Ibrani 12 - Eipomek

Allah arye, el mapu kopropa nirya ati, ‘Telebuk wininamak do, kum do?’ tenen, asilesilirye, wenebuka peteresulule

¹ Aning ati ara, na kayapo, sik minop talak ulamikce, diba tenebuka diksukumuk ulamik ninye, wini nyapmasin ninye ara, dana-dana tam nirya, yupa weik aunyakce, nunti dinauk usinyake. Disinyaka ati ara, Allah arye, ‘Winibuka diksukum bisikuk banamak’ tenyamsuk touk, ikin upsilya babye, batakna kum, pia pi dobuka, abisik deiceuk mikip arye banamabe. Sik biklamak nang arye, ‘Ikin upnilyak’ tenen, talye ning nirya batakuka, tonok bisikuk mikip arye bik-bik abuka balamak touk, nun babye atonun, ‘Ikin upsilyak’ tenen, talye winin ning nirya batakibirye, Allah tenepsuk bisikuk binamabe. Aning atonun, weik mambul ning ara, malye ning patasilya deice, kanam asa arye tapu koulongona atonun ulamsil ning nirya batakibirye, Allah tenyamsuk bisikuk binamabe.

² Nun diba tenenyap ning deiyok kouna ap, ansinibuka sirya dakna ap, deiyoknye Yesus ati, diba tenebuka talibibirye, pia tenenauk unamabe. Yesus ara, ‘Allah arye nati erepdeipnilirye, pia teleb ulinamnile’ tenenauk ulamuka anya arye, ‘Se, wanwanun yo deice ninye onyaka ara, alye una asa opnamaka ara, na like,’ kum tenebuke. Kum tenebukce, wanwanun yo deice obik talak ara, uk weik dinmokce, ikin weik unmoka babye, kum batakuke. Aminyan talak, kam bukuka im deice biyukce, Allah el weik Ninye Deiyoknye bunak, sirik taruk tam bulbiyuk. Yesus arye, ‘Allah el taruk sirik tam bulbinamna ara, pia telebe,’ tenyamukce, aninguk tenebuka deice arye, kanye deibukce, ‘Wanwanun yo deice opnamniyaka ara, na like anya arye, bataknamne’ tenen, pia kum tenelamuk.

³ ‘Tuba imun ning usiliba, mikip ara, mitang asa ubuka, imun kanye bobibirye, talima bouku sukulamsil talak ara batakipyak’ tenen, ati ara, Yesus winilamuk ning ati, pia tenenauk unamlulume. Diba tenena kum, pia malye winin nang arye, Yesus yanibuka el nong deice ikin ning weik delilamik bukni, Yesus ara, pia batakna kum arye, pi dobuka mikip arye ulamuk.

⁴ Malye winin ninye arye anggunti, ‘Malye kipnuyabe’ tenen, pirilesinyak talak noutamak arye, anggun nong bol deiceuk osinyak bukni, anggun ining min kum pananmasiliba, kum dibilulume. Ati, ikin usilya babye, batakna kume.

⁵ Tonda, Allah arye anggunti, ‘Na mapu, sik talima kwa dinamne’ tenen, nyapdeiyamsuk yupu ara, akunum luba kiplum do? Allah yupu noutamak aupsuk yupu ara, asukum deipsine. Na mapu, Allah asilesilirye, wenebuka peteresulula ara, ‘Dawaplye’ tenena kume. Allah arye, “Winina meme,” nyabuka wenepsilyopura, ‘Se’ tenen, talima bouku sukuna meme.’

⁶ Aning ara, talye ati kum nyapne. Deiyok ara, Allah arye bico tenebuka, el kanye delilul ninye nirya ati ara, ‘Teleb wininamak do, kum do?’ tenen, asilesilirye, wenebuka peteresulula ati nyapsine. Tonda, Allah arye, ‘Na mi ani’ tenen, dololulnye biti ara, malye upliba, wenebuka ikin ning arilule. (Amsal 3:11-12)

⁷ Ura, yatanye birye, el mi kopropa ati, kum wenebuka peterelul do? Kume, nun ni yapu nirya arye, ‘Wininamlulume, aning ara, kum wininamlulume,’ nyabuka, peterena ap, wenena ap usinyake. Ati, kanye imun ning usilye talak nirya, ‘Ara asilena ap, wenebuka peterena ap, ati unmasile,’ tenepmunce, batakna kum, pia pi dobuka, batakna kumce, pia talibuka unamlulume. Ikin usilye talak noutamak ara, Allah arye nunti, ‘Na mapu,’ tenesilirye, melisulule.

⁸ Nun ni yapu arye nun nirya ati, ‘Malye winin ning batakikirye, telebuk unamak’ tenen, asilesikirye, wenebuka peteresinyake. Winisinyaka anya arye, kum wenebuka peterepsetingtoura, yuk nang arye nunti, ‘Amapu ara, sik ni yapu arye deiyamik mapu kopropa kume. Sikda, talye nang arye neika mabikba, deibik mapu atia,’ tenepsitinge.

⁹ Aninguk kum bukni, nun nirya ara, nun ni yapu arye wenebuka peterelamsikba, kekelamubu. Winibuka winilamsik ning ati, nun ni yapu ati, si erebuka kanye delilamubu. Nun tam ninye ati, mitik anun arye si erelamubu bukni, nun Ni Kopropa Allah arye, nun kanye talima ap, dib kanye ap, kam ulisululnye ati ara, adiparyuk weika arye si erebuka, el amu tam bukeipyopura, kam pia unamabe.

¹⁰ Nun ni yapu kopropa arye, ‘Aning teleb,’ tenyamsik touk, wenebuka peterelamsik bukni, nun Ni Kopropa Allah arye, ‘Na mapu pia teleb kilinamne’ tenen, asilesilirye, wenebuka peteresulule. Winisilya ara, talye ati kume. Ara, ‘Na malye ning tonok babye kum upniliba, pia diksukumuk unye touk, na mapu babye atonun neika unamak’ tenen, wenebuka peteresulule.

¹¹ Ura, asilen ning ap, wenena ap, peterena ap usinyak talak noutamak ara, kanye deibuka kum unyabe. ‘Se, na ikin unulule’ tenen, engenauk unyabe. Bukni, ikin kanye bobuka, wa wibikiba, aminyan talak aning-aning weik, nong upliba, teleb kanye bobuka, weika arye lilamak touk, winilena ap, wenena ap, peterena ap usiliba, adeice arye moubuka kekekirye, kel kinyak ninye ara, aminyan talak kanye deibuka, diksukumuk unyakce, yuk nang nirya ap, teleb ubuka neikauk unamake.

¹² Aning ati ara, dikdik upsilirye, uk disilye taruk ap, gutamuk disululce lyulamsil ning ap, mikip kililanamlulume. Kanye teniltona kum arye, batakana kumce, pia talibuka unamlulume.

¹³ ‘Anggun nirya mikip arye diksukumuk unamlum’ tenen, domon yupu deice arye nyapnusine. Ara, ‘Sik teleb bisik talye luparabuka binamak’ tenen, anggun bisik ara, tuku palibuka teleb kipdeipmunyopura, sik yok mitik anun arye kwanyamle ninye ara, weik arye kum kwanipnamle bukni, kwetepmunyeba, lipsisikikirye yum uplyopura, diksukumuk banamake. Ati, Allah arye asilesilirye, wenebuka peteresilye talak nirya ara, melipdamunce, diksukumuk unamlulume.

Allah ati, batakikce ninye ara, Allah arye aminyan talak, weik arye wenebuka opnamle ati, nyabuk yupu

¹⁴ Ura, na kayapo. Anggun nirya arye, ‘Yuk ninye nirya ap, kanye deibuka neika ubibirye, malye winina ap, olana ap, yupu deice walana ap, aning nirya pia kum diparyuk, diksukumuk unamap’ tenen, pia pi dobuka, pirilenamlulume. Malye winina ning nirya, kum batakikirye, diksukumuk kum unyak ninye ara, nun Weik Deiyoknye Allah, el ap neika ansinibuka kum unamake.

¹⁵ Tonda, atalak noutamak nirya ara, anggun nirya arye, anggun neika ululum ninye ati, moubuka kalekelanamlulume. Ara, Allah arye nun lyena ati, bico tenesilirye, el kanye aniryuk talye melisilye ning akunum kekebuka kel kinyak bukni, lik upliba, ‘Dawaplye, tenebuka, batakicak’ tenen, moubuka kalekelanamlulume. Tonda, ‘Allah arye bataksilyak’ tenen, ton nang malye winibikiba, yuk nang weik yu upliba, adeice arye ninye weika arye tonap tabakuka, malye kanye bobuka malye winibikirye, ‘Sik nirya malye winipdeipdacak’ tenen, pia moubuka kalekelanamlulume. Ara, urdem ati kum nyapsine. Ton tam nang arye, yu weik upliba, yuk tam nang ton, aning eibuka kekebicopura, ninye weikia arye tonap, yu upliba, ‘Sik nirya malye winibicak’ tenen, nyapsine. ‘Winipsilyak’ tenen, moubuka kalekelanamlulume.

¹⁶ Aning atonun, anggun kan-kan noutamak ton ninye arye, ‘Ubula talye-talye neika mabicak’ tenen, moubuka kalekelanamlulume. Tonda, minop ulamuknye Esau birye, ‘Allah el ulul ning ap, diksukum un ning ap ara, mambul kume,’ tenyamukce, malye ulamuk touk, anggun kan-kan noutamak yuk nang ton tenebikirye, ‘Malye winibicak’ tenen, moubuka kalekelanamlulume. Esau bira, ‘Allah el ulul ning ara, mambul kume,’ tenyamuk. Winibuka tenyamuka anya arye, elda minyuma du mi ulamuka ati, el li birye talyamuk ning nirya dopromtu bukni, tonok sum deice aryuk el din patabukba, el weit kopropa Yakup dinmok ning dekuka doprobuka deice arye, el talipmanto ning nirya dekukba, el weit kopropa doprobuk.

¹⁷ Ura, anggun kele, Esau birye, el talyamtu ning nirya akunum dekukba, el weit kopropauk, doprobuk bukni, aminyan talak ara, Esau el kanye tamubukce, ‘Se, na ni talyamuk ning arepnutuba, naryuk doproptinye’ tenen, patabukba morobuk bukni, el li birye batakuk. Esau birye, “Se naio, aning arepnutume,” nyabuka, weik arye engebuka moronauk unmok bukni, el li kopropa, el kanye kum tamubuka ati, pia batakuk.

¹⁸ Na kayapo, sik minop talak ulamik ninye, Israel ninye winilamik touk, wini talak ululum ninye kum winilulume. Sik minop talak ulamik Israel ninye ara, ninye taruk arye talipmanto mutuku dam yayik bukni, amutuku Sinai mutuku deice ara, weik uku dilamuk. Tonda, amutuku deice ara, pia kunukna ap, mok piriripna ap, bebea lakna ap, liman ap, mok weik ap winilamuk.

¹⁹ Tonda, amutuku deiceuk weik bilkong nyana, el si ara, terompet weik lelim nyabuk. Tonda, weik ninye yupu atonun yupu, weik mambul yupu nyabukba, ayupu kekelamik ninye arye, engebuka moronmek. “Se, yupu tonap dukdongobuka kum nyanamsilyame. Nun kanye imun weik unmasile,” nyabukabikce, engebuka morolamikce, ilil weik ulamuk.

²⁰ Aning morobika deiyok ara ani. Aweik yupu arye nyabuk. ‘Amutuku ara, pia memak anya arye, sal do, kilapu do? Ura, talye kam ulul ning babye, yata ning do nirya, amutuku dam yakirye, amutuku tuku yanibikcopura, sik yuk ninye nirya arye, adiparyuk keil cobuka anang, sik nong deice cobuka onamlulume, nyabuk.’ (Keluaran 19:12-13)

²¹ Winilamikba, amutuku uamuk ning nirya ara, pia mambul ulamukba, sik kisok kwisi mek bongobukba, ilil weik ubuk. Musa babye aning nirya eibukce nyabuk. ‘Se, na ilil weik upmanila ati, na nong nirya sirim talipmanile,’ nyabuk. (Ulangan 9:19)

²² Ura, na kayapo. Sik minop talak ulamik Israel ninye, asing eipmanto ning dam yangalamik bukni, anggun wini talak ululum ninye ara, pia yuk nang dam yanmalume. Anggunda, Sion mutuku, Pia Kam Una Deiyoknye Allah, el ulul mutuku, im deice Yerusalem asik dam yanganmalume. Anggunda, weik yupa weik kum nukmanto, im deice pil don nang teleb kanye deibuka, malaikat beribu-ribuan bulubuka, weklamak dam yanganmalume.

²³ Anggunda, Allah arye, ‘Aninye ara, mambule. Anggunda, na mapu kopropa unamak’ tenen, minyuma talak akunum wipdeiyamuk ninye dam yanganmalume. Aninye ara, Allah el Mi Kopropa Yesus arye talilule. Allah arye aninye sik si sekuka im deice akunum deiyamuk. Ura, ninye im sirya, mutuku sirya nirya ati, ‘Teleb ning ani, malye ning ani,’ nyabuka, yupu lipsisikuka bokeipnamsil Deiyoknye Allah, el dam yanganmalume. Tonda, diksukum ulamik ninye delilamikba, Allah arye sik dib kanye dobuka, akunum pia ansinibuka, teleb updeibukba, sik unyakak dam yanganmalume.

²⁴ Tonda, Allah danatam, ninye danatam, noutamak ansinilina deiyoknye, Yesus el un dam yanganmalume. Ninye lyena ati, Allah arye, “Winipnamsine,” nyabuka nyalilamsuk yupu, winiryuk ning ara, Yesus ara, ayupu ati ansinilina deiyoknye usulule. ‘Allah ap, ninye tukwak ninye ap, teleb ubuka neika unamak’ tenen, ansinibuka delisulul deiyoknye ara, Yesus uka. Minop talak ulamuknye Habel arye, Allah el si erena ati, kam ning obuka, ining likdeibuk ning ara, mitik telebuk winibuk bukni, Yesus arye nun lyena ati, el ining sakukce biyuk ning ara, pia mambul weik ulule.

²⁵ Na kayapo, anggun kan-kan bukni, ton ninye arye, wini talak mambul yupu nyasilinye ati, ‘Nun like’ tenen, el ap, el nyasilye yupu ap, ati batakuka, ‘Kum kekebicak’ tenen, moubuka kalekelanamlulume. Ura, teneipdelulume. Minop talak ara, sik deiyoknye, talye tukwaknye birye, “Winina meme. Anggun kanye mouplulume,” nyalamukba, sik kum kekelamik ninye ara, kum lyepdanmanto ulamikba, Allah arye sik kum kekelamik ninye wenebuka oltakalamuk. Wini talak ara, im deice ululnye birye, nun nirya ati, “Winina meme. Anggun kanye mouplulume,” nyabuka wenesulula anya arye, sik minop talak ulamik ninye kum lyepdanmanto ulamika ati, wini talak arye mambul yupu nyasilinye batakipyopura, nun yata wiriptibya deice arye, lyepdatibye do? Kume, aning ara, kum winipmanto. Wini talak im deice arye nyasilinye batakipyopura, dipkoprop Allah arye aninye wenebuka oplopnamle. Aning ara, kum namin kipnamle.

²⁶ Minop talak ara, Allah el yupu weik arye nyabukba, tukwak mutuku nirya lulukuk. Bukni, wini talak ara, elcuk akunum nyapsile. “Tonok talak tonap, talye tukwak mutuku kum bukni, tukwak mutuku im sirya, mutuku sirya nirya ap, im deice ulul ning nirya ap, tonap pia weika arye luluknamnarya.” Allah arye nyabuka nyalin yupu akunum nyapdeisuke.

²⁷ Elce, “Tonok talak tonap,” nyapsuk deice arye kel bikinyabe. Ara, lulukmanto ning nirya ara, elce kwepdeibuk ning nirya ara, aminyan talak kum kipdeiplyopura, aning ara, kum lulukmanto ning uk, winiryuk kwepdeipnamle ning ara, pia aunamle.

²⁸ Aning ati ara, na kayapo, Allah arye nun diba tenenyap ninye talibuka, weik Ninye Deiyoknye unamsila nirya ap, elce arisiliba, talibuka unamap ning nirya ap ara, luluktuba, kum kum uptua anya arye, nun nirya arye Allah ati tuba-tuba, “Telebe,” nyabuka unamabe. Tonda, Allah arye, ‘Aning telebe,’ tenesilye touk, ‘Se, Allah ara weik mambule’ tenen, elti, ilil usiliba, el siuk pia erenamabe. Nun ni Allah ati, ‘Telebe,’ nyabuka, el siuk erebibyopura, Allah arye nunti kanye delinamsile. ‘Allah ati, ilil unamsile,’ nyapmasin yupu ara, talye ati kum nyapsine.

²⁹ Nun Ni Kopropa Allah ara, weik uku ina ibikiceba, aning-aning nirya diplirye, kum ulamle touk, elda aning atonun ululnye birye, malye winin ning nirya ati, yu upliba, kum daneipnamle anya arye, ‘Elda mambule’ tenen, ilil usilirye, el siuk erenamabe.