Ibrani 9 - Eipomek

Minop talak, Allah el si erena ati, cang kain atonun ning, kambing bol dobuka, tia dolin tenda aik domik ning ati, nyabuk yupu

¹ Minop talak ara, Allah arye, “Ninye ap, na ap neika una ati wininamlulume,” nyabuka, nyalilamuk yupu noutamak ara, Allah el si erena ati, mem yupu ap, Allah el tenda aik dona ati, lak len yupu ap ton uamuk. Ayupu noutamak ubuk ning ton nyapnusine.

² Allah el si erena ati, tia dolin aik cang kain atonun ning, kambing bol deice domik. Domikce, wilibuka min yubuka weklamik aik el si ara, Teleb Lek Aik nyalamik. Anyaik noutamak delilamik ning ara, nukuka nyapnusine. Ara, weisa delina ap, yo lakase yangalina meja ap, Allah el si erena ati, din ning dabuka delilamik ning, el si ara, roti ap delilamik. Aning nirya delilamik aik si ara, Teleb Lek Aik nyalamik.

³ Tonda, acang kambing bola tenda aik noutamak ara, aik yuk-yuk wilibuka delina ati, cang kain bitinye ning ton lapkwecamik. Acang kain bitinye ning pum tam ara, tonok aik ton, wilibuka domik. Anyaik si ara, Pia Teleb Lek Aik nyalamik.

⁴ Pia Teleb Lek Aik noutamak delilamik ning ara, nukuka nyapnusine. Ara, emas arye domika ara, sererem maka aik dolamla atonun ubuka, domikce uku seknarye, nintong teleb ning uku dilamik. Aning ara, anyaik delilamik. Tonda, pia teleb marikna muamikce, emas dobuka, el nong bol deice tilibuka deiyamik. Deiamikce, amarikna pum bisik ara, Allah arye Musa ati, “Wininamlulume, aning ara, kum wininamlulume,” nyabuka, nyalilamuk yupu ara, keil pala deice sekamuk ning ara, akeil pala dobuka, amarikna pum bisik deiyamik. Amarikna ara, Pia Teleb Lek Aik noutam akuk deiyamik. Tonda, Allah arye Israel ninye ati, im deice arye, yo kurun atonun saklamukba, arilamuk din ning, aning el si ara manna, mitik anun bulubuka kintinipmika arye, amarikna pum bisik dongobik. Ara, aning saklamuk talak ara, ton bulubukabikce, emas arye tilibuka, domik mek makau pum dongobik ning ara, aminyan talak amarikna pum bisik dongamikce, dobuka deiyamik. Tonda, Harun el kama bolamukbuk, kwapu silikuk ning ara dobuka, amarikna pum bisikuk dongamikce deiyamik. Amarikna ara, Pia Teleb Aik noutamak deiyamik.

⁵ Amarikna delilamikak deice tam delilamik ning, malaikat urasin atonun ning, el si ara Kerub, puturubuka deiyamik. Kerub ara, malaikat urasin atonun puturubuka deiyamik. AKerub deibik ning ara, ‘Nun Ni Kopropa Allah asukum dam ulule teneanamak’ tenen, delilamik. Aning puturubuka deiyamik ning ara, emas marikna deice tam deibik. Amarikna deice dolamik pil ara, ‘Allah arye ninye malye winin ning kum daneipnamsil’ tenen, ining bulubuka amarikna deice likuka, delilamikak deice tam ubuk. Aning-aning nirya delilamikba, awamuk bukni, atalak ara, winilamik ning nirya ati, yupu kum laka nyaptibye.

⁶ Anyaik noutamak delilamik ning nirya ara, arup nyapmanua atonun, akunum lelebdeiyamikce, sik apil dolamik nang, ara Allah ap, ninye ap, dana-dana ansinilina deiyok nanguk, anyaik weklamikce, sik apil dolamik. Sik weklamik aik ara, minyuma wilibuka domikba, minyuma tam aikuk wekelbalamik.

⁷ Sikda, bai tam atonun aik, minyuma aik pum weklamik bukni, Allah arena ati deiyok ninye, sik weik deiyoknye el demuk, anyaik wilibuka noutamak domik aik ara, “Pia Teleb Lek Aik,” nyalamik aik weklamuk. Sik weik deiyoknye birye, anyaik weklamuk bukni, yuk nang arye anyaik, Pia Teleb Lek Aik kum wekelbalamik. Sik weik deiyoknye anyaik weklamuka ara, asum-asum nirya kum bukni, tonok keting tamun noutamak ara, like tonok sum deice aryuk weklamuk. Tonda, anoutamak aik weklamuk talak ara, talyauk kum wekelbalamuk. Aning kum bukni, sik Israel ninye ap, el bidamang ap, aketing tamun noutamak arye, mankau kanye bobuka, malye winin ning winilamik ning ara, ‘Allah arye kilibuka kum daneipsilirye, namin kipnamsil’ tenen, ining dobuka, wekelbinarye, Allah ati, aining luptingca dobuka donoklamuk.

⁸ Ura, sik winilamik ning deice ara, Allah El Dib Kanye arye, winipmanto ning ati, peterelamsuke. Peterelamsuk ning deiyok ara ani. Ara, minyuma aik, cang kambing bol arye wibuka, tia talak ati, dopra balamik tenda aik uamuk talak nirya ara, anyaik noutamak, Pia Teleb Lek Aik wekmanto bisik, laka kum nyalamsuke. Ara, domona atonun anya arye, Allah el ulya ati, wekmanto bisik min kum laka nyalamsuka ati nyapsine.

⁹ Aning-aning nirya winilamik ning ara, winipmanto ning uamukba, adeice ara, nun wini talak unyap nang arye kel kinyabe. Nunce kel kinyaba deiyok ara ani. Ara, sik minop talak ulamik ninye arye, Allah el si erena ati, arilamik ning ap, ‘Nun malye winin ning kum kipdeipnamsil’ tenen, kam ning obuka, Allah ati arilamik ning ap deice arye, atalak Allah si erelamik ninye, sik kanye talima noutamak ning ara, diksukum kum kipdeipmanto kilamuk.

¹⁰ Apil-apil dolamik ning nirya ara, talye arena ning ap, talye din ning ap, talye dinmek ap, ninye talima teleb ulina ati, talye mek likuka pil dolamik ning ap, apil-apil dolamik ning nirya ara, mem pil uamuk bukni, talye winipmanto ning, nong bol deice atonun piluk dolamik. Apil ara, minop talak arye dipdongobuka, anoutam talak nirya pil dopra yangalamik bukni, wini talak ara, Allah arye winiryuk nyalisilye yupu, akunum nyapsuka ati, aminop pil dolamik ning ara, tuba kum talinamabe. Minop talak dolamik mem pil nirya, akunum sirya dakubu.

Yesus Kristus el ining ati, nyabuk yupu

¹¹ Minop talak ara, sikce tia talak ati domik aik, mitik teleb aik uamuk bukni, Kristus arye, Allah ap, ninye ap dana-dana ansinilina weik deiyoknye una ati, yayuk talak ara, talye tukwak ninye arye, domik aik noutamak kum wekelbiyuk. Kume, elce wekelbiyuk aik ara, atukwak mutuku noutamak kum ulule. El wekelbiyuk aik ara, malye ning tonok babye kum ulamuk aik, mambul weik aik wekuk. Yesus arye wekuk aik ara, tukwak mutuku noutamak kum ulule. Anyaik ara, im deice ulul aik atia.

¹² Sik minop talak pil dolamik nang arye, tia talak ati, cang kambing bol aik noutamak, ‘Pia Teleb Lek Aik weknuyap’ tenen, kambing basam ining ap, sapi basam ining ap, bobna deice arye wekelbalamik touk, Yesus ara, aning atonun kum winibuk. Aning kum bukni, Yesus Kristus arye, tukwak ninye nirya, nun malye winin ning, pia kum kilina ati deksukce, akunum sirya daksuke. Akunum deksukce, nun punupsuka ati, apil nirya sirya daksuke. Nun malye winin ning kilin pil, akunum sirya daksuka anya arye, Allah el dipkoprop Pia Teleb Lek Aik, like tonok talak wekuk. APia Teleb Lek Aik wekuk talak ara, el bidamang ining deice aryuk wekuk. Ati, ila tuba tonap, apil kum dopnamle. Apil akunum sirya daksuka atia.

¹³ Allah arye nyapdeibukba, Musa el yupu noutamak sekamuk touk, minop talak malye winilamik ninye arye, ‘Allah arye kanye deipnamsil’ tenen, kambing ap, yim sapi ap obuka, ining kwepman ning ap, kil sapi obuka, uku dongolamik. Uku dongopnopura, uku arye dibukapnarye, sice buknopura, aning ara, atu ap dobukapnarye, sik teleb ulina ati, atalak ulamik ninye, sik nong deice donoklamik. Winilamika ara, ‘Allah arye nun malye winin ning kilibuka kum daneipsilirye, teleb kipdeipsilyopura, nun malye nang unyap bukni, el dam yatibye’ tenen, apil dolamik. Winilamik bukni, aning ara, winipmanto ati, nong bol deice uk, teleb winilamik bukni, ninye talima noutamak ara, dipkoprop teleb kum winilalamik.

¹⁴ Sik minop talak pil dolamik ning ara, mitik mambul pil, nong bol deice ning uk, mitik teleb winilamik bukni, Kristus el bidamang ining deice arye, nun kanye talima dipkoprop teleb kilisilya ara, mambul weik ulule. Kristus ara, pia diksukumuk ulamukba, Allah El Dib Kanye, pia aunamlanye bira, el mikip melyamuka deice arye, Yesus arye Allah ati, el bidamang el nong kopropa arepdayuk. Nun kanye talima noutamak, malye ning usilya deice arye, malye winibirye dibinyabe. Ati, Kristus el ining deice arye, nun kanye talima noutamak malye ning dipsuka deiyok ara ani. Ara, ‘Tukwak ninye arye, Pia Kam Una Deiyoknye Allah, el amu tam ubikirye, el pil donamak’ tenen, pil dopsuke.

¹⁵ Aning ati ara, Allah arye nunti, “Wininamsin,” nyabuka nyalilamsil yupu, winiryuk yupu ara, akunum kintinipsukopura, Kristus arye, Allah ap, ninye ap dana-dana Ansinilina Deiyoknye usulule. Apil dobuka usilya deiyok ara, ani. Ara, Allah arye yukusilye ninye nirya ara, Allah arye, “Winibuka arenamsine,” nyabuka nyalilamsuk ning, ‘Dipkoprop doprobikirye, aning talibuka pia teleb unamak’ tenen, Kristus arye nun Ansinilina Deiyoknye usulule. Ura, Allah arye, ninye teleb ulina ati, yupu nyalilamukba, minop talak ayupu winilamika noutamak ara, Allah arye yukulamuk ninye, sik malye winilamik ning ap, nun malye wininyap ning ap, kum danalina ati, Kristus dibuk deice arye deksuke. Kristus arye nun lyena ati, punupdeipsuka deice arye, nun malye winilamubu ning noutamak lopdeipsukce, lyebuka deksuke. Nun punupsuka anya arye, Kristus ara nun ap, Allah ap, Ansinilina Deiyoknye usulule.

^16-17 Ura, yuk yupu nyapnusine. Ninye dipnukce talak ara, wininyake. Surat deice ara, “Na dipnyopura, na talyamse ning ara, winibuka, winibuka bokeipnamlyame,” nyabuka sekenyake. Asurat sekenyake nang tuba kam unyak talak ara, asurat noutamak nyabikce ning ara, yuk nang arye bokuka kum doproptinge. Asurat deiyok nang arye, dipkoprop dibikceba, yuk nang nirya laka kel kibikcopura, adiparyuk, asurat noutamak nyamikce ning atonun, sik ning bokuka doproptinge.

¹⁸ Aning atonun, minop talak Allah arye, “Wininamsine,” nyabuka nyalilamuk yupu babye, kam ulul ning obuka ining likeipna deice aryuk deiyok koulamuk. Ining ning kum areamtingopura, anyalilamuk yupu nong kum uamtue. Talyauk uamturya.

¹⁹ Allah arye nyapdeibukba, Musa arye sekamuk yupu, mem yupu nirya akunum laka nyabukce, sapi basam mi obuka, ining doprobuk. Aining ap, mek ap, tabakukabukce, bi baju ap, yo si ara, hisop yo bisila ap dobuka, kintinipmanarye ining mekwen burubukabukce, amem yupu sekmok ning deice ap, ayupu kekenmek nang nirya ap, sik nong deice ining luptingca dobuka pakalilamuk.

²⁰ Aining ap, mek ap tabakuka, aninye sik nong deice arye ining luptingca dobuka pakalilamuk talak ara, ayupu ton nyapra balamuk. “Allah arye anggun nirya ati nyalin yupu nyalisulule. ‘Wininamlulume, winipmunba, narye wininamsine,’ nyabuka nyalinmasil yupu ara, ‘Atalak aniryuk talibuka dobolbanamak’ tenen, arepmasilba, deiyok koupnuyaba ati, aining ara, likeipra banmasina,” nyabuk. Musa arye ayupu nyabukabukce, ining luptingca dobuka pakalilamuk.

²¹ Ayupu nyabukabukce, aninye nirya deice, ining likeipra balamuka atonun, Allah elti, arena ap, el si erena ap ati, sik cang kambing bol arye tia talak ati dolin tenda aik domik ning ap, anyaik pil dona ati, anyaik noutamak delilamik ning nirya ap, ining luptingca dobukapnarye, donoklamuk.

²² Aninguk kum bukni, Musa sekamuk yupu, mem yupu noutamak nyasilye touk, aning-aning nirya, teleb ulina ati, ining luptingca dobukapnarye, donoklamik. Aning atonun, ninye arye malye wininyak ning deibuka, mangkau kina ning ati ara, ining kwebuka luptingca dobukapnarye, donoklamik deice aniryuk teleb winilamik. Yuk talye ning deice arye pia kume.

²³ Aning ati ara, atalak ulamik nang nirya, teleb ulina ati, kam ning obuka, ining kwebukapnarye, luptingca dobukapnarye, donoklamik. Atalak ulamuk ning nirya ara, talye winipmanto ning, kukia atonun ning ulamuk. Dipkoprop ning ara, im deiceuk ulule. Dipkoprop im deice ulul ning teleb ulina ati, arepmanto ning ara, minop talak kam ning obuka mitik teleb ning arilamik ning deice arye, teleb kum uptue. Aning kum bukni, winiryuk ning ara, pia teleb ning deice aryuk diksukum kipdeiptue.

²⁴ Im deice ning arena ara, pia teleb ning uka nyapmasina ara, deiyok ani. Kristus weklamuk aik, pia noutamak aik ara, ninye taruk deice arye domik aik kume. Ninye arye, ‘Dipkoprop ning kum bukni, winipmanto ning dopnamap’ tenen, ninye taruk talibuka domik aik, kukia atonun ning ara, kum wekuk. Aning kum bukni, Kristus ara, im deiceuk wekelbiyukce, wini talak ara, ‘Allah arye tukwak mutuku unyak ninye melinamle’ tenen, nun melina ati, Allah el un dam binuka ulirye, Allah ati morosulule.

²⁵ Tonda, tukwaknye bukni, Allah ap, ninye ap, dana-dana ansinilina weik deiyoknye ara, keting tamun nirya bukni, like tonok talak arye, ninye arye domik aik, Pia Teleb Aik noutamak bana ati, kam ning obuka, ining bobna deice arye wekelbalule. Apil donyak nang arye, sik bidamang ininguk kwebikirye, kum wekenyake. Sikda, keting tamun tuba-tuba pil dona ati, weklamaka atonun kum bukni, Kristus elda, like tonok talak aryuk, el bidamang ininguk dobuka, im deice noutamak wekukce, Allah ati aribuk. Yesus Kristus, el bidamnye, el nong kopropa dobuka Allah ati aribuk.

²⁶ Sik tukwak ninye bukni, Allah arena ati, deiyok nang arye, tuba-tuba arilbalamak touk, Kristus arye aning kum winibuk. Kristus ara, anang arye tuba-tuba arenauk, winilamak touk, el babye atonun winiptopura, like tonok talak deice aryuk, el bidamang nong dobuka, Allah ati kum areamtue. Aning kum bukni, weika arye tonap, im deice wekelbalamtue. Ara, Allah arye aning-aning nirya kwepdeibuk talak arye dipdongobuka, anoutam talak nirya ara, ila tuba tonap, weika arye im deice wekelbalamturye, Allah ati areamtue. Bukni, wini talak ara, sirya talak dam akunum ubukba, Kristus ara, like tonok talak deice arye akunum yayuke. Kristus yayuka deiyok ara ani. Ara, el bidamang, el nong kopropa dobuka, Allah ati akunum aribuka deice arye, nun punupsuke. Malye nang arye elti, obika deice arye, ninye malye wininyak ning nirya ara, akunum kum kipdeipsukce, nun punupsuke.

²⁷ Ura, Allah arye ninye tukwak ninye nirya tenyamsuk touk unamabe. Ara, kam ulamibya ani, tonok talak arye akunum dibibyopura, aminyan ara, Allah arye, nun tukwak ninye nirya ati, “Aning telebe, aning malye,” nyabuka yupu lipsisikuka bokeipsilirye, wenepnamsile.

²⁸ Aning atonun, Allah arye, ‘Ninye tukwak ninye weik, sik malye winin ning kum daneipnamle’ tenen, like tonok talak aryuk Kristus dopdeibukba, malye nang arye Yesus obika deice arye, nun malye winin ning nirya akunum kilibuka kum kipdeipsuke. Aminyan talak ara, Yesus Kristus ila tuba tonap, tukwak mutuku dam kutukuka tikilyanamle bukni, atalak ara, ‘Malye winin ning, na nong deice deipnikiba kilipnamne,’ tenena ati kum yanamle. Aning kum bukni, bitinye talak yanamle deiyok ara, sikce, ‘Yesus dipkoprop dolyanamsil’ tenen, elti, diba tenebuka, dinauk unyak ninye ati, lyebuka dolyanamsile.