Ibrani 11 - Eipomek

“Minop talak ulamik ninye ara, Allah ati weik arye diba tenelamik,” nyabuk yupu

¹ Ura, diba tenena ara, laka nyapnusine. Ara nunda, ‘Allah arye wininamsile’ tenen, kintinibuka dinauk unyap ning nirya ap, tonda asing arye min kum elinyap bukni, ‘Allah arye wininamle,’ tenenyap ning ap ati, nunce Allah ati, diba tenebibya deice arye, kanye bokoltona kum arye, ‘Dipkoprop unamsile’ tenenauk unyabe.

² Nun apu yapu arye Allah ati, weik arye diba tenenlamikba, Allah arye sikti, kanye deiyamuka deice arye, teleb updeiyamukce, ‘Anang ara, na dokola ninye unamak,’ tenebuke.

³ Ura, Allah arye el yupu uk nyabukce, adiparyuk aning-aning yala-yala nirya kwepdeibuk. Ara, nun asing arye elinyap ning nirya memebuka delina ning ati ara, asing eipmanto ning dobuka, aning deice arye kum kwepdeibuk. Aning kum bukni, el yupu nyabuka mikip diparyuk, aning-aning nirya kwepdeibukba, anyapmok touk kikliman kibuk. Aning nirya ara, diba tenenyaba deice arye, kekebuka kel kinyabe.

⁴ Tonda, Allah si erena ati, Kain bira mitik teleb ning dobuka yanuka aribuk bukni, Habel arye aning ati, diba tenebuka deice arye, pia teleb ning bobuka yayukce, Allah ati aribuk. Aribukba, aminyan talak Allah arye, Habel aribuk ning ati, yupu nyabuk talak ara, “Na diba tenepnukce, na si erena ati, arepnuk ning ara pia telebe. Ati, Habel ara diksukumnye akunum deipne,” nyapdeibuk. Allah arye Habel ati, diksukum updeibuk ning ara, Habel diba tenebuka deice arye, winibuk. Tonda, Habel akunum diyamuk bukni, weik arye diba tenelamuka anya arye, ‘Habel birye diba tenyamuk touk, nun babye wininamabe,’ tenen ati, Habel ara, winipmantonye Winisulula ati, el diba tenyamuk ning ara, nun tuba tenebuka kel kinyabe.

⁵ Ura, Henok ara, pia teleb kibuka, diksukumuk ulamukba, Allah arye elti, “Henok bira, pia telebuk ulula anya arye, elti, na kanye deipne,” nyabuk. Allah arye Henok biti nyabuk ning ati ara, Henok kum dibuk. Min kum dibuk bukni, tuba kamuk ulamuk talak danoutam ara, Allah arye Henok dobuka, im deice bobiyuk. Allah arye Henok dobuka bobiyuka ati, akunum tunim abukba, atalak ulamik ninye arye, ‘Elda dan do, el nong eiptibye’ tenen, eibreyik bukni, kum eibik. Allah arye Henok dobuka, im deice bobiyuk deiyok ara, Henok weik arye diba tenelamuka deice aryuk, Allah arye elti, kamuk dobuka, im deice bobiyuk.

⁶ Yata ninye do nirya, ‘Allah el si erebuka, el mapu unamap’ tenen, patalul ninye nirya ara, adiparyuk, ‘Allah dipkoprop ulule’ tenen, minyuma diba tenepnamake. Diba tenebikirye, ‘Allah el si erena ati, pia pi dobuka winilamiceba, ‘Allah arye menenga ning arenamle’ tenen, kanye bokoltona kum diparyuk, diba tenenamake. Aning ati ara, yata ninye do nirya, Allah ati dipkoprop diba kum tenebikcopura, Allah arye sikti, kanye kum delinamle.

⁷ Ura, Nuh arye Allah ati, diba tenelamuka anya arye, Allah arye, “Ninye kum elilamik ning bukni, mok weika arye cepliba, weik mekwen deipnamla anya arye, tukwak ninye nirya opnamsina ati, kanye mouplulume,” nyapdeibukba, Nuh kekebukce, elda, ‘Allah weik mambule,’ tenyamuknye anya arye, ilil ubuk. Ilil ubukba, ‘Na mapu silip nirya lyepnamsil’ tenen, weik mek liya yo kintinibukce, amek liya yo deice, weik aik ton dobuka kintinipdeibuk. Awinibuka deiyok ara, Allah ati, weik arye diba tenelamuka deice arye winibuk. Nuh bira diba tenyamuk bukni, atalak sik malye winilamik ninye ara, aning nirya kum kekebuka, diba kum tenyamik. Sikce ayupu batakikba, Allah arye aninye nirya wenebuka oplobukce, sirya dakuk. Allah arye ninye teleb ulina ati, lipsisikuka delisilya ara, diba tenenyaba deice aryuk teleb kilisulule. Aning atonun, Nuh diba tenebuka deice arye, Nuh babye doprobukba, Allah arye, Nuh biti, diksukumuk kibuka teleb kipdeibuke.

Abraham arye Allah ati, diba tenelamuk ning ati, nyabuk yupu

⁸ Ura, minop talak Allah arye Abraham ati, “Auminye mutuku batakuka, na arepnamkin mutuku binamlyame,” nyabuka, yukubukba, Abraham kekebukce biyuk. Elda, ‘Na binamne mutuku anye’ tenen, moubuka kum tenebuk bukni, el diba tenelamuka deice aryuk kekebukce adiparyuk biyuk.

⁹ Biyuk ning ara, el diba tenelamuka deice arye, ninye asik nang arye, yuk karin mutuku binuka, tia talak ati, talye baju tenda aik tia dobuka, mapra balamak atonun ulamuk. Allah arye, “Amutuku arepnamkine,” nyabuka nyalilamuk mutuku, Abraham bira, amutuku binuka wekukce, ninye asik nang arye winilamak touk, ulamuka ani, aminyan ara nun apu yapu Isak ap, Yakup ap atonun winilamrik. Allah arye, Abraham ati “Amutuku arepnamkine,” nyabuka nyalilamuk touk, sik bitinye nang babye ati, ayupu atonun nyalilamuk.

¹⁰ Abraham arye utenebuka dinauk ulamuk. ‘Kume, aminyan talak, na pia unamne mutuku ara, Allah elcuk dopnamle. Allah arye, ‘Winibuka dopnamne,’ teneplirye, aik dona deiyoknye ulule. Aweik aik aruma noutamak ara, tuku palibuka apum noutamak keil deibikirye, anyaik ayukumna yo akeil deice ikuka deibikirye, anyaik nirya dobikiba, pia aunamle. Anyaik ara, tia aik kume. Allah arye dolul aik nirya ara, pia aunamle.’ Abraham arye utenebuka dinauk ulamuk.

¹¹ Tonda, Abraham el diba tenelamuka deice arye, aning ton winibuk. Ara, elce domuk kil Sara ara, you kil ulamuka ani, el Abraham babye, mi kum deipmantonye wisi akunum dayuk. Winibuka ulamrik bukni, Allah arye, “An mi deipnamlam,” nyabuka, nyalin yupu nyapdeibukba, Abraham kekebukce, diba tenebuke. Ara, ‘Kume, Allah el yupu nyalul touk aninguk unamle’ tenen, diba tenebuka ati, Allah arye Abraham ap, Sara ap ati, melyamukba, el mi deibuk.

¹² Aning ati ara, Abraham bira tonoknye, wisi deibukba, mi kum deipmantonye ulamuk bukni, el diba tenelamuka deice arye, Allah melyamukba, elce ami deibukba, dadeipdanin yangalamika ani, deiamik mapu ara, kum nukmanto unyake. Ara, im deice ulul kurya kum nukmanto ulul atonun, el mapu ara, pia weik unyake. Tonda, laut mekwen kup-kup ak keil wenenga kum nukmanto ulamle touk, el mapu ara, pia weik unyake.

¹³ Ura, anyapmasin ninye nirya ara, pia diba tenenauk ulamik ani, aminyan talak diamik. Allah arye, “Wininamsine, winibuka aning arenamsine,” nyabuka, sikti, nyalilamuk ning ara, min kum areamukba, kum dolamik. Nong kum dolamik bukni, ‘Kume, Allah arye nyalilamsuk ning ara, dipkoprop arenamsile’ tenen, kanye deibuka peratoto arye, kintinibuka dinauk ulamik. Tonda, sikce nyalamik. “Kume, nunda, yuk pera mutuku ninye, asik nang atonun kibuka unyabe. Nunda, tukwak mutuku unyap bukni, asukum ara nun mutuku kopropa kume,” nyalamik.

¹⁴ Ayupu atonun yupu nyabikce nang ara, nyabica deice arye laka peteresinyake. Sik bidamang mutuku kopropa ati, kintinibuka dinauk unyake, sikce, ‘Talya tukwak mutuku ara, nun mutuku kopropa,’ tenebuka kum unyake.

¹⁵ Sik min arye ulamik bukni, bataklamik mutuku ati, tuba pataptuba, tenelamtingtoura, dipkoprop lik uptuba, sik min arye batakamik mutuku, akunum tamubuka binamtinge.

¹⁶ Bukni, aning ara pia kum winilamikbuk, ‘Nunda pia teleb mutuku, im deice mutuku binuka unamap’ tenen, weika arye patalamukba, kintinibuka dinauk ulamik. Aning ati ara, Allah arye aninye ati, pia teleb weik asik akunum kintinibuka ati, alye una kum diparyuk, “Aninye ara, na mapu kopropa unyake. Nara, sik Ni Kopropa Allah unune,” nyalule.

¹⁷ Ura, Abraham bira, el mi Isak tonok ulamuk bukni, Allah arye Abraham ati, asilen ning aribuk talak ara, “An mi opnulyame,” nyabukba, Abraham weik arye diba tenebuka deice arye, ‘Allah si erena ati, Isak obuka Allah arepnune’ tenen, Abraham akunum kintinipdeibuk.

^18-19 Minop talak ara, Allah arye Abraham ati, nyalilamuk. “Ance Isak deipminba, Isak birye deipliba, dadeipdanin, banamak mapu nirya ara, nyanamake. ‘Nun apu kopropa Abraham arye Isak deibukba, el Isak tam nang arye deipsike,’ nyanamake,” Allah arye nyabuk. Ayupu nyalilamuk touk, Abraham arye Isak akunum deibukba, el mi tonok dem ulamuk. Allah arye, Abraham ati, asipdeyuk talak ara, Abraham arye utenebuk. ‘Kume, na mi Isak tonok dem ulul bukni, Allah arye akunum diamik ninye dobuka, tamubuka kam bukeipmantonye ulula anya arye, na ikin kume. Na mi opnyopura, diptua babye, Allah arye ami tamubuka kam bukdeipnamlarya,’ tenebuke. Ura, atalak ara, Abraham arye Isak kum obuk bukni, Abraham arye Isak ati, ‘Opnun’ tenen, kintinibukce, opmanto ubuka anya arye, mitik winipmanto ning ati ara, Isak akunum opmatuba, Allah arye kam bukdeiptua atonun winibuk.

²⁰ Ura, Isak arye Allah ati, diba tenelamuka deice arye, el mapu Yakup ap, Esau ap ati, ‘Kume, aminyan talak unamle ning ati, Allah arye telebuk ulinamsile’ tenen, “Allah arye teleb updeipnamsile,” nyabuka, teleb yupu nyabukce, sik deice deibuk.

²¹ Aning atonun, Yakup el dipnuyuk talak arye, Allah ati, diba tenelamuka deice arye, el deibuk mi Yusuf, elce deibuk mapu ati, ‘Allah arye amapu ati, teleb ulinamle’ tenen, teleb yupu nyabuka, sik deice deibuk. Ayupu nyabuk talak ara, el kama arye baribuka, kanupdongobuka Allah el si erebuk.

²² Aning atonun, Yusuf arye Allah ati, diba tenelamuka deice arye, el dipnuyuk talak dam ubukura, aminyan winipnamuk ning ati laka nyabuk. Ara, Allah arye sik Israel ninye ati, Mesir mutuku noutamak, tapu koubuka talyamika noutamak arye, lobuka yukak bobinamuk ning ati, laka nyabuk. Tonda nyabuk, “Israel ninye Mesir mutuku batakuka binumunye talak ara, na yok bulubuka, Kanaan mutuku bobuka weipnamnululume,” nyapdeibuk. Anirya ara, el diba tenyamuka deice arye nyabuk.

Musa arye Allah ati, diba tenelamuk ning ati, nyabuk yupu

²³ Tonda, Musa el li ap, el lin ap, sikce Allah ati, diba tenyamrika deice arye, winiprik. Mesir mutuku talibuka weik ninye deiyoknye Firaun arye, “Sal mapu nirya oploplulume,” nyabuk bukni, sik ilil kum arye, ‘Kume, nun mi ara, talye mi kume’ tenen, akunum deiprikce, ami bobuka, wala winilye deice arye duknyamrik.

²⁴ Aning atonun, Musa akunum nebukopura, Allah ati diba tenyamuka deice arye, winibuk. “Nara, ‘Firaun el kilmu arye deibuk mi,’ tenebuka kum nyanamniyake,” nyalamuk.

²⁵ ‘Teleb ning ara, Mesir mutuku nang arye, Allah el na tenen ninye, Israel ninye nirya ati, ikin ning sik nong deice delilamak touk, na nong deice delina babye telebuka. Malye wininyak ninye arye kanye deibuka, malye-malye wininyak ning ara, tia talak ati, na ap winiptibye bukni, aning ara teleb kum ati, kum wininamne,’ tenyamuk.

²⁶ Tonda, utenyamuk. ‘Kume, Mesir mutuku uamuk ning, dekna pia weik ning nirya taliptinya babye, mitik teleb uptinye bukni, Allah arye ninye lyena ati, dopdeipnamsilnye, Kristus ati diba tenepniba, Mesir mutuku nang arye ikin ning, na nong deice deipnicopura, aning ara weik telebe. ‘Pia teleb ning ara, aninguka,’ tenyamuk. Aning tenyamuka deiyok ara, ‘Allah arye aminyan talak menenga ati, arepnamnil ning dopropnamne,’ tenelamukce, diba tenyamuka ati winilamuk.

²⁷ Tonda Musa arye, Allah ati diba tenelamuka deice arye, ‘Mesir mutuku weik ninye deiyoknye Firaun arye derepnilyak’ tenen, ilil asa arye, Mesir mutuku batakuka, yukak biyuk. Talye ninye asing arye kum eipmantonye Allah ati, Musa arye eibuka anya arye, ikin ning weik el nong deice deiyamikba, ikin ulamuka babye, pia kum bataklamuk.

²⁸ Musa diba tenyamuka deice arye, sik Israel ninye arye, Kaplina ati Kwalina pil dolamik ning ara, kum bataklamuk. Tonda, kam ning obuka, ining likuka buplan dana-dana delilamik ning ara, Musa el babye kum bataklamuk. Aining likibuk ning ara talye ati kume. Ara, Allah arye Mesir mutuku ulamik ninye, sik minyuma mapu opnuyuk talak, ‘Ninye Ona Deiyok malaikat arye, Israel ninye nun minyuma mapu ton kum opnusil’ tenen, winibuk.

²⁹ Tonda, aning atonun, Israel ninye Mesir mutuku batakuka, mek kum ati, ninye kum ulamik mutuku noutamak balamika ani, Ining Bi Laut Mekwen kup-kup ak biyik. Amekwen ara, koubuka kum binmanto ak bukni, sik Israel ninye diba tenebika deice arye, Ining bi Laut mekwen noutamak wilibukba, tuku mikuka deice yanibuka biyik. Sik biyik bukni, Mesir mutuku ninye arye, ‘Nun babye atuku mikuka deice talye luparabuka bitibye’ tenen, piripdeyik bukni, amekwen dana-danarye langdibukabukce, Mesir mutuku yin talina nang nirya obuka sirya dakuk.

³⁰ Ura, aminyan yuk talak ara, Yeriko mutuku asik dana-dana tam nirya, weik cang keil poka wibuka domik bukni, Israel ninye diba tenebika deice arye, like tekbarye deice arye warikuka antanapdongobikba, Yeriko keil poka domik ning lokukabukce, Yeriko mutuku ninye obuk.

³¹ Israel ninye arye, Yeriko mutuku nang opnuyik talak ara, Israel ninye arye, ‘Yeriko ninye opnuyap’ tenen, ninye ton bitinye nang dopreibikba, maka meil birik. Sik maka meil birik talak ara, tonok kil el si ara, Rahab arye, ninye talye yoltan kil ulamuk bukni, el diba tenebuka deice arye, ‘Na mutuku nang arye amaka melyanmarak nang obicak’ tenen, amaka meil binmarik nang ati, “Telebe,” nyabuka, melibuka duknupdeibuka anya arye, weik keil poka lokukabukce, sik diba’ tenena kum ninye, Yeriko ninye obuk bukni, akil tonok Rahab bira kum obuk.

³² Ura, na kayapo, yata yupu tonap dukdongobuka nyapsitinye do? Lo tonap kum upmanila anya arye, Gideon ap, Barak ap, Simson ap, Yepta ap, Daud ap, Samuel ap, Allah el yupu laka nyalamik nang, nabi nang ap, yuk diba tenelamik nang nirya, winilamik ning nirya kum laka nyapsitinye.

³³ Aning-aning nirya, sikce Allah ati, diba tenelamika deice arye, mutuku-mutuku weik talyamika weik ninye deiyok nang obuka sirya daklamikce, atalilamik mutuku nirya noutamak arye, diksukumuk weik deiyok nang kililamik. Allah arye anang nirya ati, nyalilamuk ning areamukba, dololamik. Tonda, weik yu kuse arye, ‘Anang dipnul’ tenen, piripdeyuk bukni, ayu kuse sik si kangkanya darapmoka ati, kum dipmanto ubik.

³⁴ Tonda, weik uku buk dilamuk bukni, sikce tangapdongobikba, kum dibuke. Ton talak ara, yu nang arye, parang ya arye, ‘Aninye opnamak’ tenen, pirilamik bukni, bik-bik abuka balolamika ati, kum olamik. Sik Israel ninye mikip ara, mitang asa ulamik bukni, Allah el mikip arye aninye melyamukba, mikip weik ulamik. Mutuku-mutuku nirya olalamik talak ara, sik mikip weik ulamikce, yuk mutuku yin talin nang nirya ati, olbisilamik.

³⁵ Ton talak ara, kilapu sik mapu do, sik akanye yapu do, akunum diplamik bukni, Allah arye tamubuka aninye kam bukeipnaba, sik kilapu dam tamubuka yangalamik. Ton diba tenelamik ninye ara, yu nang arye dobuka, ‘Sik diba tenenyak ning nirya bataknamak’ tenen, kama dobuka sik nong deice kulalamikce, pia ikin ning weik sik nong deice delilamik. Winilamik bukni, sik diba tenena nang arye, “Se, lopdongopsululume,” nyabuka kum morolamik. Sik anang arye Allah ati, diba tenebuka kum bataklamika deiyok ara, ani. Ara sikce, ‘Kume, diba tenenyapnye Allah ati batakipyopura, ayu nang arye lopdongopsiting bukni, ara malyeuka. Oplopsicopura, aminyan ara, nun Ni Kopropa Allah arye, tamubuka kam bukeipsiliba, pia kam unamabe. Pia teleb ning ara, aninguka ati, anang arye opsica babye mambul kume. “Lopdongopsululume,” nyabuka kum moropnuyabe,’ tenenlamikba, sik yu nang arye aninye olamik.

³⁶ Malye nang arye, yuk diba tenelamik ninye ati, winilamik. Anang ati, nalibuka akutulamik. Ton nang ara, dobukapnarye, kama arye sik balye tam weika arye kulalamik. Ton nang dobuka, tapu koubukapnarye, wenena aik pum dongolamik.

³⁷ Ton nang ara, yuk nang arye keil dobuka, sik nong deice cobuka olamikba, diplamik. Ton nang ara, gergaji dobuka, sik nong noutamak sekeltaklamik. Ton nang ara, parang ya arye sekuka olamik. Adiba tenelamik ninye, tuba kam ulamik talak ara, pia bona utotoa kum ninye ulamik. Sik baju kopropa kum ati, domba bol ap, kambing bol ap, wibuka ongolamik. Aning-aning nirya kum talyamika anya arye, se tenenauk ulamukba, malye nang arye, ‘Sik diba tenena ninye ara, nun like’ tenen, ikin ning weik sik nong deice delilamik.

³⁸ Sik diba tenelamik ninye ara, sik teleb aik kopropa kum ati, talye balamikce, ninye kum ulamikak, mok kum celamuk ak ap, talye bai mutuku noutamak, yo kan-kan ap, keil deiya ap, tuku palina pum bisik ap, wekuka malamik. Aninye nirya ara, pia teleb ninye, mambul weik ninye ulamika anya arye, teleb ning ara, talye diba tenena kum ninye, malye wininyak ninye ap, ansinibuka, tonok mutuku neika kum ulamtinge. Bukni, tukwak mutuku tonok ati, yata ulamting do, kume.

³⁹ Minop talak diba tenelamik ninye nirya ati ara, Allah arye, “Aninye ara, sik diba tenenyak ning ara, pia telebe. Na kanye deipsine,” nyapdeiyamuk bukni, Allah arye aninye ati, “Aning arenamsine,” nyalilamuk ning nirya ara, min kum dopropnaryuk dibilamik.

⁴⁰ Deiyok ara, Allah arye nun nirya ati, pia teleb ning tenyamsuke. Ara, ‘Min arye ulamik ninye ap, wini talak unyak ninye ap, neika diksukumuk kipnirye, na Allah ap talima dukdongobuka, pia ansinibuka telebuk kilinamsine,’ tenyamsuke. ‘Neikauk dolonamake,’ tenebuka anya arye, minop talak ulamik ninye ap, nun wini talak unyap ninye ap, kintinipsuk ning ara, neikauk arenamsile. Allah arye nun ap, sik ap neika diksukumuk kipdeipnamsile.