Ibrani 6 - Eipomek

‘Nun talima wisipnamsil’ tenen, Allah el yupu noutamak ning ara, dolonamaba ati, nyabuk yupu

¹ Aning ati ara, na kayapo, Kristus kel kina ati, Allah yupu noutamak bukni, deiyok yupu deiyok kounamaba ara, akunum kel bikibirye, ‘Nun kanye talima wisipnamsil’ tenen, minopce kel bikuka bikatabibirye, yuk ning ton, weik mambul yupu ton kel kipnin banamabe. Ura, aik dopnuce talak ara, minyuma ayukumna yo akunum ikikirye, ila tuba tonap kum iklamak touk, Allah yupu deiyok ning bukni, deiyok kounamaba ara, ila tuba tonap tamubuka kum kel kipnin banamabe. Ayupu deiyok kouna ati nyapmasina ara, nukuka nyapnusine. Ara, ‘Malye tuba-tuba winilamibiba, Allah arye wenebuka opsilyak’ tenen, malye winin ning batakna yupu ap; Allah ati, diba tenena yupu ap;

² diba tenebikceura, mek dongona ati, lak len yupu ap; ninye nong deice taruk tatang deibikirye, ninye kwetena yupu ap; akunum diamik ninye kam buknamak yupu ap; sirya talak ara, Allah arye, tukwak ninye nirya yupu lepsisikuka boksilirye, malye winin ninye oplopnamle nyana yupu ap; ayupu nirya ara, deiyok kouna yupu ati nyapsine.

³ Ati, ‘Allah arye melisilyeba, ayupu nirya kel bikuka sengabibyopura, yuk weik mambul yupu, nong noutamak tonap, kel kipra banamap’ tenen, nyapsine.

Diba tenyamik ning bukni, ‘Anirya batakuka, malye ubicak’ tenen, nyabuk yupu

⁴ Ura, yata ninye do nirya, sik diba tenenyak ning nirya akunum batakikcopura, yata wiribuka arye, tamubuka bobitibyopura, ila tuba tonap, sik malye unyak ning ati bataktingce, urasin tamupting do? Kume, aning ara, kum winipmanto. Minop arye, kunukna akuk ulamik bukni, Allah el dirina dobuka sik talima noutamak aribukba, doprobikce el ulamle ning kel kiyamik. Tonda, Allah arye arisilye ning doprobik. Tonda, Allah arye el Dib Kanye aribukba, sik ton doprobik.

⁵ Tonda, Allah nyasilye yupu kekelamikce, sik babye, ‘Aning ara, pia teleb’ tenen, kel kiyamik. Tonda, diba tenelamik talak noutamak arye, Allah arye, nun talima talisilye talak nirya mikip arye, pil dosilye ning babye kel kilamik.

⁶ Aning nirya kel kilamik bukni, sik diba tenelamik ning nirya ila tuba, tonap batakikcopura, ila tuba tonap, sik malye winin ning tonap, kum bataktinge. Ara, kum winipmanto. Sik diba tenelamik ning batakikirye, malye winin ninguk talibuka unamake. Deiyok ara ani. Ara, sik diba tenelamik ning batakikce deice arye, Allah el Mi Kopropa dobuka wanwanun yo deice obik ning atonun, ila tuba tonap wininyake. Tonda, wininyaka deice arye, el nong deice malye ning deibikcopura, yuk talye nang arye Kristus ati, ‘Elda mambul kume’ tenen, dopnilibuka lyab-lyab anyake. Ati ara, minyuma talak diba tenebik ning, ila tuba ton akunum batakikcopura, ila tonap, sik malye winin ning batakuka diba kum teneptinge. Malye winin ninguk talibuka wininamake.

⁷ Wininyak ninye ati ara, domon yupu deice arye, ayupu ton nyapnusine. Atalak-atalak nirya mok ceplirye, tuku deice sakuka, tuku pum bisik weklyopura, aminyan ara, atuku teleb ak arye, wa winyak ninye arye dipmanto ning, dobuka linyake. Teleb ning moulamle tuku ara, Allah arye atuku ati, teleb ulilule.

⁸ Bukni, taca ning ap, tirmangka weiyang-weiyang ap palamle tuku, malye tuku ara, ninye arye dipmanto ning pia kum mouptua ati, Allah arye atukwak ati, kum danaeipmanto ulule. Aminyan sirya talak ara, atuku nirya ara, uku dopkwetepliba diplirye, sirya daknamle.

⁹ Ura, arup nyapmasin yupu aupmala ati, na kayapo anggunti pia bico tuba tenesunune. Anggunti ara, na kele. Anggunda malye winina kumce, Allah arye akunum lyepsuk ninye ati ara, teleb winilamak touk, teleb ubuka wininamlume.

¹⁰ Allah arye, nun teleb asa wininyap ning ati, tuba tenesilirye, nun wininyaba atonun, yupu lepsisikuka bogolisulule. Deiyok kum upmalibuk, talye ati, kum wenesulule. Ura, anggunce teleb pil dolulum ning nirya ara, kum luba kipnamsile. Sikce elti, diba tenyamik ninye, el mapu ati, bico tenebuka melilamlum ning ap, tuba melilulum ning ap, adeice arye el Allah ati, talima arilulum ning ara, tuba tenesulule.

¹¹ Apil dolulum touk, wini talak arye dipdongobuka doryanamle talak nirya ara, pia pi dobuka, pil teleb ubuka dolamunya ani, sirya dakanamlume. Wininamluma deiyok ara, ‘Allah arye lyepnamsil’ tenen, diba tenebuka dilamunyani, ‘Aminyan ara, dipkoprop nong upnamsile. Allah arye dipkoprop lyepropnamsile’ tenen, pia batakna kumce talibuka unamlulume.

¹² Nunce anggunti, ‘Sikda lik uplyeba, pil nirya batakuka, talya-talyauk winipmunyak’ tenen, kanye moubuka unamlulume, nyasinyabe. Aning ara kum bukni, ton nang ara, diba tenena ap, minyuma batakna kum arye, pia pi dobuka, pil dona ap deice arye, pil dopra balamikca ani, aminyan talak, ‘Allah arye nyalilamuk ning dipkoprop dololamak touk, anggun atalak ululum ninye babye, anggun ton dopropnamlulum’ tenen, nyapsine.

“Allah arye nyalisilye yupu nirya ara, kum tamubnamle. Dipkoprop nong winipnamle,” nyabuk yupu

¹³ Ura, yuk yupu ton nyapnusine. Allah arye, nun apu kopropa Abraham biti, “Winipnamkine,” nyabuka, yupu nyalilamuk talak ara, ‘Abraham birye diba tenepnunil’ tenen, Allah arye el bidamang si ap, tabakuka nyabuk. El si nyabuka ara, elda aning-aning deice tam, weik mambulnye ulula anya arye, yuk si tabakuka kum nyapmanto. Weik ning ara, el si koprop uka. Allah arye nyabuk.

¹⁴ Allah arye Abraham biti ayupu nyalilamuk. Ayupu ara ani. ‘Na Allah arye anti, dipkoprop teleb ulikinyeba, ance deipminba, dadeipdanin balamikca ani, dordeipri banamak mapu ara, yupa pia weik delinamak, nyapkine.’ (Kejadian 22:17)

¹⁵ Allah arye anyalin yupu nyapdeibukba, Abraham kekebukce, ‘Dip do, tilila do?’ tenena kum bukni, ‘Allah arye nyalilamnuk yupu dan talak arepnamnil do?’ tenen, pia darapdongobuka, nimalye arye dipra daulamuka ani, aminyan talak Allah arye nyalilamuk touk, aning aribukba, Abraham arye doprobuk.

¹⁶ Ura, Allah arye el si ap, tabakuka nyabuk ning ara, deiyok ani. Ara, anggun kele. Ninye arye, “Wininamabe,” nyabikce talak ara, yuk nang kekebikirye, ‘Dip do, tilila do?’ tenebikirye, ‘Yupu deice wapdacak’ tenen, yupu sekelongona ati, weik si ap tabakuka nyanyake. ‘Amambul si deice arye nyapsine,’ nyanyake. Weik si ap deice arye nyabikcopura, sik kekece ninye yupu walana kum diparyuk, weik si ap kekekca deice ara, ‘E, aning ara, pia dib nyapmasiyake,’ tenebikirye, diba tenenyake.

¹⁷ Winilamak touk, Allah babye atonun winibuk. Ara, Allah arye “Wininamsine,” nyabuka, nyalin yupu nyapdeibuk talak ara, utenebuk. ‘Narye nyalinman yupu nyapniba, kekebuka, aminyan talak aning dopronamak ninye arye, moubuka kel kipnuyak’ tenen, el si deice ap, tabakuka nyabuk. Ara, elce, “Wininamne,” nyabuka, nyalilamuk yupu deiyok ning ara, urasin yuk kum tamupmanto ati, elce nyalul touk, dipkoprop unamle. ‘Moubuka kel kipnuyak’ tenen, el si kopropa deice arye nyalin yupu nyabuk.

¹⁸ Allah arye, “Wininamsine,” nyabuka, nyalilamuk yupu ap, el si kopropa deice arye nyabuk yupu ap ara, urasin yuk pia kum tamupmanto, elce nyabuk touk dipkoprop unamle. Allah arye aning bitinye ati, tilila yupu kum nyaptua anya arye, dipkoprop wininamle. Allah arye, ayupu bitinye deice nyapsuk ning deiyok ara ani. Ara, sikce, ‘Allah dipkoprop lyepnamsil’ tenen, diba tenebuka dinauk unyak ninye ara, ayupu kekebikca deice arye, talima kwa dipsilyopura, kanye teniltona kum unamake. ‘Allah arepsiliba, dopronamak ning, batakna kumce pia moubuka talibikirye unamak’ tenen, nyapsine.

¹⁹ ‘Allah arye lyesulule’ tenen, diba tenebuka dinauk unyaba deice arye, nun kanye bokoltona ap, ilil una ap pia kum diparyuk, kanye deibuka, batakna kumce pia talibuka unyabe. Nun kanye talima ara, ‘Dip do, tilila do?’ tenen, kum teniltonyabe. Aning kum bukni, Yesus ati, ‘Nun Lyenanye usulule’ tenen, nun kanye talima Yesus el deiceuk delinyabe. Yesus ara, Allah el ulyak im deice pia teleb noutam aik akunum wekelbiyuk. Allah el arena ati, minop talak baju aik dopra balamik ning noutamak wilibuka domik aik ara, talye nang ton kum wekmanto ak ati, anyaik dana-dana noutamak ara, baju arye lapkwetebuka wilyamike. Aning atonun bukni, im deice ning ara, anyaik noutamak talye nang kum wekmanto ak bukni, Yesus arye nun melina ati, Allah el dam wekelbiyuk ning ara, talye lukparabuka noutam aik, pia teleb aik wekuk.

²⁰ Yesus ara, Pia Teleb Aik menekuka biyuk ning ara, nun lyena ati wekuk. Ura, Yesus ara, Allah dantam, ninye dantam, ansinilina weik deiyoknye akunum upsuke. Ara, Melkisedek arye apil dolamuk touk, Yesus ara, Melkisedek el yala atonunye ubukce, Allah ap, nun ap, teleb kibuka neika una ati, ansinilina deiyoknye pia unamsile.