Ibrani 3 - Eipomek

“Yesus ara, weik mambulnye ulule. Musa ara, mitik mambulnye ulule,” nyabuk yupu

¹ Arup nyapmasin yupu nirya aupmala ati, anyapnusin yupu babye kekenulume. Isa Mutuku Dongonye arye, nun tukwak ninye ati, ‘Malye winipting’ tenen, talima lilosululba ikin asa unyap talak ara, ‘Nun du kopropa Yesus arye, melinamsil’ tenen, eltibuk diba tenebuka tenenamlume. Na kayapu, Allah arye wibsukba, elti, diba tenelulum ninye ati nyapsine. Allah arye nyapsukba, ‘Allah el dam im deice binamabe’ tenen, diba tenenyap touk, anggun yuk mutuku ton ululum ninye, aning atonun diba tenelulume. Aning ati ara, anggun kanye tenen ning nirya ara, Yesus deiceuk deipmunce, eltibuk diba tenenamlume. Yesus elti, diba tenebuka eluk talibuka unyabe. Yesus ara, Allah arye tukwak ninye lyena ati, el pia kai teleb yupu laka nyana ati, deiyok kouna deiyoknye ulule. Nun ap, Allah ap, neika una ati, ansinilina deiyoknye Yesus usulule. Yesus ati diba tenebibirye, el yupu laka nyalbanyabe.

² Allah arye Musa ati, wipdeibukba, Musa arye Allah el ‘Na’ tenen ninye, Israel ninye sik melina ati, pil batakna kumce, apil nirya teleb ubuka pil dolamuk. Ara, Allah arye Musa ati, ‘Apil donamnile,’ tenyamuk touk, pil dolamuk. Aning atonun, Allah arye Yesus ati, ‘Apil donamnile,’ tenyamuk touk, Yesus babye pia teleb ubuka pil dolamuk. Ara, tonok ning babye batakna kum arye, elti, wipdeibuknye Allah arye, tenyamuk touk pil teleb ubuka dolamuk.

³ Ura, tonok aik dona deiyoknye birye aik doptopura, yuk nang arye, anyaik ati mitik mambul tenepnamak bukni, anyaik domika deiyoknye biti ara, ‘Se, anyaik dona deiyoknye bira, weik mambulnye,’ tenepnamake. Aning atonun, Musa ara mitik mambulnye ulul bukni, Yesus bira, weik mambulnye ulule.

⁴ Aning ara, talye ati kum nyapsine. Deiyok ani. Ara, yata aik do nirya, aik don nang arye donyake. Bukni, aning-aning nirya ara, Allah el pil dobuka deice arye, aning-aning nirya kwepdeibuk.

⁵ Minop talak Musa arye, Allah el mapu nirya melina ati, batakna kum arye, teleb ubuka pil dolamukce, aminyan talak Allah arye nyamuk ning ati, Musa arye ton nyalamuk. Winibuka Allah el amu tam ulamukce, el piluk dolamuka anya arye, Musa ara, Allah el pil melinanye, pia teleb ulamuk.

⁶ Musa ara, Allah el pil melinanye ulamuk bukni, Yesus Kristus ara, talye pil melinanye kume. El Yesus ara, Allah el mi kopropa ulirye, Allah el mapu nirya ati, anggun weik deiyoknye usulule. Apil dona babye, Kristus arye batakna kum, pia teleb ubuka dolule. Ura, Allah el mapu nyapmasina ara, nunti nyapsine. Ara, nun diba tenenyap nang arye, ilil una pia kum arye, ‘Allah dipkoprop lyesulule’ tenen, diba tenebuka kanye teniltona kum arye, pia talibuka ubibyopura, ‘Allah el mapu dipkoprop unyabe,’ teneptibye. Allah arye dipkoprop lyepnamsil ati, el laka teleb yupu, ninye lyen yupu teleb asa arye, kanye deibuka peterenyabe.

‘Diba kum tenebicak’ tenen, wenena ap, laka nyana ap ati, nyabuk yupu

⁷ Ati, Allah el mapu dipkoprop una ati ara, Allah El Dib Kanye arye nyapdeibukba, Mazmur noutamak sekamik yupu ton tenenamlume. Ayupu ara ani. Arup ara, na Allah arye yukubsiniba, na yupu kekepnumunyopura, anggun apu yapu winilamik touk winina meme. Ara, lik upsiliba, pi dobuka, ‘Kum kekenamabe,’ tenebuka, kum unamlulume.

⁸ Minop talak anggun apu yapu ara, lik ubukba, Allah nati, ‘Nun like,’ tenyamnikce bataknike. Sik winilamik touk kum wininamlulume. Atalak ara, anggun apu yapu arye, Mesir mutuku batakuka, ninye una kum ap, mok pia kum celamuk ak ap abalamikba, sikti, asin ning atonun winilelamse. Asilamse talak noutamak arye, sikce nati lik ubukba, ‘Allah ara, nun like,’ tenebuka bataklamnike.

⁹ Anggun apu yapu malye winilamika deice arye, yanilamnikce, nati pia asilelamnikbuk, keting tamun 40 deice arye wenelamse ning ara, elilamikce kel biklamik.

¹⁰ Anggun apu yapu arye winibuka ulamikba, sirye talak ulamik ninye nirya ati, yu ulamnukba, nyapse. “Kume, anggun talima noutamak ara, na yupu ap, na wininye ning ap kum ululba, pia yuk bisikuk kirikuka banyake,” nyapse. Narye, “Wininamlulume,” nyabuka, peterelamse ning nirya ara, moubuka bita kel kum bikinyake. “Dipkoprop teleb bisik ani,” nyabuka peterelamse ning ara, kum dobolbanyake.

¹¹ Winibuka malye weik winilamika ati, narye sirya talak ulamik ninye ati, yu weik ulamnukce atalak noutamak ara, ayupu ton nyapse. “Atalak malye winin ninye nirya ara, narye sik ap, na ap dikdik sena ati, kintinipdeipsi mutuku ara, sik pia kum dolonamake,” nyapse. Allah arye, Israel ninye ati nyabuk. (Mazmur 95:7-11)

¹² Anyapmasin yupu aubuka anya arye, na weitcapu atonun ninyeo, anggun babye, anggun bidamang ati, pia moubuka kalekelanamlulume. Ara, ‘Nun kan-kan tonoknye do, tonok kil do, sik kanye talima noutamak ara, malye winin ning weik upliba, diba kum tenekirye, Pia Kam Una Deiyoknye Allah ati, urasin tamubuka yukak bicak’ tenen, moubuka kalekelanamlulume.

¹³ Allah ati, ‘Nun like’ tenen, urasin tamubuka kum bataknamlum bukni, teleb ning ara, nyapnusine. Atalak-atalak nirya, nunce, ‘Asum ani’ tenen, tuba nyaptibye talak noutamak nirya ara, talima kwa dibuka melilanamlulume. Ara, talye ati kume. Ara, anggun talima noutamak malye un ning tuba aupmalya arye, anggun talima tam usilya deice arye, malye un ninguk talibuka winipmunyak tenena ati nyapsine. Tonda, anggunce, amalye winin ning ati, ‘Deiyok ara, dauplye. Aning ara, malye kume, tenepmunyak’ tenen, nyapsine. Winibuka tenemunyopura, aminyan ara, utenepmunya deice arye, ‘Pi dobuka malye winibibyak’ tenen, anggun nirya arye talima kwa dipdanuka melipdamunce, kalekelanamlulume. Malye winin ning nirya ara, tilila ninguk ulula ati, aning talibuka umunyopura, anggun talima kat kipdeipnamsile. ‘Winipmunyak’ tenen, anggunce anggun bidamang ati, kalekelanamlulume nyapsine.

¹⁴ Amambul yupu ton nyapnusine. Nunce Allah ati, winiryuk diba tenebupu talak ara, kanye bokoltona kum arye, mikip arye diba tenebupu touk, tuba-tuba diba tenepra balamibya ani, dorsirya talak babye, batakna kum arye, Allah eluk moubuka talibibirye, tuba diba tenenamabe. Winibuka winibibyopura, wini talak babye, aminyan talak babye, Kristus ap, talima dukdongobuka neika unamabe. Bukni, kanye boktopsilyeba, Allah ati batakipyopura, Yesus Kristus ap, neika kum unamabe.

¹⁵ Ati, arup nyapmasin touk, Mazmur sekamik yupu ton tenenamlume. Ayupu ara ani. ‘Asum ara, na Allah arye yukubsiniba, na yupu kekepnumunyopura, lik upsilyeba, pi dobuka, ‘Kum kekenamabe,’ tenebuka, kum wininamlulume. Minop talak anggun apu yapu ara, lik ubukba, na Allah ati, ‘Nun like,’ tenebuka bataklamnike. Anggun apu yapu malye winilamik touk, anggun wini talak diba tenelulum ninye arye, aning ton kum wininamlulume.’ (Mazmur 95:7-8)

¹⁶ Ura, ayupu ton nyapnusine. Arup nyapmasin yupu noutamak ara, kum kekelamikce, ‘Allah nun like,’ tenebuka Allah ati, bataklamik ninye ara, ‘Yata ninye do?’ tenena kume. Sikda, Mesir mutuku noutamak arye batakuka, Musa menekuka balamukba, el urasin tam balamik ninye, Israel yala ninye nirya ati nyapsine. Mesir mutuku arye batakuka, Musa menekuka balamukba, el amenyan tam balamik talak noutamak ara, abalamik ninye ara, Allah ati lik ubukba, elti, yanilamik.

¹⁷ Aning atonun, Allah arye, ‘Aninye ati, keting tamun yupa weik 40 deice arye yu ulamnukba, bataklamse,’ nyabuk ninye ara, ‘Yata ninye do?’ tenena kume. Aninye ara, Israel ninye kan-kan arye, malye-malye winilamikce, ninye kumak, mok pia kum celamuk ak noutamak balamikce, dipnin balamik. Yuk ninye ati kum nyapsine.

¹⁸ Tonda, Allah arye, “Na mikip arye nyapsine, Aning ara, na ap dikdik sena ati, kintineipsise mutuku ara, pia kum dolonamake,” nyalilamuk ning ara, ‘Yata ninye ati, ayupu nyabuk do?’ tenena kume. Ara, el yupu ati, diba tenena kum arye, yaniltalmik ninye ati nyabuke. Yuk ninye ati kume. Allah el yupu yaniltalamikce, kekebuka kum dobolbalamik ninye ati, yu ubukba batakuke.

¹⁹ Aning ati ara, nun kel biktibye ning ara, laka akunum upsile. Allah arye dikdik senak ati, teleb mutuku kintinibukak ara, aubuk bukni, sik amutuku kum wekmanto ulamik ning ara, diba kum tenyamika deice arye, ateleb mutuku kum wekmanto ulamik. Yuk deiyok ati kume.