Imamat 11 - Eipomek

Allah arye Israel nang ati, “Ton bai tam ulul kam ning ara, obuka dinamlume. Ton ning ara, pia kum dinamlume. Na kanye ara, ‘Aning ara, malye ulule,’ tenenuna atia.”

¹ Allah Yahweh arye, Musa ap, Harun ap ati, ayupu nyapdeibuk.

² Ara, sik Israel nang nirya ati, ayupu nyapnamrume. Tuku tam unyak kam un ning ara, yala yuk-yuk ning weik ulule. Ton ning ara, dina telebe. Ton ning ara, pia kum dinamlume. Ati, tuku tam unyak kam un ning noutam arye, ‘Talye lukparabuka opmunce, dipmunyakʼ tenen ati, ayupu laka nyapnusine.

³ Ara, yata kam ulye ning do nirya, sik yan kala, taruk kala ubuk ning ara, noutam arye akunum wabukba, taruk kala bitinye atonun ulul ning ara, anggunce aning dina teleb uka. Tonda akam ning ara, sik din dipmakirye, daunmakca ani, aminyan talak ara, mun arye kanye arye welepliba, tuba ton ap dinyake. Ato ulye kam ning atonun ning nirya ara, anggun Israel nang nirya arye, obuka dina teleb uka.

⁴ Bukni, yuk yala kam ulye ning ara, sik din ning tonap like bitinye talak dinyake. Bukni, sik yan kala ara, kum ubukba, bitinye atonun kum ulule. Aning atonun ulye kam un ning ara, obuka kum dinamlume. Winipmanto ara, anggun kum dinamlum ning ara, unta basam ara, el din ning bitinye talak dilul bukni, el yan kala ara, kum kwakaklule. Ati, unta basam ara, Israel nang arye, kum obuka dinamlume. Allah, na kanye ara, ‘Aning ara, malye ulule,’ tenenune. ‘Unta basam ara, malye ning ulula ati, anggunce aning obuka kum dinamlume,’ tenenune.

⁵ Aning atouk, yuk kam ulye ning winipmanto ning ton, el si pelanduk basam ara, el din ning bitinye talak dilul bukni, el yan kala ara, kum kwakaklule. Bukni, akam ning babye, kum obuka dinamlume. Na kanye ara, ‘Aning ara, pia malye ning ulule,’ tenenuna ati, aning ara, kum dinamlume.

⁶ Winipmanto ning ton, kelinci el din ning akunum diplirye, daunmalya ani, aminyan talak, tuba tonap adin ning mun noutam arye welepyeba, bitinye talak dilule. Winilul bukni, el yan kala ara, kum kwakaklule. Ati ara, kelinci babye, kum obuka dinamlume. Na kanye ara, ‘Aning ara, malye din ning ulule,’ tenenuna ati, kelinci ton kum dinamlume.

⁷ Tonda, aning atonun, anggun Israel nang arye, basam sirika ton kum dinamlume. Deiyok ara, ani. Basam sirika ara, el yan kala kwakakuk bukni, el din diplyopura, adin ning mun noutam arye welepliba, bitinye talak tonap kum dilule. Ati ara, anggun Israel nang arye basam sirika kum dinamlume. Na kanye ara, ‘Aning ara, malye din ning ulule,’ tenenuna ati, anggun Israel nang ara, basam sirika ton, obuka kum dinamlume.

⁸ Ati ara, basam sirika ap, kelinci ap, pelanduk basam ap ara, sik tup babye, pia kum dinamlume. Tonda, yuk nang arye opmakce ning do, talye urdem dipnamle ning do, aning nirya babye, el bol kum pinamlume. Aning ara, taruk arye talina pia meme. Ara, na kanye ara, ‘Akam ning winilye ara, malye ninguk ulule. Sikda pia malye ning ulule,’ tenenuna ati, anggun Israel nang ara, aning pia kum dinamlume. Ara, pia meme nyapsine.

⁹ Ura, talye mekwen deice do, balamle mek deice do, laut mekwen deice ning do, laut mekwen noutam ulye ning ati, nyapnusine. Balamle mek ap, mek mekwen ap, laut mekwen ap, amek pum tam ulul ning ara, ayala-yala weik aulul noutam ara, sik bol deice ulul ning ara, nong karasa bol atonun ning, el si koproba ap, tonda el bana ati sirik ap, aubuk ning nirya ara, anggun Israel nang arye, dina teleb uke. Ikan karasa ning bukni, sirip ap, sisik ap ulye ning ara, anggun Israel nang arye aning obuka dinamlume.

¹⁰ Bukni, balamle mek do, mek mekwen do, laut mekwen pum tam do, mek pum tam kam ulye ning bukni, el sirip ap, sisik ap kum uplyeba, taruk kala atonun ning, karasa bol kum ubuk ning yala yuk-yuk ning nirya ara, anggun Israel nang arye obuka, pia kum dinamlume. Aning yala-yala nirya ara, na Allah arye, ‘Aning ara, malye ning ulule,’ tenenuna ati, anggun babye, ‘Aning ara, nun pia like. Aning dina pia meme,’ tenebuka unamlume.

¹¹ Tonda, mek pum tam noutam ulul ning ayala-yala nirya bukni, sik karasa bol, el si sirip ap, el bana ati pol ap kum ubuk ning, ayala-yala nirya ara, obuka kum dinamlume. Aning yala-yala nirya ara, el tup dobuka dina pia meme. Tonda, amekwen pum tam kam ulye ning ara, yuk nang arye, tomobikirye, deipmakce ning babye, talye dadipmalya babye, anggun Israel nang arye, aning bol pina babye, pia kum wininamlume. Wini talak arye dipdongobuka, doupnin banamlum talak babye, ‘Aning ara, pia kum dinamabe, ara meme,’ tenenamlulume.

¹² Deiyok ara, ani. Yata kam ning do nirya, mek mekwen pum tam do, balamle mek do, laut mekwen pum tam ulamle bukni, el bol deice sirip ap, el bana ati, sisik ap kum ulye ning ara, anggun Israel nang arye, kum obuka dinamlume. Aning nirya ati, ‘Nun pia like. Aning ara, dina pia meme,’ tenebuka unamlume.

¹³ Ura, maka ayala-yala weik aulul bukni, anggun Israel nang arye, kum obuka dinamlum ning ara, laka nyapnusine. Amaka ara, ani. Raja wali nyanyak maka ap, akunum dipmalyak lun ning dilul maka, el si burung hantu nyanyak maka ap, Rajawali mirin maka ap, kum obuka dinamlume.

¹⁴ Aning atonun, kout maka ap, mul damnye maka ayala-yala nirya ap,

¹⁵ Tonda, mirin maka, el si sonyo maka ayala-yala nirya ap,

¹⁶ Gagak maka ap, tonda Unta maka ap, Camar maka ap, Belekok maka, el si ton Bip yala maka nirya ap, Elang yala maka nirya ap,

¹⁷ Pungguk maka ap, mekwen deice buklirye, mot nyalamle maka, el si burung Dendang air ap, weik burung Hantu maka ap, tonda mek pum dobolamle maka, ikan olamle maka ap, Dorik maka do, Sun Ining maka ap, el si ton Pungguk ap,

¹⁸ tonda, Undan maka tonda, lun ning dilye maka, el si Ering maka, el si ton burung Nasar maka ap,

¹⁹ tonda, Bangau maka yala nirya ap, Kasa maka ara, anggun Israel nang arye, anyapmasin maka ayala-yala nirya, obuka kum dinamlume. Aning ara, meme nyapsine.

²⁰ Tonda, mitik kam unyak ning bukni, pol deice arye bakcak arye, tupa tonap tukwak mutuku deice, yan dumbarye deice arye balamle ning ara, el si serangga, nyalamak ning, ayala-yala nirya ara, anggun Israel nang ara, ‘Aning ara, nun pia like, aning ara, meme,’ tenebuka, unamlume. Allah na kanye ara, ‘Aning ara, malye ninguk ulula ati, anggun Israel nang arye, aning pia kum dinamlume,’ nyapsine.

²¹ Bukni, yan dumbarye arye, tuku yanibuka, balul serangga yala ning bukni, sikda pol ton aulul ning ara, anggun Israel nang arye obuka dina teleb uka. Sik yan kup-kup ap, taruk kup-kup aupmalkiba, adeice arye, cang weik arye, lakdakuka banyak ning, sul kwising atonun yala ning ara, obuka dina telebe nyapsine.

²² Ayala ning ara, winipmanto ning ara, sul kwising ap, buko ap, tonda mirin kwising ap, kwarya ap, tonda ato ning buk, yuk ning nirya ap ara, obuka dina telebe uka, nyapsine.

²³ Bukni, pol deice arye lakuka, banmakirye, tuba tonap tuku yanibuka yan dumbarye arye balul ning, weik arye lompat kum kipnirye, tuku deice bunmakirye bunyak ning, ayala-yala nirya ara, dobuka kum dinamlume. Anggun Israel nang arye, ‘Ayala ning ara, pia meme,’ tenebuka unamlume.

²⁴ Aning laka nyapmasin ning yala-yala nirya ara, dina meme. Tonda, sik nong babye pina ap, talina ap babye meme. Allah el kanye ara, ‘Aning ara, malye ulula ati, dina meme, akunum laka nyapmasin ning, ayala-yala nirya ara, pia kum dinamlume. Tonda, kum talinamlulume. Ayupu kekena kum arye, talye luparabuka dipmunyopura, tonda bol pipmunyopura, Allah arye, anggunti, ‘Anang ara, na dam kum yatinge. Akunum malye kipdeipdanmaka ati, sikda malye nang atouk unyake,’ tenenamsila ati nyapsine. Tonda, alaka nyapmasin ning dipmalye ning eipmunyakarye, talemunyeura, adeice arye, malye kipdeipdanalume. Ara, narye anggunti, ‘Sikda, malye unyak nang atonun unyak ati, na dam kum yatinge,’ tenenamsine. Ati, ayala ning nirya ara, bol pina ap, talina ap kume. Tonda, yatanye do nirya, ‘Aning ara, pia malye nin ulula ati, Allah el kanye ara, amalye ning pia kum dinamlume,’ nyapdeiamsuk ning, mangkau eimunyakarye, el nong talepmunyeura, anye birye, akunum malye kipdeipdanmale. Aning talipye talak arye, dipdongobuka, arup noutam nirya ara, anye bira, malye ning atonun unamle. Bukni, keting kumupliba inilamle talak ara, ‘Asum lukunyan akunum yalyeura, tuba tonap teleb uple,’ tenenamne.

²⁵ Tonda, yatanye birye do nirya, amem ning yala yuk-yuk nirya ara, dadipmalye ning eiplirye, dobuka bol talilul do, talye bol piplye do, anye bira akunum malye kililalula ati, adiparyuk el baju nirya kwiribukaplirye, el baju nirya, mek liknamle. Baju mek liknamlul bukni, aning talipnamle talak arye, dipdongobuka, asum noutam nirya ap, keting weklyeba inilamle talak babye, malyeuk upnamle. Ara, el mining nong babye, tuba malyeuk unamle. Bukni, ‘Asum lukunyan akunum yalyeura, tuba tonap teleb upnamle,’ tenenamne.

²⁶ Amem ning ara, pia kum dinamlum ning ara, tuba tonap laka nyapnusine. Ara, yata kam un ning do, el yan kala ap, taruk kala ap, kwaliklyeura, mitik tonun bitinyeto ulamle bukni, dipkoprob el yan kala ara, bitinye kum ulye ning ara, anggun pia kum dinamlume. Tonda, aning el yan kala kwa liklirye, kala bitinye aupmal bukni, el din ning bitinye talak tuba ton kum dilye ning nirya ara, Allah el kanye ara, ‘Aning ara, pia malye ulule,’ tenelule. Ati, anggun Israel nang arye, aning pia kum dinamlume. Tonda, yatanye birye do nirya, amem ning dadipmalye ning eiplirye, aning nong dobuka, talilul do, talye bol piplul do, anye bira akunum malye kipdeipdanmalula ati, Allah el kanye ara, ‘Anye malye atonun ning ulula ati, na dam kum yatue,’ tenelule.

²⁷ Tonda, talye bai tam kam un ning, sik yan dumbarye ubuk bukni, sik yan ara, potong aupmalye ning ara, kam do, mitik kus do, singa kus do, kapang yala-yala nirya do, el yan dumbarye deice arye yanibuka banyak ning yuk-yuk ning nirya ara, Allah el kanye ara, ‘Aning ara, malye ulule,’ tenelul ati, ‘Anggun Israel nang ara, ayala ning nirya obuka, pia kum dinamlume. Ara meme,’ tenebuka unamlume. Tonda, yatanye birye, ato ning el yuk dipmalye ning, bol piplyopura, ton aning nong dobuka taliplyeura, aning nong bolpiplinye bira, adiparyuk, el akunum malye kipdeipdanmale. Aning talipmal talak arye, dipdongobuka, asum noutam nirya ap, keting kumuplyeba, inipnamle talak babye, malye upmale. Ara, el mining nong babye, tuba malyeuk unamle. Bukni, asum lukunyan akunum yalyeura, tupa tonap teleb upnamle.

²⁸ Yatanye birye do nirya, anyapmasin kam ulamle ning dadipmalye ning eiplirye, dobuka taleplyeura, malyeuk akunum kipdeipdanmalula ati, adiparyuk el ongolamlye baju nirya kwiribukaplirye, mek likinamle. El baju mek liknamle bukni, aning talipmalye talak arye dipdongobuka, asum noutam nirya ap, keting kumupliba inilamle talak babye, malyeuk tuba unamle. Ara, el bidamnye nong babye, tuba malyeuk unamle. Bukni, arup lukunyan akunum yalyopura, tuba tonap teleb upnamle. Deiyok ara, anyapmasin ning nirya ara, Allah el kanye ara, ‘Aning ara, malyeuk ulula ati, sik Israel nang ara, aning dina ap, talina ap ara, pia meme. Winibikcopura, na dam kum yatinge,’ tenelule.

²⁹ Ura, yuk yala mem ning ton, laka nyapnusine. Tuku deice yanibuka balul ning noutam bukni, anggun kum obuka dinamlum ning ap, kum dobuka talinamlum ning ap, laka nyapnusine. Ara, ayam ap, mitik kupmana ap, yan dumbarye arye, tuku yanibuka balul bal sirika ap, birik bal ap, dopu bal ap, mem bal ap, tenoi ning ap, tonda sai bal ap nirya ara, obuka kum dinamlume. Tonda, kum talinamlulume. Deiyok ara, Allah el kanye ara, ‘Aning ara, malye ulule,’ tenelule ati, anggun Israel nang ati arye, aning ara, mem ning ulul ati nyapsine.

³⁰ Aning atonun, yan dumbarye ulamle bal dumang mitik ning ap, tonda birik bal taruk dumbarye deice arye, dabu mutuku balamle weik bal, taice weik belelamle bal ap, el nong ara, cang weik bal, el si ara buaya ap, mitik bal el si landak ap, tonda aning atonun yan dumbarye deice arye, tuku deiceuk balamle bal, mem bal el si ara, Biawak ap, mitik bal el nong bol warna yuk-yuk kilamle ning ara, el si bunglon ap ara, aning-aning nirya, obuka kum dinamlume. Aning nirya ara, kum talinamlume. Allah arye, ‘Aning ara, malyeuk ulule,’ tenelula ati, anggun Israel nang ati, aning ara, mem ninguk ulule ati, kum obuka dinamlume.

³¹ Tuku deice yanibuka balul ning, ayala-yala weik aulul bukni, narye laka nyapmasin yala ning ara, anggun Israel nang arye, obuka kum dinamlume. Aning yatanye birye do nirya, anyapmasin ning yala nirya ara, anggun bol pina ap, tonda el yuk dadipmalye ning eiplirye, el bol piplinye bira, el bidamnye deice nirya ara, malyeuk kililalul ati, Allah el dam kum bitue. Aning taliplye talak arye, dipdongobuka asum noutam nirya ara, malye wininmalya ani, keting kumuplirye iniplyopura, tonap teleb upnamle.

³² Tonda, ‘Ayala ning ara, mem ning ati,’ laka nyapmasin ning nirya ara, koulubuka, saklyeba, kat ning yo deice do, keil deice do, baju deice do, kam ning bol kobuka keting mikuka arye, sisal sebuk ning do, amem ning sakuka poulyalirye, aning bol piplyopura, atalye kat ning babye, talye aupmalye ning bukni, amem ning sakuka, piplye ning ara, malye unamle. Ara, yata ning do, deipmace baju bol deice do, amsuna deice do, sak karung deice do, amem ning diplirye, poulyalirye, akat ning deice bol piplyopura, abola piplye ning nirya babye, malye unamle. Ati ara, apipmalye ning nirya ara, dobuka mek pumuk dongoltakanamlulume. Atalak arye dipdongobuka, asum noutam nirya amekwen pumuk upmalye bukni, keting kumulamle talak ara, tuba tonap, telebuk kipnamle.

³³ Winipmanto ara, kat tuku deice arye memebikirye, yulamak mangkau arye deipmamunya ani, adeice amem ning, laka nyapmasin ning nirya ara sakliba, amek makau pum tam poulbilyopura, amakau ap, amakau pum tam wamlye ning ap nirya ara, malye kibuka delilule. Ati, alaka nyapmasin malye mem ning nirya, aning bol piplinye makau ara, anggun adiparyuk, amakau cobuka, bataknauk unamlume.

³⁴ Tonda, amalye mem ning sakuka, bol pipmalye makau arye, mek kwebuka yupmakceba, pipmalye din ning ara, pia kum dinamlume. Aning atonun, amek makau pum tam arye yupmace mek ap, amakau arye, mek kwebuka imbik dipmanto mek ap, amalye ning arye, amek makau akunum pipmalula ati, amek makau arye mek pia kum dinamlume. Amek makau pum ulye ning babye, malye kipnamle.

³⁵ Arup nyapmasin mem ning, ayala-yala nirya ara, amalye ning arye sakuka, bol pipmalye ning nirya babye, malye ninguk unamle. Ara, tuku arye memebuka, teleb kibikceba, mek makau kilul ning do, tuku arye teleb uka uku sekna ati, kintinibuka delinyak ning deice do, yan sakuka bol piplyeura, dangaltakna uk unamlume. Ara talye ati kume, deiyok ara, na Allah arye, ‘Aning ara, mem ning,’ nyapmasin ning, malye ning pipmalyeba, adeice arye apipmalye ning babye, malye upmalula ati nyapsine.

³⁶ Amalye mem ning saklirye, bol pipmalye ning yala nirya ara, malye kipdeipnamle bukni, mek pum deice sakmalye ning ap, tuku pum tam palibikceba, mek mekwen delilamle ning ap, aning bitinyeuk ara, malye mem ning deplirye, nong sakliba, nong sakuka, aning bitinyeuk piptua babye, malye kibuka kum delinamle. Tuba telebuk ulule.

³⁷ Tonda, ‘Winipmanto ara, malye un ning kum kiplirye, sakuka lyulamle ning saklirye, yala ning koupnamapʼ tenen, deipmace ning deice poulyalyeura, malye ubuka kum kilinamsile. Ara, telebuk tuba unamle.

³⁸ Bukni, yala ning deice mek diklopmamunye buk, moul uplirye, amalye ning kum kiplirye, lyulamle ning sakuka, yala ning bol piplyeba, malye akunum upmalula ati, ayal ninguk ara, bataknamlulume.

³⁹ Tonda, yuk kam ulye ning, yala-yala weik diptume. Bukni, adina teleb ning babye, akam ning diplirye, mitik tonun lyulamlyeba, yata nang do nirya, adipmalye ning, bol piplyopura, malye akunum kideipdanmalule. Ati, beren tam arye dipdongobuka aunmacani, keting kumubuka iniplye talak nirya ara, adipmalye ning bol pipmalula ati, anye bira malye nang atonunuk unamake. Atalak noutam arye, na Allah dam kum yatinge.

⁴⁰ Aning atonun, yatanye birye do, aoplopmace ning do, talye dadipmalye ning do, aning bol pipmalinye babye, aning talibuka boyanganamlanye babye, tonda aning kalebuka dipnamlanye babye, aning talipmalinye babye, el atalak ongolamlye baju nirya, kwiribukaplirye, mek likinamle. Bukni, amek likmalya babye, beren tam arye aunmalye ani, keting kumuplirye inilamle talak nirya babye, dipmalye ning bol piplya ati, malye atonun nanguk unamle. Ati, atalak arye, na Allah dam kum yatue.

⁴¹ Yata yala ning do nirya, kam ulirye, mun deice arye tuku deice balyeba, buta palilamle ning yala-yala nirya ara, sik Israel nang pia kum dinamlume. Ara meme nyapsine.

⁴² Aning atouk, tuku deice yan dumbarye ning do, tonda yan weika arye uamuk ning do, mun deice arye tuku deice banmalyak, sung-sunga palilamle ning yala-yala nirya ara, malye ninguk ulule. Ati, aning nirya ara, anggun Israel nang, pia kum dinamlume. Ara, meme nyapsine.

⁴³ Anggun Israel nang arye, anyapmasin ning yala-yala nirya ton, obuka dipmunyeura, tonda talipmunyeura, anggun babye, malye kililanamlume. Ati, ato ning ara, kum dinamlume, tonda kum talinamlume. Aning ara, pia meme nyapsine. Aning talemunyopura, na Allah dam kum yatume.

⁴⁴ Aning nyapmasin yupu ara, talye ati kum nyapsine. Deiyok ara, nara Allah Yahweh, anggun ni koproba Allah unune. Nara pia teleb, pia etekdopnye, leknye unune. Ati anggunce moubuka kalikilanauk umunyopura, ‘Nunda, Allah el ninguk unyabeʼ tenen, unamlume. Nara, pia teleb, etekdopnye, leknye ununa ati, anggun babye, ‘Naʼ tenen, nang ululuma ati, anggunce malye una pia kum aryuk, pia teleb kibuka umunce, etekdop lek nang unamlume.

⁴⁵ Anyapmasin yupu deiyok ton ani. Ara, nara Allah Yahweh unune. Anggunda, Mesir mutuku ulamlum bukni, narye anggun lopdeipsisirye, telebak bobuka yanamsise. Ati, nara anggun ni Allah Yahweh unune. Ati anggunce, ‘Nunda, Allah el ninguk unyaba ati, malye winina kum aryuk, pia teleb winin nang, etekdop nanguk unamabe,’ tenepmunce, telebuk wininamlume. Na Allah ara, malye winina pia kum aryuk, pia teleb wininye, etekdop leknye ununa ati, anggun babye, ‘Naʼ tenen, nang ululuma ati, anggunce malye winina pia kum aryuk, pia teleb kibuka umunce, etekdop lek nang unamlume. Na lek pia unye touk, anggun babye atonun, pia teleb lek nanguk unamlume.

^46-47 Ati anyapdeipmasin yupu nirya ara, talye kam ulul ning, ayala-yala nirya ara, ton ning ati, na kanye ara, ‘Aning ara, pia malye, mem ning,’ tenenuna ati, anggun Israel nang arye, ayala ning obuka, kum dinamlume. Ton ning ara, na kanye ara, ‘Aning ara, teleb uka,’ tenenuna ati, anggunce ayala ning obuka, dinamlume. Aning nirya ati, anya arye, ‘Aning ara, telebe. Aning ara, malye,’ tenepmunce, moubuka biknamlumʼ tenen, ayupu nirya laka nyapmasine. Ati, narye anggunti nyapdeipsin yupu nirya ara, pia moubuka kekepmunce, aninguk talibuka, wininamlume. Ara, amu tam yan arye yanibuka, tuku deice banyak ning yala babye, tonda maka babye, mek pum tamuk balamlirye, binuka ulye ning nirya babye, tonda mun deice arye, banyak ning babye, ‘Aning obuka, pia kum dinamlum ning ara, ani. Obuka dinamlume ning ara, ani. Aning bikmunce, teleb ubuka wininamlumʼ tenen, nyapsine. Allah Yahweh arye, Musa ati, ayupu nirya laka nyapdeibuk.