Ibrani 4 - Eipomek

Allah arye, “Na mapu ara, na ap, sik ap neika dikdik sena ati, kintinipdeipsi mutuku ara, dolonamake,” nyapsuk ning ati, nyabuk yupu

¹ Ura, na kayapo, Allah arye el mapu nirya ati, “Na ap, neika dikdik sena ati, kintinipdeipsise mutuku ara, dolonamlulume,” nyabuka, nyalilamsuk yupu tuba aupmasila anya arye, aning ati ara, kanye moubuka unamabe. Ara, aminyan talak nun kan-kan arye tonoknye ati do, tonok kil ati do, Allah arye, “Kume, aninye ara, na nyamse touk kum wininyaka anya arye, na ap neika dikdik sena ati, kintinipdeipsi mutuku ara, kum dopdoptinge,” nyabuka, ‘Yupu lepsisikuka bokeipsilyak’ tenen, kanye moubuka unamabe.

² Ura, sik minop talak diba kum tenyamik ninye ara, yuk nang arye, Allah el yupu dobuka peterelamikba, ayupu kekelamik bukni, ayupu ati diba kum tenyamika anya arye, talye amul deiceuk kekeltaklamika ati, nong kum uamuk. Sikce diba kum tenelamika ati, Allah arye dikdik senak teleb mutuku kintinipdeibukak kum wekik. Ati, nun babye atonun, yuk nang arye Allah yupu peterelamsikba, kekelamubu bukni, ‘Sik minop tam ninye diba kum tenyamik touk winibibyak’ tenen, kanye moupnamabe, nyapsine.

³ Ura, nun akunum diba tenenyap ninye ara, Allah arye nyalilamsuk atonun, dikdik sena ati, kintinipsuk mutuku ara, wekenyabe. Allah arye nyabuk ning ara ani. ‘Malye winilamik ning ati ara, yu weik ulamnuk talak ara, ayupu ton nyapse. “Atalak malye unyak ninye nirya ara, na ap dikdik sena ati, kintineipsi mutuku ara, pia kum dolonamake,” nyapse. Allah arye, Israel ninye ati nyapdeiyamuk.’ (Mazmur 95:11) Allah arye ayupu nyabuk bukni, ayupu nyabuk talak ara, elce aning-aning nirya memebuka, sirya dakuk talak arye ayupu nyabuk. El pil nirya akunum sirya dakukce ayupu nyabuk.

⁴ Ura, Allah yupu noutamak bukni, yukak ara, Allah arye dikdik sen sum, like tekbarye sum ati, ayupu tonap nyabuk. ‘Allah ara, like tekbarye sum deice arye, pil dopra balamuka ani, Allah arye, el pil sirya dakuka ati, tekbarye sum akunum ubukba, pil tonap kum dobuk. Dikdik sebuk.’ (Kejadian 2:2)

⁵ Tonda, arup nyapmasin touk, Allah arye nyabuk ning ara, tonap nyapsine. Ara, “Na ap neika dikdik sena ati, kintineipsise mutuku ara kum dolonamake nyapse,” Allah arye nyapdeiyamuk.

⁶ Ura, minop talak ara, yuk nang arye, Allah arye el pia teleb lake lelin yupu peterelamikba, sik ayupu kekelamik ninye ara, diba kum tenyamikce, Allah el yupu yanilamika anya arye, Allah arye dikdik sena ati, kintinipdeibukak, teleb mutuku kum weklamik. Sik minop talak diba kum tenyamik ninye kum weklamika ati, yuk nang arye, adikdik senak kintinipsuk ning ara, aminyan talak weknamakca.

⁷ Aning ati ara, nun kele. Allah arye tenyamuk touk, tonok talak wibukabukce, atalak ati, “Asum,” nyabuka si dobuk. Asi nyabuka, “Asum,” nyabuk talak ara, sik Israel ninye malye ulamik talakuk kume. Aning ara, keting tamun yupa weik akunum upra balamuka ani, Allah arye, Daud sekamuk yupu deice arye nyabuk. Daud birye sekamuk yupu ara, arup akunum nyapmasin bukni, ayupu tonap nyapsine. Ayupu ara ani. ‘Asum ara, na Allah arye yukubsiniba, na yupu kekepnumunyopura, anggun apu yapu malye winilamik touk winina meme. Ara, lik upsilyeba, pi dobuka, ‘Diba kum tenenamabe,’ tenebuka, kum wininamlulume. Minop talak anggun apu yapu ara, lik ubukba, na Allah ati, ‘Nun like,’ tenyamnikce bataknike. Sik winilamik touk kum wininamlulume. Allah arye nyapdeiyamuk.’ (Mazmur 95:7-8)

⁸ Ura, Allah arye, “Na ap dikdik sena ati, kintinipdeipsi mutuku ara, yuk ninye ton dopdobikirye, weknamakca,” nyapmasunu ara, talye ati kum nyapsine. Yosua bira menekuka balamukba, Israel ninye arye, adikdik senak akunum weknamtingtoura, Allah arye aminyan talak noutam arye, yuk sum ati yupu kum nyapdeiyamtue.

⁹ Bukni, Allah arye, aning nirya akunum ubukba, aminyan talak tonap, “Asum ani,” nyabuka anya arye, adeice arye kel kinyabe. Allah el mapu ati, dikdik sena kintinipsuk mutuku ara, tuba aulyeba, dolonamake. Ara, Allah arye like tekbarye deice arye, pil dopra balamuka ani, tekbarye sum akunum ubukba, dikdik seamuk touk, adikdik sena atonun ton, tuba aupmasile. Allah ati diba tenenyak ninye arye, adikdik senak weknamakca.

¹⁰ Allah arye dikdik sebuk atonun nyapmana ara, laka nyapnusine. Ara, Allah el pil dolamuka ani, sirya dakukopura, dakukce dikdik sebuk touk, yata ninye do nirya, Allah arye dikdik sena ati, kintinideipsuka dolonyak ninye arye, sik pil donyak babye batakikirye, dikdik senamnyake.

¹¹ Aning ati ara, na kayapo. ‘Nun nirya ara, Allah arye dikdik sena ati, kintinipsuk mutuku ara, neika dolonamabe’ tenen, pia pi dobuka, pirilenamabe. Ara, sik Israel ninye lik ubukba, Allah yupu yanilamik atonun, ‘Nun kan-kan arye, tonoknye babye winiplya deice arye, Allah el dikdik sena kum dopropmanto uplyak’ tenen, nyapsine. Ati, pia kalikdabirye, pirilenamabe.

¹² Ura, yuk yupu ton nyapnusine. Allah arye nyasilye yupu ara, pia kam una deiyok ning ulule. Kam ulirye, pil dosiliba, nong kinamsile. Urtalya ati kum ulule. Parang ya ara, dana-dana tam ketebikcopura, el si ara, mitik tonun ulul bukni, Allah el yupu ara, ya taja atonun, el yu weik ulule. Nun yok ap, yok noutamak ulul ning, yumca ap, yu weik parang ya arye, dana-dana wilibuka tiksutu touk, Allah el yupu ara, yu weik ulirye, ninye nong noutamak ara, nun kanye tenena ap, nun talima ap, dana-dana wililisulule. Winilula ati, nun kanye talima noutamak tenepye ning babye, ‘Aning teleb, aning malye’ tenen, yupu lepsisikuka bokolisulule.

¹³ Yata ning do nirya, Allah arye kintinipdeiyamuk ning nirya ara, pia kum duknupmanto. Allah arye aning-aning nirya ati, pia dilule. Baju arye singipdongopmakce ning auplyeba, abaju dopdobikcopura, laka ulamle touk, Allah arye aning-aning nirya lak akuk dilule. Aning-aning nirya dilinye Allah ati, nun wininyap ning nirya laka nyabibyeba, elce kekebuka dipdesilirye, “Aning teleb, aning malye,” nyabuka, yupu lipsisikuka bokeipnamsile. Nun wininyap ning nirya ati, Allah el dam laka nyabibyeba, dipdesilirye, yupu lipsisikuka bokeipnamsile. Tonok ning babye kum duknuptibye.

“Allah dan tam, ninye dan tam, Ansinilina Deiyoknye bira, Yesus el uka,” nyabuk yupu

¹⁴ Allah dan tam, ninye dan tam ansinilina deiyoknye bira, Yesus eluk ulule. Weik mambulnye Yesus ara, Allah el Mi Kopropa ulule. Elda Allah el ulyak im deice noutamak akunum biyuk. Aning ati ara, nunce diba tenebuka, ninye kekenyakak arye, laka nyanyap yupu nirya ati, batakna kumce, pia talibuka unamabe. Batakna kum diparyuk, diba tenebuka unamabe.

¹⁵ Narye, “Nun diba tenenyap ning ara, batakna kumce pia talinamabe,” nyapmasina ara, talye ati kum nyapsine. Nun tukwak unyap ninye mikip ara, mitang usilye ning ara, ‘Yesus elda nun kum biksuturye, ‘Se’ tenen, bico kum tenepnamsitunye ulule,’ tenena meme. Isa Mutuku Dongonye arye nunti, ‘Malye winipting’ tenen, talima lilosulul ning nirya ara, Yesus babye atonun, el talima lilolamuke. Isa Mutuku Dongonye arye Yesus ati, ‘Malye winiptue’ tenen, talima lilolamuk bukni, Yesus elda malye winin ning tonok ning babye ton kum winilamuk. Tonda, Allah dantam, ninye dan tam ansinilina deiyoknye bira, Yesus eluk usilule. Aning ati ara, Yesus nun weik deiyoknye birye, nun ikin usilye ning ara, akunum kel kisilirye, bico tenesulule. Nun mitang usilye ning ara, melibuka mikip kilisulule.

¹⁶ Yesus arye, nun kanye talima mitang usilye ning ara kel kisilirye, bico tenesulula anya arye, nun ilil una kum arye, ‘Dipkoprop melipnunile’ tenen, Allah el kanye aryuk bico tenesilirye, melisilinye bira, elti, talye lukparabuka moronamabe. ‘Diba’ tenen, moronamaba ara, talye ati kume. Ara, nun ikin usilye talak noutamak nirya ara, Allah arye talye luparabuka oplopsutu bukni, aning kum usulule. Winina kum arye, ‘Kekepsilirye, nun patasilye touk bico tenebuka, el kanye aryuk talye luparabuka melinamsil’ tenen, nun ni Allah ati moronamabe.