Ibrani 8 - Eipomek

Allah arye, “Ninye ap neika unamabe,” nyabuka, winiryuk nyalilamuk yupu ati ara, “Yesus ara, Ansinilina Deiyoknye ulule,” nyabuk yupu

¹ Ura, na kayapo, arup nyapmasin yupu nirya, deiyok ara nyapnusine. Allah ap, ninye ap dana-dana Ansinilina Deiyoknye, weik mambulnye akunum usulule. Anye bira, Allah el Mi Kopropa Yesus eluk ulule. Aning-aning nirya deice tam, im deice ululnye, Allah el weik deiyoknye bunak sirik tam, Yesus bulbiyuk.

² Yesus el pil dolyak ara, Allah el ulyak pia noutamak, Allah el si erena aik, pia diksukum ning noutamak arye pil dosulule. Anyaik ara, ninye taruk arye talibuka kum domik. APia Teleb Aik, malye ning tonok babye kum ulul aik ara, Allah el dem aryuk kintinipdeibuk.

³ Allah ap, ninye ap, dana-dana ansinilina deiyok nang nirya ara, wibuka deibikcopura, Allah el si erena ati, teleb arin ning ap, tonda, ‘Ninye malye winin ning kum kipdeipnusil’ tenen, kam ning obuka arilbalamak ning ap, Allah ati arinyake. Aning ati ara, na nyapmasinye, nun ap Allah ap Ansinilina Deiyoknye babye, elce Allah ati, arepmanto ning ton ubuk.

⁴ Yesus ara, tukwak mutuku noutam akuk ulamtopura, elda Allah ap, ninye ap dana-dana ansinilina deiyoknye pil talibuka kum doptue. Ara, apil donyaka deiyok nang akunum wipdeiyamikba, daunyakce, Musa sekamuk yupu nyasilye touk, Allah el si erena ati, teleb ning arilbanyaka ati nyapsine. Ara, Allah arye, “Wininamlulume, aning ara kum wininamlulume,” nyapdeibukba, Musa arye sekeiyamsuk yupu noutamak arye, ‘Allah el si erena ati, aning arenamlulume,’ nyalul touk, anyaik pil don nang arye apil talibuka donyake. Ati, ‘Yesus tukwak mutuku tuba ulamtopura, apil talibuka kum doptue,’ nyapsine.

⁵ Allah ati arilbanyak deiyok nang, sik pil donyak aik, pia teleb aik noutamak ara, im deice mitik atonun ulul bukni, sik tukwak ning ara, talye winipmanto ninguk, keting kukia atonun ulule. Dipkoprop ning ara, im deice ning uka. Aning ati ara, Musa arye Allah el si erena ap, el arena ap ati, cang kain atonun ning arye, dolin aik tia tenda aik dopnuyuk talak ara, Allah arye Musa ati, ayupu nyabuk. ‘Sinai mutuku dup weleplumba, narye, “Anyaik urasin ara winibuka, winibuka dopnamlyame,” nyamkise touk, kanye moupmince moubuka dopnulyame, nyabuk.’ (Keluaran 25:40)

⁶ Allah ap, ninye ap dana-dana ansinilina deiyok nang, sik tukwak ninye arye pil donyak ning ap, sik pil don aik ap ara, winipmanto ning, kukia atonun ulul bukni, Yesus el pil ara, pia dipkoprop ning, weik mambul ning pil dolule. Aning atonun, Allah arye, “Na ap, ninye ap neika una ati, wininamlulume. Winipmunyopura, narye anggun melina ati winibuka wininamsine,” nyabuka, minop talak arye nyalilamuk yupu ara, mitik teleb ulamuk bukni, wini talak kintinipsuk nyalin yupu ara, weik mambul yupu ulule. Yesus ara, ayupu winiryuk nyalin yupu ati, Ansinilina Weik Deiyoknye ulule. Tonda, Allah arye winiryuk nyalin yupu nyapsuk ning ati, “Wininamsine,” nyabuka, nyalilamuk ning deiyok yupu ara, weik mambul ulule. Bukni, minop talak nyabuk ning ara, el deiyok yupu mitik mambuluk ulamuk.

⁷ Minop talak ara, Allah arye, “Wininamlulume. Winipmunyopura, narye winibuka melinamsine,” nyabuka, nyalilamsuk yupu, minyuma nyapdeibuk yupu, ninye malye winin ning sirya dakmanto ulamtopura, Allah arye, aminyan talak winiryuk nyalin yupu ton kum kintinipdeipsutue. Winiryuk nyali yupu kum patapsutue.

⁸ Bukni, minop talak ulamik ninye arye, Allah nyalamuk yupu batakuka malye winilamikba, Allah arye lik ubukba, ayupu ton nyabuk. Na Allah arye nyapsine. Aminyan talak ara, narye anggun Israel yala ninye ap, Yehuda yala ninye ap ati, “Wininamlulume. Winipmunyopura, narye winibuka melinamsine,” nyabuka, minop talak nyalilamsise yupu batakuka, winiryuk nyalin yupu ton nyapdeipnamsine.

⁹ Ura, anggun apu yapu Mesir mutuku noutamak ikin ulamikba, narye anggun taruk talibuka yuk mutuku bobinamsise talak nyapsise yupu atonun, kum unamle. Kume. Anggun apu yapu arye, na nyalilamsise yupu yanilamikce, bataklamnikba, anggunti narye urasin tamubuka, bataksise. Ati, minop talak nyalilamsise yupu atonun, aminyan talak kum nyalinamsine. Winiryuk nyalin yupu nyalinamsine. Na Allah Yahweh arye dipkoprop nyapsine.

¹⁰ Minop nyalilamsisi ning atonun kum bukni, aminyan talak noutamak arye, ninye ap na ap neika una ati, “Wininamlulume. Winipmunyopura, narye winibuka melinamsine,” nyabuka, anggun Israel ninye ati, nyalinamsin yupu ara ani. Ninye teleb una ati, “Wininamlulume,” nyasinye yupu ara, anggun kanye noutamak dongopnamsine. Dongopsinirye, anggun kanye talima noutamak sekeipnamsine. Nara, sik weik Ninye Deiyoknye Allah unyeba, na siuk erenamniyake. Sikda, na mapu unamake.

¹¹ Minop talak ara, na yupu kel kiyamik nang arye, ayupu kum kel kiyamik nang ati, peterelamik bukni, wini talak ara, tonoknye birye, el aik dam ululnye biti, “Allah ap talima dukdongobuka neika una ati, winipnulyam, winipnulyam,” nyabuka, tuba-tuba kum peterenamle. Aning atonun, tonoknye birye, el weit kopropa ati, “Allah ap, talima dukdongobuka neika una ati, winipnulyam, winipnulyam,” nyabuka, kum peterenamle. Kume, narye na yupu dobuka, anggun kanye talima noutamak dongopnamsina ati, weik mambul nang babye, pia mambul kum nang babye, anggun nirya ap, na ap talima dukdongobuka neika unamabe. Atalak ara, na mapu nirya kel kipra banamaka ati, sik kum peterelanamake.

¹² ‘Sik malye-malye wininyak ning nirya ara, kum kipreipnirye, namin kinamsine. Sik malye winin ning ara, kum daneipnye ning ara, ila tuba tonap kum tenenamsine. Wininamna ati, sik nirya arye nati kel kipnamniyake. Na Allah arye nyapsine, nyabuk.’ (Yeremia 31:31-34)

¹³ Ura, na kayapo, Allah arye ayupu nirya ati, “Winiryuk nyalin yupu nyapsine,” nyabuka deice arye kel kinyabe. Minop talak nyalilamsuk ning ara, winipmanto nyana ati, akunum pun dayukce malye ubuka anya arye, aning ara, akunum punupsuke. Minop talak nyalilamsuk yupu ara, tonap kum talibuka unamabe. Akunum pun dayuk ning ara, minyuma kum danamlarya. Winiryuk nyalin yupu akunum nyapmasila ati, aninguk talibuka unamabe, nyapsine.