Ibrani 7 - Eipomek

Allah ap, ninye ap, dana-dana ansinilina deiyoknye Melkisedek ati, nyabuk yupu

¹ Wini talak Melkisedek ati, ayupu nyapnusinye bira, Salem mutuku talyamukce weik ninye deiyoknye, Raja ulamuk. Tonda, aning-aning deice tam ulirye, Weik Mambulnye Allah, el pil dona ati, Melkisedek bira ninye ap, Allah ap, dana-dana ansinilina deiyoknye ulamuk. Ulamuka ani, Abraham bira yuk mutuku ninye deiyok nang obuka malye kibukabukce, tamubuka yayuk talak ara, eiprarikce, Melkisedek arye Abraham biti, “Allah arye teleb ulinamkile,” nyabuka, teleb yupu nyapdeibuka deice arye, Abraham ati teleb kipdeibuk.

² Teleb yupu nyapdeibukba, Abraham arye yuk mutuku deiyok nang obukabukce, sik bona ning weik dalubuka yayuka noutam arye, sepuluh persen (10%) bokukabikce, Melkisedek el si erena ati aribuk. Melkisedek el si deiyok ara ani. Malye una kum arye diksukum una deiyoknye ulamuka ati, el si Melkisedek nyalamik. Tonda, mutuku si Salem nyalamika deiyok ara ani. Ara, olana kum arye kanye deibuka telebuk una ati, asi ara Salem mutuku nyalamik. Ati Melkisedek bira, Salem mutuku deiyoknye ulamuka anya arye, el si Raja Salem nyalamika deiyok ara, elda kanye deibuka, teleb una deiyoknye ulamuka ati asi nyalamik.

³ Tonda, Melkisedek bira, el li ap, el lin ap, el yala nang ap, elce deibukba, dadeipdanin balamik ninye ap nirya ara, kel kum biklamike. Tonda, sikce el deibik talak ap, el dibuk talak ap ara, kel kum biklamik. Aning ati ara, Allah el Mi Kopropa arye ninye ap, Allah ap dana-dana Ansinilina Deiyoknye pia unamle touk, el Melkisedek babye, atonun ansinilina deiyoknye pia unamle.

⁴ Ura, anggun ton teneipdelulume. Melkisedek bira weik mambulnye ulamuk. Weik mambulnye ulamukba, nun apu Abraham arye, yuk mutuku deiyok nang obukabukce, sik bona ning weik dalubuka bopdakayayuk ning noutamak bokukabukce, Melkisedek el kina ati, yupa weik sepuluh persen (10%) aribuk.

⁵ Musa sekamuk yupu nyasilye touk, adeice arye kel kibupu. Allah arena deiyok nang, sik pil melina nang, sik Lewi yala nang ara, apil donyak talak ara, sik yuk yala nang nirya ati, “Anggun talilulum ning nirya noutamak arye, bokuka adiparyuk sepuluh persen (10%) arenamsulume,” nyanyake. Sikce Lewi yala nang ati, arinyak ninye nirya ara, sik apu Abraham ulamukba, sik ap, Lewi yala nang ap, sik du weit atonun unyak bukni, tuba sepuluh persen (10%) bokuka arinyake.

⁶ Lewi yala nang arye nyanyakba, sepuluh persen (10%) bokuka dolonyaka ara, kel bikupu bukni, anyapmasin anye Melkisedek bira, el apu kopropa ara, Lewi kume. El apu kopropa, Lewi kum ulamuka babye, Abraham arye el doprobuk ning bokuka Melkisedek kina ati, sepuluh persen (10%) aribukba, Melkisedek arye doprobuk. Allah arye, “Teleb ulinamkine,” nyabuka, nyalilamuknye, Abraham ati, Melkisedek arye aning doprobukce, teleb yupu nyapdeibukce, teleb kipdeibuk.

⁷ Aning nyapmasina ara, moubuka teneipdelulume. Nun kele. Weik mambul nang arye, anggun amu tam nang, mambul kum ninye ati, “Allah arye teleb winilinamsile,” nyabuka, teleb yupu nyanyaka deice arye teleb kilinyake. Ati laka upsile. Melkisedek bira weik mambulnye. Nun apu kopropa Abraham bira, mitik mambulnye.

⁸ Arub ara, Lewi yala nang arye yuk nang ati, sik talinyak ning bokuka 10% dolonyake nyapmana ara, sik Lewi yala nang ara, aminyan dipnamak ninye bukni, 10% dolonyake. Bukni, Melkisedek bira, Abraham ning bokuka 10% doprobuknye bira, Allah el yupu deice arye, “Anye bira tuba kam ulule,” nyasulule.

^9-10 Tonda, ayupu ton nyaptibye. Abraham ap, Melkisedek ap epdarikopura, Abraham arye el ning bokuka sepuluh persen (10%) aribukba, Melkisedek arye doprobuk talak ara, Lewi min kum deibik. Abraham bira, Lewi el apu kopropa ulamuka anya arye, elce deibukba dadeipdanin yangalamik nang arye, Lewi min kum deiyamika ati, ‘Abraham aribuka deice arye, aminyan talak deipnamiknye, Lewi birye aribuka’ tenen, nyaptibye. Aning ati ara, Lewi yala nang arye, yuk ninye talinyak ning 10% dolonyak bukni, ‘Sik apu kopropa Abraham arye Melkisedek ati, sepuluh persen (10%) aribuka deice arye, sik bidamang ton arebik’ tenen, nyaptibye.

“Lewi yala ninye pil dolamik ning deice arye, ninye teleb kibuka kum dipsitinge,” nyabuk yupu

¹¹ Allah ap, ninye ap dana-dana ansinilina deiyok pil dona ati, Lewi yala nang arye, Allah arena ati pil dolamik. Sik pil dolamika deice arye, Allah arye nyapdeibukba, Musa arye sekamuk yupu dobuka, Israel ninye arilamuk. Lewi yala nang arye, pil dopra balamika deice arye, ninye malye un ning kum daneipnirye, pia diksukum ulina ati, sikce pil dobuka sirya dakamsitingopura, yata ati, yuk yala ansinilina deiyoknye pataptuba, Allah arye areamsutu do? Kume, Lewi yala nang pil dolamika deice arye, diksukumuk kipdeiamsitingtoura, Allah ap, ninye ap dana-dana ansinilina ati, Melkisedek yala atonunye ton patapsutuba, kum yatue. Tonda, Lewi birye deibukba, dadeipdanin yangalamika ani, deibiknye Harun, el yala nang arye ton, ninye diksukum una ati, sirya dakeiamsitingtoura, Melkisedek atonunye ton patapsutuba, kum yatue.

¹² Ura, ansinilina deiyok nang punubikirye, yuk nang wibuka deibicopura, sikce nyanyakba, ninye nirya arye talibuka dobolbanyak yupu, mem yupu ton, pununyake. (Wini talak ara, nun ansinilina deiyoknye, winiryuk ning akunum yayuka ati, elce nyasiliba, talinyap yupu ara, winiryuk ning ton usulule.)

¹³ “Allah ap, ninye ap, dana-dana ansinilina deiyoknye, Melkisedek yala atonunye akunum yayuke,” nyapmasina ara, nun Weik Deiyoknye Yesus ati nyapsine. Yesus deipnamik yala ninye ara, Harun el yala nang kume. Yesus el yala yuk ulamuka ati, el yala ninye arye Allah ap, ninye ap dana-dana ansinilina pil talibuka pia kum dolamik. (Allah el si dona ati, keil pala yangabdiyamikak deice, Allah el arena ning, Yesus el yala nang arye pia kum arilamik.)

¹⁴ Aning ara, talye ati kum nyapsine. Laka upsiliba, kel kinyaba, deiyok ara, ani. Ara, nun deiyoknye Yesus ara, Yehuda yala nang arye deibik. Yehuda yala ninye arye, ansinilina deiyok nang pil dona ati ara, Musa arye ayala nang ati, yukubuka pia min wibuka delilamuk.

^15-16 Tonda, aning ton teneipdelulume. Arup nyapmasin yupu akunum laka upmasil bukni, pia lak koprop upliba, moubuka kel kinyaba, deiyok ara ani. Allah arye ninye lyena ati, kintinipsuk ning ara, winiryuk ning akunum arepsuke nyapsine. Ara, Allah ap, ninye ap dana-dana ansinilina deiyoknye, yuk yalanye bukni, Melkisedek arye, apil dolamuk atonunye, Yesus akunum yayuke. Elce ansinilina deiyok pil dolula ara, Musa arye, “Lewi yala nang aryuk apil donamake,” nyalamuk touk, ayalauk kum ulamuka deice arye, apil kum dolule. Yesus elda, kum dipmantonye, kam pia unamlenye ulula anya arye, pia kam unamle ning mikip deice arye, Allah ap ninye ap ansinilina deiyok pil dosulule.

¹⁷ Allah arye Yesus ati, Mazmur deice nyabuk yupu ara ani. “Allah ap, ninye ap dana-dana ansinilina deiyoknye, Melkisedek arye pil dolamuk touk, anda el yala atonunye umince, Allah ap, ninye ap dana-dana ansinilina deiyoknye pia unamlame, nyapkine.” Allah arye nyabuk. (Mazmur 110:4)

^18-19 Minop talak arye, “Lewi yala ninyeuk Allah ap, ninye ap dana-dana ansinilina deiyok nang uptinge. Yuk yala nang ton kume,” nyapdeibuk yupu ara, Allah arye, ila tuba tamubuka akunum punubuk. Minop yupu batakukabukce, winiryuk ning punubuka deiyok ara ani. Ara, Musa sekamuk yupu kekebuka dobolbalamika deice arye, aning-aning nirya aubuk bukni, malye winin ning tonok ning babye kilibukce, teleb kum kipdeibuk. Ati, ayupu ara, ninye teleb ulina ati ara, mikip kum ulamukce, nong kum ulamuk. Mem yupu talibuka winilamika deice arye, diksukum ninye kum ulamik. Talyauk ulamik. Aning ati ara, Allah arye minop ning batakuka winiryuk ning tamubuka punubukce, winiryuk yupu akunum arepsuke. Ara, ‘Allah arye lyepnamsil’ tenen, diba tenebibirye, nun kanye Yesus el deiceuk deibibirye, dinauk unamaba ati nyapsine. Allah arye nunti, awiniryuk nyalin yupu kintinipdeipsukba, diba tenebibya deice arye, Allah ap talima dukdongobuka uptibye. Mem yupu talinyaba deice arye, Allah ap talima dukdongobuka kum uptibye.

²⁰ Tonda, Allah ap, ninye ap dana-dana ansinilina deiyoknye, winiryuk kintinipsuknye bira, talya ati deiyok kum kibuk. Allah arye, nyalilamuk yupu nyabuka deiceuk deiyok kibuk. Yuk nang ara, Allah ap ninye ap, dana-dana ansinilina deiyok nang, deiyok kouna ati, nyalin yupu kum uamuk bukni, sik Lewi yala winilamika deice aryuk deiyok kilamik bukni, anye bira kume.

²¹ Narye nyapmasinye, nun winiryuk ansilina deiyoknye Yesus ara, Allah arye ayupu nyalilamuka deice arye deiyok kilamuk. Allah arye anye biti nyabuk. ‘Nara, Allah arye anti, akunum nyapdeipmakin ati, na kanye tonap kum tamupnamne. Narye akunum nyapkine. Anda Allah ap, ninye ap dana-dana ansinilina deiyoknye pia unamlame, nyapkine. Allah arye nyabuk.’ (Mazmur 110:4)

²² Allah arye Yesus ati, ayupu nyalilamuka ati ara, nun kele. Allah ap, ninye ap, talima dukdongobuka neika una ati, Allah arye, winiryuk bisik kintinipsuk ning ara, pia telebe. Minop talak nyapdeiyamuk ning ara, mitik telebe uka. Allah ap, nun ap neika una ati, nun ansinilina deiyoknye Yesus ara, Allah arye akunum kintinipdeipsuka ati, ‘Aning ara, dib unamsil do, tilila do?’ tenen, kum teniptoptibye. Dipkoprop nong upnamle. Yesus elcuk nun diba tenenyap ninye ati, lyepdopnamsile.

²³ Ura, yuk yupu ton nyapnusine. Allah ap, ninye ap, dana-dana ansinilina deiyok nang ulamik ani, ton nang deiyamikba, sik pununa ati, yuk nang ton wipdeiyamik. Apil dolamik nang ara, dipnauk ulamika anya arye, apil ara, pia tuba-tuba kum dopmanto ulamik. Ati, apil dona deiyok nang weika arye wililamik.

²⁴ Bukni, Yesus ara, kum diptua anya arye, kam pia unamle. Allah ap, ninye ap, dana-dana ansinilina deiyoknye pil donamsil ning ara, pia wininamsile. Allah ap, nun ap, ansinilina pil dosilya ara, pia kum kum danamle.

²⁵ Yesus ara, pia kam unamla anya arye, ‘Allah ap talima dukdongobuka unamap’ tenen, Yesus ati diba tenebuka, el deiceuk Allah el dam yanamak ninye nirya ara, Yesus arye pia lyebuka sirya dakasulule. Ninye lyena pil ara, etekdop asa ubuka don pil dosulule. Tonok ning babye kum batakalule. Winisilya deiyok ara, ani. Ara, pia kam ulirye, elti, diba tenenyak ninye ara, ‘Allah arye, elti, diba tenepce ninye melinamle’ tenen, Allah dam bilirye, yupu pia melibuka nyalule. Nun melina ati, Allah ati tuba morosulule.

²⁶ Ura, nun malye winin ninye kum melipdanmanto unyaba ati, nun patasilye touk, anye birye melibuka lyesulule. Allah ap, ninye ap dana-dana ansinilina deiyoknye, nun deiyoknye Yesus ulul ning ara ani. Elda, pia malye una kumnye ulul ati, malye winin ning tonok babye kum winilule. Elda pia malye una kumnye ulya ati, sik malye winin ninye yuk, el pia yuk ulule. Aning-aning nirya outam aubuk bukni, Allah arye Yesus dobuka, im deice tam erebuka deibukba, weik mambulnye ulule.

²⁷ Ura, yuk tukwak ninye bukni, Allah ap, ninye ap ansinilina deiyok nang pil dolamak nang arye winilamak touk, Yesus ara, aning atonun kum ulule. Sikda, ‘Allah arye nun malye wininyap ning kum daneipnamsile’ tenen, kam ulamle ning obuka, Allah el kanye namin kina ati, asum-asum nirya obuka arilyanganyake. Ara minyuma ara, sik babye malye wininyak ning ap, aminyan ara, yuk nang malye wininyak ning ap, ‘Allah arye kum kipdeipnusil’ tenen, kam ning obuka, asum-asum nirya arilyanganyake. Bukni, Yesus ara, aning atonun pia kum winilule. Yesus arye, tukwak ninye nirya, sik malye winin ning kum kilina ati, el babye, el bidamang nong dobuka, Allah ati arepdayukba, sik malye nang arye el Yesus obika deice arye, tonok talak deice aryuk akunum lyepsukce teleb kipdeipsuke. Nun malye winin ning kum danalina ara akunum sirya daksukce pil dopsuke.

²⁸ “Nun malye unyaba, patasilye touk melibuka lyesulule,” nyapmanu ara, deiyok ton ani. Ara, Musa sekamuk yupu deice arye nyalul touk, ‘Allah ap, ninye ap ansinilina deiyok nang kibuka apil donamak’ tenen, wibuka delinyake. Bukni, anang ara, sik babye tukwak nang anya arye, malye winipmanto nang ton unyake. Bukni, Musa sekamuk yupu, mem yupu akunum aribukba, daulamuka ani, keting tamun yupa weik akunum ubukba, aminyan ara, Allah arye, el winiryuk nyalilamsuk yupu deice arye, el Mi Kopropa wibuka deibukba, nun ap, Allah ap, ansinilina weik deiyoknye usulule. Yesus ara, malye winin ning kum winipmantonye ulule. Allah arye elti, pia teleb updeibukba, malye winin ning tonok babye kum winilule ati, pia telebnye ulule.