Ibrani 5 - Eipomek

Allah arye, “Elda Allah dan tam, ninye dan tam Ansinilina Deiyoknye unamle,” nyabuka, Yesus wibuk ati, nyabuk yupu

¹ Ura, tukwak unyak ninye bukni, ‘Allah dantam, ninye dan tam ansinilina deiyok talibuka pil donamsiyak’ tenen, ninye kan-kan arye ninye arye wibuka delinyake. Ara, anang arye, ‘Nun ap, Allah ap, teleb ubuka neika una ati, pil melibuka donamsiyak’ tenen, wibuka delinyake. Tonda, anang arye, ninye melina ati, Allah arin ning arinyake. Ara, sikce Allah el si erena ap, si kina ap ati, talye arin ning arinyake. Tonda, ‘Ninye malye un ning, kum daneipsitue’ tenen, kam ning obuka, Allah ati, arinyake.

² ‘Apil-afil nirya donamak’ tenen, wibuka delinyak nang ara, sik babye mikip kumce mitang asa unyakce, malye winipmanto nang unyaka anya arye, yuk ninye walwal arye, yuk malye bisik kirikuka banyakba, anang namin asa arye, sik yuk ati, “Teleb un bisik ani,” nyabuka lipsisikilinyake.

³ Apil deiyok nang arye, sik babye kanye talima mikip ara, mitang asa nanguk unyaka anya arye, sik bidamnye malye unyak ning kilina ati, kam ning obuka Allah ati arinyake. Tonda, yuk ninye nirya, sik malye unyak ning kilina ati, kam ning obuka Allah arena ati, uku dongolyanganyake.

⁴ Ura, yatanye, el kanye aryuk, ‘Narye Allah ap, ninye ap ansinilina pil deiyoknye unamne,’ tenepturye, apil talye luparabuka doptu do? Kume, aning kum wininyake. Aning ara, kum winipmanto ati, Allah arye, ‘Harun biti apil donamle’ tenen, Harun yukubukce wipdeibukba, pil dolamuk touk, Allah arye tenelye nanguk, yukuplyopura, anang arye apil talibuka donyake.

⁵ Aning ati ara, Kristus babye, ‘Na kanye aryuk, ninye dantam, Allah dantam, ansinilina pil talibuka, weik mambul pil deiyoknye unamne,’ kum tenebuke. Aning kum tenebuke bukni, Allah arye Kristus, el erebuka delina ati, yukubukce nyabuk yupu ara ani. ‘Anda, na Mi Kopropa ulyame. Nara, an Ni Kopropa aunune, Allah arye el mi ak nyapdeiyamuk.’ (Mazmur 2:7)

⁶ Aning atonun, yukak ton Allah arye ayupu nyabuk. ‘Allah dantam, ninye dantam, ansinilina deiyoknye Melkisedek arye pil dolamuk touk, anda, el yala atonunye umince, apiluk talibuka, pia donamlyame. Allah arye nyapdeiyamuk.’ (Mazmur 110:4) Ati, Allah arye Kristus ati, arup nyapmasin yupu deice yukubukce, ereibukba Kristus birye nun tukwak ninye ap, Allah ap, ansinilina deiyok pil dosulule.

⁷ Yesus ara, tukwak mutuku noutamak ulamuk talak ara, elce el dipnamuk ning ati tenebukce, el lyepmantonye Allah ati morobuke. Elce morobuka ara, “Naie, ance melipnilyame,” nyabuka, asing maka deice ap, weik malye nyana ap deice arye morobuke. Morobukce, el Yesus ara, ‘Allah ara, weik mambule anya arye, elti, si kipnirye, el amutamuk pia unamne,’ tenelamukce, talima naminye ulamuka ati, Allah arye, Yesus morobuk yupu kekebukce melilamuk.

⁸ Yesus ara, Allah el Mi Kopropa ulul bukni, el nong deice ikin ning weik ulamukba, donmok deice, ‘Allah arye tenelye touk, aninguk kekepnirye, aninguk talibuka unamne’ tenen, kel kilamuk.

⁹ Kel kilamukba, Allah arye Yesus ati, kam bukeibukce, akunum pia teleb ubuka deibukba, el Yesus ara, Ninye Lyena ap, Pia Kam Una ap, Deiyoknye ubuk. Ninye Lyena Deiyoknye usilya ara, talye nang ati kum bukni, ara el nyasilye yupu kekebuka, aninguk talibuka, moubuka dobolbanyak ninye ati usulule.

¹⁰ Tonda, Allah arye Yesus ati, wibukabukce, “Anda, Allah dantam, ninye dantam, Ansinilina Deiyoknye unamlame. Ara, Melkisedek arye apil dolamuk touk, apiluk talibuka pia donamlyame,” nyabukabukce, Yesus wibuka deibuk.

“Allah el yupu deiyok koun ninguk, nong bol deiceuk kum bukni, weik noutamak kel kina telebe,” nyabuk yupu

¹¹ Ura, na kayapo, arup nyapmasin yupu ati, yuk yupu tonap dukdongopnirye, weik anun laka nyabuka peterepsitinye bukni, anggunda, nimalyap aryuk kel kiluluma anya arye, ‘Anggun kekepmanto ning ara, yata wiribuka arye laka nyabuka, lakoprop nyapsitinye do?’ tenen, ikin unulule.

¹² Ura, aning ara talye kume. Minop arye diba tenelamluma anya arye, wini talak teleb ning ara, anggunda peterena deiyok nang akunum winipmatum bukni, anggunda kabula. Tuba patasilye ning ara, yuk kel nang arye, Allah yupu noutamak ulye deiyok yupu, deiyok kinyak ning uk, kanam asa aryuk kekepmanto ning ara, ila tuba tonap peterepsitingiba, kel kiptume. Moum dinmapu arye, tup ning kum dilamak talak, moum yung tuba patalyeba, dilamak touk, anggunda, Allah yupu weik mambul nong noutamak ning ara, min kum kekebuka doproptume. Anggunda, nong bol deiceuk tuba patasulule.

¹³ Yata ninye do nirya, sik moum dinmapu atonun tuba unyak ninye ara, moum yung atonun yupu, bol deiceuk dolonyak nang ara, malye winin ning kum diparyuk, pia diksukum winin ning ara, min kum kel bikinyake. Ara, Allah yupu nong noutamak yupu atia. Anggunda moum dinmapu atonun tuba umunya anya arye, aikin yupu ara, ‘Deiyok ani’ tenen, moubuka kum kel kiptume. Kabula.

¹⁴ Bukni, Allah yupu pia nong noutamak, tup ning atonun ning ara, talima akunum wisibuk ninye arye, kekebuka doproptinge. Aninye ara, atalak nirya, pia moubuka tenekirye, diksukum unyaka deice arye, ‘Aning malye, aning teleb’ tenen, dipkoprop teleb kibuka wibikirye, kel bikinyake.