. Aning ara, kilapu sik ining balamle talak, mitik tonun malye ulamak atonun, unamla ati nyapsine.

³ Winilamlya ani, like pinbarye (8) sum akunum uplyopura, adiparyuk akil arye deipmalye mi, ‘Allah elnye unamleʼ tenen, el den bol mouse ning mitik tonun sekenamyake.

⁴ Ami akunum den bola mouse ning mitik tonun kunum sekiceba, akil tuba unamle talak nirya ara, like tiga puluh tiga (33) sum noutam nirya ara, malye atonun unamlula ati, na dam ton kum yatue. Deiyok ara, el ining banamlya ati, akil ara, malye ning tuba aulule. Ati akil arye, Yahweh el si erena ati pil don ning nirya ara, bol pia kum pinamle. Tonda, Allah Yahweh el si erena ati, sapi bol arye tia domik doltakne tenda aik domice dam ara, pia kum wekenamle. Aulamlya ani, el teleb kilin sum akunum uplyopura, anyaik pum tam yanuka wekenamle.

⁵ Bukni winipmanto ara, Israel kilapu nirya, sik aunyaka noutam arye, yata kil do, tonok ton kilmu deipmalye kil ara, empat belas (14) sum noutam nirya ara, malye ning tuba el nong deice aunamle. Aning ara, kilapu sik ining balamle talak, mitik tonun malye winilamak atonun unamla ati, nyapsine. Tonda, ‘Aminyan talak, tuba tonap tamubuka, teleb kipdeipnamakʼ tenen, enampuluh enam (66) sum noutam unamla nirya ara, elda mitik tonun malye ulula ati, na Allah dam, ton pia kum yanamle.

⁶ Sal mi do, kilmu do, akil deiplirye, malye daulamlya ani, aminyan talak el teleb kilina ati, daulamlya ani, narye nyapdeipsin sum nirya akunum kiplyopura, el adiparyuk Allah arena ati, keting tamun tonok nenmalye domba basam mi bobuka, imam nang dam boyanamle. Ara, Allah Yahweh ap, ninye ap ansinilina ati, el si eren aik, sapi bol arye tia doltakna tenda aik damuk, domba mi bobuka, imam nang ati yanuka arelbanamle. Winiplyeba, aimamnye birye, adomba mi obuka uku dongonamle. Tonda, akilmu el malye winilye ning nirya ati, ‘Allah arye kilibuka, kum kiplirye, lyepnamnilʼ tenen, Yalma maka ap, Bik maka ap, winiryuk nenmalye ninguk, bobuka yanganamle. Ara, sik malye ulul ning nirya lyebuka, teleb kilina ati, arelyanganamniyake.

⁷ Imamnye elcuk, aning nirya bobukalirye, Allah Yahweh ati arelyanganamle. Tonda, ‘Allah arye, akil el malye winilamlye ning, kiliplirye, teleb kipdeipnamleʼ tenen, imamnye elcuk, apil donamlule. Aning winibuka pil doplya deice arye, akil el malye winilamlye ning kiliplirye, teleb kipdeipnamle. Anyapdeipne ning ara, yata kilapu nirya, sal mi do, kil mi do, mapu deiamikca ani, ‘Allah arye, teleb kipdeipnusil,’ tenebikcopura, aninguk wininamnyake.

⁸ Winipmanto ara, ami deipmalye kil, el domba basam mi pia ton kum weiamlamlye kil do, tonda, uang kum arye, domba basam kum dekmanto kil do, akil adiparyuk Yalma maka winiryuk min yuma nepmalye ninguk, bitinye bobuka yanganamle. Akumopura, Bik maka atonun maka, el si ara Tekukur maka, winiryuk min yuma nenamalye ning bitinye bobuka, arelyangamle. Arelyanganamle ning ara, anoutam arye imamnye birye, tonok maka ton dobukaplirye, mesba deice, uku dongonamle. Ton ning ara, akil el malye winilamlye ning kum danalina ap, namin kina ap ati, arelyanganamle. Imamnye birye, el adiparyuk, akil el malye ning teleb kibuka delina ati, pil don ning ara, kintinibuka donamle. Winiplya deice arye, Allah arye, akil el malye winipmalye ning ara, kiliplirye, teleb kipdeipnamle.