Imamat 10 - Eipomek

Ninye si Nadab ap, Abhiu ap, sikce malye winipdik yupu

¹ Tonok talak ton, Harun el mapu bitinye, sik si ara, Nadab ap, Abhiu ap, sikce uku sekna ati, taruk arye talilamak lukun ning, el si perbaraan, aning kintinibuka deiamik ning ara, sik anang birikce, dopropdik. Doproropdikopura, aning deice yuk-yuk uku sekdikba, dibukopura, Allah Yahweh arena ati, siltong teleb ning uku dongopdik. Winipdik bukni, anintong teleb ning uku dongopdik ning ara, Allah Yahweh arye sikti, “Anggunce aning ara, uku dongopmunce, nati arepnamnurume,” kum nyabuk. Allah Yahweh arye, aning ati, “Telebe,” kum nyabuka ati, sikce uku sekuka, anintong teleb ning dongopdik ning ara, Allah yanina atonun winipdikce, pia malye winipdik.

² Ati, Allah arye kum nyapmok ning winipdika ati, Allah Yahweh yu unmoka arye, uku dopkwebukaba, sik anang nong deice uku buk arye talibuka, abitinye nang dibuk. Dibukba, Allah ap, ninye ap ansinlina ati, sapi basam bol arye domik doltakna tenda aik domika damuk, Allah Yahweh arye dinmokak, asukumuk sik bitinye ara, dipdik.

³ Winibuka ati, Musa birye, Harun biti nyabuk. Atonun ning ara, ‘Anggun dam ikin weik yasilyakʼ tenen, min talak Allah Yahweh arye, akunum nyapdeiamsuk. Allah arye nyabuk yupu ara, ani. “Na si eren aik pum tam pil donamak nang nirya ara, ‘Se, Allah ara, dipkoprob pia weik etekdopnye. Malye una ning pia kum ulula ati, Allah elda, pia teleb etekdopnye, leknye ulule, tenebuka, kel biknamakeʼ tenen, na wininye ning lake kibuka, eipnamake. Nara, malye ning tonok babye, kum unulula ati, nara weik leknye unun ati, sik babye biknamake. Na weik mikip lake kipdeipniba, adeice arye, sik Israel ninye nirya babye, eibikirye, sikce, ‘Se, Allah elda, dipkoprob pia teleb, weik leknye ululeʼ tenen, kel biknamniyake. Na mikip weik tukwak winipdenyeba, adeice arye, sik Israel nang nirya babye, eibikirye, ‘Se, Allah elda, dipkoprob pia teleb, weik etekdopnye ululeʼ tenen, biknamniyake.” Allah arye nyabuk yupu ara, Musa birye Harun ati, nyabuk. Musa birye Harun ati, “Allah arye, ayupu nyapdeiamsuk,” nyabuk bukni, Harun birye tamubuka, yupu ton kum nyabuk. Tunim anauk ubuke.

⁴ Atalakuk, Harun el mam koproba Uziel birye deiamuk mapu bitinye nang ton, sik si ara, Misael ap, Elsapan ap ati, Musa birye yukubukba yarik. Akunum yarikopura, Musa birye, “Anggunda, na dam yarurume,” nyabuk. Nyabuka yukubukba, akunum yarikura, elce nyabuk. “Anggunce anggun deice mapu bitinye ara, Allah ap, ninye ap, ansinilina ati, sapi basam bola arye domik doltakna tenda aik bublan damuk, dipmaraka ati, anggunce adiparyuk, abitinye nang, asukum aryuk, sik nong ara, winirye dobuka, nun Israel nang tenda kain aik domupak arye, bai tam pia yukak delilbirurume,” nyabuk.

⁵ Nyabuk ati, Harun el mapu bitinye nang arye, anyaik bublan damuk yarikce, sik nice mapu, adipmarik nang ara, sik nong bobinuka, Israel nang ulamika arye, bai tam bobirik. Ara, Musa birye sikti, “Winipdurume,” nyabuk touk winipdik. Abitinye nang dipdik talak ara, Allah el si eren aik wekuka pil don talak, imam-imam nang kitina ati, cang kain, nong deice tam ning ara, tuba awenipmarik touk dipmarik ati, Misael ap, Elsapan ap eipdikce, anang sik nong dobuka, acang kain pum tam arye, kitibukadikce, Israel nang ulamikak bukni, bai tam bobirik.

⁶ Atalak ara, Musa birye, Harun el mapu bitinye nang tuba kam unmarik nang ara, sik si Eleasar ap, Itamar ap, tonda Harun ap, sik nirya ati, nyabuk. “Ura, nun Israel nang arye, nun kwitcapu nang dibikiba, winilamap touk kum winipnamlume. Ara, sikda, anggun kwitcapu, adipmarak nang bitinye engena ati, winirumce, ‘Seʼ tenen, malye kanye dobuka, anggun ongomunye baju kwilikmunce, kum engennamlume. Tonda, anggun potong kona kumce, batakmunyeba, kum duk mounamsile. Anyapmasin ning ara, talye ati kum nyapsine. Deiyok ara, anggun kayapu nang arye, pia malye ning winipmarik ati, Allah arye wenebuka obuka ati, anggunce na nyapman yupu kum kekepmunyopura, anggun winilye ap, Israel nang nirya ap, nun nirya babye, adiparyuk dipnamabe. Tonda, anggunce na nyapmasin yupu kum kekepmunyopura, Allah Yahweh arye nun Israel nang nirya ati, yu tenepnamsile. Bukni, anggun yala nang ap, sik yuk Israel nang yala-yala nirya ara, sik adipmarak nang ati, ‘Seʼ tenen, malye kanye bobuka ukirye, engena ara telebe uka. Adipmarak nang ara, talye kum dipmarak bukni, Allah Yahweh arye, uku dopkwepmalba, dipmala deice arye dipmarake.

⁷ Tonda, atalak ara, anggun kam tuba unmalum imam nang ara, Allah Yahweh ap, ninye ap ansinilina ati, sapi basam bol arye domik doltakna tenda aik wekelbana ati, bublan dam arye batakuka, bai tam yuk-yukak bana kume. Bai tam bimunyeura, anggun babye adiparyuk dipnamlume. Deiyok ara, ani. Anggun winilye nang ati ara, narye, ‘Sik anang ara, Allah Yahweh el aik pum tam pil donamakʼ tenen, akunum wipdeipmasince, apil deiyok kouna ati, minyak mek anggun kisok deice akunum dikuka deipmasina ati nyapsine,” Musa birye, Eleasar ap, Itamar ap, Harun ap ati, nyabuk. Nyabukura, sik awinilye nang kekebikce, Musa birye, “Wininamlulume,” nyabuk touk, anyaik damuk winipmek.

Imam-imam nang, sik pil dona ati, “Anyapsin ninguk wininamlum,” nyabuk yupu

⁸ Allah Yahweh arye, Harun biti nyabuk.

⁹ Harun, an ap, ance deiamlum nang, an mapu ap, sik nirya ara, kanye walawalan anggur mek, yu mek do, yuk yala kanye walawalan mek do, dipmunye talak ara, na Allah ap, ninye ap ansinilina aik pum tam ara, pia kum wekelyanganamlume. Anyapmasin ning kum kekemunce, talye lubakibuka anyaik wekmunyopura, anggun adiparyuk dipnamlume. Ayupu nyapdeipsin ning ara, anggun ap, anggunce deipmunyeba, dadeipdanin banamak nang, sik imam-imam nang ap nirya ara, pia kum bataknamlume. Ayupu dem nyapdeipdanin bamunce, pia talibuka wininamlume. Ayupu ara, pia kum bataknamlume. Allah arye nyabuk.

¹⁰ Tonda, anggunce, ‘Allah elce, ‘Teleb ning ara, ani. Na dam kum yanmanto ning ara, ani. Na tenen ning ara, ani. Talya aupmalye ning ara aniʼ tenen, moubuka teneprumunce, wibuka kinitinipnulume. Tonda, Allah dam kum deipmanto ning, malye ning ara, ani. Allah dam deipmanto ning, teleb ning ara, ani,’ tenebuka, mouprumunce, winibuka kinitinipnulume. ‘Aning-aning nirya ara, ato touk ululeʼ tenen, kum wininamlume. Talya winina ara, pia meme.

¹¹ Tonda, an ap, ance deiamlum nang ap, na Allah Yahweh arye, “Aning wininamlume. Aning ara, pia kum wininamlume,” nyapdeipsise ning, Musa dam binuka nyapsise yupu nirya ara, Harun an ap, an mapu ap, ‘Sik Israel nang nirya kekebikirye, bikinamakeʼ tenen, sik kekenak ati peterenalyame. Allah arye, Harun biti nyabuk.

¹² Nyabukura, Musa birye, Harun ap, Harun el mapu bitinye ara, Eleasar ap, Itamar ap, sik nirya ati, ayupu nyabuk. “Din ning, roti kwaning dana deiyok ning, el si ara, gandum do, tepung do, Allah Yahweh ati, yanuka arepmace ning ton, mitik tonun tuba aupmalye ning ara, anggun imam-imam nang aryuk dobuka dinamlume. Ara, kam ning kum bukni, roti kwaning dana deiyok ning, Israel nang arye, Allah ati arelamak ning ara, uku dongopnalum bukni, tuba aupnamle ning ara, angguncuk dinamlume. Tonda, atepung do, gandum do, yakong do, aning dopropmunyopura, roti kwaning nena deiyok ning, el si ragi tabakna kum ning ton, aninguk dinamlume. Aroti kwaning akunum dabuka, kintinip deipmunyopura, akambing ato ning obuka, uku dongona ati, mesba kintinibuka deibikak, balye tamuk bindeibuka dinamlume. “Adin ning ara, Allah el ning koproba, pia lek ninguk ulula ati, talyeuk binuka dina meme. Mesba damuk binuka, dina telebe,” nyapsine.

¹³ Tonda, aroti kwaning ara, anggun adiparyuk dobuka bimunce, malye ning kum upmalyak, pia teleb sukumuk, bindeibuka dinamlume. Adin ning ara, Allah Yahweh el arena ati, Israel nang arye, arelyanganyak din ning ati nyapsine. Aroti kwaning ara, Allah Yahweh ati, uku dongobuka arelyanganyak ning ati, an ap, ance deiplum mapu bukni, Israel nang arenamniak noutam aryuk dobuka, anggun anyapmasin nanguk, dobuka dinamlume. Ayupu nirya ara, Allah Yahweh arye, na Musa ati, “Wininamlume,” nyapdeipnuk ning ati, anggun imam-iman nang ati, laka nyapsine.

¹⁴ Aning ara, anggun imam nanguk dinamlum bukni, Harun an ap, ance deiamlum nang ap, kilapu ap, sal babye, kilapu babye, anggun nirya dina ati ara, laka nyapnusine. Ara, Israel nang arye, Allah ati arebikirye, Allah el din talakuk, taruk erebuka talipmunce, ‘Telebe,’ nyabuka, binpeterepnamak ning ara, apil akunum dobikcopura, abasam mun tup ap, abasam yan keil sirik tam ning ap, dobukapmince, yaminyeura, an ap, an mapu silip nirya ap, sal babye, kilapu babye, dinamlume. Aning ara, Allah el kanye ara, ‘Kume, aning nirya ara, Israel nang arye, nati arelyanganamniak bukni, aning nirya ara, sik imam-imam nang, sik din ning ati, Israel yala nang nirya, arye, ‘Nun ap, Allah ap, teleb kibuka, neika unamapʼ tenen, dobuka arelyanmakce ning ati nyapsine. Adin ning ara, talyak kum dinamlume. Aning kum bukni, pia teleb lekak aryuk, bobinuka dinamlume. Talya yukak dina meme. Malye un ning ton, pia kum wamlak ara, talye lukdanuka dinamlume.

¹⁵ Ura, akunum laka nyapdeipsise touk, abasam yan keil tup, sirik tam ning ap, abasam mun ap, Allah Yahweh el arena ati, el urasin damuk, Israel nang arye, sik taruk erebuka talibikirye, binuka peterebikirye, ‘Telebe,’ nyabiceura, sik imam-imam nang arye, aning kintinibibirye, sekuka delinamlume. Tonda, aning boyanganamak talak ara, abasam meta ara, adiparyuk bobinuka arelbanamake. Israel nang arye, aning nirya Allah ati, bobikcopura, imam nang arye, mesba dam binuka uku dongonamlume. Bukni, abasam mun ap, sirik tam yan keil tup ap, meta ara, tuba aupmalye ning ara, ance dopropnamlyame. Abasam mun ap, sirik tam yan ap, meta ara, Harun an ap, an mapu nirya ap, anggun dina ati, dopnamlume. Ati, aning nirya ara, dobuka dinamlume. Ara, mince Allah arye, “Anggun imam-imam nang ap, anggun mapu silip ap, dipnamak ning ara, ani. Anggunce wininalum touk, anggunce deipmunyeba, dadeipdanin banamak nang nirya ara, aning atonun doyanamle talak babye, atonun pia wininamnyake,” nyapdeipse touk nyapsine. Allah Yahweh arye, ayupu na dam yanuka nyapdeipnuke ati, laka nyapsine.” Ayupu nirya ara, Musa birye Harun ap, el mapu ap nirya ati, laka nyabuk.

¹⁶ Tonda, Musa birye Harun ap, el mapu ap ati, asipdeyuk. “Israel nang, sik malye wininyak ning ati, ‘Allah arye bikeipsilirye, nun malnye winin ning nirya pununa ati, Allah arye kilibuka kum daneipnamsilʼ tenen, dobuka boyanmangu kambing basam ara, yata wiripnamalum do?” nyabuka asipdeyuk. Nyabuka asipdeyukba, Harun birye tamubuka nyabuk. “Kume, aning ara, Eleaser ap, Itamar ap, sikce akambing obuka, uku dongopmarunge. Uku arye akunum dibuk,” nyabuk. Nyabukopura, Musa ayupu kekebukce, yu weik ubukba, sik abitinye nang ati, wabukce nyabuk.

¹⁷ “Seʼ', anggun malye winipmarume. Yata deiyok ati, Israel nang arye, ‘Nun malye winipmapu ning pununa ati, Allah arye biklirye, namin kubuka, kum daneipnamsilʼ tenen, boyanmangu kambing basam nirya ara, uku dongopmarumba, uku dipmale. Awinipmarum ning ara, teleb kume. Teleb ning ara, anggun ton bokuka dopropmatumce, pia teleb sukumuk, Allah el si eren aik urasin tam, pia teleb lek sukum dam bobinmatumce, aning dipmatuma. Deiyok ara, ani. Akambing basam arepmangu ning ara, Allah el kanye ara, ‘Aning ara, pia teleb lek ning ulule,’ tenelule. Tonda, Allah arye, alek ning ara, sik imam nang dinamake. Imam-imam nang arye, akambing tup dipmak deice arye, ‘Israel nang, sik malye wininyak ning kilibuka, sikti, teleb kipdeipnamleʼ tenen, arisulule. Israel nang, aning arepmangua deice arye, ‘Allah arye, nun malye ning ati, wenebuka oplopsutu bukni, aning arebikcopura, punupnamsile. Allah arye nun malye winin ning kilibuka, teleb kipsilirye, lyepdopnamsilʼ tenen, arepmangue.

¹⁸ Akambing basam ining ara, Allah ap, ninye ap, ansinilina ati, sapi basam bol arye domik doltakna tenda aik noutam, Pia Teleb Lek Aik nyanyak sukum pum tam, anggunce dobuka, kum binmarume. Tonda, ‘Allah arye, Israel nang, sik malye wininyak ning kilibuka kum daneipnamsilʼ tenen, aining mitik tonun, taruk arye burubuka, Pia Teleb Lek Aik pum tam, kum dikdonokmarume. Apil dopnamtumopura, akambing basam kalipdoba nirya ara, anyaik bai tam bukni, anyaik urasin tam bobinuka, adiparyuk dipmatumca. Anggun kele. Narye, anggunti, “Winipnamlume,” nyabuka, akunum laka nyapsise bukni, anggunce kum winipmarume. Musa birye Harun el mapu bitinye ati, wenebuka nyabuk.

¹⁹ Musa nyabuk yupu nirya kekebikopura, Harun birye tamubuka, Musa biti nyabuk. “Diba, arup ara, Israel nang nirya arye, ‘Nun malye wininyap ning pununa ati ara, ‘Allah arye namin kilibuka kum daneipnamsileʼ tenen, kambing basam bobuka arelyanmangue. Tonda, aning atonun, yuk kam ning ara, arepmanguba, na mapu bitinye arye, aning dobuka, uku dongopmarunge. Aning nirya ara, Allah el arena ati arepmarungue. Allah Yahweh arye, apil dopmangu ning nirya eipmoke. Bukni, sik bitinye arye, malye ning ton akunum winipmarungu ning ara, na mambul kanye bopne. Ati asipdekin babye, mitik atonun ning ton winilamse. Naryuk akambing tup arepmanuba, na mapu bitinye arye atup ap, ining ap nirya, uku dongopmarunge ning ara, narye akambing tup mitik tonun dopropmatinirye, akunum dipmantinyopura, aning ara, Allah Yahweh arye, aning ati, ‘Telebe,’ tenepnuturye, kanye deipmanutu do? Aning ara, pia kume, tenepne.” Harun birye, Musa biti asipdeyukce, nyabuk.

²⁰ Harun birye ayupu nyabukba, Musa birye kekebukopura, ‘Se, aning ara, dipkoprob nyapmaleʼ tenen, kanye deibukce, ayupu tonap nyana kumce, ayupu batakuk.